Сочинения Ивана Алексеева († 1776).

І.

История о бегствующем священстве.

Не мал убо воистинну сей божественный человеческому роду дар на исправление дадеся — истории о древних вещех и делах полагати в безсмертную тех память и в пользу многих. Коликия бы дражайшия пользы хотяху погибнути от нас, аще бы преславная дела честных мужей историями не подтвердилися! Ныне же не тако; но благия ревности и предивная дела боголюбивых мужей, аки свещи возсиявшия в мире, писанию предаятися обыче, да же, сия разгибающе, ревностнии предуспевают в силе, немощнии исправляются и к лучшему преуспевают, а ленивии восприемлют чувство свого небрежения. Дерзну же глаголати: истории древних дел, паче же нравоучительных и правильных, весть человеческие нравы исправляти и к Богу приводити внимающих. Тем же и Павел глаголет: помните наставники ваша. Но како их мощно помнити, аще историй о них не возъимамы? Сего ради аз многое и неусыпное тщание возъимех — историю сию о бегствующем иерействе обрести, вины ради сицевы: понеже частое воспрошение ко иерейству сему от нас бываше, почему оно введено и по какой силе действует. На сие от них скорое и удобное всякому во ответ слово: отцы наши первейшия иереи сие ввели и благословили, и тех благословением действуем. Тем же нужда ми бысть историю сию начати от первых времен пременения и повести сию, описуючи коегождо от священных чинов даже до наших времен и показуючи всех тех дела, аки на длани перста, во еже от древних признати настоящих. Но понеже всем небрежно бяше о сем (чтобы описати самех тех и дела их); аще и мнози во устех их имут, обаче память о них аки искра в пепеле погибати хотяше. И нам уже поздно на се взыскание случися приити, яко совершенно ведущих едва обрести; не мал труд на се восприях, испытуя некия от инок и бельцев искусных, како кто от древних священников с новодогматствующими поступаше, и от тех како кого приимаше, и коим образом сии новорукоположенцы введошася. И елико от кого что, аки пчела, обретох, ныне во един сот сея истории связах и пред очи всех предложити намерен есмь. Аще ли кто более сего весть, да приложит; аще ли ни, то за благо сия да приимет, о чем зде предлагаем.

И первее реку о отцех соловецких, благочестия ради изрядных страдальцев(х). Посылаем бо бысть исперва к ним по царскому указу и по совету Никона патриарха новорукоположенный архимандрит Иосиф, от собора духовных, на место Никанора, бывшаго в них архимандрита, с новыми догматы. Отцы же соловецстии не токмо догматов тех не прияша, но и архимандрита безделна вспять отслаша. Оному же прибывшу к Москве, на гнев велий царя подвиже. Сего ради царь некоего воеводу Игнатия со оным архимандритом в Соловецкую обитель ко отцем паки посла, придав ему сто человек воинов, повелевая, да в степень оную приимут архимандрита отцы, аще ли ни, то силою се да сотворит воевода. Видевше же отцы таковое бедство, на них нашедшее, положишася вси на подвиг мученичества, о чем особливо пространная история написана.

По сих восприимем повествование о Иове попе, благочестия ради по многим странам скитающемся. Сей убо Иов исперва бяше литовския земли, от родителей шляхетских рожден, отца имяше именем Тимофея. И внегда послан бысть Филарет, митрополит Ростовский, по совету духовнаго и мирскаго чина, от Москвы к королю в Литву, лета 7119, для прошения сына его на российское царство, в коем прошении за слово крещения сына его прогневан король удержа сего митрополита в неволи на много время, — и тем временем Филарет преосвященный приобрете сего Иова. И егда свобожден бысть от короля, взя с собою сего Иова, еще в юности суща. И прибыв с ним в российское государство, при келии его держав время (и смиренныя его ради поступи), облече его во иноческий образ. И бысть сей Иов искусен инок, проходя иноческое дело, живя во всяких добродетелех и послушании изрядне. Видев же его Филарет, уже патриаршеский престол имеяй, такими добродетели и разумом Иова украшенна, посвяти его во иерея. И в сицевом чину Иов тверд ум стяжа и сердце боголюбиво, чего ради по прозбе его отпусти его на собственное жительство, дав ему благословение, да идеже может, соберет себе духовная чада и научит иноческой философии. Отшедшу же сему Иову, прежде жительство возъиме в Тверском уезде к Новуграду, при граде Старицы, проходя тамо безмолвное житие, духом горя Господеви, его же тамо Тверский митрополит довольно знаяше, якоже услышим по сих. Видяще же его людие сие добродетельное житие, мнози начаша к нему собиратися на жительство. И сицевыя ради вины нужда бяше ему составити монастырь, иже и доныне той нарицается монастырь Раков. Нецыи же глаголют, яко, отходящу ему от Москвы, научи себе некое детище, именем Иоасафа, и имяше его в послужение свое, о нем же будет последи слово. Но яко сей Иов зело любя безмолвное житие, того ради в новосоделанном монастыри устрои братству началъника, а сам отъиде оттуду, и поселился не зело далече (в том же уезде Тверском) на утишии. Но како мощно свещи, светло горящей светом добродетели, во тме утаитися? И тамо един по единому, уведав его пребывание, притекаху к нему, требующе его разумом на путь спасения наставлятися. И сице ту мнози в жительство собрашася, коего ради множества нужда ему бысть другий монастырь состроити, иже и доныне наричется монастырь Никольский; и в сем монастыри сей Иов поживе до Никона патриарха. Внегда же настати новым догматом в России и сих ради староцерковное предание держащим утеснятися, дойде и до сего монастыря Иовлева нужда приневоления к новым догматом. Тогда, не могий ту Иов пребывати, отъиде в Рыльский уезд, и живяше при городеньстве. Но помалу и малу и тамо, аки древу стоящу ему на высоте добродетелей, мнози под сению его птицы словеснии желающе обитати, их же ради и третий монастырь, нарицаемый Льгов, лета 7177, содела. И сие бысть во дни царя Алексия Михайловича и патриарха Иоакима. Сия же вся ему содея и споспеши, во еже наздати толикия ограды и в них собрати словесныя овцы и толикой иноческой философии преданиям обучити, не что ино, токмо оное святейшаго Филарета благословение и изрядный его разум, чрез неже Всевышняго поспешество в том ему бысть. Но понеже широко новым догматом раздающимся и прещению повсюду належащу, тесно бысть сему Иову в том монастыри пребывати, изыде из тоя обители, преходя, крыяся по местом, прииде к Дону и поселися тамо при Чире реце. И виде братство к нему собирающеся, построи и тамо четвертый монастырь, и в нем постави церковь, и тоя поставление смертию своею запечатле, остави ю неосвященну, жив вяще ста лет. Старец опасный бяше благочестия хранитель и отец чад духовных изрядный, и любовный сих питатель млеком учения; отъиде от сего света временна в вечный по мзду трудов своего странствия, печаль и плачь остави последующим ему.

По смерти же сего Иова, некий бяше на Тихвине игумен, именем Досифей: и той, новых ради догматов и належащаго принуждения, остави свой монастырь и пространство жития, поиде тесным путем, укрываяся по разным местам, в недрах своих храня древния церкве разум, в ней же бяше крещен и рукоположен истинно. И тако прииде на Дон к месту оному новосоделаннаго монастыря Иовом. Людие же, по Иове оставшиися, видевше таковаго отца приход к ним, не меньша суща добродетелию и разумом Иова, радостное ему приветство творяще, приемлюще его и приход его облобызающе, вторыя радости виновный, вменяюще пришествие его Иовлево быти воскресение, и аки живописанен Иова образ предстающь явлен быти им Досифей. Внегда же вселитися ему во Иовлев монастырь, виде ту церковь новосоделанную еще не посвященну, по прошению же ту живущих, посвяти ю с присутствием некоего диакона Герасима, живша во Льгове при Иове оном. И в той новоосвященной церкви служил пять лет, принося безкровныя жертвы. Но яко не может град укрытися, верху горы стоящ: по многим странам ведома та церковь и действо их сотворися. Убояся сего сей Досифей, тем и не дожидаючися от архиерея каковых посылок, потщася гонзнути мучительских рук: оставя церковь и монастырь, прейде оттуду за Астрахань, к Хвалынскому морю, и поселися тамо близ Кумы реки, жив во оном месте лета некая богоугодно, сохраняя древнее благочестие непреклонно к противному разуму, общества всякаго со иноверными удаляяся, не по угодию плоти, презирая настоящаго века вещи, весь Богови положися [приложися], тесными пути ходя, образ показуя небеснаго звания, прейде от сея скорбныя жизни в вечный покой. Но о, колик плачь и рыдание последующим себе остави! паче, неже Иовлева плача! В толиком оземствовании, в толиком удаленном странствии, сирых, бедных и непризорных толикий отец чадолюбивый, толикий пастырь изрядный и руководец истиннаго пути, на таковой пустыни их остави, еликаго уже надеятися не можаху! Плакаху над ним мужи, рыдаху боголюбныя жены, юноши слезяху, от очию слезные источники извождаху о бедствии своем. И тако предаша тело его гробу честно, кое тело погребенное в нетлении прославленно бысть, скорбящим во утешение и во известие его спасения. По времени же некоем, оставшиися дети его духовныя, не могуще ту жити о себе, поидоша оттуду на Кубань, взявше с собою тело Досифеево, якоже иногда израильтяне кости Иосифовы. Но яко неподобательно взяша оно, — подсыпавше бо под тело его много серебра, коего отец, жив сый, отвращашеся, того ради Божий суд лиши его от них. Идущим бо им путем оным, нападше на них татарове, обоз их разбиша, а при теле том обретше сребро, взяша, и тело оно на части разсекоша и по полю на снедение зверем и птицам разметаша, кои части последи донские казаки, собравше и к своим местам приложьше, погребоша. И тако таковых иереов тамо преста быти.

Но грядем ныне ко иным странам глаголати. Настающу в Москве велию на староверцы гонению, а наипаче вины ради сея. Понеже в лето 7174 от всякаго священнейшаго чина в Москве собор бе, и на нем о коемждо священном действе с подтверждением извержения, отлучения, проклятия, подробну нововводное уставление положено, и писанное то свиток наречено, кое при Служебнике в лето 7176-е напечатано: откуду всяк священнодействуяй и людин опасно наблюдаем в том бяше. Сего ради напряжения некто бывый в Москве поп именем Козма, службу имеяй в церкви Всех Святых на Кулишках, видя сия належания, совет положи с духовными детьми своими отъити в стародубские пределы: бяше бо ему на той час стародубский полковник зело знаем и друг, Гавриила Иванович, его же в некоих напастех укрываше. И угодно бысть всем совещание то: оставльше жительства своя, поидоша в Стародуб. Полковник же, видев Козму попа, любовное приятство всем сущим с ним показа и на прошения их написа лист (и) посла их ко атаману куркувскому Ламаке, повелевая листом оным отвести им на жительство место, нарицаемое Понуровку. И тамо вси пришедшии с Козмою, числом 20, поселишася при реце [Ревне], в лето 7177.

В Великороссии же, елико день, толико умножашеся на староверцы гонение, ищуще тыя и к новшествам принуждающе силою и муками. Коих страшных прещений не могуще носити, многие народы, оставляюще своя природная места, сродники и други, течаху в стародубскую область, и тамо пустыни населяюще: откуду населися Белый Колодезь и Синей, Замишево, Шеломы — слободы. И по сих прииде еще некий поп из Белева, именем Стефан, такожде, якоже Козма, имея на себе крещение и поставление старое, муж великия ревности благочестия исполнь, взыскуя себе тихаго и безмолвнаго жития, всякаго покоя телеснаго и славы бегая. Тем (времени зовущу) службу по обычаю простых для собрания творяше, литургии же никакоже касаяся, и ниже прочих таин действоваше, новая же тако ненавидя, яко аще бы кто к нему от таковых крещен пришел, не второкрестя на общение не приимаше, новорукоположенцов за освященныя не вменяше, и детем о них впредь запрещаше. Исперва сей Стефан в Замишеве живяше, и потом в заселенную с сыном его Димитрием в слободу Митковку на жительство прейде.

И сия вся поселения в стародубском полку в царство царя Алексия Михайловича бяше. Живущу же Стефану в Митковке, прииде указ о новорожденном сему царю сыне Петре Алексиевиче в Стародуб, идеже быти на той час сыну Стефанову случися, и слыша чтомый сей указ. Умершу царю Алексию Михайловичу, на место его дщерь его Софья Алексиевна приимши скипетр царства великороссийскаго. И сия слышавше таковых слобод стародубских население, повеле послати к черниговскому архиерею и стародубскому полковнику указ (на кой час уже не оный Гавриила, но Симеон полковник в Стародубе бяше), в коем указе повелевая, дабы такие забеглые народы или ласкою, или прещением градским к новым догматом приводили. Такову указу разгласившуся, ревнителе древних преданий бегу яшася, по разным местам разсеяшася. Слабейшии же, не хотяще стяжания и домов лишитися, к новодогматствованию приступиша. Времени убо некоему в том пребывающу, утишися таковая зельность гонения, и бысть тишина: паки собрашася гонимии. Но паки от того же Симеона гонение наста. Видевше же людие толику бурю гонения на них возстающа, обще вси совет (с Козмою и Стефаном) положиша отъити в Полшу. И тако усоветоваша, — поидоша и поселишася во области пана Халецкаго, при реце Ветки. Стефан насельник бысть ту, идеже последи монастырь и цер-ковь бе, а Козма на край слободы Кехальцу [к Халцу]. И сице уселившися, на молитву кийждо со своими в храмех простых собирахуся, и пение церковнаго чина кроме литургии совершаху. Гонению же в Великороссии на староверцы належащу, мнози, оставляюще своя отечества, течаху во оная на Ветке прославляемая места, изволяюще странствие, оземствование, паче утешения своих мест со отступлением. И сицевыми народы пустыя места и зверопаственная населяхуся, и вместо древес людей умножение показася, трава и терния растущая в вертограды и садовия обратишася, гради втории показашася населением человек, ими же населися Косецкая, Романово, Леонтиево. Нецыи же глаголют, яко (по) населении Косецкия слободы отлучися Козма от Стефана, и живяше на Косецкой. Вина же сему разделению наипаче сия бысть: понеже Козма иерей бяше сын некоего утешения и человек бяше свободныя мысли града Москвы, изволи на позывание народное к службе пробрести колокола, и устави звон; Стефан же поп бяше прикрут и тверд верою, памятуючи российское себе гонение, зело сокрывая себе, любя под неким спудом жити и (в) неведомстве. Тем и зело сваряшеся во оном звоне на Козму попа, глаголя: мы (рече) не славитися семо забегохом, но от новин и гонений укрытися, и в тайных сокровищах сих цело и непорочно благочестие соблюсти древнее; а он глас издает, чтобы призвати на ся паки гонение. Но сицевый между ими свар и разделение ревности единой оставляется, благоверию же ничто касаемо. Якоже и Козма иногда с Дамианом посваришася о яйце, обаче обои быша небеснаго звания, а не раздорницы святыя церкве. Времени же некоему минувшу, отъиде Стефан от Ветки в Лоев, ревнитель сый велий староцерковных преданий, и живяше в слободе Карпове [Карповке] на утишии, славы человеческия бегая, духом горя, присно взыскуяй горняго, и в той слободе жизнь свою сконча. При смерти детем своим духовным ни о чем тако наказоваше, точию о сем, да блюдутся новин и древния церкве предания опасно да соблюдут, и глагола, да всячески от новаго рукоположения сохранят себе, и да изволят тако умрети, нежели от тех действа приятниками быти. И в том наказании отъиде на вечную жизнь, о чем мнози свидетели и доднесь обретаются.

В девятое [десятое] убо лето по настатии заграничных слобод нача место Вылев [Былев], реки и пути, людьми населятися, кое место от Ветки 20 верст к границе. Во второе же лето населения Вылева, прииде к ним черный поп Иоасаф (о нем же прежде рех, быти ему келейником у священноинока Иова выше помянутаго) [на поле рукописи: Нецыи глаголют приити ему от Обояни в Шегольския Буды], и постави вниз по пути при реце келию, отстоянием от Вылевския слободы пять верст, и пребываше в той кели уединен, проходя безмолвное житие. Бяше же в народе велие сомнение о нем и, злословие на него мещуще, нарицаху его не Иоасафом, но Асапом, вины ради сея, яко сей поп аще и стараго бяше крещения, обаче о рукоположении подзор имяше, о нем же сказати ми леть есть. Пребывающу бо Иову в монастыри Лгов [на поле: Лгов строен лета 7177] (о нем же выше), при нем же и сей Иоасаф живяше, уже иноческим одеянием облечен. Имяше же сей Иов с Тверским архиереем велие дружество, кой архиерей, аще и имяше крещение и рукоположение староцерковнаго предания, однакоже по новым книгам служение совершая. К нему посла Иов сего служителя своего Иоасафа, прося да посвятит его по старым книгам. Но яко еще не весьма новое в них бяше укоренено, посвяти Иоасафа Тверский архиерей по чину древнему, о нем же проси Иов. И тако Иоасаф восприя рукоположение, прииде паки ко Иову. Егда же Иову отъити на Дон, осташася в монастыри Льгове сей Иоасаф и иеродиакон Герасим. Но яко тесно бяше ту житие от новодогматствования, разыдошася, и Иоасаф отъиде на Амону реку, в пасеку, и по оным местам крыяся прииде на Вылев. Его же рукоположение оно стоящии при Стефане людие слышавше, яко аще и по старым ставлен, но от отступника, гнушахуся рукоположением того, и тако ругателно его поношаху и злословяху. Видев же Иоасаф тако от народа себе хулима и презираема, пути ятся к оному помянутому Досифею на Дон, (еще ему тогда в животе бывшу, и отец его духовный сей Досифей бяше, негли камо пребывая с ними по отлучении Тихвина тако ему бысть). И пришед на Дон Иоасаф, проси отца своего Досифеа, да онаго ради народнаго соблажнения в того рукоположении не повелит ему священнодействовать. Что же той на его прошение сотвори? Не словом тое прошение разреши, но метну жребий, что тем показано будет: и паде жребий на Иоасафа священнодействовать. И тако извещен быв о себе Иоасаф, отъиде оттуду [от Дону], и прииде паки в Рыльский предел, и живяше на реце Амони при деревенках, и оттуду в пограничный город Трубчевск отшед, и потом в Сумы, малороссийский город, к полковнику в пасеку, а из сея во Обоянщину, в Шегальскую Буду, а из сея паки на Вылев прииде, и поселися уже от Вылева вниз по пути 7 верст. Во времени же сем не малая бяше вылевским в священнодействе нужда: того ради, пришедше ко оному Иоасафу, просяху его, да преселится близ слободы их. Иоасаф же бяше благонравен и легок во обычаи, не помяну их первыя досады, преклонися на прошение их, — прииде. И поставиша ему келию при слободе Вылеве. К нему же мнози на пение собирающеся, духовне себе наслаждаху.

Под сие время умре Козма поп, живый на Косецком [Косецкой], о нем же нецыи сказуют, яко погребе сего, Козму, Иоасаф поп. И тако Ветка опусте от иерейства. Приспевающу некогда дню светоноснаго Воскресения, но, от неимения иерея, не малое ветковскому народу наступаше сетование. Положьшеся общим советом на таковый день праздника Владычня призвати от Вылева сего Иоасафа. Того ради пришедше к нему лучшия люди, просиша его, да приидет он к ним на Ветку на общую радость в день толикаго торжества службы совершити. Той же, яко благоприятен сый к людем, не презре толикаго их дальнаго труда и усерднаго прошения, пойде с ними к Ветке, и, обычными пении почтив торжество, хотя паки возвратитися к Вылеву. Народи же вси, собравшеся, падающе к ногам его и просяще со умилением, извщающе толикия и таковыя своя нужды в нем, да не отъидет от них, ниже да сирых тех оставит, аки овец непризорно ходящих. Видев же Иоасаф, яко тии бяху смятени душами и оставленнии аки овцы не имущии пастыря, милосердовав о них, — оставя Вылев, преселися на Ветку жити, в месте онаго предреченнаго Стефана. И на Ветке сей Иоасаф живя, видев, — елико далея временем, толико множашеся народ, а таинству святыя евхаристии оскудевающу, собрав стадо свое словесное, предложи им нужду святаго причащения, и глагола, яко подобает сего ради церкви быти. Людие, се слово услышавше, благословиша предложение се, и вси даша обеты на труд созидания церкве. И по разшествии, в радости сердец яшася вси дела, кийждо древо на строение тоя представляюще. И тако множество древ на показанное место навезоша. И состроися сия церковь при Иоасафе. И тако пребыв Иоасаф, на Ветку пришед, 5 лет, умре, остави сию новосоделанную церковь непосвященну, старости глубокия достиг, иноческаго жития добре изучен. Похваляют его (нецыи) нравы, яко бяше тих, благоуветен, разсуждения изряднаго, возраста мернаго, благолепною сединою украшен, всех от образа могий благочинию научити, ревнитель сый и подражатель во всем первым отцем умершим, токмо един порок в ставлении прия, староцерковнаго же ради предания много преседений име, и много странствуя, потом прейде от здешних.

Вестно же буди о сих, любезный читателю, яко пять сих иереев — Козма, Стефан, Иев, Досифей и сей Иоасаф, приходяще от Великой России, кроме Досифеа, службы простыя пояху, не требующе от иных иереев на священнодейство благословения, (благословлением) тех архиереев удовляющеся пребываху, от них же рукоположени быша, а воздательныя благодати во иереех не исповедающе. Приходящих убо от Великороссии новокрещеных повторяху своим крещением, новорукоположенных же никако приемлюще иереев, но и заповедающе всем по них наставшим не приимати таковых, о чем свидетельствуют вси, якоже иноческаго чина, тако и мирскаго людие древнии; а наипаче подтверждает сие наше слово Ответов Диаконовых вопрос 58, и книжица диаконовых о сравнении согласие 11.

Но грядем к сказанию о Феодосии иереи [на поле: А сей Феодосий в Великороссии новокрещенныя повторяше]. Кой Феодосий бяше крещения и поставления древняго: рукоположен бо бысть Иосифом патриархом московским, во град Рыльск, в церковь Василия Неокесарийскаго, Никольскаго монастыря. Утеснен же быв тамо новодогматных введением, отшед оттуду, прииде на Донец реку, и живяше тамо в пустыни. Некогда же ему ехавшу с трудником своим по Донцу, впаде в руки Белогородскаго архиерея розсылным. Они же, емше его, представиша архиерею. И той, много нудився привести его к новопреданиям, но не возможе: посла его к Москве к патриарху Иоакиму, идеже отдан бысть в градский суд. И тамо томим муками и принуждаем, не покорився, послан бысть в ссылку под начал в монастырь Кирилов. Седев седмь лет в темнице нужней и водней, от уныния писаше книги, которыя тесноты не стерпев, склонися к новотворным догматом (на кои присяги еще не бяше), и приставиша его ко чтению синодика. Малу же времени в том минувшу, тайно подъехаша нецыи,  увезоша его в Поморье, а оттуду в Керженец, на Белмаш. И сущии ту от иноческаго чина молиша, да не оставит их при духовной нужди. Он же отрицаяся сего дела, предлагая им оно к новотворным пристатие. Тии же, припадающе к ногам его, просяще его со слезами, обще вопиюще к нему: на нас буди грех сего падения, о отче! Видев же он всеусердное тех моление се и слезы, преклонися на прошения их, и в нуждах крещения, исповедания и постригания не оставляше их. И по некоем времени съехав от них в Калугу, и тамо в праздной церкви, в день великаго четвертка, нощию литургию совершив, и ко удовлению причастия агнец запасный сотвори. Уведано убо бысть о сем Феодосии на Ветке, яко в Калуге пребывает: нужды ради своея великия, от общаго совета послаша некоего инока искуснаго Нифонта в Калугу просити сего Феодосия граматами, да приидет на Ветку, предлагающе ему народное собрание и великия свои нужды во иерействе. Нифонт с посланными граматами достиг града Калуги, подаде Феодосию сия, к ним же и просительная своя словеса приложи. Соизволи прошению их Феодосий, — прейде от Великороссии в польскую область, идеже радостными приветствы возблагодариша приход его к ним, и вси радостное торжество о нем сотворяюще, всяко место и всяк дом радостное возглашающе, ликующе купно и веселящеся на вступлении того, вси увядшии печалию весело хождаху. Пришед убо на Ветку сей Феодосий, видев мног народ стекающся на общую молитву, и толико, яко оной новопостроенной церкви не вмещати их, приложи радение и повеле оную церковь, Иоасафом соделанную, в длину и в ширину под крыльями распространити. И тако разширенне ей бывши, проси Феодосий калужан, да обретающийся церковный канастас [иконостас] и со олтарными дверми купленныя, от построенныя церкве царя Иоанна Васильевича оставшиися, в новосоделанную церковь на Ветку пришлют. Они же по просьбе его присланным от Феодосия вся сия вдаша, ими же Феодосий изрядно украси церковь. И сице украшенной церкви бывши, призва Феодосий от Рыльска брата своего, попа белаго Александра, новоставлена, его же последи во иноческий облече образ, и еще другаго попа белаго же, новое поставление имуща, именем Григория, от Москвы призва. И с сими двома, без диакона, Феодосий освяти церковь, во имя Покрова Пресвятыя Богородицы [На поле: посвящена бысть ветковская церковь лета 7203 г.], в ню же антиминс положен бяше оный, кой Мелания старица Белевка привезла еще ко Иоасафу попу. Неции о сем антимисе глаголют, яко на оном антимисе не бяше еще написания, внегда Феодосий храм освящаше: тогда и подписан бысть; а подписал его, сказуют, Афанасий уставщик сице: Освятися олтарь священноиноком Феодосием, и прочая.

На толикую убо славу новоосвященныя церкве вси народы во всех странах радости исполнишася, на ню же отвсюду приходяще людие, видети толикий храм церкве желающе, его же ради и паче людие, оставляюще домы, в толикий путь труды восприимаху: господие честнии о зданиях своих вознерадеша, и госпожи честныя течаху на оное жительство, девы отхождаху родителей своих, на вечную чистоту вдающеся, иноческим одеянием покрывахуся. Откуду безчисленными народы наполнися ветковское жительство, и аки град велик в населении тех явися. Но яко толику множеству стекшуся народа, мирское житие проходящим, велия наста нужда в тайне брака: чесо ради от общаго совета послаша некоего старца в Калугу, и оттуду привезоша Бориса белаго попа, такожде крещение имуща старое, а рукоположение новое. И сего священноинок Феодосий благослови церковныя тайны по древнему совершати, кой поп в Ветки многое время пожив, прейде оттуду в Воронок слободу.

