Palapala Kāinoa no Ka'ahele Wai'anae 2017

Aloha e ka mea hoʻokūkū,

Ua hoʻokumu mua ʻia ka papahana ʻo Kaʻahele Waiʻanae ma ka makahiki 2012 i mea e lūlū ai ke kālā no ke kula kaiapuni ʻōlelo Hawaiʻi no nā kamaliʻi o ke kula ʻo Pūnana Leo o Waiʻanae. ʻO ka pahuhopu o ia papahana ʻo ia hoʻi ka hoʻonaʻauao ʻana aku i ke kaiaulu ʻōlelo Hawaiʻi no nā wahi pana o ke kapakai o Waiʻanae ma o ka ʻōlelo makuahine. He moʻolelo ko kēlā a me kēia wahi pana, a he mea ia e hoʻoikaika ai i ko kākou pilina i ia mau ʻāpana ʻāina. Ma o ka hoʻomau ʻana i nā moʻolelo a me ke ʻano nohona o ko kākou poʻe kūpuna kākou e kākoʻo mau ai i kā kākou mākia, “E ola ka ‘ōlelo Hawaiʻi.” Mai ke kūkulu mua ʻia ʻana ʻo Kaʻahele Waiʻanae, ua mālama ʻia kēia papahana i kēlā a me kēia makahiki. Ke kākoʻo ʻia nei ke ola o ka ʻōlelo Hawaiʻi ma Waiʻanae ma o ke kākoʻo ʻana mai i nā haumāna a me nā ʻohana o kēia kula kaiaʻōlelo Hawaiʻi.
Ma ka lā 6 o Mei, makahiki 2017, e mālama ʻia ai ka hoʻolauleʻa piha makahiki ʻeono ʻo ka papahana Kaʻahele Waiʻanae. He hapalua lā ka lōʻihi o ka pāʻani hamupela ma kapakai o Waiʻanae. Ma kahi o ka 25 kime pakanā ke ʻākoakoa mua ma ka pāka lihikai ʻo Māʻili i mea e loaʻa ai nā ʻōkuhi a me nā ʻōlelo hoʻokolo e pili ana i nā moʻolelo o nā wahi pana a e kuhikuhi ana i kahi e hele ai. He mau hana kēia e komo ai ka noʻonoʻo a me ke kino ma nā ʻano hanana like ʻole. E pani ana ka hoʻolauleʻa Kaʻahele Waiʻanae ma ka pāka ʻo Māʻili, kahi e hōʻikeʻike ai nā kula kaiaulu, e kūʻai ʻia aku ai nā ʻano meaʻai like ʻole, nā mea hana noʻeau, a e hoʻohanohano pū ʻia aku ai nā mea lanakila.
Hiki i nā ʻano kānaka like ʻole ke komo i ka hoʻokūkū mai ka pae makahiki 12 a ʻoi, eia naʻe, e aho e poeko ʻoe ma ka ʻōlelo Hawaiʻi, a e paʻa maikaʻi hoʻi ke ola kino no ke komo ʻana i nā hanana like ʻole. Inā he moho ʻoe i komo mua i ka hoʻokūkū a i ʻole ʻo kēia kou manawa mua, inā he kamaʻāina ʻoe no Waiʻanae a i ʻole he malihini hoʻi, he leo kono kēia iā ʻoe e naue mai, a e komo i kēia hoʻokūkū o Kaʻahele Waiʻanae! E hoʻomaopopo wale mai inā he mau nīnau a manaʻo paha kou no ke kāinoa ʻana.


Naʻu nō, me ha‘aha‘a a me ka mahalo ho‘i,

Keʻalohilani Medeiros
Ka‘ahele Wai‘anae Registration Coordinator
kaahele.waianae@gmail.com
(cell) (808)753-6841

-----------------------------------------------------------------------------------------------------------------------------------------------------------

Nā Lula

1. He ʻelua lālā ko kēlā a me kēia kime.

2. ʻO ka ʻumi kumamālua a ʻoi makahiki ke komo i ka hoʻokūkū.

