Nýsköpunarhreyfingin Sunnanátt býður frumkvöðlum upp á öflugt Sóknarfæri í nýsköpun þar sem þátttakendur fá tækifæri til að efla sig og sín fyrirtæki og vaxa með sunnanáttina í bakið.

Sóknarfæri í nýsköpun er átta vikna viðskiptahraðall sem beinist að nýsköpun og tækniþróun í orku, mat og líftækni, ferðaþjónustu og skapandi greinum.

Sóknarfæri í nýsköpun hefst 23. janúar og lýkur 16. mars. Hraðallinn fer að mestu leyti fram á netinu en teymin munu hittast fjórum sinnum á meðan hraðlinum stendur í vinnustofum á völdum stöðum á Suðurlandi. Þar munu teymin hitta reynslumikla leiðbeinendur, frumkvöðla, fjárfesta og stjórnendur fyrirtækja.

Lokaviðburður Sóknarfæra í nýsköpun fer fram 16. mars með fjárfestakynningum teymanna sem taka þátt.

Leitað er að frumkvöðlum, nýjum fyrirtækjum og nýsköpunarverkefnum innan rótgróinna fyrirtækja á Suðurlandi sem vilja nýta Sóknarfæri í nýsköpun til að vaxa, efla sín verkefni og mynda sterkt tengslanet.

Umsóknarfrestur er til og með 12. desember.

Samstarfsvettvangurinn Sunnanátt er hreyfiafl í nýsköpun sem vill skapa kraftmikið umhverfi fyrir frumkvöðla og fyrirtæki sem vinna að nýsköpun á Suðurlandi. Að Sunnanátt standa SASS, Háskólafélag Suðurlands, Nýheimar þekkingarsetur, Þekkingarsetur Vestmannaeyja, Kötlusetur, Kirkjubæjarstofa, Markaðsstofa Suðurlands, Orkídea og Ölfus Cluster. Auk þess koma að samstarfinu  fjölmargir aðilar, svo sem  starfsmenn sveitarfélaga og annað áhugafólk um nýsköpun og atvinnuþróun á svæðinu. 
Bakhjarjar Sunnanáttar eru SASS, Lóa nýsköpunarsjóður á landsbyggðinni og Orku-, umhverfis- og loftlagsráðuneytið.