Bidu tal Ittra ta’
San Pawl Appostlu
lill-Filippin
Fil 1, 1-11
Pawlu u Timotju, qaddejja ta’ Kristu Ġesù,
lill-qaddisin kollha fi
Kristu Ġesù,
flimkien mal-isqfijiet tagħhom u d-djakni li jinsabu fil-belt ta’ Filippi.
Il-grazzja lilkom u s-sliem mingħand Alla Missierna u mingħand il-Mulej
Ġesù Kristu!
Niżżi ħajr lil Alla tiegħi kull meta niftakar fikom, u nitlob dejjem ferħan fit-talb tiegħi għalikom,
minħabba s-sehem li intom ħadtu fix-xandir
tal-Evanġelju, mill-ewwel jiem sal-lum.
Jiena żgur minn dan: li dak li beda din l-opra tajba fikom, iwassalha għat-tmiem tagħha sa ma jasal il-jum ta’
Kristu Ġesù.
Ħaġa sewwa li jiena naħseb hekk fikom ilkoll, għaliex jiena nġibkom f’qalbi, lilkom ilkoll,
li qsamtu miegħi l-grazzja li għandi, kemm issa li jien marbut bil-ktajjen, u kemm meta kont niddefendi u nwettaq l-Evanġelju.
Iva, jixhidli Alla kemm jien miġbud lejkom bil-qalb ta’ Kristu Ġesù!
U jien dan nitlob: li
l-imħabba tagħkom tikber u toktor dejjem iżjed bl-għerf u b’kull dehen, biex tistgħu tagħrfu tagħżlu l-aħjar,
u mbagħad tkunu safja u bla ebda ħtija fil-jum ta’ Kristu,
mimlijin bil-frott
tal-ġustizzja li ġejja permezz ta’ Ġesù Kristu, għall-glorja u l-foħrija ta’ Alla.
Il-Kelma tal-Mulej
R:/ Irroddu ħajr lil Alla
R:/ Kbar huma
l-għemejjel tal-Mulej
Salm Responsorjali
Irrodd ħajr lill-Mulej b'qalbi kollha,
fil-laqgħa tat-tajbin flimkien miġbura.
Kbar huma l-għemejjel
tal-Mulej;
ifittxuhom dawk kollha li jitgħaxxqu bihom.
R:/ Kbar huma
l-għemejjel tal-Mulej
Kollu ġmiel u kobor għemil il-Mulej;
għal dejjem tibqa'
l-ġustizzja tiegħu.
Waqqaf tifkira
bl-għeġubijiet tiegħu; twajjeb u ħanin il-Mulej.
R:/ Kbar huma
l-għemejjel tal-Mulej
Hu jagħti l-għajxien lil min jibża' minnu,
jiftakar għal dejjem
fil-patt tiegħu.
Wera lill-poplu tiegħu
l-qawwa ta' għemilu, meta qassam lilhom art
il-ġnus.
R:/ Kbar huma
l-għemejjel tal-Mulej
Hallelujah, Hallelujah
In-nagħaġ tiegħi jisimgħu leħni, jgħid il-Mulej, u jiena nagħrafhom, u huma jimxu warajja.
Hallelujah, Hallelujah
Qari mill-Evanġelju skont
San Luqa
Lq 14, 1-6
R:/ Glorja lilek Mulej
Darba, kien is-Sibt,
u Ġesù daħal għand wieħed mill-kapijiet tal-Fariżej
biex jiekol għandu, u huma qagħdu għajnejhom fih.
U resaq quddiemu wieħed marid bl-ilma.
Ġesù dar fuq l-għorrief
tal-Liġi u lill-Fariżej u qalilhom:
“Jiswa jew le li wieħed
ifejjaq f'jum is-Sibt?”
Huma ma tkellmu xejn
iżda hu qabad lir-raġel,
fejqu u bagħtu.
Imbagħad qalilhom:
“Min minnkom se
jaqagħlu ibnu jew
barri f'ġiebja u għax ikun is-Sibt ma jmurx malajr itellgħu minn hemm?”
U ma kellhomx il-ħila jwiġbuh għal dan.
Il-Kelma tal-Mulej
R:/ Tifħir lilek Kristu