Qari mill-Ktieb
tal-Profeta Eżekjel
(Eżek 1, 2-5.24-28ċ)
Fil-ħamsa tax-xahar, meta s-sultan Ġeħojakin kien ilu ħames snin itturufnat,
il-kelma tal-Mulej ġiet lil Eżekjel, bin il-qassis Bużi,
fl-art tal-Kaldin ħdejn
ix-xmara Kebar; kien hemm li ġiet fuqu id il-Mulej.
Kont qiegħed inħares, u f’daqqa waħda ħassejt
riefnu ġej min-naħa
tat-Tramuntana, u rajt sħaba kbira, imdawra bid-dija,
u nar ileħħ il-ħin kollu minnha, u ġon-nar bħal bronż ileqq.
F’nofsha kien hemm xbieha ta’ erba’ ħlejjaq ħajjin, li mid-dehra tagħhom kellhom is-sura ta’ bniedem.
U smajt il-ħoss ta’ ġwenħajhom bħall-ħoss ta’ ilma kotran, donnu l-leħen ta’ Alla li jista’ kollox;
huma u mexjin kienu jagħmlu ħsejjes li jtarrxu, qisu l-ħoss ta’ eżerċtu, u meta jieqfu kienu jniżżlu ġwenħajhom.
Instema’ ħoss mill-għoli
tas-sema mifrux fuq rashom; u meta huma waqfu niżżlu ġwenħajhom.
Fl-għoli tas-sema, mifrux fuq rashom, kien hemm bħal żaffir f’għamla ta’ tron,
u fuq din l-għamla ta’ tron kien jidher bħal bniedem bilqiegħda fuqu fl-għoli.
U rajt bħal bronż ileqq donnu nar li kien jagħlqu minn kullimkien, qisu minn ġenbejh ’il fuq;
u rajt bħal nar qisu minn ġenbejh ’l isfel u dija madwaru kollu, bħal qawsalla fis-sħab meta tagħmel ix-xita;
hekk kont tistħajjilha d-dija ta’ madwaru. Hekk dehritli x-xbieha tal-glorja tal-Mulej, u malli rajtha nxtħett wiċċi fl-art.
Il-Kelma tal-Mulej
R:/ Irroddu ħajr lil Alla
Salm Responsorjali
R./ Is-smewwiet u l-art mimlija bil-glorja tiegħek
Faħħru l-Mulej
mis-smewwiet,
faħħruh fl-ogħla smewwiet!
Faħħruh, anġli tiegħu kollha,
faħħruh, eżerċti tiegħu kollha!
R./ Is-smewwiet u l-art mimlija bil-glorja tiegħek
Is-slaten ta' l-art u l-ġnus kollha,
il-kbarat u l-imħallfin kollha ta' l-art,
iż-żgħażagħ u x-xbejbiet ukoll,
ix-xjuħ flimkien
mat-tfal:
ħa jfaħħru isem il-Mulej.
R./ Is-smewwiet u l-art mimlija bil-glorja tiegħek
Għax ismu waħdu l-għoli, sebħu ’l fuq mill-art u
s-sema!
Hu għolla l-qawwa
tal-poplu tiegħu;
dan hu t-tifħir għal ħbiebu kollha,
għal ulied Iżrael, il-poplu għażiż tiegħu.
R./ Is-smewwiet u l-art mimlija bil-glorja tiegħek
Hallelujah, Hallelujah
Alla sejħilkom permezz
tal-Evanġelju,
biex ikollkom sehem
fil-glorja ta’ Ġesù Kristu.
Hallelujah, Hallelujah
Qari mill-Evanġelju skont
San Mattew
Mt 17, 22-27
R:/ Glorja lilek Mulej
F’dak iż-żmien, meta
d-dixxipli kienu flimkien
fil-Galilija, Ġesù qalilhom:
“Bin il-bniedem għandu jkun mogħti f'idejn
il-bnedmin u joqtluh, u
fit-tielet jum iqum.”
U huma sewwdu qalbhom ħafna. Reġgħu daħlu Kafarnahum, u resqu fuq Pietru dawk li jiġbru t-taxxa
għat-tempju, u qalulu:
“L-imgħallem tagħkom
ma jħallashiex it-taxxa?”
“Iva!”
qalilhom.
Meta daħal id-dar, Ġesù, bla ma ħallieh jitkellem, staqsieh:
Int x’jidhirlek Xmun?
Is-slaten tal-art mingħand min jiġbruha t-taxxa jew
il-ħaraġ,
mingħand is-sudditi jew mingħand il-barranin?”
“Mingħand il-barranin,”
wieġbu Pietru.
U Ġesù qallu:
“Mela s-sudditi meħlusa minnha. Iżda, biex ma tkun ta’ ebda skandlu għalihom, asal wasla
sal-baħar,
ixħet ix-xlief u, l-ewwel ħuta li ttalla’, aqbadha, iftħilha ħalqa, u għandek issib munita tal-fidda;
ħudha minn hemm u mur agħtiha lilhom għalija u għalik.”
Il-Kelma tal-Mulej
R:/ Tifħir lilek Kristu