1.

Kupuji Kam O Tuhanku

Bas rumahNdu si Badia

Ije teneng kal tendingku

Puji Haleluya

​

2.

Kupuji Kam, O Tuhanku

La terolangi kuasaNdu

Je ukurku reh tetapna

Surak Haleluya

3.

Kupuji Kam O Tuhanku

GegehNdu seh kal mbisaNa

Je tambah kinitekenku

Puji Haleluya

​

1.

Kudahi Kam Tuhan Dibatangku

Kupenangkih totonku man baNdu

Kukataken bujur ermengkah ukurku

Ibas ngaloken perkuah ateNdu

Reff. Nggo tangkas peratenNdu

bas geluhku

Bujur o Bapa nggo malem ateku

2.

Ku puji Kam Tuhan Dibatangku

Alu rende ku puji GelarNdu

Riahna ukurku ibahanNdu Tuhan

‘bas ngaloken keleng ateNdu Tuhan

Reff. Nggo tangkas peratenNdu

bas geluhku

Bujur o Bapa nggo malem ateku

Lit.

:

Nina Pemasmur: “Dibata kap kecion dingen gegehta, lalap IA sikap nampati katawari kita i bas kesusahen. E maka la kita gentar, aminna pe doni mundu-undu, janah deleng-deleng gedap ku teruh lawit; Aminna pe lawit ergelumbang dingen rugup-ugup, dingen deleng-deleng pe kumetter itendengna. (Masmur 46 : 2-4).

Perp.

:

Terpujilah Kam Tuhan i bas keleng ateNdu si engkelini aku.

Lit.

:

IA ngenca singkawali aku dingen engkelini aku, IA penampatku, la ndigan pe aku talu. IA kap Dibata si ngkelini dingen mereken kemulian bangku, Dibata kap gegehku dingen kecionku. (Masmur 62 : 7-8)

Perp.

:

Terpujilah Kam Tuhan i bas keleng ateNdu si engkelini aku.

Lit.

:

Bagi Tuhan megiken penderkuh bangsa Israel i bas perbudaken Mesir janah ...... .......pertoton Hanna, diberu si la mupus, janah arah pertotonna e Dibata mereken Samuel, Imam si Mbelin tubuh arah bertinna. Bageme Dibata ngangkai kuga perbeben geluhta janah Dibata mereken dalan.

Perp.

:

Terpujilah Kam Tuhan i bas keleng ateNdu si engkelini aku.

1.

O, Dibata Kam pengarapanku

Malem kal ateku ibahanNdu

Perban e kupuji Kam Tuhanku

Rasa lalap seh rasa lalap

​

2.

O Tuhan, kam me kap kecionku

Tupung aku ‘bas kiniseranku

Perban e ku puji Kam Tuhanku

Rasa lalap seh rasa lalap

3.

Asum ‘ku ngenanami percuban

Ib’reNa gegeh ras dalan pulah

Perban e ku puji Kam Tuhanku

Rasa lalap seh rasa lalap

​

Lit.

:

Tuhu melala kebiaren i bas ndalani kegeluhen enda. Kebiaren e megati mabai kita ndabuh ku bas perukuren si ndauh i bas Dibata nari. Tempa-tempa perbebenta e gegehen asangken gegeh Dibata, bagi Daud si aru atena sanga iayak-ayak Raja Saul. Bagi kalak Israel si eraru ate sanga iayak-ayak tentera Paro i laut Teberau si erbahanca kalak Israel jungut-jungut man Dibata, lupa ia kerna rencana Dibata janah tempa-tempa Dibata la banci mulahi bangsaNa.

Lit.

:

Megati pe manusia nadingken Dibata jenari erpenalem nandangi kuasa-kuasa doni enda. Talu kita i bas perbeben geluh seh maka lupa kita padan Dibata man banta.

Perp.

:

Ngaku aku O Tuhan, kerna kelangasupen ras kelepakenku. Perbeben geluh si arusna mpebayak kinitekenku, megati enggo naluken aku. Megati kutundalken Kam erkiteken ndarami ingan cio sideban.

Perp.

:

Tuhan sampati aku i bas ernalem man baNdu. Alemilah salah lepakku.

Lit.

:

Mari tole siakuken dosanta arah ende-endenta...

1.

