Festa Solenni
tal-Qalb Imqaddsa ta’ Ġesù
Glorja `l Alla fil-għoli
tas-smewwiet, u paċi fl-art lill-bnedmin ta’ rieda tajba.
Infaħħruk,
inberkuk,
nadurawk,
nagħtuk ġieh.
Inroddulek ħajr għall-glorja kbira tiegħek. Mulej Alla, Sultan tas-sema,
Alla Missier li tista’ kollox.
Mulej Iben waħdieni, Ġesù Kristu,
Mulej Alla, Ħaruf ta’ Alla, Bin il-Missier.
Int li tneħħi d-dnubiet
tad-dinja, ħenn għalina.
Int li tneħħi d-dnubiet
tad-dinja, ilqa’ t-talb tagħna.
Int li qiegħed fuq il-lemin tal-Missier, ħenn għalina. Għaliex Int waħdek Qaddis, Int waħdek Mulej,
Int waħdek il-għoli,
Ġesu’ Kristu, ma’ l-Ispirtu
s-Santu:
fil-glorja tal-Missier Alla.
Ammen.
Festa Solenni
tal-Qalb Imqaddsa ta’ Ġesù
Qari mill-Ktieb
tad-Dewteronomju
Dewt 7, 6-11
F’dak iż-żmien Mosè kellem lill-poplu u qal:
“Inti poplu qaddis
għall-Mulej, Alla tiegħek; minn fost il-popli kollha li jinsabu fuq wiċċ l-art,
lilek għażel il-Mulej, Alla tiegħek, biex tkun il-poplu miksub tiegħu.
U l-Mulej tgħaxxaq bikom u għażilkom, mhux għax kontu kbar fil-għadd iżjed minn kull poplu ieħor,
għax intom l-iċken
fil-għadd fost il-popli kollha, iżda l-Mulej għażilkom għax ħabbkom,
u għax ried iżomm il-ħalfa li ħalef lil missirijietkom; kien għalhekk li l-Mulej, b’id qawwija,
ħariġkom u fdiekom minn dar il-jasar, minn id
il-Fargħun, is-sultan
tal-Eġittu. Agħraf, mela, li
l-Mulej, Alla tiegħek, hu Alla;
Alla l-fidil, li jżomm għal elf nisel il-patt u t-tjieba tiegħu ma’ ħbiebu u ma’ dawk li jħarsu l-kmandamenti tiegħu;
imma jitħallas f’wiċċhom stess mill-għedewwa tiegħu billi jeqridhom;
ma joqgħodx jitlajja
mal-għadu tiegħu, imma f’wiċċu jitħallas minnu.
Ħares, mela,
il-kmandamenti u l-liġijiet u d-digrieti li jiena llum
qiegħed nordnalek, biex tagħmel kif jgħidu huma”.
Il-Kelma tal-Mulej
R:/ Irroddu ħajr lil Alla
R:/ It-tjieba tal-Mulej minn dejjem għal dejjem
Salm Responsorjali
Bierek, ruħ tiegħi,
lill-Mulej!
B’qalbi kollha nbierek
l-isem qaddis tiegħu.
Bierek, ruħ tiegħi,
lill-Mulej,
u la tinsiex il-ġid kollu li għamel miegħek.
R:/ It-tjieba tal-Mulej minn dejjem għal dejjem
Hu li jaħfer dnubietek kollha;
ifejjaq il-mard tiegħek kollu;
jifdi lil ħajtek mill-qabar;
iħaddnek bit-tjieba u
bil-ħniena.
R:/ It-tjieba tal-Mulej minn dejjem għal dejjem
Il-Mulej jagħmel is-sewwa,
u l-ħaqq mal-maħqurin kollha.
Hu għarraf lil Mosè l-ħsieb tiegħu,
l-għemejjel tiegħu lil ulied Iżrael.
R:/ It-tjieba tal-Mulej minn dejjem għal dejjem
Ħanin u twajjeb il-Mulej,
idum ma jagħdab u kollu mogħdrija.
Ma mexiex magħna skond ma ħaqqhom ħtijietna;
ma ħallasniex skond ma ħaqqha ħżunitna.
R:/ It-tjieba tal-Mulej minn dejjem għal dejjem
Qari mill-Ewwel Ittra ta’
San Ġwann Appostlu
1 Ġw 4, 7-16
Għeżież, ejjew inħobbu lil xulxin, għax l-imħabba ġejja minn Alla, u kull min iħobb hu mwieled minn Alla u jagħraf lil Alla.
Dak li ma jħobbx ma għarafx lil Alla, għax Alla hu mħabba.
