మరణము తరువాత (Part 1)

గ్రంథకర్త : శేఖర్‌రెడ్డి వాసా

రచనా సహకారము :  ఇమ్మానుయేల్‌ రెడ్డి  వాసా

www.FaithScope.com

నీ మరణానంతరము నీ ఆత్మ ఎక్కడ వుండబోవుచున్నదో నీకు తెలుసునా?

మూలము

రెడ్డిపాళెం గ్రామములోని నా ప్రభువు తల్లి ఉపదేశములు మరియు ఆమెను ఆవరించిన పరిశుద్ధాత్మయొక్క జ్ఞాన సహాయమే ఈ పుస్తక రచనకు మూలాధారము.

అంకితము

ఈ అవకాశాన్ని నాకు అనుగ్రహించి నన్ను ప్రేమించిన క్రీస్తు ప్రభువుకు అంకితమిస్తున్నాను. -  వాసా శేఖర్‌రెడ్డి

Contents

ముందుమాట        

మొదటి భాగము        

దేవుడు జీవాత్మను ఎన్నుకొని జీవగ్రంథములో అతని పేరును నమోదు చేసి భూమి మీదకు పంపినది మొదలు ఆత్మ భౌతిక శరీరమును విడిచిన తరువాత ఆ భౌతిక శరీరమును పూడ్చు వరకు ఉన్న కాలము        

1.  ఈ సృష్టికి ముందు - ఈ సృష్టి అంతము తరువాత (ఈ యుగము ముందు - ఈ యుగము అంతము తరువాత)        

2.  జీవాత్మను భూమి పైకి పంపుటకు ముందు దేవుడు జీవాత్మను సిద్ధపరచుట        

3.  భూమిపైకి వెళ్ళవలసిన జీవాత్మయొక్క స్థితిని నిర్ణయించి వాని పేరును జీవగ్రంథమందు నమోదు చేయుట        

4.  మన ఆత్మలోని లోపాలు - మన పుట్టుకలోని లోపాలు        

5.  పుట్టుటకు మరణమునకు మధ్య        

6.  మరణమునకు మూలకారణము        

7.  ఈ సృష్టిలో మొదటి మరణమునకు ముందు        

8.  మరణవేదన        

9.  ప్రతి ఒక్కరికి తప్పని మరణము        

10.  చిన్నపిల్లల మరణము        

11.  ఒకేసారి అనేకమంది చనిపోవుటకు కారణము        

12.  మరణమును తెచ్చు వ్యాధులు - వైద్యము        

13.  అయోగ్యముగా ప్రభువు శరీరమును - రక్తము పుచ్చుకొని మనలో కొందరు బలహీనులై రోగులై మరణించుట!        

14.  దురాశ గర్భము ధరించగా పాపము మరణమును కనుట        

15.  కొందరికి వారు మరణించబోవుచున్నారని ముందుగానే సూచనలు వారికి తెలియజేయబడుట        

16.  దేవునికి ఎవరు హత్య గావింపబడి మరణించుట ఇష్టము        

17.  చనిపోకముందే కొందరు తమను పవిత్ర భూమిలో పాతిపెట్టమని తెలుపుట        

18.  శరీరరీత్యా మరణమును చూడక బ్రతుకు నరుడెవడు?        

19.  ఇంటి ముందు మంట వేసి మరణించినవారిని గూర్చి తెలుపుట        

20.  మరణదినము జన్మదినము కన్నా మేలైనది        

21.  మరణించినవారి కొరకు దు:ఖించుట / అంగలార్చుట        

22.  అంగలార్పు చేయునప్పుడు శరీరములను గాయపరచుట లేక తలలు గొరిగించుకొనుట నిషిద్ధము        

23.  అంగలార్పు ఆహారము - పానీయములు        

24.  రాత్రిపూట శవములు వ్రేలాడుట నిషిద్ధము        

25.  శవములను పూడ్చుటకు ముందు చేయవలసిన విధులు (శవమును పూడ్చుటకు సిద్ధపరచుట)        

26.  మరణించిన వారి కన్నులు మూయుట        

27.  శ్మశానపు ఏర్పాట్లు        

28.  మరణించినవారు తమ మరణించినవారిని పాతిపెట్టుట        

29.  మరణించినవారిని గూర్చిన భయము        

30.  ఈ మట్టి శరీరముతో రెండుసార్లు మొదటి మరణమును చూచినవారు        

31.  మరణించినవారియొక్క జ్ఞాపకార్థ విందు        

32.  చనిపోయిన పరిశుద్ధుల శవములు అద్భుతములు చేయుట        

33.  ఎప్పుడో వధింపబడిన ప్రవక్తల, పరిశుద్ధులయొక్క రక్తము యుగాంతములో కనబడుట        

రెండవ భాగము        

ఆత్మ భౌతిక శరీరమును విడిచినది మొదలు క్రీస్తు రెండవ రాకడకు ముందురోజు (పునరుత్థాన దినమునకు ముందు) వరకు వున్న కాలము        

34.  శరీరరీత్యా మరణించి భౌతిక శరీరమును వీడిన వెంటనే ఆత్మ పరిస్థితి        

35.  మరణించి భౌతిక శరీరమును విడిచిన వారి ఆత్మలను ఎవరు ఎక్కడికి తీసుకొని పోవుదురు?        

36.  మృతుల లోకము - పాతాళ లోకము        

37.   మృతుల లోకములోని ప్రాంతాల మధ్య మహా అగాధములు        

38.  మరణించి శరీరమును వదిలిన ఆత్మలు కొనిపోయేవి ఏవి?        

39.  మరణించిన భౌతిక శరీరమును విడిచిన ఆత్మలు మృతుల లోకములో ఎంత కాలము ఉండాలి?        

40.   మరణించిన ఆత్మలలో రకాలు - వారు ఉండు ప్రాంతములు - వారిపై రాజు        

41.   మరణించినవారి ఆత్మలయొక్క లింగము        

42.   మరణించినవారి ఆత్మలు ఏ ఏ రూపములో ఉంటాయి?        

43.   మృతుల లోకములోని ఆత్మయొక్క శరీరము        

44.   మృతుల లోకములో ఆత్మ సంచారము        

45.  144000 మంది పరిశుద్ధులు లేక అనింద్యులయొక్క సంచారములు        

46.  ఆత్మలయొక్క వాహనములు        

47.  మృతుల లోకములోని ఆత్మల జీవన విధానము        

48.  మన మరణానంతరము మన ఆత్మ చూడగలిగి తెలివితోనే ఉండునా?        

49.  వధింపబడి మరణించిన కొన్ని ఆత్మలలో ప్రతీకార ఆలోచన        

50.  ఆత్మలయొక్క భాష        

51.   మృతుల లోకములోని ఆత్మలు చేయు ప్రార్థనలు        

52.   మృతుల లోకములోని ఆత్మ చేయు ప్రయత్నములు        

53.  మృతుల లోకములోని ఆత్మలకు క్రీస్తును గూర్చిన బోధ        

54.  మృతుల లోకములోని ఆత్మలకు సువార్తను జరిగించువారు ఎవరు?        

55.   మృతుల లోకములోని ఆత్మలకు ఆహార పానీయములు        

56.   మృతుల లోకములోని ఆత్మలు క్రీస్తు వాగ్దానము చేసిన ఫలములు        

57. పాతాళ లోకములోని వారి కిరీటములు        

58.  ఆత్మ శరీరమును విడిచి శరీరమును మరణమునకు అప్పగించిన తరువాత భూమిపై దాని కార్యములు        

59.  మృతుల ఆత్మతో జరిగించు మాంత్రిక సంబంధమైన క్రియలు        

60.  ఈ లోక వివాహ బంధములకు మరణానంతర స్థితి        

61.  నరుని కోరిక మేరే, జీవము లేక మరణము        

62.  పాతాళముయొక్క వశము కాకుండ తన్నుతాను తప్పించుకొనగలవాడెవడు?        

63.  క్రీస్తు కాలములో అక్కడ నిలిచియున్నవారిలో మరణమును రుచి చూడనివారు        

64.  మృతుల లోకములో లేని ఆత్మలు ఇంకా ఎవరెవరు?        

65.  మరణించినను మరల బ్రదికి ఇక ఎన్నటికి చనిపోనివాడు        

66.  భూమిమీద జరుగుచున్న దైవోగ్రత కార్యములు పరిశుద్ధుల ఆత్మలకు తెలియుచుండునా?        

67.  సువర్ణ కిరీటములు ధరించి సింహాసనమునందు ఆసీనులైన ఆత్మలు        

68.  మరణించినవారి ఆత్మలకు సాతాను శోధన        

69.  అకాల మరణము పొందినవారు (హత్య, ఆత్మహత్య, ప్రమాదవశాత్తు చనిపోయినవారు)        

70.  జంతువులు, పక్షులు, జలచరములు, పురుగులు మొదలైనవాటి మరణము, వానిలోని జీవము ఆ శరీరమును వదిలిన తరువాత ఎక్కడ వుండును?        

71.  ఆత్మ భౌతిక శరీరమును విడిచిన తరువాత ఈ లోకములోని వాహనము, ఎలక్ట్రానిక్‌ వస్తువులు, కంపూటర్స్‌, రోబోట్స్‌, ఇండ్లు మొదలైనవాటి పరిస్థితి        

72.  సాతానుకు క్రీస్తుకు - అపరిశుద్ధులకు పరిశుద్ధుల ఆత్మలకు చివరి యుద్ధము        

ముందుమాట

ప్రియపాఠకులారా!  ఏదైన ఒక గ్రంథము వ్రాయునప్పుడు అనేక వర్ణనలతో గ్రంథకర్త తనయొక్క ప్రతిభను చూపించుట జరుగును.  కాని మరణము తరువాత అను అంశము వర్ణనలతో వ్రాయటానికి ఇది చరిత్ర కాదు, కథ కూడా కాదు.  భాషా ప్రావీణ్యము తెల్పుటకు ఇది గేయములు వంటిది కాదు.  మరణమనేది ఒక నిద్ర.  ఈ నిద్రగా వర్ణించబడిన మరణమును, ఆ తరువాత ఆత్మయొక్క చరిత్ర ఎవరైనా మనకు చెప్పిన అది అర్థమగుట బహు ప్రయాసతో కూడినది, ఎందుకంటే మరణానంతర ఆత్మల చరిత్ర బహు రహస్యములతో కూడియున్నది.  అందులోను అది ఒక అదృశ్య చరిత్ర.  ఈనాడు మనకు కనిపించేదే నమ్మే స్థితిలో మనము లేము.

        అయినను బైబిలు గ్రంథము నందు మరణానంతర చరిత్రను బహు స్పష్టముగా మనకు తెలియజేయుచున్నది.  ఇందులో వ్రాయబడిన ప్రతి అంశము బైబిలు ఆధారముగా చెప్పుటకు బహు ప్రయాస పడవలసి వచ్చింది, ఎందుకంటే మరణించిన వారి ఆత్మలు ఇలా వుండును లేక అలా వుండును అంటే నమ్మేవారు ఎవరూ వుండరు.  కనుక ప్రతి విభాగమునకు బైబిలు గ్రంథములోని వాక్యములను జతపరచి చెప్పుట చేత ఈ పుస్తకము కొంతవరకు సంపూర్ణత్వము పొందినది అని చెప్పుటకు నేను సంతోషిస్తున్నాను.

        మన ఇండ్లలో మనతో ఉండి మన పితరులుగా మరణించినవారి ఆత్మలు ఎక్కడ వున్నారు?  అన్న ప్రశ్న మనలో ఆతృతను లేపుతుంది.  మన మరణానంతరము మనము ఎక్కడ వుంటాము అన్న ఆలోచన మనలో భయముతో కూడిన భీతి మనకు కలుగుతుంది.  కాని మన మరణానంతరము ఒక గొప్ప చరిత్ర జరగబోవునని గ్రహించేవారు కొందరే.  అలా దాని గూర్చి తెలుసుకోవాలనుకొనే వారికి ఈ పుస్తకము ఒక గొప్ప వరము.  . . .

నెల్లూరు                                                                              ఇట్లు

21.05.2007.                                                 వి. శేఖర్‌రెడ్డి

మొదటి భాగము

దేవుడు జీవాత్మను ఎన్నుకొని జీవగ్రంథములో అతని పేరును నమోదు చేసి భూమి మీదకు పంపినది మొదలు ఆత్మ భౌతిక శరీరమును విడిచిన తరువాత ఆ భౌతిక శరీరమును పూడ్చు వరకు ఉన్న కాలము

1.  ఈ సృష్టికి ముందు - ఈ సృష్టి అంతము తరువాత (ఈ యుగము ముందు - ఈ యుగము అంతము తరువాత)

        ప్రియపాఠకులారా!  ఈనాడు మన శాస్త్రజ్ఞులు ఈ భూమి కొన్ని కోటానుకోట్ల సంవత్సరములకు పూర్వమే ఏర్పడినదని చెప్పుచున్నారు.  బైబిలు గ్రంథము ప్రకారము ఆదాము నుండి వారి జీవిత కాలమును బట్టి లెక్కించితే ఈ యుగము ఆరంభమై కేవలము సుమారుగా 8 వేల సంవత్సరములు అయ్యి ఉంటుంది.  మరి ఈ ఆదాము పుట్టక ముందు ఈ భూమి ఆకాశములు లేవా?  మానవ సృష్టి ఇదేనా?  దీనికి ముందు కూడా ఉన్నవా?  ఈ యుగ అంతము తరువాత కూడా ఇలాంటి మానవ సృష్టి జరుగునా?  బైబిలు గ్రంథము ఏమని చెప్పుచున్నదో ఇప్పుడు తెలుసుకొనవలసిన అవసరత ఉన్నది.

        ఆదికాండము 1:1, ''ఆదియందు దేవుడు భూమ్యాకాశములను సృజించెను.''  ఇందులో ఆదిలో భూమి ఆకాశమును సృజించెను అని చెప్పబడింది.  ఆదియందు అనుటనుబట్టి మొదటగా అన్న అర్థము ఇందులో ఉంది.  ఈ యుగమునకు ముందు అన్న అర్థము ఇందులో లేదు.  ఈవిధముగా ఆదియందు ఎప్పుడో అనగా కొన్ని కోటాను కోట్ల సంవత్సరములకు పూర్వమే ఈ భూమి ఆకాశము సృజింపబడింది.  ఇలా ఎప్పుడో సృజింపక బడక పోతే ఆ భూమి ఆకాశము అగాధ జలములలో ముంచబడి యుండవలసిన అవసరత లేదు.  ఆదికాండము 1:2, ''భూమి నిరాకారముగాను శూన్యముగాను ఉండెను; చీకటి అగాధ జలము పైన కమ్మియుండెను; దేవుని ఆత్మ జలములపైన అల్లాడుచుండెను.''  అలాగే ఆదికాండము 1:3-4, ''దేవుడు-వెలుగు కమ్మని పలుకగా వెలుగు కలిగెను.  వెలుగు మంచిదైనట్టు దేవుడు చూచెను; దేవుడు వెలుగును చీకటిని వేరుపరచెను.''  ఇలా వచ్చిన వెలుగు సూర్యచంద్రుల వెలుగు కాదు.  యోహాను 1:1-4, ''ఆదియందు వాక్యముండెను.  వాక్యము దేవునియొద్ద ఉండెను, వాక్యము దేవుడై యుండెను.  ఆయన ఆదియందు దేవునియొద్ద ఉండెను.  సమస్తమును ఆయన మూలముగా కలిగెను.  కలిగియున్నదేదియు ఆయన లేకుండ కలుగలేదు.  ఆయనలో జీవముండెను; ఆ జీవము మనుష్యులకు వెలుగైయుండెను.''  ఇలా దేవుని వాక్కు ద్వారా వచ్చిన మాట భూమి అగాధ జలములలో ముంచబడి యుండగా  ఆ అగాధ జలములలోని చీకటిని త్రోలిన వెలుగు ఆ చీకటిలో ప్రకాశించిన వెలుగు క్రీస్తు ప్రభువు అను వెలుగు అని అర్థమగుచున్నది.  ఇలా దేవుడు మొదటి దినమున క్రీస్తు ప్రభువును తన వాక్కుగా ఈ లోక సృష్టి కొరకు తనలోని 7 ఆత్మలలో ఒక ఆత్మగా బయటికి రప్పించుట జరిగింది.  ఈ విధముగా క్రీస్తు ప్రభువు మొదటగా వచ్చుట జరిగింది.  

        ఇలా మొదటగా వచ్చినప్పుడు క్రీస్తు ప్రభువు ద్వారా సమస్త సృష్టిని సృజింపజేసెనని ఆయన లేకుండా ఏదియు సృజింపబడలేదని చెప్పబడింది.  ఇలా సృజింపబడిన ఈ భూమి ఒక్కసారేసృజింపబడింది గాని అనేకమార్లు సృజించినది కాదు.  దేవుడు యుగాంతములో ఈ సృష్టిని అనగా ఈ భూమిని ఈ ఆకాశమును సమస్తమును అగ్నిచే దహించునని వ్రాయబడింది.  2 పేతురు 3:10-12.  ఇలా దహించబడిన ఈ భూమి ఈ ఆకాశమును మరల అగాధ జలములలో ముంచబడగా ఆ నీళ్లలో అవి పూర్తిగా చల్లబడి తన స్థితిలో మార్పు పొందువరకు అలాగే ఉంచబడుతుంది.  అలా ఒకసారి ముంచిన భూమి ఆకాశము అగాధ జలములలో ఉండి నిరాకారమై పోవును, ఎందుకంటే సమస్తము అగ్నిచే దహించబడి, ఆ దహించబడిన భూమిని నీళ్లలో ముంచుట జరుగును.  ఇలా ముంచబడిన భూమిని ఆకాశమును తిరిగి వెలికి తీయుట ద్వారా ఆరిన నేలను ఏర్పరుస్తున్నట్లుగా ఆదికాండము 1:6-10లో చెప్పబడింది.  ఇందులో ''ఆరిన నేల కనబడును గాక,'' అని చెప్పబడిందేగాని ఈ ఆరిన నేలను సృజించినట్లుగా చెప్పబడలేదు.  సృజించినది ఆదియందు ఈ సృష్టి ప్రారంభములో జరిగింది.  అందుకే హెబ్రీ 1:6, ''మరియు ఆయన భూలోకమునకు ఆదిసంభూతుని మరల రప్పించినప్పుడు దేవుని దూతలందరు ఆయనకు నమస్కారము చేయవలెనని చెప్పుచున్నాడు.''  ఈ మరల రప్పించుట సరి క్రొత్త యుగ ప్రారంభములో జరుగునని గ్రహించాలి.  ఇలా రప్పించినప్పుడు ప్రతి ఒక్కరు క్రీస్తు ప్రభువునకు నమస్కరించాలి.  ఒకవేళ ఇది యుగాంతములోనో లేక పరలోక రాజ్యములోనో జరుగునని అనుకొంటే సాతాను అతని దూతలు రెండవ మరణమనే శిక్షను పొందుట గురించి చదవగలము.  ఈ పుస్తకములో చివరికి వచ్చుసరికి సాతాను అతని దూతలు ఎవ్వరు పరలోక రాజ్యములోనికి రారు.  వారు రెండవ మరణమను అగ్ని గంధకములతో బాధింపబడినట్లుగా శిక్షను పొందుచున్నారు.  కనుక మొట్టమొదటి యుగ ఆరంభములో క్రీస్తు ప్రభువు వెలుగుగా వచ్చాడు.  అటుతరువాత యుగాంతము జరిగి ఆత్మలకు పరలోకము లేదా అపరిశుద్ధులకు శిక్ష జరిగిపోయాయి.  ఆ తరువాత మరల కొంత కాలానికి (దేవుని కాలమానం ప్రకారము) తిరిగి క్రీస్తు ప్రభువును ఆదిసంభూతినిగా రప్పించుట అందరిని నమస్కరించమని చెప్పుట ఈ స్థితిలో సాతాను ఈ క్రీస్తు ప్రభువు స్థానమును తాను కోరుకొని యెషయా 14వ అధ్యాయములో వలె మహోన్నతుడైన క్రీస్తు ప్రభువు స్థానమును ఆయన సింహాసనమును కోరుకొనుట వలన వాడు నమస్కరించక త్రోసి వేయబడుట చదవగలము.

        బైబిలు గ్రంథము ప్రకారము ఈ యుగము ఆదాముతో మొదలైంది.  ఈ యుగ అంతము యుగ సమాప్తితో అంతిమ యుద్ధముతో పూర్తి అగును.  దీనినే మత్తయి 13:49, ''ఆలాగే యుగసమాప్తి యందు జరుగును.  దేవ దూతలు వచ్చి నీతిమంతులలోనుండి దుష్టులను వేరుపరచి,''  ఇందులో క్రీస్తు ప్రభువు ఇప్పుడు జరుగు యుగమును దాని సమాప్తిని గూర్చి చెప్పుచున్నాడు.  మత్తయి 13:39, ''వాటిని విత్తిన శత్రువు అపవాది; కోత యుగసమాప్తి; కోతకోయువారు దేవదూతలు.''  ఇలాంటి ఈ యుగము ఆదాముతో మొదలై యుగాంతములో అంతిమ యుద్ధముతో సమాప్తి అగును.  ఈ కాలములో అపవాది అను సాతాను తన లక్షణములను పరిశుద్ధుల మధ్య నరులలో నాటి అనేకులను నాశనమునకు నడిపించుట జరిగింది.  ఈ యుగము అంతము తరువాత అందరుతీర్పుకు గురియై కొందరు పరలోక ఆనందమును పొందితే కొందరు రెండవ మరణములో బాధను పొందారు.  ఇందులో పరలోక ఆనందమును పొందినవారు ఈ యుగములో పేరు పొందిన నామమును గుర్తించి ఆ నామములో రక్షణ పొందినవారు.  ఆ నామమే క్రీస్తు ప్రభువు నామము.  ఎఫెసీ 1:20-21, ''ఆయన ఆ బలాతిశయముచేత క్రీస్తును మృతులలోనుండి లేపి, సమస్తమైన ఆదిపత్యముకంటెను అధికారముకంటెను శక్తికంటెను ప్రభుత్వముకంటెను, ఈ యుగమునందుమాత్రమే గాక రాబోవు యుగమునందును పేరుపొందిన ప్రతి నామముకంటెను, ఎంతోహెచ్చుగా పరలోకమునందు ఆయనను తన కుడిపార్శ్వమున కూర్చుండబెట్టుకొనియున్నాడు.''  ఇందులో ఈ యుగమందే కాదు రాబోవు యుగమందు కూడా ఈ నామము ఘనత పొంది యున్నది.  కనుక ఈ వచనములో రెండు యుగాలు కనిపిస్తున్నాయి.  1.  ఇప్పుడు జరిగేది  2.  రాబోవునది.  అలాగే - హెబ్రీ 6:4-6, ''ఒకసారి వెలిగింపబడి, పరలోకసంబంధమైన వరమును రుచిచూచి, పరిశుద్ధాత్మలో పాలివారై దేవుని దివ్యవాక్యమును రాబోవు యుగ సంబంధమైన శక్తుల ప్రభావమును అనుభవించిన తరువాత తప్పిపోయినవారు, తమ విషయములో దేవుని కుమారుని మరల సిలువవేయుచు, బాహాటముగా ఆయనను అవమాన పరచుచున్నారు గనుక మారుమనస్సు పొందునట్లు అట్టి వారిని మరల నూతనపరచుట అసాధ్యము.''  ఇందులో కొన్ని అంధకార సంబంధమైన శక్తులు రక్షణలో ఉన్న వారిని తప్పిపోయినవారుగా చేసుకొని, మరో యుగమునకు నాంది చేయుచున్నారు.  దీనికి కారణము క్రీస్తు ప్రభువుకు ఎవరును నశించుట ఆయనకు ఇష్టము లేదు.  

        అలాగే క్రీస్తు ప్రభువు తన బోధలో నశించిన గొఱ్ఱెల వద్దకు వచ్చానని చెప్పుచున్నారు.  ఇంకొక దగ్గర గొఱ్ఱె పిల్లల ఆహారము కుక్క పిల్లలకు వేయ తగునా అంటున్నారు.  అంటే కొందరు గొఱ్ఱె పిల్లలుగా ఎప్పుడయ్యారు?  ఈ గొఱ్ఱె పిల్లలు ఎప్పుడు నశింపులోకి వచ్చాయి?  అలాగే కొందరు కుక్క పిల్లలుగా ఎప్పుడు మారారు?  ఈ యుగములో ఇన్ని తేడాలు ఎలా ఏర్పడినవి?  అందరు మనుష్యులే కదా!  వీరిలో ఈ తేడా ఎలా వచ్చింది?  పరలోక ప్రవేశము కేవలము ప్రభువును నమ్మితేనే అనుగ్రహింపబడును.  తీర్పు దినమున వీరిని గొఱ్ఱెలుగా ఎన్నిక చేయబడ్డారు.  మత్తయి 25:31-32, ''తన మహిమతో మనుష్యకుమారుడును ఆయనతో కూడ సమస్త దూతలును వచ్చునప్పుడు ఆయన తన మహిమగల సింహాసనముమీద ఆసీనుడై యుండును.  అప్పుడు సమస్త జనములు ఆయనయెదుట పోగు చేయబడుదురు; గొల్లవాడు మేకలలోనుండి గొఱ్ఱెలను వేరుపరచునట్లు ఆయన వారిని వేరుపరచి''  ఇందులో పరిశుద్ధులు గొఱ్ఱెలుగా ఎన్నిక చేయబడి పరలోకమును స్వతంత్రించుకొన్నారు.  అలాగే అపరిశుద్ధులు మేకలుగా ఉండి నరక పాత్రులైయ్యారు.

