1.

Nggo me berkat Tuhan e

Ku das uruk Golgota

Latih kal akapNa pe

IpersanNa silang e

Nembah kita baNa min

Nginget k’lengNa banta kin

2.

Kasa si kubahan e

La erbahan senang pe

Ceda kal ateku pe

Naktak pe iluhku e

K’rina si kugengken e

Yesus penampatku nge

3.

Kam kudahi o, Tuhan

Ras dudurken tanNdu min

Tahan Kam seh mate pe

Ban kelengNdu me kepe

Sampat aku lalap min

Tebus Kam tendingku kin

1.

E lalap nge kuinget

Gurungku Tuhan e

Ku idah nggo teriket

Iuru kalak e

TakalNa nggo terdareh

Ban duri si telap

Teman-temanNa ja keh?

Ma sada pe tetap

3.

‘Bas paksa kegelapen

Erkinar-kinar t’rang

I kayu silang kapen

Tuhanku nggo menang

Nggo talu me nuate

Nggo mutus me kesah

Lang! Ja Tuhanku mate

Je padan ngge esah

Lit.

:

“O Tuhan, keleng ateNdu seh ku langit, kesetianNdu seh ku awang-awang. KebenarenNdu seri ganjangna ras deleng, kinibujurenNdu seri bagesna ras lawit, manusia ras rubia-rubia ipekena-kenaNdu o Tuhan. O Tuhan andiko ergana keleng ateNdu e, ikawaliNdu aku i teruh kabengNdu”.

Lit.

:

“Aminna pe kita dem alu kesalahen, erbahan si la ngena ate Dibata segedang-gedang wari, tapi Dibata e tetap engkelengi kita. Perkuah ateNa tetap simpar i bas kegeluhenta. Emaka gundari mari dage si pake waktuta guna bengket ku bas paksa teneng, guna rukur kerna kinilangasupenta ndalinken si ngena ate Dibata.

Lit.

:

“Kalak jahat megiken pengajuk dosa seh ku bas pusuhna, sitik pe la ia mbiar man Dibata. Erkiteken meganjang iakapna bana, iakapna maka la i eteh Tuhan dosana janah la ia iukumNa. Rananna jahat janah melala takina, simehuli dingen pentar lanai ia nggit ngelakokenca”.

(Masmur 36 : 2 – 4)

1.

Dosangku majekkensa

SilangNdu Tuhanku

Salahku kap erbahansa

Nggo mambur darehNdu

kesahNdu asamkenNdu

Gunangku Tuhanku

Bagem pengkelengiNdu

K’rina igengkenNdu

2.

Ersembah mungkuk aku

Iadep-adepenNdu

Kerina kuakuken

‘lah itebusiNdu

Bagem pengarapenku

Em isi pusuhku

Mekuah min ateNdu

Kam kap Penebusku

3.

Ula itaktakiNdu

Ula iukumNdu

Seh me pagi sifatku

Kam me ikutenku

Kam kap kegeluhenku

Kam pengendesenku

Ku puji me gelarNdu

Tuhan Kam Bapangku

Lit.

“Terpujilah Dibata erkiteken kiniulinNa si mulia, si icidahkenNa man banta arah pemereNa i bas anakNa si ikelengiNa. Sabab erkiteken Kristus enggo itebusi, eme dosa-dosanta enggo i alemi Dibata”.

1.

Nggo mambur dareh Tuhan e

I uruk Golgota

Kerina e igengkenNa

Lah masap dosanta

Lah masap dosanta

Lah masap dosanta

Kerina e igengkenNa

Lah masap dosanta

3.

DarehNdu e si badia

Em si nasapkenca

Dosangku e si melala

Melikas ibanNa

Melikas ibanNa

Melikas ibanNa

Dosangku e si melala

Melikas ibanNa

4.

Mesera pe bas geluhku

Tetap perjingkangku

SilangNdu e gelemenku

Lah aku terkelin

Lah aku terkelin

Lah aku terkelin

SilangNdu e gelemenku

Lah aku terkelin

L.

