1.

Wari enda wari badia

Wari meriah jumpa ras Dibata

Gia melala ndube dahinta

Nembah man baNa ola kita lupa.

Reff. Wari-warinta Tuhan empuna

Geluhta pe IA kap si njayamsa

Geluhta pe IA kap si njayamsa

2.

M’lala gia dahin ertima

Tedeh ateta jumpa ras Dibata

Si ‘rnalem baNa isampatiNa

Malem nanamna ‘di rembak ras IA.

Reff. Wari-warinta Tuhan empuna

Geluhta pe IA kap si njayamsa

Geluhta pe IA kap si njayamsa

3.

Latih susah lit tiap wari

Tuhan perkuah sikap ngelayasi

K’rina si nasa IA empuna

Si ‘ndesken baNa ukur ras geluhta.

Reff. Wari-warinta Tuhan empuna

Geluhta pe Ia kap si njayamsa

Geluhta pe Ia kap si njayamsa

1.

Lit paksana merdang

Lit ka paksa peranin.

Lit paksana ngadi

Lit ka paksa erdahin.

Kerina erpaksa-paksa

Nggeluh ibabo doni.

Tapi katawari gia

Tuhan saja si puji.

3.

Jumpa pencarinta

Ban sampur pemereNa

Si kataken bujur

Ras ermengkah ate

Perkuah ate Dibata

La kap erkeri-kerin

Marilah si puji Tuhan

Si dem bas kiniulin

Lit.

Pustaka Si Badia nuduhken uga....

..., si jadi tanda permulan wari, bulan, bintang, tahun ras musim.

Perp.

Terpujilah Kam Tuhan, sabab mehuli kal ulih pendahinNdu.

Lit.

Dibata nepa erbage-bage sinuan-sinuan, rubia-rubia ras asuh-asuhen. Jenari, itepa Dibata me manusia si sentudu ras tempasNa, dilaki ras diberu ijadikenNa guna ngusahai, njagai ras mpekena-kena doni enda. Itatap Dibata kerina tinepaNa, tuhu-tuhu mehuli.

Perp.

Terpujilah Kam Tuhan, sabab mehuli kal ulih pendahinNdu.

Lit.

Emaka idungi Dibata kerina dahinNa janah iserapkenNa sada wari jadi wari pengadi-ngadin, jenari ipasu-pasuNa kerina.

Perp.

Terpujilah Kam Tuhan, sabab mehuli kal ulih pendahinNdu.

1.

Kam Tuhan Dibata simada kuasa

Singkelini k’rina doni enda

Badia gelarNdu mulia me tuhu

Kupuji gelarNdu bas geluhku

Kam Tuhan Dibata simada kuasa

Singkelini k’rina doni enda

3.

Kam Tuhan Dibata simada kuasa

Si petetap ukur kami k’rina

Ajar kami nembah ras muji gelarNdu

‘lah metunggung ibas adepenNdu

Kam Tuhan Dibata simada kuasa

Si mpetetap ukur kami k’rina

Lit.

Dibata enggo nepa doni enda alu mehuli, dingen ipehagaNa kita alu erbahan kita sentudu ras tempasNa. Jenari, isuruhNa kita jadi temanNa erdahin guna mpekena-kena doni enda. Kai nge ndai siidah ibas pusuh ras perbahanenta, tandana kita sentudu ras tempas Dibata?

Lit.

Pusuh ras perukuren si kuga nge idapeti Dibata i bas kita? IdapetiNa nge ndia pusuh si tetap ngukurken si mehuli lebih ada keperluan dirinta? IdapetiNa nge ndai pusuh, perukuren ras perbahanen si mehuli?

Lit.

IdapetiNa nge ndai kiniteken si tutus ibas njagai tempas Dibata si lit i bas kita?

Lit.

Marilah, siakuken kekotenta man Tuhan.

Perp.

O Tuhan, megati kami lupa maka itepaNdu kami sentudu ras tempasNdu, janah idiloNdu kami erdahin jadi pasu-pasu. Megati lanai idah doni enda keleng ateNdu i bas pendahin kami. Megati lanai idah anak jabu kami rupaNdu ibas kami. O Tuhan, pengasup kami dingen pegegehilah kami.

1.