        ఈ అపరిశుద్ధులు అనగా ఈ మేకలలో కుక్కలుగా పిలువబడినవారు కొందరున్నారు.  ప్రకటన 22:15, ''కుక్కలును మాంత్రికులును వ్యభిచారులును నరహంతకులును విగ్రహారాధకులును అబద్ధమును ప్రేమించి జరిగించు ప్రతివాడును వెలుపటనుందురు.''  వీరు యెరూషలేము బయటఉన్నవారు.  ఈ యుగ అంతమునకు వీరు ఈ స్థితులలో గొఱ్ఱెలుగా కొందరు పరలోక రాజ్యము చేరితే, అపరిశుద్ధులు అనగా మేకలలో కొందరు కుక్కలుగా రెండవ మరణమును పొంది యెరూషలేము బయట ఉంటారు.  రాబోవు యుగములో వారు జన్మించినప్పుడు వీరిలో పరలోకము చేరిన గొఱ్ఱెలు గొఱ్ఱెలుగానే ఈ లోకములో జన్మిస్తారు.  వీరు గొఱ్ఱెలుగా జన్మించినను ఈ లోక ఆశలలో పడి నశించుట వలన వీరిని క్రీస్తు ప్రభువు నశించిన గొఱ్ఱెలుగా పలుకుట జరిగింది.  అలాగే ఈ యుగములో కుక్కలుగా రెండవ మరణము పొందిన అపరిశుద్ధులు రాబోవు యుగములో మరల కుక్కలుగానే జన్మిస్తారు.  అనగా దేవుని రాజ్యములో అర్హత లేనివారుగానే జన్మిస్తారు.  ఇదే క్రీస్తు ప్రభువు సంబోధనలోని రహస్యము.   అందుకే ఆ నామము ఘనమైన నామముగా చెప్పబడింది.  అలా ఆ నామమును గుర్తించక చనిపోయినవారు తిరిగి నరక శిక్షను పొందుచున్నారే గాని క్రీస్తు ప్రభువు 1000 సంవత్సరముల పరిపాలనలో ప్రవేశించుట లేదు.  అటుతరువాత కూడ క్రీస్తు ప్రభువు నందు విశ్వాసముంచనివారు తిరిగి రెండవ మరణమను అగ్నిగంధకములతో కూడిన శిక్షను పొందుచున్నారేగాని పరలోక ప్రవేశము లేదు.  మరల క్రీస్తు ప్రభువు ఆదిసంభూతునిగా రప్పించుట ఈ సృష్టిని మరల అలంకరించుట ఈ నశించిన వారి కొరకు జరుగును.  ఎందుకంటే - యెషయా 66:24, ''వాటి పురుగు చావదు  వాటి ఆగ్ని ఆరిపోదు.''  ఇది ఒక కారణమైతే ఇంకొక కారణము మనలోని ఆత్మ కూడా దేవునిదే కనుక ఆ ఆత్మ నశించుట ఆయనకు ఇష్టము లేదు కనుక కొంతకాలము తరువాత ఆ ఆత్మలకు రక్షణ ఒసగుటకు మరల నూతన యుగమును ఏర్పరచి ఆ యుగములో నైనా సాతానును జయించి రమ్మని మరల ఆవకాశము ఇస్తున్నారు.  అప్పుడు ఇప్పటిలాగే నరుల మధ్య సువార్త కొనసాగింపబడునని రాబోవు యుగ సంబంధ శక్తులు తిరిగి క్రీస్తు ప్రభువును అవమానపరుస్తూ సిలువ వేయుట జరుగునని హెబ్రీ పత్రికలో వ్రాయబడింది.  అంతేగాని ఇప్పుడు చనిపోయినవారు కొద్ది రోజుల తరువాత ఈ యుగము నందే మరల మనుష్యులుగానో లేక జంతువులుగానో పుట్టుదురన్నది అసత్యము.  బైబిలు గ్రంథము ప్రకారము ఈ యుగములో జన్మించిన వారి క్రియల చొప్పున యుగాంతము తరువాత వారందరు శిక్షను పొందాలి.  ఆ శిక్షాకాలము తరువాత మరల యుగము ప్రారంభించబడి సాతానును జయించి క్రీస్తు ప్రభువును నమ్మి తిరిగి పరలోకమును చేరమని దేవుని కోరిక.  ఈ యుగములో ఎవరైతే పరలోక రాజ్యమును చేరారో వారందరు రాబోవు యుగములో గొఱ్ఱెలుగా పిలువబడుట జరుగును.  అలాగే గత యుగములో పరలోక రాజ్యములో ప్రభువును నమ్మి ప్రవేశించినవారు గొఱ్ఱెలుగా ఈ లోకములో జన్మించి తిరిగి లోక ఆశలతో నశించుట క్రీస్తు ప్రభువుకు ఇష్టము లేక వారి కోసము ఈ లోకములో జన్మించి రక్షణ మార్గమును ఒసగుట జరుగుచున్నది.  అలాగే గత యుగములో ఎవరైతే  క్రీస్తు ప్రభువును నమ్మక రెండవ మరణము అను శిక్షను పొందారో వారందరు గొఱ్ఱెలుగా కాక కుక్కలుగా సంబోధింపబడిన వారి వలె జన్మించుట జరుగుచున్నట్లుగా గుర్తించాలి.

ఈ విధముగా క్రీస్తు ప్రభువు యుగయుగాలకు రక్షకుడని, అలాగే తండ్రియైన దేవుడు యుగయుగాలకు దేవుడని అనేక సందర్భాలలో వీరిని గూర్చి సంబోధించుట జరిగింది.  ఒక్కసారి ఆలోచించండి.  ఈనాడు క్రీస్తు ప్రభువును అంగీకరించక నరక శిక్షకు గురియగుటకు యోగ్యులైనవారు మన మధ్య లేరా?  వీరి మరణానంతరము వీరు ఎప్పటికి శిక్షలోనే ఆరని అగ్నితోనే బాధింపబడాలా?  అందుకే క్రీస్తు ప్రభువు వారిపై తనకున్న ప్రేమ కొద్ది వారి కోసము తిరిగి బలియాగమునకు సిద్ధమై తిరిగి మరో యుగమును దైవసన్నిధిలో ప్రారంభించి తిరిగి పునరుద్ధరించుట జరుగును.  అప్పుడు క్రొత్తగా సృజించుట గాక అగాధ జలాలలో బురదగా ఉన్నదానిని వెలికి తీసి తిరిగి ఆరిన నేల కనబడునట్లుగా పలికి దానిని భూమిగా ఏర్పరచి దానిపై సమస్త సృష్టి తన చేతులతో సృజించుట చేయును.  అలా జరుగు అనేక యుగాలలో ఇప్పుడు జరుగుచున్న యుగము ఒకటి.  అలాంటిది మరొక రాబోవు యుగము ఉన్నది అనునది ఖచ్చితము ఎందుకంటే మన చుట్టూ జీవించు నరులలో అనేకులు ప్రభువునందు విశ్వాసము కోల్పోయినవారు.  అసలుకే విశ్వాసము లేనివారు ఉన్నారు.  కనుక వీరందరిని ఇలా చేయుట వలన వీరు పరలోక రాజ్య వారసులు కావాలంటే - రాబోవు యుగమునకు పునాది ఈ యుగములో సాతాను అతని దూతలు ఏర్పరచుకొనుట జరుగుచున్నది.  లేకపోతే వీరి ఆత్మలు నశించిపోతాయి.  యోహాను 17:12, ''నేను వారియొద్ద ఉండగా నీవు నాకు అనుగ్రహించినవారిని నీ నామమందు కాపాడితిని; నేను వారిని భద్రపరచితిని గనుక లేఖనము నెరవేరునట్లు నాశన పుత్రుడు తప్ప వారిలో మరి ఎవడును నశింపలేదు.''  కనుక అందరు పరిశుద్ధులుగా మారిపోతే ఈ నాశనకర పుత్రుడైన సాతాను నశించుట జరుగును గనుక ప్రభువు నశించుట ఇష్టము లేని నరుల ఆత్మలను తప్పించి రక్షణకు దూరముగా జీవించునట్లుగా చేసి తనకు ఇంకొక యుగమునకు రాబోవు యుగముగా పునాది వేసుకొనుచున్నట్లుగా గుర్తించాలి.

        ఇందునుబట్టి ఈ యుగమునకు ముందు ఇలా అనేక యుగములు జరిగాయి.  వాటి లెక్క ఇన్ని అని మనము చెప్పలేము.  అలాగే ఈ యుగ అంతము తరువాత రాబోవు మరో యుగము కూడ ఉన్నదని గ్రహించాలి.  అలా జరుగుతున్న యుగాలలో ఇప్పుడు ఈ యుగములో మన మరణానంతరము మన జీవితమును గూర్చి ఈ పుస్తకములో సంపూర్తిగా తెలుసుకొందము.  ఇక చదవండి  . . .

2.  జీవాత్మను భూమి పైకి పంపుటకు ముందు దేవుడు జీవాత్మను సిద్ధపరచుట

        మరల ఒక యుగమును దేవుడు ప్రారంభించినప్పుడు, భూమి పైకి వెళ్ళవలసిన జీవాత్మను దేవుడు సిద్ధపరచును.  యిర్మీయా 1:4-5, ''యెహోవావాక్కు నాకు ప్రత్యక్షమై యీలాగు సెలవిచ్చెను-గర్భములో నేను నిన్ను రూపింపక మునుపే నిన్నెరిగితిని, నీవు గర్భమునుండి బయలుపడక మునుపే నేను నిన్ను ప్రతిష్ఠించితిని, జనములకు ప్రవక్తగా నిన్ను నియమించితిని.'' కనుక ప్రవకఆత్మను దేవుడు సిద్ధపరచి, ప్రతిష్టించి, వానిని తన జనులకు ప్రవక్తగా నిర్ణయించి తల్లి గర్భములో ప్రవేశింప చేయుచున్నాడు.  యోహాను 1:6.  భూమి మీద పుట్టిన వారిలో దేవుని నిర్ణయము చొప్పున వారు ప్రవక్తలుగాను, రాజులుగాను, యాజకులుగాను, అపొస్తలులుగాను, విశ్వాసులుగాను వున్నారు.  వీరందిరి నిర్ణయము ముందుగానే అనగా భూమి పైకి పంపుటకు ముందే వారు భూమిపై వుండవలసిన స్థితి నిర్ణయించబడుచున్నది.  కనుకనే నరులలో ధనవంతులు వున్నారు, పేదవారు వున్నారు, రాజులు వున్నారు, రకరకాల వృత్తులు చేసుకొంటూ బాధలు అనుభవించువారు వున్నారు.  ఇలా అన్ని రకాల జనులు వారి వారి పుట్టుకతోనే వారి స్థితిలో అసమానతలు కలిగి యున్నారు.  వారు ఏ స్థితిలో ఉన్న ఇంటిలో పుట్టాలి అనేది దేవుని నిర్ణయమే.  క్రీస్తు ప్రభువు కాలములో క్రీస్తు ప్రభువుతో బాటుగా జీవించుటకు ఆయనతో సువార్తలో పాలి భాగస్థులగుటకు అనేకులు కోరుకొన్నారుగాని అది తన శిష్యులకు మాత్రమే అనుగ్రహింపబడెనని క్రీస్తు ప్రభువే స్వయంగా చెప్పుచున్నారు.  అంటే మనలోని ఆత్మ కోరుకొన్నను, దేవుని నిర్ణయము ప్రకారము ఎప్పుడు ఎక్కడ ఎలా జన్మించాలి అన్నది నిర్ణయింపబడును.

మన పుట్టుకకు ముందే మనమేస్ధితిలో పుట్టాలి అన్న నిర్ణయము జరుగును.

        ఇక్కడ ఇంకొక విషయమును మనము గుర్తించాలి.   దేవుడు ఆదామును సృజించునాటికి ఈ ప్రపంచములో ఎవరును లేరు.  ఏదెను వనమను దైవసన్నిధికి కాపలాదారుడుగా దేవుడు ఆదామును ఏర్పరచాడు.  ఆదికాండము 2:15, ''మరియు దేవుడైన యెహోవా నరుని తీసికొని ఏదెను తోటను సేద్యపరచుటకును దాని కాచుటకును దానిలో ఉంచెను.''  కనుక ఆదాము దేవుని నిర్ణయములో ఏదెను వనము కాచుట మరియు సేద్యపరచుట అను కార్యమును విధించి భూమి పైకి పంపాడు.  అతనిలో నుండి నారిని సృజించి అతనికి సహాయిగా వుంచాడు.  ఆదికాండము 2:18, ''మరియు దేవుడైన యెహోవా-నరుడు ఒంటరిగా నుండుట మంచిది కాదు; వానికి సాటియైన సహాయమును వానికొరకు చేయుదుననుకొనెను.''  కనుక హవ్వయొక్క కర్తవ్యము ఆదాముకు సాటి సహాయముగా వుండడమే.  కనుక ఆదాము ఏదెను వనము కాచుట, మరియు సేద్యపరచిన అది అతనికి నీతి.  అలాగే హవ్వ ఆదామునకు సాటి సహాయిగా నరునికి సహాయము చేయుచూ వుంటే అది ఆమెకు నీతి.  నీతితో జీవించిన ప్రతి ఒక్కరు పరలోక రాజ్యమునకు వారసులే.  అటు తరువాత దైవాజ్ఞను మొదటి నరజంట మీరి, పాపము శాపమును పొందెను.  కనుక వారు తమయొక్క ఉన్నత స్థితి నుండి భూమిపైకి వేదనకరమైన పరదైసులోనికి త్రోసి వేయబడ్డారు.  ఇటువంటి స్థితిలో వారికి కయీను, హేబెలు పుట్టుట జరిగింది.

        కయీను, హేబెలుకు ఏ పని చేయాలి అనేది దేవుడు చెప్పలేదు.  పైపెచ్చు వారు కూడా దేవుని అడగలేదు.  ఆదాము హవ్వలు దైవాజ్ఞను మీరుట ద్వారా వారిలో పరిశుద్ధత కోల్పోయారు. కనుకనే భూమిని దున్ని, చమటోడ్చి సాగు చేయమని దేవుడు వారిని శపించి ఏదెను వనము నుండి త్రోసివేసాడు.  కనుక ఆదికాండము 3:17, ''ఆయన ఆదాముతో-నీవు నీ భార్యమాట విని-తినవద్దని నేను నీ కాజ్ఞాపించిన వృక్షఫలములు తింటివి గనుక నీ నిమిత్తము నేల శపింపబడియున్నది; ప్రయాసముతోనే నీవు బ్రదుకు దినములన్నియు దాని పంట తిందువు;''  కనుక, ఆదాము శాపమును అనుభవించుచు కష్టించి భూమిని దున్ని దాని ఫలసాయాన్ని అనుభవించాడు.  ఇది దేవుని ఆజ్ఞ కాదు.  శాపము మాత్రమే.  ఆదామునకు దేవుని ఆజ్ఞ ఏదెను వనము సేద్యపరచుట మరియు కాచుట.  దీనిని కోల్పోయిన ఆదాము భూమిని దున్ని దైవ శాపాన్ని నెరవేర్చాడు.  ఇప్పుడు భూమిని దున్ని దాని ఫలసాయాన్ని తీయు ప్రతివాడు ఆదాము కియ్యబడిన దైవశాపాన్ని నెరవేర్చుచున్నట్లుగా మనము భావించాలి.

        ఆదాము, హవ్వలకు పుట్టిన సంతానము రెండు రకములైన పనులను ఈ భూమి మీద ఎన్నుకొన్నారు.  అందులో కయీను భూమిని సేద్యపరచువాడు.  హేబెలు గొఱ్ఱెల మందను కాచువాడు.  ఆదికాండము 4:2, ''తరువాత ఆమె అతని తమ్ముడగు హేబెలును కనెను.  హేబెలు గొఱ్ఱెల కాపరి;  కయీను భూమిని సేద్యపరచువాడు.''  ఇది నరుని ఎన్నిక దేవుడు చెప్పినది కాదు.  ఈ నరుల ఎన్నికలలో హేబెలు దేవుని శాపమును నెరవేర్చలేదు కాని తన కొరకు గొఱ్ఱెలమందను కాచుట మరియు సత్క్రియలు చేసినట్లుగా మనము గ్రహించాలి.  ఇక్కడ ఉన్నవారు నలుగురు.  ఈ నలుగురు విషయములో ఏవిధముగా సత్క్రియలు చేయగలరు?  హేబెలు కుమారుడు కనుక తన తల్లిదండ్రికి కుమారుడుగా సహాయకారిగా అన్ని పనులలో ఉండవచ్చును.  తన అన్నకు కావలసిన సహాయము చేయవచ్చును.  ఇలా తనతోటివారికి సహాయకారిగా వుండుట పరిశుద్ధ స్థితిని తెలుపును.  ఇక తను చేయుచున్న పని అనగా గొఱ్ఱెలు కాచుట నీతికి సూచన.

        ఇక కయీను సత్క్రియలు చేయలేదని అందుకే నీ అర్పణను నేను గుర్తించలేదని దేవుడు చెప్పుచున్నాడు.  ఆదికాండము 4:7, ''నీవు సత్క్రియ చేసినయెడల తలనెత్తుకొనవా?  సత్క్రియ చేయనియెడల వాకిట పాపము పొంచియుండును;  నీ యెడల దానికి వాంఛ కలుగును నీవు దానిని ఏలుదువనెను.''  కనుక పాపము కయీనును పొంచియుండి హేబెలు హత్యకు కారణమైంది.  ఇది మొదటి మరణము.  ఈ మరణము సాధారణమైన మరణము కాదు.  నరహత్య ద్వారా వచ్చిన అకస్మిక మరణము.

        ఇప్పుడు నలుగురు స్థానములో ముగ్గురు అయ్యారు.  వారే ఆదాము, హవ్వ, కయీను.  ఈ ముగ్గురు శాపగ్రస్థులే.  ఆదాము శాపగ్రస్థుడైనను మరల తప్పుచేయక దేవుని కుమారునిగా మారాడు.  కయీను తమ్ముని హత్యజేసి దైవశాపమునుబట్టి దైవ సన్నిధిని నిలువలేక తన భార్యతో కూడా నోదు దేశమునకు వెళ్ళి అక్కడ హనోకును కన్నాడు.  కయీనుకు భార్య ఎట్లా వచ్చింది? ఆదాముకు భార్య ఆదాము నుండి ఎట్లు వచ్చిందో అట్లే కయీనుకు భార్య కయీను తర్వాత జన్మించిన చెల్లెలే కయీనుకు భార్యయైనది.  జనాభా విస్తరించిన సమయములో మోషే చేత ఆదికాండము వ్రాయబడింది.  కనుక చెల్లెల్ని వివాహము చేసికొనుట నేరము కనుక గ్రంథములో వ్రాయబడలేదు.  ఆ దినములలో జనాభా విస్తరించలేదు గనుక అదే నేరముగా ఎంచబడలేదు.  ఆదాము కూడా తనలోనుండి తీయబడిన హవ్వను చూచి నా కుమార్తె అని చెప్పవలెను.  కాని నారివి అన్నాడు.  కనుకనే ఆదామునకు భార్య కాగల్గింది.

        ఆ విధముగానే కయీను వెళ్ళిపోయిన తర్వాత ఆదాము భార్య షేతును కనింది.  వాడే పెరిగి పెద్దవాడై తన చెల్లెల్నే భార్యగా చేసికొని ఎనోషను వానిని కన్నాడు.  అక్కడ నుండి యెహోవా నామమున వారు ప్రార్థన చేసికొంటూ దేవుని కుమారులుగా తీర్చబడినారు.  ఆది 4:26.

        కయీను తన చెల్లెల్ని కూడి దూర ప్రాంతములో జన సంతతులు విస్తరింపజేస్తూ దైవ నామమును మరచి లోకసంబంధులయ్యారు.  ఆదాము ద్వారా దైవశాపమును వారసత్వముగా పొందిన కయీను భరించలేనంత దైవశాపమును రెండంతలుగా పొంది, అతని ద్వారా విస్తరించిన జనాభా యెహోవాను మరచి శారీరేచ్ఛలతో విజృంభించి నరుల కుమార్తెలుగా వక్కాణించబడినారు.  వారు చెడుటయేగాక ప్రార్థనా జీవితములో యెహోవాను మరువక ఉంటున్న ఆదాము కుమారులైన దైవ సంతతులను ఆకర్షించి వారిని వివాహము చేసికొని దైవ కుమారులను పాడు చేసినందున లోకము జలప్రళయముతో నాశనమైంది.  కయీను హేబెలుల తరువాత ఆదామునకు పుట్టిన సంతానమును దేవుని కుమారులుగాను, కయీనుకు పుట్టిన వారిని నరుల కుమార్తెలుగాను చెప్పబడ్డారు.  ఆది 6:2, ''దేవుని కుమారులు నరుల కుమార్తెలు చక్కనివారని చూచి వారందరిలో తమకు మనస్సువచ్చిన స్త్రీలను వివాహము చేసికొనిరి.''  ఇలా దేవుని కుమారులు అనగా నీతి పరిశుద్ధతలతో జీవించినవారు అనగా తమ పనిని సవ్యముగా చేసి మరియు సత్క్రియలు చేసి పవిత్రతను కాపాడుకొనినవారు.  నరుల కుమార్తెలు తమ పనిని సవ్యముగా చేయక సత్క్రియలు చేయక దేవుని ఆజ్ఞలను మీరి కామవాంఛతో జీవించువారు.  ఇలా రెండు రకముల జనాభా ఏర్పడ్డారు.  ఈ రెండు రకముల జనాభాలో పుట్టినవారు దేవుని నిర్ణయము ప్రకారమే పుట్టినవారు.  

పూర్వ సృష్టిలో నరులు చేసిన పుణ్య కార్యములలోని తేడా రకరకాల స్థితులలో నరులు పుట్టుటకు కారణమైంది.

        దేవుని దూతలలో బలిష్టులైన దూతలు, మహాబలిష్టులైన దూతలు, సాధారణ దూతలు మొదలైనవారు ఉన్నట్లే, గత సృష్టిలో అనగా కొన్ని లక్షల సంవత్సరములకు ముందు జరిగిన సృష్టిలో ఇప్పటి సృష్టిలోలాగే పాపము చేసి తప్పిపోయినవారు రెండవ మరణమునకు పాత్రులై అగ్ని గంధకములో శిక్షింపబడుచుందురు.  వీరి ఆత్మకు చావు లేదు.  యెషయా 66:24,  ''వాటి పురుగు చావదు వాటి అగ్ని ఆరిపోదు.''  కనుక ఈ ఆత్మలకు వారి శిక్షాకాలము పూర్తియైన తర్వాత మరల ఒక అవకాశము దేవుడు ఇచ్చుచూ ఈ సృష్టిలో పంపించు చున్నాడు.  ఈ పాపములో మ్రగ్గిన ఆత్మలను అశుద్ధులుగా గత జీవితములో లేక సృష్టిలో జీవించి అగ్నిగంధకములలో శిక్ష అనుభవించిన ఆత్మలు వాటికి సత్క్రియలు లేవు గనుక భూమిపై నాశనమునకు మూర్ఖులుగాను, క్రూరులుగాను జన్మించుచున్నారు.  వారికి కూడా దేవుడు సువార్త రూపములో బోధింపచేసి మారుమనస్సుకు అవకాశము దయచేయుచున్నాడు.

        ఇదే మన స్థితికి కారణము.  అనగా గతసృష్టిలో ప్రవక్తగా వున్న వ్యక్తిని దేవుడు ప్రతిష్టించి పంపుచున్నాడు కనుకనే వారు దేవునిలో మహత్కార్యాలు చేయగలిగారు.  యోహాను 1:6, ''దేవునియొద్దనుండి పంపబడిన యొక మనుష్యుడు ఉండెను; అతని పేరు యోహాను.''  గత సృష్టిలో సాధారణ జీవితము జీవించి దేవునిలో ఎదగనివారికి మరల అదే జీవితము జీవించునట్లుగా దేవుడు వానిని అదే జీవితములో సృజించుచున్నాడు.  వానిని ఆ జీవితము నుండి దేవునిలో ఎదిగి గొప్ప స్థితికి రమ్మని పిలుస్తున్నాడు.  అనగా ఆస్థి అంతస్తులలో కాదుగాని దేవునిలో దేవునియొక్క జ్ఞానములో ఎదగమని చెప్పుచున్నాడు.  ఇలా ఎదగలేక పడిపోయినవారు మరల రెండవ మరణమునకు పాత్రులగుచున్నారు.  ఎదిగినవారు గొప్పస్థితిని పొందబోవుచున్నారు.  అలాగే దేవుడు గత సృష్టిలో పొందిన జీవితమును వాని కార్యములలో సత్క్రియలనుబట్టి ఈ సృష్టిలో వాని స్థితి వుంటుంది.  అనగా వాడు చేసిన పాపములకు శిక్ష పూర్తి చేయుచున్నాడు.  అటుతరువాత వాడు చేసిన కొద్దిపాటి సత్క్రియలనుబట్టి వాని స్థితి నిర్ణయించబడును.

        సొలొమోను రాజుగా ఎన్నికయైనను అతను దైవ వ్యతిరేకముగా విగ్రహ దేవుళ్ళను ఏర్పరచి తన స్థితిని పోగొట్టుకొన్నాడు.  ఇలా తన ఉన్నత స్థితిని పోగొట్టుకొన్నవారు వారి కార్యములకు శిక్షను అనుభవించి తిరిగి శిక్షాకాలము తరువాత మరల పరలోకములో ఒక స్థానమును పొందుదురు.  ఈ స్థానమునుబట్టి వారు తిరిగి భూమిపై అదే స్థితిలో జన్మించుదురు.  ఇక్కడనుండి దేవుడు వారికి ఇచ్చిన తలాంతును బట్టి ఎదిగి అనగా తను చేయవలసిన కార్యములు చేయుచూ దేవునిలో సత్క్రియలు చేసినవాడు మంచి స్థితి పొందుచున్నాడు.  కనుకనే క్రీస్తు ప్రభువు ఈ స్వల్ప జీవితములో జాగ్రత్త వహించమని బోధించారు.  మత్తయి 5:16.  ఇప్పుడు జరుగు యుగములో మన జీవితము స్వల్ప కాలమేనని మనందరికి తెలిసిన విషయమే.  మహా అంటే 100 లేక 120 సంవత్సరములు బ్రతుకుతాము.  ఇలాంటి అనేక యుగములు జరుగునని, ఆ జరుగు యుగములలో కూడా దేవుడు ఆయనేనని కీర్తన 103:18లో చదువుకొన్నాము.  తరువాత యుగములో మన జీవన విధానము మనము శరీరముతో చేసిన కార్యములని గుర్తించాలి.

