Паважаныя абітурыенткі і абітурыенты,
запрашаем вас на падрыхтоўчы інтэнсіў ад выкладчыкаў бакалаўрскай праграмы «Гісторыя» (Дэпартамент гуманітарных навук і мастацтваў ЕГУ).

Што, калі гісторыя — гэта не пра тое, «як было насамрэч», а пра тое, як людзі бачылі сябе і іншых, як яны апісвалі і разумелі свой час — і што засталося паміж радкоў.

Дэпартамент гуманітарных навук і мастацтваў ЕГУ запрашае абітурыентаў на падрыхтоўчы інтэнсіў ад выкладчыкаў бакалаўрскай праграмы «Гісторыя».

❗️Унікальная магчымасць: інтэнсіў ужо стартаваў, але вы можаце далучыцца ў якасці слухача ў любы момант да яго завяршэння. Каб далучыцца - калі ласка, запоўніце форму

Падрыхтоўчы інтэнсіў — гэта 6 аўтарскіх лекцый, у якіх выкладчыкі праграмы дзеляцца не шаблоннымі ведамі, а уласным даследчыцкім вопытам. Гэта магчымасць убачыць, якой можа быць гісторыя, і паспрабаваць сябе ў ролі даследчыка, інтэрпрэтатара, назіральніка.

📍 Фармат удзелу - анлайн (Zoom)
📍 Як праходзяць заняткі - 1 занятак = дзьве акадэмічныя гадзіны (да 90 хвілін)
📍 Мова навучання - беларуская, руская
🕒 Агулам - 6 заняткаў

💡 Удзельнікі-абiтурыенты, якія паспяхова завершаць усю праграму інтэнсіву, вызваляюцца ад уступнага суразмоўя пры паступленні на праграму «Гісторыя» Дэпартамента гуманітарных навук ЕГУ. Акрамя таго, інфармацыю пра праходжанне інтэнсіву можна уключыць ў сваё партфоліа пры падачы на гранты на аплату навучання.

ПРАГРАМА ІНТЭНСІВУ

1. 20 траўня — Уводзіны: Шматаблічнасць замест аб’ектыўнасці?
   Гісторыя як поле інтэрпрэтацый. Чаму адна і тая ж падзея можа мець некалькі «ісцін»?
   
   

2. 27 траўня — Ад літары да тэксту: берасцяныя граматы, цэры, графіці
   Што мы можам зразумець пра мінулае па самых простых штодзённых надпісах?
   
   

3. 3 чэрвеня — Летапісы і хронікі: як чытаць старажытныя тэксты
   Чаму летапісы — гэта не «рэпартажы», а асаблівы спосаб мыслення пра час?
   
   

4. 10 чэрвеня — Хто былі продкі? Праблема ідэнтычнасці ў Сярэднявеччы і раннім Новым часе
   Нацыі, роды, вераванні — як у мінулым вызначалі, хто «мы»?
   
   

5. 17 чэрвеня — Цяжкасці разумення культуры: як этналогія і культурная антрапалогія працуюць з крыніцамі
   Феномен культуры — адзін з самых складаных для вывучэння. Гэта патрабуе асаблівых крыніц: суб’ектыўны погляд людзей, уласныя назіранні, візуальны матэрыял, кантэксты культуры, сімвалы, уласны вопыт.

6. 24 чэрвеня — Гістарычная геаграфія як інструмент разумення мінулага Як рэкі, межы і дарогі становяцца сведкамі і ўдзельнікамі гісторыі? 

🔍 Што дасць вам удзел у падрыхтоўчым інтэнсіве?

• Гэта найлепшы спосаб пазнаёміцца з выкладчыкамі бакалаўрскай праграмы «Гісторыя».

• Вы атрымаеце ўяўленне пра тое, як арганізавана навучанне на бакалаўрыяце — усе лекцыі інтэнсіву па насычанасці не саступаюць тым, якія слухаюць студэнты.

• Замест звыклых «дамашніх заданняў» — творчыя практыкаванні, якія стануць часткай навучання (атрымаецца ва ўсіх!).

• Удзел у праграме можа змяніць ваша ўяўленне пра гісторыю, а таксама пра тое, навошта і як яе можна вывучаць і выкарыстоўваць у жыцці і прафесіі.

• Вы на ўласным досведзе пераканаецеся, што гісторыя — гэта не столькі навука пра мінулае, але і пра сучаснасць. А навучанне на такой праграме, як «Гісторыя», адкрывае шлях да паспяховай кар’еры.

• І нават калі вы яшчэ не ўпэўненыя ў сваім выбары — прайдзіце інтэнсіў і ўпэўніцеся, што гэта менавіта тое, што вы шукалі!

У праграме магчымы змены і дапаўненні
*Адпраўляючы заяўку, вы даяце згоду на электроннае захоўванне вашых персанальных дадзеных.