Aukin þátttaka barna og ungmenna af erlendum uppruna
UMFÍ og ÍSÍ vekja athygli á nýútkomnu efni sem hefur það markmið að auka þátttöku barna og ungmenna af erlendum uppruna í skipulögðu íþróttastarfi. Markhópur efnisins eru foreldrar barna og ungmenna af erlendum uppruna.
Félögum stendur til boða að sækja um styrk til þess að innleiða efnið í sínu félagi. Styrkupphæð er 180.000kr. á hvern styrkþega og eru fimm styrkir í boði. Til þess að hljóta styrk þurfa félög að skila áætlun um hvernig nýta eigi fjármagnið til þess að fjölga börnum og ungmennum af erlendum uppruna í starfinu. Tímarammi verkefnisins er frá september 2018 og til áramóta.
UMFÍ og ÍSÍ taka saman árangur og reynslu frá þeim félögum sem hljóta styrk og deila í framhaldinu með öllum félögum landsins. Saman getum við þannig hjálpast að, miðlað reynslu og þekkingu okkar á milli og gert gott starf enn betra.
Umsóknarfrestur er til 17. september nk.