VISITA 1: ¡Xixón ye célebre! Curiosidaes de la hestoria de Xixón
¿Yes de Xixón y nun conoces la to propia ciudá? ¿Tas de visita y quies conocer la ciudá d'otra manera? Nesta visita vamos facer un percorríu per distintos llugares y momentos hestóricos de la ciudá, conociendo personaxes y momentos curiosos de la villa de Xovellanos. Un percorríu divertíu y desenfadáu dende Cimavilla a Begoña, con paraes que van sorprendete y que te van convertir nuna persona esperta nel Xixón más célebre.
👉 La ruta sal de la Plaza'l Marqués, debaxo de la estatua Pelayo.
👉 La ruta tien una duración d'alredor de 1 hora y media.
👉 Pueden trayese perrinos.
VISITA 2: La hestoria del asturianu al traviés de Xixón
El percorríu, guiáu pol académicu y fondu conocedor de la hestoria del asturianu Inaciu Galán, va entamar cola llegada del llatín a Asturies, arrancando nes termes romanes y va percorrer más de dos mil años al traviés de los espacios de la ciudá.
Un percorríu entreteníu dende los proyectos d’una Academia de la Llingua Asturiana de Gaspar Xovellanos y la obra de Xosefa Xovellanos, primer muyer escritora n’asturianu, hasta l’actualidá, pasando pelos espacios de la hestórica manifestación de Conceyu Bable pola entrada del asturianu nes escueles en 1976, ente otros munchos momentos clave pa entender la realidá del idioma y de la propia Asturies d'anguaño.
👉 La ruta sal de frente la puerta de les Termes Romanes.
👉 La ruta tien una duración d'alredor de 1 hora y media.
👉 Pueden trayese perros, pero hai una parada na que s'entra un ratín a un muséu, onde nun dexen entrar perrinos.