По сем умре священноинок Феодосий, старости достиг глубокия. Похваляют его нецыи нравы, яко бяше смирен и благоприятен, прост, зависти лишен, мира церковнаго хранитель, един порок имея, во еже от немощи долговременныя темницы, для слободы, к новым догматом пристати, при сем же и новорукоположеным дверь отверсти и начало подати оным священнодействовати, откуда поступающии по нем уже и новокрещеных и новорукоположеных попов приемлют, и дают власть священная деяти, не яко прежнии иереи. Обаче сей Феодосий, якоже и прежнии, новотворных крещение повторяше своим крещением и в сем согласоваше древним иереем, пред ним бывшим. Настоящии же по нем, в приеме хиротонии новых согласуют Феодосию, а в крещении новотворных иначе поступают.

По Феодосии оста Александр, и друзии новорукоположеннии. И на сих преста древняго рукоположения иерейство. Показуется же от граматы Александра диакона, яко во дни Феодосия и миро древнее окончася, о чем пространное имеется послание.

И таковой убо нужде новорукоположенными иереи на многая лета простирающися, восхотеша народы из сего новоприятия извинутися в древния рукоположенных обычаи. Иначе же не возмогоша извинутиси, токмо да посвящен им будет какой либо от новых епископ, и сей по древним да хиротонисает им иереев. Что же о том и сотвориша? Вдавшеся обще радетельством во искание се, и не обретоша к нему удобства, точию в Волоской земли, в ней же удобоприступна себе Ясскаго митрополита Антония обретоша, к нему же тамо живущии староверцы свободный вход в разговор имуще чрез многа: тем и дерзновенно просиша его, да посвятит им из них человека во епископа. Он же на се соизволи, и повеле подати доношение, кое поданное доношение яве сотворено бысть господарю и прочим советником его. И вси  радостно соизволяху на то, и обещавше церковь каменную им дати.

По сем еще в лето Господне 1731 ветковскаго монастыря игумен иеромонах Власий, от всего собора, о том же к господарю Волховскому грамату писа сице: Благородному и высокопочтенному, во благочестии сиятельнейшему и прочая. Ниже: В прошлом 1730 годе, преосвященному всея Молдавии и прочих стран кир господину Антонию подали доношение, и прочая, — в коем послании просиша, да повелит митрополиту от Ветки посланнаго человека посвятити. Временем же сего належания и патриарх Цареградский в Яссы прибысть, муж высокаго учения. И сему явлена бысть доношение и граматы, и персональное от староверцов [обоего согласия, ветковскаго и диаконова] прошение. Патриарх убо приятствова их, обаче ответствова им, яко аз един без прочих вселенских патриархов совета не могу сотворити; обаче обеща им на то скорый ответ из Царяграда прислати. По мале же времени отшествия патриарха, присланы быша из Царяграда 12 пунктов в Яссы, гречески писаны. Но яко словенски учившимся не возможно читати, просиша, да преведены будут на словенский язык. Сему же сотворшуся, един ветковскаго согласия похити оныя, и Ветке вдася. Диаконова же согласия не ведуще о том преводе, просиша митрополита, да повелит превести пункты на словенский язык. Видев то митрополит, возмне шпирство некое от них быти, яростно их отсла от себе. Они же, познавше лукавый ветковских подлог, скрышася от лица митрополита, да не бедне их живот скончается. И на том преста взыскание то. Пункты же оныя присланныя 12 бяху в таковом разуме, да хотяй ставитися исповедание даст — новотворные догматы хранити и в них спасение веровати и прочих сему научити.

Не по многих сего случая, бяше некий чернец в Киеве, имеяше от митрополита Киевскаго не малую милость, почему (вместо игуменства) припущен был к приказных дел отправлению. И уверившися, украл из секрета с письма архиерейскаго печать Лвовскаго и Галицкаго. И сочинившу воровския письма, будто по прошению их поехал тайно до Ясс на посвящение архиерейское. И в Яссы приехав, привез великия подарунки господарю Михайле и митрополиту Георгию, и объявив лист за руками, аки бы града Чигирина людие просят его на епископию. И господарь велел митрополиту его поставить. Приявши же сей Епифаний архиерейства чин, поехал от Ясс аки в Чигирин, но объявился на Украйне, в Польше, и тамо испроси у поезднаго официала Лвовскаго епископа, чтоб ему на Украйне жить, и сорок церквей попов ставить. И егда от архиереа велено яти его, он убег за Днепр, и в Киеве ят, вдан был под караул. И по описке в Синод, а из Синода в Яссы, повелено сего Епифания от чина епископскаго обнажити: и обнажен бысть в Киеве, и растрижен, и плетьми наказан, послан бысть в ссылку, в поморския страны. И преехавши Ярославль, на лесу отбили, и за границу в некия пустынки привезен, и там пребысть недель с десять, и на день Преображения Господня в Ветку взят, и без всякаго испытания на архиерейское действо определен, лета 7242. И тако на оном возведении быв, многих во диаконы и в попы поставил. Помале же освидетельствован и обретен сей быти новых догматов человек: откуду ветковцы чувство приявше, за епископа его не почтоша и от ставленных им грамматы начаша отбирати. Уведавше же то прочие попы, отбегоша с грамматами в разная места, и доныне в великой чести священная действуют. А Епифаний (мнимый епископ) в ветковское разорение в Киев скорбен взят, и тамо умре и без пения [На поле: Слышно было, что некоему солдату велено его погребсти].

По сем в лето 7258 явися в подольских странах некий человек от Великороссии, именем Анфиноген: быв иногда диакон, нарицаше себе епископа [На поле: Анфиноген был ключарем Воскресенскаго монастыря ризницы]. И по староверцах грамматы своя разсылаше, велика себе некоего именуя, и весьма хитро пиша, призывая к себе забеглых попов и прочих знатных ветковскаго и диаконова согласия, обещаваяся им поставити или дияконов, или попов, или самого епископа. И сия убо слышавше, потрясошася мнози, удивляющеся незапному его появлению, притекающе на видение его. И тако оному архиерейская действующу, неких во диаконы и в попы рукоположи. Некто же бяше чернец Анфим, муж забеглаго ума, и удивлен в том многим, но своенравен и безсоветен. Сей иногда за древняя в Москве много пострада, но и велие безумие от любоначальства на себе показа, им же ослепе, нача себе глаголати попа, о чем до того ведущии его отнюдь ни в мысли имяху. И тако нарицая себе, притече к нему, нарицающемуся епископу Анфиногену, и от него во архимандрита поставися; возвращься оттуду, восприя жительство между Гомиею и Веткою, при Соже реце в пустыни, и тамо обитель собираше. После же и во епископа заочно сей Анфим от Анфиногена (взгляд имея на Федима епископа, поставльшаго Григориа Неокесарийскаго) поставися; но прельстися: ибо в тое мнимое его поставление уже Анфиноген не епископом, но у некоего пана капитаном сотворися. Обаче некоим слепым Анфим за епископа вменися и действова епископская, и во диаконы и в попы поставляше, кои попы имеху не малыя подзоры, их же он постави, и до ныне священная действуют.

Тем же не вем, кому зде дивитися: народному ли нечювствию, или толикой страшной дерзости Анфимове, яко толикий муж ведущий и толико терпение за древнее пострадавый, легкими юзами любоначальства связан тако паде, и многим смех на себе привлече, разумным же страх, яко тако скорыми ногами к подложному епископу притече и неиспытно велие на себе обязательство оному даде, во вся дни почитати и покарятися тому, и прочая. Велию науку собою показа внимающим, что деет любоначальство, и коим концем любящия мирския чести овенчевают. После бо сего дерзновения Анфим отшед, и тамо по некоим странам преходя, апостольствуя, рукополагая прочих, возвратися оттуду, возмездие своего дела восприя: ят бо бысть некоими в Польше и Могилевскому епископу вдан, и той остриже ему главу и браду, в темницу затворити повеле. И тако прокажен, едва оттуду утече, и в некоих местах скрыся.

Не минем же и сие зде глаголати, что в нынешнее настоящее лето 7263 содеяся. Гомельские и ветковские по заграничью жителие, к ним же приложишася после и в Малороссии обретающиися в слободах, написаша тии челобитныя, просяще, да от великороссийских архипастырей поставится во епископа им человек на совершенства антимиса, мvра и на произведение попов, потом же и да благословят возградити сугубыя обители. И по сей челобитной еще известнаго несть, ибо на сем престаем глаголати.

Окончание.

Доселе убо сию историю о бегствующем иерействе, начен от первейших лет, в няже староцерковная пременения показашася, произведох, предлагая, како соловецстии [отцы] храняхуся от новшеств рукоположенных, не приимше онаго присланнаго к ним архимандрита, и каков бяше оный Стефан великия ревности и Козма попы, иже всячески новшеств охраняхуся, ни крещения, ни рукоположения тех приимаху. И не токмо сия сами не приимаху, но и последующим себе во исходе души своея наказоваху, да никтоже ни по какой нужде от новшеств рукоположенных приимет. И сице творяху не токмо сии, но и прочии. Свидетельствоваша сия приказания оставшияся тех иереев дети духовныя, в коем приказании и скончашася. Свидетельствуют сия и до днесь кои живии, слышавше и видевше тех детей, делом, и словом приказания их сохранших, и в том от сего света [века] отшедших. Аще ли Иоасафу и повелено бысть Иевом от Тверскаго архиереа поставитися в иереа, но в сем несть разгласия с соловецкими отцы: ибо они под исповеданием новых догмат ставленнаго не прияша; сей же Иоасаф во исповедании и поставлении древняго обычая рукоположен и прият бысть в действа. И ниже оное Иоасафово поставление на образец может быти нынешних взыскателей, сих ради вин. Первая вина: яко той архиерей Тверский имяше на себе крещение и рукоположение древнее. Вторая вина: яко и сам той архиерей, аще нуждею к новодогматствованию и привлечен, обаче древняя лобызаше, что свидетельствоваше и новгородский Сава: аще (рече) и новым касаюся, но весьма в сомнении. Третия вина: яко всех согласий разсудительнии таковых с новшествы рукоположенными не сравняют и не абие сих отвергают. Четвертая вина: яко сицевых и каноны не лишают еще благодати; глаголет бо Никон на первое правило Великаго Василия: яко первии отступльшии имут благодать рукоположения. И сих ради вин к новостем приставшии, а наипаче искру любве еще древних имущии, не подлежат всеконечному отвержению: тем и действуяй что в любви древних, благодатно содевает для приемлющия той персоны. Аще же первых попов дети духовныя за оное поставление Иоасафа и гаждаху, убо и не достойни суть кары.

Темже вся сия исторически о отцех  древних предложивше, и словом их дела видевше, повратим очи свои на нынешнее иерейство и видим: сообразны ли суть тем, на них же они уповают? Ни. Реку же о сем сице: Аще бы оных отец соловецких и тех древних иереев от праха земнаго Господь Бог, зеницы их отрешив, их ревности благоверия, возставил бы и между сих настоящих иереев поставил, не аки ли бы злато посреде глины возблещали, и аки ангели посреде плотских человек воспрославили бы ся, и видели бы сих, под именем тех иерейства показующихся? В коликое уже безобразие и нелепотство настоящее иерейство прииде! Онии иереи быша ревнители благочестия духовнаго [древняго], сии чествования мирскаго. Онии утешающеся в дусе; сии же в брюхе. Онии упование свое имуще на Бога; сии же на злато и откупники свои. Онии прилежаще беседам духовным; сии же беседам мирским. Онии веру праву и догматы истинны соблюдаху: сии же трапезам веру непреложну имут. И что о сих реку? Онии иереи истиннии бяху; сии же истинных иереев токмо имена содержат, а достоинств правильных далече отстоят. Онии аки пчелныя матки быша; сии же шершни, жалы свои наготове имуще, да кого либо противных себе уязвят, уранят, изгонят. О, иерейства сего чюждеименнаго и своевольнаго! Всуе хвалится отцами, всуе во устех имя обносит! И сия убо слышав, православный читателю, аще чювство доброе имаши, от древняго слышания не мало настоящему удивишися, в коликое небрежение, в коликое своевольство и безобразие прииде — познати можеши. Кое уже снисхождение их видим не далече дверей отступления, яко не велико уже посредство содевается. И сему что виновное есть? — не обретаю, токмо в широкия врата единому другаго предварения, яко бы рещи: един законы плотскими не воздержно ходя слепоту налучи, в блате страстей погрязе, а ин, мняся светом разума ходя, той же вавилонской чаши желая, законы мамонныя поставляет и веру столовую снабдевает. Темже и купно един другаго предваряет в злобе, и надежды благия не вем откуду обрести, яко всем врата широкая любезна и многие усердствуют в ня входити, тесная же дверь благоверия презирается. И како кто может добре закон Божий церковный хранити? Ни како. Читаем бо во истории стрелецкой ["История о вере и челобитна о стрельцах" Саввы Романова], яко в лето 7195 восхотеша стрельцы древлецерковная паки возвратити и за то душы своя обещающе положити, о чем мнози не малыя труды показаша; но егда сии стрельцы с некоими посадскими разумнейшими, по царскому повелению, с Хованским князем, на разговор к Иоакиму патриарху посланы, тогда кия от них на патриаршие напитки вергошася, тии вси под руку патриаршу пойдоша, кроме любящих трезвость, и студ воздержным сотвориша, а наипаче егда тако о древностех старающимся стрельцам, прислан к ним бысть от двора царскаго человек, возвещающ им милость царску, на всякой десяток по ушату пива простова и подделнаго и по мере меда и вина: и се слышавше онии, оставиша той совет и по напитки побегоша, и в том питии мудрость их поглощена бысть, и забывше обеты свои ради покоя телеснаго отпадоша истины. Не вем же воистину, что хощет быти и в нас, яко всяко рачение преста, а плотский покой верх восприемлет. К коему еще злейше явися: во всех слободах кабацких домов умножися, на совершенное отгнание добраго разума, а исправляющаго о том несть. Мнимии бо духовнии, вместо законов церковных, сами сребролюбию и телесным прибытком раби быша, желающе в сем веце покоя и славы, и суще враги креста Христова сотворишася: тем и аки пси объюродеша, не могуще на всяко беззаконие лаяти, от коего молчания людскую выгоду себе приобретают, и в едином множестве закона похвалу имут, от чего не малая есть боязнь, да не оных стрельцов мрак и нас покрыет, ибо не новое то гонящим во след плотскаго мудрования отпадати Божия правды. Пишет Бароний, яко в гонения древняя мнози Христа отвергошася, а в первых сии, иже пространно живяху и благая мира любляху. От чего Боже сохрани нас и помилуй, и даруй нам по стопам Твоим ходити, и церкве Твоея святыя слушати, и со святыми избранными твоими угодити, и Тебе славу возсылати вовеки, аминь.

II.

О вечности священства Христова суетно приемлющим возражение.

Мнози глаголют нам: Священство Христово вечно; и мы его тако исповедуем и держим; вы же священников наших не приемлете: убо по вас [вашему] священство Христово престало?

Отвещаю:

Священство Христово основание свое имать на сих словесех Христовых, о нем же сам Владыка Христос приточне рече: человек некий добра рода, отходя во страны далече прияти себе царство, и возвратившися, призва десять рабов своих, даде им десять мнас, рече к ним: куплю дейте, дондеже прииду (Лука зач. 95). Сия словеса блаженный Феофилакт сице толкует: "Отходя Христос на небеса, призва десять рабов своих и даде им десять мнас. Кто же суть раби его? Раби его суть, им же церкви поручени, по оному: внемлите убо себе и всему стаду, в нем же вас Дух Святый постави епископов пасти церковь свою (Деян. гл. 20 ст. 28). Что же суть десять мнас? Десять глаголемии быти совершеннаго ради церковнаго стояния, ибо в церкви чин совершение имать предстоящих украшение, и ни больши лепо быти, ни менее, еже Слова благодатию трие сии образы в церкви: очищение, просвещение и совершение. Три сия действа наследуема чинов: диакони очищают оглашением учения, пресвитери просвещают крещением, архиереи же священныя чины поставляют и совершают, еже есть рукоположения. Видиши ли? — чины к действам, ни вящше, ни меньше реку предстоящих". Дозде Феофилакт. Зде весь образ сотворися. Тем или мертво оно и бездушно явиша, или само тело главою соделаша, коего священства Христос не преда. Сам Христос куплю священства своего Апостолом и тех наместником архиереом преда деяти, дондеже приидет. Но вы сея приискренния купли не имате, но от чужия купли иерейство сие приясте, в нем же Христовы купли не исповедаете. И кто сему странному вашему делу не зазрит? Глава, сиречь архиерей, не имея священства купли, вам куплю священства преда деяти. И архиерей ставивый ваших иереев чужд Христовы купли, а ваши иереи, поставльшиися от них, куплю священства имут. Аще же архиереи купли не имут, убо и ставлении от них ваши иереи купли священства не имут. Тем же, аще ставивыи ваших попов архиереи не имут власти рукоподанныя от Христа, (но) по себе куплю деют священную: убо и вы не потому благородию Христова священства куплю деете, в нем же Христос преда, но самочинно, на забаву обычая своего и безприбыточно. Вонмите убо Евангельским оным словесем: и призва, рече, десять раб, и предаде им десять мнас. Кая десятица рабов знаменает чины совершеннаго строения. Мнасы же десять тако же совершенное даров Святаго Духа в священных чинех. Десятица бо число — всех числ совершенство, из него же аще кто и едино измет, уже во всех числех погибнет совершенство числения, и велие смущение учинится. Посему и священство тое не будет образом Богопреданнаго священства, но некоим искаженным. Внимайте же десятице, ея же первое число всех нужнейши к числению прочих девяти: так и в священстве Христове, всех первейший и весьма потребнейший к произведению прочих чинов (есть) архиерей. Како же вы, изъявше первое число из десятицы, последующее имети хощете? И да яве сотворим сие, — хощет ли кто десятицу числ сотворить? Но не может, перваго числа не рекше, второе число глаголати: иде же бо перваго не глаголется, тамо и втораго несть. Егда же первое речеши, то и второе и третие речеши; оному же не рекшуся, всяко числение престает. Видиши ли, коликая сила во единице первой, без нея же вся погибнут. Тем же Дионисий Ареопагит в богословии своем Божественное естество единице сей приуподобляет: яко же без единицы числа не могут стати, тако и без Бога вся тварь престанет быти. Сего ради (и) Христос не иным чим полный своего священства образ предложи, но десятию числы, да навыкнеши тое знати. Аще первое не явиши, то и образ числения погубиши: ибо от втораго не числится десятица и полна не может быти, но от перваго начинается. Так и священство: от архиерея, аки от единицы и от перваго числа, вси чины церковныя начинаются и бывают. Архиерей бо в церкви аки единица в прочих девяти. Аще же сего отвержеши, то не будет втораго и третияго числа, сиречь не будет иерея и диакона, и прочих чинов. И се есть твердое основание священства Христова, и всем разумно десятию числы преданное. Откуду всяк познать может нецелость его и падшее быти увесть. Зриши бо, — аще перваго числа не будет, преста уже числение: и аще архиерея не будет, пало уже священство. И яко же тамо без перваго числа [прочие] числы производить не мощно: тако и без архиерея священным чинам быти не удобно. Видиши ли, коль явственно предание священства Христова и образ его погубленный ведати возможно. Аще леностию и небрежением заражен кто не будет, никто [то никогда] в священстве (по сему определению) заблудит. Помни словеса Господня; не туне бо в сицевых числах Господем священство Его предано, но да выну всяк дикое и неприкладное священство может познати. Постави сию линию десяточислие, и числи от перваго. Аще в числах подобательно увидиши, то сущий священства Христова образ; аще ли ущерблено, и перваго числа несть, разумей его искажено быти. Зря же о сих (от сего?) предложеннаго изъяснения числ, колико се настоящее иерейство предания Христова отстоящо, хранися: первых убо числ архиерейских отвращаются и гнушаются, а от них производимых вторых и третиих, сиречь попов и диаконов, держатся. Но Господь Бог дело священства Христова не иереем преда, но архиереем; и архиерей един источник благодати в церкви, и сих образы на ризе своей носит един, а не иерей. И яко Сам Христос во истекание благодати единаго архиерея устрои, сие же иерейство по коему оному (иному?) Евангелию в себе истекающую благодать исповедают, отвращением своим дающе иным благодати в священнодейства? О, дерзости, о своевольства! О, похвалы суетныя! В толиких страшных тайнах, смертию и крестом от Христа заслуженных, смело и небрежно поступают, толикия высокия ограды Христова предания прелазяще и сие богопреданное число казяще, увы, не зрят убо, яко не от главы священство свое начинают, но от среды некия, сиречь от иерейства, начало творяще, минующе богопреданный устав священства, и ни един взгляд на Христово основание имуще, ни на апостольское и святых Отец утверждение взирающе; в сем иерействе поступают, чуждее некое Евангельской проповеди держаще. Ведят убо, яко своих первоначальных глав не имут: тем же на оживление своего тела, иерейства, отвне приемлют, на подобенство сие, яко бы рещи, феодоров труп, главы своея не имев, ищет от семеновы главы оживление. И како может чуждая глава иному трупу жизнь подати? Глаголю же: сие настоящее иерейство главы, своего архиерея, не имать, от него же бы хиротония его была оживлена, от иныя главы, архиерея, их же весьма гнушается, жизнь влечет, и иерейство свое священство богопреданное и вечное, от него удержаное, в себе то глаголют. О, ложнаго указания! Аще ли хощете поне внешний образ священства удержати, прилепите иерейство свое ко главе той, от нея же оно начало восприя, и тако оно имуще главу будет.

Но ваш ответ на сия готов сей: яко и древле святая церковь отвне сущу хиротонию приимаше и от тех глав отделяше.

Вемы сие, вемы, яко отвне хиротонии приемлемы быша, но ко главам животворным, в них же силы хиротонии самем Христом положени быша. И тии: приемлюще тех безблагодатных, данною им властию благодатных творяху, и тако аки сосуды скудельнича их отвне приимаху, огнем не печены суще, огнем благодати Духа Святаго тверды и богоугодны в дело таин церковных совершаху. Ваши же попы не прияли от Христа в хиротонии дары на совершение подаяти, но токмо вверенных приобщений благодати сподобляти, а не в священнодейства власти раздаяти: сие бо единых архиереев дело. А в первой убо благодати, юже всем обще верным подаяти, на рукоположении архиереом явлени есте, а во второй, сиречь благодати на священство раздаянием, не поставлени быша иереи. И како не поданной им власти от Бога на священодейства и прочим иереом подаяти будет? разве в богопротивное некое служение, якоже святых Апостол правило 1-е гласит: "кождо в данном ему чину да пребывает", и "не преступай заповедей, не суть бо наша, но Божия, якоже рече Господь: слушаяй вас, Мене слушает, и слушаяй Мене, слушает Пославшаго Мя, и отметаяйся вас, Мене отметается; отметаяйся же Мене отметается пославтаго Мя (Луки гл. 10, ст. 16). В предисловии же Номоканона святых отец тако о сем пишет: "подобает бо духовным отцем ведати, еже от духовнаго и каноннаго разсуждения, яко да грехи тяжкия и недоумительныя исправлению кающагося к епископом и совершеннейшим и благоразумнейшим препослати; в некоих же со искуснейшими советовати не срамлятися; иереов же и протодиаконов грехи, яже извержения томление наводят, да не дерзнет духовник разрешати их, якоже бо невозможно ему хиротонисати, сице ни на священства степени изпадшаго паки возвращати: еже бо во гресех извержения сущему священнодействовати простити и попустити, есть аки подобающаго возводити на священство". Дозде Номоканон. От сих двух предложений яве есть, яко сие настоящее иерейство, новоприходящим иереем власти на священнодейство подающее, весьма заблужденно и богопротивно творят, самое действо и должность архиерейскую восхищающе. О, слепоты великия и дерзости страшныя! Вступают бо в то, чего им Христос не даде; творят бо то, что страшными Божиими словесы Апостоли святии запретиша, о чем и Номоканон яве гласит: "еже кому подати власть на священнодейство, то самое есть, еже на степень священства возводити". И сие ли ваше дело священства богопреданнаго образ? и тое  ли вечно вам Христос творити преда, о чем Апостоли запрещают, лик церковных пастырей на вас вопиет? сим ли вы священством похвалу имате? на сие ли во спасение уповаете? О, Боже! второе зде некое Евангелие отверзеся, ратующееся со Христом и со ученики Его, и святою церковию. Павел Апостол ко епископом глаголет сице: вас, рече, постави Дух Святый епископов пасти церковь Божию. На оная же Христова словеса и Феофилакт в толковании глаголет: "архиереом, а не иереом поручено строение церковных чинов". Темже и устав святыя церкве тверд положен, чтобы и о приходящих ведали епископи, а не иереи. Читай о сем Номоканон, поместнаго собора Карфагенскаго правила 117 толкование, в нем же пишет сице: "Понеже многи распри бываху между епископов о Донатианех, обращающихся к соборней церкви, к которому престолу тем (подобно) причитаемым быти. Прежде бо царскаго закона, иже повелеша о соединении церквей, тому епископу повиновахуся, им же от льсти обращение прияша и к соборней церкви приобщишася". Дозде правило. Зрите ли, яко зде поверяет новообращенных епископу, а не иерею приимати; аще же где сей прием иерею оставляется, обаче с волею архиерейскою, якоже о том в правиле святых Апостол 39 повелевается: "без воли епископа своего пресвитери или диакони да не творят ничто же, тому бо поручены людие Господни". Толкование: "Несть достойно пресвитеру или диакону без повеления епископа своего ни людей вязати, еже есть отлучати, или умножати, или умаляти епитемию, сиречь запрещение, или ино что таковое творити, аще не будет дано им от епископа о том писание, сиречь приимати в покаяние и вязати и разрешати; кроме того не могут ничтоже творити: яко епископу суть поручены Господни людие и той хощет воздати слово о душах их". До зде Кормчая.

Видиши ли зде опасство святыя церкве во Христовых и апостольских словесех: еже притчею назнамена Христос призвати рабов и дати им десять мнас, се есть апостольскому и епископскому чину вручение церковное, то святая соборная церковь аки зеницу ока соблюдаше, правилы ю подтверждающе: "тому бо, глаголет, поручены людие Господни". Но како поручены? — внимайте притчи оной Господней. Ваше же иерейство в толику дерзость и слепоту прииде, яко ни во что поручение оно Господне и каноны соборныя преложше, в епископскую должность прииде, по иерейскому благословению точию вяжут и решают, и на степень священства возводят, и дают власть священнодействовати. А почему? искать нечего [понеже ни на чем утверждаются]. И несть ли се Евангельскаго и Апостольскаго предания презорство?

Заключение глаголанных.