B’dan dehret l-imħabba ta’ Alla fina, għax Alla bagħat lil Ibnu l-waħdieni fid-dinja, biex ngħixu bih.
U hawn qiegħda l-imħabba; mhux għax aħna ħabbejna lil Alla, imma għax ħabbna Hu u bagħat lil Ibnu biex ikun ta’ tpattija għal dnubietna.
Għeżież, jekk Alla ħabbna daqshekk, aħna wkoll għandna nħobbu lil xulxin.
Lil Alla għadu ħadd ma rah, imma jekk inħobbu lil xulxin hu jgħammar fina, u mħabbtu ssib il-milja tagħha fina.
B’hekk nafu li aħna ngħammru fih u Hu fina, għax tana sehem mill-Ispirtu tiegħu.
Aħna rajna, u nagħtu xhieda, li l-Missier bagħat lil Ibnu
s-Salvatur tad-dinja.
Kull min jistqarr li Ġesù hu
l-Iben ta’ Alla, Alla jgħammar fih u hu f’Alla. U aħna għarafna l-imħabba li Alla għandu għalina u emminnieha.
Alla hu mħabba, u min jgħammar fl-imħabba jgħammar f’Alla u Alla fih.
Il-Kelma tal-Mulej
R:/ Irroddu ħajr lil Alla
Hallelujah, Hallelujah
Ħudu fuqkom il-madmad tiegħi u tgħallmu minni, għax jiena ta’ qalb ħelwa u umli.
Hallelujah, Hallelujah
Qari mill-Evanġelju skont San Mattew
Mt 11, 25-30
R:/ Glorja lilek Mulej
F’dak iż-żmien Ġesù qabad u qal:
“Infaħħrek, Missier, Sid is-sema u l-art, għax inti dawn il-ħwejjeġ ħbejthom lil min għandu l-għerf u d-dehen u wrejthom liċ-ċkejknin.
Iva, Missier, għax lilek hekk għoġbok. Kollox kien mogħti lili minn Missieri, u ħadd ma jagħraf lill-Iben jekk mhux il-Missier,
kif ħadd ma jagħraf
lill-Missier jekk mhux
l-Iben u dak li lilu l-Iben irid jgħarrafhulu.
Ejjew għandi, intom ilkoll
li tinsabu mħabbtin u mtaqqlin, u jiena nserraħkom.
Ħudu fuqkom il-madmad tiegħi u tgħallmu minni, għaliex jiena ta’ qalb ħelwa u umli, u intom issibu
l-mistrieħ għal ruħkom.
Għax il-madmad tiegħi ħelu u t-toqol tiegħi ħafif”.
Il-Kelma tal-Mulej
R:/ Tifħir lilek Kristu
Festa Solenni
tal-Qalb Imqaddsa ta’ Ġesù
Jiena nemmen f’Alla wieħed, il-Missier li jista’ kollox, li ħalaq is-sema u
l-art, dak kollu li jidher u dak li ma jidhirx.
U f’Mulej wieħed Ġesù Kristu, Iben waħdieni ta’ Alla,
imnissel mill-Missier
qabel kull żmien.
Alla minn Alla, dawl minn dawl, Alla veru minn Alla veru, imnissel mhux magħmul, natura waħda mal-Missier u bih sar kollox.
Niżel mis-smewwiet għalina
l-bnedmin u għall-fidwa
tagħna. U ħa l-ġisem
bis-setgħa tal-Ispirtu
s-Santu minn Marija Verġni
u sar bniedem. Sallbuh għalina, bata taħt Ponzju Pilatu, miet u difnuh, u
fit-tielet jum qam minn bejn l-imwiet, skont
il-Kotba mqaddsa,
u tela’ s-sema, u qieghed fuq
il-lemin tal-Missier.
U għandu jerġa jiġi
bil-glorja biex jagħmel ħaqq
mill-ħajjin u mill-mejtin, u s-saltna tiegħu ma jkollhiex tmiem. U fl-Ispirtu s-Santu, Mulej li jagħti l-ħajja li ġej mill-Missier u mill-Iben:
li Hu meqjum u mweġġah flimkien mal-Missier u
mal-Iben. Hu li tkellem b’fomm il-profeti.
U fi Knisja waħda, qaddisa, kattolika, appostolika.
Nistqarr magħmudija waħda
għall-maħfra tad-dnubiet.
U nistenna l-qawma
mill-imwiet, u l-ħajja
taż-żmien li ġej. Ammen.
Festa Solenni
tal-Qalb Imqaddsa ta’ Ġesù