It-Tlieta
tal-Ħames Ġimgħa
tal-Għid
Qari mill-Ktieb
tal-Atti tal-Appostli
Atti 14, 19-28
F’dak iż-żmien, waslu f’Listra xi Lhud minn Antjokja u minn Ikonju, li rnexxielhom idawru n-nies għal magħhom.
Qabdu jħaġġru lil Pawlu u kaxkruh ’il barra mill-belt, għax ħasbuh mejjet.
Imma xi dixxipli daru miegħu, u hu qam fuq riġlejh u daħal il-belt.
L-għada telaq ma’ Barnaba u mar Derbi.
Huma xandru l-Evanġelju f’dik il-belt u għamlu ħafna dixxipli. Fi triqthom lura, għaddew minn Listra, Ikonju u Antjokja,
jagħmlu l-qalb lid-dixxipli u jħeġġuhom biex jibqgħu
fil-fidi,
‘għaliex, kif kienu jgħidulhom, jeħtiġilna nbatu ħafna biex nidħlu
fis-Saltna ta’ Alla’.
Għamlulhom ukoll presbiteri f’kull Knisja, u bit-talb u s-sawm ħallewhom f’idejn il-Mulej, li fih kienu emmnu.
Imbagħad għaddew minn Pisidja u ġew fil-Pamfilja. Wara li xandru l-kelma f’Perġe, niżlu Attalija;
minn hemm marru bil-baħar lejn Antjokja, mnejn kienu bagħtuhom
u rrikkmandawhom f’idejn
il-grazzja ta’ Alla
għax-xogħol li temmew.
Meta waslu, laqqgħu
l-membri tal-Knisja u
qagħdu jgħarrfuhom b’dak kollu li Alla għamel magħhom,
u wrewhom kif fetaħ il-bieb tal-fidi għall-pagani.
Hemm qagħdu għal ftit żmien sewwa mad-dixxipli.
Il-Kelma tal-Mulej
R:/ Irroddu ħajr lil Alla
R:/ Il-ħbieb tiegħek, Mulej, huma s-sebħ
tas-saltna tiegħek
Salm Responsorjali
Kulma għamilt iroddlok ħajr, Mulej;
iberkuk il-ħbieb tiegħek kollha.
Is-sebħ tas-saltna tiegħek ixandru,
fuq is-setgħa tiegħek jitkellmu.
R:/ Il-ħbieb tiegħek, Mulej, huma s-sebħ
tas-saltna tiegħek
Biex jgħarrfu lill-bniedem il-qawwa tiegħek,
u s-sebħ u l-ġmiel tas-saltna tiegħek.
Saltnatek hi saltna
għaż-żminijiet kollha,
minn nisel għal nisel
il-ħakma tiegħek.
R:/ Il-ħbieb tiegħek, Mulej, huma s-sebħ
tas-saltna tiegħek
Tifħir il-Mulej ixandar fommi;
u jbierek kulħadd l-isem qaddis tiegħu
għal dejjem ta’ dejjem!
R:/ Il-ħbieb tiegħek, Mulej, huma s-sebħ
tas-saltna tiegħek
Hallelujah, Hallelujah
Il-Messija jbati u fit-tielet jum iqum mill-imwiet,
u hekk jidħol fil-glorja tiegħu.
Hallelujah, Hallelujah
Qari mill-Evanġelju skont
San Ġwann
Ġw 14, 27-31a
R:/ Glorja lilek Mulej
F’dak iż-żmien, Ġesù qal lid-dixxipli tiegħu:
“Jiena nħallilkom is-sliem; nagħtikom is-sliem tiegħi; ma nagħtihulkomx kif tagħtih id-dinja.
Tħallux qalbkom titħawwad u anqas titbeżża’. Smajtu x’għedtilkom: ‘Jiena sejjer u nerġa’ niġi għandkom’.
Kieku kontu tħobbuni, kontu tifirħu li sejjer għand il-Missier, għax il-Missier hu akbar minni.
U għedtilkom dan minn issa qabel ma jseħħ, biex meta jseħħ temmnu.
M’iniex se nkellimkom
iżjed fit-tul, għax il-Prinċep tad-dinja ġej.
Kontra tiegħi xejn ma jista’ jagħmel; iżda ħalli
d-dinja tagħraf li jiena nħobb lill-Missier u li nagħmel
kif ordnali l-Missier”.
Il-Kelma tal-Mulej
R:/ Tifħir lilek Kristu
It-Tlieta
tal-Ħames Ġimgħa
tal-Għid