        ఇది స్వల్ప జీవితమేకాని కొన్నివేల సంవత్సరముల కాలము మనలను బాధించునని గుర్తించాలి.  అటుతరువాత మరల, సృష్టి దేవుడు చేసినప్పుడు అప్పుడు నీవు వుండు స్థితి నిర్ణయింపబడును.  ఉదా :- వ్యభిచారమున కొందరు పుట్టుచున్నారు.  దీనికి పుట్టినవాడు చేసిన తప్పేమి?  దీనికి కారణము వాడు గతసృష్టిలో చేసిన తప్పే,  ఈ తప్పుకు వాడు శిక్ష అనుభవించినను, తిరిగి ఉన్నత స్థానమును పొందుట కొరకు వానికి మరల ఈ సృష్టిలో ఒక అవకాశమును దేవుడు వానికి ఇచ్చి వానిని తను ఏ తప్పైతే చేసాడో అదే స్థితిలో 'ం' అనగా వాని తప్పుడు క్రియలు, నీతిక్రియలు  ఏమిలేని స్థితిలో వాని స్థితిని నిర్ణయించి పుట్టించును.  వాడు ఆ స్థితినుండి అనగా 'ం' నుండి ఎక్కువగా ఎదగవచ్చును.

        ఇంకొకడు నీతిక్రియలు ఎక్కువగా వుండి పాపపు క్రియలు తక్కువగా వుంటే వాడు తన పాపపు క్రియలకు శిక్ష అనుభవించి పరలోకములో నీతి క్రియలను బట్టి వాని స్థానము వుండును.  ఈ నీతిక్రియలు వానిని విడచిపెట్టవు.  కనుక వాడు వాని నీతిక్రియల చొప్పున కొంత ఉన్నత స్థితిలో జన్మించును.  వాని పరిస్థితి మెరుగుగా వుంటుంది.

        ఇంకొకడు యాజకుడుగా వుండి తన అవినీతి క్రియలకు శిక్ష అనుభవించి నీతిక్రియల చొప్పున పరలోకములో ఒక స్థానమును పొందినవాడు మరల భూమిపై పుట్టుటకు, సృష్టిని దేవుడు చేసినప్పుడు వాడు యాజకులలో ఒకడుగాను లేక వాని గత నీతికార్యములనుబట్టి వాడు యాజకవృత్తి గలవారికి సన్నిహితుడుగా పుట్టును.  వానికి ఇంకా ఎక్కువ స్థితికి ఎదుగుటకు దేవుడు ఈవిధముగా బహు గొప్ప అవకాశమును దయచేయుచున్నాడు.

        కనుక ఎవరు ఏ స్థితిలో పుట్టినను వాడు గత సృష్టిలో తను చేసి సంపాదించుకున్న స్థితిని తిరిగి దానికన్నా కొంచెము ఉన్నత స్థితిని ఒక తలాంతుగా దేవుడు వానికి అనుగ్రహించును.  కనుకనే ఒక్కొక్కరు ఒక్కొక్క స్థితిలో జీవించగలుగుచున్నారు.  వారు ఆ స్థితిని ఆసరా చేసుకొని సత్క్రియల యందు మనస్సు పెట్టి అప్పగించిన పనిని పూర్తిచేసి దేవునిలో అంచెలంచెలుగా ఎదిగి తిరిగి మొదటి స్థితిని పొందవచ్చును.  

        అయితే ఒక గృహిణి ఉన్నదనుకొందము.  ఈమె ఎటువంటి తప్పుచేయక సత్క్రియలు కొంతవరకు చేయుచూ అనగా అందరికి అనుకూలమైన సహాయము చేయుచూ దేవుని చర్చికి తరచుగ హాజరగుచూ వారు చెప్పినది విని జీవించుచున్నది.  ఇలాంటి స్త్రీ చనిపోయిన తరువాత తప్పులు లేవు గనుక ఈ స్త్రీ పరలోకమునకు వెళ్ళినప్పుడు అక్కడ ఆమె ఒక స్థానమును, ఆమె క్రియల చొప్పున నిర్ణయించబడును.  అటుతరువాత మరల దేవుడు సృష్టించినప్పుడు ఆమె జీవాత్మగా భూమిపై పుట్టినప్పుడు ఆమె అదే స్థితిలో పుట్టించబడును.

        ఈవిధముగా ప్రతి ఒక్కరు భూమిపై పుట్టుటకు ముందే దేవుడు వాని స్థితిని నిర్ణయించి పంపును.  ఇక్కడ నరులు తమ కర్మగా భావించే అవకాశము వున్నది.  కాని దేవుడు మనలను మన స్థితి నిర్ణయించి పంపిన తరువాత మనము భూమిపై మరల చేయు కార్యములను బట్టి తరువాత జీవితముయొక్క నిర్ణయము జరుగును.అయితే యుగయుగాలకు పూర్వము అనగా లక్షలాది సంవత్సరాలకు పూర్వము అనగా దేవుడు నరులను భూమి మీద పుట్టించిన మొట్టమొదటి సృష్టిలో అనగా అంతకు మునుపు మానవ సృష్టి ఏదియు జరుగనందున ఇదే ప్రథమ సృష్టియైనప్పుడు - దుష్క్రియలు సత్క్రియలు లేనందున దేవుడు ఏ విధముగాను హెచ్చుతగ్గులు లేకుండ పుట్టించియున్నాడు?  జనులందరిలో గత జన్మ లేనందున ఎవరిలో ఏ క్రియలు లేవు గదా!

మొట్టమొదటి యుగములో అందరు సమానులే.  మనము చేసిన కియ్రలే మనలో ఇన్ని రకాల వ్యత్యాసాలకు కారణమైంది.

        అటువంటి స్థితిలో మొదటి సృష్టి జరిగింది.  ఈ సృష్టిలో నరులలో ఏర్పడి సాతాను కార్యముల మూలముగా వీరిలో అసమానతలు ఏర్పడి ఒకరు ఉన్నతి స్థానమును, ఇంకొకరు తక్కువ స్థానమును పొందగలిగారు.  మొదటి సృష్టి తరువాత శిక్షాకాలములో వారి పాపములకు శిక్ష జరిగిందిగాని వారి సత్క్రియలలో తేడా లేదు.  ఎక్కువ సత్క్రియలు చేసి దేవునిలో ఉన్నవారు గొఱ్ఱెలుగా తరువాత సృష్టిలో మంచి స్థితిలో జన్మించుట జరిగింది.  అలాగే చెడు జీవితములో కాలము వెచ్చించి మంచి క్రియలు చేయనివారు శిక్షాకాలమున చెడు కార్యములకు శిక్ష జరిగినను, వారిలో మంచి కార్యములు లేవు గనుక వారు తరువాత సృష్టిలో అదే స్థితిలో అనగా తక్కువ స్థితిలో మేకలుగాను కుక్కలుగా పుట్టుట జరుగుచున్నది.  అందుకే యుగయుగములకు దేవుడని చెప్పబడినది.  యెషయా 26:4, ''యెహోవా యెహోవాయే నిత్యాశ్రయదుర్గము యుగయుగములు యెహోవాను నమ్ముకొనుడి.''  కీర్తన 103:18, ''ఆయన కృప యుగయుగములు నిలుచును  ఆయన నీతి వారికి పిల్లపిల్ల తరమున నిలుచును.''  ఇప్పటి యుగములు లాంటివి ఎన్నియున్నను అన్నింటికి ఆయనే దేవుడు.  నిర్గమ కాండము 20:5-6.        

యుగయుగములు ఆదాము మొదలుకొని యుగాంతము వరకు ఒక యుగము.  ఇలా అనేక యుగములు

        ఒకసారి సాతానుతో చెయ్యి కలిపి నాశన కార్యములో నడచి రెండవ మరణమునకు పాత్రులైనవారు దేవుని ప్రవక్తలుగా ఎలా పుట్టగలరు?  వారికి దేవుని కనికరము వలన సాధారణ జీవితమే లభించును.  అలాగే నరునియొక్క దురాశలచేత కొందరి జీవితములో పేదరికమును అనుభవించవచ్చును.  వారిని వారి దురాశలచేత సాతాను వారిని నాశనమార్గములో పయనింప చేయుటకు తన సర్వశక్తులు ప్రయోగించుచున్నాడు.  కనుక మోసములు, కుయుక్తులతో కొందరి స్థితి భూమిపై సాతానుయొక్క నిర్ణయములో వుంటుంది.  అందుకే సోమరిపోతుగా వుండక సాతానును దాని ఆశలను లోకమును జయించమని చెప్పుచున్నాడు.  కనుక మనస్థితి దేవుడు ఇచ్చిన తలాంతుగా భావించి దానిలో మనకు ఒసగబడిన వృత్తిని నెరవేర్చి నీతిని సంపాదించండి.  తరువాత మన వృత్తితోబాటుగా దేవుని ఆజ్ఞను గౌరవించి పాటించి, క్రీస్తుయొక్క సువార్తను మనకు సాధ్యమైనంతగా చాటి మరల ఉన్నత స్థితి పొందుటకు ప్రయత్నము చేయండి.  కనుక దేవుడు జీవాత్మను భూమిపైకి పంపుటకు ముందే వారియొక్క స్థితిని నిర్ణయించి పంపును.  తలాంతుల ఉపమానములో క్రీస్తు ప్రభువు ప్రతి ఒక్కరికి తలాంతులు ఇస్తున్నారు.  కాని వాటిలో కొందరికి ఎక్కువగా కనబడుచున్నవి.  మరికొందరికి తక్కువగా కనబడుచున్నవి.  అంటే ఇందులో ఎక్కువ కలిగినవారు ముందుగానే కొన్ని తలాంతులు కలిగియుండి మరికొన్ని వారి కృషితో సంపాదించారు.  కొద్దిగా కలిగినవారు వారి కృషితో మరికొన్ని సంపాదించుకోవచ్చును లేక దానిని పోగొట్టుకోవచ్చును.  కనుక దేవుడు భూమిపై ధనవంతుడుగా పుట్టించాడని ఆనందపడవద్దు.  నీకు ఈ లోకములో వారసత్వముగా వచ్చినది ఎంత?  నీవు సంపాదించింది ఎంత?  ధర్మకార్యాలకు పరోపకారార్థము బీదరికములో బాధపడువారికి ఖర్చు పెట్టినది ఎంత?  అని ప్రభువు లెక్క అడుగుతున్నాడు.  యోబు 31:7.  నిన్ను తక్కెడలో పెట్టి నీవు చేసిన పుణ్య క్రియలకు తూస్తున్నాడు.  పాప క్రియల కంటె పుణ్య క్రియలు అధికముగా ఉన్న యెడల నీవు ధన్యుడవే, లేని యెడల ధనికుడు లాజరు ఉపమానములో వలె పాతాళములో వేదనపడుట ఖాయము.  మార్కు 12:41-44.  తనకు కల్గినదంతయు వేసిన బీద విధవరాలు అందరికంటే ఎంతో శ్రేష్ఠమైనది.  ఇందుకు నిదర్శనము మదర్‌ థెరిసా.  నీకు దగ్గ కార్యములు నీకు భుజ భారముగా అనుగ్రహించి యున్నారు దానిని నెరవేర్చాలి.  లేకపోతే నీవు కేవలము ధనవంతుడుగానే ఈ లోకరీత్యా మిగిలిపోయి ఎందుకు పనికిరానివాడివిగా మిగిలిపోతావు.  అలాగే పేదరికములో పుట్టితినని లేక నీ పుట్టుక పరిశుద్ధమైనది కాదని బాధపడక గత యుగ కాలములో నీ క్రియలు సరిగా లేవని గుర్తించి దేవునిలో ఎదుగుటకు ప్రయత్నించు.  రోమా 14:12.  

        ఇండియాకు మదర్‌ థెరీసా వచ్చినప్పుడు ఆమె దగ్గర ఎంత డబ్బు వున్నది?  ఇప్పుడు ఆమె పేరు మీద వున్న సంస్థల ఉన్నతి ఎంత?  సర్వమును దయచేయగల దేవుడు ఏమైనా చేయగలడని గుర్తించి దేవునిలో ఎదిగినట్లైతే, మనము తరువాత స్థితిలో ఉన్నత స్థానమును పొందగలము.  ఈ ఉన్నత స్థానముయొక్క నిర్ణయము మన జీవిత కాలములో మనము చేసే మంచి క్రియలను బట్టి వుంటుందని గ్రహించాలి.  జీవితాంతము పాపపు క్రియలు చేస్తూ, క్రీస్తు ప్రభువును అంగీకరించక మన మరణానంతరము క్రీస్తు ప్రభువు 1000 సంవత్సరముల పరిపాలనలో కూడ ప్రభువును అంగీకరించక మొదట పాతాళ లోకము తరువాత రెండవ మరణము అను శిక్షలను పొందిన ఆత్మ తిరిగి యుగ ప్రారంభమై సృష్టి జరిగినప్పుడు ఏ విధముగా జన్మించును?  దైవకుమారులుగానా లేక అన్యులుగానా?  ఇలా నిర్ణయింపబడిన ఆత్మ దేవుని నిర్ణయము ప్రకారము వారి ఉన్నతి స్థితిని లేక గత సృష్టిలో వారు చేసిన మంచి కార్యములను బట్టి ఎన్నిక చేసిన కుటుంబములో ప్రవేశించుట జరుగును.  ఈ విధముగా దేవుడు జీవాత్మను భూమి పైకి పంపుట జరుగుచున్నది.

3.  భూమిపైకి వెళ్ళవలసిన జీవాత్మయొక్క స్థితిని నిర్ణయించి వాని పేరును జీవగ్రంథమందు నమోదు చేయుట

        ప్రకటన  3:5, ''జయించు వాడు ఆలాగున తెల్లని వస్త్రములు ధరించుకొనును;  జీవ గ్రంథములోనుండి అతని పేరెంతమాత్రమును తుడుపు పెట్టక, నాతండ్రి యెదుటను ఆయన దూతల యెదుటను అతని పేరు ఒప్పుకొందును.''  పేరును తుడుపు పెట్టాలి అంటే వ్రాసియుండాలి కదా!  తుడుపు పెట్టుట వారివారి క్రియలపై నిర్ణయించబడుతున్నది.  ''జీవ గ్రంథములోనుండి అతని పేరెంత మాత్రమును తుడుపు పెట్టక,'' అని అనుటలో గొప్పవాడు కాదు, పేదవాడు కాదు, ప్రతి ఒక్కరి పేరు వ్రాయబడియున్నది.  కాని వారు జీవించిన కాలములో వారు చేసిన క్రియలనుబట్టి జీవ గ్రంథములో వుంచుట లేక తీసివేయుట అను నిర్ణయము తీసుకొనబడును.  మనము ఏ స్థితిలో భూమిపై పుట్టినను మన పేరు పుట్టుకతో జీవ గ్రంథములో వ్రాయబడియుండును.  అలా వ్రాసిన తరువాత జీవాత్మను భూమిపైకి పంపబడును.  ఇలా భూమి పైకి నమోదు చేయబడి జీవాత్మ పంపబడునాటికి, గత యుగములో చేసిన చెడ్డ కార్యములకు శిక్ష పూర్తి చేసుకొని యుండునని గ్రహించాలి.  కనుకనే వారి పేరు జీవగ్రంథములో నమోదు చేయబడుచున్నది.  పాపపు జీవితములో జీవించిన వారి పేరు జీవగ్రంథములో వుండదు.  నీతి కార్యములు కలవారి పేరు మాత్రమే అందులో వుండును.  ఇలా నమోదు చేయబడినది అంటే ప్రతి ఒక్కరి జీవితములో కొంచెమో లేక ఎక్కువో మంచి కార్యములు వుండాలి.  

దేవుడు పక్షపాతి కాడు.  ప్రతి ఒక్కరి పేరు జీవగంథములో నమోదు చేయును

వుంటాయి కూడా, ఎందుకంటే ఎంత దుష్టుడైనను ఏదో ఒక సందర్భములో నీతి కార్యము చేయును.  తన మరణానంతరము తన దుష్ట క్రియలకు శిక్ష అనుభవించి మంచి స్థితికి వచ్చును.  అప్పుడు అనగా తన శిక్షాకాలము పూర్తి అయిన తరువాత అతనిలో చెడు కార్యములు లేవు.  ఉన్నవి కొంచెము నీతి కార్యములే కనుక కొద్ది స్థితిలో అతని పేరు జీవగ్రంథములో లిఖించబడుచున్నది.  దేవుడు పక్షపాతి కాడు.  ప్రతి ఒక్కరికి అవకాశమును ఇచ్చుచున్నాడు.  ధనికుడు అని లేదు, పేదవాడని లేదు, బానిసని లేదు.  మన పుట్టుక మన పూర్వస్థితినిబట్టి నిర్ణయింపబడితే, మన పేరు మాత్రము నూతన రీతిగా జీవగ్రంథమందు లిఖించబడి నూతన జీవితమునకు సిద్ధపరచబడి యున్నదని గుర్తించి, సత్క్రియలతో దేవుని ఆజ్ఞలను తూచ తప్పకుండా పాటించి తరువాత జీవితమును ఆనందకరమైన స్థితిలో వుంచుకొనుటకు ప్రయత్నము చేయవలెను.  ఇప్పుడు చేయు చిన్న ప్రయత్నమే, తరువాతి రోజులలో ఒక పెద్ద ఉద్దేశ్యముగా మారి నిన్ను గొప్పవానిగా చేసి నీ పేరును జీవగ్రంథములో తుడుపు పెట్టనియ్యక పరలోక వారసునిగా చేయునని గుర్తించాలి.  

4.  మన ఆత్మలోని లోపాలు - మన పుట్టుకలోని లోపాలు

        లేవీయకాండము 26:27, ''నేను ఈలాగు చేసినతరువాత మీరు నా మాట వినక నాకు విరోధముగా నడిచినయెడల'' మరియు నిర్గమ కాండము 20:5-6, ''ఏలయనగా నీ దేవుడనైన యెహోవానగు నేను రోషముగల దేవుడను; నన్ను ద్వేషించువారి విషయములో మూడు నాలుగు తరముల వరకు, తండ్రుల దోషమును కుమారులమీదికి రప్పించుచు నన్ను ప్రేమించి నా ఆజ్ఞలు గైకొనువారిని వెయ్యితరములవరకు కరుణించువాడనై యున్నాను.''  మన ఆత్మలోని లోపాలు - మన పుట్టుకలోని లోపాలు గల వారి పేరు కూడా పరలోకములో నమోదు చేయబడియే పుట్టుదురు.  కాని వారి ఆత్మలోని లోపమును బట్టి వారియొక్క ముందు తరములవారు చేసిన పాపము వల్ల వీరి శరీరములో లోపము ఏర్పడును.  ఈ లోపము ఏర్పడిన ప్రాంతమును బట్టి వీరియొక్క శరీర ఎదుగుదల ఉండును.  ప్రకటన 3:17-18, ''నీవు దౌర్భాగ్యుడవును దిక్కుమాలినవాడవును దరిద్రుడవును గ్రుడ్డివాడవును దిగంబరుడవునై యున్నావని యెరుగక-నేను ధనవంతుడను, ధనవృద్ధి చేసియున్నాను, నాకేమియు కొదువలేదని చెప్పుకొనుచున్నావు.  నీవు ధనవృద్ధి చేసి కొనునట్లు అగ్నిలో పుటమువేయబడిన బంగారమును, నీ దిసమొల సిగ్గు కనబడకుండునట్లు ధరించుకొనుటకు తెల్లని వస్త్రములను, నీకు దృష్టికలుగునట్లు నీ కన్నులకు కాటుకను నాయొద్ద కొనుమని నీకు బుద్ధి చెప్పుచున్నాను.''  వీరిలో ఉన్న అంధకారము అనగా గ్రుడ్డితనము, చెవిటితనము మొదలైనవి ఆత్మకు సంబంధించినవి.  వీరిని గూర్చి క్రీస్తు ప్రభువు శరీర రీత్యా వీరు ఇవి కలిగి లేకున్నను వారు ఆత్మ రీత్యా ఉన్నట్లుగా చెప్పుచూ దాని నుండి విడుదల పొంది రమ్మని చెప్పుచున్నారు.  దీని వలననే వీరు క్రీస్తు ప్రభువును గుర్తించలేక పోతున్నారు.  సువార్తను వినలేక పోవుచున్నారు.  వీరు చూచుటకు బహు అందముగానే యుండవచ్చును కాని వీరిలోని ఆత్మీయ అంధత్వమనునది చెవిటితనమన్నది క్రియ జరిగించుచున్నది.  అందుకే పౌలు తన లేఖలో ఈ యుగ సంబంధమైన దేవత ఆత్మీయ అంధత్వమును కల్గించుచున్నట్లుగా చెప్పబడింది.  అంటే వీరు ఇలా ఉండటానికి కారణము ఈ యుగ సంబంధమైన దేవత అనగా సాతాను యొక్క బంధకాలని గ్రహించాలి.  వీరి ఆత్మ బంధకాలలో ఉన్నది కనుక వీరు సాతాను ఆధీనములో బందీలుగా ఉండి ఈ ఆత్మ రీత్యా అంధత్వమును చెవిటితనమును కల్గియున్నారు.  ఈ ఆత్మీయ అంధత్వము కారణముగా వీరు నరక పాత్రులుగా మారుచున్నారు.  అలాగే నరులు ఈ లోకములో దైవాజ్ఞలను మీరి జీవించుట వలన దేవుని నుండి శిక్షను పొందుట ఇహ లోకములోనే జరుగును.  ఈ శిక్ష మూలముగా ఇహ లోకములో వారి వల్ల వారి తరువాత వారి తరములలో శిక్ష కొనసాగును.  ఇది 3 లేక 4 తరములు కొనసాగుతాయి.  తండ్రి చేసిన శిక్షకు కుమారునికి ఏమి సంబంధము?  తండ్రి జూదములో పాపము చేసి ఆస్తిని పోగొట్టుకొనిన కుమారుడు కడు పేదవాడుగా మారును కదా!  అలాగే పాపము వలన ఆత్మ శరీరము రెండును బలహీనమగును.  పాపము చేసినవాని ఆత్మ శరీరము బలహీనమైనప్పుడు వానికి జన్మించువారు బలహీన స్థితిని పొందుట జరుగును.  అందుకే దేవుని 10 ఆజ్ఞలలో విశ్రాంతి దినమున ఆత్మను వాక్య పరిచర్యలో బలపరచుకొమ్మని ప్రభువు చెప్పుట జరిగింది.

        ఇంతకి తల్లిదండ్రుల పాపము వల్ల ఇలా బలహీన శరీరముతో జన్మించినవారు చేసిన పాపము ఏమి?  అన్న సంశయము మనకు కలుగవచ్చును.  ఇందులో వీరు గత సృష్టిలో చేసిన కార్యములు వారు అలా పుట్టుటకు కారణమని గ్రహించాలి.  వారి పాపములు వారి మరణానంతరము శిక్ష అనుభవించినను - మార్కు 9:48, ''నరకమున వారి పురుగు చావదు; అగ్ని ఆరదు.''  అనగా వారి ఆత్మకు నశింపు లేదు.  వారు ఆత్మరీత్యా శిక్షను అనుభవించినను ఆత్మకు నశింపు లేదు.  కాని వీరు గత సృష్టిలో పాప కార్యములు, పుణ్య కార్యములు చేసియుందురు.  ఇది సహజము.  మనము కూడా పాపము, పుణ్యము రెండు చేస్తూనే వుంటాము.  పుణ్యము మన శరీర ఆత్మలకు ఉన్నతి దయచేస్తే, పాపము శరీర ఆత్మల నాశనమును కలిగించును.  ఈ కారణము చేత పాపము వలన ఆత్మ బలహీనమై మన శరీరమునకు అనేక ఋగ్మతలను కలిగించి ఈ లోకరీత్యా వారి మరణమునకు కారణమై, వారి జీవిత కాలమునకు ముందే శరీరములోని కొన్ని భాగాలను చెడగొట్టి వారు మరణము పొందునట్లుగా చేయును.  ఇక అదే పాపము ఆత్మను వెంబడించును అని మనము వేదమునందు చదువగలము.  ప్రకటన 14:13, ''అంతట-ఇప్పటినుండి ప్రభువునందు మృతి నొందు మృతులు ధన్యులని వ్రాయుమని పరలోకమునుండి యొక స్వరము చెప్పగా వింటిని.  నిజమే;  వారు తమ ప్రయాసములు మాని విశ్రాంతి పొందుదురు;  వారి క్రియలు వారి వెంట పోవునని ఆత్మ చెప్పుచున్నాడు.''  ఈ పాపము ఆత్మను వెంబడించి వారి ఆత్మకు రకరకములైన జాడ్యములు అనగా జబ్బులకు కారణమగుచున్నది.  అదే కొద్దిపాటి పాపము చేయనివారికి ఈ ఋగ్మతలు జబ్బులు వుండవు.  కొద్దిపాటి పాపములు చేసినవారు వారి పాపములకు శిక్షను అనుభవించి పరలోకమునకు వెళ్ళినప్పుడు వారు జీవవృక్షములో పాలిపంపులు కలిగి వారి ఆత్మకు ఉన్న బలహీనత లేక జబ్బులను తొలగించుటకు జీవవృక్షపు ఆకులను ఉపయోగించుట జరుగును.  ప్రకటన 22:2, ''ఆ పట్టణపు రాజవీధిమధ్యను ప్రవహించుట ఆ దూత నాకు చూపెను.  ఆ నదియొక్క ఈవలను ఆవలను జీవవృక్షముండెను; అది నెలనెలకు ఫలించుచు పండ్రెండు కాపులు కాయును.  ఆ వృక్షముయొక్క ఆకులు జనములను స్వస్థపరచుటకై వినియోగించును.''  పరలోక రాజ్యములో జబ్బులు వుండవు.  అయితే స్వస్థపరచుటకై జీవవృక్షపు ఆకులతో సంబంధమేమున్నది?  కనుక పాపానికి శిక్ష అనుభవించినను వారిలో బలహీనతలు పోవు.  అవి పోవుటకు పరలోకములోని జీవవృక్షపు ఆకులను ఉపయోగించుకోవాలి.  అలా ఉపయోగించుకొన్నవారికి ఆత్మ స్వస్థత పొంది బలహీనతను పోగొట్టుకొని బలమైన స్థితిలో జీవించును.