¹²Nggo ndeher kiniseran, ula min Kam tetap ndauh O TUHAN, sabap adi la Kam, ise kin nampati aku?

P.

¹³Bali ras rarasen banteng, ikeleweti musuh aku, bagi banteng si meliar i Basan nari, ikepungna aku.

L.

¹⁴Nganga babahna ngalaken aku, bagi singa erdengum ngerigep panganna atena.

P.

¹⁵Kerina gegehku nggo keri, bali ras lau mambur ku taneh, tulan-tulanku nggo nangtangen kerina, pusuhku melengas bagi lilin kena api.

L.

¹⁶Kalah-kalahku kerah bali ras abu, dilahku leket i das langit-langit babahku. I bas abu kematen, TamparkenNdu aku.

P.

¹⁷Gerombolen kalak jahat ngepung aku; bagi rarasen biang ideherina aku, itebakna tanku ras nahengku.

L.

¹⁸Tulan-tulanku nggo teridah kerina, janah puas akap imbangku ngidahsa.

P.

¹⁹Ibagi-bagina pakenku, jenari itikam tandukkenna baju lantangku.

L.

²⁰Tapi ula min Kam ndauh, o TUHAN, minter min Kam reh nampati aku.

P.

²¹Kelini aku i bas pedang nari, pulahi min aku i bas biang si ngerigep nari.

L.

²²Aku lanai ergegeh, pulahi nui aku i bas tanduk banteng ras i bas babah singa.

Lit.

​

:

Ketuahen kalak si megiken Kata Dibata, dingen simakekenca ibas geluhna si teptep wari, Haleluya.

Perp.

:

(iendeken)

Ha le lu ya, Ha le lu ya, Ha le lu ... ya.

45.

Mulai ciger gelap kerina negeri e, telu jam dekahna.

46.

Kira-kira jam telu karaben serko Jesus alu sora megang, nina, "Eli, Eli, lama sabakhtani?" ertina: "O, DibatangKu, o, DibatangKu, ngkai maka ItadingkenNdu Aku?"

47.

Piga-piga kalak si tedis i je megi sora Jesus, emaka nina, "IlebuhNa Elia!"

48.

Minter kiam sekalak muat bunga karang. Icelupkenna bunga karang e ku bas anggur si macem, jenari idudurkenna ku babah Jesus alu galah.

49.

Tapi nina kalak si deban, "Timai lebe, sinehen ntah reh kin Elia e mulahi Ia!"

50.

Sekali nari serko Jesus jenari keri KesahNa.

51.

Paksa si e merigat kire-kire Rumah Pertoton i datas nari seh ku teruh. Taneh linuren, uruk-uruk batu pecah,

52.

kuburen-kuburen talang, janah nterem kalak si badia si nggo mate ipekeke Dibata i bas si mate nari.

53.

Itadingkenna kuburen e; janah kenca keke Jesus i bas si mate nari bengket ia ku Jerusalem; i je nterem kalak ngidah ia kerina.

54.

Asum perwira ras perajurit-perajurit si erjaga ngidah kejadin e kerina, mbiar kal ia, janah nina, "Tuhu-tuhu me Ia Anak Dibata."

55.

I dauh-dauh nari nterem diberu ngenehenca. Diberu e, eme si ngikutken Jesus i Galilea nari dingen si nggo nampati Jesus.

56.

Piga-piga i bas si e, eme Maria Magdalena, Maria nande Jakup ras Jusup bage pe ndehara Sebedeus.

1.

I uruk Golgota,

ku idah silangNdu

Dosangku si majekkenca,

silangNdu e Tuhan

Reff.

Reh aku Tuhan

ngadap man baNdu

Yesus dudurken tanNdu

alokenlah aku

1.

Ngikut Tuhan kin atendu

Persan silang

Ola sangsi ola mbiar

Ikutkenlah

Reff. Persan saja min silangNdu,

Ikut terus

Mulia me kal upahNdu

tetap tutus

2.

Simbaklah min peratenndu,

saber tetap

Bujur saja ukurindu,

dat me sangap

Reff. Persan saja min silangNdu,

Ikut terus

Mulia me kal upahNdu

tetap tutus

3.

