Qari mill-Ktieb tal-
Profeta Isaija
Is 38, 1-6.21-22.7-8
F’dak iż-żmien Ħeżekija marad għall-mewt.
U ġie għandu l-profeta Isaija bin Amos u qallu:
“Dan jgħid il-Mulej:
‘Aħseb għal darek għax se
tmut u ma tgħixx.’”
U Ħeżekija dawwar wiċċu lejn il-ħajt, u beda jitlob
lill-Mulej u jgħid:
“Ftakar, Mulej, nitolbok kif jien imxejt quddiemek, b’fedelta’ u qalb sħiħa u għamilt it-tajjeb f’għajnejk.”
U beka Ħeżekija biki kbir.
Imbagħad il-kelma
tal-Mulej ġiet fuq Iżaija u qallu:
“Mur u għid lil Ħeżekija:
‘Dan jgħid il-Mulej, Alla ta’ David missierek:
Jien smajt it-talba tiegħek, rajt id-dmugħ tiegħek.
Arani, issa se ntawwal għomrok bi ħmistax-il sena oħra, u neħilsek minn
id is-sultan tal-Assirja,
lilek u ’l din il-belt, u nħares ’il din il-belt.’ ”
U Iżaija qal:
“Ħa jieħdu ċappa tin u
jogħrku l-ġerħa biha u jfiq.”
U Ħeżekija qal lil Iżaija:
“Liema hu s-sinjal li se nitla’ f’dar il-Mulej?”
Iżaija wieġeb:
“U dan ikun is-sinjal
mill-Mulej, li l-Mulej jagħmel dan:
Arani, jiena rraġġa’ lura d-dell għaxar tarġiet li
x-xemx diġa niżżlet
mat-taraġ ta’ Aħaż”
U x-xemx reġgħet lura għaxar tarġiet mit-taraġ li kienet telgħet.
Il-Kelma tal-Mulej
R:/ Irroddu ħajr lil Alla
R:/ Mulej, int salvajtli
’l ħajti mill-ħofra
tal-qerda
Salm Responsorjali
Jiena għedt:
“F’nofs ħajti jkolli nitlaq;
għall-bqija ta’ snini jżommuni fi bwieb
Art l-Imwiet.”
R:/ Mulej, int salvajtli
’l ħajti mill-ħofra
tal-qerda
Jien għedt:
“Miniex se nara l-Mulej
f’art il-ħajjin;”
ma nara b’għajnejja
lil ħadd iżjed
minn fost dawk
li jgħammru fid-dinja.
R:/ Mulej, int salvajtli
’l ħajti mill-ħofra
tal-qerda
Tneħħietli l-għamara
tiegħi u ġiet imwarrba minni, bħal għarix
ta’ ragħaj.
“Int kebbibt ’il ħajti
bħan-nissieġ,
min-newl int qtajtni.
R:/ Mulej, int salvajtli
’l ħajti mill-ħofra
tal-qerda
Mulej, qalbi tgħix għalik,
aħjili ’l ruħi,
fejjaqni u agħtini saħħti.”
R:/ Mulej, int salvajtli
’l ħajti mill-ħofra
tal-qerda
R:/ Hallelujah. Hallelujah
In-nagħaġ tiegħi jisimgħu leħni, jgħid il-Mulej;
u jiena nagħrafhom,
u huma jimxu warajja.
R:/ Hallelujah. Hallelujah
Qari mill-Evanġelju skont San Mattew
Mt 12, 1-8
R:/ Glorja lilek Mulej
Darba waħda, is-Sibt, Ġesù kien għaddej minn għalqa miżrugħa. Issa lid-dixxipli tiegħu ħadhom il-ġuħ;
u bdew jaqtgħu s-sbul u jikluh. Imma rawhom
il-Fariżej, u qalulu:
“Ara, id-dixxipli tiegħek jagħmlu dak li ma jiswiex nhar ta’ Sibt.”
U hu qalilhom:
“Ma qrajtux x’għamel David meta kien bil-ġuħ,
hu u dawk li kienu miegħu?
Ma qrajtux kif daħal fid-dar ta’ Alla u kiel il-ħobż
tal-preżenza ta’ quddiem
il-Mulej,
li la hu u lanqas dawk li kienu miegħu ma kienu jistgħu jieklu minnu, imma
l-qassisin biss?
Jew ma qrajtux fil-Liġi li nhar ta’ Sibt il-qassisin
fit-tempju jiksru s-Sibt bla ma jonqsu?
Ngħidilkom li hawnhekk
hawn min hu aqwa
mit-tempju.
Li kieku kontu tafu xi jfissru l-kelmiet, ‘Ħniena rrid, u mhux sagrifiċċju’, ma kontux tikkundannaw lil min hu bla ħtija.
Għax Bin il-bniedem huwa
Sid is-Sibt.”
Il-Kelma tal-Mulej
R:/ Tifħir lilek Kristu