Qari mill-Ktieb
tal-Profeta Ġeremija.
Ġer 1, 17-19
F’dak iż-żmien: Il-Mulej kellimni u qalli:
“Ħażżem ġenbejk, qum u għidilhom kull ma ordnajtlek.
La tibżax minnhom, għax inkella nbeżżgħek jien quddiemhom.
Arani, illum se nagħmel minnek belt fortizza, kolonna tal-ħadid, ħajt
tal-bronz, kontra l-pajjiż kollu,
kontra s-slaten ta’ Ġuda u
l-prinċpijiet tiegħu, kontra
l-qassisin tiegħu u l-poplu
kollu tal-pajjiż.
Huma jeħduha kontrik, imma ma jagħmlulek xejn, għax jiena nkun miegħek
–kelma tal-Mulej– biex neħilsek minnhom.”
Il-Kelma tal-Mulej.
R:/ Irroddu ħajr lil Alla
Salm Responsorjali
R:/ Fommi jxandar
il-ġustizzja tiegħek.
Fik, Mulej, nistkenn;
ma jkolli qatt għax ninfixel.
Fil-ġustizzja tiegħek
ħollni u eħlisni,
mejjel widintek lejja u salvani.
R:/ Fommi jxandar
il-ġustizzja tiegħek
Kun għalija sur tal-kenn
u fortizza qawwija
għall-ħelsien tiegħi,
għax blata tiegħi
u fortizza tiegħi int.
Alla tiegħi, eħlisni minn id il-ħazin
R:/ Fommi jxandar
il-ġustizzja tiegħek
Għax int, Mulej,
it-tama tiegħi;
Mulej, inti l-fiduċja tiegħi
sa minn żgħożiti.
Fuqek intlaqt sa minn ġuf ommi,
minn ħdan ommi inti ħadtni
R:/ Fommi jxandar
il-ġustizzja tiegħek
Fommi jxandar il-ġustizzja tiegħek,
kull jum is-salvazzjoni tiegħek.
O Alla, sa minn żgħożiti int għallimtni;
u jiena nxadar s’issa
l-egħġubijiet tiegħek.
R:/ Fommi jxandar
il-ġustizzja tiegħek
Hallelujah, Hallelujah
Henjin dawk li huma ippersegwitati minħabba
fil-ġustizzja, għax tagħhom hija s-Saltna
tas-Smewwiet
Hallelujah, Hallelujah
Qari mill-Evanġelju skont
San Mark
Mk 6, 17-29
R:/ Glorja lilek Mulej
F’dak iż-żmien: Erodi bagħat jarresta lil Ġwanni u qaflu fil-ħabs minħabba f’Erodja, mart ħuh Filippu billi kien iżżewiġha hu.
Għax Ġwanni lil Erodi kien jgħidlu:
“Ma tistax iżżommha int
il-mara ta’ ħuk!”
Għalhekk Erodja saret
tobogħdu u kienet trid toqtlu, imma ma kinitx tista’, għax Erodi,
li kien jaf x’raġel tajjeb u qaddis kien Ġwanni, kien jibża’minnu:
u kien iħarsu mill-għawġ, u kien iħobb joqgħod jisimgħu, għad li kien jibqa’ mħasseb ħafna wara li jisimgħu.
Mela wasal jum tajjeb, meta Erodi għalaq sninu u għamel ikla lill-kbarat tiegħu, lill-fizzjali l-għolja u lill-aqwa nies tal-Galilija.
Bint Erodja daħlet tiżfen, u għoġbot lil Erodi u
lill-mistednin tiegħu.
Is-sultan qal lit-tfajla:
“Itlobni kull ma trid, u jien nagħtik kull ma titlobni.”
U qalilha u ħalfilha:
“Titlobni x’titlobni, kollox nagħtik, imqar nofs
is-saltna tiegħi!”
Dik ħarġet u marret tistaqsi lil ommha:
“T’għid x’nitolbu?”
“Ras Ġwanni l-Battista,”
weġbitha dik. Malajr reġgħet daħlet tgħaġġel quddiem
is-sultan, talbitu u qaltlu:
“Irridek issa stess tagħtini ras Ġwanni l-Battista fuq platt.”
Tnikket għall-aħħar
is-sultan, iżda minħabba
fil-ġurament u l-mestednin ma riedx jerġa’ lura
mill-kelma li taha.
Maljar is-sultan bagħat suldat minn ta’ madwaru u ordnalu li jġiblu rasu. Dak mar u qatagħlu rasu
fil-ħabs;
imbagħad ġiebha fuq platt u taha lit-tfajla, u t-tfajla marret tatha lil ommha.
Meta d-dixxipli tiegħu semgħu b’dan, ħadu l-ġisem tiegħu u difnuh ġo qabar.
Il-Kelma tal-Mulej
R:/ Tifħir lilek Kristu