Qari mill-Ktieb tal-
Profeta Eżekjel
Eżek 43, 1-7a
Ir-raġel ġiebni ħdejn il-bieb li jħares lejn il-Lvant. U, ara, il-glorja ta’ Alla ta’ Iżrael riesqa min-naħa tal-Lvant;
il-ħoss tagħha bħall-ħoss ta’ gliegel ta’ ilma, u l-art kienet tiddi bil-glorja tiegħu.
U d-dehra li rajt kienet bħal dik id-dehra li kelli meta ġie biex jeqred il-belt u bħal dik li kelli ħdejn ix-xmara Kebar.
Jiena nxtħett wiċċi fl-art. U l-glorja tal-Mulej daħlet
fis-santwarju mill-bieb li jagħti għan-naħa tal-Lvant.
L-ispirtu refagħni u daħħalni fil-bitħa ta’ ġewwa, u, ara,
il-glorja tal-Mulej imliet
is-santwarju.
U smajt min ikellimni
mis-santwarju waqt li raġel kien wieqaf ħdejja. U qalli:
“O bniedem, dan hu l-post tat-tron tiegħi, il-post fejn inqiegħed qiegħ riġlejja,
u li fih jien se ngħammar fost ulied Iżrael għal dejjem ta’ dejjem”.
Il-Kelma tal-Mulej
R:/ Irroddu ħajr lil Alla
Is-sebħ tal-Mulej jgħammar f’artna
Salm Responsorjali
Ħa nisma’ xi jgħid Alla:
il-Mulej is-sliem ixandar.
Qrib hi tassew is-salvazzjoni tiegħu għal dawk li jibżgħu minnu, biex jgħammar
is-sebħ f’artna.
R:/ Is-sebħ tal-Mulej jgħammar f’artna
It-tieba u l-fedeltà jiltaqgħu,
il-ġustizzja u s-sliem jitbewsu.
Il-fedeltà mill-art tinbet,
u l-ġustizzja mis-sema tixref.
R:/ Is-sebħ tal-Mulej jgħammar f’artna
Il-Mulej ukoll jagħti l-ġid tiegħu,
u artna tagħti l-frott tagħha.
Il-ġustizzja quddiemu timxi,
u s-sliem fuq il-passi tiegħu.
R:/ Is-sebħ tal-Mulej jgħammar f’artna
Hallelujah, Hallelujah
Il-Missier tagħkom wieħed hu, dak li hu fis-smewwiet
u l-mexxej tagħkom wieħed hu, il-Messija.
Hallelujah, Hallelujah
Qari mill-Evanġelju skont
San Mattew
Mt 23, 1-12
R:/ Glorja lilek Mulej
F’dak iż-żmien, Ġesù kellem lin-nies u lid-dixxipli tiegħu, u qalilhom:
“Fuq il-katedra ta’ Mosè qagħdu l-kittieba u
l-Fariżej. Mela kulma jgħidulkom huma agħmluh u ħarsuh,
iżda tagħmlux kif jagħmlu huma, għax huma kliem biss għandhom, imma fatti xejn.
Huma jorbtu qatet kbar u tqal u jgħabbuhom fuq spallejn ħaddieħor,
waqt li huma stess anqas b’sebagħhom wieħed ma jridu jħarrkuhom. Kulma jagħmlu, jagħmluh għal għajnejn in-nies;
ħalhekk ikabbru l-filatteri u jtawlu l-ġmiemen tagħhom. Iħobbu l-postijiet ewlenin
fl-imwejjed, u s-siġġijiet ta’ quddiem fis-sinagogi,
u jixtiequ min isellmilhom fil-pjazez u li n-nies isejħulhom: “rabbi”. Imma intom tħallux min isejħilkom: “rabbi”,
għax l-Imgħallem tagħkom wieħed hu, u intom ilkoll aħwa.
U ssejħu lil ħadd: “missier” fuq din l-art, għax il-Missier tagħkom wieħed hu, dak li hu fis-smewwiet.
Hekk ukoll tħallux min isejħilkom: “mexxejja”, għax il-Mexxej tagħkom wieħed hu, il-Messija.
Il-kbir fostkom għandu jkun il-qaddej tagħkom; min jitgħolla, jitbaxxa, u min jitbaxxa, jitgħolla”.
Il-Kelma tal-Mulej
R:/ Tifħir lilek Kristu