శరీరాత్మల బలహీనతలకు కారణము పాపము.  శరీరమునకు వచ్చిన బలహీనత వాని జీవితకాలము కియ్ర జరిగించి వాని మరణముతో అంతమగును.  ఆత్మకు వచ్చిన బలహీనత పరలోకములోని జీవవృక్షపు ఆకులతోనే అంతమగును

        అయితే జీవితాంతము నరహత్యలు, వ్యభిచారము, దొంగతనము మొదలైనవి చేయుచూ పరిశుద్ధులకు వ్యతిరేకముగా పోరాడి వారిని హత్య చేసినవారికి శిక్ష బహుకాలము వుండును.  వీరు రెండవ మరణము ద్వారా అగ్నిగుండములో బాధపడుచుందురు.  ప్రకటన 21:8, ''పిరికివారును, అవిశ్వాసులును, అసహ్యులును, నరహంతకులును, వ్యభిచారులును, మాంత్రికులును, విగ్రహారాధకులును, అబద్ధికులందరు అగ్ని గంధకములతో మండు గుండములో పాలుపొందుదురు;  ఇది రెండవ మరణము.''  అలా పరిశుద్ధాత్మను దూషించిన వారికి ఈ యుగమునందును తరువాత యుగమునందును పాపక్షమాపణ లేదు.  మత్తయి 12:31-32, ''కాబట్టి నేను మీతో చెప్పునదేమనగా-మనుష్యులుచేయు ప్రతి పాపమును దూషణయు వారికి క్షమింపబడును గాని ఆత్మ విషయమైన దూషణకు పాప క్షమాపణ లేదు.  మనుష్యకుమారునికి విరోధముగా మాటలాడువానికి పాపక్షమాపణ కలదుగాని పరిశుద్ధాత్మకు విరోధముగా మాటలాడువానికి ఈ యుగమందైనను రాబోవు యుగమందైనను పాపక్షమాపణ లేదు.''  వారిలో కొంచెము పుణ్యము కూడా ఉండనివారు.  వీరి శిక్షాకాలము పూర్తి అగు సరికిని మరియొక సృష్టికి మరొక యుగమునకు భూమి సిద్ధపరచబడును.  కనుక వారు పరలోకములో ప్రవేశించుట, వారి ఆత్మకు జీవవృక్షపు ఆకులను ఉపయోగించుకొని స్వస్థత పొందు సమయము వారికి దొరకదు.  శిక్షాకాలము పూర్తి అయిన వెంటనే వీరు అగ్నిగుండము నుండి పరలోకమునకు చేర్చబడుట, అటుతరువాత జీవగ్రంథములో వ్రాయబడి భూమి మీదకు పంపుట జరుగును.  వారి ఆత్మకు ఏర్పడిన బలహీనతలను స్వస్థపరచుకొను సమయము వారికి దొరకదు.  కను వీరియొక్క ఆత్మ బలహీన స్థితిలోనే వుండి, మరల జన్మను పొందుచున్నది.  కనుక వీరి ఆత్మ వైకల్యము కల్గియున్నది కనుక ఆ వైకల్యమును బట్టి వారి పుట్టుకలో లోపములు సంభవించునని గ్రహించాలి.  ఉదా :-  1. గొఱ్ఱెలుగా చెప్పబడిన ఇశ్రాయేలీయులు.  2.  మేకలుగాను కుక్కలుగాను చెప్పబడిన అన్యులు.  కొందరు క్రైస్తవులుగా పుట్టుచున్నారు.  కొందరు అన్యులుగా పుట్టుచున్నారు.  అందరు సమాన రీతిలో జన్మించక పోవుట వారు పొందిన ఆత్మ బలహీనతలని గ్రహించాలి.  పరిశుద్ధాత్మను దూషించి మరల ఏర్పాటు చేసిన మరో యుగములో మంచి క్రైస్తవునిగా ఎలా జన్మించగలరు?  అలాగే జీవితాంతము నరహత్యలు, వ్యభిచారము వంటివి చేస్తూ మరో యుగములో దేవుని బిడ్డగాను సరియైన పుట్టుకలో లోపము లేని ఆత్మను శరీరమును ఎలా పొందగలము?  ఆత్మలలోని లోపము శరీర రీత్యా అనేక లోపాలకు కారణమగును కదా!  దేవుడు జీవాత్మను లోపములు కలదిగా చేయలేదు.  అలాగే జీవాత్మ శరీరమును కుంటి, గ్రుడ్డిగా చేయలేదు.  తన పోలిక తన స్వరూపము చొప్పున నరుని చేయాలని చేశారు.  ఆదికాండము 1:26, ''దేవుడు-మన స్వరూపమందు మన పోలికె చొప్పున నరులను చేయుదము; వారుసముద్రపు చేపలను ఆకాశ పక్షులను పశువులను సమస్త భూమిని భూమి మీద ప్రాకు ప్రతి జంతువును ఏలుదురుగాకనియు పలికెను.''  కనుక ఈ ఆత్మలోని లోపాలు మనము చేసిన పాపముల వలన సంభవించి దేవుని క్రియలుగా చెప్పబడు జీవవృక్షపు ఆకులతో స్వస్థత లభించక మరో సృష్టిలో మరో యుగములో జన్మించుటలో ఆ ఆత్మలోని లోపము మనము గతములో పొందిన స్థితి మన శరీరముపై ప్రభావము చూపి మన శరీరములో అనేక లోపాలకు కారణమగుచున్నది.  క్రీస్తు ప్రభువును అంగీకరించక పోవుట ఇన్ని అనర్థాలకు కారణము.  అంగీకరించినవారు జీవవృక్షపు ఆకులతో స్వస్థత కల్గి మరో సృష్టిలో పవిత్ర స్థితిలో జన్మించుట జరుగును.  కాబట్టి నరుని శరీరములో కన్పించు అసమానతలు మన ఆత్మలో పాపము వలన కల్గినవని గుర్తించి క్రీస్తు ప్రభువుని అంగీకరించుట ద్వారా అన్ని అనర్థాల నుంచి మన ఆత్మను రక్షించుకొనగలము.  ఇందులో మనము గుర్తించవలసినవి మూడు  . . .                            1.  పరిశుద్ధాత్మను దూషించి నందున పాప క్షమాపణ లభించక పోవుట        

        2.  తల్లిదండ్రులు చేసిన పాపము.  

        3.  గత సృష్టిలో వారు చేసిన పాపమునకు శిక్ష అనుభవించిన  ఆ శిక్షాకాలము పూర్తియైన తరువాత వారు పరలోకములో జీవవృక్షపు ఆకులు ద్వారా వచ్చు స్వస్థతకు సమయము లేకపోవుట.  

        ఈ మూడు కారణముల చేత వీరి ఆత్మ లోపముతో భూమిపై ఇలా జన్మించి అలాగే వారి శరీరములో పుట్టుకతో లోపములు కల్గి ఉంటున్నది.

5.  పుట్టుటకు మరణమునకు మధ్య

        పుట్టుక మన చేతులలో లేదు.  మన మరణము మన చేతులలో లేదు.  పుట్టినవారు పుట్టుచూనే వున్నారు.  మరణించేవారు మరణిస్తూనే వున్నారు.  మన జీవితములో ఈ పుట్టుక మరణములకు మధ్య మాత్రమే ఈ శరీర జీవితము వుంటుంది.  పుట్టుకకు ముందు ఆత్మ రూపములో జీవితము.  మరణము తరువాత ఆత్మ రూపములోనే జీవితము.  కాని ఈ రెంటి మధ్య అనగా పుట్టుక మరియు మరణముల మధ్య జీవితము భౌతిక శరీరముతో వుంటుంది.  ఈ కాలములో మనిషి శిశువుగా పుట్టుట, మంచిచెడ్డల జ్ఞానమును పొందుట, పరిణతి చెందినవాడుగా ఇంకొకరిని వివాహమాడి మరియొక శిశువుకు లేక మరికొందరి శిశువులకు జన్మనిచ్చుట జరుగుతుంది.  అటుతరువాత వృద్ధాప్యము తరువాత మరణము.  ఇవి నరుని జీవితములో ముఖ్యమైన సంఘటనలు.  ఏ కాలము వారైన, ఏ ప్రాంతము వారైనా పై విధముగానే వారి జీవితము వుంటుంది.  సంసార జీవితము వద్దు అనుకొని జీవించేవారు మరి కొందరు వున్నారు.  వారికి వివాహము, నూతన శిశు జన్మ వారి జీవితములో వుండదు.

        అయితే నరుడు పుట్టిన తరువాత శిశు దశలో ఏ విధమైన కార్యములు చేసుకోలేని స్థితిలో మరియొక నరునిచే మోయబడుచు కాలమును గడుపును.  అటుతరువాత మంచిచెడు తెలుసుకొనుచూ ఒక జ్ఞానిగా ఎదుగును.  ఇందులో మనము ఒక విషయమును తెలుసుకొనవలసి యున్నది.  అదేమిటంటే ప్రతి ఒక్కరి జీవితము బహు రహస్యమైనదే.  ఎవరికి వారే వారి జీవితములో రాజు లేక రాణియైనను ఎవరిని తక్కువగా అంచనా వేయకూడదు.  ఎవరి జీవితమును మనము పరికించి చూచిన ఎన్నో రహస్యములు అందులో కనిపిస్తాయి.  దీనికి అనేక రకములైన కారణాలు కూడా మనము చెప్పవచ్చును.  ఏది ఏమైనప్పటికి ఈ పుట్టుకకు మరణమునకు మధ్య ఈ జీవితము దానిలోని స్థితి తరువాత వుండే ఆత్మ జీవితమునకు పునాది.  ఈ శరీర జీవితములో పుట్టిన ప్రతి నరుడు వాని మరణము వరకు చేయు కార్యములు వ్రాస్తూ పోతే ప్రపంచమంతయు ఇలాంటి చరిత్ర పుస్తకాలతోనే నిండిపోవును.  అందుకే నేను ప్రతి ఒక్కరిని  ఒక రాజు లేక రాణి అని చెప్పాను.  వీటి గురించి ఈ పుస్తకములో వ్రాయుట లేదు గాని ఇలాంటి నరునియొక్క మరణమును గూర్చి ఇక ఒకదాని తరువాత ఒకటిగా తెలుసుకొందము.

6.  మరణమునకు మూలకారణము

        ఆదామును దేవుడు నేల మంటితో సృజించి ఏదెను వనములో ఆయనను వుంచినప్పుడు మరణము అనేది లేదు.  ఎన్ని సంవత్సరములు ఆదాము హవ్వలు ఏదెనులో జీవించారో వ్రాయబడలేదు.  అయితే దేవుడు ఆదామునకు మరణమును గూర్చి తెలియజేసాడు.  ఆదికాండము 2:17, ''అయితే మంచి చెడ్డల తెలివినిచ్చు వృక్ష ఫలములను తినకూడదు;  నీవు వాటిని తినుదినమున నిశ్చయముగా చచ్చెదవని నరుని కాజ్ఞాపించెను.''  కాని ఆదికాండము 3వ అధ్యాయములో సాతాను సర్పము ద్వారా బోధించిన బోధకు హవ్వలోనై దేవుడు తినవద్దన్న పండును తిని పాపము చేసింది.  అంతేకాకుండా ఆదాముకు ఆ పండ్లను ఇచ్చి తినిపించి ఆదాముతో పాపము చేయించింది.  ఈ విధముగా దైవాజ్ఞను మీరి మొదట ఆత్మరీత్యా మరణమును పొందారు.  కాని ఆదికాండము 3:19, ''నీవు నేలకు తిరిగి చేరువరకు నీ ముఖపు చెమట కార్చి ఆహారము తిందువు;  ఏలయనగా నేలనుండి నీవు తీయబడితివి;  నీవు మన్నే గనుక తిరిగి మన్నైపోదువని చెప్పెను.''  ఈ విధముగా ఆదాము చేసిన తప్పుకు నరులకు శిక్ష వచ్చినది.  ఆదాము శాపగ్రస్తుడుగా మారి మరణమును తెచ్చుకొన్నాడు.  ఇంతకి మరణమునకు మూలకారణము  దైవశాపము.  ''నీవు మన్నే గనుక తిరిగి మన్నై పోదువని చెప్పెను.''  

నిషేధఫలమా - దైవాజ్ఞ మీరుటయా- దైవశాపమా - పాపమా ఏది మరణమునకు మూల కారణం?

        ఈ క్రియ మరణము ద్వారా మాత్రమే సంభవించునని గ్రహించాలి.  మన శరీరము మట్టి నుండి తియ్యబడినది కనుక తిరిగి మట్టిలోనికి వెళ్ళవలసియున్నది.  ఇది దైవశాపము.  ఇలా వెళ్ళుట ఒక్క మరణము ద్వారా మాత్రమే సాధ్యము.  ఇటువంటి శాపమునకు కారణము నరుడు దైవాజ్ఞను మీరుట - దేవుని ఆజ్ఞను మీరుట పాపము అని బైబిలు గ్రంథము చెప్పుచున్నది.  కనుక దైవాజ్ఞ మీరుట పాపము, తద్వారా దైవశాపమును పొందుట మరణము ఈ లోకములో ప్రవేశించుటకు ముఖ్య కారణమైనది.  కనుక నరుని పాపము - మరణమునకు మూలకారణమైనది.  అయితే ఏ పాపము చేయని క్రీస్తు ప్రభువు ఎందుకు మరణించెనని మనము అనుకోవచ్చును.  క్రీస్తు ప్రభువు మరణము మన కొరకేగాని ఆయన పాపము చేసి కాదు.  క్రీస్తు ప్రభువు తన ప్రాణమును మన కొరకు మచ్చలేని బలిపశువుగా అర్పించి తిరిగి తీసుకొని, తన అర్పణతో మనలను  పాప విముక్తులుగా చేసాడు.  తన రక్తముతో మనకు విడుదల కల్గించాడు.  అందుకే - ప్రకటన 5:9, ''ఆ పెద్దలు-నీవు ఆ గ్రంథమును తీసికొని దాని ముద్రలను విప్పుటకు యోగ్యుడవు, నీవు వధింపబడినవాడవై నీ రక్తమిచ్చి, ప్రతి వంశములోను, ఆయా భాషలు మాటలాడువారిలోను, ప్రతి ప్రజలోను, ప్రతి జనములోను, దేవునికొరకు మనుష్యులను కొని, మా దేవునికి వారిని ఒక రాజ్యముగాను యాజకులనుగాను చేసితివి;  గనుక వారు భూలోకమందు ఏలుదురని క్రొత్తపాట పాడుదురు.''  కనుక క్రీస్తు మరణము వలన మనము దేవుని ప్రజలుగా వుండుటకు కొనబడ్డాము.  ప్రకటన 7:13-14, ''పెద్దలలో ఒకడు-తెల్లని వస్త్రములు ధరించుకొనియున్న వీరెవరు?  ఎక్కడనుండి వచ్చిరని నన్ను అడిగెను.  అందుకు నేను-అయ్యా, నీకే తెలియుననగా అతడు ఈలాగు నాతో చెప్పెను-వీరు మహా శ్రమలనుండి వచ్చిన వారు; గొఱ్ఱెపిల్ల రక్తములో తమ వస్త్రములను ఉదుకుకొని వాటిని తెలుపుచేసికొనిరి.''  కనుక వీరు గొఱ్ఱెపిల్లయైన క్రీస్తు రక్తములో తమ పాపపు వస్త్రమును ఉదికి ప్రక్షాళన చేసికొని దేవునిలో ఎన్నికయై, పరలోక రాజ్య వారసులుగా మారిరని గ్రహించాలి. కనుక పాపము వలన మరణము సంభవించినది.  రోమా 6:23, ''ఏలయనగా పాపము వలన వచ్చు జీతము మరణము, అయితే దేవుని కృపావరము మన ప్రభువైన క్రీస్తుయేసునందు నిత్యజీవము.'' కనుక పాపము చేయు ప్రతివాడు మరణమును పొందును.  ఈ మరణము దేవుడు ఇచ్చిన శిక్ష.  అయితే పాపము చేయక పవిత్ర జీవితమును జీవించువాడు మొదటి మరణమును పొందినను నీతి విషయమై క్రీస్తు ప్రభువు తిరిగి లేపునని గుర్తించాలి.

        ఇక్కడ - మనకు ఒక సంశయము ఏర్పడవచ్చును.  అదేమిటంటే, పాపము చేసినవారు - పాపము చేయనివారు ఇద్దరు మరణిస్తున్నారు కదా!  అయితే మరణమునకు మూల కారణము పాపమేనా?  అన్న సంశయము మనకు కలుగవచ్చును.  క్రీస్తు ప్రభువు చెప్పిన లాజరు ధనవంతుని ఉపమానములో ధనవంతుడు పాపము చేసినవాడు.  లాజరు పాపము చేయనివాడు.  కనుక లాజరు అబ్రాహాము రొమ్మున ఆనుకొని సేద తీరుతూ స్వేచ్ఛా జీవితము పొందుచున్నాడు.  ప్రకటన 6:9, ''ఆయన అయిదవ ముద్రను విప్పినప్పుడు, దేవుని వాక్యము నిమిత్తమును, తాము ఇచ్చిన సాక్ష్యము నిమిత్తమును వధింపబడినవారి ఆత్మలను బలిపీఠము క్రింద చూచితిని.''  వీరు క్రీస్తు కొరకు మరణమును పొందినవారు.  వీరు బలిపీఠము క్రింద విశ్రాంతిలో వున్నారు.  కనుక వీరికి వేదనలేని జీవితము ఆత్మకు అందించబడును.   అయితే పాపములో మరణించినవానికి ధనికునివలె వేదనలో జీవించాలి.  దీనినే మరణము అని అంటారు.   యోహాను 11:25-26, ''అందుకు యేసు-పునరుత్థానమును జీవమును నేనే;  నాయందు విశ్వాసముంచువాడు చనిపోయినను బ్రదుకును;  బ్రదికి నాయందు విశ్వాసముంచు ప్రతివాడును ఎన్నటికిని చనిపోడు.  ఈ మాట నమ్ముచున్నావా?  అని ఆమెను నడిగెను.''  కనుక పాపము చేయక క్రీస్తు ప్రభువులో మరణించిన ఆత్మ జీవముతోనే తిరుగునని గ్రహించాలి.  పాపము చేసి క్రీస్తులో జీవించని ఆత్మ మరణ బంధకములలో పాతాళలోకములో బంధింపబడి యుండును.  కనుక మరణమునకు మూలకారణము పాపమని గ్రహించి పశ్చాత్తాపము క్రీస్తునందు మారుమనస్సు పొంది క్రీస్తు రక్తములో మన పాపపు జీవితమును ఉతికినట్లైతే, మనము పరిశుద్ధులుగా మారి పాపము వలన వచ్చు నిత్యబంధకమైన మరణమును దాటగలమని గ్రహించాలి.

7.  ఈ సృష్టిలో మొదటి మరణమునకు ముందు

        ఆదికాండము 1వ అధ్యాయములో దేవుడైన యెహోవా సమస్తమును సృజించెను అనగా భూమిని, ఆకాశమును, గ్రహమును, నక్షత్రములను, సూర్యుడు, చంద్రుడు, పక్షులు, జలచరములు, జంతువులు, మొదలైనవన్నింటిని సృజించారు.  ఈ సమస్తము సృజించిన తరువాత ఏదెను వనమును దేవుడు భూమి మీద వేసాడు.  అటు తరువాత ఏదెను వనమునకు వెలుపల మట్టితో నర శరీరమును చేసి దానిలో జీవాత్మను ఊదగా నరుడు జీవాత్మగా మారాడు.  ఇది మొదటి నరునియొక్క నిర్మాణము.  ఆది 2:7, ''దేవుడైన యెహోవా నేలమంటితో నరుని నిర్మించి వాని నాసికారంధ్రములలో జీవవాయువును ఊదగా నరుడు జీవాత్మ ఆయెను.''  ఈ మొదటి నరుడు - దేవుని పోలిక, స్వరూపము చొప్పున సృజించబడినాడు.  

ఆది 1:26, ''దేవుడు-మన స్వరూపమందు మన పోలికె చొప్పున నరులను చేయుదము;  వారుసముద్రపు చేపలను ఆకాశ పక్షులను పశువులను సమస్త భూమిని భూమి మీద ప్రాకు ప్రతి జంతువును ఏలుదురుగాకనియు పలికెను.''  ఇది మొదటి నరునియొక్క నిర్మాణము.  ఇతని పేరు ఆదాము అనగా ఎఱ్ఱమన్ను అని అర్థము.  అటు తరువాత దేవుడు ఎఱ్ఱమన్నైన ఆదాము చేత సమస్త సృష్టికి పేర్లు పెట్టించాడు.  సమస్త సృష్టిలో అతనికి సాటి సహాయము లేకపోయెనని దేవుడైన యెహోవా అనుకొని వానికి గాఢనిద్రను కలిగించి వాని ప్రక్కటెముకనుంచి నారిని సృజించాడు.  ఆది 2:21-23, ''అప్పుడు దేవుడైన యెహోవా ఆదామునకు గాఢనిద్ర కలుగజేసి అతడు నిద్రించినప్పుడు అతని ప్రక్కటెముకలలో ఒక దానిని తీసి ఆ చోటును మాంసముతో పూడ్చి వేసెను.  తరువాత దేవుడైన యెహోవా తాను ఆదాము నుండి తీసిన ప్రక్కటెముకను స్త్రీనిగా నిర్మించి ఆమెను ఆదాము నొద్దకు తీసికొనివచ్చెను.  అప్పుడు ఆదాము ఇట్లనెను - నా యెముకలలో ఒక యెముక  నా మాంసములో మాంసము  ఇది నరునిలోనుండి తీయబడెను గనుక నారి అనబడను.''  ఇప్పటికి మరణము లేదు.  అటుతరువాత దేవుడైన యెహోవా తినవద్దన్న పండు తిని పాపము శాపమును పొందాడు.  తరువాత ఆదాము హవ్వతో శయనించి కయీనును, తరువాత హేబెలును కన్నారు.  ఇప్పటిదాక నరుడు అనగా శరీరముతో వున్న నరుడు చనిపోలేదు. అటుతరువాత అర్పణను ఇద్దరు తెచ్చారు.  దేవుడైన యెహోవా హేబెలు అర్పణను లక్ష్యముంచుట చేత కయీనుకు హేబెలుపై కోపము వచ్చింది.  ఆది 4:8, ''కయీను తన తమ్ముడైన హెబెలుతో మాటలాడెను.  వారు పొలములో ఉన్నప్పుడు కయీను తన తమ్ముడైన హేబెలు మీద పడి అతనిని చంపెను.'' మనమనుకొన్న మొదటి మరణముయొక్క సంఘటన రానే వచ్చింది.  ఈ మరణము సహజ మరణము కాదు.  హేబెలు యేండ్లు మీరి మరణించినవాడు కాడు.  పసి వయస్సులో తన అన్నయైన కయీనుచే కొట్టబడి మరణమును రుచి చూచాడు.  ఈ మరణము శరీర మరణములలో మొదటి మరణము.  ఈ సంఘటనలో వున్న మనుష్యులు నలుగురు.  ఆ నలుగురులో ఆదాము, హవ్వ, కయీను, మరియు హేబెలు.  వీరిలోనే పాపము కార్యము జరిగించి హేబెలు హత్యకు కారణమైంది. ఆదాము హవ్వ వీరికి మొదటి సంతానము కయీను.  రెండవ సంతానము హేబెలు.  వీరి తరువాత షేతు అను కుమారుడు ఆదామునకు హవ్వకు పుట్టుట జరిగింది.  ఆదాము షేతును కను నాటికి ఆదామునకు 130 సంవత్సరములవాడు.  ఆదాము పుట్టినప్పటి నుండి సుమారు 130 సంవత్సరముల లోపలే హేబెలు హత్య జరిగి మరణించుట జరిగింది.  ఇందులో తల్లిదండ్రి అన్నలకన్నా ముందే హేబెలు మరణించుట జరిగింది.  ఈ మరణము క్రీస్తు ప్రభువునకు సాదృశ్యముగా చెప్పబడినది.  హెబ్రీ 12:24.

        అటు తరువాత అనేకులు సహజ మరణమును రుచి చూచారు.  అనేకులు చంపబడ్డారు.  ఆత్మహత్యలు జరిగించుకొన్నారు.  వీటన్నిటి గురించి వివరముగా తెలుసుకొందము.

8.  మరణవేదన

        మనుష్యులు పుట్టుచున్నారు.  కాలాలు గతించి పోవుచున్నవి.  ఈ మరణవేదన పొందువారు తమకు తెలియకనే భీతిని పొందుచున్నారు.  ఈ మరణవేదన ఒక్కొక్కరికి ఒక్కో విధముగా వుంటుంది.  కాని అది ఏవిధముగా వారు అనుభవము పొందినప్పటికిని అది మరణవేదనే.

క్రీస్తు ప్రభువు తన చెమట రక్తముగా వచ్చునంతగా మరణవేదన పొందెను

        ముఖ్యముగా యేసుక్రీస్తు విషయములో - ఆయన తన సిలువ బలియాగమునకు ముందు గెత్సేమనె తోటలో మరణవేదన పొందాడు.  ఆయన రక్తము చెమటగా కారునంతగా వేదన అనుభవించుట జరిగింది.  ఇది ప్రతి ఒక్కరికి తెలిసిన విషయమే.  లూకా 22:44, ''ఆయన వేదనపడి మరింత ఆతురముగా ప్రార్థన చేయగా ఆయన చెమట, నేల పడుచున్న గొప్ప రక్త బిందువులవలె ఆయెను.''  ఇందులో ఆయన వేదన పడినట్లుగా వ్రాయబడింది.  ఇలా ప్రతి ఒక్కరికి తమ మరణము పలాని విధముగా జరుగును అని తెలిసిన వారి వేదన మనము వర్ణించలేము.  సాక్షాత్తు దేవుని కుమారుడైన క్రీస్తు ప్రభువు మరణవేదన పడి తనలోని చెమట రక్త బిందువులవలె వచ్చెనని చెప్పబడింది. మనము మరణించుదుమన్న సంగతి తెలిసిన మనలో మరణవేదన కలుగును.  నా 70 సంవత్సరముల జీవితములో అనేకులు మరణవేదన పడుట చూచాను.  కాని వారి వేదన ఒక్కొక్కరిలో ఒక్కొక్క విధముగా వున్నది.  ఇలానే వుండునని ఎవరి విషయములోను చెప్పలేము.  కాని క్రీస్తు ప్రభువుయొక్క మరణవేదన నరులందరికన్నా తీవ్రమైనదని మనము గ్రహించాలి, ఎందుకంటే నా జీవిత కాలములో మరణవేదన పడు నరులను అనేకులను చూచానుగాని వారి రక్తము చెమట రూపములో వచ్చునంతగా వేదనపడిన వారు ఎవ్వరూ లేరు.  

