Allegra

Il ferm augmaint da la mobilited sün duos roudas ed il müdamaint da clima chi chaschuna ün temp per trer a nüz il lej dschiet adüna pü cuort düraunt l‘inviern, haun animo las duos vschinaunchas Segl e Bregaglia da tschercher soluziuns per amegldrer la situaziun actuela.

Cha que fo nair dabsögn da fer qualchosa per amegldrer la situaziun pel trafic plaun s‘ho eir constato tar ün‘inspecziun al lö, insembel cun rapreschantants da tuottas duos vschinaunchas, dals differents uffizis chantunels (natüra ed ambiaint, chatscha e pes-cha, prievels da god e natüra, trafic plaun e svilup dal territori) ed eir da la Pro Lej da Segl scu organisaziun da protecziun locala importanta.
 
L‘importanza turistica da quista colliaziun es per las duos vschinaunchas fich granda. Pervi da que haun ellas elavuro per quist traget dad 800 meter traunter la „Sponda Larscins“ ed „Ils Barchiröls“duos variantas cul böt da ragiundscher üna soluziun per l‘ütilisaziun chi cuntainta düraunt tuot an. La prüma varianta as basa sün ün schlargiamaint sün almain 3.5 m ed ün ingrandimaint da la senda da colliaziun existenta. Per pudair realiser quista varianta as stuvess adatter il terrain, schmerdscher bös-chs, planer vi spelms e fabricher mürs. La seguonda opziun as basa sün üna nouva colliaziun lung il lej. Quista colliaziun gniss integreda uschè bain pussibel illa cuntredgia da la riva e gniss per part pendida sü scu piaunch vi da la paraid da spelm. 

Per pudair güdicher l’effet e las consequenza sülla cuntredgia unica ho la gruppa da lavur, mis in funcziun da las duos vschinaunchas, decis dad elavurer quistas duos visualisaziuns fotorealisticas preschantedas suotvart.

Gugent savessans uossa Lur opiniun da quistas duos variantas. Grazcha fich ch‘Els as piglian il temp per respuonder a nossa retschercha.

Tscherts elemaints da text sun fixos da Google e nun haun pudieu gnir tradüt.