DOORSOON waa maansadii 26aad ee diiwaanka nabadda iyo deeleyda qarniga 21aad.
Maansadan Doorsoon waa mid ka mid ah silsiladda Deeleeyda Qarniga waxeey daba socotaa kuwii ka horeeyay gaar ahaan Danasheeg iyo Diiwaanka kuma arag,kadib markaan arkay sideey wax walba isu dooriyeen ayaan ku fikiray inaan Dadka dareensiiyo isbedelka ku dhacay iyo haddii aaneey ka gaashaaman kan ku soo fool leh,wixii shar ah Rabbi sw ayaan ka megen galnay,laakiin wuxuu na faray inaan marwalba ka digtoonaano.
waxaa ku qoran qaanuunka caalamiga ah ee jimciyada quruumaha ka dhaxaysa wadanka aan lahayn dowlad mudo 20 sano ah in la geliyo maxmiyad lagalana wareego awooda dadka deggan haday heshiin waayaan. bal hadaba maansadii doorsoon iyo aqristaha aan idiin kala baxo ee bogasho wacan:-
Maansadii(Doorsoon)
Doorsoontay xaajadu
Haddii daalki lagu jiro
Hadduu reerku weli degin
Haddaan leys daneeyneyn
Haddeey labadi daamood
Haddeey hadalki daayeen
Haddaad diido waanada
Duulaan hadduu jiro
Haddaan leysu diirnixin
Maansooy digniinleey
Degmo iyo dadkeedleey
Calan doowladeedleey
Dana gaara badanleey
Afdaboolan dahableey
Iskuduubni diidleey
Nin doorkaan kudeeynine
Maxaad noo dardaarwerin
Doontaanu fuuleen
Ku gudbeeyno dooxada
Qofki daadaheeyaa
Haddaan lala dadaaleyn
Ooy qaar daloolshaan
Qaar dabada haaystaan
Kuwa dumiya mooyee
Weli aan dad loohelin
Hadduu daad ku soojabo
Shiraacuna dabeeylaha
Hadba dacal u jiitaan
Daasada ku dhuris iyo
Daardaarin daayee
Qofna aan daneyneyn
Yaa neef dadkii lihi
Duudka uga jiifsaday
Rujinkara dadweeynoow?
Afartaa dulxaarkii
Doorsoon ku magacoow
Aan daxalka laabtiyo
Dareen li'ida jiiftaa
Daah kaaga qaadee
Haddii aad da'weyntahay
Dib u fiiri waayaha
Dagaalkii gumeystaha
Wixii daal la soo maray
Aaway danabyadeenii
Duulaanka ugu jiray
Ineey calanki doonaan?
Aaway dumarki dahabkii
Dukaamada u geeyeen
Ineey deeq u bixiyaan?
Madoonoo hadana dumi
Ayaan hadal ku deeynaa?
Feker duulki diidaa
Oon garan maxaa dana
Diradiraha sheeydaan
Dabka wuu ku huriyaa
damiir xumo hajoogtee
Waxeey daba ordaayaan
Si'aan daawo loo helin
Iyo weli ka sii daran
Kala daadsanaan iyo
Isdoondoon la'aanteed
Ineey kala dadoobaan
Dibnaan leysu soonoqon
Dawa malaha geeridu
Dacwa malaha ruux maran
Duqoow malaha mooryaan
Daaci malaha sheeydaan
Dugsi malaha doqonimo
Dembi maleh carruurnimo
Diin malaha gaalnimo
Difaac malaha fulaynimo
Dayac malaha gobanimo
Daymo malaha foolxumo
Dudun maleh dugaalnimo
Dakane maleh walaalnimo
Dugaag malaha sii deyn
Haddaan kala dambeyn jirin
Hadduu daabki qoriyahay
Hadduu dile hogaan rabo
Haddeey nabadu diid tahay
Haddaan deeyro wadanahay
Haddeey digo hulaaq tahay
Haddii dirac la duudsiyo
Hadduu doqon warkii jiro
Haddii culimo diineed
Haddeey kala digraayaan
Haddii kii dembiga wada
Haddeey duul u hiilshaan
Haddaan daaya laba oran
Haddii leysla duulaa
Daganaaba weli dagan
Haddeey duul walaala ah
Laduubteen cadaawaha