Kune susah tah mesera,

megeng-genglah

Tuhan Yesus usihennta,

ikut gelah

Reff. Persan saja min silangNdu,

Ikut terus

Mulia me kal upahNdu

tetap tutus

Lit.

:

“O senina-seninangku, nginget perkuah ate Dibata si mbelin si isehkenNa man banta, Kupindo man bandu: Endeskenlah kulandu man Dibata saja selaku persembahen si nggeluh rikutken si ngena ateNa. Sabab bage me arusna ersembah man Dibata sue ras biakndu mahluk si rukur.”

1.

Babalah persembahen si merimna

Ku adep-adepen Dibatanta

Babalah korban pujin si mehaga

Kulebe altarNa si Badia

G’lah tetap i b’reNa pasu-pasuNa

Man k’rina manusia

G’lah tetap b’reNa pasu-pasuNa

Terpuji gelar Tuhan

2.

Babalah persembahen si jilena

Ku rumah Dibata si Perkuah

Babalah korban pujin si merimna

Ku adep-adepen si erkuasa

G’lah tetap b’reNa keleng ateNa

Ras lias ateNa banta

G’lah tetap b’reNa pasu-pasuNa

Segedang-gedang geluhta

3.

‘ndeskenlah persembahenta man baNa

Si nggo nehken kegeluhen banta

‘ndeskenlah lagu pujin si jilena

Jadi persembahen si Badia

G’lah lias ras keleng ateNa

isehkenNa man banta

E maka ernalem ku IA

Malem tuhu ateta

Lit.

Turang ras senina, perkuah ate Dibata si mbelin enggo sialoken. Jesus nggit jadi kahul man banta gelah kita terkelin. Erkiteken si e kita rutang sikeleng-kelengen i bas doni enda.

Perp.

Bujur Tuhan i bas perkuah ateNdu si mbelin si enggo ku aloken. Aku erpadan maka kekelengenNdu ku sehken pe man doni enda.

Lit.

Turang ras senina, kematen Tuhan Jesus e mereken usihen man banta i bas ermeteruk ukur, setia ras nggit mereken dirindu guna kiniulin enterem jelma ras doni enda.

Perp.

Erpadan aku Tuhan ngusih Kam i bas ermeteruk ukur, setia ras nggit mereken diringku guna kiniulin enterem jelma ras doni enda.

Lit.

Turang ras senina, ibas kematen Jesus, kita nggeluh ibas geluh si mbaru.

Perp.

Erpadan aku Tuhan i bas ndalani wari-waringku, tetap nggeluh nangdangi si ngena ateNdu.

Lit.

Sipepaguhi perpadanenta arah ende-endenta : ......

1.

Kuikutken me dalanNdu

Dalan dame man bangku

Terkelin me kap geluhku

Itebusi darehNdu

Reff. Ku ikutken me dalanNdu

Ku endesken geluhku

Bas Kam o Jurus’lamatku

Dame senang tendingku

2.

Mesera gia dalanku

PadanNdu kap enteguh

Ngelawan kuasa gelap

Di ras Kam menang tuhu

Reff. Ku ikutken me dalanNdu

Ku endesken geluhku

Bas Kam o Jurus’lamatku

Dame senang tendingku

3.

Kupersilahangken bangku

Ngikutken pendiloNdu

Kudalanken peratenNdu

Dat aku pasu-pasu

Reff. Ku ikutken me dalanNdu

Ku endesken geluhku

Bas Kam o Jurus’lamatku

Dame senang tendingku

Bengketlah ku bas kegeluhenndu sekalak-sekalak. Cidahkenlah kesetian ras ketutusen atendu ngikutken si ngena ate Dibata i bas geluhndu. Guna si e, alokenlah pasu-pasu idur Dibata nari :

​

“i pasu-pasu janah i kawali Dibata kam, siang ayo Dibata ersinalsal i babondu janah melias ateNa ngenehen kam, i tatap Dibata ku kam janah malem atendu ibahanNa”. Amin

​

Perp. : A....min, A.......min, A......min

​