1.

Haleluya wari enda

Wari Minggu nggo ka seh

Pulung kita k’rina jenda

Maka tambah pemeteh

Muji Dibatanta e

Ras ngataken bujur pe

2.

Asa Kristen japa gia

Pulung k’rina sendah me

Maka inget manusia

Perkeleng Dibata nge

Sabab Tuhan Yesus e

Nggo nangtangi kita pe

1.

Anem geluh dem percuban

Yesus pengarapen

Anem kote kiniteken

Yesus jadi teman

Reff. Yesus kap pengarapenku

Si gel-gel nungkat keg’luhenku

Yesus kap pengarapenku

segedang-gedang g’luhku

2.

Anem geluh bas kinis’ran

Yesus kap gegehku

Ibas gelap pe erdalan

Yesus sekawalku

Reff. Yesus kap pengarapenku

Si gel-gel nungkat keg’luhenku

Yesus kap pengarapenku

segedang-gedang g’luhku

3.

Ku endesken me geluhku

Ku bas adepenNdu

Kam kap si nemani aku

‘bas k’rina geluhku

Reff. Yesus kap pengarapenku

Si gel-gel nungkat keg’luhenku

Yesus kap pengarapenku

segedang-gedang g’luhku

Lit.

:

Jesus reh ku doni enda, nggit IA ngenanami kiniseran gelah manusia terkelin. IA setia i bas keleng ateNa, seh maka la IA surut amin gia ngalaken kematen, Jesus kap pengarapen si tuhu-tuhu.

Perp.

:

Ipuji kami Kam o Tuhan, sabab Kam setia engkelengi kami. Kam kap ulu pengarapan kami.

Lit.

:

Jesus reh ku doni enda. IpulahiNa manusia perdosa i bas kuasa kematen nari. Jenari ijujurkenNa kegeluhen si mbaru.

Perp.

:

Terpujilah Kam Tuhan, nggit Kam ngalaken kematen, gelah kami ndatken kegeluhen si mbaru.

1.

Kataken bujur man Tuhan

‘rkiteken kiniulinNa

KekelengenNa man banta

Tetap seh rasa lalap

Reff. Rendelah muji Tuhan

si turikenlah min

perbahanenNa banta

si enggo sialoken

2.

Meriahlah min ateta,

Sabab kita si k’rajangNa

Meriah dage ukurta,

Si tetap nembah baNa

Reff. Rendelah muji Tuhan

si turikenlah min

perbahanenNa banta

si enggo sialoken

3.

Malem kal tuhu ateta,

Bujur kal perbahanenNa

Pasu-pasuNa geluhta,

Si tetap nembah baNa

Reff. Rendelah muji Tuhan

si turikenlah min

perbahanenNa banta

si enggo sialoken

Lit.

:

Turang ras senina, Jesus Kristus enggo nuduhken kesetian ras keleng ateNa man banta. Kuga nge kita ngergaken kesetiaan ras keleng ate Dibata e sedekah enda?

Lit.

:

Jesus nggit mereken diriNa ngalaken kiniseran guna keterkelinen manusia. Kuga nge ketutusenta sedekah enda engkelengi temanta manusia?

1.

Kam Yesus Tuhanku palas kegeluhenku

Reh aku ngadap man baNdu

Tegulah min aku ibas ndalani geluhku

‘Lah ula celus nahengku

Reff. Dengkehken sorangku erlebuh o Tuhan

Ngendesken pingko-pingkoku

Alemi min salah dosangku o Tuhan

‘Lah atan bas kiniulin

2.

Kam Yesus Tuhanku, sampati min geluhku

Alemi Tuhan dosangku

La kap lit terligen ibas adep-adepenNdu

Kerina salah lepakku

Reff. Dengkehken sorangku erlebuh o Tuhan

Ngendesken pingko-pingkoku

Alemi min salah dosangku o Tuhan

‘Lah atan bas kiniulin

Lit.

“Kam enggo erkubang-kubang ibahan dosa, tapi Kuperidi kam maka bersih bagi salju. Aminna gia erkiteken dosandu kam enggo mbiring bagi tengguang, mulihi kam jadi mbentar bagi kapas” (Jesaya 1 : 18)

1.

Kam kap lalap man ikutenku

Yesus Kam Penebusku

Kam kap lalap Penundalenku

Yesus Kam Penawarku

Ialemi Kam dosangku

Maka senang tendingku

Kam kap lalap Penalemenku

Yesus Kam Penebusku

2.

Kam o, Yesus pengarapenku

Kam pematang tuahku

Kam si negu-negu aku pe

Ku bas kesenangen e

Bengket Kam ku kematen

Lako ngepkep tendingku

Maka aku pe terkelin kin

Bengket kesenangen e

31.

Emaka iajari Jesus ka ajar-AjarNa nina, "Anak Manusia si isuruh Dibata la banci lang ngenanami mbue kiniseran, janah itulak peminpin-peminpin ras imam-imam si mbelin bage pe guru-guru agama. Ia ibunuh janah kenca telu wari nggeluh Ia mulihi."

32.

Kerina KiniseranNa enda jelas kal IturikenNa man ajar-ajar. Perban si e iawin Petrus me Jesus emaka ipandangna.

33.

