Qari mill-Ktieb
ta’Ġob
1, 6-22
Ġara darba li wlied Alla resqu quddiem il-Mulej, u fosthom ġie wkoll ix-Xitan.
U l-Mulej staqsa lix-Xitan:
“Mnejn inti ġej?”
Ix-Xitan wieġeb lill-Mulej u qallu:
“Minn dawra mad-dinja, kont nitlajja 'l hawn u 'l
hemm.”
Il-Mulej raġa' staqsa
lix-Xitan:
“Il-qaddej tiegħi Ġob ħsibt
fih? Ma hawnx ieħor bħalu fid-dinja, raġel perfett u tajjeb, jibża' minn Alla u mbiegħed mill-ħażen.”
Ix-Xitan wieġeb u qal:
“Tgħid għal xejn Ġob jibża‘minn Alla?
Forsi int ma bnejtx ħajt madwaru u madwar daru, u madwar kulma għandu kif iddur?
Berikt kulma għamlu idejh, u ġidu kotor mal-art kollha kemm hi.
Imma midd idek u olqot
kull ma għandu, u tara
jekk jisħtekx f'wiċċek.”
U l-Mulej wieġeb lix-Xitan:
“Ara, kull ma għandu f'idejk. Biss terfax idek fuqu.”
U x-Xitan telaq minn quddiem il-Mulej.
Mela darba wlied Ġob, subjien u bniet, kienu qegħdin jieklu u jixorbu
l-inbid għand ħuhom
il-kbir.
U ġie għand Ġob messaġġier jgħidlu:
“Il-gniedes kienu jaħartu,
bil-ħmir jirgħu ħdejhom:
qabżu fuqhom is-Sabijin u ħatfuhom, u lill-qaddejja darbuhom b'xifer is-sejf.
Bqajt jien waħdi biex ngħarrfek b'dan.”
Kien għadu ma waqafx jitkellem dan, meta ġie ieħor jgħidlu:
“Niżel nar ta' Alla
mis-sema, ħaraq
l-imrieħel u l-qaddejja, u belagħhom. Bqajt jien waħdi biex ngħarrfek b'dan.”
Kif kien għadu jitkellem,
ġie ieħor jgħidlu:
“Il-Kaldin niżlu fi tliet ġemgħat, u nxteħtu fuq
l-iġmla u ħatfuhom, u
lill-qaddejja darbuhom b'xifer is-sejf.
Bqajt jien waħdi biex ngħarrfek b'dan.”
Kif kien għadu jitkellem, ġie ieħor jgħidlu:
“Uliedek, subjien u bniet, kienu qegħdin jieklu u jixorbu l-inbid għand ħuhom il-kbir,
u dlonk qam riħ qawwi
min-naħa tad-deżert,
u ħabat għad-dar min-naħa tal-erba’ kantunieri tagħha u waqgħet fuq
iż-żgħażagħ u mietu.
Bqajt jien waħdi biex ngħarrfek b'dan.”
Imbagħad Ġob qam, ċarrat ħwejġu, qaxxar rasu, niżel wiċċu fl-art u beda jsalli u jgħid:
“Għeri ħriġt minn ġuf ommi, għeri nerġa' mmur hemm. Il-Mulej tani,
il-Mulej ħadli: ikun imbierek isem il-Mulej.”
F'dan kollu Ġob ma dinibx u ma qalx dagħwa waħda kontra Alla.
Il-Kelma tal-Mulej
R:/ Irroddu ħajr lil Alla
R:/ Ressaq widintek lejja Mulej, isma’ kliemi
Salm Responsorjali
Isma', Mulej, il-kawża ġusta tiegħi,
ilqa' l-għajta tiegħi,
agħti widen għat-talb tiegħi;
bla qerq huma xufftejja.
R:/ Ressaq widintek lejja Mulej, isma’ kliemi
Mingħandek toħroġ
il-ġustizzja għalija,
għajnejk jaraw
is-sewwa.
Jekk qalbi tiflili,
jekk billejl iżżurni,
jekk inti ġġarrabni,
ma ssib ebda qerq fija.
R:/ Ressaq widintek lejja Mulej, isma’ kliemi
Insejjaħlek,
għax int tweġibni,
o Alla;
ressaq widintek lejja,
isma' kliemi.
Uri t-tjieba tiegħek
tal-għaġeb; int li teħles mill-għedewwa lil min jittama fil-leminija
tiegħek.
R:/ Ressaq widintek lejja Mulej, isma’ kliemi
Hallelujah, Hallelujah
Bin il-bniedem ma
ġiex biex ikun moqdi,
imma biex jaqdi u biex
jagħti ħajtu f’fidwa
għall-kotra.
Hallelujah, Hallelujah
Qari mill-Evanġelju skont
San Luqa
Lq 9, 46-50
R:/ Glorja lilek Mulej
F’dak iż-żmien, qamet
kwistjoni bejn id-dixxipli dwar min kien l-akbar fosthom.
Ġesù għaraf x'kellhom
f'moħħhom, u ressaq tifel żgħir lejh, qiegħdu maġenbu, u qalilhom:
“Min jilqa' lil dan it-tifel żgħir minħabba f'ismi,
ikun jilqa' lili; u min jilqa' lili, ikun jilqa' lil dak li bagħatni.
Għax min hu l-iżgħar fostkom ilkoll, dak hu
l-kbir.”
Qabeż Ġwanni u qallu:
“Mgħallem, rajna wieħed ikeċċi x-xjaten f'ismek,
u ridna nżommuh,
għax hu m'huwiex wieħed minn tagħna.”
Imma Ġesù qallu:
“La żżommuhx, għax min m'huwiex kontra tagħkom, huwa magħkom.”
Il-Kelma tal-Mulej
R:/ Tifħir lilek Kristu