Il-Ġimgħa
tat-Tieni Ġimgħa
tal-Għid
Qari mill-Ktieb
tal-Atti tal-Appostli
Atti 5, 34-42
F’dak iż-żmien, wieħed Fariżew, jismu Gamaljel, mgħallem fil-Liġi u miġjub mill-poplu kollu,
qam fis-Sinedriju u ordna li
lill-appostli joħorġuhom ’il barra għal ftit. Imbagħad qal lil sħabu:
“Irġiel ta’ Iżrael, iftħu għajnejkom x’sejrin
tagħmlu lil dawn in-nies.
Ftit żmien ilu qam Tewda u beda jgħid li hu xi ħaġa; u madwar erba’ mitt raġel qablu miegħu.
Dan qatluh, u dawk kollha li kienu marru warajh tferrxu u ġew fix-xejn. Warajh ġie Ġuda l-Galilew, fi żmien iċ-ċensiment,
u ġibed poplu sħiħ warajh. Lil dan ukoll qatluh, u xterdu dawk kollha li kienu marru warajh.
Fuq dan li ġara issa, ngħidilkom: ħallukom minn dawn in-nies u itilquhom.
Għax dan il-ħsieb jew ħidma tagħhom, jekk hi ġejja mill-bnedmin, għad tisfa fix-xejn; iżda jekk hi ġejja minn Alla,
ma jseħħilkomx teqirduhom. Araw li ma ssibux ruħkom li qegħdin teħduha kontra Alla!”.
Imbagħad qagħdu fuq
il-parir tiegħu. Sejħu
lill-appostli quddiemhom, u, wara li tawhom is-swat,
ordnawlhom li ma jitkellmux fuq l-isem ta’ Ġesù; imbagħad telquhom. Iżda huma ħarġu minn quddiem is-Sinedriju ferħana
talli ġew meqjusa bħala nies li jistħoqqilhom li jkunu mmaqdra minħabba l-isem ta’ Ġesù.
U kuljum, fit-tempju u fi djarhom, kienu jgħallmu u jxandru bla waqfien li Ġesù hu l-Messija.
Il-Kelma tal-Mulej
R:/ Irroddu ħajr lil Alla
R:/ Ħaġa waħda tlabt lill-Mulej: li ngħammar fid-dar tiegħu
Salm Responsorjali
Il-Mulej id-dawl u
s-salvazzjoni tiegħi;
minn min għandi nibża’?
Il-Mulej hu l-kenn tiegħi;
quddiem min għandi nitwerwer?
R:/ Ħaġa waħda tlabt
lill-Mulej: li ngħammar fid-dar tiegħu
Ħaġa waħda tlabt
lill-Mulej,
ħaġa waħda nfittex:
li ngħammar f’dar il-Mulej
tul il-jiem kollha ta’ ħajti;
biex nitgħaxxaq bil-ħlewwa tal-Mulej
jien u nħares lejn it-tempju tiegħu.
R:/ Ħaġa waħda tlabt
lill-Mulej: li ngħammar fid-dar tiegħu
Nemmen li għad nara
t-tieba tal-Mulej f’art
il-ħajjin.
Ittama fil-Mulej,
żomm sħiħ u qawwi qalbek;
ittama fil-Mulej.
R:/ Ħaġa waħda tlabt
lill-Mulej: li ngħammar fid-dar tiegħu
Hallelujah, Hallelujah
Il-bniedem mhux bil-ħobż biss jgħix,
iżda b’kull kelma li toħroġ minn fomm Alla .
Hallelujah, Hallelujah
Qari mill-Evanġelju skont
San Ġwann
Ġw 6, 1-15
R:/ Glorja lilek Mulej
F’dak iż-żmien, Ġesù telaq lejn in-naħa l-oħra tal-baħar tal-Galilija, jew ta’ Tiberija.
Ħafna nies marru warajh, għax raw is-sinjali li kien jagħmel bil-fejqan
tal-morda.
Ġesù tela’ lejn
l-għoljiet u qagħad hemm bilqiegħda mad-dixxipli tiegħu. Kien qrib l-Għid,
il-festa tal-Lhud.
Ġesù rafa’ għajnejh, lemaħ kotra ta’ nies ġejja lejh, u qal lil Filippu:
“Mnejn nixtru l-ħobż biex dawn ikollhom x’jieklu?”.
Dan qalhulu biex jippruvah, għaliex hu kien jaf x’sejjer jagħmel. Filippu wieġbu:
“Mitejn dinar ħobż ma jkunux biżżejjed għalihom biex kull wieħed minnhom jieħu xi ftit”.
Wieħed mid-dixxipli tiegħu,
Indrì, ħu Xmun Pietru, qallu:
“Hawn tfajjel li għandu ħames ħobżiet tax-xgħir u żewġ ħutiet żgħar; imma dawn x’inhuma għal daqshekk nies?”.
“Qiegħdu n-nies bilqiegħda!”,
qal Ġesù.
Dik in-naħa kien hemm ħafna ħaxix. Għalhekk
in-nies, xi ħamest elef raġel, qagħdu bilqiegħda.
Ġesù ħa l-ħobżiet, radd
il-ħajr, u qassamhom lil dawk li kienu bilqiegħda; hekk ukoll għamel bil-ħut, u kulħadd ħa kemm ried.
Meta xebgħu, Ġesù qal
lid-dixxipli tiegħu:
“Iġbru l-loqom li baqa’, biex xejn ma jinħela”.
Marru jiġbruhom, u mlew
tnax-il qoffa bil-loqom li kien fadlilhom in-nies
mill-ħames ħobżiet
tax-xgħir wara li kienu kielu.
Għalhekk dawn in-nies, meta raw dan is-sinjal li għamel Ġesù, qalu:
“Dan hu tassew il-Profeta li għandu jiġi fid-dinja!”.
Imma Ġesù, meta ntebaħ li kienu ġejjin biex jeħduh bilfors ħalli jagħmluh sultan, raġa’ warrab waħdu lejn l-għoljiet.
Il-Kelma tal-Mulej
R:/ Tifħir lilek Kristu
Il-Ġimgħa
tat-Tieni Ġimgħa
tal-Għid