Qari mill-Ktieb tal-
Profeta Isaija
Is 10,5-7.13-16
Dan jgħid il-Mulej:
Gwaj għall-Assirja, il-ħatar ta’ għadbi u l-għasluġ
fil-qilla tiegħi!
Għall-poplu midgħi jien nibagħtu,
u kontra l-ġens
tad-dagħdigħa tiegħi jien
nordnalu, li jħarbtu bla ħniena, jaħtaflu l-priża,
u jgħaffeġ fuqu bħat-tajn tal-art. Imma hu ma jifhimhiex hekk, u f’qalbu ma jidhirlux hekk:
għax f’qalbu għandu li jħarbat, u jeqred ġnus fuq ġnus. Għax hu qal:
‘Bis-saħħa ta’ idejja għamilt dan; u bl-għaqal tiegħi, għax moħħi jilħaqli, neħħejt il-fruntieri
tal-popli,
u ħtaftilhom ġidhom, u bħall-ġorf niżżilt lis-slaten. U idi, bħallikieku sabet bejta, ħatfet ġid il-popli.
Bħalma jiġbru l-bajd mitluq, jien ġbart l-art
kollha, bla ma ħadd ħarrek ġwenħajh, jew fetaħ munqaru u pespes.’
Forsi qatt ftaħret
il-mannara kontra min iqaċċat biha?
Forsi l-munxar qatt qam għal min jaħdem bih?
Bħallikieku l-ħatar jista’ jħarrek lil min jerfgħu, jew l-għasluġ lil dak li mhux xi biċċa għuda!
Għalhekk għad jibgħat
is-Sid, il-Mulej tal-eżerċti,
l-għelubija f’simnitu,
u f’ġewwenih iqabbadlu
l-ħruq, il-ħruq tan-nar.
Il-Kelma tal-Mulej
R:/ Irroddu ħajr lil Alla
R./ Il-Mulej ma jitlaqx
il-poplu tiegħu
Salm Responsorjali
Huma jkasbru, Mulej,
lill-poplu tiegħek,
u jgħakksu
lill-poplu ta’ wirtek.
Joqtlu l-armla u l-barrani,
u l-mewt jagħtu
lill-iltiema.
R./ Il-Mulej ma jitlaqx
il-poplu tiegħu
U jgħidu:
“Ma jarax il-Mulej; ma jintebaħx Alla ta’Ġakobb.”
Ifhmuha, intom nies boloh fost il-poplu!
Nies bla moħħ, meta se tintebħu?
R./ Il-Mulej ma jitlaqx
il-poplu tiegħu
Forsi min għamel
il-widnejn ma jismax?
Jew min sawwar
l-għajnejn ma jarax?
Taħsbu li min iwiddeb
lill-ġnus ma jrażżanx?
Jew m’għandux għerf
min jgħallem
lill-bniedem?
R./ Il-Mulej ma jitlaqx
il-poplu tiegħu
Għax il-Mulej ma jitlaqx
il-poplu tiegħu,
ma jħallix il-poplu,
il-wirt tiegħu.
Għax il-ħaqq jerġa’ jsir
bil-ġustizzja,
u fuqu jimxu dawk kollha ta’ qalb safja.
R./ Il-Mulej ma jitlaqx
il-poplu tiegħu
R:/ Hallelujah. Hallelujah
Infaħħrek, Missier,
Sid is-sema u l-art, għax inti dawn il-ħwejjeġ
tas-Saltna wrejthom
liċ-ċkejknin.
R:/ Hallelujah. Hallelujah
Qari mill-Evanġelju skont San Mattew
Mt 11, 25-27
R:/ Glorja lilek Mulej
F’dak iż-żmien, Ġesù qabad u qal:
“Infaħħrek, Missier, Sid
is-sema u l-art,
għax inti dawn il-ħwejjeġ ħbejthom lil min għandu
l-għerf u d-dehen u wrejthom liċ-ċkejknin.
Iva, Missier, għax lilek hekk għoġbok. Kollox kien mogħti lili minn Missieri, u ħadd ma jagħraf lill-Iben jekk mhux il-Missier,
kif ħadd ma jagħraf
lill-Missier jekk
mhux l-Iben u dak li lilu
l-Iben irid jgħarrafhulu.”
Il-Kelma tal-Mulej
R:/ Tifħir lilek Kristu