Qari mill-Ewwel Ittra ta’
San Pawl Appostlu
lill-Korintin
1, Kor 1, 17-25
Ħuti, Kristu ma bagħatnix biex ngħammed iżda biex inxandar l-Evanġelju, mhux bi kliem l-għerf sabiex ma jiġix fix-xejn is-salib ta’ Kristu.
Il-predikazzjoni tas-salib
hija bluha għal dawk li jintilfu; imma għal dawk
li jsalvaw, għalina, hi
l-qawwa ta’ Alla.
Bħalma hu miktub:
‘Neqred l-għerf
tal-għorrief, inwarrab
id-dehen tad-dehnin’
Fejn hu l-għaref? Fejn hu
l-iskriba? Fejn hu l-filosfu
ta’ din id-dinja? Forsi Alla
ma bellahx l-għerf tad-dinja?
U billi, fl-għerf ta’ Alla,
id-dinja b’għerfha ma għarfitx lil Alla,
Alla għoġbu jsalva lil min jemmen bil-bluha
tal-predikazzjoni.
Għax il-Lhud jitolbu
s-sinjali u l-Griegi jfittxu
l-għerf, imma aħna nxandru ’l Kristu msallab,
skandlu għal-Lhud u bluha għall-Griegi;
iżda għal dawk li huma msejħin sew Lhud sew Griegi,
Kristu huwa l-qawwa ta’ Alla u l-għerf ta’ Alla.
Għax il-bluha ta’ Alla hija għarfa iktar mill-bnedmin, u d-dgħufija ta’ Alla hija aqwa mill-bnedmin.
Il-Kelma tal-Mulej
R:/ Irroddu ħajr lil Alla
R:/ Bit-tieba tal-Mulej mimlija l-art
Salm Responsorjali
Għannu, ġusti,
bil-ferħ lill-Mulej;
jixirqilhom ifaħħruh
in-nies sewwa.
Faħħru l-Mulej
bid-daqq taċ-ċetra;
għannulu fuq l-arpa b’għaxar kordi.
R:/ Bit-tieba tal-Mulej mimlija l-art
Għax sewwa hi
l-kelma tal-Mulej,
kollox bil-fedeltà
huwa għamel.
Hu jħobb id-dritt
u s-sewwa;
bit-tjieba tal-Mulej mimlija l-art.
R:/ Bit-tieba tal-Mulej mimlija l-art
Il-Mulej ixejjen
il-fehmiet tal-ġnus,
ifixkel il-ħsibijiet
tal-popli.
Imma l-fehma tal-Mulej tibqa’ għal dejjem,
minn żmien għal żmien
il-ħsibijiet ta’ moħħu.
R:/ Bit-tieba tal-Mulej mimlija l-art
Hallelujah, Hallelujah
Ishru, u itolbu l-ħin kollu,
biex tkunu tifilħu tieqfu quddiem Bin il-bniedem.
Hallelujah, Hallelujah
Qari mill-Evanġelju skont
San Mattew
Mt 25, 1-13
R:/ Glorja lilek Mulej
F’dak iż-żmien, Ġesù qal
lid-dixxipli tiegħu din
il-parabbola:
“Is-Saltna tas-smewwiet ixebbhuha ma’ għaxar
xebbiet li ħarġu
bl-imsiebaħ tagħhom
biex jilqgħu l-għarus.
Ħamsa minnhom kienu
boloh u ħamsa għaqlin,
għax il-boloh ħadu
l-imsiebaħ imma ma
ħadux żejt magħhom,
waqt li l-għaqlin ħadu mhux biss l-imsiebaħ
iżda wkoll iż-żejt fil-kwies.
L-għarus iddawwar ma ġie, u għalhekk ilkoll ħadhom in-ngħas u,
raqdu.
Imbagħad f’nofs ta’ lejl instama’ min jgħajjat
‘Ara l-għarus! Oħorġu ilqgħuh!’
Dawk ix-xebbiet qamu lkoll u ħejjew l-imsiebaħ tagħhom. Iżda l-boloh qalu
lill-għaqlin,
‘Agħtuna ftit żejt minn
tagħkom, għax l-imsiebaħ
tagħna jintfew.’
Qabżu l-għaqlin u qalu,
‘Għandu mnejn ma jibqax biżżejjed, la għalina u lanqas għalikom! L-aħjar, morru
għand tal-ħanut u ixtru għalikom.’
Xħin dawk marru biex jixtru jiġi l-għarus;
dawk li kienu lesti daħlu miegħu għall-festa tat-tieġ, u l-bieb ingħalaq.
Sa fl-aħħar waslu wkoll
ix-xebbiet l-oħra, u bdew jgħidu,
‘Sinjur, Sinjur, iftħilna!’
Iżda hu weġibhom u qal:
‘Tassew, ngħidilkom,
lilkom ma nafkomx.’
Ishru, mela, għaliex
la tafu l-jum u lanqas
is-siegħa.”
Il-Kelma tal-Mulej
R:/ Tifħir lilek Kristu