Qari mill-Ktieb
ta’ Koħèlet
Koħ 11, 9 – 12, 8
Thenna, o żagħżugħ,
fir-rebbiegħa ta’ ħajtek,
u ħa tkun ferħana qalbek f’jiem żgħożitek.
Imxi wara t-taħbit ta’ qalbek, u wara l-għaxqa ta’ għajnejk.
Iżda kun af li ta’ dan kollu jitolbok kont Alla fil-ħaqq tiegħu.
Ħarrab ukoll minn moħħok it-tħassib, u żomm il-ħsara
’l bogħod minn ġismek; għax it-tfulija u
ż-żgħożija buffura riħ.
Ftakar f’min ħalqek f’jiem żgħożitek qabel ma jaslu
jiem in-niket, u joqorbu
s-snin li tgħid għalihom:
“Xejn ma jogħġbuni”;
qabel ma jiddallmu x-xemx
u d-dawl, u l-qamar u
l-kwiekeb, u s-sħab jerġa’ jidher wara x-xita;
meta dawk li jgħassu d-dar jibdew jitriegħdu, meta
l-qalbenin jitgħawġu, u jieqfu dawk li jitħnu, għax jonqsu fl-għadd,
u jiddallmu dawk li jħarsu
’l barra mit-tieqa; meta
l-bibien jingħalqu fuq
it-triq, u l-ħoss tal-mitħna jonqos,
u l-għana tal-għasfur jintefa, u kull għana jieqaf; meta kull telgħa tbażża’, u t-triq issir tkexkix,
meta s-siġra tal-lewż tarmi
ż-żahar, u l-ġrad jitqal
fil-mixi; u l-kappara titlef gostha, għax il-bniedem
imur id-dar tiegħu ta’ dejjem,
u l-bekkejja jiġġerrew
mat-toroq; qabel ma l-ħajta tal-fidda tinqata’, u
l-musbieħ tad-deheb jitfarrak;
qabel ma l-ġarra fuq l-għajn tinkiser, u
t-tarjola fuq il-bir tinqasam;
u t-trab jerġa’ jmur fl-art mnejn ġie, u n-nifs tal-ħajja
jitlaq lejn Alla, minn fejn ġie.
O frugħa tal-frugħat, jgħid Koħèlet, kollox frugħa.
Il-Kelma tal-Mulej.
R:/ Irroddu ħajr lil Alla
R:/ Mulej, int kont għalina kenn minn nisel għal nisel
Salm Responsorjali
Int traġġa’ l-bnedmin lejn it-trab,
u tgħidilhom: “Erġgħu lura, intom bnedmin!”
Elf sena huma għalik bħal jum tal-bieraħ li għadda,
jew bħal sahra tal-lejl.
R:/ Mulej, int kont għalina kenn minn nisel għal nisel
Int taħsadhom, u jsiru bħal ħolma.
Huma bħall-ħaxix li jinbet filgħodu;
filgħodu jwarrad u jħaddar,
filgħaxija jidbiel u jinxef.
R:/ Mulej, int kont għalina kenn minn nisel għal nisel
Għalhekk għallimna ngħoddu jiem ħajjitna,
sabiex aħna nimxu
bil-għaqal.
Dur lejna, Mulej! Kemm se ddum?
Ħenn għall-qaddejja tiegħek.
R:/ Mulej, int kont għalina kenn minn nisel għal nisel
Imliena kmieni bit-tieba tiegħek,
biex nifirħu u nithennew ħajjitna kollha.
Ħa tkun fuqna l-grazzja ta’ Alla Sidna!
Wettqilna inti x-xogħol ta’ jdejna,
wettaq, iva, xogħol idejna.
R:/ Mulej, int kont għalina kenn minn nisel għal nisel
Hallelujah, Hallelujah
Is-Salvatur tagħna Kristu Ġesù qered il-mewt,
u dawwal il-ħajja permezz tal-Evanġelju.
Hallelujah, Hallelujah
Qari mill-Evanġelju ta’
San Luqa
Lq 9, 43b-45
R:/ Glorja lilek Mulej
F’dak iż-żmien, waqt li kulħadd kien imnixxef
bil-għaġeb quddiem il-kobor liema bħalu ta’ Alla, Ġesù qal lid-dixxipli tiegħu:
“Iftħu widnejkom sewwa għal dawn il-kelmiet:
Bin il-bniedem għandu jkun mogħti f’idejn
il-bnedmin”.
Iżda huma ma fehmuhx dan il-kliem, u baqa’ mistur għalihom hekk li ma qabdu xejn minnu,
u beżgħu jistaqsuh dwar dak li kien qal.
Il-Kelma tal-Mulej
R:/ Tifħir lilek Kristu