5. ա/ Կաթոցիկից մեկական կաթիլ ջուր, սպիրտ, բուսայուղ և օծանելիքի 1-2 կաթիլ կաթեցրեք ափսեի վրա՝ չխառնելով հեղուկները միմյանց։ Հետևեք, թե ո՞ր կաթիլն է առաջինը գոլորշիանում, որը վերջինը: Չափեք ժամանակը, որն անհրաժեշտ է դրանց գոլորշիացման համար:
բ/ Ձեռքի վրա մեկական կաթիլ սպիրտ և ջուր կաթերեք, իրարից մի փոքր հեռու։ Ի՞նչ զգացողություն եք ունենում, ո՞ր դեպքում եք սառնություն զգում և ինչո՞ւ։
Վերցրեք միանգամյա օգտագործման ներարկիչը (առանց ասեղի) և մոտավորապես կեսը լցրեք տաք ջրով: Մատով կիպ սեղմեք և փակեք ներարկիչի բաց ծայրը: Դանդաղ դուրս քաշեք մխոցը և դիտեք, թե ինչպե՞ս է ջուրը եռում (տես նկարը): Բացատրե՛ք դիտարկվող երևույթը։
Ուշադրություն․ Զգույշ եղեք տաք ջրի հետ աշխատելիս:
Իմացե՛ք, որ.
Դիտումներն ու փորձերը ցույց են տալիս, որ պինդ մարմինները նույնպես գոլորշիանում են։ Օրինակ, սառույցը գոլորշիանում է, դա է պատճառը, որ լվացքից հետո դրսում ցրտին փռած հագուստը չորանում է նույնիսկ սառնամանիքին: Գոլորշիանում է օրինակ նաֆթալինը, որի հոտը մենք զգում ենք այդ ընթացքում։