        చెమట పట్టుట క్రీస్తు ప్రభువులోని తీవ్రమైన ఆలోచనా పట్టుదలను మనకు చూపుచున్నది.  రక్తబిందువులవలె పడుట ఆవేదనలో ఆయన పడిన మానసిక సంఘర్షణయొక్క తీవ్రతను సూచిస్తున్నది.  కనుక క్రీస్తు ప్రభువు ఈ మరణవేదనను పొందినను దానినుండి పారిపోవుటకు ప్రయత్నించలేదు.  అంటే ఈ మరణమును గూర్చి వేదనపడి దానిని తప్పించుకొనుటకు ప్రయత్నింపక ధైర్యముతో ఎదుర్కొని సిలువ బలియాగము ద్వారా మరణించినట్లుగా గ్రహించాలి.  క్రీస్తు ప్రభువు పొందిన మరణము చాలా దారుణమైనది.  నరులు ఆయనను అనేక విధములుగా అవమానించారు.  ఆయన మీద ఉమ్మి వేయుట కూడా చేసారు.  అంటే ఒక దైవకుమారుడు, ఉన్నత స్థానములో ఉన్నవాడు, ఇంత ఘోరాతిఘోరమైన మరణమును పొందవలసి యున్నది అన్న 'సత్యము' వేదనకు గురి చేస్తున్నది.  ఇలా వారి మరణము కొందరికి ముందుగానే దేవుని చేత తెలియజేయబడునని గుర్తించాలి.  అలాగే మరణకరమైన వ్యాధితో బాధపడువారు తాము కొన్ని దినములలో మరణించుదుమని తెలిసి వేదనపడుట మనము చూస్తున్నాము.  వారు డాంబికముగా కనబడినను లోలోన ఏమగునో అన్న వేదన వారిలో మరికొంత కృంగదీసి వారిని త్వరగా మరణమునకు అప్పగించును.  ఈ వేదన కలిగినవారికి ఆకలి నశించి వారిని బలహీనులుగా చేయును.  కనుక వారు త్వరగా మరణించుట జరుగును.  వీరికి కలుగు వేదన తెలియనిది లేక ఏమగునో అన్న వేదన.  కాని క్రీస్తు ప్రభువుకు కలిగిన వేదన తెలిసినది.  తరువాత తాను ఎక్కడికి వెళ్ళబోవుచున్నాడో ఆయనకు తెలియును.  అయినను తాను పొందబోవు మరణము చాలా హింసతో కూడినది కనుక ఆయన వేదన పడినాడు.  అంతేగాని, ఆయన పిరికివాడుగా తప్పించుకొనాలని ప్రయత్నము చేయలేదు.  అయితే మరణకరమైన జబ్బులతో బాధపడువారు, వారు మరణించుదురని ముందుగా తెలిసి వారు వేదన పడుదురు.  ఈ వేదనకు కారణము తప్పించుకోవాలన్న ప్రయత్నమే అని గుర్తించాలి.  అనగా తాను మరణించకూడదని సకల విధములుగా ప్రయత్నించుట మనము చూస్తున్నాము.  తన జీవిత కాలములో లేని మరచితనము ఆ కొద్దిరోజులలో చూపించుదురు.  దీనికి కారణము ఎలాగైన బ్రతకాలని ఆశ.  దైవ ప్రార్థనలలో కాలము గడుపుటకు ఎక్కువగా ప్రయత్నము చేయును.  కాని ఫలితము మాత్రము చాలావరకు మరణమే.  ఎందుకంటే ముందు కాలములోని వారి జీవితము చాలావరకు వారి శరీరమును దెబ్బ తీయుట వలన దాని స్థితి మరణమునకు దారి తీసి యుండును.  కనుక తిరిగి దానిని నిలబెట్టవలెనన్న ప్రయత్నము చాలావరకు విఫలము అగుట మనకు కనబడుచున్నవి.  

        ఇలా ప్రతి ఒక్కరిలో మరణవేదన అనేది కనబడుచున్నది.  దీనికి కారణము వీరికి వీరి శరీరము మీద వున్న ఆశ.  ఈనాడు ఎవ్వరినైనా మనము వాని మరణము గురించి మాట్లాడిన వారు దు:ఖితులగుట చూస్తున్నాము.  దీనికి కారణము తెలియని స్థితి అని మనము గుర్తించాలి.

9.  ప్రతి ఒక్కరికి తప్పని మరణము

         ఏదెను వన చరిత్రలో ఆదాము దైవాజ్ఞ మీరి దైవశాపమును పొంది మరణము సంపాదించాడు.  అయితే అప్పుడు దైవాజ్ఞను మీరినది ఆదాము కదా!  మనకెందుకు మరణము సంభవించుచున్నది అని మనము అనుకొనవచ్చును.  దేవుడు శపించినది ఆదామునే, అయితే దైవశాపము మూలముగా ఆదాము శరీరము అతనిలోని ఆత్మ సమస్తము శాపగ్రస్థముగా మారుట జరిగింది.  అటుతరువాత ఆదాము హవ్వను కలసి కయీనుకు జన్మనిచ్చారు.  అంటే కయీనును దేవుడు వేరుగా సృష్టించలేదు.  

శాపగ్రస్థ శరీరము నుండి శాపగ్రస్థ శరీరము గాక పవిత్ర శరీరము ఏలాగు వచ్చును?

కయీను ఆదాము హవ్వల శారీరక కలయికలో వారి ఇరువురు బీజముల ద్వారా పిండముగా ఏర్పడి, భూమి మీద ప్రసవింపబడినాడు.  కనుక, ఈ బీజములు శాపగ్రస్థమైన ఆదాము హవ్వలలోనివే గదా!  కనుక ప్రతి ఒక్క నరుని శరీరము శాపగ్రస్థమై యున్నది.  కనుక భూమి మీద పుట్టిన ప్రతి నరుని శరీరము శాపగ్రస్థమైనదే కాని ఆత్మ దైవ సన్నిధి నుండి ప్రతి నరుని శాపగ్రస్థ శరీరములోనికి పంపుట చేత ఆత్మ శరీరముతో పోరాటము చేసి పవిత్ర జీవితము జీవించాలని ప్రయత్నిస్తున్నది.  కాని ఈ శరీర వాంఛలు ఆత్మయొక్క కోరికను నెరవేరనియ్యక ఒకదానికొకటి వ్యతిరేకముగా కార్యములు చేయుచూ చివరకు ఆత్మను నాశనకర మార్గమునకు నడిపించుచున్నది.  గలతీ 5:17, ''శరీరము ఆత్మకును ఆత్మ శరీరమునకును విరోధముగా అపేక్షించును.  ఇవి యొకదానికొకటి వ్యతిరేకముగా ఉన్నవి గనుక మీరేవిచేయ నిచ్ఛయింతురో వాటిని చేయకుందురు.''  మత్తయి 26:41, ''మీరు శోధనలో ప్రవేశించకుండునట్లు మెలకువగా ఉండి ప్రార్థనచేయుడి; ఆత్మ సిద్ధమే గాని శరీరము బలహీనమని పేతురుతో చెప్పి''   కనుక శాపగ్రస్థమైన ఈ శరీరము ఏనాటికైనను మరణము రుచి చూడక తప్పదని గ్రహించాలి.  1 రాజులు 2:2, ''లోకులందరు పోవలసిన మార్గమున నేను పోవుచున్నాను;  

మనము విశ్వాసముంచిన క్రీస్తు ప్రభువు కూడా మన పాపముల కొరకు మరణించాడు

కాబట్టి నీవు ధైర్యము తెచ్చుకొని నిబ్బరము గలిగి,'' ఇందులో ఏలీయాను దేవుడు బేతేలునకు పొమ్మని చెప్పుచున్నాడు.  ఎందుకు?  ఈ లోకమును విడిచి వెళ్ళుట కొరకు.  అయితే ఏలీయా ఆత్మను పొందినవాడు కనుక తాను ఎక్కడికి వెళ్ళుచున్నాడో తనకు తెలియును.  అది ఎలీషా చూచి దు:ఖపడకూడదని ఏలీయా ఎలీషాను ఇక్కడే వుండమని నేను బేతేలుకు వెళ్ళుదునని  చెప్పుట జరిగింది.  కాని ఎలీషా ఇందుకు విరుద్ధముగా నేను నీతో కూడా వస్తానని చెప్పి ఏలీయాతో కూడా బేతేలునకు వెళ్ళాడు.  ఈ బేతేలునందు ఏలీయా సుడిగాలిలో ఆరోహణమై పోవుట జరిగింది.  ఇది దైవ నిర్ణయము.

        కీర్తన 89:48, ''మరణమును చూడక బ్రదుకు నరుడెవడు?  పాతాళముయొక్క వశము కాకుండ తన్నుతాను తప్పించుకొనగలవాడెవడు?''  ఇలా మరణమును ప్రతి ఒక్కరు పొందవలసినదేగాని దాని నుండి తప్పించుకొనుట అసాధ్యము.  అలాగే లూకా 2:26, ''అతడు ప్రభువుయొక్క క్రీస్తును చూడక మునుపు మరణము పొందడని అతనికి పరిశుద్ధాత్మచేత బయలుపరచబడి యుండెను;  ఆత్మవశుడై అతడు దేవాలయములోనికి వచ్చెను.''  సుమెయోనుకు క్రీస్తును చూడక మరణము పొందడని పరిశుద్ధాత్మ చేత బయల్పరచుట, దేవుడు మరణమును ప్రతి ఒక్కరికి వచ్చుటకు సమ్మతించినట్లుగా గుర్తించాలి.

        అయితే క్రీస్తు ప్రభువు తనయందు నమ్మకముంచినవాడు మరణమును పొందడని చెప్పుచున్నాడు.  యోహాను 8:51, ''ఒకడు నా మాట గైకొనినయెడల వాడెన్నడును మరణము పొందడని మీతో నిశ్చయముగా చెప్పుచున్నానని ఉత్తరమిచ్చెను.''  ఈ మరణము శరీర మరణమును గూర్చి కాదు.  ఇందులో చెప్పబడిన మరణము ఆత్మకు సంబంధించినది.  దీనినే రెండవ మరణమని చెప్పవచ్చును.  క్రీస్తునందు నమ్మిక వుంచినవారు మరణిస్తారు.  ఎలా?  శరీరరీత్యా కాని వారు సమాధానకరమైన పరదైసులలో నిత్యానందమును పొందుదురేగాని వేదన పొందుట వారికి యుండదు.  కాని అపరిశుద్ధులు వారు మరణించినప్పటి నుండి సాతాను చేత వారి ఆత్మ కొనిపోబడి పాతాళములో వారు బంధింపబడి వేదనను అనుభవించుదురు.  వారికి రెండవ మరణమును పొందుటకు యోగ్యులైనవారు.  కాని క్రీస్తు నందు విశ్వాసముతో ఆయన మాట చొప్పున జరిగించువారు ఈ రెండవ మరణము అనగా శాశ్వతమైన నిత్యమైన మరణము నుండి తప్పించబడుదురని క్రీస్తు ప్రభువు చెప్పుచున్నాడు.  క్రీస్తు ప్రభువు చెప్పిన మరణము ఆత్మ సంబంధమైనది.  ఇది తెలియని యూదులు - యోహాను 8:52, ''అందుకు యూదులు - నీవు దయ్యము పట్టినవాడవని యిప్పుడెరుగుదుము;  అబ్రాహామును ప్రవక్తలును చనిపోయిరి;  అయినను-ఒకడు నా మాట గైకొనినయెడల వాడు ఎన్నడును మరణము రుచిచూడడని నీవు చెప్పుచున్నావు.''  అని అనుచున్నారు.  కనుక శరీర మరణము ప్రతి ఒక్కరు పొందవలసినదే.

దూతలకన్నా కొంచెము తక్కువవానిగా క్రీస్తు ప్రభువు కూడా పుట్టుట

        క్రీస్తు ప్రభువు శరీరరీత్యా పుట్టినవాడు కాదు.  అయినను మరణించుట జరిగినది.  హెబ్రీ 2:9, ''దేవుని కృపవలన ఆయన ప్రతి మనుష్యుని కొరకు మరణము అనుభవించునట్లు, దూతలకంటె కొంచెము తక్కువవాడుగా చేయబడిన యేసు మరణము పొందినందున, మహిమాప్రభావములతో కిరీటము ధరించిన వానిగా ఆయనను చూచుచున్నాము.''  దూతల కంటే కొంచెము తక్కువవాడు ఎవడు?  నరులమైన మనమే కదా!  కీర్తన 8:4-5, ''నీవు మనుష్యుని జ్ఞాపకము చేసికొనుటకు వాడేపాటివాడు?  నీవు నరపుత్రుని దర్శించుటకు వాడేపాటివాడు?  దేవునికంటె వానిని కొంచెము తక్కువవానిగా చేసి యున్నావు.  మహిమా ప్రభావములతో వానికి కిరీటము ధరింపజేసి యున్నావు.''  ఇందులో నరులు దేవుని కంటె కొంచెము తక్కువవారుగా చేయబడినట్లుగా చెప్పబడినది.  దేవుడు సంపూర్ణమైనవాడు.  ఆయనకన్నా ప్రతి ఒక్కరు తక్కువవారే.  నరులుగాని దేవుని దూతలుగాని దేవునితో సమానులు కాలేరు.  ఆయనకన్నా తక్కువవారే!  హెబ్రీ 2:9లో చెప్పిన విధముగా దేవుని దూతలకు దేవునికి మరణము లేదు.  దేవుని దూతలకన్నా లేక దేవునికన్నా తక్కువవారుగా చేయబడిన నరులు మరణమును పొందుటకు భౌతిక శరీరమును కలిగియున్నారు.  అనగా వీరిపై మొదటి మరణము క్రియ జరిగించును.  కనుక నరులు దేవునికన్నా ఆయన దూతలకన్నా కొంచెము తక్కువవారుగా వున్నారు.  ఇటువంటి నరులలో ఒకరుగా క్రీస్తు ప్రభువు - ఆత్మ ద్వారా ఏర్పడినను కన్య మరియమ్మయొక్క గర్భములో పిండముగా రూపొందినవాడు.  కనుక నరుల శరీరము నుండి వచ్చిన కన్య మరియమ్మ శరీరము నుండి క్రీస్తు శరీరము ప్రసవించబడినది.  కనుక మనుష్యుల శరీరము వంటి శరీరమును క్రీస్తు ప్రభువు మనుష్య సంబంధముగా పొందియున్నాడు.  కనుకనే దూతలకన్నా కొంచెము తక్కువవానిగా క్రీస్తు పుట్టెనని చెప్పుట జరిగింది.  ఈ విధముగా దేవుడు క్రీస్తు ప్రభువును దేవదూతలకన్నా తక్కువవానిగా చేయుట ద్వారా ఆయన మనందరి కొరకు బలియాగము చేసి మరణించుట జరిగింది.  లేని పక్షములో ఈ సిలువ బలియాగము జరుగుట అసంభవమని గుర్తించాలి.  మనందరి కొరకు అనగా మనలను పాపము నుండి విమోచించుట కొరకు, క్రీస్తు ప్రభువు తననుతాను తగ్గించుకొని ఈ లోకములో నివసించి, ధర్మశాస్త్ర ప్రియుల ద్వారా ద్వేషింపబడి చివరకు సిలువపై మరణమును అనుభవించారు.  కనుక మొదటి మరణము శరీరరీత్యా వచ్చునది కనుక అది ప్రతి ఒక్కరు అనుభవింపక తప్పదు.

10.  చిన్నపిల్లల మరణము

        అభముశుభము తెలియనివారు చిన్నపిల్లలు.  అనగా తల్లి గర్భములో వేయబడినది మొదలు 5 సంవత్సరముల లోపల పిల్లలు మంచి చెడు తెలియనివారు.  వీరు మరణించుట మనము చూస్తున్నాము.  గర్భపాతముద్వారా అనేకమంది ఆడశిశువులను చంపుచున్నారు.  చట్టబద్ధమైన గర్భస్రావాలంటూ మరికొందరిని చంపుచున్నారు.  పుట్టిన బిడ్డ జబ్బులతో చనిపోవుచున్నారు.  హత్య కావింపబడుచున్నారు.  ఇలా ఎందుకు జరుగుచున్నది?

        ఈనాడు గర్భస్త్రావము చేయించుకొనుట సర్వసాధారణమై యున్నది.  దీనికి కారణాలు చాలా విచిత్రముగా చెప్పుదురు.  కొందరు ఆడపిల్ల కాబట్టి మాకు వద్దనుకొన్నాము.  మరికొందరు ఇప్పుడు బిడ్డ వద్దని అనుకొన్నాము, ఇలా అనేక రకములైన కారణాలు చెప్పుదురు.  కాని వారు ఒక బిడ్డను చంపుచున్నారని నరహత్య చేయుచున్నారని అనుకోరు.  తమ కామవాంఛ కోసము చేసిన ప్రయత్నములో గర్భము ఏర్పడినప్పుడు, వారు ఆ బిడ్డను వద్దని గర్భస్రావము చేయుచున్నారు.  ఇది నరహత్యతో సమానమే.  సమాజము ఎంత ఉన్నత స్థితిలో వున్నను శిశు హత్యను సమర్థించదు.  పెళ్ళి కాకుండా గర్భము వచ్చుట కామదాహము కాదంటారా!

        యుగాంతమున స్త్రీలు దయారహితులు, వాత్సల్యరహితులగుదురురని దైవవాక్యము చెప్పుచున్నది.  మత్తయి 24:12.  కనుక మన స్వార్థము ఒక కారణమైతే,  

        రెండవ కారణము, చాలా ప్రత్యేకత పొందియున్నది.  చిన్న బిడ్డగా పుట్టువాడు జీవగ్రంథమందు నమోదు చేయబడి దేవుడు భూలోకమునకు పంపును.  ప్రకటన  3:5, ''జయించు వాడు ఆలాగున తెల్లని వస్త్రములు ధరించుకొనును;  జీవ గ్రంథములోనుండి అతని పేరెంతమాత్రమును తుడుపు పెట్టక, నా తండ్రి యెదుటను ఆయన దూతల యెదుటను అతని పేరు ఒప్పుకొందును.''  

        ఇలా జీవగ్రంథములో వ్రాయబడినవారు కొద్దివారైన గొప్పవారైన వారిలో తప్పులేదు క్రియలు లేవు కనుక అవి మంచివి లేక చెడు రెండును లేవు కనుక వారు పరలోక రాజ్యములో అతి అల్పమైన స్థితిలోనైనా వుందురు.  ఇందులో ఏ తేడా లేదు.  ఎందుకంటే తీర్పు వారి క్రియలనుబట్టి వుండును.  వీరు, పసిబిడ్డలు కనుక వీరికి చెడు కార్యములు లేవు కనుక వారు శిక్షార్హులు కారు.  కనుక దైవరాజ్యములో వారికి ప్రవేశము కలుగునని గ్రహించాలి.  మత్తయి 18:4, ''కాగా ఈ బిడ్డవలె తన్నుతాను తగ్గించుకొనువాడెవడో వాడే పరలోకరాజ్యములో గొప్పవాడు.''

దావీదు చేసిన వ్యభిచారము, నరహత్య తనకు అక్రమముగా పుట్టిన బిడ్డ మరణమునకు కారణమైనది

        2 సమూయేలు 11:2-5, ''ఒకానొక దినమున ప్రొద్దు గ్రుంకువేళ దావీదు పడకమీదనుండి లేచి రాజనగరి మిద్దెమీద నడుచుచు పైనుండి చూచుచుండగా స్నానముచేయు ఒక స్త్రీ కనబడెను.  ఆమె బహు సౌందర్యవతియై యుండుట చూచి దావీదు దాని సమాచారము తెలిసికొనుటకై యొక దూతను పంపెను, అతడు వచ్చి-ఆమె ఏలీయాము కుమార్తెయు హిత్తీయుడగు ఊరియాకు భార్యయునైన బత్షెబ అని తెలియజేయగా దావీదు దూతలచేత ఆమెను పిలువనంపెను.  ఆమె అతనియొద్దకు రాగా అతడు ఆమెతో శయనించెను; కలిగిన అపవిత్రత పోగొట్టుకొని ఆమె తన యింటికి మరల వచ్చెను.  ఆ స్త్రీ గర్భవతియై-నేను గర్భవతినైతినని దావీదునకు వర్తమానము పంపగా''  ఇది దావీదు కామదాహమునకు ఒక నిదర్శనము.  

మనము చేసిన పాపము మూడు నాలుగు తరముల వరకు ఏడింతల శిక్షను మన సంతానము పొందును.

2 సమూయేలు  11:14-17, ''ఉదయమున దావీదు - యుద్ధము మోపుగా జరుగుచున్నచోట ఊరియాను ముందుపెట్టి అతడు కొట్టబడి హతమగునట్లు నీవు అతని యొద్దనుండి వెళ్లిపొమ్మని యోవాబునకు ఉత్తరము వ్రాయించి ఊరియాచేత పంపించెను.  యోవాబు పట్టణమును ముట్టడివేయుచుండగా, ధైర్యవంతులుండు స్థలమును గుర్తించి ఆ స్థలమునకు ఊరియాను పంపెను.  ఆ పట్టణపువారు బయలుదేరి యోవాబుతో యుద్ధమునకు రాగా దావీదు సేవకులలో కొందరు కూలిరి, హిత్తీయుడగు ఊరియాయును హతమాయెను.''  ఇది నరహత్యతో సమానము.  చేయించినవాడు దావీదు.  కాని దావీదు చేసిన పాపమునకు పశ్చాత్తాపము పడకపోవుట అతనికి అది పాపముగా ఎంచబడినది.  అటుతరువాత 2 సమూయేలు 12:1-12లో నాతాను ప్రవక్త దావీదు చేసిన తప్పును గుర్తుచేసి పశ్చాత్తాపపడునట్లుగా చేయుచున్నాడు.  పశ్చాత్తాపము ద్వారా తన ఆత్మను రక్షించుకొనగలిగినను శిక్ష మాత్రము తప్పలేదు.  2 సమూయేలు 12:13-15, ''నేను పాపముచేసితినని దావీదు నాతానుతో అనగా నాతాను-నీవు చావకుండునట్లు యెహోవా నీ పాపమును పరిహరించెను.  అయితే ఈ కార్యము వలన యెహోవాను దూషించుటకు ఆయన శత్రువులకు నీవు గొప్ప హేతువు కలుగజేసితివి గనుక నీకు పుట్టిన బిడ్డ నిశ్చయముగా చచ్చునని దావీదుతో చెప్పి తన యింటికి వెళ్ళెను.''  తరువాత శిశువు మరణించుట జరుగును.

        ఇచ్చట శిశువు మరణించుటకు కారణము తల్లిదండ్రులే.  వారు వ్యభిచరించి అక్రమ సంతానముగా బిడ్డను పొందారు.  అంతేకాదు తండ్రి నరహత్య చేయించాడు.  ఇలా ధర్మశాస్త్ర విరుద్ధముగా పాపము చేసినవాడు మూడు నాలుగు తరములవరకు ఏడింతలుగా శిక్షింపబడునని బైబిలు గ్రంథము చెప్పుచున్నది.  నిర్గమ కాండము 20:5-6, ''ఏలయనగా నీ దేవుడనైన యెహోవానగు నేను రోషముగల దేవుడను; నన్ను ద్వేషించువారి విషయములో మూడు నాలుగు తరముల వరకు, తండ్రుల దోషమును కుమారులమీదికి రప్పించుచు నన్ను ప్రేమించి నా ఆజ్ఞలు గైకొనువారిని వెయ్యితరములవరకు కరుణించువాడనై యున్నాను.''  లేవీయకాండము 26:28, ''నేను కోపపడి మీకు విరోధముగా నడిచెదను.  నేనే మీ పాపములను బట్టి యేడంతలుగా మిమ్మును దండించెదను.''

        కనుక ఈ తప్పుకు మూడు నాలుగు తరముల వరకు శిక్ష అనుభవించవలసిందే.  కాని పాపపశ్చాత్తాపము వల్ల కొంత ఊరట కల్గి వారు పవిత్రులు అగుదురు.  అప్పుడు వారికి పుట్టిన బిడ్డకు ఆ పాపముతో సంబంధము వుండదు.  కనుక నిజమైన పశ్చాత్తాపము పాపమునుండి విముక్తి కలిగి మన బిడ్డలపైకి రాకుండా ఆపును.  పాపములోని తల్లిదండ్రులకు పుట్టిన బిడ్డ దేవుని కోపమును వారసత్వముగా పొందవలసినదే అని గ్రహించాలి.

        పరలోకము నుండి వచ్చు జీవాత్మకు పాపము వుండదు, ఎందుకంటే ప్రకటన 3:5 ప్రకారము వారి పేరు జీవ గ్రంథమందు వ్రాయబడి వారిని భూమిపైకి పంపబడినవారు.  ఇటువంటివారు వారి గత సృష్టిలో మంచి కార్యములు లేకపోవుట చేత చెడు కార్యముల కొరకు శిక్షింపబడి, ఏమిలేని స్థితిలో శిక్షను పూర్తి చేసి పరలోకమునకు వెళ్ళుదురు.  ఇటువంటివారిని పరమున సాధారణ స్థితి లభించునుగాని ఉన్నత స్థితి లభించదు.  వీరు మరల సృష్టిలో సాధారణమైన వాని గర్భముననే జన్మింతురు.  వారి ఆత్మ ఇటువంటి స్థితిని ఒప్పుకొనక - నా తల్లిదండ్రుల పాపముతో నాకు పాలిపంపులు అవసరములేదు.  నాకు వద్దు అని దేవునిని వేడుకొనును.  అలా దేవుని ప్రార్థనలో సంధించుట చేత దేవుని కోపము వారి తల్లిదండ్రులపై రగులుకొని ఏదో ఒక రూపములో అనగా జబ్బు, ఆకస్మిక మరణము, మొదలైన విధానములో పసిబిడ్డ మరణించుట జరుగును.  అనగా పసిబిడ్డ మరణమునకు కారణము తల్లిదండ్రులని పసిబిడ్డ కాదని గుర్తించాలి.