Tuhan Alemi aku,

Alemi dosa ras kesalahenku

Bereken bangku pusuh si mbaru

Gelah metunggung iadepenNdu

​

2.

Tuhan alemi aku,

Sura-surangku rusur kuikutken

Ajari aku kerna p’ratenNdu

Petangkas kai arus kulakoken

3.

Tuhan Alemi aku,

Rusur denga lagungku la mehuli

Ku ban si jahat bas pengakapNdu

Sasapken k’rina salah lepakku

​

Lit.

:

Selaku persurehen Dibata, aku nehken kataNa man banta kerina kita singakuken kinilangasupenta, niNa:

​

“Tapi sipentingna kal, daramilah lebe kinirajanNa, janah dalankenlah si ngena atena, maka icukupiNa kai si perlu man bandu. Emaka ola aru atendu kerna wari si pepagi, sebab si pepagi lit denga ka nge si man ndelenken. Labo padah itambahi kiniseran si sendah alu kiniseran si pepagi” (Matius 6 : 33-34)

1.

Anem dosangku mekelat megara

IsalihkenNdu me jadi mbentar

Kam kap erbanca geluh meherga

Kugejap tuhu kelengNdu simpar

Reff. Tendingku ersurak janah nembah

Kupakeken me pedah

Kam kap Dibata Bapa Si Perkuah

Bas kep-kepenNdu min aku gelah

3.

Sedekah aku nggeluh ibas terang

Ukur meriah pusuh pe salang

Baban si mberat jadi menahang

B’reNdu pengapul dame ras senang

Reff. Tendingku ersurak janah nembah

Kupakeken me pedah

Kam kap Dibata Bapa Si Perkuah

Bas kep-kepenNdu min aku gelah

1.

Wari Raya Agama

Ibereken TUHAN man Musa

2.

aturen-aturen wari raya agama, si arus irayaken bangsa Israel tupung bangsa e pulung ersembah man TUHAN. Nina Musa,

3.

"Enem wari arus kam erdahin, tapi arus iingetndu maka wari si pepituken, eme wari pekesahken, wari Sabat. I bas wari e ula kam erdahin, tapi pulunglah kam lako ersembah man TUHAN. Wari Sabat e TUHAN empuna, aminna i japa pe kam tading.

4.

Momokenlah wari raya si tersena enda i bas paksa-paksa si nggo itentuken."

Lit.

​

:

Ketuahen kalak si megiken Kata Dibata, dingen simakekenca ibas geluhna si tep-tep wari, Haleluya.

Perp.

:

(iendeken)

Ha le lu ya, Ha le lu ya, Ha le lu … ya.

1.

Perumpaman kerna kalak upahen i bas kebun anggur.

"Sabap Kinirajan Surga bali kap ras si mada kebun anggur. Erpagi-pagi si lampas ndarat ia i rumah nari ndarami kalak upahen guna erdahin i kebun anggurna.

2.

Kenca ersada arihna ras kalak upahen emaka upahna sada duit pirak sada wari rikutken gaji biasa, isuruhna kalak upahen ku kebun anggurna.

3.

Jam siwah erpagi-pagi ndarat ka ia i rumah nari, idahna kalak dongal-dongal i tiga.

4.

Nina man kalak e, ‘To, berkatlah kam pe ku kebun anggurku erdahin. Bujur nge kari kubahan upahndu.’

5.

Emaka berkat kalak e. Kira-kira jam sepulu dua, bage pe jam telu karaben ndarat ka ia i rumah nari, janah bagi si ndai ka me perbahanenna.

6.

Kira-kira jam lima karaben ndarat ka ia i rumah nari, jenari jumpa ia ras piga-piga kalak si tedis-tedis la erkai pe. Nungkun ia man kalak e nina, ‘Ngkai maka dongal-dongal saja kam gedang-gedang wari?’

7.

Erjabap kalak e, ‘Sabap la lit si ngupahi erdahin i juma.’ Nina tuan e, ‘To berkatlah kam pe ku kebun anggurku erdahin.’

8.

Nandangi gelap nina tuan e man mandurna, ‘To dilo kalak upahen e, jenari galari upahna; si perpudina erdahin lebe bereken upahna janah si lebe erdahin pudi bereken.’

9.

Man kalak si mulai erdahin jam lima karaben iberekenna sada duit pirak sekalak.

