1.

Kam kusembah, ulu tuah,

Ajar aku me gelah

Lah nurihi pujin kami

lalap la ‘ngadi-ngadi

Lias ras keleng ateNdu jujurkenNdu man bangku

Nteguh paguh la terundu,

Kuasa ras muliaNdu

2.

Tetap aku daramiNdu

ban tedehNdu man bangku

Suari berngi ijagaiNdu,

mbelin kal kek’lengenNdu

Di reh susah ndumpang aku erlebuh aku baNdu

Minter nusur penampatNdu

erban teneng tendingku

Lit.

:

Enggo icidahken Tuhan perkuah ateNa si la erkerin-kerin, gel-gel nari seh ersundut-sundut

Perp.

:

Igejap kami Tuhan perkuah ateNdu, si enggo gel-gel nari icidahkenNdu. Kam Dibata si la pernah mobah seh rasa lalap.

Lit.

:

Tuhan perkeleng dingen perkuah kap, la pedas IA merawa, janah dem keleng ate si tetap.

Perp.

:

Bujur kap kerina perbahanen Tuhan, i bas kerina si ibahanNa IA dem perkuah ate.

1.

Dibata saja man pujin,

Ersembah ‘rjimpuh kita min,

Ermengkahlah ateta.

Melias m’Ia bujur ka,

La kita itadingkenNa, ‘Di kita mekelesa

Dage teman ersuraklah !

La ‘rsibar kekelengenNa,

IligeniNa kita.

Ibas ende-endenta e

Nggit kita muji Bapa ndai,

LiasNa ras uliNa

Lit.

:

O Tuhan, megati kal kami lupa nandangi kebujuren ras perkuah ateNdu. Megati idarami kami penampat i bas bas doni enda nari. Eme si erbahanca kami erndele ate tupung reh perbeben ku bas kegeluhen kami. Alemilah kami erkiteken kebujuren ras perkuah ateNdu o Tuhan

1.

Ise nge ndia

banci si nampatisa

Latih idoni

ukur gulut mesera

Mari dahi IA

kam si latih ras beraten

Adi ras Yesus

bene me kiniseran

2.

Ku ja nge ndia

perdalanen geluhku

La kap ku jumpa

ingan cio cilinggem

Yesus nge kap ngenca permakan si tuhu-tuhu

Man baNa saja

ngenca kita ernalem

3.

Melala kal

jumpa aku keguluten

Ise kin ndia

banci si mulahisa

Ibas Tuhan Yesus

Ngenca lau kegeluhen

Si banci pesenangken

ukurta k’rina

Lit.

“Marilah kam si latih dingen si beraten, maka Kubereken pengadi-ngadinndu. Tamakenlah pasangenKu ku kudukndu janah erlajarlah i bas Aku. Sabab pasangen si Kubereken man bandu entabeh mabasa, dingen baban si Kutamaken ku babondu menahang kap” (Matius 11 : 28-30)

Lit.

¹I bas beltek nurung e nari ertoto Juna man TUHAN Dibatana nina,

Perp.

²I bas kiniseranku nari kulebuh Kam o TUHAN janah IaloiNdu aku. I bas doni kematen si mbagesna nari nderkuh aku mindo penampat, emaka IbegikenNdu aku.

Lit.

³IsampetkenNdu aku ku tengah lawit si mbagesna i je ikeleweti lau aku, galumbang si ergalun IsuruhNdu namburi aku.

Perp.

⁴Kuakap nggo IbuangkenNdu aku i bas adep-AdepenNdu nari, janah lanai ndigan pe kuidah RumahNdu si badia.

Lit.

⁵Lau si ergalun reh namburi aku, narus mate ibahanna aku. Aku gedap i bas lawit si mbages, janah lumut-lumut ngelilet takalku.

Perp.

⁶Nggo nusur aku ku palas deleng-deleng, ku negeri i ja kerabangenna ieruk seh rasa lalap. Tapi, o TUHAN DibatangKu, IrintakNdu kepe aku i bas ingan si mbages nari maka aku nggeluh ka mulihi.

Lit.

⁷Tupung nandangi keri atena kesahku, i je ertoto aku man BaNdu; emaka IbegikenNdu aku i bas RumahNdu si badia nari.