        పసిబిడ్డ దేవునితో ఎలా ప్రార్థించును?  వారిలో భాష రానివారు వుంటారు, మాటలు రానివారు వుంటారు, సరిగా మాట్లాడలేని వారుంటారు,  ఎలా చెప్పాలో తెలియనివారు వుంటారు.  ఇక్కడ మనము ఒక ప్రత్యేకమైన సంగతి తెలుసుకోవాలి.  పసిబిడ్డలోని ఆత్మ దేవుని ప్రార్థించునని గుర్తించాలి.  ఎలా?  రోమా 8:26-27, ''అటువలె ఆత్మయు మన బలహీనతను చూచి సహాయము చేయుచున్నాడు.  ఏలయనగా మనము యుక్తముగా ఏలాగు ప్రార్థన చేయవలెనో మనకు తెలియదు గాని, ఉచ్చరింప శక్యముకాని మూలుగులతో ఆ ఆత్మ తానే మన పక్షముగా విజ్ఞాపనము చేయుచున్నాడు.  మరియు హృదయములను పరిశోధించువాడు ఆత్మయొక్క మనస్సు ఏదో యెరుగును; ఏలయనగా ఆయన దేవుని చిత్తప్రకారము పరిశుద్ధులకొరకు విజ్ఞాపనము చేయుచున్నాడు.''  పసిబిడ్డకు శరీరరీత్యా ఇంకా ఎదుగుదల లేక ప్రార్థించలేక పోవచ్చును.  కాని వారి ఆత్మ బలమైన స్థితిలోనే వుండి మాటలకు సాధ్యపడని మూలుగులద్వారా దేవుని ప్రార్థించి, తనకు తన తల్లిదండ్రులద్వారా రాబోవు శిక్ష నుండి తప్పింపమని దానికొరకు మరణించుటకైనను సిద్ధమని దేవుని వేడుకొనును.  కనుక తల్లిదండ్రులు పాపము చేయక పరిశుద్ధ స్థితిలో వుంటే మంచిదని గుర్తించాలి.

పసిబిడ్డలోని ఆత్మ ఉచ్ఛరింప శక్యము కాని మూలుగులతో దేవునికి విజ్ఞాపన చేయును

        ఇక్కడ ఇంకొక విషయము గుర్తించాలి.  తల్లి దండ్రులు పాపము చేసినను కొంతమంది శిశువులు వారి ఇంట చనిపోకుండా వుంటారు.  ఈ ఆత్మలు ప్రార్థనా జీవితములోనివి కావు.  ఇవి గత సృష్టిలో దైవ వ్యతిరేకమైనవే.  శిక్షను అనుభవించినను ఆత్మ పుట్టుకతోనే అదే పాపపు ఆలోచనతోనే వుండెను కనుక ఈ ఆత్మలు తమ ప్రార్థనలో దేవునిని అడగవు.  కనుక వారిని దేవుడు శిక్షించి మరణించునట్లుగా చేయడని గుర్తించాలి.  

ఇందునుబట్టి దైవభక్తిలో యోగ్యమైన ఒక ఆత్మ మన ఇంటిలో పుట్టి ఈ ఇల్లు పాప భూయిష్టమై యుండుట చేత వారి తల్లిదండ్రులు పాపులై దేవుని కోపమనే తరతరాల శిక్షను పొందియుండి యుండుటచేత దానిలో భాగస్వామ్యము నాకు వద్దని ప్రార్థించుటచేత, దైవభక్తి ఉన్నతస్థితి గల్గిన ఆత్మ ఏదో ఒక కారణముచేత చనిపోవుట జరుగును.  అనగా మన కుటుంబములో దేవునిలో ఉన్నతస్థితిలో జన్మించిన ఆత్మ చనిపోవుట జరుగుచున్నదని గ్రహించి బాధపడవలసి యున్నదని ఈ పుస్తకము ద్వారా భూజనులను హెచ్చరించుచున్నాను.

        దావీదు సంఘటనలో దావీదు పాపములో వుండగా పుట్టిన బిడ్డ మరణించుట జరిగింది.  కాని దావీదు మారుమనస్సు పొంది దేవుని పశ్చాత్తాపము పొందిన తరువాత శిక్షను అనుభవించిన తరువాత వారికి సొలొమోను పుట్టుట జరిగింది, కాని ఈ బిడ్డ మరణించలేదు.  దీనికి కారణము, సొలొమోను ఆత్మ ఉన్నతమైనదే.  అలాగే సొలొమోను పుట్టునప్పటికి దావీదు తిరిగి పాపము నుండి విమోచింపబడి ఉన్నత స్థితిని పొందియున్నాడు.  కనుక సొలొమోను వంటి దైవజనుడు పుట్టుట జరిగి శిశువుగా మరణించలేదు.  కాని దావీదు గొప్పవాడు కనుక తాను పాపము చేసినను, ఆయన ద్వారా జన్మించిన మొదటి బిడ్డ పరలోకములో గొప్ప స్థితిని కలిగియుండునని గ్రహించాలి.  ఇలాంటి బిడ్డ దావీదు ఉన్నతమైన స్థితిలో కాకుండా పాపపు స్థితిలో పుట్టుట జరిగింది.  కనుకనే ఈ ఆత్మ తన తల్లిదండ్రుల పాపముతో నాకు పాలిపంపులు వద్దని దేవుని ప్రార్థనతో సంధించి, దేవుని కోపము వారి తల్లిదండ్రులపైకి వచ్చునట్లు చేసి తాను శరీరరీత్యా మరణించి తిరిగి దేవుని సన్నిధి అనగా పరదైసునందు చేరుతున్నట్లుగా గ్రహించాలి.

11.  ఒకేసారి అనేకమంది చనిపోవుటకు కారణము

        ఈమధ్య 2004వ సంవత్సరములో డిసెంబరు 24వ తేదీన సునామి అను పేరుతో వచ్చిన ఉప్పెన వల్ల సుమారు 3 లక్షలమంది చనిపోయారు.  2005వ సంవత్సరములో పాకిస్తాన్‌లో వచ్చిన భూకంపము వల్ల సుమారు 75,000 మంది చనిపోయారు.  ఇలా మనము చెప్పుకుంటూ పోతే అనేక సంఘటనలు వస్తాయి.  ఇంతకి రెండవ ప్రపంచ యుద్ధములో ఎంతమంది చనిపోయారు?  ఈ భూమి పుట్టినప్పటినుండి ఎన్ని యుద్ధములు జరిగాయి?  ఎంతమంది చనిపోవుట జరిగింది?  దీనికి కారణమేమై యుండును.

        హెబ్రీ 3:16-17, ''విని కోపము పుట్టించినవారెవరు?  మోషేచేత నడిపింపబడి ఐగుప్తులోనుండి బయలుదేరి వచ్చిన వారందరే గదా!  ఎవరి మీద నలువది ఏండ్లు ఆయన కోపగించెను?  పాపము చేసినవారి మీదనే గదా?  వారి శవములు అరణ్యములో రాలి పోయెను.''  6 లక్షల ఇశ్రాయేలీయుల మగ యోధులతో ఐగుప్తు నుండి దైవజనము రాగ వారందరు దేవునికి విరోధముగా సణిగి అరణ్యములో శవములుగా రాలి పోయెనని బైబిలు గ్రంథములోని మోషే చరిత్రలో చదవగలము.  ఇలా వీరు అర్థాంతరముగా మరణించుటకు కానాను చేరక పోవుటకు కారణము - దేవునిపై వారు సణుగుట మరియు దేవుని కోపము వారిపై రగులుట.

అరణ్యములో 6 లక్షల ఇశాయ్రేలీయుల శవములుగా రాలిపోవుటకు కారణము వారు చేసిన పాపమే కదా!

        ఆది 6:13, ''దేవుడు నోవహుతో - సమస్త శరీరుల మూలముగా భూమి బలాత్కారముతో నిండియున్నది గనుక నా సన్నిధిని వారి అంతము వచ్చియున్నది;  ఇదిగో వారిని భూమితోకూడ నాశనము చేయుదును.''  ఇందులో నోవహు కాలములో జీవిస్తున్న సమస్త శరీరుల మూలముగా భూమి బలాత్కారముతో నిండియున్నది.  బలాత్కారము చేయుట అనగా ఇష్టము లేకపోయినను బలవంతముగా తీసుకొనుటను బలాత్కారము అందురు.  అనగా మనకు ఇష్టము వుండదుగాని లంచము ఇవ్వాలి.  అలా చేయకపోతే పని జరుగదు.  మనకు ఇష్టము లేకపోయినను అందరిలాగానే మనము పాపపు కార్యములు చేయాలి.  బలవంతముగా మానభంగము చేయుట, మొదలైనవన్ని బలాత్కారము క్రింద లెక్కించబడును.  ఇలాంటి నీచ పాపపు కార్యములు కొద్దిమందిలో కాదుగాని, నోవహు కాలములో సమస్త శరీరులలో వున్నట్లుగా దేవుడు నోవహుతో చెప్పుచున్నాడు.  కనుకనే దేవుని సన్నిధిలో వారికి అంతము వచ్చిందని చెప్పబడినది.  ఈ కారణము వలన నోవహు కాలములో వున్న సమస్త జనాభా జలప్రళయము ద్వారా నశించారు.  దీనికి కారణము బలాత్కారమని గ్రహించాలి.

        అలాగే ఆదికాండములో సొదొమ, గొమొఱ్ఱా పట్టణములను అగ్నిగంధకములతో నాశనము జరిగించుటకు కారణమేమి?  ఆది 18:20, ''మరియు యెహోవా-సొదొమ గొమొఱ్ఱాలను గూర్చిన మొర గొప్పది గనుకను వాటి పాపము బహుభారమైనది గనుకను'',  ఇందునుబట్టి పాపపు మొర ఎక్కువై భరింపరానిదిగా మారుట ద్వారా ఆ పట్టణములను నాశనము చేయుటకు దేవుని నిర్ణయము అబ్రాహామునకు తెలియజేసాడు.  అలాగే యుద్ధాలు దేవుడు పాపపు నరులను తొలగించుట కొరకు సాతానుకు దేవుడు అప్పగించునని గ్రహించాలి.  కనుకనే యుద్ధాలలో జరుగు మారణహోమమును లెక్కించలేము.  ఇలా చెప్పుతూ వెళితే ఇశ్రాయేలీయుల చరిత్రలో అనేక సంఘటనలు వున్నవి.  వారి నాశనమునుగాని, వారు జరిగించిన యుద్ధాలకుగాని కారణములు పాపమే.  వారి నాశనము  వారు దేవునికి దూరమై అన్య దేవతలను పూజించుట ద్వారా పొందారు.  ఈ నాశన కాలములో వారిలో అనేకులు మరణించుట జరిగింది.  శేషించిన కొద్దిమంది తిరిగి దేవునిలోకి తిరిగి మారుమనస్సు పొందినప్పుడు అన్యులకు నాశనము జరుగుచూ వచ్చింది.

        ప్రకటన 8:4-5, ''అప్పుడా ధూపద్రవ్యముల పొగ పరిశుద్ధుల ప్రార్థనలతో కలిసి దూత చేతిలోనుండి పైకి లేచి దేవుని సన్నిధిని చేరెను.  ఆ దూత ధూపార్తిని తీసికొని, బలి పీఠము పైనున్న నిప్పులతో దానిని నింపి, భూమిమీద పడవేయగా ఉరుములు ధ్వనులు మెరుపులు భూకంపమును కలిగెను.'' యుగాంతములో ఈ భూమి పాపముతో నిండియుండుట చేత భూమి మీద జరుగు భూకంపమునకు పరిశుద్ధుల ప్రార్థనలే కారణమయ్యాయి.  అనగా వారు వారి రక్తమునకు ప్రతిగా దండనను ఇయ్యమని వారు చేసిన ప్రార్థనల ఫలితము భూకంపముగా మొదట క్రియ జరిపించింది.  

సంఘటనలు                                                       కారణములు             

1.  6 లక్షల మంది అరణ్యములో శవములుగా రాలిపోవుట . . . . . . . . . . . . . . . . . . . . . . . . . . .  పాపము   (దైవ వ్యతిరేకముగా సణుగుట)   (హెబీ 3:16-17)

2.  నోవహు కాలములో జల పళ్రయములో అప్పటి జనము మరణించుట . . . . . . . . . . . . . .  బలత్కారము (అనగా పాపము బలవంతముగా జరిగించబడుచున్నది)   (ఆదికాండము 6-7 అధ్యాయములు)

3.  సొదొమ గొమొఱ్ఱా అగ్నిగంధకములో నాశనమగుట . . . . . . . . . . . . . . . . . . . పాపము బహు భారముగా మారినది (ఆ పట్టణములో కనీసము 10 మంది నీతిమంతులు లేకపోవుట)   (ఆది 18, 19 అధ్యాయములు)

4.   యుగాంతములో ఈ భూమి అందులోని సమస్తము నాశనమునకు కారణము . . . . . . . . . . . . .  పాపమే (పక్రటన గంథము.)

5.  పాకిస్తాన్‌లో 2005వ సం  భూకంపము వల్ల 75,000 మంది చనిపోవుటకు . . . . . . . . . . .  ?  

6.  2004 సం  డిసెంబరు 4వ తేదీన వచ్చిన సునామిలో 3 లక్షలమంది మరణమునకు . . . . . ?

పాఠకులారా!  చదివి గహ్రించండి!

        అలాగే, ప్రకటన 11:19, ''మరియు పరలోకమందు దేవుని ఆలయము తెరవబడగా దేవుని నిబంధనమందసము ఆయన ఆలయములో కనబడెను.  అప్పుడు మెరుపులును ధ్వనులును ఉరుములును భూకంపమును గొప్ప వడగండ్లును పుట్టెను.''  ఇందులో దేవుని నిబంధనమందసము దేవుని పది ఆజ్ఞలకు  మూలము.  ఈ ఆజ్ఞలు మందసము రూపములో మోషే కాలములో క్రియ జరిగించాయి.  అనగా పది ఆజ్ఞలు మీరిన వారికి దేవుని నిబంధన మందసముగా వున్న ఈ ఆజ్ఞలు తన ఉగ్రతను వారిపై కనపరిచినాయి.  దాని ఫలితము అనేకులు నాశనము పొందినట్లుగా యిశ్రాయేలీయుల చరిత్రలో చదువగలము.  ఇప్పుడు అదే నిబంధనమందసము పరలోకములో వున్నట్లుగా ఈ వాక్యములో చెప్పబడినది.  అయితే మోషే కాలము నుండి యుగాంతము వరకు ఈ నిబంధనమందసములోని ఆజ్ఞలను మీరిన వారిపై తన ఉగ్రతను చూపుచూనే వున్నది.  అనేక భూకంపములకు కారణము అనేకుల అకస్మిక మరణమునకు కారణముగా యున్నది.

        అలాగే ప్రకటన గ్రంథములో జరగవలసిన యుగాంతమునకు కారణము కూడా పాపమే!  ఈ పాపము ఎక్కువై తన మొరను దేవుని సన్నిధిలో వినిపించినప్పుడు దేవుడు తన ఉగ్రతను పంపి అనేకుల అకస్మిక మరణమునకు కారణమగుచున్నాడు.  అయితే ఇక్కడ మనము ఒక సంగతి గమనించవలసియున్నది.  అదేమిటంటే - ఈనాడు అనేక ప్రాంతాలలో జనాభా విస్తరించియున్నది.  అందులో ఒక ప్రాంతములోని జనాభా యుద్ధముల ద్వారా, బాంబులద్వారా, జల ప్రళయము ద్వారా నశించినవారి పాపము మితిమీరినదిగా చెప్పవచ్చును.  అంతమాత్రాన మిగిలిన ప్రారతముల వారు పరిశుద్ధులని కాదు లేక పాపము చేయనివారు అని మనము అనుకోకూడదు.  మిగిలిన ప్రాంతాలవారు కూడా పాపములో మ్రగ్గుచున్న వారే.  కాని వారిలో కొందరు పరిశుద్ధులు వున్నారు.  వారి కోసము, ఆ ప్రాంతమును దేవుడు విడిచిపెట్టి, ఆ ప్రాంతములో అపరిశుద్ధులు చేయు పాపపు క్రియలను ఓర్పుతో సహించుచున్నట్లుగా మనము గ్రహించాలి.

ఎంత ఘోరమైన పాపులు వున్నను వారి మధ్య 10 మంది పరిశుద్ధులు వున్న ఆ ప్రాంతమును దేవుడు నాశనము చేయడు

        ఆదికాండము 18:20-33లో వలె అబ్రాహాము సొదొమ, గొమొఱ్ఱా పట్టణములకు జరగబోవు సంగతి వినినప్పుడు, అబ్రాహాము సాహసించి దేవునితో 50 మంది - 45 మంది         - 40 మంది - 30 మంది - 20 మంది - 10 మంది నీతిమంతులు వున్న నాశనము చేయుదువా అని అడిగాడు.  అందుకు దేవుడు చివరకు 10 మంది నీతిమంతులు వున్నా ఆ సొదొమ గొమొఱ్ఱా పట్టణములను నాశనము చేయనని చెప్పుట జరిగింది.  అయితే మనము లోతు చరిత్ర చదివినట్లైతే - ఆ సొదొమ గొమొఱ్ఱా పట్టణములలో కేవలము లోతు, లోతు భార్య, అతని ఇద్దరు కుమార్తెలు మాత్రమే నీతిమంతులుగా వున్నట్లుగా మనము గ్రహించాలి.  అయితే దేవుడు నాశనము చేయునప్పుడు వారిని తప్పించి నాశనము చేసాడు.

        ఇందునుబట్టి ఒకేసారి అనేకమంది చనిపోవుటకు కారణము పాపమే!  వారు చేసిన పాపమే వారి మరణమునకు కారణమైనది.  ఒక్కొక్క ప్రాంతములో కనీసము అబ్రాహాము అడిగినంతమంది నీతిమంతులు జీవిస్తున్నా వారి కోసముగా ఆ ప్రాంతములోని అపరిశుద్ధులను వదిలి వేస్తున్నట్లుగా గుర్తించాలి.  అంతమాత్రాన వారికి శిక్ష రాదని కాదు.  పరిశుద్ధుల జీవన విధానము కోసము ఆ ప్రాంతములో వారిని దేవుడు శిక్షించక కనికరమును చూపుచున్నాడు.  ఒక్కసారే ఎక్కువమంది చనిపోయిన వారి పాపము గొప్పదే.  కాని మనము బ్రతికియున్నంత మాత్రాన మనము, మన ప్రాంతమంతా మంచివారని కాదు.  మన ప్రాంతములో కూడా అనేక పాపపు బలాత్కార క్రియలు జరుగుచున్నవి.  కాని దేవుడు నీతిమంతుల కోసరము ఆ ప్రాంతము వారిని కనికరముతో ఉపేక్షిస్తున్నట్లుగా మనము గ్రహించాలి.  2 పేతురు 3:9.

12.  మరణమును తెచ్చు వ్యాధులు - వైద్యము

        ఈనాడు ప్రతి సంవత్సరము గుండె జబ్బుల వల్ల మరణించుచున్నవారు ఎందరు?  ప్రతి సంవత్సరము హెచ్‌.ఐ.వి. వల్ల చనిపోవువారు ఎందరు?  

        ఇలా చెప్పుకొంటూపోతే  అనేక రకముల జబ్బులు ప్రతి ఏటా వాటివాటి క్రియలను పూర్తి చేస్తున్నాయి. ఈనాడు అన్నింటికన్నా రోగముల చేత చనిపోయేవారే ఎక్కువమంది వున్నారు.  అనగా మరణ దూత ఈ రోగముల ద్వారా కూడా నరులను మంటికి పంపుచున్నది.

        ఇటువంటి రోగములకు మందులున్నవంటే మనలోని భయము తొలగి ఆనందమును రేపుతుంది.  కాని ఈ మందు ఎంతవరకు బ్రతికించగలుగుచున్నది.  వాని జీవితకాలము వరకే కదా!  అయితే మందులలో వున్న ప్రత్యేకత ఏమిటి?  ఇందునుగూర్చి ఇప్పుడు తెలుసుకొందము.  2 రాజులు 20:1, ''ఆ దినములలో హిజ్కియాకు మరణకరమైన రోగము కలుగగా, ఆమోజు కుమారుడును ప్రవక్తయునైన యెషయా అతనియొద్దకు వచ్చి-నీవు మరణమవుచున్నావు, బ్రదుకవు గనుక నీవు నీ యిల్లు చక్కబెట్టుకొనుమని యెహోవా సెలవిచ్చుచున్నాడని చెప్పగా'',  ఈ విధముగా హిజ్కియా రాజు మరణకరమైన వ్యాధితో బాధపడుచున్నాడు.  అనగా ఈ వ్యాధికి అంతము మరణమే.  

ఈనాడు రకరకాల జబ్బులతో మరణించువారు ఎందరు?

        ఈ విషయమును యెషయా ప్రవక్త తెలియజేయగా హిజ్కియా రాజు ఏమి చేసాడో తెలుసుకోవలసిన అవసరత మనకు వున్నది.  ఇది చాలా ముఖ్యమైన విషయము.

        2 రాజులు 20:2-3, ''అతడు తన ముఖము గోడతట్టు త్రిప్పుకొని - యెహోవా, యథార్థహృదయుడనై, సత్యముతో నీ సన్నిధిని నేనెట్లు నడుచు కొంటినో, నీ దృష్టికి అనుకూలముగా సమస్తమును నేనెట్లు జరిగించితినో కృపతో జ్ఞాపకము చేసికొనుమని హిజ్కియా కన్నీళ్లు విడుచుచు యెహోవాను ప్రార్థించెను.''  ఎప్పుడైతే తనకు మరణకరమైన వ్యాధి వున్నదని తెలుసుకొన్నాడో వెంటనే తన ముఖమును గోడ తట్టుకు త్రిప్పుకొని కన్నీళ్ళు విడుచుచూ యెహోవాను ప్రార్థించాడు.  అలా మనకు రోగములు పట్టినప్పుడు మొదట మనము దేవుని ప్రార్థించాలి.  అందుకు 2 రాజులు 20:4-5, ''యెషయా నడిమిశాలలో నుండి అవతలకు వెళ్లకమునుపే యెహోవా వాక్కు అతనికి ప్రత్యక్షమై ఈలాగు సెలవిచ్చెను.  -నీవు తిరిగి నా ప్రజలకు అధిపతియైన హిజ్కియా యొద్దకు పోయి అతనితో ఇట్లనుము-నీ పితరుడైన దావీదునకు దేవుడగు యెహోవా నీకు సెలవిచ్చునదేమనగా- నీవు కన్నీళ్లు విడుచుట చూచితిని;  నీ ప్రార్థన నేనంగీకరించి యున్నాను;  నేను నిన్ను బాగుచేసెదను;  మూడవ దినమున నీవు యెహోవా మందిరమునకు ఎక్కి పోవుదువు.''  ఇందులో మరణకరమైన వ్యాధితో బాధపడు హిజ్కియా ప్రార్థనకు ఫలితము వచ్చింది.  స్వస్థత జరుగునని చెప్పబడినది.  అంతేకాదు - 2 రాజులు 20:6, ''ఇంక పదునయిదు సంవత్సరముల ఆయుష్యము నీకిచ్చెదను;  మరియు నా నిమిత్తమును నా సేవకుడైన దావీదు నిమిత్తమును ఈ పట్టణమును నేను కాపాడుచు, నిన్నును ఈ పట్టణమును అష్షూరు రాజు చేతిలో పడకుండ నేను విడిపించెదను.''  

మరణకరమైన వ్యాధి అతనిలో వున్నను నరుని ఆయుస్సు వున్నంతవరకు అది ఏమియు చేయలేదు

        ఇలా దేవుని యొద్దనుండి 15 సంవత్సరముల ఆయుస్సు పొందుట జరిగింది.  ఎప్పుడైతే మారుమనస్సు కల్గి ప్రార్థన జరిగిస్తామో ఆ ప్రార్థనను దేవుడు గుర్తించినట్లైతే మనకు మరణకరమైన వ్యాధి వున్నను దేవుడు మనకు ఆయుస్సు పెంచును.  దేవుడు ఎప్పుడైతే మన ఆయుస్సు పెంచాడో - మరణకరమైన రోగములు కలిగియుండి మరణించకుండా వుండు వారిని అనేకులను మనము మన నిజ జీవితములో చూడవచ్చును.  ఇలా ఎప్పుడైతే హిజ్కియా తన ప్రార్థన వల్ల ఆయుస్సును పొందాడో - ఈ లోక సంబంధమైన వైద్యము అతనియందు పని చేసింది.  2 రాజులు 20:7, ''పిమ్మట యెషయా-అంజూరపుపండ్ల ముద్ద తెప్పించుడని చెప్పగా వారు దాని తెచ్చి కురుపుమీద వేసినతరువాత అతడు బాగుపడెను.''  

        ఇందులో అంజూరపు పండ్లను ముద్దగా చేసి కురుపుకు పెట్టినప్పుడు ఆ కురుపు మానుట జరిగింది.  అనగా ఈ లోక సంబంధమైన ఈ మందులు అన్ని నరుని ఆయుస్సు వరకు మాత్రమే పని చేయునని గ్రహించాలి.  ఈ ఆయుస్సు పెరగాలి అంటే వైద్యునిలో లేదుగాని పరమ వైద్యుడైన క్రీస్తు ప్రభువు చేతిలో వున్నదని గ్రహించాలి.  ఇందునుబట్టి, మనకు రోగములు వచ్చినప్పుడు మొదట ప్రార్థించి అటుతరువాత వైద్యమును పొందవచ్చునని గ్రహించాలి.  ఈ లోకము వైద్యశాస్త్రము దేవుడు ఇచ్చిన జ్ఞానమేకాని నరుల స్వంత జ్ఞానము కాదు, ఎందుకంటే పైనుండి అనుగ్రహింప బడనిదే మనము ఏమి చేయజాలమని గ్రహించాలి.  

        యాకోబు 3:17, ''అయితే పైనుండివచ్చు జ్ఞానము మొట్టమొదట పవిత్రమైనది, తరువాత సమాధానకర మైనది, మృదువైనది, సులభముగా లోబడునది, కనికరముతోను మంచి ఫలములతోను నిండుకొనినది, పక్షపాతమైనను వేషధారణయైనను లేనిదియునై యున్నది.''  కనుక మరణకరమైన రోగములు నరుని మంటిగా మార్చుటకు అతనిలోని జీవమును చంపును.  అందుకుగాను అతని శరీరములో అవయవములను పని చేయనీయక ఆపును.  అయితే మరణకరమైన వ్యాధి వచ్చినను దేవుడు వానికి ఆయువు పెంచినట్లైతే వానికి ఆ వ్యాధి ప్రభావము వల్ల మరణము సంభవించదని గ్రహించాలి.

13.  అయోగ్యముగా ప్రభువు శరీరమును - రక్తము పుచ్చుకొని మనలో కొందరు బలహీనులై రోగులై మరణించుట!

