Qari mill-Ktieb
tal-Profeta Eżekjel
(Eżek 18, 1-10.13b.30-32)
Ġietni l-kelma tal-Mulej,
u qalli:
“Xi tridu tfissru bih dan
il-proverbju għall-art
ta’ Iżrael:
‘Il-missirijiet kielu
l-għeneb qares u ddarrsu snien uliedhom?’
Daqskemm jien ħaj, oraklu ta’ Sidi l-Mulej,
ma jkollkomx għalfejn
ittennuh iżjed dan
il-proverbju f'Iżrael.
Araw, kulħadd huwa tiegħi; bħall-ħajja tal-missier hekk dik tal-iben tiegħi huma.
Min jagħmel id-dnub, ikun hu li jmut. Jekk wieħed jgħix ħajja sewwa u jagħmel il-ħaqq u s-sewwa,
jiġifieri ma jmurx jiekol fuq il-muntanji, ma jerfax għajnejh lejn l-idoli
tad-dar ta’ Iżrael,
ma jtebbax il-mara ta’ għajru, ma jersaqx lejn mara fl-inġiesa tagħha,
ma jaħqar lil ħadd, irodd lura r-rahan tad-dejn,
ma jisraqx, jagħti ħobżu lil min hu bil-ġuħ, jostor
bl-ilbies lill-għeri, u ma
Jislifx bl-imgħax, ma jiħux interessi,
iżomm idu mill-ħażen, jagħmel il-ħaqq skont
is-sewwa bejn bniedem u ieħor,
iġib ruħu skond
il-kmandamenti tiegħi u jħares id-digrieti
tiegħi biex jagħmel
is-sewwa,
min jagħmel dan kollu huwa ġust, u żgur jgħix,
oraklu ta’ Sidi l-Mulej.
Iżda jekk huwa jiled iben
li jagħtiha għas-serq u għat-tixrid tad-demm,
jaqaw iben bħal dan se
jgħix?
Le, ma jgħix; hu jkun għamel dawn il-ħwejjeġ moqżieża kollha, u żgur imut, demmu jkun fuqu.
Għalhekk lil kull wieħed minnkom niġġudikah skont imġibtu, dar Iżrael,
oraklu tal-Mulej.
Indmu, u erġgħu lura minn dnubietkom kollha,
biex ma jkollkomx xi jwaqqagħkom fil-ħażen.
Biegħdu minnkom
il-ħtijiet kollha li waqajtu fihom, u ġeddu qalbkom u ruħkom.
L-għala tridu tmutu, dar Iżrael? Jiena ma nieħux pjaċir
bil-mewt ta' ħadd!
Oraklu tal-Mulej.
Mela indmu u għixu.”
Il-Kelma tal-Mulej
R:/ Irroddu ħajr lil Alla
R:/ Oħloq fija qalb safja, o Alla
Salm Responsorjali
Oħloq fija qalb safja,
o Alla,
u spirtu qawwi ġedded fija.
La twarrabnix minn quddiemek;
tneħħix minni l-ispirtu qaddis tiegħek.
R:/ Oħloq fija qalb safja, o Alla
Roddli l-hena
tas-salvazzjoni tiegħek,
u bi spirtu qalbieni wettaqni.
Lill-midinbin ngħallem triqatek,
u l-ħatjin lejk jerġgħu lura.
R:/ Oħloq fija qalb safja, o Alla
Għax lilek ma jogħġbokx
is-sagrifiċċju;
noffrilek vittmi maħruqa,
u ma tilqagħhomx.
Is-sagrifiċċju tiegħi, o Alla,
hu l-qalb niedma;
qalb maqsuma u sogħbiena ma twarrabhiex, o Alla.
R:/ Oħloq fija qalb safja, o Alla
Hallelujah, Hallelujah
Infaħħrek, Missier,
Sid is-semma u l-art, għax inti dawn il-ħwejjeġ
tas-saltna wrejthom
liċ-ċkejknin.
Hallelujah, Hallelujah
Qari mill-Evanġelju skont
San Mattew
Mt 19, 13-15
R:/ Glorja lilek Mulej
F’dak iż-żmien, ressqu quddiem Ġesù xi tfal żgħar biex iqiegħed idejh fuqhom u jitlob għalihom.
Iżda d-dixxipli qabdu jgħajjtu magħhom. U Ġesù qalilhom:
“Ħalluhom it-tfal
iż-żgħar jiġu għandi, u la żżommuhomx, għax ta’ min hu bħalhom hija
s-Saltna tas-Smewwiet.”
Imbagħad qiegħed idejh fuqhom u telaq minn hemm.
Il-Kelma tal-Mulej
R:/ Tifħir lilek Kristu