1.

Meriah kita ras k’rina

Sipuji Dibatanta.

Perban lias ateNa e,

IsehkenNa man banta pe.

Nggo pulung kita k’rina pe,

Ibas ingan enda,

Ibas ingan enda.

3.

Dage ‘lah ula lupa min,

Pehaga Dibatanta.

Alu perbahanenta kin,

Kelengilah pe temanta.

Ibas kegeluhenta e,

I babo doni e,

I babo doni e.

Lit.

O Tuhan, Tuhan kami, kemulian-Ndu teridah belang-belang doni. Seh ku Surga Kam terpuji;

Perp.

Danak-danak ras si gara-gara rende muji Kam. Kinirajan-Ndu nteguh la terundu, imbang si ngelawan Kam isompelNdu babahna

Lit.

Adi kutare ku langit tinepaNdu, kuidah bulan ras bintang-bintang si itamakenNdu i bas inganna.

Perp.

Kai kin manusia e, maka ingetNdu ia? Manusia kap ngenca, ngkai maka ipekena-kenaNdu ka ia?

Lit.

IbahanNdu ia teruhen asangken Kam ngenca, itangkuhkenNdu ia alu kemulian ras kehamaten.

Perp.

ItangkuhkenNdu ia jadi raja, merentah kerina tinepaNdu kerina itamakenNdu ku tapak-tapak nahena.

1.

Kam Tuhan Dibata simada kuasa

Singkelini k’rina doni enda

Badia gelarNdu mulia me tuhu

Kupuji gelarNdu bas geluhku

Kam Tuhan Dibata simada kuasa

Singkelini k’rina doni enda

2.

Kam Tuhan Dibata simada kuasa

Singerajai k’rina sinasana

K’rina tinepaNdu nembah mungkuk baNdu

Rasa lalap mujiken gelarNdu

Kam Tuhan Dibata simada kuasa

Singerajai k’rina sinasana

Lit.

Turang ras senina, bage ulina rencana Dibata i bas njadiken kita mulia dingen mehaga, gelah kita jadi temanNa njagai ras ngergaken kegeluhen. Si sedari nge maka bage kal ulina sura-sura Dibata i bas geluhta?

Perp.

......

Perp.

Ngaku kami Tuhan, maka megati labo isedari kami maka geluh kami meherga i adep-adepenNdu. Lanai idalanken kami sura-suraNdu guna njagai ras ngergaken kegeluhen. Emaka lanai idah doni enda pendahinNdu i bas geluh kami.

Lit.

I bas Dibata ngergaken sinasa lit alu mehuli dingen mulia, kuga nge ndia kita i bas ngergaken temanta manusia dingen njagai tinepaNa si deban?

Perp.

......

Perp.

Ngaku kami Tuhan, maka kurang ngergaken kemulianNdu si lit i bas diri teman bage pe tinepaNdu si deban. Seh maka kami lanai mediate dingen kepate nandangi teman kami manusia ras tinepaNdu si deban.

1.

Geluhku ku’ndesken baNdu

Si dem dosa

Sabab Kam Dibataku ngenca

Si ngasup mulahi aku

Ibas kuasa si gelap

Alemi aku Tuhan

Alemi aku Tuhanku

O Tuhan, alemi

Lit.

“Bali ras ganjangna langit i babo doni nari, bage kal me belinna keleng ateNa man kalak si erkemalangen baNa. Bagi dauhna Timur i Barat nari, bage me ipedauhNa dosa-dosanta i bas kita nari. Bagi keleng ate bapa man anak-anakna, bage kal me pengkelengi Dibata kalak si erkemalangen man baNa”

(Bdk. Masmur 103:11-13)

1.

Perban keleng ateNdu,

tebusiNdu geluhku.

Alu mambur darehNdu,

Geluhku jadi mbaru

Reff. Asa ngasup gegehku,

kuikutken kataNdu

Jesus kam si perkuah.

kupuji ras kusembah.

3.

Perban keleng ateNdu

jadikenNdu geluhku

Meherga ras erguna

Desken batu permata

Reff. Asa ngasup gegehku,

kuikutken kataNdu

Yesus kam si perkuah.

kupuji ras kusembah.

8.

Ibuang erkiteken la ngikutken kata TUHAN

Kata TUHAN seh man Sakaria nina,

9.

"Nai Kuperentahken bangsangKu, "Bahanlah keputusen si bujur i bas tep-tep perkara, janah cidahken lias ras perkuah ate sapih-sapih kam.

