1.

Meriah kita ras k’rina

Sipuji Dibatanta.

Perban lias ateNa e,

IsehkenNa man banta pe.

Nggo pulung kita k’rina pe,

Ibas ingan enda,

Ibas ingan enda.

2.

Dage gegehi bantalah,

Muji Tuhan perkuah.

Ibas keleng ateNa nge,

Seh banta keriahen e.

Gundari subuk ras pagin,

Tuhu meriah min,

Tuhu meriah min

​

3.

Dage lah ula lupa min,

Pehaga Dibatanta.

Alu perbahanenta kin,

Kelengilah pe temanta.

Ibas kegeluhenta e,

I babo doni e,

I babo doni e.

​

1.

Kek’lengen Yesus kempak manusia

Desken Dibata engkelengi Ia

KekelengenNa maler kap man banta

Adi sipakelah pedahNa

Reff. Min si keleng-kelengen kita k’rina

Bagi pedahken Yesus bas pustaka

Sababna kai sipindo bas gelarNa

Ib’re Dibata man banta.

3.

Bas paksa kita nehken kekelengen

Ola min siban ceda kempak teman

Erban mehuli ola rahan-ahan

Lah kedamen jujurken Tuhan

Reff. Min si keleng-kelengen kita k’rina

Bagi pedahken Yesus bas pustaka

Sababna kai sipindo bas gelarNa

Ib’re Dibata man banta.

Lit.

Mari sibegiken Kata Dibata kerna dahin gereja i tengah-tengah doni enda. “Sada ngenca kula, janah...

... ras penandainta kerina nandangi Anak Dibata; kita dewasa, janah dungna seh kita ku tingkat kedewasaan Kristus si serta e.” (Epesus 4: 4-7, 11-13)

1.

Perpulungen ersadalah,

Ngikutken PedahNa.

Bas kiniteken tetaplah,

Man Tuhan Dibata.

Bas si mehuli ayaklah,

Sisampat-sampaten.

Bage kap pedah Dibata,

Sikeleng-kelengen.

3.

Ersada ‘bas lau peridin,

Ban sada Tuhanta.

Gereja kitik tah mbelin,

Si mada Dibata.

Gereja la banci pecah,

Ersada kerina.

Ersada bas kiniteken,

Sisampat-sampaten.

4.

Erbage-bage pemere,

Man banta kerina.

Tujunna sada me kepe:

Terpuji Dibata.

Ersada ukur me jine,

O, Kristen japa pe.

Anem melala ringring pe,

Sada kula kepe.

Lit.

Kita me ring-ring ni Kristus si idilo guna Ersada, Ersaksi ras Ngelai. Uga pendalankenta sedekah enda?

Lit.

Lit nge ndia idah Dibata i bas pusuhta guna ersada? Lit nge ndia ukurta guna naksiken Dibata? Lit nge pusuhta guna ngelai kalak si deban?

1.

AlemiNdu aku bas dosangku

AlemiNdu aku bas lepakku

O Tuhan sasap min

O Yesus sasap min

Alemi dosangku

2.

Si la payo dem ibas geluhku

Ngaku aku baNdu o Yesusku

O Tuhan sasap min

O Yesus sasap min

Alemi dosangku

Lit.

Selaku persuruhen Dibata aku nehken...

... Nina:

“Sabab i bas persadanndu ras Kristus, kam enggo ipebayak i bas kai pe, i bas pengeranandu bage pe i bas pemetehndu, la kam kurang kai pe kerna pemere-pemereNa.”

(1 Korinti 1:5, 7b).

1.

Amin dosangku mbue la terkira

Si erban ndauh ras Kam Tuhan

Tapi keleng ateNdu tangkas Tuhan

La tak-takiNdu dosangku

Reff: Bujur man baNdu Tuhan

ban ialemi dosangku

Meriah kel ukurku

Tuhan nasapken dosangku

4.

Ukurku ipelimbarui Tuhan

Si nai nilah ibas Tuhan

Sura-surangku saja kuikutken

Gundari kuikut Tuhan

Reff: Bujur man baNdu Tuhan

ban ialemi dosangku

Meriah kel ukurku

Tuhan nasapken dosangku

4.

Nina TUHAN man kalak Israel, "Marilah, dahi Aku, maka kam nggeluh.

5.

Ula kam lawes ku Berseba lako nembah. Ula darami Aku i Betel, sabap Betel masap pagi. Ula kam lawes ku Gilgal, sabap anak kota e keri pagi ibuang."

6.

Dahilah TUHAN maka kam nggeluh. Adi lang, desken api si gurlah me Ia, maka meseng IbahanNa bangsa Israel. Meseng me anak kuta Betel ipan api e, janah ise pe la ngasup nimpetisa.

7.

Cilaka me kam, o kam si nalihken kebujuren si pentar jadi nggeduk, dingen ndampesken kebenaren ku taneh.

14.

Daramilah si mehuli, ula si jahat, maka kam nggeluh. Adi bage TUHAN Dibata si Mada Kuasa tuhu-tuhu rembak ras kam, bagi si ikatakenndu rusur.

15.

Cigalah atendu man kejahaten, ngena atendu si benar, janah arus iperdiatekenndu gelah keadilen menang i bas pengadilen. Mbera-mbera mekuah ate TUHAN man bangsa enda si lit denga tading nggeluh genduari.

Lit.

