ՀՀ Կառավարությունը՝ քաղաքացիական հասարակության գործընկերների աջակցությամբ, հայտարարում է գաղափարների մրցույթ՝ Բաց կառավարման գործընկերության (ԲԿԳ) գործողությունների չորրորդ ծրագիրը համալրելու նպատակով:

Ի՞նչ է ԲԿԳ գործողությունների  ծրագիրը: Ծրագիրը պետության կողմից ստանձնած հանձնառությունների փաթեթ է, որն ուղղված է խթանելու կառավարման թափանցիկությունը, հաշվետվողականությունը և հանրային մասնակցությունը:

Ո՞վ կարող է դիմել: Կառավարման հաշվետվողականության առաջարկներ կարող է ներկայացնել ցանկացած ոք՝ անկախ տարիքից, սեռից, հասարակական կազմակերպության և կուսակցական պատկանելությունից: Այս տարի, բացի նախարարություններից և հասարակական կազմակերպություններից, գաղափարներ կարող են ներկայացնել նաև հանրային ծառայողներ (ներառյալ քաղ․ ծառայողներ) և անհատ քաղաքացիներ։  

Ի՞նչպիսի առաջարկներ ենք ակնկալում: Բաց կառավարման գործընկերությունը շեշտադրում է հավակնոտ և համակարգային հանձնառությունների միջոցով կառավարման բարեփոխումներին ուղղված նախաձեռնությունները: Գործողությունների ծրագրում ընդգրկվող նախաձեռնությունները կարող են լինել ինչպես նոր, այնպես էլ՝ նախկինում սկսված, ընթացիկ բարեփոխումների շարունակություն:

Որո՞նք են չափորոշիչները: Առաջնահերթ պահանջ է գործողությունների ծրագրում ներառված յուրաքանչյուր հանձնառության համապատասխանության ապահովումը բաց կառավարման հետևյալ չորս սկզբունքներից առնվազն մեկին ` թափանցիկություն, հաշվետվողականություն, մասնակցություն, տեխնոլոգիական նորարարություն:

Հայտերի ընդունման վերջնաժամկետն է 2018թ. սեպտեմբերի 3-ը:
Առաջարկվող հանձնառությունները կարող եք ներկայացնել այս ձևաթղթի միջոցով:
Նախորդ գործողությունների ծրագրերին կարող եք ծանոթանալ ԲԿԳ լրատվական կայքում:  http://www.ogp.am/hy/