10.

Ngidah si enda, kalak si perlebena kal erdahin erpengakap maka lebih asa si e ialokenna. Tapi man bana igalari sada duit pirak ka nge sekalak.

11.

Kenca ialokenna duit e, jungut-jungut ia man tuan e.

12.

Nina, ‘Kalak si pudin reh enda, sada jam ngenca erdahin, tapi kami erpagi-pagi nari seh ben iparpari las matawari ipeserindu ka nge upah kami.’

13.

Ngaloi tuan e man sekalak si jungut-jungut e, ‘O teman, begiken! Bujur kap kubahan man bandu. Nggo kap ndai sue arihta maka sada duit pirak upahndu sada wari.

14.

Emaka to mulih, baba upahndu e. Man kalak si pudin erdahin asa kam, bali ateku kubahan ras man bandu.

15.

Ma ate-ateku nge adi duitku? Ntah cian kin atendu ngidah aku melumbar?’"

16.

Jenari idungi Jesus KataNa nina, "Dage kalak si arah pudi jadi si arah lebe kap pagi, janah kalak si arah lebe jadi si arah pudi."

Lit.

:

O senina-seninangku, nginget perkuah ate Dibata si mbelin si isehkenNa man banta, kupindo man bandu: “Endeskenlah kulandu man Dibata saja selaku persembahen si nggeluh rikutken si ngena ateNa. Sabap bage me arusna kam ersembah man Dibata sue ras biakndu selaku mahluk si rukur”.

(Roma 12 : 1)

1.

Labo erkiteken beluhku

Labo erkiteken pentarku

Tapi perbahan penampatNdu

Mbelin tergejap bas ngasupku

​

2.

Labo erkiteken dahinku

Labo erkiteken pangkatku

Tapi perbahan perkuahNdu

Malem ateku tuhu-tuhu

3.

Labo erkiteken ertangku

Labo erkiteken bayakku

Tapi perbahan pemereNdu

Pasu-pasuNdu simpar bangku

Lit.

Ingetlah maka kam itepa Dibata maba pasu-pasu arah pendahinndu.

Perp.

Erpadan kami Tuhan, ngendesken diri kami jadi pasu-pasu arah pedahin kami.

Lit.

Manusia itepa Dibata guna njagai, ngusahai ras mpekena-kena kerina tinepa Dibata

Perp.

Erpadan kami Tuhan, endesken kami diri kami jadi pasu-pasu man kerina tinepaNdu. Ipake kami wari-wari pemereNdu enda alu mehuli, segelah idah doni enda pendahinNdu i bas pendahin kami.

1.

Talenta sini b’reken Dibatanta

Jadi min erlipat ganda

Tutus ateta ndahiken dahinNa

Amin pe mberat tapina ermulia.

Reff. Kalak si malang

nandangi Tuhan

La kap nggit nilah

labo nggit nogan

Maka dahikenlah alu tutus

Ola lakoken alu mekarus

3.

Ersadalah min arihta kerina

Make kata ras pedahNa

Gelar ni Tuhan ‘lah tetap mulia

Ije me t’ridah ibas lagu-langkahta.

Reff. Kalak si malang

nandangi Tuhan

La kap nggit nilah

labo nggit nogan

Maka dahikenlah alu tutus

Ola lakoken alu mekarus

4.

Ulihta lit kap bas Tuhan Dibata

Mulia rikut mehaga

Adi perkisat la kel lit gunana

Jelma mejingkat maka ngena ateNa.

Reff. Kalak si malang

nandangi Tuhan

La kap nggit nilah

labo nggit nogan

Maka dahikenlah alu tutus

Ola lakoken alu mekarus

Bengketilah kegeluhenndu, daramilah lebe kinirajanNa janah dalankenlah si ngena AteNa, maka IcukupiNa kai si perlu man bandu. Guna jadi gegehndu, alokenlah pasu-pasu idur Dibata nari:

​

Dibata, sumbul kemalemen ate e gelah si ncukupi keperlunndu guna ndalanken si sentudu ras peratenNa. Janah Dibatalah erdahin i bas kam arah Jesus Kristus gelah kam ngelakoken kai si ngena AteNa. Man Kristuslah kemulian seh rasa lalap. Amin.

​

Perp. : A....min, A.......min, A......min