Bidu tal-Ittra ta’
San Ġakbu Appostlu
Ġak 1, 1-11
Ġakbu, qaddej ta’ Alla u
tal-Mulej Ġesù Kristu,
lit-tnax-il tribù mxerrda mad-dinja: sliem!
Ħuti, għoddu kollox b’ferħ meta tħabbtu wiċċkom ma’ kull xorta ta’ tiġrib,
għax għandkom tkunu tafu li
t-tiġrib tal-fidi tagħkom inissel is-sabar.
Ħallu li s-sabar ikollu
l-milja tiegħu fikom, biex tkunu perfetti u sħaħ, bla ma jkun jonqoskom xejn.
Jekk xi ħadd minnkom jonqsu l-għerf, għandu jitlob lil Alla, li jagħti lil kulħadd b’id miftuħa u bla ma jċanfar lil ħadd, u jagħtihulu.
Mela ħa jitlob bil-fidi, bla ma jitħasseb xejn, għax min jitħasseb ikun jixbah
lill-mewġ tal-baħar imqanqal u mqalleb bir-riħ.
Bniedem bħal dan ma għandux jistenna li se jaqla’ xi ħaġa mingħand il-Mulej; hu bniedem mifxul fih innifsu,
u mhuwiex żgur mit-triq li jagħżel. Ħa jiftaħar ħuna
l-fqir li Alla għollieh, u
l-għani jiftaħar
fl-umiljazzjoni tiegħu.
Għax dan jgħib bħal ward ir-raba’; titla’ x-xemx tisreġ u bis-sħana tnixxef il-ħaxix, u l-fjur tiegħu jaqa’ u
s-sbuħija ta’ surtu tgħib;
hekk ukoll jiġrilu l-għani f’kulma jmidd għonqu għalih.
Il-Kelma tal-Mulej
R:/ Irroddu ħajr lil Alla
R:/ Tiġi fuqi tjubitek, biex ikolli l-ħajja
Salm Responsorjali
Qabel ma għakkistni, jien kont fl-iżball;
imma issa nħares il-kelma tiegħek.
Twajjeb int, u l-ġid tagħmel;
għallimni l-kmandamenti tiegħek.
R:/ Tiġi fuqi tjubitek, biex ikolli l-ħajja
Swieli ta’ ġid li għakkistni,
għax tgħallimt
il-kmandamenti tiegħek.
Aħjar għalija l-liġi ta’ fommok
mill-eluf ta’ flejjes
tad-deheb u l-fidda.
R:/ Tiġi fuqi tjubitek, biex ikolli l-ħajja
Jien naf, Mulej, li ġusti
d-digrieti tiegħek;
u li skont is-sewwa għakkistni.
Tkun it-tieba tiegħek
il-faraġ tiegħi,
skont il-wegħda li għamilt mal-qaddej tiegħek.
R:/ Tiġi fuqi tjubitek, biex ikolli l-ħajja
Hallelujah, Hallelujah
Jiena hu t-Triq, il-Verità u l-Ħajja, jgħid il-Mulej.
Ħadd ma jmur għand
il-Missier jekk mhux permezz tiegħi
Hallelujah, Hallelujah
Qari mill-Evanġelju skont
San Mark
Mk 8, 11-13
R:/ Glorja lilek Mulej
F’dak iż-żmien, ġew
il-Fariżej u bdew iħaqquha ma’ Ġesù; u, biex iġarrbuh, talbuh sinjal mis-sema.
Hu tniehed tnehida fih innifsu u qal:
“Għalfejn irid sinjal dan
in-nisel? Tassew ngħidilkom, ebda sinjal ma jingħatalu dan
in-nisel”.
U telaqhom, raġa’ tala’ fuq id-dgħajsa u mar ix-xatt
l-ieħor.
Il-Kelma tal-Mulej
R:/ Tifħir lilek Kristu