1.

Ibas Tuhan aku megegeh,

Tuhan me kupujiken

Tuhan me jadi gegehku

Ibas IA lit kesenangen

Ibas IA lit kesenangan

Lit.

:

Pujin man Tuhan i bas kerina perbahanen ras keleng atena si tetap

Perp.

:

Kam simperdiateken geluh kami, si mereken kai si iperluken kami i bas paksana.

Lit.

:

Kam me ulu pengarapen kami O Tuhan

Perp.

:

....

Perp.

:

Si mulahi kami i bas perbeben geluh kami ras si naluken imbang-imbang si ilat perukurenna.

Perp.+Lit.

:

Terpujilah Kam O Tuhan si tetap setia erdahin njagai dingen ngkawali kegeluhen kami.

1.

Tupung tayang aku nginget Kam

Gedang berngi ku ukuri Kam

Sabab Kam si nampati aku

O Dibata tedeh ‘teku Kam.

Reff. O Dibata Kam kap Dibatangku

Kudahi tedeh ateku Kam

Mesikel aku nandangi Kam

Desken taneh si enggo kerah

Bageme muasna tendingku

Man baNdu Tuhan Dibatangku

2.

Sabab Kam si nampati aku

Teruh kabengNdu rende aku

‘Di ras Kam meriah ukurku

O Dibata Kam sekawalku.

Reff. O Dibata Kam kap Dibatangku

Kudahi tedeh ateku Kam

Mesikel aku nandangi Kam

Desken taneh si enggo kerah

Bageme muasna tendingku

Man baNdu Tuhan Dibatangku

3.

Nteguh cikep tanku o Tuhan

Teneng ukurku adi ras Kam

La ku mbiar jumpa percuban

Malem ate ‘di rembak ras Kam.

Reff. O Dibata Kam kap Dibatangku

Kudahi tedeh ateku Kam

Mesikel aku nandangi Kam

Desken taneh si enggo kerah

Bageme muasna tendingku

Man baNdu Tuhan Dibatangku

Lit.

:

Turang ras senina, kita nggeluh i tengah-tengah doni si dem alu perbeben. Eme si jadi rudang i tengah kegeluhenta. Lit si ngasup ertahan ibas perbeben si reh nderpa ia, tapi mbue ka si guling janah lanai ngasup keke perbahan beratna perbeben e. Lit ka deba bene pengarapen geluhna sabab lanai ngasup ngidah si mehuli i bas doni enda. Manusia ndarami ingan cicio arah perbebenna, ndarami dalan pulah ras terkelin.

Lit.

:

Turang ras senina, i bas paksa enda Dibata lit i tengah-tengahta guna megiken isi pusuhta, emaka marilah si turiken man Dibata kai si jadi perbeben geluhta

Perp.

:

O Tuhan, kelengilah aku, pulahilah aku i bas kesusahen ras perbeben geluhku.

Lit.

:

Turikenlah man Dibata kai si jadi kebiarenndu.

Perp.

:

O Tuhan, berelah gegehNdu man bangku, sampati min aku gelah pulah i bas si jahat nari si atena ngerimrim aku

Lit.

:

Turikenlah man Dibata kai si jadi kebiarenndu.

Perp.

:

O Tuhan, megati aku lalar erkiteken buena perbeben geluhku, ku darami penampat si deban si la i bas Kam nari. Ndabuh aku ku bas dosa erkiteken la aku setia man banNdu. O Tuhan, alemi min aku. Pulahi min aku i bas kuasa dosa nari.

1.

Tuhan Alemi aku,

Alemi dosa ras kesalahenku

Bereken bangku pusuh si mbaru

Gelah metunggung iadepenNdu

​

2.

Tuhan alemi aku,

Sura-surangku rusur kuikutken

Ajari aku kerna p’ratenNdu

Petangkas kai arus kulakoken

3.

Tuhan Alemi aku,

Rusur denga lagungku la mehuli

Ku ban si jahat bas pengakapNdu

Sasapken k’rina salah lepakku

​

Lit.

Nina Tuhan, man banta kerina kita si enggo nuriken perbebenta man baNa :

“Enggo Kubegi kerina isi pusuhndu. Aku me Tuhan Dibata si erkeleng ate man bandu, Kupulahi kam i bas kesusahenndu janah Kualemi salah ras dosandu. Marilah kam si latih dingen beraten, maka kubereken pengadi-ngadinndu.”

1.

Tuhan tetap nemani geluhku

Dingen mereken dalan man bangku

Ernalem gelah tetap

Ras ertoto man baNa

Tuhan tetap nemani geluhku

2.

Tuhan tetap nemani geluhku

Dingen mereken dalan man bangku

Tedeh ate tendingku

Ngidah kemulianNdu

Tuhan tetap nemani geluhku

3.

Tuhan tetap nemani geluhku

Dingen mereken dalan man bangku

Enda me keg’luhenku

Ku endesken man baNdu

Tuhan tetap nemani geluhku

3.

Pertoton Paulus kerna si ngoge suratna

Kuinget kenca kam, kukataken bujur man Dibatangku erdandanken kam.

4.

Tep-tep aku ertoto kerna kam kerina, ertoto aku alu meriah ukur.

5.