Павел Апостол, похваляя Ефесян веру и истинное их и твердое последование Евангелию, тако глаголет к ним: наздани бывше на основании апостол и пророк, сущу краеугольну самому Исусу Христу, о немже всяко создание составляемо растет в церковь святую о Господе (Ефес. 2. гл. 20 ст.). Рцыте же ми вы ныне, откуду тако о своем иерействе можете рещи, яко наздани есте в нем на апостолех и пророцех и на самом краегольном камени Христе? Ибо во иерействе своем и на Христа своего священства не положисте, господство им некое дающе в приятии иереев: зане Христос церковь свою иереем не вручи и в строении церковных таин главами не постави, но всю церковную власть и вси той должности Апостолом и их наместником епископом даде, и в них сия дары положи, и тем куплю повеле деяти до пришествия Его. Ваше же иерейство несть совершеннаго купечества на служение и работство оных купцев повелению. И како, забывши свою должность, вступает не в данное ему, иным дающе власти священнодейства? Сего ради глаголю, яко вы сицевым презорством паче и паче образ Христова священства погубисте и действом своим помрачисте. Аще (же) хощете внешний образ наздав явити, идете и прилепите е ко главе, от нея же то начася. Мы же, яко перваго числа и главнаго, архиерейска, не имамы: убо и опасны есмы вступати в то число, коего Христос не преда. Тем же мы паче чествуем образ богопреданнаго священства, неже вы. Коликая воистинну от начала проповеди Евангельския быша гонения, тесноты, скудости священства! Африка, великая часть света, имяше двести пять престолов епископских, но от обладания пленивших ю на четыре точию престола сведеся, и то утаенно. Карфагенская великая митрополия от арианскаго пленения 25 лет не имяше своего епископа; обаче в сих и иных скудостях священства и епископов, ни едина история не объяви, чтобы отвне приемлемым иерейством где церкви правилися, ниже един архипастырь таких ради случаев о сем повеле. Вонмите же опасно и сему: Христос Бог наш, предведец всяких грядущих случаев и многих хотящих быти, учеником сказуя, а о сем большем деле церковнаго строения, на нуждныя случаи, кроме того совершеннаго священства нимало определи: мнится то не полезно. Аще бо от того хотяше кая польза быти, да в великих нуждах и иерейством внешним единым церковь довольствуется, рекл бы; но яко великим смущением се виновно и погибели, не остави сему Божий промысл быти. И да известно се буди:  древле иудейский род от Иеросалима в Вавилон пленен, но яко с надеждою возвращения был, сего ради повелением Божиим огнь оный небесный, его же жерцы на всесожжение (прикладыванием дров) храняху при церкви, Иеремия пророк скры в пустыни в кладезь, и претворися той огнь в водное естество, (и бе тамо) 70 лет, его же из плена жерцы обретше, паки на вожжение жертв из кладезя взявше и употребляху. Видите ли промысл Божий, чудно явленный. И сия (быша) в ветхом; коль же паче в новой своей благодати не устроил бы и паче сего. Но недоведомых ради судеб своих оста сие. Видим же отчасти, яко на едином иерействе велие своевольство, велия затрата церковных прав. Аще и повеления несть, что бы тамо не было, аще бо законом Божиим и преданием апостольским и отеческим сие позволено было, да иерейство без епископства правит церковь, о, Боже! что бы церковь тогда была? вси бы следовы тоя погибли. Но слава единому премудрому Богу! Коль себе честны имать искупленные кровию своею человеки! Той преизящнейшии пастыри им даде, яко да целу и непорочну церковь Господеви представят.

III.

О власти священнаго чина.

Господину честному, и воину изряднейшу, и в мысли остроумнейшу, взыскателю горних усерднейшу, убожество наше кланяется и сими словесы приветствует и поздравляет.

От перваго убо разговора с тобою (о власти духовной) познах тя быти разумна и добрых нравов взыскательна; ныне же и от сродныя ти понуждаем есмь о том же и паки писанием возобновити. Но яко вежества словесна [мудрости словесы] не навыкшим нам лепотствовало бы пред вашим остроумием молчати; но обаче обрести нам благодать пред вашим почтенством, простою мыслию приведохомся на сия, во еже сими словесы истинну показати правду церковную, ея же отпадением тще спасение наше имать быти. Тем же для удобопонятнейшаго разума об искомой вещи, на подобенство вашего чина во основание из евангельских сокровищ нечто изъяв, придаю днесь благоумию твоему в руководство, о чем у Матфея в Благовестии в зачале 25 обретается: Вшедшу Исусу (рече) в Капернаум, приступи к Нему сотник, моля Его и глаголя: Господи, отрок мой лежит в дому разслаблен, люте стражда. И глагола ему Исус: Аз пришед исцелю его. И отвещав сотник, рече Ему: Господи, несмь достоин, да под кров мой внидеши, но токмо рцы слово, и исцелеет отрок мой. Ибо аз человек есмь под властию, имый под собою воины, и глаголю единому: иди, и идет, и другому: прииди, и приидет, и рабу моему: сотвори се, и сотворит. Слышав же Исус, удивися, и рече грядущим по Нем: аминь глаголю вам, ни во Израили толики веры обретох; сотнику же рече: иди, и якоже веровал еси, буди тебе. И исцеле отрок его в той час. Дозде Евангелист, от его же повести искомыя вещи явственное указание сотворим.

Бывшу бо Исусу на горе и народом заповеди тамо предложившу многи, сниде с горы, и последова Ему народ. И егда Ему приити во обитательный свой град, сретает Его сотник, и яко же лепо самого Господа и Бога молит Его, да исцелит отрока его. Исус же, предведый вся смотрительно, рече ему: Аз пришед исцелю его. Но сие убо сотник отрече, глаголя: яко несмь достоин, да под кров мой внидеши. Ведяше бо сотник Исуса иудейска рода быти, себе же языческа, и яко иудеом не бяше повеления ко язычникам входити: того ради и отрече вход к себе Исусов. Какое зде разнство! Хананея бо иногда ко Исусу вопияше: помилуй мя, Господи, Сыне Давыдов, дщи моя зле беснуется. (Исус же) ничто ей не отвещеваше, и учеником, о ней просящим Его, рече: несмь послан, токмо ко овцам погибшим дому Израилева. Сей же сотник и не проси, Исус же сам позвася абие к нему в дом на исцеление приити. Вся бо сия предведущия премудрости Божия исполнено: разуме (бо) Исус внутреннее движение сотника, яко от словес сих Христовых произыти имут от сотника словеса, веры предивныя исполнена, обличающия в неверовании словесем Его (весь) народ. Тем же и по внегда рещи Исусу: Аз пришед исцелю его, сотник, из своея военачальныя власти божественную Его власть и без присутствя Его самого действительну быти разумев,  глагола: рцы точию слово, и исцелеет отрок мой. Утверждает же сие доводом сим: ибо аз, человек, власть некую над воины под собою сущия имам и повелеваю им: иди, и идет, и прииди, и приидет, и сотвори се, и сотворит. Такову пречудную веру сотник из своего чина ко Исусу Господу нашему разуме глаголати, от единыя того премудрости, учения и чудотворения навык: аще бо ты Бог и Владыка над всеми всесильный, то может и без присутствия Твоего быти, еже хощеши, — рцы точию слово и исцелеет отрок мой, ибо и аз, по данной мне власти от Кесаря, и не присущ где, слово мое  действует.  И воистинну, власти естество таково, идеже и несть власть имущий, слово его чины устрояет, на степени высокия возводит, почестей сподобляет, и из сего обнажает и извергает, вяжет, биет, в темницы затворяет и смерти предает. А ему же несть власти, и пришед ничто может сотворити. Таково любомудрие о Исусе сотник показа, ни в закон вник, ни в пророки, но от своего чина Божию власть и силу истинную быти изрече, и тако всех, закон слышащих и чтущих, не могущих (же) власти духовныя и силы познати, обличи, и Христовы похвалы сподобися. Что же рекут Господеви слияние власти божественныя творящии, закон чтуще, а от закона о власти сей, Духом Святым в церкви положеной, научитися не могут доселе? Научися убо ты зде премудрости Владычни, како из обычных ведомостей человек человека удовляет и в свое любомудрие приводит. Тако звездочетцев звездою на поклонение к себе приведе; тако рыбарей ловитвою рыб последовати себе устрои; тако и сего сотника от власти его сущия Божию власть разумети сотвори. Тако и мы, худейшии, от разума Божия навыкше, о честнейший, хощем ти из всеначальныя вам власти церковную и сущую в ней Божию власть указати и яве истолковати. Виждь убо, како и вы под властию прочих вышших пребываете; аще бо владяй вами и той же человек, яко и ты, но властию данною ему паче тебе: тем же и не силен ты во оном, но он в тебе, и очи твои нань взирают, и уши твои к нему отверсты, и сердце, и ум, и всего тела твоего движение на повеление его готово, и не имаши ты в его власти, но разве повелит ти он сотворити что во владомых им, силен бываеши (тогда) содеяти то и ты. Аще же и тя испытати подобает, имаши и ты власть, но токмо над челядию твоею и над домом; а на гражданстве твоя власть не бывает, но того есть токмо, ему же от превышшаго владыки власть сия дана бысть. Откуду научаемся разумети, всякую власть быти ино и всяк человек ино, не бо единоестественни суть человек и власть, трава и цвет травы. Ино убо есть естество, наводящее траве доброту. Их же рознство и пророк представляя, глаголет: всяка плоть яко трава, рече, и всяка слава человеча аки цвет травный: изше трава, и цвет ея отпаде. Различия степени церковныя власти научитися (возможно) от планет небесных, о них же Апостол глаголет: ина, рече, слава солнцу, и ина слава луне, и ина слава звездам: звезда бо звезде изобилует во славе. И луна убо не может свет солнца показати, такожде и звезда своея меры превзыти. Сице бо есть положение небесе аернаго, из него же приуказы [указания] и доводы имамы о церковном небеси. Суть бо и в нем во образе солнца чин архиерейский, или рещи апостольский, наместников Христовых, к ним же сам Христос рече: вы есте свет миру. Сего ради в служении Божественныя литургии Христа дело собою являют, двома свещема по входе крестит [осеняет], знаменает от Христа в дву естествах исходящую светлость, коею светлостию небесная и земная просветил есть; потом же на горнем месте святитель седши, крестит треми свещами, знаменует, яко во еже сести Христу одесную Отца, просветишася людие в разуме знати Святую Троицу. И сицевых дел иерей своим действом показати не может; аще что и знаменует Христово, обаче не с такою властию, но смирения вид показуя, иначе и иначе во всех священных действиях, а не со властию. Обаче и се не без архиерейския силы; ибо он, по образу луны, влечет себе свет от солнца, архиерея. Но ино есть свет солнца, и ино свет луны: луна не светит, аще лучю солнца не приимет; иерей не может что освятити, аще света благодати от архиерея не приимет. Первый бо свет солнца, Христа, полагается во архиереи, и от него, как от зеркала, или от воды луч к стене отпрядающь, в прочих предается, по священному Дионисию. Тем же без архиерея, просветителя суща всех, ни диакон, ни иерей в благодати может быти, по Симеону Фессалонитскому, о чем указует сице: "единый действует епископ, свидетель свещателен сый, яко подражает Бога, Отца светов, и Его же обилует благодатию, си есть дарований даром, и всяк чин, и вся тайны и все совершенство чрез него" (гл. 75). Той же: "яко же бо от источника света, вся церковная чрез него совершается, тем же свещателен именуется епископ" (гл. 76). И паки той же: "Яко от епископа токмо мvро и хиротония, и чрез него во всех действиях епископская предваряют благодатию". Слыши, ничтоже действовати священник может в дусе, или иное что действовати, аще хиротонию не имеет: сия же от архиерея есть, ибо архиерейство чрез ню действует. Паки: "иерей не действует тайны без жертвенника; сей же чрез мvро освящается, мvро же чрез архиерея токмо совершается. Убо кроме архиерея ниже жертва, ниже священник, ниже жертвенник; весма убо вся сия чрез архиерея суть" (гл. 77). Дозде Симеон. В предисловии же Номоканона пишется: "мирских человек простых грехи в менших да со искуснейшими (поп разсуждает); иереев же и протодиаконов грехи, яже извержения томления наводят, епископов суду подлежат. Да не дерзнет духовник разрешити их: якоже бо невозможно ему хиротонисати, сице ни на степень священства изпадшаго возвращати". До зде Номоканон.

Видел ли еси сими доводами величество чина архиерейскаго? внял ли еси силу тех превосходящую, нежели рещи в солнце светлейший свет, действуяй в прочих светилах в раздании светов, луну и звезды просвещающи? Аще бо и спрятается [скрывается] от наших очей солнце, но от лица луны не спрятается; аще ли на колико спрятается от луны солнце, луна отемнится. Разумей убо глаголемая, каково убо Творец наставление тебе из сего дает, в нем же да научишися познавати от Вышняго всему в церкви просвещению быти: не убо луна солнце просвещает, но солнце луну просвещает, и не может нам света подати луна, аще от солнца не просветится, по устроению Зиждителя. И сия убо планит сих власти и силы прикладны ти будут [примером ти да будут] во свет и благочиние церковных чинов. Аще бо архиерей имать свет Христов, просвещает всех, и вся благодати Божией исполняются. Иначе быти не мощно. Не может бо диакон приносити (жертвы), ни иерей хиротонии совершити.

Из сих убо двух, — из мирския, глаголю, власти и из небесных светил, — дахом ти сию третию власть и силу церкве святыя чинов вызнавати. Не мни убо власть церковну хуждши планетныя и мирския власти, но паче и паче да лепотствует ти церковная. Яко же духовная мирских и одушевленная воздушных превосходит честию, тако оных церковная. Видиши ли луну когда в небе сияющу, и абие погубляющу свой свет, не ино что виновное (сему) разумей быти, токмо потеряние [сокрытие] света солнечнаго, кое в полномесячии обыче бывати, от средостения земли, путь лучи солнечныя пресечением: от сего затмения лунна бывают. Разумей сия: дондеже свет архиерея сияет в нем, светоприемен бывает иерей и просвещает народы; аще (же) заградится чим дарование архиерейско на иерея приити, (сам) по себе иерей не может свет возъимети и других осветити, но во тме пребудет, о чем доводы выше предложихом.

И такими словесы, евангельскими и учительскими, церковными и гражданскими, и светилы небесными, о власти и силе степеней церковных нашу истину уяснивше и богопреданную тую быти показавше, кто дерз[остен] сице духоположенныя степени сливати и епископския должности, не по данней им власти, себе придевати [присвояти] сим действом, во еже даяти новоприходящим иереем власти священная деяти? Востанет убо на суд сотник сей, и осудит род сей продерзый, яко [он бо] единым естественным своим разумом власть Божию подобательно позна, нежели сии, на законе почивающии, церковныя, глаголю, и Божия в ней власти разлучити едины от другия не могут, и архиерейскую со иерейскою властию во едино сливают, не ину власть архиерея, и ину иерея, но архиерея и иерея едину быти глаголют. О, слепоты! о, презорства великаго! Кто бы от разум имущих рек, (яко) солнца и луны единак свет, или кто (бы) рек тысящника, и сотника, и сержанта, и капрала едина власть и сила? Никто же бо собою власть и силу приемлет, но от высшаго, и во что прия, в том и может [творити]; не приим же власти аще кто и во гражданстве, ничто может быти повеление его; аще же не по данному во что вступит, указы, или грамоты раздаяти будет, раны за то приимет. Рцы слово токмо и исцелеет отрок мой: ибо и аз, рече сотник, имам под собою воины, и глаголю единому: иди, и идет, прииди, и приидет, сотвори се, и сотворит; но сия по данной власти бывает. Слыши бо Христа глаголюща: дадеся Ми всяка власть на небеси и на земли. Зриши ли? — дадеся, глаголет. И такову убо власть, отходя Христос на небеса, даде Апостолам и тех наместником, архиереем, в сицевых превысочайших словесех и таинствах, рек: якоже посла Мя Отец, и Аз посылаю вы. И се рек, дуну, и глагола им: приимите Дух Свят, и имже отпустите грехи, отпустятся им, и имже держите, держатся. Видиши ли величество вещи? зриши ли, каково власти подаяние? И сея убо первейшии приемницы Апостоли и архиереи; и сии суть во власти и силе полномощнии. Рцы, рече, слово, и исцелеет отрок мой. Тако бо Христос не все присутствием своим, но (и) словом могий деяти. Сего, поелику возможно, и Апостоли быша наручницы [наследницы], словом на небеси и на земли вязаху, словом [от болезней] исцелеваху. И сей апостольстей силе словом вязати и решити быша и епископи наручницы совершеннии, а не иереи; иереи же токмо слуги в повеленных архиереом, аще повелит им кия грехи вязати и решити, а не совершенной силе, о чем читати Номоконон и книгу Симеона Солунскаго. Зане глава и жених церковный епископ, а не иерей; и той благодать Всесвятаго Духа во многих дарех восприят. Глаголется (бо) источник, во еже всех напаяти в потребах, того ради таково знамение источников и на ризе носит. Той глаголется совершен пастырь, в кий образ и жезл пастырский предносящь имать, тако бо от Духа Святаго дадеся ему: приимите, рече, Дух Свят; и инде: даю вам власть, и проч. Не приемше бо от Духа Святаго сынове Скевы, о них же в Деяниих апостольстих (пишется): и зряще Апостолов, запрещающих бесовы словом, тожде и они запрещение творити начаша; но бесове, видевше их не приемших таковыя от Христа власти, нападше на них, бияху, и едва смерти не предаша, глаголаще: мы Христа знаем и Павла свемы; вы же кто есте (гл. 19, ст. 14). Видиши ли, — слово бысть Апостол, и слово бысть сынов Скевы; но апостольскаго ради слова трепетаху бесы, а сынове Скевы за слово трепетаху бесов. Что же есть вина сего разнства? Не обретаем, точию сия: зане Апостоли, имуще Христову власть, запрещаху, а сынове Скевы не прияша такия власти. Темже и ныны всяк дерзаяй и запрещаяй не в данных ему, ничтоже есть, но и паче посрамляется и ранам достоин бывает.

Краткими словесы пробег аз о власти и силе разных степеней, во еже разумевати архиерейскую [власть] над вся, и не обществовати [совокупляти] того совершенства с нижайшими, да не противницы Духа Святаго во он день обрящемся, любви вашей доброжелательствуя и послушанию рабствуя, поклонением окончеваю.

IV.

Книга:

О бегствующем иерействе разговоры и извещение о должности святейшаго предания.

Сама собою Премудрость Божия и Законоположитель Христос Бог претит, глаголя: аще кто церковь преслушает, да будет ти яко язычник и мытарь, о чем учит Апостол. Подобне же нечто и в премудром Соломоне запрещает, глаголя: не преходи предел вечных, яже положиша отцы твои. Все божественное писание, ветхое и новое, свидетельствует спасению нашему быти от хранения закона и преданий по вере правой. Аще же ли кто инако учит, отступай от таковых, по Апостолу. Закон же в нас сугуб положен есть, или самого Христа Бога нашего повелением, или святыми Его ученики и Апостолы преданием, и тех наместниками, святыми архиереи, уставлении и изъяснении: тожде и едино заповедию Христовою умствовати подобает, по оному: слушаяй вас, Мене слушает. Сего ради Павел глаголет: аз приях от Господа, еже и предах вам. Но аще мы, или ангел с небесе благовестит вам паче, еже благовестихом, анафема (Евр. бес. 34). Церковь святая Иоанну показана бысть облечена в солнце Христова приказания, и луна под ногама во утверждение ветхаго завета, и окрест ея главы 12 звезд, апостольскаго учения знаменованием. Тем же последнее святых соборов о сем сицево запечатление полагается: "вся яже чрез церковная предания и учительства и воображения святых и приснопамятных отец новосотворенная и соделанная, или посем содеятися хотящая, анафема". Заградитеся ныне уста в чревоугодие отверзающаяся, умолкните языки ради плотскаго угодия отвергающая богопреданныя церковныя догматы и в пространные входы тесныя врата превращающая сими словесы: се ничто, и се невелико, а се не нынешняго времени заповедь, киими словесы, аки облаки темными, хотяще свет истиннаго предания закрыти. От времен апостольских неслыханная ныне заповедь явися, изменяющая церковная предания, в них же Христово законоположение на некия басни [превращающе и] глаголюще: отцы наши так творили, и мы, последующе им, тожде творим. А от предания святыя Церкве не показуют, токмо вместо предания мощи нетленныя отец своих представляют, а того не разумеют, яко чудеса втораго есть чина, по Лукину благовестию: Господу поспешествующу, (рече) и слово утверждающу последствующими знаменьми и чудесы. Зрите ли, чудеса точию во утверждение слова потребна, да познано будет слово то истинно быти; аще же слово не будет истинно, знамения по себе крепости не имут. Тем же явите нам истину церкве предания, его же дело ваше видим далече отстоящее. Но Христос повеле веровати по писанию; Христос слушать Апостолов повеле, яко себе; Христос повеле слушати церковь. Настоящее же ваше учительство вне Христова учения, вне апостольскаго и соборнаго предания, о чем разговорами сими явим. Аще ссылаетеся на отец своих; но отцы ваши великия ревности в богопреданных бяху, о чем [выше] историю предъявихом. Аще же и Феодосия речете, то и он иначе поступаше во оном; в хиротонии же новотворной аще и попусти, но не сообразной вам и от времене действующих и от приемлющих действо. Но яко о сем удоволивше слышателя вышепредложенною историею, кая вас изгоняет от упования ваших иереев, понеже несте оных (последователи): убо и не нарицайте их "отцы наши, древнии иереи". Изгнани бо есте наследия их своими делы. Прочее грядем к канонам и историям святыя церкве, и будем уже ими вас разсмотрять, аще первенствующия церкве Христовы хранителе преданий и обычаев есте. И сице известное предложив поступаю в разговоры.

Разговоры о разнствии между приемлющими настоящих иереев и не приемлющими.

Вход в разговоры.

Бывшу ми иногда в чуждых странах (глаголет сие неприемляй настоящих иереев) и пришед ко мне человек некий согласия инаго, его же аз с подобающим почествованием восприях; и седшим нам, беседующе, и дойде слово, еже бы нам о разностех наших совопроситися. Тогда пришедый рече ми: любезен глагол ми есть к тебе, и аще повелиши ми, с вопрошением да реку ти, ты же да не понесеши тяготу словес моих.

Аз же рех ему: Рцы ми, аще что пользу нам принести могущая в намерении имаши, ибо и аз в беседованиих полезных желателен есмь; точию да не позазриши невежества словес моих: не искусен бо есмь добрых разговоров.

Вопросити же пришедый рече ми: Желателен есмь любви вашей; обаче разнство наше умствованием настоящаго позволения в единосовестие и подобательное любви приити не малое препятие творит, и видится между нами таково, яко усты токмо и на едином языце приязнь и любовь наша; дражайшая же любы погибе в нас, яко не мощи от разнства нашего иначе быти, и яко удальшеся доброты сея; тем, яко от некоего злаго гнезда, от развращеннаго нашего сердца рождаются гаждения, клеветы, полезнаго же что сдышати не обретаю. Тем же любве ради Божия прошу тя, скажи ми: кия ради вины седмь таин церковных отмещетеся, отнюдуже и разнство наше?

Аз же: Бог да сохранит нас от сего, еже бы седьми таин церковных отметати; сынове бо есмы святыя соборныя апостольския церкве: тем же и веруем о них быти во спасение и жизнь вечную преданным, не веруяй же тако еретик есть.

Пришедый: Тем же и дивно ми есть: словом толикую приязнь о тайнах показуете; но егда тя на дело вопросами оными поведу, познаю тя сих отрицающася и не приемлюща.

Аз же: Искуси мя вопрошении твоими, и познаеши такова мя быти, якова и рех.

1. О приеме иерейстем.

Начало разговоров.

Пришедый: Рцы ми истину: кия ради вины тайну священства Христова, в веки богопреданную, не приемлете?

Аз же: Где сия слышал еси, яко мы сию тайну священства не приемлем?

Пришедый: Самая истина общаго вашего действа свидетельствует, нетребованием иереев, ако не приемлете священства.

Аз же: И киих иереев не требуем?

Пришедый: Ни ли не познаваеши гласа силу, яко приемлемых нами иереев не приемлете, купно же и действа священная быти отреваеши?

Аз же: Дивитися сие ответствование творит мя: ибо прежде вопрошение твое бысть ко мне о тайне священства Христова; ныне же, аки забыв свой вопрос, на приемлемых вами иереев сходиши! И что ти сему виновное? не вем. Однако же вопрошу тя: священство и иерейство едино ли есть?

Пришедый: Едино есть.

Аз же: Не усмотрив сих вещей естеств, тако отвещал ми еси едино быти.

Пришедый: И кое сих (рече) разнство естеств мне быти покажеши?

Аз же: Велие тебе разнство сих быти покажу, — вонми. Священство убо есть богопреданное действо, устрояющо священныя чины, состоит же треми сими: веществом, то есть возложением рук епископских; видотворением, сиречь глаголы оными, их же святитель на рукополагаемых в молитве глаголет; совершительною силою Святаго Духа, ея же ради действо хиротонии исполняется и рукоположенный в своем чине и сане устрояется, да будет своим служением благоугоден Богу и церкви (Катихизис Бол. глава 63). Иерей же сему священию, яко же сиянию солнца, подлежащее есть лице.

Пришедый: Буди убо и тако, яко же изрекл еси; но по оному, не приемля Духом Святым освятимое лице, не приемлете и святящаго е Духа Святаго.

Аз же: Тако есть.

Пришедый: И аще тако есть, яко же и есть, подобаше ти, святящий приемлющу свет, прияти и освятимое им лице настоящаго иерейства; аще ли же ни, то во твоих словах действу неприятия будеши противен.

Аз же: Добре глаголеши о свете и о подлежащем ему. Но видиши ли солнца преизобильнейшее сияние, яко и низходящим лучам от того и касающимся вещем вспять возломатися и освящати вне прилучаемыя, яко же при воде и стекле случается бывати; однакоже, егда толикому великому сиянию аще некое тело к противоположной вещи препнет путь, не приидет на ту вещь луча. Сице ми разумей и зде: свет убо есть божественный сила, совершающая действо священия, да будет светимое благодатно, и прочая; бывает же сей силе препятие, аки некое дебельство, в действующих еретичество, и сие такоже Духу Святому препинает на действуемое лице приходити: убо хиротонисуемое лице не совершенно и не благоугодно бывает. И зри убо, како в себе богопреданное священство от него бывает ино, а сие лице ино, яко несовершенно за недостоинство.

Пришедый: Но многажды и недостойными иереи Бог действует за спасение людское, яко же Благовестник и Номоканон сказует; ты же, иначе о сем глаголя, наводиши сомнение, и пользу многих пресещи тщишися.

