Qari mill-Ewwel Ittra ta’
San Pawl Appostlu
lill-Korintin
1, Kor 12, 12-14,27-31a
Ħuti, bħalma l-ġisem hu wieħed u fih ħafna membri u l-membri kollha tal-ġisem, għad li huma ħafna, jagħmlu ġisem wieħed,
hekk ukoll Kristu. Għax aħna wkoll, lkoll
tgħammidna fi Spirtu wieħed biex nagħmlu ġisem wieħed,
sew Lhud sew Griegi sew ilsiera sew ħielsa, u lkoll xrobna minn Spirtu wieħed.
Issa l-ġisem m'huwiex membru wieħed, imma magħmul minn ħafna membri.
Intom il-ġisem ta' Kristu, u kull wieħed minnkom membru tiegħu. Lil xi wħud Alla qegħedhom fil-Knisja fl-ewwel post bħala appostli,
it-tieni bħala profeti,
it-tielet bħala għalliema.
Imbagħad id-don tal-mirakli, imbagħad id-don tal-fejqan,
l-għajnuna, it-treġija, u
d-don ta' ilsna diversi.
Jaqaw ilkoll appostli?
Ilkoll profeti?
Ilkoll għalliema?
Ilkoll bid-don tal-mirakli?
Ilkoll għandhom id-don
tal-fejqan?
Ilkoll jitkellmu bl-ilsna?
Ilkoll ifissru?
Intom ħabirku għal doni ogħla.
Il-Kelma tal-Mulej
R:/ Irroddu ħajr lil Alla
R:/ Aħna l-poplu tiegħu u n-nagħaġ tal-mergħa tiegħu
Salm Responsorjali
Għajtu bil-ferħ lill-Mulej,
nies kollha tal-art,
aqdu bil-ferħ lill-Mulej,
idħlu quddiemu b'għana ferrieħi.
R:/ Aħna l-poplu tiegħu u n-nagħaġ tal-mergħa tiegħu
Kunu afu li Jaħweh hu Alla,
hu ħalaqna, u aħna tiegħu, aħna l-poplu tiegħu u
n-nagħaġ tal-mergħa tiegħu.
R:/ Aħna l-poplu tiegħu u n-nagħaġ tal-mergħa tiegħu
Idħlu b'għana ta' ħajr
mill-bibien tiegħu,
bit-tifħir fil-btieħi
tat-tempju tiegħu;
roddulu ħajr u bierku ismu!
R:/ Aħna l-poplu tiegħu u n-nagħaġ tal-mergħa tiegħu
Hallelujah, Hallelujah
Profeta kbir qam fostna,
u, Alla żar il-poplu
tiegħu.
Hallelujah, Hallelujah
Qari mill-Evanġelju skont
San Luqa
Lq 7, 11-17
R:/ Glorja lilek Mulej
F’dak iż-żmien, Ġesù, mar f'belt jisimha Najn, u marru miegħu d-dixxipli tiegħu u kotra kbira ta' nies.
Kif wasal qrib il-bieb
tal-belt, kienu qegħdin iġorru wieħed mejjet li ommu, mara armla, ma kellhiex ħliefu;
u magħha kien hemm għadd ġmielu ta' nies mill-belt.
Kif raha l-Mulej tħassarha u qalilha:
“Tibkix!,”
Resaq, u mess it-tebut.
Dawk li kienu qegħdin jerfgħuh waqfu. U hu qal:
“Żagħżugħ, qiegħed ngħidlek, qum!”
U l-mejjet qam bilqiegħda u
beda jitkellem. U Ġesù tah lil ommu. In-nies kollha tkexkxu bil-biża', u bdew jagħtu glorja lil Alla u jgħidu:
“Profeta kbir qam fostna!” u:
“Alla żar il-poplu tiegħu.”
U dan il-kliem li qalu xtered mal-Lhudija u dawk
l-inħawi kollha.
Il-Kelma tal-Mulej
R:/ Tifħir lilek Kristu