Tapi erkusur Jesus, IpernehenNa ajar-AjarNa janah IrawaiNa Petrus nina, "Laweslah i bas Aku nari, Iblis! Perukurenndu e, perukuren manusia kap, la bagi perukuren Dibata."

34.

Jenari idilo Jesus jelma si nterem ras ajar-AjarNa. Nina man kalak e, "Ise atena ikut ras Aku, arus maka ipersilahangna bana, ipersanna kayu persilangna jenari iikutkenna Aku.

35.

Sabap ise si mpertahanken kegeluhenna, bene kep kegeluhenna e, tapi ise si bene kegeluhenna erkiteken Aku ras erkiteken Berita si Mehuli, terkelin me.

36.

Lit kin gunana man sekalak jelma, amin bana gia kerina doni enda tapi bene kesahna? Tentu lang!

37.

La kai pe banci ibereken manusia guna gancih kesahna.

38.

Adi sekalak jelma mela ia ngakuken Aku ras KatangKu i tengah-tengah manusia si genduari bage pe i tengah-tengah kalak perdosa, emaka Anak Manusia si isuruh Dibata pe pagi mela ngakuken ia, sanga Anak Manusia si isuruh Dibata e reh i bas kemulian si mbelin si reh i bas Bapana nari ras malekat-malekat si badia."

Lit.

​

:

Ketuahen kalak si megiken Kata Dibata, dingen simakekenca ibas geluhna si tep-tep wari, Haleluya.

Perp.

:

(iendeken)

Ha le lu ya, Ha le lu ya, Ha le lu … ya.

L.

⁷Seh kal kejamna perbahanen man bana, tapi igengkenna, janah sinik saja ia. Bali ras anak biri-biri si nandangi igeleh, bali ras biri-biri si nandangi iguntingi mbuluna, la sitik pe ia sumekah.

P.

⁸Ia itangkap, idabuhken ukumenna, jenari ibaba gelah iukum mate ia. Tapi la ise pe mperdiateken nasipna, aminna pe ia mate erkiteken dosa-dosa bangsanta.

L.

⁹Ia ikuburken sada lubang ras kalak jahat, itanemken ras kalak bayak, aminna pe la ia pernah ngelakoken si jahat, tah melasken kata guak."

P.

¹⁰Nina TUHAN, "PeratenKu kap maka ia ndatken kiniseran; ia mate guna persembahen pengalemi dosa. Erkiteken si e nggedang umurna, janah idahna kesusurenna. Arah ia jadi me bagi si Kusura.

L.

¹¹Kenca kiniseranna, idatca me keriahen; itehna me maka kiniseranna e labo sia-sia. Suruh-suruhenKu si tutus e, nterem kalak ibahanna benar, janah ia me simersan ukumen nterem jelma.

P.

¹²...

L.

¹¹...

P.

¹²Erdandanken si e Kubereken man bana ingan si mulia, i tengah-tengah kalak si mbelin ras si erkuasa. Sabap nggit ia ngendesken kesahna seh mate, ngenanami kiniseran bagi kalak jahat. Tapi si tuhuna ipersanna dosa nterem jelma, janah itotokenna gelah kalak jahat ialemi kerina."

Lit.

:

Kalak si empersembahken pengataken bujur, IA nge si mpehaga kap Aku, janah man kalak si perdalinna la erpandangen, kucidahken kesangapen ni Dibata (Ulangen 6 : 5)

1.

Lalap sikataken bujur

Beritaken kemulianna

Mbelin pemereNa banta

Puji gelarNa

Reff. Dibata kap cilinggementa

malem ateta

Tuhan Dibata Penalementa

Penanam-nanam bas geluhta

2.

K’leng ateNa kapen nusur

Lalaplah ngataken bujur

Ingetlah pedahNa rusur

Segedang umur

Reff. Dibata kap cilinggementa

malem ateta

Tuhan Dibata Penalementa

Penanam-nanam bas geluhta

3.

Adi seh sura-suranta

Labo e perban gegehta

Maka ula kita lupa

Ia m’rekenca

Reff. Dibata kap cilinggementa

malem ateta

Tuhan Dibata Penalementa

Penanam-nanam bas geluhta

Lit.

Kegeluhen Jesus eme tanda keleng ate Dibata kempak manusia. Megenggeng IA ndalani percuban, gelah Dibata ermulia

Perp.

Erpadan kami Tuhan, kami jadi saksiNdu gia melala kiniseran, gelah doni enda tek dingen muji gelarNdu

Lit.

Jesus reh ku doni enda labo guna diriNa. IA setia gia ngenanami kiniseran guna keselamaten manusia.

Perp.

Erpadan kami nggeluh bagi Jesus, lanai kami nggeluh guna diri kami saja, tapi kami nggeluh guna kiniulin kalak sideban.

Lit.

Jesus meteh kiniseran si arus ibentasiNa erkiteken dosa manusia. Tapi la IA surut i bas ngalaken kiniseran, erkiteken keleng ateNa.

Perp.

O Tuhan, la ipindo kami gelah la kami jumpa perbeben, tapi ipindo kami gelah ibereNdu kami gegeh, guna ngalaken perbeben.

“Ipasu-pasu janah ikawali Dibata kam, siang ayo Dibata ersinalsal ibabondu, janah melias ateNa ngenehen kam. Itatap Dibata ku kam, janah malem atendu ibahanNa”. Amin

​

Perp. : A....min, A.......min, A......min

​