Аз же: Чти в том же Номоканоне о сем: сказует бо, яко в недостойном иереи действует рукоположения благодать, о коей благодати преди рех, сиречь сила, совершающая рукоположение. Ныне же хощу познати разум глаголания твоего: по чему зде недостойных ми глаголеши, — по житию, или по вере?

Пришедый: По житию.

Аз же: Истинно тако. Но что ти виновное на се понуди приити слово? ни бо аз тя истязаю о сем; но зде ищется то, — верою недостойными действует ли Бог?

Пришедый: Мое мнение и в то приходит, яко идеже священство бывает, аще и что-либо тамо противно явится, ради имене своего священства, творит священнодействуемое им лице.

Аз же: Каков доводов имаши на се, да познаю словеса твоя быти истинны?

Пришедый: Рех ти, яко священство сие, кое имеется в верующих во Христа, священство есть Христово и по действу едино; другаго же несть; но священство Христово свято, яко же и сам преди рекл еси убо и всяк, приемляй священство сие, освящен есть и совершен в делех своих.

Аз же: Аще, за имя священства Христова, и прилучаемое от внешних освященно: убо приими от тех и прочая тайны, глаголю же крещение, евхаристию, мvро. Ибо священнаго священства вся тайны священны; но, по тебе, внешнее священство священно поистине: убо и вся дела его приятия достойна. И какова зде противорицательства самому Христу и церкви Христовой тобою явятся! Слыши убо самого Христа о сем святым своим Евангелием глаголюща: аще кто во Мне не пребудет, извержется вон, якоже розга, и изсышет. На сия Христова словеса Феофилакт толкование творит: "аще во Мне пребудете соблюдения ради заповедей, тогда болий плод принесете; не пребываяй же во Мне, усыхает, се же есть: что име, от корения отлагает, аще кую благодать духовную прия, обнажается ея оттоле и лишается сущия помощи". Дозде Феофилакт. Зри убо, яко во отступницех Христовых несть благодати Духа Святаго. И кую убо пользу ты от видимых тех таин надеешися? Видел еси прежде, яко совершительная сила тайны священства благодать Святаго Духа; но в еретицех несть тоя: убо в еретицех священство несовершенно. Посему же разумей и дела того. Но хощу от тебе порядок взяти словес. Тем же скажи ми: от латин хиротонисуемое лице приемлеши ли за освященнаго иерея?

Пришедый: Не приемлю.

Аз же: Чесо ради не приемлеши? ибо и в них священство священства Христова наименование имать, и глаголют е у себе быти паче инех священнейше? Почто за освящаемо от имене Христова священства не приемлеши, по предреченным ти?

Пришедый: Сего ради: аще оно и под именем Христова священства, но иереи тою священства крещения истиннаго не имут.

Аз же рех: Чти о сем Иоанна Китрошскаго, — пишет бо: "яко хиротония от латин приходящих многажды святыми не отлагается", о чем в книзе Матфея Властаря, в составе во главе 12, и в старописанной Кормчей видети есть.

Пришедый: Мнится ми о сем тако, яко во оная лета, егда писаше сие Иоанн, не бяше еще о Дусе Святем зломудрия, ниже обливаемаго крещения в латине; но токмо опресноцы и другая некая малейшая, о них же в той же главе читаем. И того ради святии отцы рукополагаемых от латин не отвергаху.

Аз же: Аще и кроме оных вин, их же изрекл еси, быша латини тогда; обаче в тайнодействах их церковных исповедаеши ли на той час пришествие Духа Святаго?

Пришедый: Не исповедаю.

Аз же вопросих: Почто?

Пришедый: Понеже той же Китрошский, в том же слове, латинскаго общества бегати повелевает. Аще с теми общество возбраняется: убо от не имущих Духа возбраняется. А наипаче в правиле первом Василия Великаго сказуется о чистых, яко им в тайнах не имети Духа Святаго; аще они и подобне нам веру в Бога и крещение содержат, но зане покаяние грешным и второбрачие отревающе, остави их Дух Святый. И не точию, но и в самых схизматиках Духа Святаго отрицает Златоуст быти. Того ради и аз не исповедую в тайнодействах латинских Духа Святаго быти.

Аз же: Добре отвещал ми еси; но прошу тя сказати: егда от страны латинския таков, якова и сказал ми еси выше, пришел бы к вам иерей, требуя вашего соединения под обетом вашего умствования и во отрицании латинских ересей, — и таковаго бы како вы прияли?

Пришедый: Образ приятия таковых явлен есть в нас, яко, по обещании и отрицании подобательном, новопришедшаго иерея старший иерей в нас благословив, повелевает ему иерейская действовати и действует.

Аз же: Не приим иерей той в латинех на хиротонии Духа благодать, и действовати тайны церковныя будет; может ли предложенный хлеб и вино на святой трапезе тело и кровь святая быти?

Пришедый: Не приим иерей Духа Свята и действует тайны, не могут хлеб и вино им приносимо тело и кровь Христова быти, но прост хлеб и вино пребудет.

Аз же: Оный к вам приходяй иерей от латин, аще действовати будет, имеет ли Дух Свят?

Пришедый: Имеет.

Аз же рех: И аще имея, то где получив возъиме благодать Духа Святаго в священнодейства? ибо ты сам предрекл еси не прияти ему на хиротонии в латинех Духа.

Пришедый: Тако есть; но во отречении латинских ересей и во обете умствования истиннаго возъиме Дух.

Аз же: И чем ты сие мне подтвердиши?

Пришедый: Каноном поместнаго собора карфагенскаго 69-м о Донатех, их же повелевает кроме крещения повторна и кроме мvропомазания иереем в той же хиротонии священнодействовати; но не без Духа Святаго действовати повелевает: яве есть отсюду, яко сей донатийский иерей во отрицании ересей и во обете истиннаго мудрования Дух Святый на священнодейства восприя, его же в Донатистех не име.

Аз же: Сицевый от Донат ко истине пришед, донатскаго ли, или соборныя святыя церкве архиерея властию в ней священнодействовал иерей?

Пришедый: Соборнаго.

Аз же: Прошу тя сказати, — иереи на хиротонии кую благодать Духа приемлют?

Пришедый: Совершительную тайн, крещения, глаголю, и причащения.

Аз же: Епископи кую благодать Духа Святаго на хиротонии приемлют?

Пришедый: Воздательную и совершительную сих тайн: рукоположения, мvра и жертвенника.

Аз же: Во что епископу от Духа Святаго благодать воздательна дается?

Пришедый: Во еже воздавати руковозложением иным благодати, сиречь разныя чины в церкви устрояти благодатныя.

Аз же: Истинна суть словеса твоя; но понеже и ты сам изрекл еси, яко иерею имети токмо совершительную от Духа Святаго власть, а не воздавательну, почто же ваши иереи новоприходящим иереем воздают власть на священнодейства? и како то могут дати, что от Духа Святаго рукоположением не прияли? Покажи мне сие от святых отец.

Пришедый: Показую ти сие от Потребника. Равное бо тамо в нем о таких новоприходящих поведение от святых архипастырей положено, яко же архиерею, тако иерею действовати: повелит бо тем приходящим архиерей или иерей преклоняти колени, и пред коимждо их равне приходяй отрицание ересей творит, и помазует равне архиерей, или иерей. Зри убо, како над новоприходящими равное архиерею, или иерею творити предается. Что же еще последовательно сему, разве токмо сие, еже Духа Святаго подаяние благодати? Но иерей сие может, ибо обоих благословение духовно бывает, яко же рукою, тако и словом, яково на крещении и прочая. Или возложением руку пресвитерску не приходит Дух Святый? — о чем во ответе Тимофея епископа Александрийскаго. Что сих доводов яснейши и что твердейши, по них же нашим попам новоприходящия иереи во исполнение церковное приимати, и тех благословляти в священнодейства, и на тая Духа Святаго благодати подаяти?

Аз же: Памятуй ты своя речения, ибо ты сам прежде о том рекл еси, яко иереи прияли на рукоположении власть точию совершати тайны крещения и причащения, а не иным в священнодействе благодати воздавати; ныне же, аки забыв тая, паки в воздательну благодать их словесы возводиши. Обаче для пользы общия приидем на словеса церковных чиноначалий и тех священнаго удобрения, елико подадеся нам от преданий святых отец разумети, разглаголем. Дионисий Ареопагит о церковном священноначалии слово 1 и 5: Три бо суть чины священнаго удобрения во святей Божией церкви: первый убо чин есть архиерейский, вторый иерейский, третий диаконский. Вонмем же о силах их: перваго убо, архиерейскаго, чина три силы суть: хиротонии, мvра и жертвенника; втораго чина, иерейскаго, три силы суть: молитв, крещения и литоргисания; третьяго чина такоже три силы суть: служити олтарю, предобучати, или оглашати, и споспешествовати иерею в крещении. И сия убо трех чинов разнствия в силах не просто предание церкве, но небеснаго священноначалия образы, ради сугубаго нас небесным умам возвождения, его же не леть есть никако преходити. И вышний убо чин может вся нижшаго творити, вышшаго же нижший не может, понеже от вышшаго силы в меньшия, или нижшия изливаются силы, и что вышший излиет силы, то нижайший имать. Сам же вышший чин, аки херувимский, непосредственно от самого Бога священными лучами воспален, и аки светильник во вся церковная чиноначалия лучи своего благодатнаго света раздает, божественнаго света под ним сущия творя причастники, удостоя в службе Божией. Тем же и святитель глаголется, яко просветительную светов силу имущ и един вся в церкви освящает. Втораго же чина, иерейска, вторая суть действия по оным силам, между коими силы имут рукоположением власть и крестити, о нем же ныне нам есть слово. Но о сем разумно буди, но неже иереи восприяли архиерейским рукоположением от Духа крестити, кая тайна святаго крещения иерейска сия обстояния имать: сиречь начало, среда и конец, яко же чин крещения показует. Начало крещения есть, в нем же предваряющее бывает сие: первее приходяй ко святей церкви на проклятие ересей у дверей церковных преклоняет колени, о чем и вы глаголете; среда же — самое то действо крещения; конец же — по крещении мvропомазание и во осьмый день губою отертие мvра. В сих иерейскаго действа окончавается сила. До сего бо точию стоит. А что в чине сем повелевает преклоняти колена приходящим пред архиереем, или иереем, от коего повеления возмнеся вам и равну обоим силу имети, не ведуще силы и разума оного повеления глаголете. Зане тайна святаго крещения приискреннее до архиереев пристоит, аки Апостолов чин содержащих, по словеси Христову: шедше, рече, научите языки, крестяще их, и прочее. Но яко невозможно везде архиерею исполнити, поставляют на действо иереев, яки рабов своих, а не аки равных. Тем же и крещают токмо, а не рукополагают во иереи кого: ибо не дано им рукоположением того. Кое же сие ваше суесловие от мерности архиерейския прилагати к мере иерейстей, не ведуще о том церковных историй и канонных извещений, в них же многия случаи чтем, яко многажды архиереи в лице своем иереев и простых мнихов на соборы посылаху, и тыя заседаху тамо места их, обаче не в силе архиерейстей, но токмо в повелении, яко же и во образе царей господие неции посольство творят; обаче не тии бывают архиереи, ниже сии царие, и ни власти, ни имени того носят, но токмо во исполнении повеленных бывают. Тем же и дивно есть нам, яко желающе вы иерейство свое благодатно явити, чужде дарование ко оному припрягаете законопреступно. Не слышите ли и самого Христа даровы учеником своим подающа, но в разных силах? Первое Его даяние бысть власти на духи нечистыя, да изгонят их и всяк недуг исцелят. Второе даяние Его бысть по воскресении, духовно уже, — и не словом, но дуновением: и се рек, на ученики дуну, рек: приимите Дух Свят, и имже отпустите грехи, отпустятся, и имже держите, держатся. Третие его даяние самого Духа Святаго даров ниспослание: егда бо в день пятьдесятый, седящим учеником его на горницы, очевидно сниде Дух Святый раздельно в дарованиих, во огненных языцех, и на едином коемждо их седе на главах, аки рукополагая их и в дела Христова совершая. Зриши ли, в разных даяниих Христовых разныя благодати и силы даров? Тогожде разумей и ныне в церкви своей разныя дары чрез архиерея подающа, ибо един и Той же подает и творит архиерея, подающа хиротонии церковных, Той же подает и творит строителя святых таин, Той же подает и творит архидиакона и диакона, иподдиакона, Той же подает и творит четца и певца: во вся сия един Христос Духа благодать, или дары подает чрез возложение архиерейских рук. Темже ов силен бывает церковныя чины устрояти, ин тайны совершати, ин тайнам служити, ин на амвоне прочитати, ин же токмо о своем спасении пещися. И сия убо сам Христос в Дусе Святе устрояет: темже и не мощно никому определение Его сие прейти, ниже степени Духом Святым устроенныя обручати, сиречь архиерея предел — церковных хиротонии, иерея же предел — молитв, крещения, литоргии. И яко же не мощно диакону в пределение иерейско вступати, так не мощно иерею в предел архиерейский входити; яко не приял есть от Христа в хиротонии силы: убо и не может. Диакон бо не приял от Христа власти жертву его совершати: и не может; аще же диакон дерзнет принести жертву, не может жертва его тело и кровь Христова быти. Такоже иерей, аще восхощет что в хиротонии пользовати, не может пользовати како в нем хиротония, яко не приял на сию от Первосвященника Христа Сына Божия власти. И сих ради вин всуе натягаете от Потребника оных словес, архиерейскую должность — ко иерейской немощи: яко не того есть разума слово оно.

Пришедый: Еще к возможности иерейской сие нас влечет, яко его призыванием Дух Святый сходит на крещение, на возложение рук, на благословение и проч. А новоприходящему отвне иерею что потреба, токмо Духа Святаго власть на хиротонию подати? Но Духа благодать подается чрез иерея: убо благословением иерейским совершен бывает в Дусе Святе новый иерей. И что еще требуем?

Аз же: Рекох бо ти, яко чрез иерея Духа благодать на примирение церковное и вчинение единоверных подается, в немже возложение бывает рук, благословение и проч., и до того точию действует чрез иерея благодать Духа; на новопришедшаго же иерея иныя благодати и иныя Духа Святаго силы (надсвыше простаго народа) потреба, и не общия простых верных, но отличныя и собственныя. Зри убо: не приял ли Духа Святаго Павел, и колико бяше свят Павел с Варнавою? Но сего ради не быша во второй силе Духа Святаго мощни, кроме епископскаго рукоположения, о них же сице рече Дух Святый: отделите ми Варнаву и Савла на дело, на неже призвах их: тогда постившеся и помолившеся Апостоли, возложиша руки на ня. Слышиши ли, что глаголет: отделите ми, сиречь уже в первой благодати сущих и общей христианстей на особливую благодать отделите, кия обще вернии не имут. И в сие подаяние не иереи руки возложиша, но Апостоли, Христову и епископску власть и силу имуще. Такожде егда потребовася Христу Апостолом власть дати во оставление народное грехов, не просто, но Сам и дуновением даде, сице: и се рек Исус, дуну, и глагола им: приимите Дух Свят, имже отпустите грехи, отпустятся, и имже держите, держатся; и Петру: дам ти ключи царствия небеснаго, и егоже аще свяжеши на земли, будет связан и на небеси. Зри убо, яко сицевых словес к народу не глагола Христос, но ко единым учеником; и не просто им власть сию даде, яко совершенным им во всем, но дуновением, являя, яко дар сей совершен есть и не имут его вси вернии, но кому либо когда дается, тогда той и возъимать. Яко совершен бе Петр, обаче ни той в начале веры сия прия, но егда Господь восхоте; тогда и другим с ним Апостолом особь дуновением сию власть даде. Яве, яко не приим такову власть, не возъимать. Или сие: коликия благодати Божия Иоанн Предотеча исполнен бяше; но сего ради не бысть совершенный решитель грехов людских, яко не приял в то от Христа власти, и не можаше. Такоже и иерей, аще и приял рукоположением благодать Духа Святаго, но не в хиротониях, но во иных убо, аще где и подает, но в данных ему подает, и не в данных ничто может. Сего ради велено иерею исповедав обратившагося иерея, доложить святейшаго патриарха, власть имущаго апостольску, или иному коему святителю, и той како разсудит о нем, того и сподобит; и аще изволит архиерей новопришедшаго иерея во обычный его чин благословити, и таковаго иерея сам архиерей на первую степень возводит, яко же о том в грамоте патриарха Антиохийскаго Макария писано: "ихже вторицею не хиротонисати, облачит их (рече) архиерей и на коемждо облачении одежд глаголя псаломския стихи, ихже обыкохом глаголати и мы, егда облачаемся прежде сдужбы; молитва же рукоположения ни едина глаголется, точию, егда одеют их, вручает им книгу службы и во время причащения причащает их, якоже и прочия священники новохиротонисании". Дозде от грамматы. Подобне и о испадших иереев священства есть видети, о чем есть в Номоканоне и в Баронии, лета Господня от 64-го чис. 4 и лета от 69-го чис. 5. И таковыя убо должности возведения не прия иерей от Духа, и дерзаяй в сем, ничто творит, ибо сей дар Духа Святаго во архиереи токмо. И чуден убо воистину в них сей дар и велий, яко егда в них сей угаснет, вся чины церковныя не освящены будут: ибо кроме его ни иерей, ни жертвенник может быти, яко же божественный Дионисий в книзе 4 о церковном священноначалии во главе 5-й пространно пишет. Но за долготу сия оставляем; токмо от главы 77 Симеона Фессалонитскаго приведем зде. Глаголет бо, яко епископа токмо мvр и хиротонии, и чрез него во всех действиях епископская подается благодать"; и паки той же: "иерей не действует тайны без жертвенника, сие же мvр освящает; мvр же чрез архиерея токмо совершается: и убо кроме архиерея ниже священник, ниже жертвенник весьма, вся сия чрез архиерея суть". Дозде Симеон. И сих ради свидетельств где архиерейства не будет, тамо иерейство и тайны престанут. Ибо в Книге О вере, московския печати, о юнитах, списатель пишет, яко егда отступиша пять владык к римскому костелу с митрополитом Рагозою и того ради вмале не сгорети святыни случися церковной, аще бы на той час не подъити патриарху иеросалимскому Феофану и посвятити митрополита в Киеве, и тако вознести святыню в Рустей церкви. И сия убо в Книге о вере. Но ты вонми: не убо со оными архиереи до конца иереи отступили; обаче не воспоминает какой либо на тех святыни церковней остатися исполнением. По тебе же не падет святыня сия во иереех, чего отнюд ни един от святых когда написа.

Последства же ради полагаем зде и сия ваши о иерействе доводы.

Первый довод: Иерейское благословение со архиерейским и по сугубству единако, еже словом и рукою бываемое равне от обою.

На сие отвечает во обличение вам святый Симеон Фессалонитский, — тако глаголет: "Различная суть дарования Духа Святаго, и овому дается сие, овому же иное дарование, вся же сия действует един и той же Дух: иереи же сию благодать не имут, но токмо священнодействовати могут и крестити, и сия убо кроме архиерейския не сотворят силы, и мvру и хиротониям рукоположения силы никтоже имать, точию епископове".

Вторый довод: "Такожде и сам себе отлучив, или прокляв наглостию, со слезами и сокрушением сердца ко архиерею изряднее приступити, или, сему не сущу, к духовному некоему отцу искусну известити, и прослезитися, и прощение просити, и дела покаяния творити".

Отвещаю: Возражает вам сие в том же месте пониже, яко сие не о возведении на степень изпадшаго, сице: "тем же рекий от ярости словом единым нечествовати, священник сый и не сотворив, осуждается убо и священства возбраняется на многое время, но не подлежит извержению". Подобне же нечто есть о сем и в Кормчей, во главе 68. Блаженный же Симеон Селунский, во главе 49, пишет: "еже убо иереем действовати сицевое, по нужде бывает и с повелением епископским, и не присутствующу ему, но священствующу, и большия грехи, се есть отрицание веры и убийство, и священников грехопадения к епископом просити подобает, и ина, елика отбегают исповедникова разума, и вся творити с епископским советом: яко епископу дело сие свойственно есть". И паки той же на вопрос 13: "темже пресвитери не имут хиротонии, во еже решити и вязати, но токмо епископи". И ниже: "ниже убо воля есть пресвитеров во вся  разсуждати, наипаче же отрицании не могут разрешити, токмо епископи, ниже убийства". Подобне же и Номоканон в предисловии (л. 4 об.) глаголет: "подобает духовным отцем и се ведати: иереев и протодиаконов грехи, яже извержения томления наводят, да не дерзнет духовник разрешати их:  якоже бо не возможно ему хиротонисати, сице ни на степень священства изпадшаго паки возводити".

Третий довод: "Аще ли юноши суть, или пресвитери, или старцы возрастом, мук ради отвергошася, да получат человеколюбие; обаче да постятся две четыредесятницы, упражняющеся в молитвах и творяще коленопреклонение и прилежное моление. Приближающуся же исполнению обоих месяцев, за осмь дний да приемлют очистительныя молитвы от обретающихся всех с молящимся о нем иереем, да глаголют прилежно: Господи помилуй 100, якоже выше завещахом, яко да отмыются и помажутся мvром по преждереченному завещанию, и службе бывши, да сподобятся святым тайнам". О чем в Кормчей, в завещании Мефодия патриарха Константина града, лист 587, от него же мнение ваше востече, аки бы по иерейской очистительной молитве отвергийся Христа той иерей и священства сподобляется.

И на сие вопреки вам церковными правилы самое то завещание отвещает. В самом бо том завещании против сего места на боку напечатана ссылка на правило 6-е Анкирскаго собора; а в сем 6 правиле Анкирскаго собора напечатано сице: "мук прещения убоявся токмо и пожер идолом, и потом покаявся, 5 лет да припадает". На сие же в конце толкования тако глаголет: "и по исполнении всех 6 лет, да приидут на совершение, и Божественнаго сподобятся причащения". Дозде сие 6 правило. Но аще во оном завещании на сугубую четыредесятницу святый Мефодий сии пять лет и скрати, обаче, яко же и самое правило сие, не указует по причащении тако отрекшемуся иерею Христа сващеннодействовати, ибо 1 и 2 правило собора Анкирскаго, страха ради мук пожершия пресвитеры, или диаконы, таже вспять обратившияся, рекше, покаявшияся и пред мучители Христа исповедавшия, чести убо причастным быти и седалища повелевает, священническое же что действовати не оставляет, яко же Матфей Правильник во главе 1-й состава 2-го пишет; подобне же сему есть обрести и в правиле святых Апостол 62, и в 10-м перваго вселенскаго собора, и в правиле 10 Петра Александрийскаго, и в книге Иоанна Зонара, во главе 125. Обаче вся сия должности отрекшихся епископскому суду прилежат, яко же в самой Кормчей, в правиле 5-м Анкирскаго собора, в толковании, сице глаголет: "епископу же есть власть (о них), якоже видит их или потщаливы, или в небрежении суща, тако и заповедь дает им, или человеколюбствовав сократит время покаяния, или паче приложит к тому". Дозде от правил. Аще бо негде сице отрекшихся Христа и иереи истязуют, обаче сего никако могут кроме епископскаго повеления что сотворити, ибо сущее сие дело по истине самых токмо епископ, им же церкви Божия поручены и сами тии иереи. Бываху убо таковии случаи и древле, о чем Бароний в лето 254 и 355 во своей книге пишет: "яко мнози от сих страха ради, или мук ради отрекошася Христа и во многом множестве народа бегаху за епископы своими, дабы на покаяние в церковь прияты были". Ниже: "такоже и Киприан во Африце, тако и в Риме Корнилий папа, правило сие с падшими храня". Дозде Бароний. Видиши ли святыя церкве обычай о отпадших, яко ко епископом, а не ко иереом отпадающии веры притекаху, и не за иереи, но за епископы своими гоняхуся, и у тех милости прошаху, на них же весь суд таковых лежаше; а иереи уже повеленная властию архиереов своих над оными творяху, а не по себе. Тем же всуе чуждую должность иерейству своему приписуете.

Пришедый: В Кормчей книге, в каноне осьмом перваго вселенскаго собора читаем, яко от чистых рукоположение имеющих повелевает, ко святей церкви пришедшим, с тою же хиротониею в своих санех быти устрояет. Ты же покаряешилися сему правилу, яко в еретичестей хиротонии может священнодействовати, или ни?

Аз же на сие отвещах ему: Матфей Иеросалимский в составе 1-м и Иосиф Волоцкий в слове 15-м, такожде и Максим Грек в слове 60-м, и инии глаголют, яко сии чистии веру и крещение подобне православным содержат, но некими же малыми противностьми заняти быша, однакоже о них в 1-м правиле Василия Великаго пишется, яко в тайнах церковных не имети им Духа Святаго, и яко сии, не имущии в тайнах Духа Святаго, ко святей церкви приходяще, тайну своего крещения в соборной церкви исправляху мvропомазанием святым, и тако в крещении своем совершени бяху; но хиротонию такожде чистых (сии приходящии) едину от тайн церковных имуще, к соборной церкви приходят, обаче не совершену Духом Святым, яко же и крещение чистых мvропомазанием святым исправися. Хиротония же тех же чистых по вас во святую церковь без исправления прията бысть. И что сие странное? Едины обоих тайн от единых рук совершаемы, но овая во святей церкви исправляема бысть, другая же неисправна пребысть?

Но убо к лучшему разсмотрению хиротонии приступим.

Всякая хиротония треми сими состоит: а) веществом, сиречь возложением епископских рук, б) видотворением, се есть молитвами, г) совершительною силою Святаго Духа. Вонми же предреченным, яко в чистых не быти Духу Святому. И аще не быти в них Духу Святому, убо и не совершенна в чистых хиротония бысть, и токмо остается рещи, яко вещество и вид в хиротонии чистых бяше, третия же совершительная сила в ней не бяше. То како, по мнению вашему, церковь святая, в силе Святаго Духа полномощная, неполномощную и несовершенную хиротонию чистых в действо восприяла бы? Всякая бо вещь несовершенная не может дело свое совершенно показати, яково что на при показ глаголю. Вещь убо ееть скудель; составляется же из трех: из вещества, из вида, и из огня, и бывает сосуд благопотребный. Вещество сего сосуда есть глина, вид же из глины требовательный сосуд, совершенство же его есть огнь. И дондеже сей сосуд из вещества и вида пребывает, не может совершенно дело свое показати, сиречь варение, или вливание воды понести; егда же ожжется огнем, тогда совершен и благопотребен в деле своем будет, совершитель бо его есть огнь. Прейдем же отсюду и на еретическую хиротонию. Ибо еретическая хиротония два токмо имать: вещество и вид:, а третия, совершительныя силы Святаго Духа, не имать: убо яко оная скудель, неискушенная огнем, в делех своих непотребна. Истинно убо есть слово, яко еретичестей хиротонии во святей церкви подобает Духом Святым (яко же и скудели огнем) совершатися. Но кто во святей церкви сея совершительныя благодати податель? Никтоже, токмо епископи.

