1.

Pujilah Tuhan si Badia

Puji perbahanenNa si mbisa.

Embus suling, terompet

Cawir ban sorana

Puji Tuhan si Mada k’rina tinepa

2.

Suraklah o doni kerina

Rende muliakenlah gelarNa

Bujur perbahanenNa

La pedas merawa

Puji Tuhanta ibas lias ateNa

3.

O tendingku puji Dibata

Alu dem keriahen pujilah

Kerina si erkesah

Ia si madasa

Puji Tuhan si Mada k’rina tinepa

1.

Perpulungen ersadalah,

Ngikutken PedahNa.

Bas kiniteken tetaplah,

Man Tuhan Dibata.

Bas si mehuli ayaklah,

Sisampat-sampaten.

Bage kap pedah Dibata,

Sikeleng-kelengen.

2.

Gereja Kristen sikaplah,

Ersada paguhlah.

Ersada ukur min i bas,

Dibata Bapanta.

Peturah kiniteken pe,

Ras dame k’rinalah.

Ras sikeleng-kelengenlah,

Ngikutken Tuhanta.

Lit.

O Tuhan Dibata, Bapa si erkeleng ate man kami, terpujilah gelarNdu sabab mbelin kiniulinNdu maler man kami. ItepaNdu doni alu serta, dem alu kiniulin, janah kerina tinepaNdu nggeluh alu dame. O Tuhan Jesus, ipuji kami Kam, sabab Kam enggo maba perdamen ku doni enda. O Kesah si Badia, kataken kami bujur sabab enggo iajari ras ipengasupNdu kami erdame. Terpujilah Kam seh rasa lalap, Amin

1.

Nusur min o, Kesah Tuhan

Bengket ku ukurku e

Maka Kata sini suan

Turah janah ‘rbuah pe

Kam ibas Dibata nari

Pekena ukurku min

Pasu-pasu pendahin

Maka aku genduari

Ndaram tuah si tetap

Alu ate si tetap

2.

Kam benana kegeluhen

Kam si mahan ukur t’rang

Kam si jadi persuruhen

Maka kerajan menang

Maka perpulungen kari

Tutus ngikut Yesus kap

Janah IA peserap

Ibas dosa doni nari

Jadi dungna me bage

Bagi Kam badia pe

Lit.

Jesus Kristus enggo mperdameken...

... isi pusuhta, kuga nge kininggitenta erkorban i bas ndalanken perdamen?

Perp.

O Tuhan, ngaku kami maka metahat denga akap kami erkorban ndalanken perdamen, seh maka kegeluhen kami la jumpa kejuah-juahen. O Tuhan alemilah kami.

1.

O Bapa, salah lepakku ku ’teh nge.

Dosangku pe rusur kuinget

Man baNdu aku erdosa

​

Reff. Mekuah ateNdu min

erkiteken liasNdu

SasapkenNdu min

k’rina dosangku o Tuhan.

2.

O Bapa, kubahan rusur si jahat

Patut nge aku i ukumNdu

Bujur nge keputusenNdu

​

Reff. Mekuah ateNdu min

erkiteken liasNdu

SasapkenNdu min

k’rina dosangku o Tuhan.

3.

O Bapa, geluhku dem alu dosa

Ibas bertin nari pe aku

Enggo ikuasai dosa

​

Reff. Mekuah ateNdu min

erkiteken liasNdu

SasapkenNdu min

k’rina dosangku o Tuhan.

Lit.

:

Bagi dauhna Timur i Barat nari, bage me ipedauhNa dosa-dosanta i bas kita nari. Bagi keleng ate bapa man anak-anakna, bage kal me pengkelengi Dibata kalak si erkemalangen man baNa.

(Masmur 103 : 12-13)

1.

Anem dosangku mekelat megara

IsalihkenNdu me jadi mbentar

Kam kap erbanca geluh meherga

Kugejap tuhu kelengNdu simpar

Reff. Tendingku ersurak janah nembah

Kupakeken me pedah

Kam kap Dibata Bapa Si Perkuah

Bas kep-kepenNdu min aku gelah

2.

Ukur pinter ras bujur nge pindoNdu

Pusuh si getem ngena ateNdu

Demi pusuhku alu liasNdu

Gelah ku pembarken min kataNdu

Reff. Tendingku ersurak janah nembah

Kupakeken me pedah

Kam kap Dibata Bapa Si Perkuah

Bas kep-kepenNdu min aku gelah

3.

