#PUPIkalmaMo: Ang Nagkakaisang Panawagan ng mga Iskolar ng Bayan sa Komunidad ng PUP

Kusang-loob na lumitaw ang hindi maikukubling kaliwa't kanang suliranin nang buksan ng Kagawaran ng Edukasyon at Komisyon sa Mas Mataas na Edukasyon ang mga klase sa modang distance at blended learning; kapalit man nito ay libo-libong bilang ng mga kabataang naglaho ang natitirang pag-asa dahil napilitang mag-dropout at tuluyang tumigil sa pag-aaral dulot ng sumisidhing kahirapan.

Ito ay ibinunga ng tahasang pagsasantabi hanggang sa kawalan ng kongkretong plano ng rehimeng Duterte upang sugpuin ang krisis-pangkalusugan at tugunan ang sosyo-ekonomikong pangangailangan ng sambayanang Pilipino. Patuloy na pinatunayan ng administrasyong Duterte, bago pa man ang pandemya at lalo't tayo'y nasa gitna ng kawalang kasiguraduhan, na tuta nitong kukunsintihin ang kolonyal, komersyalisado at anti-demokratikong klase ng edukasyon, kapalit man ang kinabukasan ng mga Iskolar ng Bayan.

Sa loob ng Politeknikong Unibersidad ng Pilipinas (PUP), isinubo sa mga estudyante at kaguruan ang walang kongkretong patnubay na Flexible Technology-Enhanced Learning (FlexTEL) Program na may modang online at modular nang buksan ang Unang Semestre (S.Y. 2020-2021). Sa kabila na pinanguna na ng mga estudyante at kaguruan ang kawalang kahandaan at teknikalidad na suliranin ay binging ipinagpatuloy ng administrasyon ang klase.

Dulot ng pagpupumilit ng administrasyon ng PUP, pasan ng mga estudyante, magulang, kaguruan, kawani at mga sektor sa loob ng pamantasan ang kahirapang maitaguyod ang edukasyon sa gitna ng pandemya. Ang kapalpakang ito ay nagbunga sa mga estudyante ng kawalang ganang matuto habang sa parehong panig, kabilang ang mga guro, ay malaki ang naging epekto ng hindi makatao't matinding pisikal at mental na pagkaubos, limpak na dagdag gastusin at marami pang kahirapang sumusulpot bago at matapos ang semestre lalo pa't hindi pa rin natatapos ang academic requirements.

Mistulang napakatagal ng unang semestre ng pag-aaral sa ilalim ng makabagong moda dulot ng napakabigat na mga gawain na nagdulot ng labis na pagkahapo at pagkaubos sa lakas ng mga estudyante at kaguruan. Hindi pa man tuluyang nakababawi sa pagkapagod, kumakatok na agad ang ikalawang semestre ng pag-aaral. Bunsod nito, labis na umalingawngaw ang sentimyento't mga panawagan ng mga Iskolar ng Bayan mula sa iba't ibang kolehiyo, departamento, at maging sa branches at campuses. Sa isinagawang "First Semester Assessment Drafting and Student Consultation" nakaraang ika-12 ng Marso, nagsama-sama ang iba't ibang estudyante, organisasyon, publikasyon, konseho, at pormasyon upang itaas ang kanilang mga kalagayan at bumuo ng kongkretong mga panawagan upang hindi na muling maulit ang mga suliraning kinaharap noong unang semestre.

Labis na lumitaw sa isinagawang konsultasyon ang bigat ng FlexTEL katulad ng umaapaw na mabibigat na gawain na kailangang maisakatuparan sa loob ng maikling panahon; kawalan ng kongkretong guidelines at plataporma upang mag-aral at makapagpasa ng gawain; napakataas na pamantayan ng paggagrado na nagdulot ng sapilitang withdrawal at pagbagsak ng mga estudyante; delayed at mali-maling modyul na labis na nanggigipit sa mga estudyanteng kabilang sa correspondence na moda ng pag-aaral; at iba pang sitwasyong labis na nagdulot ng ligamgam at pagkabalisa sa mga Iskolar ng Bayan. Sa gitna ng pandemya kung saan apektado ang kalusugan at kabuhayan ng mga mamamayan, hindi na dapat pang dumagdag sa isipin at pagkabalisa ng komunidad ng PUP ang bigat na dulot ng FlexTEL dahil sa kabila ng mga kahirapan sa makabagong moda ay pilit pa ring iginagaod ng mga estudyante at kaguruan ang edukasyong dapat ay aksesable para sa lahat.

Bunsod nito, nanawagan ang malawak na hanay ng mga Iskolar ng Bayan sa administrasyon ng PUP na tugunan ang nagkakaisang panawagan:

1. Ekstensyon ng semestral break

Hindi makatao at hindi nakasasapat ang kasalukuyang patlang sa dalawang magkasunod na semestre. Marami sa mga estudyanteng modular ang hindi pa nakapagpapasa sa kadahilanang late ang pagdating ng modules at mayroon pa ring mga estudyante ang wala pa ring modules. Kailangan nilang bunuin ang ilang buwang pagkatuto sa loob lamang ng ilang linggong natitira, habang may mga estudyante pa ring hindi pa kumpleto ang mga grado at walang katiyakan sa mga kukuning subject sa ikalawang semestre.