И зри убо яко еретическое крещение совершают и иереи; хиротонии же  еретичестей  совершенство подати  не могут; ибо иерею в хиротониих не токмо запретися, но вящше сего, яко от Духа не дадеся власти, о чем сама собою церковь соборная показует. Внимай же опасно и канона сего повелению: "аще (рече) хощет православный епископ, да устроит от чистых епископа негде в селе". Видиши ли: да устроит его. Устроение же епископско (бывает) благословением и грамотою в подаяние благодати и силы совершительныя Святаго Духа, да мощен будет совершати святая. Но сея власти и силы Святаго Духа во иереех несть: не постави бо их Дух Святый воздавати силы хиротониям, но токмо крестити, литоргисати и молитвы совершати. Тем же напрасно и приводити вам правило сие о чистых. Иереи бо ваши не епископския силы суть, по своея средния мерности: убо и не могут тако в степени духовныя кого вчинити, яко же правило оное указует. И тако самая истина вещей глаголати наставляет, яко аще вы от чистых хиротонию приимете, два точию в ней приимете: вещество и вид, их же даша чистии еретицы. А третия у вас, совершительныя силы, дати некому: убо без совершительныя силы той иерей действовати будет у вас. Понеже иереи не творят совершенну быти от еретик хиротонию: тем же несовершенная хиротония Духом Святым не может совершенно свято деемая показати, яко же довольно из скудели оныя [примером] указах.

Но приидем еще на ино некое подобенство в лучшее еще указание хиротонии. Кладу же зде припоказ [в пример] хиротонии совершенной и несовершенной одушевленную вещь. Но вещь и сия есть сугуба: совершенная и несовершенная. Совершенная убо есть вещь сия, такоже, как и скудель, из трех составление имущи: из вещества, из образа и из Духа. Таков есть человек: из вещества имать тело,  из образа подобенство человека, из Духа конец и совершительная сила дел. Несовершенная же вещь, видение и подобенство человека без духа, или без души, кая из двух токмо, глаголю же из вещества и образа, состоит, и по телеси протяжению значит человека, сил же одушевленных не имать: убо и недействительна. Сей вещи несовершенной от чистых хиротония будет в вас подобна, для того, что вещество рукоположения чистых и вид молитв она от своих тамо епископ восприяла, оживляющаго же и совершающаго ю Духа Святаго не восприяла, и есть труп мертваго человека, — значит иерея, но не освящена, еже бы ему вместо одушевления быти: убо и нимало дела может творити. Потреба бо его иерейству оживляющаго его иерейство Духа Святаго; но сего подателя и лечителя хиротонии несть: убо и ничтоже есть.

От жития Саввы и Феодосия о Иоанне Маркионове.

Разговор 2-й.

Пришедый: Аще бо сия каноны и уставы церковныя и тако повелевают, и по чину церковному тако быти, яко же и предложил ми еси, но сие есть свободных времен. Ибо видим многая нужных ради случаев и неудобоправительных вин иначе и в священных чинех бываемая, неже яко же канонами повелевается, на подобие некия ладии. Егда на тихих водах плавает, удобно есть ю кормчию по воли своего требования управляти, на жестоких же быстринах и порогах водных не аможе хощет кормчий, вратится ладия: тако и церковь Христову и пастыри тоя во уставах дознай.

Аз же: Вем убо, вем церковь Христову, яко корабль плавающий в мори и разными напастьми волн бурных потрясаем, но не погружаем: ибо на кормиле сего корабля сам Христос возлежит, словом укрощая волны мира сего, и не оставляет ему сокрушитися, искушает бо сими до елико хощет, да лучшу церковь свою явит и светлейшу. Тем же яко на сия привел мя еси, и аз издавна желах словесе сего, прошу тя, скажи ми не тех историй разум, в них же действо и повеление должности архиерейския на отвне приемлемых хиротонии показуется, но тех, были ли когда случаи таковыя от лет вознесения Христова, чтобы иерейство без всякаго архиерейскаго благословения во всех тайнах возмогало бы истиною. Ибо многия уже лета от Христа преидоша и многия мятежи и гонительства в верных быша, и великия нужды и скудости в священных случахуся чинех, и было ли что в приеме священства подобозрачное сему?

Пришедый: Было, и зело много было.

Аз же: Прошу показати нам сие былое от святых [церковных] историй.

Пришедый: Святый Савва освященный Иоанна Маркионова, от Севириан хиротонисаннаго, приял: чти о сем в Минеи Декабря 5-го дня. Святый Максим Исповедник Пирра патриарха, от ереси единовольных поставленнаго, приял: чти о сем в Минеи Генваря 21-го дня. Святый Тарасий Цареградский патриарх от иконоборцев рукоположен и многих от иконоборцев рукоположенных на 7-м вселенском соборе прия: чти о сем Февраля 25. Исидором отступником ставленнаго Даниила Иона митрополит прия: чти в Минеи письмянной, Августа.

Аз же: Много свидетельств о приеме священных чинов зде предложил ми еси; обаче ни едино свидетельство на прием вашего иерейства мощно [нет].

Пришедый: Древняя твоя обыклость тако глаголати научает.

Аз же  вопросих: Рцы ми,  кто  пред Иоанном во Иеросалиме был патриарх?

Пришедый: Илия.

Аз же: Сей Илия благочестив ли бяше?

Пришедый: Благочестив.

Аз же: Подлинно ли ведаешь то, яко Иоанн на место Илиино от еретик рукоположен бе?

Пришедый: Подлинно вем, яко от еретик рукоположен бе.

Аз же: И где чел еси о сем, яко Иоанн от еретик рукоположен бе?

Пришедый: В житии Саввы освященнаго, идеже пишется сице: "егда Севир еретик во Антиохии, от царя Анастасия приим власть, много на непослушающих его зла показа, посла же и ко Илии патриарху того Сидонскаго собора уставления, и виде яко не прия Илия, но паче на ярость царя подвигоша. И паки, тая же соборная уставления с некиими клирики и с силою царевою во Иеросалим посла". Дозде от жития святаго Саввы. Видиши ли, яко с клирики, яве яко и с епископы еретическими, коими Иоанну по Илии подобательно поставитися.

Аз же: Читай в том же житии далее, и обрящеши писано сице: "И се слышав отец Савва, прииде во святый град со всеми пустынными игумены, и с соборными граматами пришедших от Севира изгнаша". Дозде от жития Саввы. И от сего дается ведати яко в приходе [во время прихода] оных клириков во Иеросалим ниже Илия изгнася, ниже Иоанн в патриархи поставлен, дело бо сие возбранено оными отцы, из пустыни с Саввою пришедшими. Темже суетно навел еси сие, аки бы Иоанн от Севириан рукоположен был. А и клирики не о том от Севира присланы были, дабы Иоанна рукоположили, но того ради, да что на Сидонском соборе уставили еретики, то бы и Илия подписал, о чем и Флавиан Антиохийский Патриарх принуждаем был, но не послуша.

Пришедый: Буди и тако, яко в то время, в неже клирики от Севира во Иеросалиме были, и не рукоположен бяше Иоанн; но последи сего всяко от Севира рукоположен Иоанн бе.

Аз же: Откуду се доказати можеши?

Пришедый: От того же Савина жития, в нем же пишется, яко с велиим гневом повеле царь Анастасий Алимпию, власть имущему в Палестине, изгнати Илию, иже и сотвори, а на место Илиино Иоанна, обещавшася Севирову ересь прияти, в патриархи постави.

Аз же: Алимпий священнаго ли чина, или мирскаго бяше?

Пришедый: Мирскаго; власть имея тоя Палестины.

Аз же: И како, мирскую власть имея, во священный чин поставити может?

Пришедый: Присутствующими себе может.

Аз же: Почто, минуя историю, от себе глаголеши? Не пишется бо тамо, яки бы Алимпий своими ему епископы Иоанна постави, но просто постави, глаголет. И сия речь, еже рещи постави, не есть свойственнаго разума, но преноснаго. Зде бо речено дело вместо вины, сиречь от вины происходящее дело поставления; надлежало бы рещи сице: повеле поставити. Ибо повеление повелевающаго дело есть вина или начало дела, от него же составися дело поставления. Многажды же и мы просто глаголем: сей господин дом построи, но многажды и руками не прикасаяся; сице глаголется: построи дом, яко он вина бе строения того. Сице и о сем поставлении дознается: постави Иоанна Алимпий, но повелением.

Пришедый: Буди и тако, яко Алимпий оный повелением токмо постави Иоанна; обаче не благочестивыми архиереи, обстоящими жительством окрест Иеросалима; ибо еретика не поставит благочестивый архиерей. Иоанн бо бяше еретик: убо яве есть, яко и от еретик поставлен бысть на патриаршество Иоанн.

Аз же: Ничто мнения сего злейше! Отсюду показася путь еретичества. Что бо тебе глаголати то, чего история не являет? Держитеся того, что история научает: от себе ничто глаголи. Веждь же, яко Илия первопрестольник бяше Палестины, окрест Иеросалима сущих епископ, и зело православен бяше и свят. И како бы был свят, оставляя под рукою его сущих епископов еретиками быти? никако. Но сего ни история, ни свойство архипастыря святаго может явити. Не зриши ли, что Златоуст, поставлен в Царе-граде патриархом, коликое о епархии прилежание сотвори, всюду созирая священных чинов недостоинства и их многия изрине? О сем чти в житии его. А Илия патриарх был муж свят и ереси всякия ненавидяй толико, яко и здраве свое за благочестие хотяше положити. И како бы хотяше под своею паствою еретиков архиерев имети? Никако. Зри убо, что содея Флавиан Царя-града патриарх: токмо уведа, яко Евтихий Царя-града архимандрит еретичество нача, абие собор на него сотвори, и на нем того осуди. Чти в Баронии лето 448. Да знаеши отсюду пастырей добрых овцам: таковии бо не отпускаша входа волком, яко же и сей Илия.

Пришедый: Аще мя и тако утесняеши доводы (своими и принуждаеши) умствовати, яко не бяху до самого Иоанна епископов под Илиею еретиков, и поставитися Иоанну Маркионову от благочестивых сущих архиереов; обаче и тако две вины, порок наводящих Иоаннову поставлению, обретаются: 1-я вина, яко тако к ереси обещавшася Иоанна благочестивии в патриарха поставиша; 2-я вина, яко на место Илиино поставиша, ему же живу еще сущу. И сих ради вин не бяше его поставление духовно: убо чрез Савву освященнаго Духа Святаго сподобися действовати священная Иоанн.

Аз же: Рцы ми, на той час имели сии хиротонисующии Иоанна епископи Духа благодать хиротонии, или ни?

Пришедый: Вем то, яко противно бяше поставление Иоанново; а имели ли на той час поставляющии Иоанна благодать, или ни, — неизвестно; веровати ненадежно.

Аз же: Аще бо по твоему мнению умствовати, яко бы онии архиереи на поставлении Иоаннове лишени были власти рукоположения и безблагодатно поставиша его, то нужда двум сим быти: 1) яко от того часа мужи, поставившии Иоанна, простыми быша, а не архиереями, 2) и сицево лишение благодати духовныя приимше, нужда бяше и сим от святаго Саввы духовныя благодати взыскати. Но яко сего не бяше и быти не можаше: тем же и суетно мнение твое, еже бы на той час поставляющим благодати обнажитися. А наипаче сего ради, понеже Христос, отходя на небеса, вручи церковь свою Апостолам, Апостоли же епископом, и оттоле на сих полагашеся Христова церковь. И аще вверенную им паству добре правят, мзду приимут; аще ли ни, то взыщет Господь неправды от руку их. Тем же или достойне, или недостойне кого рукополагают, равне в Дусе Святе рукополагают, по оному: "не всех убо (рече) избирает Дух Святый, всеми же действует"; и ниже: "действует убо рукоположения благодать за когождо спасение, и когождо по вере приемлет", и прочее (Номокан. л. 714). Навыкни же и сему, яко Господь Бог не абие впадша на зло обнажает благодати своея, но по конечном ожесточении во зле, яко же и видим, колицы быша злии иудеи и священницы их, обаче единому и десяти прокаженным повеле показатися иереем, рек: идите покажитеся иереови, сиречь по закону животная принесите на жертву. И паки, егда вниде Исус в церковь Соломоню, изгна вся продающая оттуду, рек: дом Мой, дом Отца Моего, дом молитвы. Тако оную нарек. Егда же архиереи и старцы иудейстии вознесоша Исуса на древо и конец злобы показаша, преста быти во оных церкви благодать Божия, еже Господь Бог раздранием завесы показа. Зриши ли, доколе терпяше в них Бог благодатию своею, пожидаючи обращения их И сия о ветхом; что же реку о новой благодати? Егда бо на вечери тайней преломи хлеб, даяше в тело свое ясти учеником, достойным и недостойным, и Иуде [предателю] даде, и паки повеле сие творити в свое воспоминание, назнаменовав священниками их быти, не минув и Иуду предателя. Оставляю же глаголати, внегда креститися Самарии, равне на вся Дух Святый возложением рук апостольских прииде, и на Симона Волхва. Воззрим же и на древния еретики: покрывающе свою ересь притворным благочестием, восхитиша епископския престолы, яков же бяше Несторий, Диоскор, Евтих, Фотин, Пирр и прежде сих Павел Самосатский; дондеже открышася сущими еретиками и дондеже из санов не быша извержены, действоваху благодатно. И от сих предложенных дадим указание о оном Иоанне Маркионове, обет давшем Севирово общество [общение] прияти. Аще и падеся в том, но не мощно глаголати, яко бы и всего христианства лишися, и рукоположившии его аки бы благодати архиерейския отпадоша. Имамы бо о сем вышеречении приклады [примеры], а наипаче рещи и се, яко во оном обете Иоанн не весьма паде, зане соборно во всем народе не прокля 4-й вселенский собор: убо и еретиком не возречеся. Аще Пролог в житии Иоанна Постника и еретиком его наричет; но како прежде обличения сице нарицати? Необычно есть. Ибо и Савва святый возопи к нему: аще не обратится, тогда аки еретик проклянется. А наипаче Номоканон словесное отвержение не извержением сана, но на некое время отлучением карает. Тем же падение Иоанново не бяше отсечением власти поставляющим его, но в том же Духа Святаго действе поставиша Иоанна. А понеже рекл еси, второй быти вине в том яко на место Илиино прелюбодейно возвестися Иоанну; но сицевой вине тяжкой зде на поставляющих не мощно быти, ибо сей Илия невозвратно бысть от еретика царя изгнан, и вдовствовати церкви не годствует надолзе.

Пришедый: Чувство некое придася [подадеся] ми, во еже разумети, яко не абие Духа благодать от поползновения некоего противна отъемлется, зане великих бед народу виновно бы было скорым благодати отъятием: мнози бы, не разсмотривше скорости отъятия, погибли и спасаемии, почему бы и слиянию вещей нужда быти многу, и без Духа духовным являтися, яко же свету угасшу и отемнением светильника нужда бы всему церковному лицу во тме быти.

Аз же: Тако есть. Ибо и светильник, аще подлежащия присутствию его не просвещает, яве есть, яко и сам света не имать.

Пришедый: Но смущает мое сердце, и ум недостижен творит, во еже ми веровати тако, яко же глаголеши, оправдая действо. Понеже в житии Иоанна Постника Иоанна онаго еретиком нарицает, о чем Пролог и Бароний свидетельствует. Ты же того Иоанна словесы уменьшаеши и не вменяеши его совершенно веры отступника, и мнится ми по некоей страсти глаголати тебе сие, не хотящи исповедати на оно рукоположение чрез Савву и Феодосия благодати духовныя подаяния.

Аз же: Аще совершенно огласися оный Иоанн еретик быти, то почто царь Алимпия онаго из сана низложи?

Пришедый: Зане, не удостоверився совершенно о Иоанне, аще истиною Севирову ересь прия, постави того.

Аз же: И аще того ради онаго низложи, яко недостоверна мужа в ереси избра, убо остает умствовати, яко Иоанн, аще устами оный обед и даде Алимпию, обаче совершеннаго намерения не име к ереси, но в несовершенном разуме на власть токмо прельстися, тако вмале паде, яков случай легкомысленным бывает.

Пришедый: И кую ми вину речеши паче сея на Алимпиево низложение?

Аз же: Вина онаго пред царем наипаче бяше сия, яко обет токмо от Иоанна взя, еже бы Севира во общество прият, а делом соборным не свидетельствова подобательно, еже в соборной церкви всенародно Севира оправдити и Сидонское соборище похвалити, а Халкидонский четвертый вселенский собор отринути, но просте вещь обета сотворися некако и домовне, идеже бяше оный Алимпий. И того ради слабаго попущения в гнев царя вложи Алимпий и от сана испаде. Иначе же о том умствовати, то Алимпиевы несть вины: ибо он от Иоанна обет взя Севира во общество прияти. А пребудет ли в том Иоанн, или не пребудет, не сердцеведец есть. Еще же к сим и сие реку, яко оный Алимпий власть имяше в той Палестине: убо и живяше тамо. И како, близ живый, Иоанново непостоянство в ереси слышав, не пришел паки Иоанна во обете утвердити, дондеже царь в толиком разстоянии услыша? Двое зде в нем разумети: или Алимпий и сам в ереси той не тверд бе, или ни за что вмени то упражнением ко иным делам.

Пришедый: Не дело ли сущаго еретичества показано бяше Иоанном, яко Иоанна Постника, не хотяща четвертый вселенский собор отринути, биением и муками на то принуждати, о чем Пролог декабря 7-го сказует? Прошу, очистити мою совесть, во еже мнети его не суща еретика быти за сие.

Аз же: В надежде исправления, всяких ради нужных вин, во обществе и то бывает — не вменяти абие еретика, аще в то мало и поступит. Ибо сицева вещь и над святыми случашеся, яко же о преподобнем Герасиме, иже во Иордане, и о святем Григории, отце Григория Богослова, и о прочих, от каковы либо простоты на мале впадших в еретичество, но не глаголются быти еретики; а наипаче от повести оныя о иереи некоем святом, речи некия северианския ереси над Божественными тайны приглашающим, ему же и ангел Господень служаше, рещи подобает, его же егда диакон от Константина града прииде, зазре в том; иерей же ко ангелу, аки спираяся, глагола: почто толико время замолча? и той ему отвеща, яко Бог положи человеком от человек исправлятися (Грамматика Иосиф. печат. в предисловии). К сему же и сие припомяну, како оный мних ради поятия идольскаго жерца дщери отречеся Христа, обаче идол отвеща жерцу не дати ему дщерь в жену, яко еще Христос от него не отступает, о чем в прологе Генваря 16. Чтем же и в Лимонаре, во главе 4, яко по отгнании оригенистов от некия обители, авва Леонтий, вшед в церковь, виде одесную олтаря ангела Божия и слыша глас: отнележе посвящен бысть сей олтарь, мне поручен. Или и у самого Саввы не бяше ли оригеновы ереси обитель некая? — обаче коликою любовию он снисходил им в долготерпении за надежду исправления! Чти в житии того. И сия приведох ти не того ради, аки бы и еретики самыя Духа Божия имут; но увещаю тя и совесть твою очищаю, яко да не мниши кого вмале от простоты впадша в кое зло быти уже зла и благодати Божия обнажена. Свидетель бо ми есть сему и святый Исаак, глаголя: яко не егда содеем грех, бываем грешнии, но егда не возненавидим грех и не раскаемся о нем: Никон, слово 63, к концу. Свидетельствует же сему и сам святый Савва, возопивый на Иоанна, да не сотворит общения с Севиром; аще ли (рече) не послушает, то от всех отец пустынных аки еретик прокленется, коего обличения отец Иоанн устыдеся, отвержеся Севира, и прочее. Чти в житии святаго Саввы. Зриши ли, яко и отец Савва не конечно еретиком Иоанна нарек, но егда бы увещаний их не послушал, тогда бы к сущим еретиком причтен был? И что сих доводов на очищение совести твоея лучше, аще пленяеши непокорство твое разуму святых?

Пришедый: Зело мне благоприятны сия доводы; обаче еже глаголаше Иоанну Савва "аще не послушает, аки еретик прокленется", и сие убо слово епископския должности знак; отнюдуже и разумети леть есть: аще Савва прокляти за непокорство Иоанна глаголет, убо и извергнути; и аще полномощен, извергнути, то и возвести.

Аз же: Внимай глаголанным от Саввы. Ибо неопредельно рек, — "проклянется" глаголя, — а не: аз тя прокляну. И сим ничто ино, точию о благоверии ревность являет, прочая же на власть архиерейскую оставляет.

Пришедый: Почто зде относительная словеса на ины лицы глаголеши, аки бы Савва во оных мыслию относя ко архиереом оному рек, их же ту присутствия не бе.

Аз же: И аще не бе, то кем Иоанн поставлен бяше? Ибо мало бяше время меж поставлением и пришествия Саввы во Иеросалим, точию бо не заста Алимпия ту.

Пришедый: Чего же ради, егда Иоанн патриарх Севировы ереси в церкви отрицался, не являет история ту епископом некоим быти кроме Саввы и Феодосия?

Аз же: Глубоко корение имать непокорение в твоем сердце, яко многими словесы не мощи мнение твое исторгнути из души! Ибо рех ти довольно, яко Савва не полномощен бе Иоанна от ереси прияти; обаче ты своя глаголеши, не зная, яко то время на собрание кратко бе; и не того, в неже увещеваше Савва Иоанна, но ино прочее вопрошаю тя по мнению твоему: аще Савва и Феодосий от Северианския ереси Иоанна под проклятием тоя ереси приимал, убо ли и ставивших его тако приимал?

Пришедый: И чесо ради тако их приимати?

Аз же: Зане же (по тебе) явнаго еретика им поставити: ибо грехи зле поставльшихся на поставивших восходят.

Пришедый: Каково свидетельство на се явиши?

Аз же: Доброе тебе свидетельство на се явити имам, однако не скоро; но прежде вопрошу тя: Даниил оный, от Исидора Московскаго митрополита, бывшаго на Флоренском соборе, во епископы поставленный, православныя ли веры прежде был?

Пришедый: Православныя.

Аз же: Чесо же ради пред Ионою митрополитом Московским латинских ересей отрицался той?

Пришедый: Яко от отступника Исидора рукоположение восприя.

Аз же: Исидор в православии ли митрополию в Руссии держал?

Пришедый: В православии.

Аз же: Даниил оный, ведая ли Исидора отступника быти, рукоположися от него?

Пришедый: Не ведая.

Аз же: Добре отвещал ми еси; но видиши ли, яко Даниил и по незнанию от Исидора (к римскому костелу отступльшаго) рукоположивыйся, пред хотящим в священнодейство его благословить отрицашеся латинских ересей. Коль же паче сим долженствует, по ведению еретика суща на святый сей Иеросалимский престол возведшим Иоанна, пред Саввою и Феодосием творити отрицание ересей по тебе?

Пришедый: Несравнительно есть двух сих падение. Исидор бо согреши в Дух Святый отступлением. Ибо латини Духа Святаго в два начала разделяют. Тем же латини и Исидор в Дусе Святе согрешиша и той от себе в действах своих отгнаша: потребовася тем отрицанием Дух Святый к себе рукоположенным привлещи. А поставившие Иоанна правыя веры не отступиша, но как прежде Дух Святый имели, тако и по поставлении имеша, о чем увеща нас предреченное слово: тем и не нужно есть им Севировых отрицатися ересей.

Аз же: И сии в Дух Святый согрешиша, понеже еретика (яко же вы глаголите), недостойна суща, на таковое дело возведоша и ко святому жертвеннику Божию приставиша на повседневную Духа Святаго досаду: того бо Духа Святаго место сие престол и седалище. И что сего противнее?

Пришедый: Есть бо грех и грех, и есть суд и суд, по святых отец; и зрится убо качество и количество падения. Ино бо есть в самого Бога погрешение, ино же в предание и уставы отеческия. Римская бо церковь, к ней же и Исидор притече, о Бозе погрешиша; а поставляющии Иоанна в преданиих церковных погрешиша, и далече суще единаго от другаго погрешение: убо и истязанию кийждо их подлежит ину и ину.

