تطوع فى الجماعة الوطنية لحقوق الإنسان


إحنا مين؟
مجموعة شباب بنات وولاد ، شاركنا فى الثورة ، وعاوزين نعمل جماعة تضم كل الناس اللى شايفه ثورتنا كانت علشان حقوقنا فى العيش والحرية وعدالة اجتماعية، وشايفين كمان أن نفس اللي قولناه فى مصر الشباب العربي قاله فى تونس وفى سورية والبحرين واليمن ودول تانية عندهم نفس همومنا وأهدافنا.
فإحنا جماعة عشان بتجمعنا مصالح وأهداف وأحلام واحدة عشان نبني بلد يحترم الكرامة الإنسانية والحرية والعدالة الاجتماعية، بلد يخلينا كلنا نستفيد منها من غير نقول دا مسيحي ودا مسلم دي بنت ودا ولد ولا دا نوبي أو دا بدوي.
والجماعة وطنية لأنها طالعة من أهلنا وناسنا وحته من بلدنا.
وجماعة وطنية لحقوق الإنسان لأننا شايفين أن الثورة فى مصر قامت عشان حقوقنا الأساسية وهيا العيش والحرية والعدالة الاجتماعية.
كمان الجماعة الوطنية لحقوق الإنسان لازم يبقي ليها تواجد مع الناس فى البلاد العربية لانهم عندهم نفس حلمنا ونفس هدفنا فى بلاد بتوفر العيش والحرية والعدالة الاجتماعية.
ليه الجماعة الوطنية؟
ناس كتير (بنات وولاد مسلمين ومسحيين عمال وفلاحيين ناس فقرا وناس حياتهم مستورة)، بعد ما خلعنا مبارك كانوا عاوزين يعملوا حاجة علشان بلدهم وناسهم، منهم جرب يدخل أحزاب أو نقابات أو يشارك فى مظاهرات، وناس منهم استشهدوا أو أصيبوا علشان نكمل ثورتنا وعلشان نحقق اهدافها، ومننا ناس حسوا أن مفيش فايدة من اللى بنعمله والثورة بتتسرق.
وللأسف كان صوتنا ضعيف سواء فى الانتخابات أو فى الدستور بعد ما وقعنا مبارك ، بالعكس كنا هدف للى كان بيحكم مصر بعد مبارك، ودا علشان مكناش موجودين مع بعض وبنفكر مع بعض وبنحاول نحقق مصالحنا.
واحنا فى الجماعة فكرنا أننا مشكلتنا هيا أننا مش بنتحرك كجماعة عندها مصالح وأهداف وأعضاء فى كل مكان فى مصر، علشان يبقي صوتنا عالي وواضح، ونقدر نغير كل حاجة.
بس أحنا مش لوحدنا، فى ناس تانية عندها أحلام تانية أو أفكار تانية، ممكن تكون كويسة ، واحنا مش عاوزين نبقي مكانهم، ولا نحاربهم ،أحنا بس بنقول أن رؤيتنا مختلفة.
شايفين دورنا/ دور الجماعة أزاي ؟
ثورتنا مربوطة بحقوقنا، فلو خدنا حقوقنا تبقي ثورتنا نجحت، وعلشان لسه حقوقنا مخدنهاش تبقي ثورتنا مستمرة، وعشان محدش يجي على حقوقنا لازم يبقي فى جماعة بتقف قدام اللى يمد أيده فى جيوبنا أو على ولادنا.
والجماعة الوطنية مش بس بتساعد الناس علشان تعرف تاخد حقوقها ، لا أحنا شايفين أن دورنا الأكبر أننا نغير بلدنا وناسنا علشان تبقي زي ما كنا بنحلم بيها فى ميادين التحرير فى كل حته فى مصر، بلد فيها كرامة لناس أحرار وقادرين يعيشوا كويس.
وعلشان حقوقنا مش بس مواد فى القانون ، هنفضل نتكلم عن ثورتنا مع الناس ونقولهم يغيروا ازاي ونغير معاهم بلدنا.
الجماعة هتشتغل ازاي؟
احنا عاوزين نعمل كيان كبير (الجماعة الوطنية ) يبقي فيه أعضاء بالآلاف فى كل حته فى مصر، والكيان دا هيشتغل فيه ناس متخصصين زي محامين باحثين أو حتى أطباء، وشغلتهم أن الكيان دا يبقي شغال كويس ويقدر ينفذ اللى يقرره أعضاء الجماعة.