Kailangan din ng mga estudyante, guro, at kanilang mga pamilya ng makatao at sapat na panahon upang makapagpahinga at makapaghanda sa susunod na semestre. Nakikita rin itong oportunidad upang kamtin ang mga rekisito at adjustment mula sa mga kahinaan at kapalpakan ng nakaraang semestre. Maaari rin itong gamitin upang maipamahagi ang sahod at benepisyo ng kaguruan lalo na ang ipinangakong dagdag mula sa paglikha ng modules at course packs.

Nakikita rin itong oportunidad upang ganap na maipamahagi ang modules sa lahat ng mga estudyanteng modular bago pa man magsimula ang Ikalawang Semestre.

2. Ekstensyon at konsiderasyon sa mga itinakdang deadline sa mga gawaing akademiko

Kaakibat ng ekstensyon ng semestral break, kinakailangan ding bigyan ng makataong puwang ang mga estudyanteng makapagpasa ng requirements at mga gurong makapag-kalkula at makapagpasa ng grado. Hindi makatarungan ang delay at late na pamamahagi ng modules — labas pa sa usaping nagkaroon ng mismatch o pagkahalo-halo ng mga ito. Kailangan ding ikonsidera ang kalagayang nasa adjustment period pa rin ang mga estudyante't guro sa distance learning. Kinakailangan ding ilapat ang grading system sa kalagayan ng mga estudyante at guro.

3. Pagbabawas ng academic requirements

Malaki ang naging dagok ng lubhang hindi napaghandaang distance learning sa panahon ng pandemya — dagok sa pisikal at mental na kalusugan ng mga estudyante't kaguruan. Marami sa mga tumahak ng modular ang itinutulak na mag-online upang makasabay at makapagpasa ng requirements gayong walang internet access o may kahirapan sa pagkamit ng rekisitong devices ang mga estudyante. Mayroon ding mahihigpit na patakaran sa mga kolehiyo na hindi lapat sa konteksto ng pandemya — tulad ng "2.0 policy" ng College of Accountancy and Finance.
Marami ring academic requirements ang kinakailangang magpaluwal ng out-of-pocket expenses ang mga estudyante — tulad ng pambili ng multitester, soldering iron, at iba pang kagamitan. Kailangang kilalanin na ang online learning at modular mismo ay dagdag nang gastusin sa pamilyang Pilipino — mula sa tubig, kuryente, pagkain, at iba pa.

4. 100% module distribution bago magsimula ang klase

Lubhang late at litaw ang kawalan ng kahandaan sa pamamahagi ng module sa mga modular na estudyante. Kailangang lutasin ang mga bara sa mabilis na distribusyon tulad ng burukratikong mga proseso. Kailangang sinsinin ang pamamahagi nito upang maiwasan ang pagkakahalo-halo, pagkukulang at pagkakamali sa ibabahaging modules.

5. No-Fail Policy

Makatao lamang na walang babagsak na estudyante sa kanilang mga klase sa gitna ng hirap na dulot ng distance learning. Maraming estudyante ang nakatanggap ng "forced withdrawal" at hindi makatarungang grado sa kabila ng pagpupursige na makamit ang academic requirements. Makatwirang magkaroon ng university-wide policy na bawal mambagsak at pagpapaluwag ng grading criteria.

Tinatawagan ang malawak na hanay ng mga estudyante, kaguruan, kawani, at iba’t ibang sektor sa loob ng unibersidad upang makiisa at sumuporta sa panawagan ng mga Iskolar ng Bayan. Gagap natin ang bigat na bitbit ng buong komunidad dahil sa hindi maka-mamamayan at maka-estudyanteng moda ng pag-aaral kung kaya’t esensyal at makatwiran ang tumindig at pagtibayin ang ating pagkakaisa. Inilayo man ng rehimeng Duterte ang pangarap ng mga kabataan at mamamayan dulot ng kahirapan mula sa sapilitang pagpili na magtrabaho imbis na mag-aral, mahal na bilihin, at mababang pasahod, patuloy pa ring magniningas ang pag-asa at dadagundong ang boses ng nagkakaisa at kolektibong pwersa ng mga Iskolar ng Bayan na siyang tutudla at magpapakilos sa administrasyon upang pakinggan at tugunan ang ating mga karapatan at kahingian.

Sa panahon ng krisis pang-ekonomiya at pangkalusugan, walang ibang dapat na unahin ang rehimeng Duterte kundi ang pagpa-prayoridad ng kanyang nasasakupan. Ngunit, sa kabila ng mag-iisang taon na tayong nasa militaristikong lockdown, nanatiling matigas at kibit-balikat ang gobyerno sa panawagan ng kabataan at mamamayan. Ngayon, higit kailan pa man, kinakailangan ang ating pagtindig para sa’ting karapatan!

Isulong ang makataong moda ng pagkatuto!
Ipaglaban ang ligtas na pagbabalik ng pisikal na klase!
Ilantad at panagutin ang rehimeng Duterte sa kriminal na kapabayaan sa edukasyon!

PUMIRMA SA MANIPESTO!

https://tinyurl.com/PUPIkalmaMo