3. E hoʻopihapiha a pūlima kēlā a me kēia lālā i ka palapala hoʻokuʻu kuleana ma ka hiki ʻana aku i kahi hoʻokūkū.
Koi ʻia nā mākua e pūlima i ia palapala hoʻokuʻu kuleana no nā keiki ma lalo o ka ʻumi kumamāwalu makahiki.

4. E pono ana kekahi lālā o ke kime e ʻau no ka ʻaʻa ʻana i kekahi o nā hanana hoʻokūkū.

5. Na kēlā a me kēia kime e hoʻolako i kona kaʻa iho.

6. E noho paʻa kēlā a me kēia lālā o ke kime kekahi me kekahi. ʻAʻole ʻae ʻia ka hoʻokaʻawale ʻia ʻana o nā kuleana no ka hoʻokō koke ʻana i nā koina hoʻokūkū.

7. ʻAʻole ʻae ʻia ka wehe ʻana i nā waihona ʻōlelo hoʻokolo a i ka hoʻomaka ʻana o ka hoʻokūkū i ka lā 8 o ʻApelila, hola ʻewalu o ke kakahiaka. Mālama ʻia ka wā kākau inoa mai ka hola ʻehiku a i ka hola ʻewalu o ke kakahiaka ma ka pāka kahakai ʻo Māʻili.

8. E hoʻolauleʻa a e ʻimi i ka lei o ka lanakila. E hoʻomaopopo i ka lawena hoʻokūkū kūpono, ʻoiai he hana kēia e lauleʻa ai kākou kekahi me kekahi. Inā he hana ʻāpuka, he waha heʻe, a he hana maʻalea wale kā ke kime e pilikia ai kekahi kime ʻē aʻe, e kīpaku hoʻi ʻia ana nō ia kime hana ʻino.

9. Lawa kūpono ana nō ka wā e hoʻokō ai i nā hanana like ʻole o ka hoʻokūkū. E kani ana paha ka hola hoʻopau ma ka hola ʻekahi o ka ʻauinalā.

10. E MĀLAMA KĀKOU I NĀ KĀNĀWAI AUPUNI A ME NĀ KĀNĀWAI ALANUI E OLA PONO AI KĀKOU!!!

11. Ke noi ʻia nei nā kime e noho paʻa a i ka wā o ka ho‘olaulea ma ka pāka kahakai ʻo Mā‘ili kahi e hoʻolako ʻia ai ka meaʻai a e hōʻikeʻike ai nā hui a me nā puolo like ʻole. E mālama ʻia ana ka ʻaha hoʻohanohano ma kahi o ka hola ʻekolu o ka ʻauinalā.


-----------------------------------------------------------------------------------------------------------------------------------------------------------
Kāki Kāinoa Hoʻokūkū

Inā e kāinoa ʻoe ma o ka punaewele, e uku ʻoe ma o ke kāleka hōʻaiʻē. Ma ka loaʻa ʻana mai o kāu palapala kāinoa, e hoʻouna ʻia aku he leka uila e hōʻoia ana i kou komo ʻana i ka papahana me nā ʻōkuhi uku ma o ka punaewele. Koi ʻia kou uku ʻana i ke kāki i loko nō o ke 72 hola o ka hoʻouna ʻana aku i ka palapala kāinoa i mea e mālama ai i kou kūlana moho hoʻokūkū. Inā ʻaʻole uku ʻia ke kāki i loko o kēia wā, e kāpae ʻia ana kou kūlana moho hoʻokūkū.

$50.00* Kāki Kāinoa Hiki Mua (Lā Palena Pau: ʻApelila 6, 2017)
$60.00 Kāki Kāinoa Hiki Hope (Lā Palena Pau: Mei 1, 2017)
*Uku ʻia kāu meaʻai a me nā paleʻili kūikawā no kēlā a me kēia lālā o ke kime hoʻokūkū. ʻAʻole hiki ke hoʻohiki ʻia ka loaʻa a loaʻa ʻole paha o kou nui paleʻili inā uku ʻia kāu kāki kāinoa ma hope o ka lā 6 o ʻApelila.
    This is a required question
    This is a required question
    This is a required question
    This is a required question
    This is a required question
    This is a required question
    This is a required question
    This is a required question
    This is a required question
    This is a required question
    This is a required question