Аз же: Правилом святых Апостол 45-м глаголется: "епископ или пресвитер, аще повелит еретикам служити в церкви, аки пресвитером, или ино что от священных содевати, аки причетником, таковый да извержется". Подобне же и поместнаго собора в правиле 124 пишется: "еще который епископ с донатианы служити будет, надеяся я обратити, и не обратит, да извержется". И паки: "на злате поставивый в священство, и с поставленным да извержется". Видиши ли, како сии вси не о Бозе, но в церковных уставах погрешающии священства измещутся. Коль же паче поставившии, по вас, Иоанна еретика олтарю Божию служителя священетва изриновени были бы? Но не суть сия, не суть. Аще Иоанн и обещася Севира во общество прияти, аще ведая, или не ведая, сего Иоанна поставиша во епископа, обаче вся в надежде бяше исправления, о чем и речем. Понеже Иоанн сей сын бяше иерея, в Сионе граде, Маркиона, и православныя веры со отцем своим, и довольно быша знаеми святому Савве, о чем в житии того Саввы Метафраст повествует, и яко имением своим в строении монастыря святому Савве спомогательны быша, и видится, яко сии великия добродетельныя милости и ревности мужие быша. Но егда же, по попущению Бога святаго, три сия патриархии престолы, глаголю же Александрии, Антиохии и самого Царяграда, ересиархами обладахуся, тогда оный, во Антиохии по Флавиане православном патриарсе наставый, Севир единовольныя ереси, увиде, яко един сей Иерусалимский престол чист бяше на востоце от ереси единовольныя, посоветовав с царем тезоименитым тому в ереси, яко да той престол сею ересию окаляют. И посла ко Илии патриарху исповедание веры своея на хартии, дабы подписал е, придав же и воев, дабы его к сему принуждали. Егда же Илия уже в бедстве бяше, святый Савва с крепкими мнихи притече во Иеросалим, и велиим дерзновением воев оных вооруженных мнихи  распудиша, в бегство обратиша. Уведомижеся о сем Кесарю, посла Алимпия воеводу с воинством во Иеросалим, который, пришед во Иеросалим, согна с престола Илию, на его же место Иоанна Маркионова, обещавшася Севира во общество прияти, во Иеросалиме патриархом быти постави. И зде ищется разумения истина. Вы убо глаголете, яко явным еретиком уже прежде поставления сотворися Иоанн; мы же глаголем, по истории словесем, яко токмо воеводе обещася Севира во общество прияти. Виновное же имамы сие, яко глаголет "обещася" точию, а не сие глаголет, яко "прия". И таков отсюду разум выдается, яко бы кто, кому что взаим дати хотя, вопросил бы у него: заплатиши ли? Он же бы ему рекл, обещаяся: заплачу, и не тогда сие заплатил, егда еще не взял, но первее возмет, и тогда обещанное повинен исполнити, сиречь заплатити. Тако и сей Иоанн обещася точию прияти Севира во общество. И како еще ему Севира прияти во общество, не получив власти? Но зрится, яко точию Иоанн на ся в том подписку даде воеводе, чего и от Илии требовася, но и се домовне  видится, ради обыкновенных мятежей. И довольны на се доводы имамы. Понеже в житии Саввы святаго читаем, не нагло сему воеводе во Иеросалим со оными грамматами царскими приити, но зело коварно и лестно явив оныя грамматы, мню, яко оныя прежде бывшия ревности отец опасаяся, да не таков же мятеж, яков и прежде, присланных ради сотворит, или яко же и во Антиохии и Царе-граде пострада. Тем же яково коварство и прикровение в показании граммат показа, много паче во Иоаннове обете тожде содея, да тайным советом сим устроит склонительных архиереов к поставлению Иоанна быти. И о сем явственнейше есть и отсюду. Понеже каноны повелевают прежде поставления слушати у поставляющихся исповедание православныя веры, и потом ставити в святительский чин, аще православен; а сей бы Маркионов Иоанн исповедание веры Севирова злоумия пред православными епископы исповедал, и тако бы его они поставили. Странное есть воистину се слышание, и быти никако возможно! Но паче все сие под скрытием, яко же обет, тако исповедание веры Иоанново, быти свойственнейше знати дается. Понеже таково нечто случившееся читаем и у Барония в лете Господнем 491 о патриарсе Цареградстем Евфимии православнем, яко призвав он Анастасия, в царство греческое избраннаго еретика быти, не восхоте его венчати, да не еретик над христианами царствует, и егда виде Анастасий в сем непреклонна Евфимия, тогда лестно подписася в православии быти. И тако венчан бысть. Подобне же сему о Иоанне разумети подобает: аще воеводе и под обетом Северианския ереси остася, а членам духовным в православии быти явися, и тако да вкрадется в церковное начальство и покажет плод обета своего. И таковии мнози беху ересиархи, яко же Арий, Несторий, Македоний, Диоскор, Фотин, и прочии, — скрытыми в себе ересьми вкрадахуся в духовныя чины, и потом злаго исповедания ветви свои широко распростираху. Над свыше же и се рещи: аще бы Иоанн в явственном еретичестве требовал от православных поставления на таковый святый град, не соизволили бы (поставити его). Аще бо отцы, не боящеся на оном пришествии пред присланными от царя, со Иеросалимляны пред Краниевым местом проклинаху Севира: коль ми же бы паче Севирианина суща не восхотели бы на Иеросалимский возвести престол. И аще бы прислании от царя чрез волю понудили бы православныя в духовенстве члены того Иоанна поставити, то бы мятеж в том был от духовных и мирских, каков мятеж Антиохияне против Севира творяху и в Константине— граде на самого Анастасия царя, не убоявшеся того державы. К сим же и во историях таковый мятеж не умолчали бы. Ибо Бароний о таких случаях, яко в Царе-граде, тако и во Антиохии и Александрии, подробно описует, а о Иеросалимском, чтобы поставления ради Иоаннова кий мятеж в православных был, нимало воспомяну. Тем же не писмянное ваше се мнение [не утвержденное доказательствами], аки бы епископи тии православнии в явственном еретичестве рукоположили Иоанна, но некое суетное. А кую злобу на Иоанна Постника сей Иоанн показа, и то самыя вещи естество являет, яко по настатии патриаршестем должный плод обета нача открывати, и сих ради вин негли истории описателю тако Иоанна еретика быти написати от ревности случися, и промчеся сие имя в роды. Истиною же Иоанн не пребысть еретиком, но православен и скончася. И тако сие ему имя и странно в наших ведениих быти, православному еретиком глаголатися. И зри убо самыя истории сказание, яко между поставления Иоаннова и увещания его мало бысть время: вскоре бо отцы притекоша, и точию не засташа посланных от царя, и тогда Савва увеща паки Иоанна на правоверие. И егда сицевое Иоанна непостоянство уведано бысть царю, того воеводу наказав, и инаго именем Анастасия воеводою посла, и той во Иеросалим пришед, Иоанна всади в темницу, дондеже Халкидонский собор проклянет. И виде Иоанн тако себе утеснена суща, проси его, воеводу, да испустит се творити в церкви. И собрася народ в церкви святаго Стефана, идеже Савва (и Феодосий) с десятию тысящею притекоша; тамо же и присланный бяше воевода, ожидая слышати исполнения по указу цареву. Иоанн же взыде на амвон, поим с собою Савву и Феодосия, аки начальников всего чернечества пришедша. Весь же народ на мног час вопияху: еретики проклени, а соборы прослави и оправди! Тогда вси триесогласно прокляша Нестория, Евтихия, Севира и прочих еретик, не приемлющих Халкидонскаго собора. Тогда оный воевода со стыдом и боязнию избеже, и оттуду благовременнее сице вознепщева себе сохранити [изшед из церкви и бежа в Кесарию]. Виждь убо и разумей словеса историчная: нигде бо не глаголет, аки бы Феодосий и Савва прияли к церкви Иоанна от ереси суща и отрицания его ради ересей пред ними на святительском престоле быти учиниша. Но вонми словесем опасно. Егда бо восходити Иоанну на амвон, сам аки патриарх предъиде, Савву же и Феодосия в помоществование противу еретиков по себе поим [прия], и став на амвоне окрест постави, Савву одесную страну, Феодосия же ошуюю. И зри сказание истории: не Савва и Феодосий поимше Иоанна, но Иоанн поят с собою сия отцы, и не поставиша Савва и Феодосий Иоанна на амвон прямо себе ко алтарю, яко же обычай бывает отрицающимся ересей, да пред ними проклянет ереси, но он взыде прежде, и последствоваша ему Савва и Феодосий, и тако им трем стоящим на амвоне, не ко олтарю, но к народу лицем, аки слова Божия проповедником. И не глаголет во истории, аки бы един Иоанн еретики проклинал, но вси трие согласно проклинаша ту еретики. И кто рещи о сем может, аки бы Савва и Феодосий Иоанна тогда от ереси приимали, разве не имеяй разума права? Аще ли, по вас, Иоанн патриарх, свидетельствуя себе отцем верна быти, еретиков проклинал; но отцы кому себе свидетельствоваша верными, тех же еретиков проклинали? Аще же в сем неудобоятно ти, то от гласа народнаго навыкни, прямо их стояща и просяща Иоанна, аки патриарха, да в силе Духа Святаго еретики проклянет, а соборы прославит. И не к Савве просят, да он ему прокляти еретиков повелит, аки приемлющий Иоанна; но самого, аки главу церковную, просят Иоанна. Аще ли паки, по вашему мнению, яко бы своего ради приятия в церковь таково Иоанн проклятие творил, остается глаголати и сие, яко и Савва и Феодосий под некиим омышлением у народа быша, и оное сомнение им очищающе, проклинаху еретики. Убо по сему, Савва слушал исповедание веры от Иоанна, а народ слушал исповедание веры от Саввы и Феодосия. И кое се будет безумие! Аще же и иначе возглаголати о том, яко сии трие, обращени на народ, в сицево непщевание еретики проклинаху — Иоанн ради отцев, а отцы ради Иоанна проклинаху взаимно, и самое то блядословие будет, еже и глаголати срамно. Но оставивше всякое о сем суеумие, глаголем истину. Коликое бо се разстояние времене между увещанием первым Иоанна и между церковнаго сего собора, в неже, когда дойде слух от Иеросалима в Царьград и во Антиохию, и когда прислася ин Палестины держатель, кой сего Иоанна свергнути во Иеросалим прииде, и коликаго времене требует дальний сей путь, в неже Иоанн службы архиерейския благочестно уже совершаше в церкви и ведом бяше у всех православен, а ныне бы прииде ему отрицание ересей в церкви пред отцы творити. Зело невежественно умствование се будет; а наипаче, оставя православных епископов присутствие, пред Саввою неимущим епископския власти творити исповедание веры и отрицание Северианских ересей, а Савве в священнодейство благословити патриарха. Коликаго беззакония исполнено дело се явилося бы! И приписовати таковую вредность к толиким отцем, ревнителем благочестия, како не гаждение? како Богу не досада, сице облыгати святыя Его?

От жития преподобнаго Максима исповедника, о Пирросе.

Разговор 3-й.

Пришедый: Аще ты мя от сего приклада и потщался еси отвести, однакоже имам ин приклад, им же всяко надеюся во уповании нашего (приема) иерейства оправдитися. Слыши же, — писано есть в житии Максима Исповедника сице: "Медлящу (рече) преподобному во Африканстей стране, прииде тамо Пиррос патриарх Цареградский (ниже) и много бы тамо повредил церковь Христову, аще не бы имел противника, сего Максима преподобнаго, с ним же, сошедшеся, о вере по вся часы препирашеся. И нужда бе собратися епископом африканским в Карфагену, да слушают прения обою. Препрен убо быв Пиррос, пристал бе к правоверию, и прият бысть от церкве любезно и честно, вкупе с титлою патриаршею. А тогда и книжицу правовернаго исповедания составил бе и в Рим к папе Феодору (иже по Иоанне наста) прииде, и прият его папа честно, яко патриарха православна цареградскаго". Дозде от жития. Не малой убо крепости сей образец нашего иерейства о приеме обретается: ибо Максим не бяше епископ, но токмо архимандрит, ничто могий больше иереев, обаче восприя от единовольных поставлена Пирра патриарха еретика в действе церковных таин действовати подобающая патриарху. Но Максим свят и не погреши в приеме сем. Что сего довода светлейши и вероятнейши?

Аз же: Понеже ты в том обыкл, (еже) просто, без внутренняго постижения разума, истории прочитовати и прилагати то к хотению своему несмотреливно, чего тамо и несть и не глаголется: тем и зришися прелестно в мысли твоей уповати и утешатися в том суетно. Но понеже высоко вознесл в сем упование твое и тепл еси в надежди сего предложения, темже вопрошаю тя: на оном прении исповедуеши ли быти епископов?

Пришедый: Исповедую.

Аз же: Кто же тамо главою церковною был, — епископи, или Максим?

Пришедый: Мню, яко епископи и Максим.

Аз же: Чесо ради неправильно глаголеши, не согласяся с церковными каноны?

Пришедый: По должности африканских престолов епископи, по должности же прения Максим главою.

Аз же: Зде мною должность ищется прежде не та, почему должность прения, но почему должность церкви правления содержится; сея главы ищу, яви ми ону.

Пришедый: Но аще и епископи по должности церковных прав главою, но на прении сем в деле главными нужда быти епископом и Максиму, яко искусну сущу прав церковных.

Аз же: И аще тако за искусное долженствует, то подобает ли не по свойству его архиерейская творити?

Пришедый: Советовати мощно, деяти же то несть мощно.

Аз же: Почто?

Пришедый: Понеже не восприят се рукоположением и не тех бе престолов.

Аз же: Благо отвещал ми еси и подобающее вещи. Но зри убо, яко во Африце тогда Максим бяше пришельцем, паче же и не чином архиерейским; епископи же африканстии, на том прении бывшии, наместницы ту сущих церквей, к ним же по прении Пиррос пристал бе: и како мощно, минув епископов, Максим дерзнул бы в чуждей епархии такова прияти человека? Дело бо се зло есть, и немощное, и беззакония полно. И кто бы попустил таковому делу быти? Не буди мне тако на святаго и премудраго отца и помыслити. Понеже сие дело крайняго безчиния и разбойничества знак, коего дела на мале и в еретицех слышится, разве Максима Киника и Тимофея убийцы, или и других злодеев, и та мнением на чуждыя веры, а не в самех себе. Како же мы в таковое нечестивство впадша толикаго ведателя и хранителя прав церковных речем, их же ради толикия труды, толико странствие, толикия скорби подъяти изволяя, ныне же сицево пострадати? Не буди нам, не буди, о друзи, на сего старца таковая хула! Вникни убо во историю и познай от тоя боголюбное и братолюбное, его же ради обходит африческия епископы, утверждая их, да не подкрадут онии единовольнии татие и еретицы, а не завидя их епископству, охраняя, а не наветуя их престолы, его же приход во Африку великия пользы исполнен явися. Но зде, внезапное пресечение глаголов о сем сотворя, вопрошаю тя: по истории глаголется прияту быти Пирру с титлою патриаршею; сия титла что значит?

Пришедый: Честь коего-либо достоинства.

Аз же: Карфагенский град в митрополии святительской кого наивысша себе в духовных судах имать?

Пришедый: Папу, тако бо в предисловии карфагенскаго собора напечатано: "Карфагена, рече, град есть часть кархидонская, Кархидон же область и митрополия есть африкийская: Африкия бо на многия части разделена есть, от них же едина есть Кархидон. Бяху бо со святыми отцы на сем соборе и блюстители места от папы римскаго послани. Блюстителие же места сего ради нарицаются, понеже от папы посылаеми суть по всем странам и градом творити повеленная им, и место его исполняюще, и от всех почитаеми в папы место, и смотряюще и соблюдающе во всех странах правоверие". И ниже: "Бе же старейшина собора Аврелий епископ кархидонския церкве, его же и папою именоваху". И сице в Кормчей.

Аз же: Приимем слово зде оно, его же прежде оставих: "препрен убо бысть Пиррос, и пристал к правоверным и прият бысть церковию". И о сем убо мнение твое словесы показася, яко в сем приятии от церкве Пирра знаменати Максима приемлюща; настоящий же разум истории влечет сия к епископом, держащим церкви, а наипаче к самым епископом африканским оставляется то умствовати, еже бы им в совершенном определении восприяти к церкви Пирра, но токмо честию патриаршею почтити, а не пределом патриарших дел.

Пришедый: Имаши ли чим сие утвердити?

Аз же: Пошествие Пиррово в Рим к папе тебе во утвержение искомаго действа представляю.

Пришедый: И кое есть из сего утвержение искомаго?

Аз же: Велие во утвержение доводство се, еже речеся по оном приятии в Карфагене поити ему в Рим.

Пришедый: Сие пошествие его в Рим мне, а не тебе помоществует.

Аз же: В чесом тебе помоществует сие?

Пришедый: Во еже умствовати, яко оное в Карфагене приятие Пирра дверь к папе отверзе.

Аз же: Кую вину непщуеши ты оного Пирра в Рим пошествия?

Пришедый: Сию, яко да и Риму явится прият быти церковию.

Аз же: По сему твоему слову карфагенская митрополия больше есть властию римскаго престола, аще рещи, яко тамо Пирр пойде токмо да явится прият быти церковию, а не да совершенно приимется.

Пришедый: Исповедуеши ли ты епископом оным полномощную власть в церкви имети?

Аз же: Исповедую.

Пришедый: И аще исповедуеши, то почто не вменяеши Пирра онаго полномощным приятия дело?

Аз же: Яко дело оно высочайшаго суда искаше.

Пришедый: Почто?

Аз же: Ибо зде бяше в приеме лице не меньшия степени, но самыя высочайшия, — патриарх; и равнопрестолен бе папе, а не сим африканским епископам: тем же по правилам святых отец подобает меньшим епископом высших их в суде совопрошатися, си есть у митрополитов, аще далече есть ин главнейший суд, а митрополиты патриархом, патриархи же междуусобными или послании, или соборы в том подобающее да зрят. Сего ради и удивляюся вашему в сем умствованию, аки младенческими легкомыслии разсмотряете онаго Пирра в церковь приятие, важности же оных последующих дел, во истории той положенных, не внимаете.

Пришедый: И кая в той последующих дел важность?

Аз же: Оная есть показана в последстве важность, яко повнегда приятися в Карфагене Пирру, состави книжицу своего исповедания о правой вере, во еже подати ю в Риме папе: се есть последующая приятию важность дела, его же ради нашему усмотрительству придается взаимная в равнопрестольных должность.

Пришедый: И кая се взаимная должность?

Аз же: Пять бо бяше исперва в церкви святей престолов, равных по образу пяти чувств тела Христова, во исполнение разума верных: первый убо бяше престол римский, вторый — константинопольский, третий — антиохийский, четвертый — иеросалимский, пятый — александрийский; и сии вси под единою Главою Христом и в едином разуме пребываху; на той час и закон положен бысть в них, аще кому единому восходити на престол архипастырства, отписовати до прочих престолов то, яко взыде сей, яко тако веру содержит, по нему же единосоветие и помощствование любве и общия к Богу молитвы. И сия убо должность в Пирре неотменно бе, яко да прият будет Пирр чрез исповедание истинное в константинопольский престол и общую любовь. И таковая убо изрекши, приступим ныне к сказанию истории, юже Бароний в лете Господнем 645-м тако полагает: "Сего лета во Африце, егда Пирр оный константинопольский патриарх, сущ во изгнании, хотяше ересию своею церковь повредити и от истины отводити. Сопротивися ему Максим святый авва, а потом мученик, с которым явно пред всеми епископы, игемоном Григорием Патрикием, господами честными, в месяце Июлии, во граде Карфагене прение сотвори, которое целое верно написанное в книгохранительнице Ватиканской греческо хранимо есть даже до сих наших времен, и преложи е на латинский язык Франциск Туриан езуит, все целое на обоих языках. Сим прением Пирр побежден, покорися и на отречение своих ересей в Рим к папе Феодору пойде, идеже егда вся ереси прокля, почте его папа и на патриаршество константинопольское возвращен бысть, и при олтаре папа престол его при своем постави, почитая его яко патриарха константинопольскаго". Дозде Бароний. Зриши ли конец дела, где окончася приятие Пирра и коим образом, яко же самая должность предреченная взыскует? Се истинный и совершенный предел того приятия, а не карфагенский.

Пришедый: От сих твоих предложений склоняюся ныне мыслию в то, еже умствовати мне, яко не бяше Пирр Максимом прият, но епископы африканскими, или наибольше митрополитом карфагенским, иже вместо папы ту бяше; но отгнанием сего моего омышления возрасте во мне ино омышление, яко папа просто Пирра в той же хиротонии прият и остави ему в ней священнодействовати. Но Пирр еретик бяше и от еретик рукоположен: убо папа еретическую хиротонию в дело прия, и нам путь предочищен в нашем приятии иереев показа.

Аз же: Троякое на се разумение представляю, да сими совесть твою во искомом очищу. Первое разумение: обычно бо бысть се от апостольских времен во святей церкви, не скоро падших отревати, или еретичеством оглаголовати оно лице, прежде даже довольными увещании его нрав искусится, а наибольше тое лице, на неже мнози взирают, но долготерпением исправляти ради последующих ему, да не разорится тело Христово на суетную тщету. Ибо и мы множицею зрим солнце, мрачными тучами покрываемо; обаче вемы его в небе быти и ожидаем очищения его от тех: так и о церкви в еретических нахождениих архипастырие святии творяху, друголюбно в терпении поступаху, дондеже или исправится, или в совершенное безнадежие вещь приидет. Второе разумение: в притчи своей Христос власть данную церкви сице объяви, рек: призвав десять рабов своих, даде им десять мнас, рече им: куплю дейте, дондеже прииду. На сия Христова словеса святый Феофилакт рабов сих сказует епископов быти, им же церкви поручени по оному: внемлите убо себе и всему стаду, в немже вас Дух Святый постави епископов пасти церковь. И по сему приказанию Господню епископи власть имут церковную, и яко же хотят к полезному всяко могут. Третие разумение: наипаче же не мощно глаголати о Пирре, яко бы еретическая хиротония на нем была, понеже пред ним бяше в Цареграде Сергий патриарх благочестиваго рукоположения: аще последи и открыся в нем таящаяся единовольных ересь, но за то от Господа смертию наказан; по смерти же сего Сергия рукоположен бысть на его место сей Пирр: и мощно ли рещи, яко от еретик рукоположену быти ему? Ибо бяше ту царь Ираклий не еретик. Аще от неведения что и погрешил, но архиереев прочих не бяше еще ту единовольных, дондеже, по смерти сего Ираклия, Константин наста. А понеже бяше мало на том престоле Пирр, еретичество имея, но сие исповеданием веры пред папою очисти: убо в хиротонии и пребысть той. И слов ради предложенных несть вам никоего пособия на прием вашего иерейства отсюду.

От жития святаго Тарасия.

Разговор 4-й.

Пришедый: Признаваю ныне нечто от предложенных подобательное; обаче еще имам некая словеса, подтверждающая мя, о Тарасии святом патриархе Цареградском, яко он иконоборцами на сие рукоположен бяше и в том рукоположении до смерти своея действова святыя тайны церковныя.

Аз же: Несть нашего умствования в том, еже глаголеши.

Пришедый: Чего ради?

Аз же: Вины ради сей, яко не могу о себе творити ничтоже, Христос провеща; мы же кто? своя глаголати хощем!

Пришедый: История о Тарасии тако от обстоятельных вещей и дел того времене наставляет умствовати, яко святый Тарасий от иконоборец рукоположен бысть, понеже в та времена по всем странам епископи благочестивии искоренени быша: Копроним бо царь всюду посла грамоты позывательныя епископов в Константинополь на собор, и бе сшедшихся тамо 338 епископов, и всех тех принуди царь тогда на иконоборство руки подписати. Тем и несть мощно кроме иконоборец Тарасию поставление восприяти.

Аз же: Двое зде разумети подобает: первое, яко не по воли, но по страху подписаша то, о чем и каяхуся последи, и на седьмом вселенском соборе разрешени; второе, яко много еще епископ и непорочных в сем осташася.

Пришедый: И откуду се мне покажеши?

Аз же: От разных историй. Но яко не сему глаголанию есть время, на ино место отложим; речем зде едино сие, яко Иоанн святый епископ Готфский и во дни Копронимовы часто к самой царице Ирине на увещание прихождаше, непорочен сый.

Пришедый: Аще и бяше сего к ней вход, но временем; внутрь же Царяграда и окрест епископи иконоборцы быша.

Аз же: Тарасий святый благоверен бяше зело и власть имяше в том от самыя царицы и прочих, яко же повествует Метафраст и Бароний: "Егда бо, рече, по словесем Павла исповедника, царица Ирина собра в палате Мегиавру весь народ мирскаго чина и духовнаго на совет, избрати патриарха вместо Павла, и егда общим гласом присудиша никому иному се достоинство прияти, токмо Тарасию, тогда Тарасий блаженный, став посреде их, рече: яко восточнии и западнии нас проклинают по вся дни, аз же проклят не хощу быти, но аще изволите для соединения церквей собор собрати, то аще и недостоин есмь, обаче на се сложуся. И вси, во еже быти собору, соизволиша". Дозде повесть, от нея же вопрошу тя: иконоборцев ли на сем совете со Ириною мниши быти?

Пришедый: Иконоборцев.

Аз же: И чего ради мирно на честь иконную присудиша?

Пришедый: Мню, яко царския власти убоявшеся.

Аз же: Аще зде царския власти убоялися, како же на оный вселенский собор и с мечи приити не убоялися (и с) воины, глаголюще: аще попустите (рече) идолом вносимым быть (сице иконы нарицаху), помост сей крови епископов исполнится? И сие схождение их несогласно первому почто?

Пришедый: Виновное сему, яко не сих мню на том совете быти.

Аз же: И аще не сих, убо остает разумевати благочестивых быти.

Пришедый: Негли посредственно тех во иконоборстве разумевати, негли человекоугодне и прикровенно на то царице присуждати, а последи сию злобу чрез воины сия износити.

Аз же: Не малаго удивления вси твои глаголы! Рекл бо еси я и посредственне и лукавно глаголющих царскому лицу, аки бы иных не мощи. Обаче Бароний не по тебе о Ирине царице, таковаго же совета ищущей, глаголет с благоговейными о искоренении иконоборства начати совет, а не со злыми. Еда бо, рече Христос, собирают от терния грозди и от волчец смокви, тако и от злых благаго навыкнути.

Пришедый: Можеши ли доказати то, яко Ирине царице было откуду благоговейных и кроме иконоборцев на совет собрати.

