Í ljósi reynslunnar á síðasta landsmóti og miklum áhuga eldri skáta á Íslandi að vera með í starfsmannabúðum á World Scout Moot á næsta ári, þá langar mótsstjórn að heyra hversu mikilvægt er að fjölskyldubúðir verði í boði fyrir Moot. Við erum aðeins að spyrja fyrir seinni hluta Mootsins þegar allir eru saman komnir á Úlfljótsvatni, umsjónarmenn búða í fyrri hluta Mootsins geta haft fjölskyldur með sér. Við biðjum ykkur því um að svara könnuninni hér á eftir, en ákvörðun um fjölskyldubúðir verður tekin á grundvelli svaranna sem berast.

Við svörun þarf að hafa í huga að samkvæmt reglum WOSM þá yrðu fjölskyldubúðir rétt utan við mótssvæðið sjálft og EINGÖNGU fyrir fjölskyldur þeirra sem eru að vinna á mótinu. Aðgengi að móttsvæðinu er lokað öðrum en þátttakendum og starfsfólki, utan við að opnað verður fyrir gesti í einn dag en þeir þurfa að skrá sig fyrirfram, greiða gestapassa og fara um svæðið í skipulögðum hópum. Sömu reglur eiga við um fjölskyldur í fjölskyldubúðum, þ.e. börn og makar sem ekki eru að vinna við mótið hafa ekki aðgang að mótssvæðinu fyrir utan á gestadaginn.