我叫丸仔，今年20歲，我係一個釋囚手足，同時亦都係一個候審手足。至於點解會同時係釋囚同埋候審呢？因為我喺呢場運動入面，一共五次被捕，當中一單案獲警方歸還證件獲無條件釋放，一單案被判入勞教中心，一單案喺最近被正式落案起訴，下庭將會轉介往區域法院審理，淨低兩單案就依家喺警方調查當中。對比上一單案判入勞教中心僅僅六個月嘅刑罰，嚟緊呢一單案因為會喺區域法院審理，加上我幾個月後就會年滿21歲，喺參考返相同控罪嘅案例下, 相信將會面對嘅係四至六年嘅監禁。其實喺上庭沒收護照之前身邊每一個人都叫我盡快離開香港去英國，包括我阿媽，佢哋都覺得香港已經唔再有公平公正嘅司法制度，我將會面對嘅只會係不平等嘅審訊，之但係我選擇咗留低，係因為我真係好想兌現同大家煲底除罩相見嘅願望，而且我真係唔想離開呢個孕育我成長嘅家鄉，我更加唔想到某天街頭再相聚嘅時候我要遠在英國隔岸觀火，所以我決定留低同呢個城市共存亡。今次好多謝甜一刻俾呢個機會我做一日店長，今次我會整荔枝味嘅雪花酥，相信講到荔枝有部份人都會諗起九龍區一個地方—荔枝角，而荔枝角係有一座收押所，關押住21歲或以上嘅男性還押人士，當中包括我哋嘅手足。今次呢個荔枝味嘅雪花酥就係想寄語大家勿忘牆內嘅手足。喺我服刑嘅時候，最開心嘅事就係收到信，因為我知道仲有好多人記得我同埋關心我，我冇被遺忘，所以你哋嘅支持就係轉化成我哋嘅動力。希望你哋會支持今次呢個荔枝味雪花酥