Аз же: Довольная ти свидетельства имам о сем представити, яко аще и многия страны со епископы ко иконоборству приобщены быша, обаче многих читаем и благочестивых мужей, от мирскаго и духовнаго чина и инок, во оная времена по многим странам быти, и в самом Цареграде ересию иконоборною неповрежденных, их же сице объявляю. В житии святаго Тарасия пишет, яко по отшествии Павлове, в покаянии мнози христиане начаша быти в самом Цареграде небоязненно. Виждь убо: и в самом Цареграде многих глаголет быти. В том же граде во оное время бяше секретарь царских дел, в мирском чине, святый Тарасий. В то же время царския палаты бяше советник святый Никифор, сдруженный святому Тарасию, кой последи и наместник Тарасиева патриаршества случися. В то же время супруга святаго Феодора Евдокия бяше, Никифора святаго мати, в дивном житии даже до лет патриаршества сыновня поживе. Чти Июня 2-го. В то время бяше святый Феофилакт исповедник, присвоенный святому Тарасию. Чти Марта 8. В то время бяше преподобная Анфиса, дщи царя Копронима, тетка сея Ирины по мужи. Чти Апреля 12. В то время бяше святый Козма халкидонский, рожденный в Цареграде. Апреля 18. В то время бяху блаженный Фотин и Феоктистия, родители святаго Феодора Студита. Чти в житии Феодора, Ноября 11. В то же время бяше преподобный Феодор Студит. Чти Ноября 11. В то время бяше брат Феодора сего святый Иосиф, епископ Фессалонитский. Зри Пролог Января 27. В то время бяше Михаил епископ Синадский. Чти Маия 23. В то время бяше Платон освященный, иже и на седьмом вселенском соборе присутствова. Чти Апреля 5. В то время бяше Симеон прозорливый. Чти в житии святаго Георгия исповедника, Апреля 7. В то время бяше Георгий брат Симеона прозорливаго. Чти Апреля того же дня. В то время бяше в Сигрианских горах монастырь, именуем Малое село, преподобными отцы окормляем. В тех же горах бяше монастырь в Полихронии, правим Георгием прозорливым. В тех же горах бяше монастырь во острове Коломонис. В то время бяше благочестивая епископия в Катанех, Львом епископом правящася. Чти Февраля 20. В то время в Сурентии епископами благочестивыми людие правяхуся. В то время такожде в Захарии людие благочестивыми епископами правящеся. В то время в Сугдании благочестивии епископи бяху. В то время за Еллеспонтскою пучиною, во острове Лимнос, благочестиви епископи бяху [На поле: Митрополия Царю граду прилежит. 6-го вселенскаго соб. пр. 39]. В то время в Милитине благочестиви митрополити быша. В то время в самом житии Тарасия описуется, яко многая увещания Павел бывый патриарх Царяграда на исправление иконоборныя ереси, на избрание Тарасиево Ирине подаде, между коими словесы и то сказа, что многия под рукою державы царствия их земли, правило веры неизменно держаще, удаляются иконоборных церкве. Чти в Тарасиеве житии. В то время бяше преподобный Иоанн епископ Готфский, к самой царице поучительными словесы о благочестии святых икон, часто входя, увещеваючи. Чти Июня 26. Пишет убо Бароний в лете Господнем 780-м, яко "умершу царю Льву, злому на иконы святыя гонителю, наста сын его Константин десятолетен с материю Ириною, и в сие время державы приятия царства их всякому невозбранно было Господу Богу служити и православное учение проповедати, глаголати же с еретики  и препиратися о чести икон, о чем при Льве и уст отверзти было не мощно. Откуду и признатися возможно есть, яко и в самой царице не малая бяше о благочестии склонность, негли се наипаче по предъувещанию онаго Иоанна Готфскаго в ней явися, яко же читаем Июля 26, негли же и Павлово, в 5 лето державы тоя бывшее, увещание  поможе ей ко  истинному взысканию благочестия. Откуду и мысляше Ирина со иными своими, кого бы сыскати на умирение бедств оных и на устроение собора вселенскаго онаго; но  никого же обретоша, токмо сего Тарасия, секретария кесарьскаго, но мирскаго, котораго егда на сие преклоняху, отнюд соизволити не хотяше. И тогда нужда бысть ей весь народ духовнаго чина и мирскаго собрати в палату Мегиавру. И егда же собратися им, рече: весте что сотвори Павел? поищем церкве добраго учителя! И возопиша вси: никтоже ин может быти, токмо Тарасий. Тарасий же изыде к ним, и сице глаголаше о себе: Вижду раздрану Церковь Божию, а восточнии и западнии на всяк день проклинают нас! Тяжка вещь есть клятва и отлучение от царства Божия! Едино крещение, едина вера, едина церковь православная; ничтоже тако Господу Богу приятно, яко же сие,  егда вси едино есмы. Аще собор вселенский устроен будет, да вси соединени пребываем, аз соизволяю; аще же сие не будет, аз проклят и на суде Божием, от него же мя ни един кесарь свободити может, осужден быти не хощу. То слышавше вси, на собор соизволиша. По сем Тарасий на патриаршество посвящен бе, егда уже от всех чинов имяше обещание". Дозде Бароний. От сих всех предложенных яве есть, яко на оном тогда со Ириною совете не быти иконоборцем; ибо возможно есть от таковых обстоящих людей и от таковых обстоящих ю благочестивых епархий и монастырей и кроме еретиков на таковый и толикий духовный совет собрати. Внимай убо сему опасно. Яко же царице от разных подъущений изъят бысть недуг иконоборства, и наведеся доброе исповедание святых икон в почитании и славе, а наипаче страх оных громогласных словес Павловых объя сердце тоя, да не отпадет в такой противности царствия Божия: тем же и труд взыскания и совета от своих ей требоваше, да на искоренение тоя ереси старателя обрящет. И к сему годствовало ли бы оных ересиархов, на самих себе главу, призвати? Котораго бо такова есть совесть — на свою злобу иным советовати? Можеши ли ты на ся и на дом твой зол совет подати? Никако же. Тако и о том совете разумей быти, — сокровенне, и тайне, и единомысленных собранием, аще история за краткость и умолчевает. Возми же о сем себе в разум: аще бы тамо ересиархов оных, глаголю епископов иконоборных, собравши, рекла бы тако: кого нам избрать во истребление ереси иконоборныя добропочтительна? и вси бы, минувше председящих оных епископов еретических, на мирскаго сего человека, глаголю Тарасия, показали бы, яко никто так может сотворити, точию сей, — не двояка ли в них злоба отсюду возрасла бы? Первая, яко онии епископи, во иконоборстве обыкшии, слышанием на их ересь хульных оскорблений обезчещени были бы. Вторая, яко и велия презорства и несносныя срамоты знак, во еже минувше тыя, мирскаго на их пагубу избрати. Самыя зависти вещь сия и мятежа вина; не малыя бо ревности и рвения яростное тогда возгорелося бы во оных, и тако бы тамо прибытием их не совет благ, но вражда бы была излишняя. Тем же царица Ирина, яко изряднейшая в разуме, в державе царствия щедрая, собра единомысленных себе, и тако вещь добрый конец прия.

Пришедый: Но аще сему и мощно верить, яко не быти на том совете иконоборцем по силе царскаго изводения, но благоверным, могущим на благое дело добре присудити; обаче поставлению Тарасиеву не мощно в церкви кроме иконоборцев сотворитися.

Аз же: Чудны суть словеса твоя! Яко их же глаголеши, а сам ты в словесех твоих чувства не имаши. Рекл бо еси прежде, яко буди тако, что и не быти на том с царицею совете иконоборных епископов, но точию благочестивых, о них же довольно приведеся прежде; ныне же прислагательное глагол твоих аки забыв, или не вняв, паки глаголеши таже, яко не мощно Тарасию откуду рукоположение на ся прияти, токмо от иконоборцев за обстояние церковное тех. Но для искоренения обыкновения твоего, пресекши докончание слова истины, вопрошу тя: исповедуеши ли ты на оном царицы совете епископов благочестивых быти, или ни?

Пришедый: Откуду аз исповедание дам сие, яко тамо благочестивии епископи быша?

Аз же: От оных словес, яко духовнии вси чины тамо быша; духовных же разумеем паче освященный чин быти. И аще освященный, то ведати подлежит зде четцы, диакони, иереи и епископи, к сим же и иноки, понеже тамо сказует всякаго духовнаго чина быти.

Пришедый: Буди тако; но аще и мнится таковым православным священным чинам быти тамо, однакоже како сие может быти, оставя своих ему, ту сущих, епископ, от странных рукоположитися? — вещь мятежа полна.

Аз же: Познаваеши ли словес твоих плетения, яко путы некия ти быти? Ибо прежде, во отревании на совет оных, яко мятежу виновно, сопротивился еси; ныне же самого тя принуди рещи за презорство рукоположения быти мятежу, яко естество самое научает знати. Но яко везде требовати ми снисход словесем твоим, тем же для лучшия пользы вопрошу тя: что же, — аще попустим Тарасию от иконоборцев рукоположену быти, подобательно ли есть глаголати, яко и священнодействовал с рукоположившими его еретики до собора.

Пришедый: Никако; но мню, яко токмо рукоположитися от иконоборцев во архиереи восприя; действовати же, аки православну, с еретики неподобательно ему бысть.

Аз же: Странное глаголание твое, странное слышание! И далече суть закона словеса твоя. Ибо рукоположение от еретик приимати не противно быти глаголеши; а служением с таковыми приобщатися, се противно ти вознепщевася. Смеха бо и срама суть достойна сия словеса твоя. Лучше бы тебе общество священнодействия такова в противное не вменяти, нежели священство правоверну от еретик прияти, аще и обоя далече суть церковных законов, и вне творяй отмещется священства (Соб. Карфаген. пр. 9 и 124). Но оставим вся природному некоему вещей сих недоумению. Веждь же о сем опасно: аще общения ради с еретики в священнодействе отгоняется действуяй благодати священства, коль же паче в неимущих благодати священства ищай благодати священства? Кую бо благодать священства в себе иконоборцы, толикими ересьми застаревшии, имели и чим в рукоположении Тарасия святаго пользовали бы тогда? Не могуще бо в себе благодати священства имети, како иным преподадут? Рцы ми: где сей святый Тарасий Духа благодать в священнодейство прия? Еда, по тебе, от иконоборцев? Или без Духа благодати осмь лет, по вас, Тарасий до седьмаго Вселенскаго собора священнодействовал? Аще ли в Дусе священнодействовал тайны, яви ми, где прия той? Ибо во иконоборцех не бяше Духа Божия, ниже тайны в них совершенно бываху, яко же подобает. Тайны бо святыя церкве посему тайны, яко видим на трапезе лежащ хлеб, тайна же сущее Тело Христово; видим во святей чаши вино, по тайному же самая Христова кровь. Тако же видим воду на крещении, ничто же ино, токмо тела омывание; тайно же порождение наше во Христа знаем. Подобне же и о прочем есть глаголати. Но сия что творит? Не человек, но самаго пришествие Святаго Духа, Его же иконоборцы отнюдь не имеша. И како бы у них Тарасий священства тайну прияв, в Дусе бы был и кия бы тайны без Духа совершал? Но оставивше убо сие невежество, известными свидетельствы сия блядословия отринем сими: 1) Понеже Бароний велий под четверопрестольными подзиратель бяше, того ради и малейшее се, еже из мирскаго чина на престол патриарший абие Тарасию взыти, в подозрение положи, аки неправильно: како бы умолчал ему, аще бы от еретик рукоположился? 2) Паки той же пишет: "егда папа прия послания от царицы Ирины позывательная на собор, тогда отписа к Тарасию папа, хваля веру и исповедание его, возшествия же его на патриаршество от мирскаго чина не хваля, и не хотяше бы сие его возшествие подтвердити, аще не бы сим долгом преклонен был, яко да честь образов церквам возбранит". А о сем нимало в том воспомяне (еже бы ему и паче нужно отписати), яко от еретик рукоположен был. 3) Еще той же Бароний в лете Господнем 787-м пишет: "яко за еже Тарасий на седьмом Вселенском соборе рукоположенных иконоборными епископов для исповедания святых икон приятия и для истиннаго их покаяния, в лучшее умирение церкве святыя, во еже первою честию святых икон прославити, за сущее снисходительство прияти, в том же чине прият и благослови священныя тайны действовати, неции от святых отец, а наипаче Феодор Студит и Савва, хуляху Тарасия". Коль бы паче хулам и отвращению не был Тарасий достоин от отец, егда бы и сам хиротонию, от тех восприял бы? 4) Аще бы святый Тарасий от иконоборных еретиков поставлен был, то кая бы се истина была, под отрицанием и клятвами рукоположенных в церкви приимати, а сам от святых отец собора не прият под таковым отрицанием ересей был? Понеже у всех историописателей не пишется, еже бы отцем Тарасия, аки от еретик ставленнаго, приимати. Тем же ложное сие смышление и несогласное разуму истории сие умствование о Тарасиеве рукоположении, аки бы от еретик хиротонисан был; но истина есть вещь и согласная историям и действам соборным, яко от православных епископов рукоположен бысть.

От того же Тарасиева жития о Павле патриарсе исповеднике.

Разговор 5-й.

Пришедый: И како же Павел прежде Тарасия в патриархи Царя-града от сих иконоборец поставлен бысть, и действоваше вся приличия патриаршая, и доныне есть и глаголется патриарх, аще и рукою еретическою бысть патриарх? Познавается бо отсюду, яко аще и не подобне соборныя церкве, однакоже не может быти просто (еретическое рукоположение), но некоего освящения виновно. Аще бы не сице, чего ради тако глаголатися? Кий ответ на се можеши показати?

Аз же: Сей твой подлог наипаче хощет ми о Тарасии утвердити истину.

Пришедый: И коими винами сего моего подлога хощеши о Тарасии утвердити?

Аз же: Сими хощу утвердити: понеже сей Павел, приим рукоположение от иконоборец надеждею сею, да искоренит иконоборную ересь, аки глава сущи духовнаго правления; но не содеяся по его тако: тем же, аки согрешив надежды, отречеся сего чина же и действа, и восприя о том покаяние.

Пришедый: Павел не о том каяся, что от иконоборец рукоположен бяше; но о том, что на иконоборство подписася.

Аз же: Се ми есть на низложение твое помощь, еже рекл еси, яко подписася на иконоборство. Тем же вопрошу тя: скажи ми время подписания сего?

Пришедый: Мнение мое есть о сем, яко при некоих соборех подписатися ему.

Аз же: Во время возведения на епископский престол взыскуется ли у хотящаго ставитися исповедание веры?

Пришедый: И зело.

Аз же: Возмем же от сего разум сей: егда иконоборцы хотяху Павла рукоположити на патриаршество, тогда, по обычаю церковному, взяша у него обещание во исповедании том, чтобы ему с ними поборати на святыя иконы, и по обету сему и подписку, о которой ему подписке и сенаторы с царицею пришедше припомянуша. Но сие убо, мною реченное, аки недостоверно есть ти; тем же вопрошу тя: во время поставления своего от иконоборец Павел дал ли тем еретиком на иконоборство обет?

Пришедый: Дал; понеже таков есть повсемственный обычай, яко в соборной церкви, тако и в еретицех.

Аз же: И аще убо повсемственно есть таково, да в коейждо вере и согласии прежде поставления во епископы брати обеты, да тако мудрствует и учит: и посему дал ли и Тарасий в поставлении своем иконоборцем обет на иконы по их обычаю?

Пришедый: Аще глаголати достойно, что Тарасий от иконоборец рукоположен, то без исповедания веры не мощно поставитися от тех.

Аз же: И аще Тарасий по иконоборной ереси творил исповедание веры: то убо Тарасий в том еретичестем исповедании и веры отречеся (приидет по вас)?

Пришедый: Никако; за повольную бо ему власть от прежняго совета свободно ему и православное исповедание пред иконоборными архиереи творити.

Аз же: Архиереи, кои (по мнению твоему) Тарасия ставили, иконоборнаго ли исповедания бяху?

Пришедый: Иконоборнаго.

Аз же: И како убо се, — хотяй Тарасия рукоположити иконоборнаго бяше исповедания, а Тарасий, хотяй от того рукоположитися, православнаго исповедания бяше! И что между ими таковое странное явится тогда? Слушаяй Тарасиево исповедание еретик бяше и еретическаго исповедания: а исповедание пред ним глаголяй православен, и православное исповедание глаголяй! Тем же вопрошу тя: кия ради вины пред рукоположением творится исповедание веры?

Пришедый: Для известия мудрования того, согласное ли той церкви имать, да не волк вместо пастыря стаду Христову введен будет.

Аз же: Что же, — аще хотяй рукоположитися несогласно исповедание изглаголет рукополагателю, будет ли его той рукополагати?

Пришедый: Не будет.

Аз же: Како же ты прежде рекл если, яко Тарасий пред иконоборным архиереем православное и несвойственное еретику исповедание творил, и той аки бы оно слушал и Тарасия рукоположил?

Пришедый: Тако есть.

Аз же: И чего ради тако есть? — рцы ми.

Пришедый: Яко иконоборная ересь уже преставаше.

Аз же: И аще тогда уже преставаше ересь иконоборная и упадаше, и иконоборцы укрощахуся: то почто Павел с престола сшел? Не малаго удивления сия ответствия твоя суть достойна,  яко Павел, восходя на престол патриарший, притворно подчинися лютости иконоборства, хотящь ересь како-либо истребити, а егда зря лютое се укрочаемо, с престола сниде, и идеже бы хотяше падение свое загладити залога своего исполнением, ту тощ отъиде, знак имея неразумия. Но не тако убо, не тако; но паче знаком отчаяния исправы отъиде. И аще Павел виною сею понужден отъиде, то како хотяше иконоборный архиерей, слушав православное исповедание, поставити Тарасия в Царе-граде патриарха? Вещь сия странна и неимоверна, и  паче утверждает поставление Тарасиево от православных.

Пришедый: Оставим уже то глаголати, аки бы Тарасий пред иконоборцем православное иеповедание глаголал; но речем то, негли по глаголу Павлову исповедание иконоборное дал за надежду исправления.

Аз же: И аще иконоборное исповедание иконоборцем дал, убо и подписался под иконоборство, и тако самое отступление Тарасий сотворил; и нужда бы в его святость покаянием и исповеданием православия то пред собором исправити. Но яко иконоборнии епископи ему на соборе исповедание православия творили, а Тарасий никому: убо и не бысть в падении иконоборства Тарасий, яко же Павел.

Пришедый: Чего же ради Павел от иконоборцев поставлен в патриархи, а церковь его нарицает патриархом? Зри августа 30.

Аз же: Материи ради и  формы еретическаго тайнодейства, сиречь возложения рук на главу хиротонисуемаго и приглашения словес во время рукоположения, вси и в  еретиках поставляемии глаголются  быти иереи и архиереи; обаче еретичестии глаголются, аще не покаются; аще же покаются от ереси, и тогда возглаголются архиереи еретическое то ставление имущии, действовати же по тому священная не могут, аще от православнаго архиерея власти благословением на священнодейства не приимут. Ибо то подает едина, совершающая священства, Святаго Духа сила, коея еретицы отнюдь не имут, но токмо соборныя церкве архиереи имут. И да реку ти о сем уподобительне: зри ми скуделъника, из вещества и вида сосуд содевающа; вещество его есть глина, а вид его есть сосуд соделанный; обаче сице показанный сосуд имя свое носит; а без огня совершенное свое действо явити не может, яко же и еретическая хиротония, имя носящи, без Духа Святаго не покажет своего действа совершенно, без совершительныя силы, о чем довольно выше рехом.

О Мелетии архиепископе Антиохийстем.

Разговор 6-й.

Пришедый: Вижду убо аз намерение твое, хотящее мя из всех доводов моих обнажити и пуста надежды моея сотворити мя; обаче не надеюся тако твоей удаче быти. Ибо пишется о Мелетии Севастийстем, яко он во град Антиохийский арианами избран и во архиепископа рукоположен, и всеми правоверными за истиннаго епископа прият бысть; ваше же не упрямство ли то есть, — везде ищете точию рук православных поставления, а на такия нужныя случаи, бываемыя в церкви, не взираете, в кая не все православных, но и еретических хиротоний не отревахуся правовернии, яко же слышиши ясное действо на Мелетии, — еретичество в православных приято.

Аз же: Ни, любезный мой друже, не упрямство нас от приятия вашего иерейства и от вас отлучает; но закона церковнаго положение, и сие есть самое разсечение наше от вас и вашего действа. Ибо аз толико рачительство о правости догмат церковных имам, яко тех ради род и отечество оставих, и ныне тех ради претерпеваю многия недостатки и здравие свое полагаю, и отщетихся земнаго утешения, един лишен пребываю, не имея обстояния сродства земнаго, токмо надеяние едино на Господа; не словом, но делом всегда желаю в дому закона церковнаго неисходно до кончины моея пребывати, не изменяючи то ни на славу мирскую, ни на прибытки текущия, кия не могут заменити пред Богом души моей, кроме преданнаго словеси от Христа Бога и церкви Его: тем не хощу ни помыслити что ради тленных в законе лгати. О, Христе Царю! Тебе зрителя словесем моим поставляю! Но да не позазрит мя Твоя любовь в дерзости словес моих, ниже да не возмниши мя гордящася тако суетно глаголати, — ни: се бо моя похвала и честь — токмо веры безстрастныя хранение, ея же ничто  дражайше в мире сем, и в сем сладце хощу по послушествующей моей совести хвалитися. Извещен бо есть от истины моего желания и верую тако; ты же ми тако в законех церковных неизвестен являешися. Не от мене тако, но от своих предложений такова себе быти показал еси, яко не имети тебе что достоверное. И болезную о тебе; но во твоей власти оставляю. А что и сие о Мелетии предложил ми еси, но никоея от него тебе помощи несть, о чем всех историков о Мелетии привести тебе потщуся, да познаеши из них, аще тако по тебе. Внимай же. В Стоглавнике, во главе 31, пишет о Мелетии сице: "Мелетий сей, Севастийский епископ, житием и словом славен зело, безчиния же ради сущих под рукою его, отрекся епископии, и бысть в безмолвии. Тогда еретицы мневше, яко мудрствует с ними Мелетий, испросиша его у царя, да будет им епископ, еже и бысть". И паки в житии того самаго Мелетия, Февраля 12-го, повествуется сице: "Мняще (ариане Мелетия) единомудренна им быти и надеяхуся, яко к тому же их мудрованию и Евстафиан приведет (тако бо христиан нарицаху) и всю Антиохию научит догматом арианским, составльше нань общий избрания суд, утвердиша писанием своих рук и увериша святому Евсевию Самосатскому, мужу правоверну, на соборе том бывшу, и пославше моление ко святому Мелетию с царским соизволением, приведоша его во Антиохию с великою честию". Ниже: "И посажден бысть Мелетий святый на Антиохийскаго архиепископства престоле". О сем Мелетии и Бароний в лете Господнем 360-м лист 287, пишет от истории Феодоритовы, яко Евсевий Самосатский, епископ православный, отай на оный престол Антиохийский Мелетия (ведая каков бе внутрь) устрои и писание избрания его у себе держаше; егда же епископи во Антиохию на извержение Мелетиево собрашася, посла кесарь ко Евсевию, дабы оное писание возвратил, аще же не восхощет, отсещи ему руку (обаче не веляше ему руки отсещи, токмо его тако устрашаше). Он обе руце простре глаголя: не единыя, но обоих да лишуся, а писание на совершение злобы арианския не дам. Прия сие в сладость Константий кесарь, и сию его доброделель похвали". Дозде историков о Мелетии словеса. Видиши ли, яко у всех сих историков, как в Стоглаве и Житии, так у Феодорита и Барония, не описует о Мелетии, аки бы по тебе арианами поставлен; аще в хотении ариане и польстишася о нем, но сие возведение Мелетиево на Антиохийский престол Евсевием, великим благочестия хранителем, бысть, и толиким, яко и рук своих за благочестное его поставление дати не отречеся. Что сих свидетельств явственнейши во обличение твоего мнения? Но паче ты признайся зде арианскому безумию: не известившеся добре о Мелетии, подписку дали не своему епископу, но благочестивому епископу, аки бич на себе, да поставит Мелетия на Антиохийском престоле; и осмотрившеся сии совы, яко не такого улучили, подвигши своими епископы, безсовестно изгнаша Мелетия. А что рещи, яко благоверну Евсевию епископу на общее собрание христиан и ариан того поставити, извещаю: яко еще на он час о разнстве христианом со арианы соборных правил не бяше, по коему неуставлению и Василий Великий Уалента царя арианина во исполнение церковное прия, и о сем его оправдует поместнаго собора, иже в Лаодикии, правило 6-е, тако глаголя: "аще и Василий Великий Уалента царя еретика суща ко исполнению верных прия: не бе бо и еще сего собора и се правило не бе изложено". И того ради во образ того ныне приимати не подобает, аки неуставное по уставлении.

Чрез канон третияго вселенскаго собора о Нестории.

Разговор 7-й.

Пришедый:  В Кормчей книге напечатано собора третияго Вселенскаго правило 3-е, а в нем пишет сице: "аще который пресвитер, или епископ, или диакон от Нестория священства лишен, той преосвящен есть, а его же он прия, той не освящен есть". До зде правило. И от сего в нас мнение таково произыде, яко мощно по сему правилу и от каковы либо ереси со испытанием правыя веры пришедша иерея к правоверным, преосвященна его вменяти. Приемлеши ли и ты сие правило во увещение, во еже бы и тебе со исповеданием истины пришедша от ереси иерея тако прияти?

Аз же: Приемлю сие правило; но мнение твое о нем отреваю.

Пришедый: Чесо ради?

Аз же: Яко дверь беззакония сим хощет отверстися. Ибо аще, по тебе, за едино исповедание православия пришедша иерея от ереси вменяти православна, то всякое смятение в церковь Божию вовлечется, яко преосвященными по тебе, неосвященными же сущими, священная содевати тайны неосвященно; и таковыми мнимыми священными аки безумен некто будет себе свящати, и вместо пшеницы чистыя терния некая собирати и со оным во он век отходити несть нашея охоты в том. А наипаче и горшее всего, яко по сему мнению беззаконником глаголатися и клятве подлежати приидет: ибо о таковых еретиках чин и устав положен, како обратившихся приимати. Например: аще будет иерей, от ереси каковы-либо обращенный, к соборной пришед церкви, и таковаго, по отрицании ересей и по исповедании православныя веры, по качеству ересей, — аще кого крестити, того прежде крестить, аще кого мvром помазать, того помазать, аще же кому токмо ересей отрекшися приобщатися церкви, той тако и приобщается точию с верными стояния; и потом, аще восхощет, быв исперва иерей, паки священнодействовати, тогда сие дело поручается самому епископу, понеже он владеет хиротонию, и сей приемлет правило и зрит по оному качество его и количество ересей бывших, и, по тому смотря, или его второе рукоположит, или тако чрез благословение священныя ризы нань возложит, яко же исперва довольно ти рех; и от двух убо чинов, рекше мvропомазуемых и крещаемых, паки поставляются. О сем чти в Кормчей, во главе 37, послание Константина-града собора к Мартирию епископу Антиохийскому, како приимати еретики к соборной церкви, в нем же пишется, яко от ариан и прочих еретик, по помазании мvра, поставляются иереи в сан, в нем же быша, а не аки преосвященными, по тебе, наричутся.

Пришедый: Вем убо и аз добре сие послание соборное о еретичестем приеме; но в нем того не пишется, чтобы паки рукополагатися, или хиротонисатися таковым, но да поставляются, просто рекше, — даются им, или определяются тыя же места, их же имеша.