        1 కొరింథీ 11:23-30, ''నేను మీకు అప్పగించిన దానిని ప్రభువు వలన పొందితిని.  ప్రభువైన యేసు తాను అప్పగింపబడిన రాత్రి యొక రొట్టెను ఎత్తికొని కృతజ్ఞతాస్తుతులు చెల్లించి దానిని విరిచి-యిది మీకొరకైన నా శరీరము;  నన్ను జ్ఞాపకము చేసికొనుటకై దీనిని చేయుడని చెప్పెను.  ఆ ప్రకారమే భోజనమైన పిమ్మట ఆయన పాత్రను ఎత్తికొని- యీ పాత్ర నా రక్తమువలననైన క్రొత్తనిబంధన;  మీరు దీనిలోనిది త్రాగునప్పుడెల్లనన్ను జ్ఞాపకము చేసికొనుటకై దీనిని చేయుడని చెప్పెను.  మీరు ఈ రొట్టెను తిని, యీ పాత్రలోనిది త్రాగునప్పుడెల్ల నన్ను జ్ఞాపకము చేసికొనుటకై దీనిని చేయుడని చెప్పెను.  మీరు ఈ రొట్టెను తిని, యీ పాత్రలోనిది త్రాగునప్పుడెల్ల ప్రభువు వచ్చువరకు ఆయన మరణమును  ప్రచురించుదురు.  కాబట్టి యెవడు అయోగ్యముగా ప్రభువుయొక్క రొట్టెను తినునో, లేక ఆయన పాత్రలోనిది త్రాగునో, వాడు ప్రభువుయొక్క శరీరమును గూర్చియు రక్తమును గూర్చియు అపరాధియగును.  కాబట్టి ప్రతి మనుష్యుడు తన్ను తాను పరీక్షించుకొనవలెను;  ఆలాగుచేసి ఆ రొట్టెను తిని, ఆ పాత్రలోనిది త్రాగవలెను.  

పభ్రువు బల్ల భోజనములో అయోగ్యముగా తీసుకొను రొట్టె ద్రాక్షారసము మన శరీరమును బలహీనపరచి రోగులుగా మార్చి మన మరణమునకు ఒక కారణమగునా!

        ప్రభువు శరీరమని వివేచింపక తిని త్రాగువాడు తనకు శిక్షావిధి కలుగుటకే తిని త్రాగుచున్నాడు.  ఇందువలననే   మీలో అనేకులు బలహీనులును రోగులునై యున్నారు;  చాలమంది నిద్రించుచున్నారు.''  మనము ప్రభువు శరీరమును రొట్టెతో - రక్తమును పులియని ద్రాక్షారసముతో మాదిరిగా చూపుచూ సంఘములో పుచ్చుకొనుచున్నాము.  మనలో ఎంతమంది అది పుచ్చుకొనుటకు సిద్ధపాటు కలిగియున్నారు?  ఇది మనలను మనము విమర్శించుకోవాలి.  మనలో పాపము చేసి పశ్చాత్తాపము పొందక ప్రభువు బల్లలో పాల్గొనువారు ఎందరు?  ఇవన్ని ఒక ప్రక్కన పెట్టితే, అసలు ప్రభువు బల్లలో పంచువాటిని రొట్టె, ద్రాక్షారసముగానే పుచ్చుకొనువారు ఎందరు?  వీరు దానిని ప్రభువు శరీరముగాను - రక్తముగాను భావించక పోవుట చేత ఆ ప్రభువు, శరీరము - రక్తము వానిని బలహీనపరచి, రోగిగా మార్చునని గ్రహించాలి.  చివరకు వానిని మరణమునకు అప్పగించును.

        పవిత్రమైనది అపవిత్రమైన దానిలో వుంచిన అక్కడి వారిని బలహీనపరచి రోగములు కలిగించునని గ్రహించాలి.  పాతనిబంధన కాలములో మందసములో నుండి ప్రభువైన దేవుడు ప్రత్యక్షపరుచుకొనేవాడు.  ఇది పవిత్రమైనది.  దీనిని ఫిలిష్తీయులను, అన్య దేవతా విగ్రహములను ఆరాధించువారు కొనిపోయి వారి దేశములో అనగా అపవిత్ర ప్రాంతములో వుంచినప్పుడు ఏమి జరిగిందో మనము ఇప్పుడు తెలుసుకొందము.   1 సమూయేలు 5:1, ''ఫిలిష్తీయులు దేవుని మందసమును పట్టుకొని ఎబెనెజరునుండి అష్డోదునకు తీసికొనివచ్చి''  1 సమూయేలు 5:6, ''యెహోవా హస్తము అష్డోదువారిమీద భారముగా ఉండెను.  అష్డోదువారిని దాని సరిహద్దులలో నున్నవారిని ఆయన గడ్డల రోగముతో మొత్తి వారిని హతము చేయగా''  అప్పుడు అష్డోదు ప్రాంతము వారలు ఆ మందసమును అపవిత్రమైన గాతు ప్రాంతమునకు పంపినారు.  1 సమూయేలు 5:9, ''అయితే వారు అష్డోదు నుండి గాతునకు దానిని మోసికొనిపోయిన తరువాత యెహోవా హస్తము ఆ పట్టణపు పెద్దలకు పిన్నలకును రహస్య స్థానములలో గడ్డలు లేపి వారిని మొత్తి, గొప్ప నాశనము చేసెను.''  ఇలా అపవిత్రమైన ప్రాంతములో దైవ ప్రత్యక్షత తనయందు చూపు మందసము పవిత్రమైనది గనుక ఆ ప్రదేశాలలో అనేక బలహీనతలను కలిగించి, రోగములను కలిగించి, చివరగా వారిలో అనేకులు పీడ చేత చచ్చిరని వ్రాయబడినది.

పవిత్రమ్రైనది అపవిత్ర స్థానములో వుంచినప్పుడు అక్కడ జరుగు ప్రతి అనర్థాలు పవిత్రమ్రైన దాని వలన కలిగినదే!

        అలాగే మనము ప్రభువు బల్లలో ప్రభువు శరీరమును రొట్టెగాను - ప్రభువు రక్తమును ద్రాక్షారసము రూపములో తీసుకొనుచున్నాము.  మన శరీరమును అపవిత్ర స్థితిలో వుంచుకొని, పవిత్రమైన ప్రభువు శరీర రక్తములను యాజకునిచే ప్రతిష్టించబడి పవిత్ర స్థితిలో మార్చబడిన రొట్టెను ద్రాక్షారసమును పుచ్చుకొనుట ద్వారా అది మన శరీరమను అపవిత్ర స్థలములో ప్రవేశించును.  అలా ప్రవేశించిన పవిత్రమైన ప్రభువు శరీరము రక్తము అను రొట్టె ద్రాక్షారసము మనలో బలహీనత కలిగించి రోగిగా మార్చును.  ఇలా అనేకులు మరణమును చివరగా పొందుచున్నారు.  ఇక్కడ మనము మరియొక విషయమును గుర్తుంచుకోవాలి.  అదే ప్రభువు శరీరము - రక్తమును  రొట్టెగాను ద్రాక్షారసముగా, ఏ పాపము చేయక, వాటియందు భక్తిశ్రద్ధలతో పుచ్చుకొనుట బహు శ్రేష్ఠమైనదని గ్రహించాలి.  అలా పుచ్చుకొనువారికి ఏ విధమైన కీడు వారికి కలుగదు.  పైపెచ్చు వారిలోని బలహీనతలను తీసివేసి రోగములను స్వస్థపరచునని గ్రహించాలి.  అయితే ఇందులో మరణించినవారిని - ''నిద్రించుచున్నారు,'' అని చెప్పుట మనము గమనించాలి.  1 కొరింథీ 11:30, ''చాలామంది నిద్రించుచున్నారు.''  అయోగ్యముగా ప్రభువు భోజనము భుజించి - పానమును త్రాగినను వారు ప్రభువునందు నిద్రించుచున్నవారిగానే చెప్పబడినది.  అంటే ప్రభువు నందు నిద్రించువారు ధన్యులే.  ప్రకటన 14:13, ''అంతట-ఇప్పటినుండి ప్రభువునందు మృతి నొందు మృతులు ధన్యులని వ్రాయుమని పరలోకమునుండి యొక స్వరము చెప్పగా వింటిని.  నిజమే;   వారు తమ ప్రయాసములు మాని విశ్రాంతి పొందుదురు;  వారి క్రియలు వారి వెంట పోవునని ఆత్మ చెప్పుచున్నాడు.''  కనుక వారి మరణానంతరము విశ్రాంతిలో వుందురు, ఎందుకంటే వారు ప్రభువు బల్లలో అయోగ్యముగా పొల్గొన్నను వారు ఆ శిక్షను అప్పుడే అనుభవించి, ఆ పీడ చేత వేదనను పొంది మరణిస్తున్నారు.  ఆ పీడనలో కూడా వారు క్రీస్తును వదలలేదు.  అంతేకాకుండా వారు బాధను అనుభవిస్తూ కూడా వారు అయోగ్యరీతిగా ప్రభువు బల్లలో పాల్గొన్నా కూడా వారు క్రీస్తు నందు విశ్వాసమును వీడనందున వారికి శరీరరీత్యా బలహీనతలు, రోగములు ఏర్పడి మరణించినను వారు నిద్రించినవారితో సమానమైనవారుగానే  చెప్పుట వారికి ఒక రకమైన ఓదార్పు.  కనుక మన బలహీనతలలో, రోగములలో ప్రభువును దూషించక, మన అయోగ్యతే మనకు అలా జరిగిందని గ్రహించి పశ్చాత్తాపముతో మనలను ప్రభువు రాజ్యమునకు యోగ్యులుగా చేసుకొందముగాక!

14.  దురాశ గర్భము ధరించగా పాపము మరణమును కనుట

        యాకోబు 1:15, ''దురాశ గర్భము ధరించి పాపమును కనగా, పాపము పరిపక్వమై మరణమునుకనును.''  ఇందులో దురాశను మన గర్భము నందు లేక మన మనస్సు నందు ఉంచుకొని యున్నప్పుడు పాపము ఏదో ఒక సమయములో జరుగును కదా!  అనగా ఒకడు పరస్త్రీ మీద వ్యామోహితుడై తన మనస్సు నందు లేక తన గర్భము నందు ఆ స్త్రీ పై దురాశ చేత వ్యామోహితుడై యుండగా, ఏదో ఒక సమయమున పాపపుక్రియ అనగా ఆ స్త్రీ పై బలాత్కారము చేయడా?  అలా కార్యరూపము దాల్చిన దురాశను పాపము అని చెప్పబడినది.  

ఆశ కలిగి యుండుట తప్పు కాదుగాని దురాశ కలిగి యుండకూడదు. ఆశ కలిగిన నరుడు తన ఉన్నతికి పాటుపడును  దురాశ  కలిగిన నరుడు తన నాశనమునకు పాత్రుడగును

దురాశ మన మనస్సు నందు వున్నంతవరకు పాపమును మన మనస్సులో గర్భములో పిండమును పెంచిన విధముగా వుంచుకొని యుందుము.  అనగా పిండము నవమాసములు పెరుగుచున్నట్లుగా మన మనస్సునందున్న దురాశ కూడా రోజురోజుకు పెరుగును.  ఆ దురాశ నెరవేరకపోవుట నరులలో కోపమును రగిలించును.  ఈ దురాశ లేపిన కోపము నరులలో ఏ క్రియకైనను ఒడిగట్టించును.  కనుక దురాశ అనగా మనది కాని దానిపై ఆశను వదులుకోవాలి.  ఒకడికి డబ్బుపై ఆశ వున్నది.  వాడు ఒక వ్యాపారము పెట్టి డబ్బు సంపాదించాలి అనుకొన్నాడు.  హోల్‌సేల్‌ మార్కెటునందు దొరుకు వస్తువును విడివిడిగా కొంత లాభమునకు అమ్మును.  ఇది అతనికి డబ్బుపై ఆశను కలిగియున్నట్లుగా చెప్పవచ్చును.  ఇతనికే ఆ డబ్బుపై దురాశను కలిగినప్పుడు తన వ్యాపారములో కల్తీ చేసి ఇంకా ఎక్కువగా సంపాదించుకోవాలని అనుకొనును.  దీనిని దురాశ అందురు.  ప్రకటన 6:6, ''మరియు-దేనారమునకు ఒక సేరు గోధుమలనియు, దేనారమునకు మూడు సేర్ల యవలనియు, నూనెను ద్రాక్షారసమును పాడుచేయ వద్దనియు, ఆ నాలుగు జీవులమధ్య ఒక  స్వరము పలికినట్టు నాకు వినబడెను.''  ఇందునుబట్టి ధరలు పెంచుట, కల్తీ చేసి వ్యాపారము చేయుట వగైరా నరులలో వచ్చిన దురాశ ఫలితము.  ఇందులో అతని మనస్సులోని దురాశ గర్భము ధరించి కల్తీ వ్యాపార రూపములో పాపమును కనెను.  ఇలా ప్రతి విషయములోను చెప్పవచ్చునని గ్రహించాలి.

        ఇక - ''పాపము పరిపక్వమై మరణమును కనును,'' అనుటలో పైన చెప్పిన విధముగా తన దురాశ చేత పాపము చేయుచూ వున్నవాడు తన మరణానంతరము తన వెంట పాపపు క్రియలు వచ్చును కనుక ఇతను పాతాళ లోకములో వేదన పొందును.  అలాగే తన క్రియల చొప్పున క్రీస్తు ప్రభువుచే తీర్పు  తీర్చబడి రెండవ మరణమును పొందునని చెప్పుచున్నాడు.  

        ఆదిలో ఆదాము చేసిన దైవవ్యతిరేక ఆజ్ఞ నరులకు ఈ భౌతిక శరీరరీత్యా మరణమును కలిగించినది.  దీనిని మొదటి మరణమని చెప్పబడినది.  ఈ మొదటి మరణమును పొందియున్న మనము దురాశ చేత ఈడ్వబడినప్పుడు మనము శోధనలోకి వస్తాము.  యాకోబు 1:14, ''ప్రతివాడును తన స్వకీయమైన దురాశచేత ఈడ్వబడి మరులు కొల్పబడిన వాడై శోధింపబడును.''  అని చెప్పుటనుబట్టి మనము స్వంతముగా కలిగించుకొన్న దురాశ మనలను పాపము చేయువరకు ఈడ్చుకొని పోవును.  ఈ శోధనలో పాపము చేయునంతవరకు జరుగుచూనే వుండును.  ఇలా పాపము చేసినవారు దానినుండి తిరిగిరానివారై తమ దురాశ అంతకంతకు పెంపు జరుగుచూ - చివరకు అందరివలె మరణమును పొందుదురు.  ఇది వానిలోని దురాశ వలన చేసినది పాపపు క్రియలే కనుక అది వానిని రెండవ మరణమునకు అప్పగించునని ఇందులోని పరమార్థము.

15.  కొందరికి వారు మరణించబోవుచున్నారని ముందుగానే సూచనలు వారికి తెలియజేయబడుట

        కొందరు తమ వ్యాధులలో తాము మరణించబోవుచున్నామని చెప్పుదురు.  అయితే వీరు మరణిస్తారా లేదా అన్నది కాలమే వారికి తెలియజేస్తుంది.  అనగా ఇలా వీరు చెప్పిన తరువాత కొన్ని సంవత్సరములు బ్రతికినవారిని కూడా మనము మన నిజ జీవితములో చూస్తున్నాము.  ఇది ఒక ఊహ మాత్రమే.

        అయితే మరికొందరికి ఇతరులు ఫలానా సంఘటన జరిగే అంతవరకు నీవు మరణించవని తెలియజేయబడుతుంది.  ఇలా చెప్పువారు చాలా కొద్దిమంది మాత్రమే.  నా నిజ జీవితములో - నాకు పెండ్లి జరిగిన 6 సంవత్సరముల కాలము పిల్లలు లేకుండా వుండుట జరిగింది.  ఈ సమయములో నా భార్య అమ్మమ్మ, నా భార్యయైన భారతితో నీకు ఒక కుమారుడు పుట్టుట చూడగలనా?  నా వయస్సు మీరుచున్నదని అడిగెను.  నా భార్య అమ్మమ్మ నాకు కూతురు పుట్టిన తరువాత గాని ఆమె మరణము రుచి చూడదని తెలియజేయబడినది.  

పరిశుద్ధాత్మ ముందుగా బహిర్గతము చేసినవారికి మాత్రమే తాము ఏ సంఘటన తరువాత మరణించబోవుచున్నామో తెలుసుకొనగలుగుదురు

ఇంతకి ఈ విషయమును ఎవరు తెలియజేసారు?  అంటే పరిశుద్ధాత్మ.  పరిశుద్ధాత్మ మనలో క్రియ జరిగించి మన మనస్సును పురికొల్పుట చేయును.  అప్పుడు పై విధమైన ఆలోచన బహిర్గతము అగును.  అయితే నా భార్య అమ్మమ్మ నాకు ఐదవ సంతానముగా కూతురు జన్మించిన తరువాత ఆమె బహు వృద్ధాప్యములో మరణించుట జరిగింది.  కనుక దేవుడు ఎవరు ఎప్పుడు మరణించబోవుచున్నారో  తెలియజేయును.   కాని అది సూచనగా మాత్రమే చెప్పును.  అలాగే సుమెయోను విషయములో జరిగింది.  దేవుడు పంపించు రక్షణను కన్నులారా చూడనిదే మరణము చెందవని, ఆయనకు తెలియజేయబడింది.  లూకా 2:25-26, ''యెరూషలేము నందు సుమెయోనను ఒక మనుష్యుడుండెను.  అతడు నీతిమంతుడును భక్తిపరుడునైయుండి, ఇశ్రాయేలుయొక్క ఆదరణకొరకు కనిపెట్టువాడు;  పరిశుద్ధాత్మ అతనిమీద ఉండెను.  అతడు ప్రభువుయొక్క క్రీస్తును చూడక మునుపు మరణము పొందడని అతనికి పరిశుద్ధాత్మచేత బయలుపరచబడి యుండెను;  ఆత్మవశుడై అతడు దేవాలయములోనికి వచ్చెను.''  ఇందులో సుమెయోనుయొక్క మరణము ఎప్పుడు జరుగునని చెప్పబడినది?  క్రీస్తు ప్రభువును చూచిన తరువాత జరుగునని చెప్పబడినది.  ఇది తెలియజేసినది పరిశుద్ధాత్మ అని కూడా చెప్పబడినది.

        ఈ విధముగా పరిశుద్ధాత్మ ద్వారా వారి మరణమునకు సూచనయైన సంఘటన జరిగిన తరువాత ఆ దైవజనునిలో ప్రవర్తన ఎలా వున్నదో మనము తెలుసుకొనవలసియున్నది.  లూకా 2:27-32, ''అంతట ధర్మశాస్త్రపద్ధతి చొప్పున ఆయన విషయమై జరిగించుటకు తలిదండ్రులు శిశువైన యేసును దేవాలయములోనికి తీసికొనివచ్చినప్పుడు అతడు తన చేతులలో ఆయనను ఎత్తికొని దేవుని స్తుతించుచు ఇట్లనెను -  -నాథా, యిప్పుడు నీ మాటచొప్పున సమాధానముతో నీ దాసుని పోనిచ్చుచున్నావు;  అన్యజనులకు నిన్ను బయలుపరచుటకు వెలుగుగాను  నీ ప్రజలైన ఇశ్రాయేలుకు మహిమగాను  నీవు సకల ప్రజలయెదుట సిద్ధపరచిన నీ రక్షణ నేను కన్నులార చూచితిని.''  ఈ పరిశుద్ధాత్మ వలన తన మరణమునకు సంబంధించిన సంఘటన తెలుసుకొన్న సుమెయోను కలత చెందినట్లుగా మనము గ్రహించాలి, ఎందుకంటే - సుమెయోను దేవుని స్తుతించుచు   ''సమాధానముతో నీ దాసుని పోనిచ్చుచున్నావు,'' అని చెప్పుచున్నాడు.  తన ఆత్మకు సమాధానము తన మరణమునకు సూచనగా చెప్పబడిన క్రీస్తును చూచిన తరువాత అతనిలో కలిగినట్లుగా మనము గ్రహించాలి.  ఇందునుబట్టి నిజమైన దైవసేవకుడు తాను పొందబోవు రక్షణను తన భౌతిక శరీరముతో వుండగానే చూడాలన్న తాపత్రయము వుంటుంది.  ఈ తాపత్రయము నుండి సుమెయోనుకు నెమ్మది కలిగి రక్షణను పొందానన్న సంతృప్తి అతనిలో కలిగింది గాని తాను శరీరరీత్యా మరణించ బోవుచున్నానన్న బాధ అతనిలో లేదు.  ఇలా పరిశుద్ధాత్మ తన దాసులకు వారియొక్క పరిచర్యను, వారి ఉద్ధేశ్యమునుబట్టి వానికి సంభవించబోవు మరణము ఎప్పుడు జరుగునని తెలియజేయును.  అలాగే నా జీవితములో నా మరణమును గూర్చి కూడా పరిశుద్ధాత్మ దేవుడు దర్శనములో మాట్లాడుట జరిగింది.  ఇందులో నేను దైవ అత్యంత కృపచే రచించుచున్న ఈ సమస్త రచనలు పూర్తి అగువరకు     నాకు మరణము రాదని పరిశుద్ధాత్మ దేవుడు బయలుపరచుట జరిగింది.        

16.  దేవునికి ఎవరు హత్య గావింపబడి మరణించుట ఇష్టము

        దేవునికి మొదట తన ప్రియమైన కుమారుడు హింసించబడుట, సిలువమీద హత్య గావింపబడుట ఇష్టమైన చర్యగా యెషయా గ్రంథమందు చెప్పబడింది.  యెషయా   53:3-10, ''అతడు తృణీకరింపబడినవాడును ఆయెను   మనుష్యులవలన విసర్జింపబడినవాడును వ్యసనాక్రాంతుడుగాను, వ్యాధి ననుభవించినవాడుగాను మనుష్యులు చూడనొల్లనివాడుగాను ఉండెను.  అతడు తృణీకరింపబడినవాడు గనుక మనము అతనిని ఎన్నికచేయకపోతిమి.  నిశ్చయముగా అతడు మన రోగములను భరించెను  మన వ్యసనములను వహించెను  అయినను మొత్తబడినస వానిగాను  దేవునివలన బాధింపబడినవానిగాను  శ్రమనొందినవానిగాను మనమతనిని ఎంచితిమి.  మన యతిక్రమక్రియలనుబట్టి అతడు గాయపరచబడెను   మన దోషములనుబట్టి నలుగగొట్టబడెను   మన సమాధానార్థమైన శిక్ష అతనిమీద పడెను   అతడు పొందిన దెబ్బలచేత మనకు స్వస్థత కలుగుచున్నది.  మనమందరము గొఱ్ఱెలవలె త్రోవ తప్పిపోతిమి   మనలో ప్రతివాడును తనకిష్టమైన త్రోవకు తొలిగెను  యెహోవా మన యందరి దోషమును అతనిమీద మోపెను.  అతడు దౌర్జన్యము నొందెను  బాధింపబడినను అతడు నోరు తెరవలేదు   వధకు తేబడు గొఱ్ఱెపిల్లయు   బొచ్చు కత్తిరించువానియెదుట గొఱ్ఱెయు  మౌనముగా నుండునట్లు  అతడు నోరు తెరువలేదు.  అన్యాయపు తీర్పునొందినవాడై అతడు కొనిపోబడెను   అతడు నా జనుల యతిక్రమమునుబట్టి మొత్తబడెను గదా.  సజీవుల భూమిలోనుండి అతడు కొట్టివేయబడెను   అయినను అతని తరమువారిలో ఈ సంగతి ఆలోచించినవారెవరు?  అతడు మరణమైనప్పుడు భక్తిహీనులతో అతనికి సమాధి నియమింపబడెను   ధనవంతునియొద్ద అతడు ఉంచబడెను   నిశ్చయముగా అతడు అన్యాయమేమియు చేయలేదు   అతని నోట ఏ కపటమును లేదు.  అతని నలుగగొట్టుటకు యెహోవాకు ఇష్టమాయెను ఆయన అతనికి వ్యాధి కలుగజేసెను.  అతడు తన్నుతానే అపరాధపరిహారార్థబలిచేయగా అతని సంతానము చూచును.  అతడు దీర్ఘాయుష్మంతుడగును, యెహోవా ఉద్దేశము అతనివలన సఫలమగును.''  కనుక క్రీస్తు నలుగగొట్టబడుట యెహోవా దేవునికి ఇష్టమైన కార్యము.

హత్యగావింపబడి మరణించిన తన సేవకులను దేవుడు ఇష్టపడునుగాని చంపినవారిని కాదు

        అలాగే క్రీస్తు ప్రభువు తనకు సాక్షియై తనయందు విశ్వాసియై చంపబడి మరణించిన వానిని గూర్చి గొప్పగా చెప్పుట మనము వేదములో చదువగలము.  ప్రకటన  2:13, ''నా యందు విశ్వాసియై యుండి నన్ను గూర్చి సాక్షియైన అంతిపయనువాడు మీ మధ్యను చంపబడిన దినములలో,'' అని చెప్పుచున్నాడు.  కనుక ఇతడు హతసాక్షి.  ఇలా చంపబడాలన్నది క్రీస్తు ప్రభువుయొక్క నిర్ణయము.  ఇది క్రీస్తు ప్రభువుకు ఇష్టమైన చర్య, ఎందుకంటే తనకోసము తనకు సాక్షిగా విశ్వాసిగా వుండి, సాతాను సింహాసనము వున్న స్థలములో పోరాడి చంపబడుట దేవునిలో ఉన్నతమైన స్థానమును పొందుటయే. ఇటువంటివారిని  హత: సాక్షులుగా చెప్పబడింది.  వీరిలో కొంతమంది హత్య గావింపబడి చంపబడ వలెనని దేవుని కోరిక.  ప్రకటన 6:9-11, ''ఆయన అయిదవ ముద్రను విప్పినప్పుడు, దేవుని వాక్యము నిమిత్తమును, తాము ఇచ్చిన సాక్ష్యము నిమిత్తమును వధింప బడినవారి ఆత్మలను బలిపీఠము క్రింద చూచితిని.  వారు-నాథా, సత్యస్వరూపీ, పరిశుద్ధుడా, యెందాక తీర్పు తీర్చకయు, మా రక్తము నిమిత్తము భూనివాసులకు ప్రతిదండన చేయకయు ఉందువని బిగ్గరగా కేకలువేసిరి.  తెల్లని వస్త్రము వారిలో ప్రతివాని కియ్యబడెను; మరియు వారివలెనే చంపబడబోవువారి సహదాసులయొక్కయు సహోదరులయొక్కయు లెక్క పూర్తియగువరకు ఇంక కొంచెము కాలము విశ్రమింపవలెనని వారితో చెప్పబడెను.''  కనుక, ఈ యుగాంతము సంభవించాలంటే హతసాక్షులుగా మారవలసిన వారి సంఖ్య పూర్తి కావాలి అని తెలపబడింది.