Erlebuh aku o Tuhan

Ibas kesusahenku

Dengkehken min aku erlebuh

Man baNdu o Tuhanku

O Tuhan si erkuasa

Perdiateken aku

O Tuhan si erkuasa

Perdiateken aku

2.

La serta ras la gegehku

Mbiar aru ateku

Bas toto ‘ku reh

Ngendesken pusuhku baNdu Tuhan

O Tuhan si perkuah

Ola tundalken aku

O Tuhan si perkuah

Ola tundalken aku

Perp.

:

O Bapa, megati bera-bera ukur kami maka Kam selaku Bapa kami si megiken perbeben geluh kami. Rusur kami kiam ndarami ingan cicio si lit i bas doni. Iasamken kami me teman-teman kami, kade-kade, erta, kepentaren doni enda jadi penampat i bas geluh kami. Ngaku kami O Tuhan dingen alemilah salah ras dosa kami.

Lit.

:

Marilah kita sekalak-sekalak ertoto i bas pusuhta guna kerina kesalahen-kesalahenta i lebe-lebe Dibata.

Lit.

“La ateKu kam mate i bas dosa; tedeh ateKu kam ngakuken dosa-dosandu, sabab Aku me Tuhan Dibatandu si setia janah erkeleng ate man kalak si ngakuken dosana. Aku me Dibata si megiken pingko-pingkondu, si ngidah perbebendu, si mperdiateken kearun atendu, si mulahi kam i bas kiniseranndu nari, bagi Aku mulahi bangsaKu i bas perbudaken Mesir nari,

Lit.

bage me pe kam Ku pulahi i bas perbudaken dosa nari. Kusasapken salah ras dosandu. Emaka nggeluh lah alu setia iadep-adepenKu, ula mbiar sabab Aku si milih kam, la kam Kutadingken. Ingetlah padanKu man bandu jadi gegehndu.”

1.

Amin dosangku mbue la terkira

Si erban ndauh ras Kam Tuhan

Tapi keleng ateNdu tangkas Tuhan

La tak-takiNdu dosangku

Reff: Bujur man baNdu Tuhan

ban ialemi dosangku

Meriah kel ukurku

Tuhan nasapken dosangku

3.

Pusuhku enggo ip’limbaruiNa

P’raten doni lanai erkuasa

P’rayakenku ndalanken peratenNa

Kesangapen ib’rekenNa

Reff: Bujur man baNdu Tuhan

ban ialemi dosangku

Meriah kel ukurku

Tuhan nasapken dosangku

13.

Anak-anak Jop ras kebayakenna ikernepken

I bas sada wari, asum anak-anak Jop erpesta man-man i bas rumah seninana sintua,

14.

reh sekalak kiam-kiam maba berita man Jop. Nina man Jop, "Asum kami sangana nenggalaken lembu, kalde pe nggagat i bas mbalmbal deherkenca,

15.

rempet reh kalak Seba, iserangna jenari irampasna kerinana. Ibunuhna kerina suruh-suruhenndu, aku ngenca pulah lako meritakenca man bandu."

16.

Ope denga ia dung ngerana, nggo ka seh suruh-suruhen si deban nina, "Biri-biri ras permakanna nggo keri mate idumpang perkas. Aku ngenca pulah lako meritakenca man bandu."

17.

Ope denga ia dung ngerana, reh ka suruh-suruhen si deban nina, "Kami iserang telu terpuk gerombolen kalak Kaldea. Unta-unta irampasna, janah kerina suruh-suruhenndu ibunuhna, aku ngenca pulah lako meritakenca bandu."

18.

Ope denga ia dung ngerana, reh ka suruh-suruhen si deban nina, "Asum anak-anakndu man-man i rumah anakndu sintua,

19.

rempet rembus angin meter i gurun pasir nari. Meruntuh rumah e iembusna, janah mate kerina anakndu ibahanna. Aku ngenca pulah lako meritakenca man bandu."

20.

Kenca bage tedis Jop janah icaingkenna uisna perban cedana atena. Iguntingna buk takalna, kenca bage nembah erjimpuh ia, ayona seh ku taneh.

21.

Nina, "Kadeku pe la lit asum aku tubuh nai, mate pe aku la pedah lit kadeku pe. TUHAN nai si merekenca, genduari nggo ka IbuatNa. Terpujilah GelarNa."