Аз же: Поставление зде не простое определение, по тебе, мест значит, но самую хиротонию паки по помазании являет приимати, о чем в той же Кормчей о Павликианских пресвитерех глаголет, в правиле перваго Вселенскаго собора 19-м: "по крещении да поставлени будут кождо в чин свой". Зри убо и о сих что глаголет: да поставлени будут. Еда по тебе и сии просто определени да будут во своя места? И аще таких еретиков по крещении не хиротонисати паки, то уже ни от единых еретик не подобает иереев хиротонисати паки, но в той же еретичестей хиротонии приимати. И кое сие невежество, — крещение их повторяти, а хиротонию приимати! Но не тако убо, не тако. Многажды бо глаголется и мирским поставлятися, и грамата, данная им на сан рукоположитися, грамата ставленная, а не хиротонисанная. Но того ради не мнети о таких мирских, аки бы и не хиротонисати, но так просто давать места, яко же еретиком Кальвином и Лютором свойственно бывает. Зри убо о еретичестей хиротонии в правиле святых апостол 68-м, в нем же о той пишется сице: "аще от еретик хиротонию приял бе, отметаем бо таковых яко же крещение, сице и хиротонию: не бо освящение сие, но скверну веруем исходатайствовати". Матфей Властарь в составе 500-м, во главе 24-й, подобне же о сицевых, и в Кормчей на сие правило 68-е глаголет: ибо от тех крещении не крещени и поставлении не причетницы. Такожде и Никон Черныя горы в книге о Заповедех Господних, в слове 63-м, на канон сей тожде пишет; и Севаст Арменополь в книзе своей пятой, на вопрос 30-й во ответе о еретичестей хиротонии, так глаголет, яко первейшему иерейству скверне непщуему и аки не бывшу вменяху. И от сих канонных представлений, како от еретик Павликиан хиротонисанных, по оной речи, еже поставлени, мнети токмо места давати сим? Весьма сие мнение законопреступно будет. Аще же мнети ону речь поставлени вместо еже рещи хиротонисани, то мнети подобает и о тех еретиках, о них же соборное послание гласит, идеже стоит сия речь поставлени, ту разумети речь сице: хиротонисати. И сия убо из наведения правила онаго о Павликианех на послание соборное рекох, разрешая  мнение твое о той речи, да не мнится, идеже глаголется поставлятися, аки бы ту определятися местам, но разумевати поставлятися, рекше хиротонисатися. Ныне же сию речь поставляются разрешим и от иных канонистов, како ю мнети подобает от самых тех же правильных мест. Константин Арменополь, в книге своей первой, на канон оный перваго Вселенскаго собора 19-й о Павликианех, так пишет: "Павликиане да выкрещиваются, и аще непорочни, и паки хиротонисуются, аще и предхиротонисашася". Дозде Константин. Зриши ли, кая речь в Кормчей лежит поставляются, тая же речь у сего написана хиротонисуются. И сие чего ради? Понеже, аще рещи: поставити во иереи, тоже знати и: хиротонисати во иереи. Тем же еже рещи поставляти, тоже разумети и хиротонисати, ибо обоя едину силу разума имут. Прейдем же отсюду и на онаго послания соборнаго о еретиках арианах и прочих разум, их же по помазании мvром повелевает тако же иереев поставляти в сан, в нем же быша, о которых той же Константин Арменополь сице глаголет: "Арианы убо и македонианы, и наватианы и прочая по помазании, глаголет, аки люди ни хиротонисуются во оное, еже быша у самых первее, аще же пресвитери, аще диакони, аще же иподдиакони, аще же псалмочетцы". До зде Арменополь. Что сих словес явственнейши хощет быти, во еже разумети, яко идеже в Кормчей глаголется поставляти, то истинно знать подобает хиротонисати? Видиши ли разум святыя церкве о еретических хиротониях? Едино отметно, — яко же павликиан, тако и ариан поставления ни во что полагает, но паки архиереом ставити в саны повелевает, аще и прежде ставлени быша. О вашем же иерействе аще поучимся, видим некую скрытую вещь не от простых, но от некоих властолюбцев ухищренну, но обаче яве: понеже онии, поразумевше, яко их же мvром помазовати, тех правильно подобает паки ставити, положили то несогласие (еже) простых мvром помазовати, а попов не помазовати. И сицево убо ваше установление всячески беззаконно есть, понеже на сие никоего правила святых не можете (указати): тем же от чрева своего сия догма у вас составлена, а не от святыя церкве. Ныне же сию в вас утвержденную догму диаконовы, аки лучше разумевше, уставили инако: ни попов, ни простых помазовать. А на чем то утвердиша, ни един взгляд, или правильное разсуждение в подобенство введоша, но некия аще доводы имут, но отнюдь чужды. Подобает бо правильное положение изобретати не в страсти плотския, но яко же и святым годе бяше, аще где и случашеся что таково, но кия ради вины. Аще ли вину оную не смотря, но словеса единыя ловити на слабость, то вместо злата собереши себе блато, и вместо света тьму держати будешь. И от сих всех мною церковных правил решении глаголю ти, яко по сему правилу третьяго Вселенскаго собора, о Нестории реченному, за едино исповедание правоверия всякаго еретика иерея вменяти преосвященна, будет безумно и всякаго беззакония преполно дело явится.

Пришедый: Что же есть сему собору виновное, да единаго еретика поставление тако вменяюще прияти, а прочим соборам то иначе глаголати и не вменяти другия от еретик ставленныя тако, яко же оным речеся, и ниже на приуказ в прочия еретики имети?

Аз же: Виновное сему се есть, яко прежде соборнаго оглашения  Несториевы  ереси сии того епархии бяху, о чем того собора третияго на правило оно третье в толковании глаголет: "Егда собрашася (рече) святии отцы на Ефестем соборе, и неции от митрополит отлучишася от правоверных и мудроваху повеления еретическая злочестиваго Нестория епископа Константиня-града, в человека верующаго и жидовская смыслящаго, и Келестина епископа Римскаго. Неции же от епископ осташа и не приидоша на собор, и не восхотеша осудити, ни прокляти неосвященную сию и злочестивую епископу, но паче побораху и помогаху им. Сего ради повеле святый собор помогающих Несторию и Келестину и тую ересь держащих и тако смыслящих изврещи из сана и от церкве изринути, епископом же и пресвитером, их же бе Несторий и Келестин от священства изверг, занеже право мысляху и вероваху, тем паки прияти свой чин; такожде и иже от своих епископов извержени быша за некая злая дела, и от Нестория и от Келестина прияти и оправдани быша, паки не священи и абие да извержени будут". Дозде толкование, в нем же коль явственно показана вина, ея же ради глаголет святый собор: от Нестория неосвященнии, сии от святыя церкве преосвященнии быти. Но сии вси священнаго чина, зазревшии Несторию, того ли самого Нестория поставления, или токмо его епархии быша? Обаче сего святый сей собор не истязует, яко до него еще Несторий в данной ему архиерейской власти бяше и сим собором лишен тоя: убо и ставленнии им равны с прежде ставленными до него быша. Вина же сего собора до священных лиц не сия бяше, от Нестория ли, или до Нестория рукоположени были, — не сия, но оная, яко многия им священнаго чина за обличение извержени быша. Многажды и то бывает, яко аще епископ и малогодный кого от своея епархии священства извержет, не может иныя епархии без общаго суда епископ того на священство возвратить, и сему приклади мнози. Диоскор, аще и ересь име и по своей ереси некия за противность изверже, обаче до общаго собора никто их разрешити дерзает. Что же, — и Феофилом изгнанные бывше, (егда) приидоша просити милости у Златоуста о том, еда прияти быша к церкви? Никако; но проси посланием Феофила Златоуст о сем, аще Феофил и великих злоб исполнен бяше. И таковых ради вин и Несторием изверженных священства сии святии отцы Несториево связание бывшее на них разрешиша токмо, а не от ереси прияша, и похвалиша ревность тех о благоверии, и обличение их вознесоша, и в ничто оное лишение священства поставиша, глаголюще: "аще кто от Нестория не освящен, той преосвящен есть!" Видиши ли, яко зде словеса о развязании токмо связания бездельна Несториева, а не о еретичестей хиротонии суть.

Пришедый: Досаждаеши ты мне сими словесы, их же токмо нагромождаеши, да заградиши некоего своего обычая намерок, и сим предпочитаеши свою страсть, обыклую ти, неже истину. Мое бо зде намерение и труд от болезни сердца моего, да разсмотрю в правых словесех вашего разглагольствия истину, — мы, или вы остаемся в неправде и неразсмотрении праваго разума святыя церкве; ты же мя ныне, иными словесы раздражая, глаголеши сих не в ереси ставленных в чины священства и не еретика быти мниши Нестория, и тех не от ереси пришедших. И что смущаеши мя сими? И первое твое разглагольствие в сомнение ми ввести сим прикровением не годным хощеши. Глаголи мне истину, да вся мне твоя благоприятна будут.

Аз же,  осклабляяся, рех ему: Гневайтеся и не согрешайте во гневе неразсмотрения словес своих! Многажды бо в нас бывает гнев виною нашего неразсмотрительетва и смущение от незрительныя силы умныя, яково и твое, любезный мой друже, ныне смятение сердца. Но туне. Коликия бо тебе прежде изрек с доводами о том словеса, яко всякаго ради противнаго мнения не бывает абие еретик, яко многим и святым случашеся и случается! Аще же некако в том и обличаем на мале, ибо многажды и чувство обличеннаго онаго обличения объяти не может, или и обличник сам малаго ума: тем же многащи сие место долготерпению оставляется, да оно паче негли исправит братнее падение. Ибо ничто тако Бог хощет нам, яко же спастися и в разум истинный приити. Сего ради с долготерпением всяким повеле нам друг друга исправляти, глаголя: аще брат твой согрешит в тя, обличи его между тобою и тем единем; аще ли ни, то поими с собою и другаго; аще ли ни тако исправляется, то рцы церкви; аще ли ни церкви послушает, да будет ти яко язычник и мытарь. А Василий Великий к сим Христовым словесем приложил и сие глаголати: "аще кто и церкви не послушает, но ежели лукаваго сего указанием церковь не вредится, и по обличении сем долготерпети подобает". Сицево бяше милосердие от церковных и к Несторию. Итак не хотяху погибели святии пастырие истины, яко же повем, да услышиши, кто он бяше, и како на сие прииде, и что сего дела конец. Несторий бо сей прежде неже взыти ему на престол Константинопольския церкве, иерей бяше Антиохии града, муж сущь великаго жития и премудрости, и тоя его ради славы по смерти Сисиниевы царь Феодосий возведе его на престол Константинопольския церкве, и в начале сего приятия престола велие рачительство показа на искоренение еретиков; обаче в тое же лето и сам тяжкую ересь сицевым образом нача. Употреби той Несторий некоего епископа Дорофея, аки толкователя своего, на разглашение онаго хуления, а сам еще стыдяшеся, и в церкви при нем седя дерзну ко всему народу той Дорофей возгласити: "иже Марию наречет Богородицею, да будет анафема!" Сему весь народ удивися, и общения с ними имети не хотяше. Феодорит епископ Кирский, имеяй велие с Несторием дружество, вначале ересь его защищаше; но пришед в чувство, описа его, како изначала людем являшеся смирен и о мире небрегущь. Во второе же лето своего пастырства Несторий ересь свою во вся страны разширяти нача; но Кирилл Александрийский велие тамо посланиями утверждение подая. Феодосий же кесарь почиташе Нестория, понеже сам его на оное епископство устрои; не похваляше его учения, обаче не возбраняше его прежде соборнаго осуждения. Егда бо монаси поношаху ему, а друзии дерзновеннейшии яве на него в церкви вопияху, яко еретик есть: он же темнице их предаваше, и бити их повелеваше и во изгнание посылаше. Предлагаху сие кесарю монаси и даша ему просительное писание, просяще, дабы за их обиды не сотворил отмщение Несторию, но дабы веру святую от его злаго учения защищал, немедля собор устроил бы. Писаше же и увещаваше святый Кирилл Нестория, дабы веру святую целу сохранил и единогласия церковнаго не терзал бы, удержаваше же и клириков цареградских, иже у него совета просяху, дабы еще о нем кесарю не доносили и ереси на него не возлагали, ожидая его исправления; того ради и собора египетскаго еще не хотяше составити Кирилл, на нем же можаше такожде предати анафеме тех, иже Марию не исповедает Богородицу. Сия вся кафолическая кротость и терпение и любовь отлагаше. Дойде же сей о Нестории слух и в Рим, и писа папа к Кириллу, аще тако есть. И Кирилл отписа к папе, яко тако есть. В лето же третие своего архиерейства написа Несторий и к папе своего исповедания словеса, в них же Христа простым человеком именуя, а рождшую Его Христородицею. И сие его писание папа соборне в Риме прокля, а Кириллу написа, наместником его своим поставляя, яко да возвестит Несторию, аще в десять дней не исправится Несторий, проклят будет. Но приим сие Кирилл не скоро о том Несторию яви; писа же от собора Александрийскаго ко клиру Цареградскому, возвещая им о проклятии на Нестория от папы и о разрешении тех, их же Несторий прокля. В четвертое убо лето патриаршества Несториева третий Вселенский собор на Нестория во Ефесе собрася, и сице на нем Несторий непокоривый в ереси из священства низложен святыми и проклят заочно, ибо, не единою зван быв, не прииде ко отцем, тем и глаголаша: понеже Несторий звание наше презре и послов наших не припусти, понуждени есмы то, ему же безбожно учаше, разсуждати, и егда уразумехом от его писания, еже зде явно прочтеся, и от вещания его, еже из уст в том граде слышано, яко зле научает и нечестиво мудрствует, по законом и правилом и по писанию святейшаго Римскаго епископа Келестина, с плачем и не хотяще, сие плачевное изречение творим: Господь наш Исус Христос, Его же он похули, сим собором того же Нестория от сана епископскаго низлагает и от чина и общения священническа осуждает. Сие изречение вси епископи подписаша, их же бяше множае двух сот, и писаша о том к Несторию; по соборе же сем Несторий на покаяние в монастырь святаго Евпрепия заключен, и егда не каяшеся в том, на горшее во Асен пустыню изгнан, и тамо пребывая, лютою смертию погибе: язык бо его червие расточиша и зде еще геену себе исповеда. До зде о Нестории, яже виною роптания твоего предложих, яко же возмеся ти, аки бы я Нестория за приятие от него священник очищати возмехся ти, еже ни в мысли моей имам; но то едино ти внушах, яко не абие в заблуждение впадших церковь еретиками вменяет и священства обнажает, но оставляет время на исправление пождательно, а наибольше главнейшим долготерпит, врачует, и не абие от здраваго телесе Христова отсецает, и ради надежды исправления и ради исполнения церковнаго, да не како скорым отсечением и ожити хотящий уд в суетную тщету отсечется. Виждь убо, колико святии Несторию терпляху! И в какой ереси и гордыни пребывающу! В коих злых действова священства не обнажен, и благодать Святаго Духа содействоваше ему! Егда же обнажен священства, тогда и благодать ему содействовати преста. Сего ради удивляюся вашему неразсмотрительству, яко слово соборное преосвященства от Нестория отступльших к еретикам, сущим священства лишенным, прикладаете, кия давно отчужденны быша благодати. Несторий бо сперва от благоверных епископов рукоположением прия благодать; а еретицы от времене уже не имут благодати: тем же и ни коего уподобления в суде Несторию не имут.

Пришедый: И аще убо тако подобательно есть церкви святей в начинающих ереси еще надеятися благодати духовныя, дондеже будет священными священства извержен: убо подобне и ныне, идеже где и еретичество в священных чинах, но не изверженных, благодать исповедати духовну и рукоположенных от них вменяти за истинных священник.

Аз же: Не годствует сицево мнение, ибо благодать Божия сугубо (двояко) пребывает в нас и отъемлется нас, яко же показуется: Филиппу, единому от седми диакон крестившу иногда Самарию, ни на единаго Дух Святый сниде, Ананию же, крестившу Павла, сниде Дух Святый. Сему убо разнству разуметися подобает, кия суть вины, яко обоим быти диаконом, а действия различная явишася чрез них. Мню бо, яко идеже присутствуют главнейшии чины, тамо оставляется тем совершенство вещи показати; а идеже сим не сущим, благодать Божия о себе чрез меньшия совершенство творит. Подобно есть рещи и о твоем здании: аще где присутствуют вящшия чины, то тыя по данней им власти еретичествующих извергают; аще ли ненадеемо где сим то творити, тамо, по обличении двою и трех свидетелей, самая их правила извергают, яко же третий Вселенский собор возгласи: "кто не проклинает Нестория, проклят есть", того правая вера проклинает; аще ли иначе пожидати, то и никогда ереси отлучатися будет.

О Феликсе, о Евдоксии и о Анатолии.

Разговор 8-й.

Пришедый: Благодарен есмь за твою толикую ко мне приязнь, яко одолжити мя в разговорах сих изволил еси любовию твоею; но понеже сими отвлекох аз время твое, упраздних от делания твоего потребна, буди же за сие тебе милость Божия во оставлении долгов твоих. Однако же еще имам не вопрошено в себе нечто, и о том, прошу, скажи ми. Евдоксий патриарх цареградский не токмо от ариан рукоположен бысть, но и самый ересиарх арианский, такожде и Феликс, аще сам и православен, обаче не токмо арианское прия поставление, но и прелюбодейно, живу сущу Ливерию папе, на его место в Рим рукоположися, Диоскор же постави Анатолия на Константинопольский патриарший престол: и вси сии в еретичестей хиротонии действоваху. Скажи ми, — прошу тя, — скажи ми вину попущения сего.

Аз же: О сем убо Феликсе и Евдоксии потребно разумети сие. Первое: яко еще не бяше тогда никоего уставления соборнаго о разнстве православных со арианы, аще по некоих местех и разнства некая бяше с сими, ибо еще на посредстве бяше сие и на общем увещании, яко же читаем. Второе: яко Феликс на Римский престол аще и рукоположен вместо Ливерия в папы, но римляне, ревнители сущии, не припустиша его до себе священнодейством [священнодействовати], дондеже Ливерий папа окаляся арианским некоим исповеданием в вере, тако же и подписанием на изгнание Афанасия Великаго. И о сих двух, о Феликсе и Евдоксии, сокращенно глаголю: прежде соборнаго устава вся сия бысть, по коему неуставлению и Василий Великий Уалента царя арианина на общую молитву со христианы в церковь припусти, но о сем оправдает его Лаодикийский поместный собор правилом шестым, яко в том Василий не погреши, яко не бе о том еще правила; последи же сих случаев вся сия святыми соборы запретися, и под судом Божиим будет преступаяй пределы отец своих. О Анатолии же (речем): аще и от Диоскора, ересь имуща, рукоположися, но сия еще в нем бяше скрыта, и прежде еще соборнаго суда. Но о сем в разговоре о Нестории довольно речеся. А наипаче и сам Бог во гресех наших долготерпеливно исправления нашего ожидает, яко же и о содомлянах ко Аврааму рече: глас вопля их вниде во уши Господа Саваофа, и иде соглядати их, аще тако есть по воплю их. Сему последует в падениих и церковь Христова: не на казни, но к милости паче взирает, о чем уже бяше. Прочее же, вечеру уже сущу, час приспе упокоения трудов и сократити сия возвещает глаголы.

Пришедый: Благодарю Господа Бога моего, сотворшаго мне милость, во еже приити мне на сия разговоры, во вся нужнейшая нас обстояния, и в требующихся ми восприяти решения: от давных бо лет желах и просих у Владыки моего, да даст мне известнейше и по тонку о сем уведати. Аще и случахуся кия где разговоры; но не бяше тако, яко же ныне, в неже самая живая благодать Божия настави и подвиже мя, за кое Его мне исполнение во благих желания моего буди честь и слава и поклонение благодарное всегда и ныне. Не мал убо воистину в сем случаи извет о долготерпении Божии во гресех моих, яко не забвенно теми прошение мое учини, приводя мя к чувству спасения моего, яко не презирает и грешников мольбы, но из всех причин извещает нам свою благость и позывает ко обращению. Буди благословенно имя Его вовеки, яко напитал есть душу тощу и насытил душу алчущу! Но яко же и тя, о друже мой, преутружденна и упражнена беседою моих словес во испытании сотворих: сего ради у Господа Бога прошу, да подаст ти Той награждение тщеты времене сего, и да сотворит прилог к смыслу твоему и да разжет сердце твое в горняя, яко много пользовал еси душу мою.

Аз же: Да не позазрит твое разсудительное невежества словес моих! Ибо аз человек о плоти пекийся, и непрестанными суетами объят есмь, и не имый добраго знания каковых-либо учений, ниже во чтении книг довольное упразнительство имый, откуду бы чистейши и явственнейши что довести и указати; но свыше мене зде дерзнух, на помощь Божию взираючи, к сим же и разумея, яко ничто полезнейши быти может, паче же в настоящее сие время, яко между нами о писании святом беседа, егда аз вопрошаю, ты же мне отвещаеши. Паче сего ничто же есть в житии сем радостнейше, и сия есть душевная пища, всяк мед превосходящая. Прочее да даст ти Господь Бог в приятии семен духовных возрастити пдоды благия, и себе и нас в гладе жития нашего напитати!

И тако, лобзавше друг друга, разыдохомся.

V.

О пренесении честных мощей святаго Николы Чудотворца,

на кую повесть ссылаются некия о приеме попов своих, аки бы на том пренесении папа Римский был, оправдание, яко не бяше.

По многих о иерействе вашем свидетельствах несвойственнаго разума приводится вами на среду из книги Жития Николы Чудотворца от пренесения того мощей слово, глаголющее на том пренесении быти призывану греческими епископы римскому папе отступнику, откуду крепкою надеждою вопиете: аще папу, отступника и сущаго еретика, грецы кроме нужде на пренесении святых сих Николиных мощей от Рима призваша, коль паче нам, в толикой нужде, мощно внешних рукоположенцев приимати. И сия суть пролазки, а не дверь.

Заграждение сея пролазки камением показания истины.

Пишет убо Бароний, яко гречестии пастыри разгласиша папежев латин в ересех быти лета 863-го, а наипаче от лета 1054-го, — сицевых ересей: 1-я) на опресноках служат, 2-я) удавленину ядят, 3-я) брады бреют, 4-я) суботы постятся, 5-я) нечистое животно ядят, 6-я) мнихи свиныя мяса ядят, 7-я) пост великий недобре творят, 8-я) в сырныя недели мясо ядят, 9-я) Духа Святаго и от Сына исходити глаголют, 10-я) брак священства хулят, николаитами зовут, 11-я) от родных братий своячин поемлют в жены, 12-я) на мше при окресноце друг  друга объемлет и мир ему дает, 13-я) епископи перстни на руках носят, 14-я) епископи на войну исходят и своею рукою неприятелей убивают. И сия ереси до лета сего 1086-го (в неже Николины мощи пренесены) в латинах явишася. Тем же гречестии патриарси с прочими треми восточными патриархи  за богопротивныя ереси латин непреклонных общим судом (клятве предаша). Предаде клятве папу и последующих ему Фотий патриарх Царя града в лето 867-е; Сергий же патриарх не токмо папу прокля, но и из книг память его изглади в лето 1054-е. Но и папа некий Марин, в лето 882-е, прокля Фотия Цареградскаго патриарха и дела его. И от сего времени преста конечно со греки римляном мир, и един на другаго неусыпную брань возъимаху. И Бароний нача о восточных во описании преставати, яко гневен. Ведати же зде и се подобает,  яко Бар град епархия Цареградскаго патриарха есть, в православии суща, в нем же мощи святаго Николы положени быша. Тем и дивитися странному сему извещению приходит: патриархи Цареградстии папу за вышереченныя ереси проклинают, а барстии, подчинения Цареградскаго, того проклятаго в действо общаго служения и во святыню некую приемлют. Несть ли се раскол епархии и к самим себе несогласие? Ибо тогда Фотий не токмо к восточным патриархом писа, позывая их на тое проклятие папежев, но и к своим подчинительным епархиям, да соберутся. И сего позывания послании бяху в лето 863-е; дело же проклятия исполнилось 867-го. А Сергиево пап изглаждение и проклятие  в лето 1054-е бяше, за мало до сего пренесения мощей. Зде же, аки забывше проклятие свое соборное на папу, на священнодейство позывают уже проклятаго ими:  вещь есть великаго сомнения, и вам самим, приводящим сия, к действу неупотребительно сих ради вин:

Первая вина. Понеже вы своих иереев во отречении новин и во обете древняго предания святых хранения приемлете; папа же на оное пренесение от греков позван бяше не во отречении своих латинских ересей, ниже во обете греческаго благочестия ко греком прииде, но во своем суще зломудрии тех ересей: тем же и не имать к себе указания подобна на приятие ваше попов.

Вторая вина. Аще в таковом лице своих ересей на пренесении мощей папино бытие годствует вам на образец приятия вашего иерейства: то употребляйте подобно тому, сиречь попов таких приимайте, кои бы суще новаго учения были и во всех артикулах предания новаго же, и в таковом их новом залоге вся священнодействуемая ими за сущую святыню приимите от них, и тако тогдашняго бытия на пренесении папы образ сущаго того дела на вас познается. Ибо папа в латинских ересех греками (по истории) на пренесении прият бяше: и вы, в новинах попа приемлюще, того дела хранители будете.

Третия вина. Догматы церковныя глаголются быти догматы страшныя, и не глумитися ими подобает, но со страхом теми спасения искати. Зрите же, яко догматы сии всякаго епископа молящагося и службу творящаго со еретики священства извергают. Но аще (по вас, или по той истории) епископи гречестии на пренесение оное мощей еретика суща папу к служению сему призваша: убо зде единому чему отложену быти подобает, — или правилам, запрещающим с еретики службы и молитвы творити, упразднитися, или, тыя правила соборныя храняще, тако поступающия Цареградскому патриарху из санов священных изврещи подлежит, яко ведуще папу соборне отлучена и проклята, на службу Божию прияша.

Четвертая вина. Толикий святый сей Никола бяше ревнитель благочестия, егда еще живый на земли ненавиде еретиков, яко Ария еретика не возмощи ему стерпети на Сына Божия хулы, ныне же больше уже сподобленный соединения с Богом, востребовал бы над свыше богословящих толикаго богохульника на пренесение тела своего и общество службы Божия верным со зловерным видети! И кое се богоприятство? Ибо нецыи мниси монастыря Ксиропотама славнаго, токмо приемше иногда во общество папежев, с громом и шумом великим восколебася земля и пожре вся здания монастыря, и мнихи и вся сущая в нем, и бысть им гроб страшный и ужаса всех зрящих объятый. Читай о сем историю печатную о Флоренском соборе. Зде же во общество приятия папы дело явися (по вас) и благоприятно, и угоднику Божию Николе требовательно, и вам во образец годное.

Пятая вина. Глаголете, яко сие бытие папы на пренесении мощей в печатной книги положено: и како не верите ему? Отвещаю. Несть дивно, не досмотрившеся с греческими о том писмами, напечатати, ибо не Бог, ни ангел при том деле справы досматривал, но человек, ему же что в чувстве, то и исправляет, а что чувством ведати не достиг, то и не возмог. Сия бо есть история; но двоими вещьми дозирается во истине, — или взглядом на каноны церковные и естественный тех разум, или согляданием других языков на подобное описание истины. Аще ли из сих что оскудеет, всячески в наборе том погрешит. Но сие несть достойно гаждения, ибо в конце печатных книг многажды о погрешностях прозба прощения полагается, да идеже что от недознания содеяся, да оставится в том, глаголюще: яко и вы тою же немощию обложени есте, и в чем недостаточно, исправите, а не клените. Тем же последующии сим искуснейшии в том исправщики в печатном дозирательстве исправиша сию о пренесении историю, и не напечаташа то, аки бы на том пренесении святых мощей папа еретик был, но ясно сопротивное разуму сие отложили, яко в Прологе Иосифовском, тако и в Минеях-Четиих, и в книге Полинодии, составленной богомудрым Захарием архимандритом Киевопечерским. Но вам не приятна тако исправленная история, яко неисправна, не разсуждающе, яко тако ратницы истине творят: обычно бо емлется лучше вера многим, неже единому.