Qari mill-Ewwel Ittra�ta’ San Pietru Appostlu
1 Piet 1, 3-9
Ikun imbierek Alla u Missier Sidna Ġesù Kristu,
li fil-ħniena kbira tiegħu raġa’ wilidna għal tama ħajja bil-qawmien ta’ Ġesù Kristu mill-imwiet u għal wirt li la jitħassar,
la jittabba’, u lanqas jinxef. Dan il-wirt hu merfugħ għalikom fis-sema għax
intom tinsabu taħt il-ħarsien tal-qawwa ta’ Alla fil-fidi tagħkom li twassal
għas-salvazzjoni li lesta biex tidher fl-aħħar taż-żminijiet.
Għalhekk għandkom għax tifirħu mqar jekk issa, għal ftit żmien ieħor, jeħtiġilkom titnikktu taħt ħafna provi.
Bħalma d-deheb, li jintemm, jgħaddi mill-prova tan-nar, hekk tgħaddi
mill-prova l-fidi tagħkom, li tiswa aktar mid-deheb,
biex ikun jistħoqqilha tasal
għat-tifħir, għall-glorja, u għall-ġieħ, meta jidher Ġesù Kristu. Lilu, għalkemm ma rajtuhx,
intom tħobbuh; fih, għad li issa m’intomx tarawh, intom temmnu; fih intom tifirħu b’ferħ glorjuż, li ma jistax jitfisser,
waqt li tiksbu l-għan tal-fidi tagħkom, li hu s-salvazzjoni tagħkom.
Il-Kelma tal-Mulej
R:/ Irroddu ħajr lil Alla
R:/ Il-Mulej jiftakar għal dejjem fil-patt tiegħu
Salm Responsorjali
Irrodd ħajr lill-Mulej b’qalbi kollha,
fil-laqgħa tat-tajbin flimkien miġbura.
Kbar huma l-għemejjel
tal-Mulej;
ifittxuhom dawk kollha li jitgħaxxqu bihom.
R:/ Il-Mulej jiftakar għal dejjem fil-patt tiegħu
Hu jagħti l-għajxien lil min jibża’ minnu,
jiftakar għal dejjem fil-patt tiegħu.
Wera lill-poplu tiegħu
l-qawwa ta’ għemilu,
meta qassam lilhom art
il-ġnus.
R:/ Il-Mulej jiftakar għal dejjem fil-patt tiegħu
Bagħat jifdi lill-poplu tiegħu,
waqqaf għal dejjem il-patt tiegħu.
Qaddis u tal-biża’ hu ismu!
Għal dejjem jibqa’ t-tifħir tiegħu!
R:/ Il-Mulej jiftakar għal dejjem fil-patt tiegħu
Hallelujah, Hallelujah
Ġesù Kristu, għad li kien għani, ftaqar minħabba fikom,
sabiex intom tistagħnu permezz tal-faqar tiegħu.
Hallelujah, Hallelujah
Qari mill-Evanġelju skont
San Mark
Mk 10, 17-27
Glorja lilek Mulej
F’dak iż-żmien, waqt li Ġesù kien se jaqbad it-triq, mar fuqu wieħed jgħaġġel, niżel għarkupptejh quddiemu u qallu:
“Mgħallem tajjeb, x’għandi nagħmel biex nikseb il-ħajja ta’ dejjem?”.
Ġesù qallu:
“Għaliex qiegħed issejjaħli tajjeb? Ħadd ma hu tajjeb ħlief Alla biss. Inti
l-kmandamenti tafhom: la toqtolx, la tiżnix, la tisraqx,
la tixhidx fil-falz, la tiħux bil-qerq dak li hu ta’ ħaddieħor; weġġaħ lil missierek u ’l ommok”.
U dak wieġbu u qallu:
“Mgħallem, jiena dan kollu ili nħarsu minn żgħożiti”.
Imbagħad Ġesù xeħet fuqu ħarsa ta’ mħabba u qallu:
“Ħaġa waħda tonqsok: mur bigħ li għandek, agħtih lill-fqar, u jkollok teżor fis-sema; imbagħad ejja u imxi warajja”.
Imma għal dan il-kliem
ir-raġel qarras wiċċu u telaq b’qalbu sewda, għaliex kellu bosta ġid.
Ġesù mbagħad ħares ħarsa madwaru u qal lid-dixxipli tiegħu:
“Kemm hi iebsa
għall-għonja li jidħlu
fis-Saltna ta’ Alla!”.
Id-dixxipli stagħġbu għal
din il-kelma, imma Ġesù raġa’ qalilhom:
“Kemm hi iebsa, uliedi, li wieħed jidħol fis-Saltna ta’ Alla!
Eħfef li ġemel jgħaddi minn għajn ta’ labra milli wieħed għani jidħol
fis-Saltna ta’ Alla”.
Huma stagħġbu wisq aktar,
u bdew jgħidu wieħed lil ieħor:
“Mela min jista’ jsalva?”.
Ġesù ħares lejhom u qalilhom:
“Għall-bnedmin dan ma jistax ikun, imma għal Alla iva; għax għal Alla kollox jista’ jkun”.
Il-Kelma tal-Mulej
R:/ Tifħir lilek Kristu