1.

Wari Paskah wari badia

Enggo keke Jesus Tuhanta

Kita k’rina m’riah ukurta

BerekenNa geluh si mbaru

Reff. Dage mari kita kerina

Surak muji-muji gelarNa

Haleluya, Haleluya

Suraklah Haleluya

2.

Wari Paskah wari badia

Enggo menang Jesus Tuhanta

Enggo menang kap kita kerina

Bas kuasa kematen nari

Reff. Dage mari kita kerina

Surak muji-muji gelarNa

Haleluya, Haleluya

Suraklah Haleluya

3.

Wari Paskah wari badia

Kemenangen man banta kerina

Ula lupa nembah man baNa

simereken kemenangenta

Reff. Dage mari kita kerina

Surak muji-muji gelarNa

Haleluya, Haleluya

Suraklah Haleluya

1.

Enggo me talu kematen

Iban Tuhan Jesus e

Nggo me keke kepe Ia

Tudu ras padanNa pe

Haleluya, haleluya !

Nggo me keke Jesus e

Haleluya, haleluya !

Nggo me keke Jesus e

2.

Si Maria ras temanna

Lawes ku kuburen e

La jumpasa Tuhan Jesus

Nggo me keke Penebus

Haleluya, haleluya !

Nggo me keke Jesus e

Haleluya, haleluya !

Nggo me keke Jesus e

3.

Ralep-aleplah min kita

Perban keke Tuhan e

Nggo me menang kita k’rina

Nggo me talu kematen

Haleluya, haleluya !

Nggo me keke Jesus e

Haleluya, haleluya !

Nggo me keke Jesus e

Lit.

Turang ras senina, Tuhan enggo ...

.. menang naluken kuasa dosa doni enda.

Perp.

Megati la ipakeken kami kuasa si enggo iberekenNdu Tuhan, gegeh kami usuren ipake kami guna naluken kuasa dosa e, seh maka kami megati labuh ras kote, sabab gegeh kami saja la kepe ngasup ngelawan kuasa dosa doni enda.

(Song Leader ngendeken KEE No. 211:1)

Lit.

Turang ras senina, Kekeken Jesus mulahi...

... Ermeteruk ukur encidahken kekelengen man doni enda.

Perp.

Megati perukuren kami nge ipebelin kami Tuhan, seh maka jadi perukuren si jahat i bas kami. Erkiteken si e igejap kami maka kami la metunggung nggeluh iadep-adepen Tuhan.

​

(Song Leader ngendeken KEE No. 211:1)

Lit.

Marilah siakuken dosanta i lebe-lebe Dibata, nintalah i bas ukurta sekalak-sekalak:

O Tuhan ieteh kami kelepaken kami, rusur kami la ngergai perbahanenNdu si mehuli man kami. Rusur ilupaken kami maka Kam nggo nebusi kami alu darehNdu, gelah kami ngelakoken perbahanen si mehuli tapi perbahanen kami tetap bagi kalak si erkubang-kubang i bas dosa.

4.

I lebe-lebe Yesus

Teridah k’rina salahku

IalemiNa dosangku

I lebe-lebe Yesus

Perp.

…

Perp.

O Bapa ieteh kami kinilatunggungen kami guna ngaloken keselamaten i bas kam nari sabab geluh kami ikuasai dosa. Kebiaren ras aru ate erbahanca la meriah iakap kami i bas ndalani geluh enda. Sampati kami o Tuhan gelah kami ngasup nggeluh sentudu ras sura-suraNdu

1.

Kuakuken me dosangku

I lebe Tuhan

Megati aku lalar bas kegeluhenku

Keleng atendu pengarapenku

I teruh perkuahNdu malem me pusuhku

Keleng atendu pengarapenku

I teruh perkuahNdu malem me pusuhku

​

2.

Erlebuh aku baNdu

O Jesus Tuhanku

Alemi min o Bapa salah ras lepakku

Keleng ateNdu pengarapenku

Tedeh ‘teku ngidah belinna perkuahNdu

Keleng ateNdu pengarapenku

Tedeh ‘teku ngidah belinna perkuahNdu

Lit.

“La ateKu kam mate i bas dosa, tedeh ateKu kam ngakuken dosa-dosandu, sabab Aku me Tuhan Dibatandu si setia janah erkeleng ate man kalak si ngakuken dosana, si la nginget-nginget kesalahenndu.”

1.

Tendingku e nggo itulbasi

Lanai bene kap aku nge

Ban dareh Yesus me njelasi

Makana sai utangku pe

Kerajang doni dosa kap

‘Di erta surga e tetap

3.

