L-Erbgħa
tat-Tieni Ġimgħa
tal-Avvent
Qari mill-Ktieb tal-
Profeta Iżaija
Iż 40, 25-31
“Ma’ min ixxebbhuni jew tqabbluni?”
jistaqsi l-Qaddis. Erfgħu għajnejkom ’il fuq u araw:
min ħalaqhom dawn
il-ħlejjaq kollha?
Imexxi u jgħodd l-eżerċti tiegħu, u jsejħilhom b’isimhom wieħed wieħed.
Bis-saħħa ta’ qawwietu,
bil-qawwa ta’ setegħtu,
ħadd minnhom ma jonqos.
Għaliex titkellem Ġakobb,
u int, Iżrael, tgħid:
“Triqti moħbija mill-Mulej,
u mwarrab il-jedd tiegħi minn Alla”?
Jaqaw ma tafx? Lanqas ma smajt?
Il-Mulej hu Alla ta’dejjem, il-ħallieq ta’ truf l-art. Ma jegħja qatt, u ma jinkeddx, l-għerf tiegħu ma ssibx tarfu.
Hu li jagħti l-qawwa
lill-għajjien, u jkattar
il-qawwa lil min hu bla saħħa. Jintelqu ż-żgħażagħ u jegħjew,
fl-aħjar tagħhom jogħtru
l-irġiel. Imma dawk li jittamaw fil-Mulej jieħdu saħħithom, itellgħu
l-ġwienaħ bħall-ajkli,
jiġru bla ma jegħjew, jimxu bla ma jintelqu.
Il-Kelma tal-Mulej
R:/ Irroddu ħajr lil Alla
R./ Bierek, ruħ tiegħi,
il-Mulej!
Salm Responorjali
Bierek, ruħ tiegħi,
il-Mulej!
B’qalbi kollha nbierek
l-isem qaddis tiegħu.
Bierek, ruħ tiegħi,
il-Mulej,
u la tinsiex il-ġid kollu
li għamel miegħek.
R./ Bierek, ruħ tiegħi,
il-Mulej!
Hu li jaħfer dnubietek kollha;
ifejjaq il-mard tiegħek kollu;
jifdi lil ħajtek mill-qabar; iħaddnek bit-tieba u
l-ħniena.
R./ Bierek, ruħ tiegħi,
il-Mulej!
Hanin u twajjeb il-Mulej, idum ma jagħdab u kollu mogħdrija.
Ma mexiex magħna skont ma ħaqqhom ħtijietna;
ma ħallasniex skont ma ħaqqha ħżunitna.
R./ Bierek, ruħ tiegħi,
il-Mulej!
Hallelujah, Hallelujah
Ara, il-Mulej ġej biex
isalva lill-poplu tiegħu:
hienja dawk li huma lesti
biex jiltaqgħu miegħu.
Hallelujah, Hallelujah
Qari mill-Evanġelju skont
San Mattew
Mt 11, 28-30
R:/ Glorja lilek Mulej
F’dak iż-żmien, Ġesù qal:
“Ejjew għandi,
intom ilkoll li tinsabu mħabbtin u mtaqqlin,
u jiena nserraħkom.
Ħudu fuqkom il-madmad
tiegħi u tgħallmu minni, għaliex jiena ta’ qalb ħelwa u umli, u intom issibu
il-mistrieħ għal ruħkom.
Għax il-madmad tiegħi ħelu u t-toqol tiegħi ħafif.”
Il-Kelma tal-Mulej
R:/ Tifħir lilek Kristu
L-Erbgħa
tat-Tieni Ġimgħa
tal-Avvent