Sedekah aku nggeluh ibas terang

Ukur meriah pusuh pe salang

Baban si mberat jadi menahang

B’reNdu pengapul dame ras senang

Reff. Tendingku ersurak janah nembah

Kupakeken me pedah

Kam kap Dibata Bapa Si Perkuah

Bas kep-kepenNdu min aku gelah

5.

Nembeh ate TUHAN man kerina kalak si meganjang rukur, janah la IpelepasNa ia pulah i bas ukumen nari.

6.

Kalak si tutus dingen tek nandangi Dibata ndatken pengalemen, kalak si patuh man TUHAN la jadi si jahat man bana.

Lit.

​

:

Ketuahen kalak si megiken Kata Dibata, dingen simakekenca ibas geluhna si tep-tep wari, Haleluya.

Perp.

:

(iendeken)

Ha le lu ya, Ha le lu ya, Ha le lu … ya.

7.

Kune meriah ukur TUHAN ibahanndu, imbang-imbangndu IbahanNa jadi temanndu.

8.

Tuhu-tuhu tedeh kal ateku nandangi kam kerina alu keleng ate si rehna i bas Jesus Kristus nari. Dibata saksingku maka kai si kukataken enda la bual.

9.

Pertotonku kerna kam eme: Ertoto aku man Dibata gelah ertambahna min keleng atendu janah rikut ras pemeteh si tuhu-tuhu ras pengangkan si serta,

10.

gelah ietehndu milihsa apai si mehulina. Alu bage bersih kam pagi dingen la erpandangen i bas warina Kristus reh pedua kaliken guna ngadili kerina manusia.

11.

Geluhndu pagi itambahi alu biak si tuhu-tuhu mehuli. Si enda Jesus Kristus ngenca ngasup njadikenca, eme guna muji dingen pehagaken Dibata.

12.

O senina-senina, gelah ietehndu, maka kai si nggo jadi man bangku erbahanca reh mbarna Berita Si Mehuli e.

13.

Seh maka kerina si erjaga i bas istana bage pe kerina kalak si ringan i jenda meteh maka aku ipenjaraken erdandanken aku suruh-suruhen Kristus.

14.

Janah erdandanken aku ipenjaraken e, senina-senina si sada kiniteken teremen reh tekna man Tuhan, seh maka katawari pe reh pangna ia meritaken Berita Si Mehuli e.

15.

Tuhu lit piga-piga kalak si meritaken Kristus erdandanken cian ate ntah erdandanken ia kalak perubat-rubat, tapi si debanna meritakenca arah ukurna ersuruh.

16.

Si e idalankenna erpalasken keleng ate, sabap ietehna maka nggo ibereken Dibata man bangku dahin guna mpertahanken Berita Si Mehuli e.

17.

Kalak si deban, labo arah ukurna ersuruh mberitaken Berita Si Mehuli e, tapi erkiteken rangapna nge. Iakapna reh suhsahna kuakap ibahanna asum aku i penjara.

18.

Labo dalih! Meriah nge ukurku subuk mehuli ntah la gia mehuli sura-surana, gelah Kristus e iberitaken asa bancina. Tetap nge meriah ukurku,

Lit.

:

Sabab Kristus e kap si ndameken kita, alu njadiken si dua pihak e jadi sada. Kristus jine alu dareh dagingNa enggo ngeruntuhken tembok si nirangken bangsa-bangsa e dingen si erbahanca ia tetap ermusuhen. (Epesus 2 : 14)

Lit.

Dibata enggo mereken perdamen man bandu, enda me si jadi tugas ras tanggungjababndu selaku anak si enggo iperdameken Dibata ras diriNa

Perp.

Aku erpadan Tuhan, ngergaken perdamen si enggo kualoken i bas Kam nari.

Lit.

Dibata ndilo kam maba perdamen ku kerina temanndu manusia

Perp.

Aku erpadan nggit erdame ras temanku manusia janah tetap ngelakoken si mehuli gelah teridah perdamen i tengah-tengah kegeluhen

1.

Perkuah ate si mbelin,

Nemani geluhku.

Ije me aku erdalin,

Teruh perkuahNdu.

2.

Perkuah ate si mbelin,

Sinasap dosa e.

PedahNa e sigelem min,

Lah kita la bene.

3.

Perkuah ate si mbelin,

Tetap la erleka.

Ban dosa aku gelap kin,

Ras Yesus terang ka.

“Dibata si mada perkuah ate, si enggo nenahkan kam ku kemulianNa si rasa lalap i bas Kristus, njadiken kam serta, megegeh dingen paguh. IA nge si mada Kuasa seh rasa lalap” Amin.

​

Perp. : A....min, A.......min, A......min