Lah sangap k’rina manusia

Si lalar ibas dalin e

Nggo reh Penawar, mate IA

Lah si nggo tek temanNa nge

Idilo Jesus k’rina kap

Keleng ateNa min gejap

1.

Paskah

Sanga Musa ras Harun i Mesir ikataken TUHAN man bana nina,

2.

"Bulan enda me jadi bulan si pemena i bas perkiran tahunndu.

3.

Peseh lah perentah enda man kerina perpulungen bangsa Israel: I bas wari si pesepuluhken i bas bulan enda, tep-tep perbapan la banci la milih sada anak biri-biri ntah pe anak kambing guna keluargana.

4.

Adi keluargana e la nterem janah la kerisa sada anak biri-biri, tah anak kambing iraskenna ras kalak si deher rumahna gelah terkeriken sada anak biri-biri tah anak kambing alu mperkiraken teremna kalak si manca ras si terpan sekalak-sekalak.

5.

Banci ipilihndu biri-biri ntah pe kambing, tapi la banci la bajarna, umurna sada tahun, si la erpandangen.

6.

Kenca bage, karaben i bas wari si pesepulu empatken i bas bulan e, kerina perpulungen bangsa Israel arus nggeleh asuh-asuhen si nggo isikapken e.

7.

Darehna ibuat sitik, jenari tamaken ku binangun pintun si pajek duana ras ku beloti si berteng i babo pintun rumah ingan asuh-asuhen e ipan.

8.

I bas berngina dagingna arus ipanggang, jenari ipan ras gule-gulen si pagit ras roti si la itama ragi.

9.

La banci ipan matah-matah ntah pe itanggerken, tapi arus ipanggang kerina, subuk takalna, nahena ras isi beltekna.

10.

La banci itadingkenndu sitik pe seh erpagi-pagi; adi lit denga tading, la banci la itutung seh meseng.

11.

Pedas-pedas kam manca. Tupung si e arus kam make paken erdalan ndauh, pake sepatundu, cikep cikenndu. Eme Pesta Paskah guna enghamati Aku, TUHAN.

12.

I bas berngi si e mentas Aku arah tengah-tengah negeri Mesir munuh kerina anak dilaki sintua, subuk manusia bage pe asuh-asuhen bage pe kerina dibata-dibata bangsa Mesir. Aku kap TUHAN.

13.

Dareh si i bas pintun ndai, eme jadi sada tanda maka i je me kam ringan. Adi Kuidah dareh e, Kusilahi saja emaka la kam kena kai pe Kuban asum Kuukum kalak Mesir.

14.

La banci la irayakenndu wari e jadi sada pesta agama, guna peringet-ingeten man bandu, maka Aku, TUHAN nggo erbahan si enda kerina. Rayakenlah e i bas kerina paksa-paksa si reh enda."

Lit.

​

:

Ketuahen kalak si megiken Kata Dibata, dingen simakekenca ibas geluhna si tep-tep wari, Haleluya.

Perp.

:

(iendeken)

Ha le lu ya, Ha le lu ya, Ha le lu … ya.

1.

Kekeken Jesus

Kenca lepas wari Sabat, erpagi-pagi si lampas wari Minggu, lawes Maria Magdalena ras Maria si deban ku kuburen Jesus.

2.

Rempet jadi linur mehantu kal. Sekalak malekat Tuhan nusur i Surga nari, igulingkenna batu e jenari kundul ia i babona.

3.

Ayona ersinalsal bagi kilap janah uisna mbentar bagi kapas.

4.

Mbiar kal perajurit-perajurit si erjaga e, nggirgir ia jenari ampar bagi kalak mate.

5.

Ngerana malekat e man diberu ndai, "Ola kam mbiar! Kueteh nge maka idaramindu Jesus si nggo ipakuken ku kayu persilang e.

6.

Ia lanai i jenda. Ia nggo ipekeke Dibata i bas si mate nari bagi nggo pernah IkatakenNa man bandu. Mari, nehenlah InganNa cibal e.

7.

To pedas-pedaslah kam lawes, katakenlah man ajar-AjarNa, ‘Ia nggo ipekeke i bas si mate nari, janah genduari leben Ia ku Galilea asa kam. I jah idahndu me Ia.’ Ingetlah kai si kukataken man bandu enda."

8.

Emaka minter itadingken diberu ndai kuburen e. Mbiar kal ia janah meriah ka ukurna. Kiam-kiam ia, ijumpaina ajar-ajar Jesus guna ngatakenca.

9.