22.

I bas kerina kejadin enda ndai Jop la erdosa, sabap la ia nggit nalahken Dibata.

Lit.

​

:

Ketuahen kalak si megiken Kata Dibata, dingen simakekenca ibas geluhna si tep-tep wari, Hosiana.

Perp.

:

(iendeken)

Ho si a na, Ho si a na, Ho si a … na.

L.

¹²Ujin Dingen Percuban

Ketuahen kalak si megenggeng sanga ibas erbage-bage percuban. Sabap kenca menang i bas percuban e, ialokenna me ulih kemenangenna, e me kegeluhen si nggo ipadanken Dibata man kalak si ngkelengi Dibata.

P.

¹³Adi lit kalak ikenai percuban, ula min nina, "Percuban enda rehna i bas Dibata nari." Sabap Dibata la banci icubai si jahat, janah ise pe labo icubai Dibata.

L.

¹⁴Tapi kalak kena percuban adi ia tergoda jenari kena siding sura-surana si jahat.

P.

¹⁵Janah adi sura-surana si jahat e ipejangjang, tubuh me dosa. Adi dosa e nggo ilakoken, buahna e me kematen.

L.

¹⁶Ula kam tertipu o senina-senina si kukelengi!

P.

¹⁷Kerina pemere si mehuli ras serta rehna i Surga nari; pemere e ipesusur Dibata, si njadiken kerina si ersinalsal i langit. Dibata tetap nge; labo Ia erdauhna i bas kita nari seh maka ItadingkenNa awih-awih si gelap i sekelewetta.

L.

¹⁸Rikutken PeratenNa kita nggo IpekuanakNa arah KataNa si tuhu-tuhu, gelah kita si meganjangna i bas kerina si IjadikenNa.

Lit.

:

Kelengilah Tuhan Dibatandu asa ukurndu, asa tendindu, asa gegehndu lit. (Ulangen 6 : 5)

Lit.

Kita enggo ipilih Dibata jadi anakNa janah enggo i sikapkenNa pe man banta si mehuli si jadi kerajangenta gelah kita ngasup naluken perbeben geluh, janah tetap erpengarapen man Dibata

Perp.

......

Perp.

Ateku tetap ras Tuhan rasa lalap, tetap nggeluh i bas rencana Dibata sienggo isikapkenNa man bangku, aminna pe melala perbebenku, erpadan aku tetap erpengendes man Tuhan

Lit.

Tuhan enggo mereken jaminen man banta maka IA me ingan cicionta si megiken pingko-pingkonta, uga dage ninta?

Perp.

......

Perp.

Tetap aku tek ras alu nteguh kucikep padan Dibata man bangku. Erpadan aku nginget perkuah ate Dibata i bas aku menaken dahinku tep-tep wari. Man Tuhan saja kuendesken perbebenku, janah kuberitaken gelarNa eme Dibata si setia ras si erkeleng ate man bangku arah perbahanenku tep-tep wari.

1.

Adi ras Yesus malem naring pusuhta

IperdiatekenNa me kita ban kelengNa

Amin gia jumpa erbage percuban

La kap itadingkenNa kita isampatiNa

​

Reff. Malem me ate

Je kita pe dat dame

ras keriahen ukur

Bene me kebiaren

tading me keguluten

Mberat jadi menahang

pusuh pe jadi salang

3.

Adi ras Yesus lanai aru ateta

Darami k’rajanNa dalanken singena ‘teNa

IcukupiNa k’rina si perlu banta

Mbelin kap kuasa ras kekelengenNa banta

​

Reff. Malem me ate

Je kita pe dat dame

ras keriahen ukur

Bene me kebiaren

tading me keguluten

Mberat jadi menahang

pusuh pe jadi salang

Laweslah, ersaksilah kita kerna Dibata i bas kerina dampar kegeluhenta, dingen alokenlah pasu-pasuNa :

​

“IA me Dibatanta si enggo milih kita jadi persuruhenNa. Ula mbiar, ipasu-pasuNa kita, ikawalina kita janah ipegegehiNa kita guna ndahiken si ngena ateNa. IA tetap ras kita seh ku kedungen jaman”. Amin

​

Perp. : A....min, A.......min, A......min

​