Glorja `l Alla fil-għoli
tas-smewwiet, u paċi fl-art lill-bnedmin ta’ rieda tajba.
Infaħħruk,
inberkuk,
nadurawk,
nagħtuk ġieh.
Inroddulek ħajr
għall-glorja kbira tiegħek. Mulej Alla, Sultan
tas-sema,
Alla Missier li tista’ kollox.
Mulej Iben waħdieni, Ġesù Kristu,
Mulej Alla, Ħaruf ta’ Alla, Bin il-Missier.
Int li tneħħi d-dnubiet
tad-dinja, ħenn għalina.
Int li tneħħi d-dnubiet
tad-dinja, ilqa’ t-talb tagħna.
Int li qiegħed fuq il-lemin tal-Missier, ħenn għalina. Għaliex Int waħdek Qaddis, Int waħdek Mulej,
Int waħdek il-għoli,
Ġesu’ Kristu, ma’ l-Ispirtu
s-Santu:
fil-glorja tal-Missier Alla.
Ammen.
Qari mill-Ktieb
tal-Apokalissi ta’ San Gwann
Apok 21, 9b-14
L-anġlu ġie u jkellimni u qalli:
“Ejja nurik il-Għarusa
mart il-Ħaruf”.
U ħadni fl-ispirtu fuq
muntanja kbira u għolja,
u wrieni l-Belt Qaddisa,
Ġerusalemm, nieżla
mis-sema mingħand Alla,
bis-sebħ ta’ Alla fiha, tiddi bħal ħaġra mill-aktar prezzjuża, bħal ġaspru jleqq daqs il-kristall.
Għandha ħajt kbir u għoli, bi tnax-il bieb fih, u tnax-il Anġlu fil-bibien, li fuqhom hemm miktuba ismijiet, jiġifieri,
l-ismijiet tat-tnax-il tribu ta’ wlied Israel. Tlieta minn dawn il-bibien jagħtu
għan-naħa tal-lvant,
tlieta għan-naħa
tat-tramuntana, tlieta
għan-naħa tan-nofsinhar u tlieta għan-naħa tal-punent.
U l-ħajt tal-Belt għandu tnax-il pedament, li fuqhom hemm it-tnax-il- isem
tat-tnax il-Appostlu
tal-Ħaruf.
Il-Kelma tal-Mulej.
R:/ Irroddu ħajr lil Alla
R:/ Ħbiebek ixandru
l-ġmiel ta’ saltnatek
Salm Responsorjali
Kulma għamilt iroddlok ħajr, Mulej
u ħbiebek iberkuk;
is-sebħ tas-saltna tiegħek ixandru,
fuq is-setgħa tiegħek jitkellmu.
R:/ Ħbiebek ixandru
l-ġmiel ta’ saltnatek
Huma jgħarrfu
lill-bnedmin il-qawwa tiegħek
u l-ġmiel glorjuż
tas-saltna tiegħek.
Saltnatek hi saltna
taż-żminijiet kollha,
u l-ħakma tiegħek minn nisel għal nisel.
R:/ Ħbiebek ixandru
l-ġmiel ta’ saltnatek
Ġust il-Mulej fl-imġiba tiegħu kollha,
twajjeb fl-egħmil tiegħu kollu.
Qrib il-Mulej lejn kull min isejjaħlu,
lejn kull min isejjaħlu
fis-sewwa.
R:/ Ħbiebek ixandru
l-ġmiel ta’ saltnatek
Hallelujah, Hallelujah
Rabbi, int l-Iben ta’ Alla,
inti s-Sultan ta’ Iżrael.
Hallelujah, Hallelujah
Qari mill-Evanġelju skont
San Ġwann
Ġw 1, 45-51
R:/ Glorja lilek Mulej
F’dak iż-żmien: Filippu sab lil Natanael u qallu:
“Sibna lil dak li fuqu kitbu Mosè, fil-Liġi, u l-profeti, Ġesù ta’ Nażaret, bin Ġużeppi”
Qallu Natanael:
“Tista’ toħroġ xi ħaġa tajba minn Nażaret?”
“Ejja u ara”
wieġbu Filippu.
Meta Ġesù ra lil Natanael riesaq lejh, qal:
“Hawn hu Iżraeli li
jistħoqqlu dan l-isem; ma hemm ebda qerq fih.”
Natanael staqsieh:
“Rabbi kif sirt tafni?”
U Ġesù wieġbu:
“Rajtek taħt is-siġra tat-tin
qabel ma kellmek Filippu.”
“Rabbi,”
Qallu Natanael,
“int l-Iben ta’ Alla, inti
s-sultan ta’ Iżrael!”
Ġesù wieġbu:
“Qiegħed temmen għax għidtlek li rajtek taħt
is-siġra tat-tin? Għad tara ħwejjeġ akbar minn dawn.”
U żied igħidlu:
“Fis-sewwa, fis-sewwa ngħidilkom: għad taraw
is-sema miftuħ u l-anġli
ta’Alla niżlin u telgħin
fuq Bin il-bniedem.”
Il-Kelma tal-Mulej
R:/ Tifħir lilek Kristu