​

:

Ketuahen kalak si megiken Kata Dibata, dingen simakekenca ibas geluhna si tep-tep wari, Haleluya.

Perp.

:

(iendeken)

Ha le lu ya, Ha le lu ya, Ha le lu … ya.

12.

Mejuah-juah nina Epapras. Ia i bas golongenndu nari janah ia nggo jadi si erdahin i bas dahin Kristus Jesus. Rusur kam itotokenna man Dibata alu tutus ate. Ipindokenna man Dibata gelah tetap ukurndu, erpemeteh kam, la monce-once kinitekenndu, bage pe gelah patuh kam i bas si ngena ate Dibata.

13.

Kuidah tutus kal atena erdahin man gunandu bage pe man guna kalak si ringan i Laodikea ras i Hierapolis.

14.

Lukas, dokter si ikelengi kita ras Demas nehkenmejuah-juah man bandu.

15.

Kataken mejuah-juah i bas kami nari man senina-seninanta si sada kiniteken si ringan i Laodikea, bage pe man Nimpa ras perpulungen si erbahan kebaktin i rumahna.

16.

Kenca iogendu surat enda usahakenlah maka i perpulungen Laodikea pe iogeken. Janah raduken si e, ogeken pe surat si man perpulungen Laodikea si ikiremkenna pagi man bandu.

17.

Janah kataken man Arkipus, "Usahakenlah ndungisa dahin si ibereken man bandu i bas ndahiken dahin Tuhan."

18.

Alu tanku kusuratken kata pendungi enda: Mejuah-juah i bas aku nari, Paulus. Ula lupa maka aku sangana i bas penjara! Lias ate Dibata rembak ras kam gelah.

Lit.

:

Turang ras senina i bas Jesus Kristus,...

kita ngendesken persembahenta ibuat i bas Roma 12:1b, niNa :

“Endeskenlah kulandu man Dibata saja selaku persembahen si nggeluh rikutken si ngena ateNa. Sabab bage me arusna kam ersembah man Dibata sue ras biakndu selaku mahluk si rukur”.

1.

Nginget perkuah Dibata si mbelin

Si isehkenNa man banta k’rina kin

Ibas kerina dampar kegeluhen

I doni si dem alu keguluten

Reff. Endeskenlah kulanta man Dibata

Kerinana si lit ibas geluhta

Selaku persembahenta si nggeluh

Em persembahen si ngena ateNa

2.

Sabab bage me arusna kita kin

Ersembah man Dibatanta si mejin

Si nggo m’reken man banta manusia

Keg’luhen si mehuli ras badia

Reff. Endeskenlah kulanta man Dibata

Kerinana si lit ibas geluhta

Selaku persembahenta si nggeluh

Em persembahen si ngena ateNa

3.

Marilah k’rina sipuji Dibata

Janah sipeteruk ka pe ukurta

Alu bage si dat sura-suraNa

Kai si mehuli ras ngena ateNa

Reff. Endeskenlah kulanta man Dibata

Kerinana si lit ibas geluhta

Selaku persembahenta si nggeluh

Em persembahen si ngena ateNa

Lit.

Kita idilo jadi ring-ring i bas KulaNa, nggejabken kiniulin nggeluh i bas persadan ras Dibata, bagepe ras temanta si deban. Nggit nge kita ertutus ate mbangun kiniersadan i bas perpulungen ni Tuhan?

Perp.

Selaku ring-ring Kristus, ateku tetap nggeluh i bas persadan kulaNa i doni enda.

Lit.

Jesus nggo mereken DiriNa ngelai manusia. Nggit nge kita mereken dirinta bagi Kristus, nggeluh i bas biak nggeluh si nggit mereken diri guna ngelai?

Perp.

Erpadan aku Tuhan, makeken diriku ngelai Kam arah ngelai temanku manusia.

Lit.

Bagi Jesus reh ku doni enda naksiken kiniulin Dibata. Nggit nge kita ertutus ate naksiken kiniulin Tuhan ku sekelewetta?

Perp.

Erpadan aku Tuhan, naksiken Kam arah perukuren, pengerana ras perbahananku.

1.

O Tuhan ajari kami

Engkelengi teman kami

Si latih kote ras ndele

Ngidah p’ratenNa e.

Reff. Bage kap pedah Tuhanta

Sikeleng-kelengen

Bage kap pedah Tuhanta

Sisampat-sampaten

2.

O Tuhan pakelah kami

‘lah ngasup tutus nampati

Si labuh la jumpa dame

‘lah geluna jore.

Reff. Bage kap pedah Tuhanta

Sikeleng-kelengen

Bage kap pedah Tuhanta

Sisampat-sampaten

3.

O Tuhan pengasup kami

Nggejapken dingen ngapuli

Pusuh si rate mesui

Gelah terapuli.

Reff. Bage kap pedah Tuhanta

Sikeleng-kelengen

Bage kap pedah Tuhanta

Sisampat-sampaten

Turang ras senina, bengketilah kegeluhenndu si tep-tep wari. Gelah tetap kam ngasup majekken kula ni Kristus i bas Ersada, Ersaksi ras Ngelai, emaka alokenlah pasu-pasu idur Dibata nari : “Perkuah ate Tuhan Jesus Kristus, kekelengen Dibata ras kerembaken Kesah si Badia ras kam kerina gelah” Amin.

​

Perp. : A....min, A.......min, A......min