2025. gods 13. septembrī 19.00 Rēzeknis nūvoda Rogovkā jau catūrtū godu nūtiks latgalīšu dzejis slams "Rogovkys dzejis voga" – Dzejis dīnom veļteits pasuokums (simboliski savejūt buļbu laiku, saceņseibu, kurā juoteik iz prīšku i Dzejis dīnys), kurā vysys uzmaneibys vydā latgaliski rokstūši dzejnīki.

Slama nūsacejumi: autoram juosagatavej treis dzejūli latgaliski (vālams pyrma tuo napublicāti gruomotuos voi medejūs (portali, prese, izdavumi) – sovi soc. teikli nasaskaita). Pyrmajā kuortā kotrys skaita pa dzejūļam, kurūs viertej žureja pīcu dalinīku sastuovā i skateituoji kai sastais žurejis lūceklis, tod teik izvierzeiti autori tuoļuokai kuortai. Tai trejuos kuortuos byus nūskaidruots uzvarātuojs, kurs sajem uzvarātuoja titulu, naudys bolvys nu Nautrānu pogosta i latgalīšu kulturys kusteibys "Volūda", kai ari latgalīšu literaturys jaunradis veicynuošonys programa pīduovuos vareibu 2026. godā izmontuot desmit dīnu raksteišonys rezidenci Lūznovys muižā (ar apmoksuotu uzaturiešonu rezidencē i stipendeju rodūšajam dorbam). Taipat slama uzvarātuojam byus vareiba pīsadaleit Latvejis Nacionalajā dzejis slama čempionatā 2026. godā. 

Dzejis slama “Rogovkys dzejis voga” vadeituojs itūgod byus Lauris Zalāns, ar muzykalim prīšknasumim uzastuos grupa "Sovvaļnīks", vokaluo studeja "Skonai" i grupa “TKP / tā kā pērn”. 

Pasuokumu reikoj Rēzeknis nūvoda Nautrānu apvīneibys puorvaļde, Rēzeknis nūvoda Kulturys i turysma puorvaļde i latgalīšu kulturys kusteiba “Volūda”.

Dasasaceit dzejis slamam var da 31. augusta. Nūtikšonā byus vareiba pīsadaleit 10 autorim, apstyprynuojumu par pīsadaleišonu atsyuteisim da 3. septembra. 

Vaicuojumim i vaira informacejai var raksteit literatura@voluda.lv voi zvaneit 29509672.