Nginget kuga kam nampati aku i bas dahin meritaken Berita Si Mehuli, tangtangna nari seh genduari.

6.

Bage pe tek aku maka iterusken Dibata nge dahin si mehuli si nggo IbenakenNa i bas kam seh ku warina Kristus reh mulihken.

7.

Kuinget kam lalap! Janah patut nge bagenda penggejapenku kerna kam. Sabap kerina kam nggo ras aku ngenanami lias ate si ibereken Dibata man bangku, subuk genduari asum aku i bas penjara, bage pe nai asum aku bebas denga mpertahanken ras mpeteguhi Berita Si Mehuli e alu tutus ate.

8.

Tuhu-tuhu tedeh kal ateku nandangi kam kerina alu keleng ate si rehna i bas Jesus Kristus nari. Dibata saksingku maka kai si kukataken enda la bual.

Lit.

​

:

Ketuahen kalak si megiken Kata Dibata, dingen simakekenca ibas geluhna si tep-tep wari, Hosiana.

Perp.

:

(iendeken)

Ho si a na, Ho si a na, Ho si a … na.

Lit.

¹⁵Tapi Kam kap pengarapenku, o TUHAN, Kam kap Dibatangku.

Perp.

¹⁶Kidekah umur geluhku aku tetap i bas TanNdu pulahi aku i bas imbang-imbangku nari, i bas kalak si ngayak-ngayak aku.

Lit.

¹⁷Perdiateken min aku suruh-SuruhenNdu, erkiteken KiniulinNdu erdandanken keleng AteNdu, kelini min aku.

Perp.

¹⁸Erlebuh aku man BaNdu o TUHAN, ula pediat aku kemalun. Bahanlah maka juru me kalak jahat alu lanai ngerana lawes ia kubas doni kematen.

Lit.

¹⁹Sompel min babah kalak perguak, si megombang dingen meganjang rukur, simelasken cakap megombang man kalak bujur

Lit.

:

Tuhan kap permakanku, emaka la kekurangen aku. Ibas mbal-mbal si meratah ipesenang-senangNa aku. Kempak lau si teneng permalerna, itegu-teguNa aku. ibabaiNa aku arah dalan si pinter erkiteken gelarNa (Mazmur 23 : 1- 3)

1.

O Tuhanku Kam me permakanku

E maka la kekurangen aku

Ku mbal-Mbal m’ratah aku babaNdu

I pesenang-senangNdu geluhku

Reff. Permakanku sinjayam geluhku

Malem ateku senang tuhu

KelengNdu tetap maler man bangku

Kam me Tuhanku, Permakanku

2.

IteguNdu kempak lau si maler

IbahanNdu ateku nggo malem

E maka tedeh ate tendingku

Kempak keg’luhen si sikapkenNdu

Reff. Permakanku sinjayam geluhku

Malem ateku senang tuhu

KelengNdu tetap maler man bangku

Kam me Tuhanku, Permakanku

3.

Amin aku bas kelbung si gelap

Arapenku man Tuhan e tetap

La nai mbiar ndalani geluh e

Sabab Tuhan e temanku jine

Reff. Permakanku sinjayam geluhku

Malem ateku senang tuhu

KelengNdu tetap maler man bangku

Kam me Tuhanku, Permakanku

Lit.

Dibata erpadan man banta guna ngkawali ras mpengasup kita i bas kerina dampar kegeluhenta, uga dage ninta?

Perp.

Kami erpadan tetap ernalem man Tuhan i bas kerina dampar geluh kami.

Lit.

Kai dage tandana kam ernalem man Dibata?

Perp.

Ateku makeken geluhku guna ersaksi i tengah-tengah doni enda, kudalanken kai si ngena ate Tuhan.

Lit.

Mari dage sipegegehi perpadanenta man Tuhan alu rende kita : ......

1.

Kawali perpulungenNdu Tuhan

bas perdalan geluh

Ibas geluh susah tah pe senang

Subuk ngalo ntah mere

Tegu perpulungenNdu Tuhan

Jagai ibas tanNdu

Babai ku bas lau maler si teneng

Bas dalin kiniteken

2.

Tuahi perpulungenNdu Tuhan

Si maba pusuh dame

Singgeluh mereken pengarapen

Si dem bas kekelengen

Sampat perpulungenNdu Tuhan

Bas jumpa percuban

Babai ku bas lau maler si teneng

Bas dalin kiniteken

3.

Sampat perpulungenNdu o Tuhan

Nggejap keleng ateNdu

Petetap ukur anakNdu Tuhan

Cikep ‘nteguh padanNdu

Lalit ingan malem si deban

‘di la ras Kam Tuhan

PadanNdu kap gelemenku Tuhan

Gelah aku terkelin

Laweslah, cidahkenlah kinitekenndu, dalankenlah kebujuren Dibata, ola kam mbiar, Dibata si nemani ras si nikapken kerina keperlunndu, alokenlah pasu-pasu idur Dibata nari :

​

“i pasu-pasu janah i kawali Dibata kam, siang ayo Dibata ersinalsal i babondu janah melias ateNa ngenehen kam, i tatap Dibata ku kam janah malem atendu ibahanNa”. Amin

​

Perp. : A....min, A.......min, A......min

​