Rempet reh Jesus njumpai diberu e nina, "Mejuah-juah!" Ideheri kalak e Jesus, ijemakna nahe Jesus janah isembahna.

10.

Nina Jesus man bana, "Ola kam mbiar to lawes, suruh senina-seninangKu ku Galilea. I jah idahna me Aku."

3-4

I tengah dalan nungkun ia sapih-sapih ia nina, "Ise kari nampati kita nggulingken batu si nutupi kuburen e?" Batu e seh kal galangna. Tapi kenca ia seh, idahna kuburen e nggo talang.

5.

Emaka bengket ia ku bas, janah idahna i je sekalak anak perana, mbentar uisna kundul arah kemuhen. Mamang kal atena.

6.

Tapi iperkuanken anak perana ndai ia nina, "Ola mamang atendu! Kueteh nge maka idaramindu Jesus kalak Nasaret si ipakuken ku kayu persilang. Ia lanai i jenda. Ia nggo keke! Nehenlah! Enda kap InganNa.

7.

Genduari mulihlah janah beritaken man Petrus ras ajar-AjarNa, nindu, ‘Ia nggo leben ku Galilea; i jah kam ItimaiNa bagi si nggo IkatakenNa man bandu.’"

8.

Emaka ndarat kalak ndai i bas kuburen e nari jenari kiam ia perbahan mamang atena dingen mbiar kal ia. Perbahan biarna lanai iturikenna man ise pe.

Lit.

:

“I bas si e arus iingetndu gelah ipatuhindu undang-undang si ipedahken Musa man bandu; kelengilah Tuhan Dibatandu. Bahanlah kai si ngena ateNa, ikutken pedahNa, patuhlah man baNa, janah permuliakenlah IA alu bulat ukurndu ras tendindu”

1.

O Kam Dibatangku,

Kudarami dingen tedeh ateku

Mesikel aku nandangi Kam,

Desken taneh tenggiring si kerah

Reff. Ku puji Kam, ku puji Kam

bas kegeluhenku

Kam si mulahi aku,

bas k’rina kinis’ran

2.

O Kam Dibatangku,

Pelepas kuidah Kam irumahNdu

Maka kuidah kemulianNdu,

Kupuji Kam ateku bas g’luhku

Reff. Ku puji Kam, ku puji Kam

bas kegeluhenku

Kam si mulahi aku,

bas k’rina kinis’ran

3.

Kidekah umurku,

Aku reh ngataken bujur man baNdu

Nare tanku erlebuh baNdu,

Alu ende-enden si meriah

Reff. Ku puji Kam, ku puji Kam

bas kegeluhenku

Kam si mulahi aku,

bas k’rina kinis’ran

Lit.

Dibata enggo naluken kuasa dosa. KekekenNa mereken kegeluhen si mbaru ras mereken jaminen keselamaten man banta, uga dage ninta ngaloisa?

Perp.

Alu paguh kegeluhenku tetap i bas Kristus si jadi keselamatenku, kubahan IA jadi ulu gegehku i bas aku ngalaken perbeben geluh enda.

Lit.

Kekeken Kristus njamini kita, gelah metunggung i adep-adepen Dibata janah metunggung ndahiken dahin Tuhan jadi perberita si meriah ku sekelewetta. Uga dage ninta?

Perp.

Ateku makeken kula, tendi ukurku, meritaken berita si meriah i bas kerina dampar geluhku.

1.

Sendah wari Paskah m’riah ukurta

Jesus enggo keke tangkas kuasaNa

Sendah wari Paskah malem ateta

Jesus enggo keke nebusi dosa

Reff. Surak haleluya o haleluya

Jesus enggo menang

kita pe senang

​

2.

Ngerayaken Paskah bas kegeluhen

Jesus sisaksiken bas perbahanen

Maba keriahen ras pengarapen

Jesus sisaksiken ras sipembarken

Reff. Surak haleluya o haleluya

Jesus enggo menang

kita pe senang

​

3.

S’lamat wari Paskah bas wari enda

M’riahlah ukurta sembah Dibata

Sangap kita banNa dame pusuhta

‘Nggo italukenNa k’rina musuhta

Reff. Surak haleluya o haleluya

Jesus enggo menang

kita pe senang

​

​

“Aku me Dibatandu si milih kam jadi persuruhenKu. Ku pasu-pasu kam, Ku kawali kam janah Kupegegehi kam guna ndahiken si ngena ateKu. Aku tetap ras kam seh ku kedungen jaman.” Amin

​

Perp. : A....min, A.......min, A......min

​