الأهم أن الكيان دا هيكون فيه أعضاء من الناس اللى عندهم مصلحة واحدة فى أن بلدنا يبقي فيها كرامة للناس ويكونوا أحرار وقادرين يعيشوا كويس، والأعضاء دول هما اللى هيحددوا نشتغل ازاي ومع مين وأمتي وهما أصحاب القرار فى الكيان (الجماعة)، وكل مجموعة أعضاء فى مكان هيشتغلوا مع بعض وياخدوا القرارات مع بعض، بشكل فى ديمقراطية.
وعلشان نحقق دا الجماعة هيكون عندها مرحلتين فى الأول هنشتغل علشان نعمل أساس كويس لينا، هنتعرف على متطوعين ومتطوعات ويكونوا معانا بمعايير واضحة، ونساعدهم فى أنهم يعملوا مجموعات محلية فى كل حته فى مصر، يتكلموا عن الثورة والجماعة.
وكل متطوع عشان يبقي عضو لازم يعمل خطوات علشان نبقي مطمنين أن كلنا عندنا نفس الهدف والمصلحة ،كمان المتطوع/ة هيكون ليهم برنامج للتأهيل والتدريب علشان يبقي قادر يتعامل مع الناس، وكمان ، وفى المرحلة دي هنشتغل مع الناس دي على تحقيق أهداف ثورتنا.
والمرحلة التانية لما يكون عندنا ناس فى أماكن ومحافظات معقولة، ونحس أننا هنعلن عن الجماعة بشكل أكبر ومع ناس أكتر وهيكون الناس دي هما جمهور الجماعة وأعضائها وأصحاب القرار فيها.
مبادئ الجماعة الوطنية لحقوق الإنسان
الجماعة ملتزمة بعدد من مبادئ وقيم أخلاقية فى عملها أو أنشطتها وهي:
• القيم والمبادئ اللي نادت بها الثورة المصرية من وكرامة إنسانية حرية وعدالة اجتماعية.
• الإيمان بأهمية العمل مع النشطاء والناشطات فى المنطقة العربية لدعم حقوق الإنسان والقانون، وأننا جزء من تحرك شعبي مناصر لحقوق الإنسان لجميع شعوب المنطقة.
• الاتفاقيات والمواثيق الدولية والإعلانات العالمية لحقوق الإنسان.
• الالتزام بقيم الدولة المدنية الحديثة وخاصة قيم المواطنة وعدم التمييز.
• تمثيل عادل للنساء والأقليات فى هيئاتها بشكل يعبر عن تنوع المجتمع.
• الاستقلال التام عن السلطات وكذلك التنظيمات الحزبية.
• الانضمام للجماعة والمشاركة فى أنشطتها هو عمل طوعي وباستثناء فريق العمل لا يتقاضي أي من أعضاء الجماعة أي أجر أو مزايا مادية.
• يحظر على الجماعة تلقي أموالاً من جهات حكومية أيا ما كانت كما أنها لا تتلقي أي أموال من الخارج أو الداخل إلا وفقا لضوابط تضمن الاستقلال للجماعة ووفقا لقواعد الشفافية والديمقراطية الداخلية ومن كيانات أو شخصيات ليس لها تاريخ فى معاداه الثورات فى المنطقة العربية، على أن تعلن الجماعة عن سياساتها المالية بشكل واضح وشفاف.
43 ب شارع رمسيس – الدور الرابع – شقة 63 – وسط القاهرة – تليفون وفاكس 0227738870 & 01023811147
بريد إلكتروني :nchrl.eg@gamil.com – موقع إلكتروني : http://www.nchrl.org/ مدونة الجماعة الوطنية : http://nchrl.blogspot.com/
    This is a required question
    This is a required question
    This is a required question
    This is a required question
    This is a required question
    This is a required question
    This is a required question
    This is a required question
    This is a required question
    This is a required question
    This is a required question
    This is a required question
    This is a required question
    Item 1
    Please enter one response per row
    This is a required question
    This is a required question
    This is a required question
    This is a required question
    This is a required question
    This is a required question