Qari mill-Ktieb tal-
Profeta Hosegħa
Hos 11,1-4.8ċ-9
Dan jgħid il-Mulej:
“Meta kien tfajjel Iżrael ħabbejtu, u mill-Eġittu sejjaħt lil ibni. Imma aktar ma sejjaħtilhom, aktar tbiegħdu minni;
offrew sagrifiċċji lil Bagħalim, u baħħru quddiem l-idoli.
Kont jien li ’l Efrajm għallimtu jimxi, erfajthom fuq dirgħajja, iżd’huma m’għarfux kemm kont
ħadt ħsiebhom!
Bi ħbula ta’ bnedmin jien
ġbidthom, b’rabtiet ta’ mħabba; u kont għalihom bħal min jerfa’ tarbija ma’ ħaddejh,
u lejha mmil nitmagħha. Daret għalija qalbi, tqanqlet bil-bosta ħnienti.
Le, ma nħaddimx il-korla mħeġġa tiegħi; le,
ma nerġax inġib fix-xejn
’l Efrajm, għax Alla jien,
u mhux bniedem,
jien f’nofsok il-Qaddis;
jien ma niġix biex neqred.”
Il-Kelma tal-Mulej
R:/ Irroddu ħajr lil Alla
R:/ Itfa’ fuqna d-dija ta’ wiċċek, u nkunu salvi
Salm Responsorjali
O Ragħaj ta’ Iżrael,
agħti widen,
int li qiegħed fuq
il-kerubini,
qajjem il-qawwa tiegħek,
u ejja ħa ssalvana.
R:/ Itfa’ fuqna d-dija ta’ wiċċek, u nkunu salvi
Erġa’ ejja,
Alla tal-eżerċti;
ħares mis-sema, u ara,
u żur ’l din id-dielja.
Ħu ħsieb dak li ħawlet lemintek,
ir-rimja li int kabbart għalik.
R:/ Itfa’ fuqna d-dija ta’ wiċċek, u nkunu salvi
Hallelujah, Hallelujah
Iż-żmien huwa mitmum,
indmu u emmnu
fl-Evanġelju.
Hallelujah, Hallelujah
Qari mill-Evanġelju skont
San Mattew
Mt 10, 7-15
Glorja lilek Mulej
F’dak iż-żmien, Ġesù qal
lill-appostli tiegħu:
“Intom u sejrin, xandru
u għidu li s-Saltna
tas-Smewwiet waslet.
Fejqu l-morda, qajmu
l-mejtin, fejqu
l-lebbrużi, keċċu x-xjaten.
B’xejn ħadtu, b’xejn agħtu.
Tfittxux li jkollkom flus fuqkom, la tad-deheb, la
tal-fidda u lanqas tar-ram;
u la ħorġa għat-triq, la żewġ ilbiesi, la qrieq u lanqas ħatar, għax il-ħaddiem ħaqqu ħobżu.
Fil-belt jew raħal fejn tidħlu, araw ikunx hemm min jixraqlu tmorru għandu, u ibqgħu f’daru sa ma titilqu minn hemm.
Meta tidħlu f’dar, sellmu
lin-nies tagħha, u jekk tkun dar li jixirqilha,
ħa jiġi fuqha s-sliem tagħkom.
Imma jekk tkun dar li ma jixirqilhiex, ħa jerġa’ lura għandkom is-sliem tagħkom.
Jekk imbagħad xi ħadd ma
jilqagħkomx u ma jismax minn kliemkom,
oħorġu ’l barra minn dik id-dar jew belt u farfru
t-trab ta’ saqajkom.
Tassew, ngħidilkom,
li jum il-ħaqq ikun eħfef
għal Sodoma u Gomorra
milli għal dik il-belt.”.
Il-Kelma tal-Mulej
R:/ Tifħir lilek Kristu