10.

Ula tindas diberu balu-balu, anak melumang, bangsa si deban si ringan i tengah-tengahndu, bage pe kalak si musil-musil. Janah ula ukurken si jahat sapih-sapih kam ras temanndu."

11.

Tapi tupung e nai la nggit bangsangKu megiken Aku. Mekeng ia, itutupna pinggelna,

12.

janah ipemersikna ukurna bali ras batu. Erkiteken la ia nggit megiken pengajaren si Kubereken arah KesahKu man nabi e, seh kal garana pusuhKu.

13.

Perbahan la idengkehkenna tupung Aku ngerana, emaka tupung ia ertoto la Kualoi.

14.

Desken angin kaba-kaba Kukencahken ia maka ringan i negeri kalak. Taneh si mehuli enda nggo tading terulang, dingen lanai lit ise pe ringan i je."

Lit.

​

:

Ketuahen kalak si megiken Kata Dibata, dingen simakekenca ibas geluhna si teptep wari, Haleluya.

​

Perp.

:

(iendeken)

Ha le lu ya, Ha le lu ya, Ha le lu ... ya.

34.

Undang-undang si pentingna

Kenca idah kalak Parisi maka lanai pang kalak Saduki nungkun man Jesus, arih-arih ia,

35.

jenari sekalak i bas ia nari, e me guru agama, ncubai Jesus alu penungkunen nina,

38.

"O Guru, perentah si apai kin si pentingna kal i bas kerina Undang-undang agama?"

37.

Erjabap Jesus, "Kelengilah Tuhan Dibatandu asa ukurndu, asa tendindu, dingen asa gegehndu lit.

38.

Enda me perentah si mbelinna dingen si pentingna.

39.

Si peduaken bali ras si ndai e me, ‘Kelengilah temanndu manusia bagi kam ngkelengi dirindu.’

40.

Kerina Undang-undang agama si ibereken Musa ras nabi-nabi erpalasken duana perentah enda ndai kap."

Lit.

:

“O senina-seninangku, nginget perkuah ate Dibata si mbelin si isehkenNa man banta, kupindo man bandu: endeskenlah kulandu man Dibata saja selaku persembahen si nggeluh rikutken si ngena ateNa. Sabab bage kap arusna kam ersembah man Dibata sue ras biakndu selaku mahluk si rukur”.

(Roma 12:1)

Lit.

Dibata nepa manusia menam seri ras IA dingen sentudu ras TempasNa. Selaku tinepa si meherga iadep-adepen Dibata, kai nge si jadi perpadanenndu man Dibata?

Perp.

Erpadan kami Tuhan, tetap njaga diri kami si sentudu ras tempasNdu alu engkelengi tinepaNdu si debanna.

Lit.

Dibata tetap ersura-sura makeken kita jadi aronNa guna nehken keleng atena man kerina manusia.

Perp.

Erpadan kam Tuhan, jadi aronNdu guna ngergaken teman kami manusia alu nehken keleng ateNdu man bana.

1.

I doni enda mbue kesusahen

Bage pe lit ka nge perubaten

Rehlah min KinirajanNdu

I gereja si arus ersada

Maka tangkas keg’luhen simbaru

Rehlah min kinirajanNdu

Reff. Rehlah min, rehlah min,

Rehlah min KinirajanNdu

2.

Gelah talu gelap kemusilen

Cidahkenlah terang keadilen

Rehlah min KinirajanNdu

I bas lawit i deleng i juma

I dalan, i tiga, ras i kota

Rehlah min kinirajanNdu

Reff. Rehlah min, rehlah min,

Rehlah min KinirajanNdu

3.

Bas pusuh, kata ras perbahanen

Kekelengen ras pe kebenaren

Rehlah min KinirajanNdu

Kam me kapen si mada si nasa

Ibas Kristus bangsaNdu ersembah

Rehlah min kinirajanNdu

Reff. Rehlah min, rehlah min,

Rehlah min KinirajanNdu

Berkatlah ndalani kegeluhenndu si meherga i adep-adepen Dibata alu tetap ngergaken Hak Azasi Manusia. Guna jadi gegehndu, alokenlah pasu-pasu idur Dibata nari : “Ipasu-pasu janah ikawali Dibata kam, siang ayo Dibata ersinalsal ibabondu, janah melias ateNa ngenehen kam. Itatap Dibata ku kam, janah malem atendu ibahanNa.” Amin.

​

Perp. : A....min, A.......min, A......min