Haddeey dirir dhexdooda ah
U dabaal degaayaan
Haddeey duurgaleenkii
Dalka noogu keeneen
Haddii madax nin duubtaa
Diintuu wakiil yahay
Haddii dooraweeynuhu
Difaac doowladeed yahay
Haddii eey dadweeynuhu
Labadaranba doorteen
Hoobiyana loo diray
Madaafiicna doogtaan
Ooy dani ku gaartahay
Iyo curato diimoon
In ladilo bannaantahay
Oon cidi u diirnixin
Haddii daarihii xamar
Dumiyaay lawada yiri
Hadduu qaxu degaanyahay
Dib ugurasho xeel yahay
Haddu guul dagaal yahay
Dabaka'eri sidii yahay
Haddaan diradiraalaha
Lagu darin cadaawaha
Haddaan daaqsin jiilaal
Awr dabarka lagu xirin
Haddeey dirinta geedkii
Duqoowdii fadhiiseyn
Haddeey qaar danmoodeen
Ineey dibada aadaan
Haddeey ceyr durduurtaan
Carruurtana daweeystaan
Dugsiyana u aadaan
Haddeey doolarkoodii
Dagaalada u dhiibaan
Hadduu daashka kii lihi
Dumiyaha la xeeryahay
Haddii dunida oo idil
Dalwalbaa nabdoon yahay
Oo kii dagaal rabo
Loo diro dalkeenii
Haddeey dumarku saabaan
Dusha kula qaxaayaan
Hadduu ruux degaan kale
Dareen li'i ku mari karin
Haddii diin Illaaheey
Qaarba meel ladoonteen
Haddii aan dagaag nahay
Dibadda iyo gudahaba
Haddaan calanki diidnoo
Qaarba maro u doonteen
Astaantii dalkeenii
Hadduu dookh ninkii yahay
Haddii danabyadeenii
Aakhirada loo diray
Haddii eey dullaaliin
Dabka naga gedaayaan
Haddii kii dulmiga wada
Duud libaax damgiigsado
Haddeey daafi qurunleey
Noo kala dabqaadaan
Hadduu daabki nagu dhacay
Diilintiisu baabi'in
Haddii daqaradeenii
Weli doogsi loo helin
Doorsoontay xaajadu
Waana kama dameystii
Ninkuu digay kumuu dilin
Waa naloo danleeyahay
Dalki waa la qeybsaday
Dulmanoow bal ila garo
Ineey labada daamood
Gumeystaha dantoodiyo
Damacooda gaarka ah
Ku dadaalayaanoo
Dadka wada dilaayaan
Qaar daabulaayaan
Dibada u qaadaan
Qaar doolar siiyaan
Derejana u sheegaan
Qaar eey ku dumiyaan
U diyaarsanaayaan
Anagoon dareen qabin
da, guyaal labaatana
cishiriin diraacood
Dalkaan kala dambeyn helin
digreetada aduunyada
dastuurkay wadaagaan
waa shay ku daabacan
deg deg qaybsi lagu rido
in la kala dillacshaan
Oo kala degaayaan
degmo weliba reer helo!!!
Yaa dugaaga xoolaha
Duunyo weligii raacsaday
Ooy daaqsin geeysooy
Dib u soo xaroodeen?
Waa sheeko diimoon
Oon weli ladaalacan
Dheg dareensaneey maqal
Doorsoonku waa halis
Diintuu u daranyahay
Waa leys dulleystaa
Dhaqankaa la doorshaa
Waa soo duxaayaa
Haddaan leygu diideyn
Da'yartuu asiibaa
Duqoowdeey ku diimaan
Dadabeey u fiishaan
Waa duumadoo kale
Iyo weli ka sii daran
Waxaa iga dardaarana
Hala dego colku hadego
Somaliyeed duman
Noqo ul iyo diirkeed
Dib u gocasho yeey jirin
Diintuna ma qeybsana
Firqawaliba dookheed
Digriwaliba shiikhii
Degmo waliba beesheed
Hadda iyo danteenii
Isku duubnideenii
Dalku waa dalkeenii
Dadku waa dadkeenii
Doorsoonka nagu dhacay
Dameeyluhu ha qaadeen
Meel daran hageeyeen
Rabbigeen ha daawiyo
Dallaalana Alloow keen.
Aamiin Aamiin Aamiin.
Waa qalinkii
Abwaan Axmed Xaayoow
xaayoow09@hotmail.com