Lit.

​

:

Ketuahen kalak si megiken Kata Dibata, dingen simakekenca ibas geluhna si tep-tep wari, Haleluya.

Perp.

:

(iendeken)

Ha le lu ya, Ha le lu ya, Ha le lu … ya.

31.

Idilo Jesus ajar-AjarNa si sepulu dua kalak, jenari nina, "Begikenlah! Genduari kita i bas perdalanen ku Jerusalem. I je me pagi jadi kerina si nggo isuratken nabi-nabi kerna Anak Manusia si isuruh Dibata.

32.

Sabap Ia pagi iendesken man kalak si la nandai Dibata. Isaling-saling kalak e pagi Ia, igombang-gombangina janah icidurina.

33.

Iligasina jenari ibunuhna Ia, tapi i bas wari peteluken nggeluh Ia mulihi."

34.

Bage gia labo iangka ajar-ajar kai si ikataken Jesus. La tangkas man bana erti kata e, emaka labo iangkana maksud Jesus.

Lit.

:

O senina-seninangku, nginget perkuah ate Dibata si mbelin si isehkenNa man banta, kupindo man bandu: Endeskenlah kulandu man Dibata saja selaku persembahen si nggeluh rikutken si ngena ateNa. Sabap bage me arusna kam ersembah man Dibata sue ras biakndu selaku mahluk si rukur”. (Roma 12 : 1)

1.

Babalah persembahen si merimna

Ku adep-adepen Dibatanta

Babalah korban pujin si mehaga

Kulebe altarNa si Badia

G’lah tetap i b’reNa pasu-pasuNa

Man k’rina manusia

G’lah tetap b’reNa pasu-pasuNa

Terpuji gelar Tuhan

2.

Babalah persembahen si jilena

Ku rumah Dibata si Perkuah

Babalah korban pujin si merimna

Ku adep-adepen si erkuasa

G’lah tetap b’reNa keleng ateNa

Ras lias ateNa banta

G’lah tetap b’reNa pasu-pasuNa

Segedang-gedang geluhta

3.

‘ndeskenlah persembahenta man baNa

Si nggo nehken kegeluhen banta

‘ndeskenlah lagu pujin si jilena

Jadi persembahen si Badia

G’lah lias ras keleng ateNa

isehkenNa man banta

E maka ernalem ku IA

Malem tuhu ateta

Lit.

Dibata kap Kebujuren si tetap, IA tetap setia i bas Padan si enggo ibelaskenNa.

Perp.

Kucikep padanNdu, i bas kerina kecibal geluhku o Tuhan.

Lit.

Dibata labo nadingken kita i bas perbebenta, IA tetap nampati kam, alu kebujuren ras Perkuah ateNa si tetap. Tetaplah ernalem man baNa.

Perp.

Ateku ernalem man Tuhan saja segedang-gedang geluhku.

1.

Pengasup kami o Tuhan

Gelah pedahNdu banci idalanken

Em kap tendang kami bas kegeluhen

KataNdu si man gelemen

Gelah tangkas kata ras perbahanen

Ban min kami tetap bas kebujuren

SurgaNdu kap perayaken

2.

Temani kami o Tuhan

Bengket ku doni si dem keguluten

SampatiNdu kami lako naluken

Dosa si man sirangenken

E maka ola kal kami tadingken

I bas kami ndalani kegeluhen

G’lah dat kami kemenangen

3.

Kawali kami o Tuhan

Alu gegeh ras kuasaNdu si mbelin

Olangilah kami idur si setan

Si atena encedaken

DameNdu gelah tetap kuarapken

Ban kelengNdu ngenca kap kami atan

Bengket ku bas kesangapen

Turang ras senina, berkatlah dingen tetaplah inget kebujuren ras perkuah ate Dibata si mbelin, dingen alokenlah Pasu-pasuNa:

​

“IA si ngasup ngkawali kita gelah ola celus, emaka ola kita mbiar. IA si ngasup maba kita ngadap ku adep-adepen Dibata si mulia. IA ngenca Dibata si ngkelini kita arah Jesus Kristus Tuhanta, siakuilah kemulianNa, kuasaNa genduari nari seh rasa lalap”. Amin

​

Perp. : A....min, A.......min, A......min

​