        ఇందుచేత హతసాక్షిగా మారునట్లుగా సమస్తమును త్యజించి, దేవునికి క్రీస్తుకు సాక్షులుగా జీవిస్తూ భూమి అను సాతాను స్థానములలో సువార్త ప్రచారము కొనసాగించాలి.  అలా సాతాను స్థానములో జరిగించు సువార్త కార్యము బహు ప్రయాసకలదైనప్పటికిని సాతానుకు అది బహు కంటకముగా వుండి, దానిని నిలుపుటకు సాధ్యమైనంత విధముగా ప్రయత్నము చేయును.  ఆశ, వ్యామోహములతో వాని ఆత్మీయ జీవితమును నాశనము చేయుటకు ప్రయత్నించును.  ఇలా అనేకవిధములుగా ప్రయత్నించి, చివరిగా తన అనుచరులతో వానిని హత్య గావించును.  ఇటువంటివాడు దేవునిలో ఉన్నతమైన స్థానమును పొందినవాడు.  తన మరణము వరకు దేవుని కోసము పోరాడి క్రీస్తువలె తన ప్రాణమును పెట్టినవాడు కనుక ఇతను దేవునికి ఇష్టమైనవాడు.  ఇలా హత్యగావింపబడి మరణించినవారు తనకు ఇష్టమైనవారు కనుక వారిని పాతాళముయొక్క వశము చేయక, వారిని సమాధానకరమైన పరదైసులో బలిపీఠము క్రింద విశ్రాంతిలో వారిని వుంచి, వారికి ఎటువంటి బాధ కలుగకుండా దేవుడు చూచుకొనుచున్నాడు.  కనుక మనము కూడా సువార్త విషయములో ఆలోచింపక, భయపడక, ప్రాణమును పెట్టుటకు సిద్ధపడవలెనని ఈ పుస్తకము ద్వారా సువార్తీకులను కోరుకొనుచున్నాను, ఎందుకంటే ఈ చర్య దేవునికి ఇష్టమైన చర్య.  దీనిలో చెడు అర్థము తియ్యలేరు.  అనగా సువార్తీకులను చంపుట ఇష్టమైన చర్య కనుక దానిని నెరవేర్చుదామని చంపుటకు సిద్ధపడేవారు కొందరు ఉన్నారు.  కాని ఇందులో దేవుడు ఇష్టపడినది హత్యగావింపబడి చంపబడినవాడుగాని, చంపినవారు కాదు.  నరహత్య చేసినవానికి పాతాళములో సావాసము కల్పించియున్నాడు.  వానికి నిత్య వేదనేగాని వాని ఆత్మకు శాంతి లేదు.  ప్రకటన 21:8, '' పిరికివారును, అవిశ్వాసులును, అసహ్యులును, నరహంతకులును, వ్యభిచారులును, మాంత్రికులును, విగ్రహారాధకులును, అబద్ధికులందరును అగ్ని గంధకములతో మండు గుండములో పాలుపొందుదురు;   ఇది రెండవ మరణము.''  కనుక ఈ చర్యలో చంపేవారిని దేవుడు ఇష్టపడుట లేదని గుర్తించాలి.  అయితే చంపబడినవారు తన చివరి వరకు దేవునిలో సాక్షిగా వుండి, తన ఆత్మను ఉన్నతస్థితిలో వుంచి చనిపోయారు కనుక వారు దేవునికి ఇష్టులు అని గ్రహించాలి.  మత్తయి 5:10-12, ''నీతినిమిత్తము హింసింపబడువారు ధన్యులు; పరలోక రాజ్యము వారిది.  నా నిమిత్తము జనులు మిమ్మును నిందించి హింసించి మీమీద అబద్ధముగా చెడ్డమాటలెల్ల పలుకునప్పుడు మీరు ధన్యులు.  సంతోషించి ఆనందించుడి, పరలోకమందు మీ ఫలము అధికమగును.  ఈలాగున వారు మీకు పూర్వమందుండిన ప్రవక్తలను హింసించిరి.''

17.  చనిపోకముందే కొందరు తమను పవిత్ర భూమిలో పాతిపెట్టమని తెలుపుట

        ఇలా కొంతమంది చెప్పుట మనము చూస్తుంటాము.  అలాగే ఇంకొంతమంది తమ దగ్గర వున్న ఆస్తిని పంచుకొనుట కన్నా తమ ఇష్ట ప్రకారము ముందుగానే వీలునామా వ్రాస్తారు.  ఇలా వారివారి అభీష్టాన్ని ముందుగా తెలియజేస్తారు.  తమ దగ్గర వున్న నగలను, తమ మనమరాలైన పలానా పలానా అమ్మాయికి ఇయ్యమని, భూమిని తమ కుమారులను సమముగా పంచుకోమని చెప్పేవారు వున్నారు.  అయితే అవన్నీ వారు మరణించిన తర్వాతనే జరగాలి.  వారి మరణానికి ముందు కాదు.  ఎందుకంటే వారిపై వారికి నమ్మకము లేదు.  తమ దగ్గర వున్నది ఇచ్చేస్తే తమ వారు తమని సరిగా చూచుకోరేమోనన్న బెంగతో వారు అలా వీలునామా వ్రాయిస్తారు.  వీలునామాను వారి జీవిత కాలములో అనేకమార్లు మార్చవచ్చును.

ఈ మట్టి శరీరమును ఎక్కడ సమాధి చేసినను ఆత్మకు కలుగు మేలు ఏమి లేదు

        ఇవన్నీ ఒక ఎత్తు అయితే చనిపోయిన తరువాత వారు ఎక్కడ పూడ్చిపెట్టవలెననునది ఒక ఎత్తు.  సాధారణముగా చనిపోక ముందు కొద్దిమంది మాత్రమే ఈ కోరికను చెప్పుట జరుగును.  మిగిలినవారు చనిపోయిన తరువాత వారు ఎక్కడ ఇష్టపడితే అక్కడ పూడ్చుట చేయుదురు లేక కాల్చుట జరుగును.  హిందువులలో కాల్చిన శరీరములోని కొంత బూడిదను ఎముకలను నిమజ్జనము అను పేరుతో నదులలో కలుపుతారు.  ఇది ఒక సాంగ్యము.  అయితే ఏ నదిలో కలపాలో వీరిలో కొందరు వారి మరణమునకు ముందే వారి వారికి తెలియజేస్తుంటారు.  దీనికి కారణము నదులు పవిత్రమైనవని వాటిలో నిమజ్జనము చేయుట ద్వారా పాపాలు తొలగి పరలోకమునకు చేరుతామని అనుకొంటారు.

        ఏది ఏమైనప్పటికి బైబిలు గ్రంథములో కూడా తన మరణానంతరము కనీసము తన ఎముకలనైనా కనాను అను పవిత్ర భూమిలో సమాధి చేయమని కోరుకొన్నవారు వున్నారు.  హెబ్రీ 11:22, ''యోసేపు తనకు అవసానకాలము సమీపించినప్పుడు విశ్వాసమునుబట్టి ఇశ్రాయేలు కుమారుల నిర్గమమునుగూర్చి ప్రశంసించి తన శల్యములను గూర్చి వారికి ఆజ్ఞాపించెను.''  ఆది 50:22-26, ''యోసేపు అతని తండ్రి కుటుంబపువారును ఐగుప్తులోనివసించిరి, యోసేపు నూటపది సంవత్సరములు బ్రదికెను.  యోసేపు ఎఫ్రాయిముయొక్క మూడవ తరము పిల్లలను చూచెను;  మరియు మనష్షే కుమారుడైన మాకీరునకు కుమారులు పుట్టి యోసేపు ఒడిలో ఉంచబడిరి.  యోసేపు తన సహోదరులను చూచి-నేను చనిపోవుచున్నాను;  దేవుడు నిశ్చయముగా మిమ్మును చూడవచ్చి, యీ దేశములోనుండి తాను అబ్రాహాము ఇస్సాకు యాకోబులతో ప్రమాణము చేసియిచ్చిన దేశమునకు మిమ్మును తీసికొని పోవునని చెప్పెను.  మరియు యోసేపు - దేవుడు నిశ్చయముగా మిమ్మును చూడవచ్చును;  అప్పుడు మీరు నా యెముకలను ఇక్కడనుండి తీసికొని పోవలెనని చెప్పి ఇశ్రాయేలు కుమారులచేత ప్రమాణము చేయించుకొనెను.  యోసేపు నూటపది సంవత్సరములవాడై మృతి పొందెను.  వారు సుగంధ ద్రవ్యములతో అతని శవమును సిద్ధపరచి ఐగుప్తు దేశమందు ఒక పెట్టెలో ఉంచిరి.''  ఈ విధముగా యోసేపు తన శరీరమును కాదుగాని తన ఎముకలను దేవుడు వాగ్దానముగా అబ్రాహాము ఇస్సాకు, యాకోబులతో చెప్పిన స్థలములో సమాధి చేయమని ప్రమాణము చేయించుకొన్నాడు.  ఇలా ఆది కాలము నుండియే పవిత్ర భూమి అను పేరు వచ్చింది.  అందులో తమను సమాధి చేయమని ముందుగానే చెప్పి చనిపోవువారు ఆదికాలమునుండి వున్నారు.

        ఈ విషయమును మోషే గుర్తించుకొని ఆ ఎముకలను ఐగుప్తు నుంచి కానానుకు వెళ్ళు సందర్భములో తనతోబాటుగా తీసుకొని పోయెను.  నిర్గమ 13:19, ''మరియు మోషే యోసేపు ఎముకలను తీసికొని వచ్చెను.  అతడు-దేవుడు నిశ్చయముగా దర్శనమిచ్చును;  అప్పుడు మీరు నా ఎముకలను ఇక్కడనుండి తీసికొని పోవలెనని ఇశ్రాయేలీయుల చేత రూఢిగా ప్రమాణము చేయించుకొని యుండెను.''   యెహోషువ 24:32, ''ఇశ్రాయేలీయులు ఐగుప్తులోనుండి తెచ్చిన యోసేపు ఎముకలను షెకెములో, అనగా యాకోబు నూరు వరహాలకు షెకెము తండ్రియైన హమోరు కుమారుల యొద్ద కొనిన చేని భాగములో వారు పాతిపెట్టిరి.  అవి యోసేపు పుత్రులకు ఒక స్వాస్థ్యముగా ఉండెను.''  ఇలా అనేకమంది అనేక రీతులుగా చెప్పుచుందురు.  మనము సాధారణముగా కథోలిక్‌ చర్చీలలో చూచినట్లైతే, చర్చీలోను, చర్చి ప్రాంగణములలో కొందరి సమాధులను చూడవచ్చును.  వారు చర్చిని పవిత్ర స్థలముగా భావించుట, ఆ చర్చీలో జరిగిన అద్భుతములు ఇవన్నీ లెక్కించుకొని తమను ఆ చర్చిలోనే పూడ్చుమని యోసేపు వలె కోరుకున్నవారు.  అలాగే ప్రభువు నందు నిద్రించిన కొందరి శరీరములు చెడిపోక జీవించినవారివలె వున్నవారిని కూడా చర్చీలలో భద్రపరచుట మనము చూడవచ్చును.  ఉదా :-  గోవాలోని ఒక చర్చీలో సెయింట్‌ జేవియర్‌ భౌతికకాయమును ఒక ప్రక్కన గాజు పెట్టెలో అందరు చూచుటకు వుంచి యున్నారు.  ఇది సుమారు 500 సంవత్సరములనుండి యున్నది.

గంథకర్తనైన నేను నా మరణానంతరము నా శరీరమును రెడ్డిపాళెం గ్రామములోని చర్చి స్థలములో పూడ్చమని నా కుమారులకు చెప్పియున్నాను

        అలాగే గ్రంథకర్తనైన నేను నా కుమారులకు, కుమార్తెకు నా మరణానంతరము నా భౌతిక కాయమును రెడ్డిపాళెములోని నా ప్రభువు తల్లి చర్చి ప్రాంగణము నందు సమాధి చేయమని చెప్పియున్నాను.  ఎందుకంటే నేను క్రైస్తవునిగా మారుట, ఈ రచన ఇంత ఉన్నతమైన స్థితికి రావటానికి కారణము అక్కడ నాకు కలిగిన దర్శనములు.  కనుక నా దృష్టిలో ఆ రెడ్డిపాళెము చర్చి స్థలము ఒక పవిత్రమైనది.  దేవుడు నన్ను ఎన్నుకొన్న స్థలము.  అందుచేత నా మరణానంతరము నా  శరీరము అందు సమాధి చేయమని చెప్పుట జరిగింది.

        ఏది ఏమైనప్పటికి ఇవన్నీ మన కోరికలే కాని మనము ఎక్కడ పూడ్చినను అనగా పవిత్ర స్థలములో పూడ్చినను లేక పూడ్చకపోయినను ఆత్మీయ దృష్టిలో దీనికి ప్రాధాన్యత లేదు, ఎందుకంటే ఈ శరీరము మన మరణానంతరము ఈ భూమిపాలు కావలసినదే.  కాని పరలోకమునకు చేర్చబడదు.  ఏనాటికైనను ఈ శరీరము మట్టిపాలు కావలసినదే.  అయితే దేవుని మహిమను పొందినవి ఈ చెడిపోని పరిశుద్ధుల శరీరములు వారి మరణానంతరము కూడా చాటుచున్నట్లుగా మనము గుర్తించాలి.  అయితే మరణానంతరము మన ఆత్మ శరీరమును వదిలివేయును.  కనుక శరీరము ఏనాటికైనను మట్టిపాలు అగును.  అయితే ఆత్మ వెంట వెళ్ళునవి కేవలము క్రియలు మాత్రమే.  అవి చెడ్డవైనను, లేక మంచివైనను ఆత్మ వెంట వెళ్ళునని గుర్తించాలి.  ప్రకటన 14:13, ''అంతట-ఇప్పటినుండి ప్రభువునందు మృతినొందు మృతులు ధన్యులని వ్రాయుమని పరలోకమునుండి యొక స్వరము చెప్పగా వింటిని.  నిజమే;  వారు తమ ప్రయాసములు మాని విశ్రాంతి పొందుదురు;  వారి క్రియలు వారి వెంట పోవునని ఆత్మ చెప్పుచున్నాడు.''  కనుక ఈ మట్టి శరీరమును ఎక్కడ సమాధి చేసినను ఆత్మకు కలుగు యోగ్యత ఏమి లేదని గ్రహించాలి.

18.  శరీరరీత్యా మరణమును చూడక బ్రతుకు నరుడెవడు?

        కీర్తనలు 89:48, ''మరణమును చూడక బ్రదుకు నరుడెవడు?  పాతాళముయొక్క వశము కాకుండ తన్నుతాను తప్పించుకొనగలవాడెవడు?''

హేబెలు హత్యతో మొదలైన మరణమను క్రియ యుగాంతము వరకు కొనసాగును

        ఎవరైనా వున్నారా?  ఎవరు లేరనే చెప్పాలి.  హేబెలు హత్యతో మొదలైన మరణక్రియ యుగాంతము వరకు కొనసాగును.  ఈ మరణమును చూడక బ్రతుకు నరుడెవడు లేడని చెప్పవచ్చును.  చివరకు క్రీస్తు ప్రభువుకు కూడా సిలువ మీద మరణించెనని గ్రహించాలి.  లూకా  23:46, ''అప్పుడు యేసు గొప్ప శబ్దముతో కేకవేసి - తండ్రీ, నీ చేతికి నా ఆత్మను అప్పగించుకొనుచున్నాననెను.  ఆయన యీలాగు చెప్పి ప్రాణము విడిచెను.''  ఇలా క్రీస్తు ప్రభువు కూడా మరణించాడు.  దేవుని కుమారుడు తన ప్రాణమును నరుల కొరకు పెట్టుటకు ఈ లోకానికి వచ్చాడు.  అలాగే సిలువ బలియాగము ద్వారా మరణించి నరులను రక్షించాడు.  ఏది ఏమైనప్పటికి క్రీస్తు ప్రభువు కూడా శరీరరీత్యా మరణించినట్లుగా గ్రహించాలి.  కీర్తన 82:6-7, ''మీరు దైవములనియు   మీరందరు సర్వోన్నతుని కుమారులనియు నేనే సెలవిచ్చియున్నాను.   అయినను ఇతర మనుష్యులు చనిపోవునట్లు మీరును చనిపోవుదురు   అధికారులలో ఒకడు కూలునట్లు మీరును కూలుదురు.''

        బైబిలు చరిత్రలో ఇంకొక ఇద్దరు ఉన్నారు.  వారు మరణమును రుచి చూడకుండా పరదైసుకు కొనిపోబడిరి.  వీరిలో మొదటివాడు హనోకు.  రెండవవాడు ఏలియా.  హనోకు దేవునితో నడచి పరదైసులో చేర్చబడితే ఏలీయా సుడిగాలిలో ఆరోహణమై పరదైసులో చేర్చబడెను.  ఇలా వీరిద్దరు మరణము నుండి తప్పింపబడినవారు.  కాని వీరు కూడా యుగాంతములో ఇద్దరు ప్రవక్తలుగా భూమిపైకి దిగి వచ్చి సాతాను ప్రతిరూపమైన క్రూరమృగము చేతిలో చంపబడవలసి యున్నది.  ప్రకటన 11:3, ''నేను నా యిద్దరు సాక్షులకు అధికారము ఇచ్చెదను; వారు గోనెపట్ట ధరించుకొని వెయ్యిన్ని రెండువందల అరువది దినములు ప్రవచింతురు.''  ప్రభువు సువార్త పరిచర్య చేసిన దినములు కూడా 42 నెలలు.  అనగా ఇంచుమించు మూడున్నర సంవత్సరాలు.  ప్రకటన 11:7-8, ''వారు సాక్ష్యము చెప్పుట ముగింపగానే అగాధములోనుండి వచ్చు క్రూరమృగము వారితో యుద్ధముచేసి జయించి వారిని చంపును.  వారి శవములు ఆ మహాపట్టణపు సంతవీధిలో పడియుండును; వానికి ఉపమానరూపముగా సొదొమ అనియు ఐగుప్తు అనియు పేరు; అచ్చట వారి ప్రభువుకూడ సిలువవేయబడెను.''  కనుక వీరు కూడా మరణమును తప్పించుకోలేక పోతున్నారు.  కనుక ప్రతి ఒక్కరు మరణమును రుచి చూడవలసినదేనని గ్రహించాలి.  దీనినే మొదటి మరణము అని అందురు.  మొదటి మరణము భూమిమీద పుట్టిన ప్రతి ఒక్కరు రుచి చూడవలసినదేనని గ్రహించాలి.  1 కొరింథీ 15:50.

19.  ఇంటి ముందు మంట వేసి మరణించినవారిని గూర్చి తెలుపుట

        ఇది ఒక సూచనగా ఆ రోజులలో ఇశ్రాయేలీయులు చేసేవారు.  ఈ మంటను బట్టి ఆ ఇంటిలో మరణించిరని తెలుసుకొనుట జరిగేది.  ఇలా ప్రతి ఒక్కరి విషయములో చేసేవారు.  అలాగే యెహోరాము రాజు చనిపోయినప్పుడు అతనిని దావీదు నగరమున పాతిపెట్టిరిగాని రాజ సమాధులలో అతనిని పాతిపెట్టలేదు.  

యూదుల ఆచారాలలో ఇంటి ముందు మంట వేసి ఆ ఇంటిలో మరణించిరని తెలుపుట కూడా ఒకటి

*2 దినవృత్తాంతములు 21:19, ''రెండు సంవత్సరములు వ్యాధి బలమగుచు వచ్చి ఆ వ్యాధిచేత అతని పేగులు పడిపోయి బహు వేదన నొందుచు అతడు మరణమాయెను.  (ఇంగ్లీషు హోలి బైబిల్‌ ద కింగ్‌ జేమ్స్‌ వర్షన్‌ నందు తమ పితరులకు వేసిన మంట వలె జనులు ఇతని కొరకు వేయలేదని వ్రాయబడి యున్నది.) అతని జనులు అతని పితరులకు చేసిన ఉత్తరక్రియలు అతనికి చేయలేదు.''  కనుక  యెహోరాము పితరులకు జరిగినట్లు సంతాప సూచకముగా మంట వేయుట యెహోరాము విషయములో జరగలేదు.  ఇది ఒక సూచన మాత్రమే.  ఎందుకంటే ఇంటి ముందు మంట వేసిన ఆ యింటిలో ఎవరో చనిపోయారని అందరికి తెలుస్తుంది.  అంటే ఇంటిలో ఒక వ్యక్తి చనిపోయిన వారి కుటుంబమువారు వెళ్ళి, మా ఇంటిలో చనిపోయారని వేరే ఇంటివారికి చెప్పరు.  వారు అంగలార్పు వేదన పొందుచుందురు కనుక వారి ఇంటి ముందు మంట వేసిన అది చూచిన ప్రతి ఒక్కరికి తమ ఇంటిలోని మరణమును గూర్చి తెలియజేసినట్లు అగును.  అయితే చలి కాచుకొను మంటకు, ఈ మంటకు తేడా ఉన్నదని గ్రహించాలి.  చలి కాచుకొను మంట చుట్టూ జనులు ప్రోగు అగుదురు.  కాని ఈ మంట చుట్టూ జనులు ప్రోగుకారు అని గ్రహించాలి.

        కనుక ఇంటి ముందు మంట వేయుట అనునది తమ ఇంటిలో మరణించినవారిని గూర్చి అందరికి తెలుపు ఒక ఆచారముగా భావించాలి.

20.  మరణదినము జన్మదినము కన్నా మేలైనది

         ప్రసంగి 7:1-2, ''సుగంధతైలముకంటె మంచి పేరు మేలు;  ఒకని జన్మదినముకంటె మరణదినమే మేలు.  విందు జరుగుచున్నయింటికి పోవుటకంటె ప్రలాపించుచున్నవారి యింటికి పోవుట మేలు;  ఏలయనగా మరణము అందరికినివచ్చునుగనుక బ్రదుకువారు దానిని మనస్సున పెట్టుదురు.''

        జన్మదినము :-  ఒక బిడ్డను మన సమాజములోనికి మనము ఆహ్వానిస్తూ, సంతోషముగా గడుపుట, విందు వినోదాలతో ఆనందించుట చేస్తాము.  ఈ ఆనందము మితిలేని విధముగా జరిగించుట మనము చూస్తున్నాము.  ప్రతి ఒక్కరి జీవితములో జన్మదినము వున్నది.  ప్రతి ఏటా ఈ దినమును క్రొత్త బట్టలతో చాక్లెట్‌, కేకులు మొదలైనవాటిని పంచుతూ మన చుట్టు ప్రక్కల వారితో ఆనందాన్ని పంచుకొనుట జరుగును.  నరుని జన్మదినము డాక్టర్లు నిర్ణయించి చెప్పుదురు.  ఒకరోజు అటోఇటో మొత్తానికి పుట్టుట జరుగును.

నరుని పుట్టుకతోనే వాని మరణదినము ఒకటున్నదని మనస్సున కలిగియుండాలి

        మరణదినము :-  జన్మదినము వున్నట్లే ప్రతి ఒక్కరికి మరణ దినము కూడా వున్నది.  ఇది అందరికి తెలిసిన విషయమే.  అయితే ఈ మరణదినము ఎలాగుండునో ఎవ్వరికి తెలియదు.  అయితే తన మరణదినమును గుర్తు చేసుకొనువారు అరుదని మనము చెప్పవచ్చును.  జన్మదినమునకు ప్రతియేట గుర్తించుకొని దానిని బహు జాగ్రత్తగా ఉన్నతముగా ఆనందించుట జరుగును.  కాని నరుడు తన మరణదినమును తను జరుపుకొనలేడు.  ఈ మరణదినము తన శరీరమును ఆత్మ వదిలి వెళ్ళు దినమని చెప్పవచ్చును.  ఈ దినము తరువాత, ఈ శరీరము క్రుళ్ళి మన్నుగా మారిపోయి ఈ జీవి ఇక కనబడడు.  వీనిలోని ఆత్మ కొనిపోబడును.  ఇక అది ఎన్నటికి రాదు.  తిరిగిరాని లోకానికి అది వెడలిపోవును.  కనుక మరణించిన నరునికి సంబంధించినవారు దు:ఖములో మునిగి ఏడ్పులతోను, రోదనలతోను చూచు వారికి భయాందోళన కలిగించుచూ వుందురు.  ప్రతి ఒక్కరి మదిలో ఏదో తెలియని స్తబ్ధత నెలకొని ఆలోచనాశక్తి నశించి ఆ దినమున బాధగా తన దైనందిన జీవితాన్ని వీడి జీవించుదురు.  కాని మరణించిన ఆత్మ వారిని వదిలి తెలియని లోకానికి వెళ్ళునుగాని దానికి దు:ఖము, వేదన వంటి ఇహలోక సంబంధమైనవి వుండవు.  ఆత్మకు వేదన, దు:ఖము మొదలైనవి వారు శరీరరీత్యా జరిగించిన దుష్ట కార్యములను బట్టి కలుగునుగాని అందరికి కాదు.  నీతిగా జీవించినవారి ఆత్మలకు మరణానంతరము విశ్రాంతిలో వుందురు.

        అయితే మరణించిన వానికి లేని దు:ఖము ఆత్మను వదిలిన శరీరమును చూచువారు అనుభవించుదురు.  వారి ఇంటివారు పరిమితి లేని బాధను అనుభవించుట చూస్తున్నాము.  కొందరిలో అయితే వారి జీవితాంతము వారికి సంబంధించిన వారి మరణదినమును అప్పుడప్పుడు గుర్తు చేసుకొంటూ బాధపడుట చూస్తున్నాము.  వీటన్నింటికి కారణము ఒక్కటే జన్మదినమున మన మధ్య నూతన జీవి చేరుట ఆనందమును ఇచ్చుచున్నది.  అయితే మరణ దినమున ఒక జీవి తిరిగిరాని స్థితికి వెళ్ళుట దు:ఖమునకు కారణమై యున్నది.  అయితే బైబిలు గ్రంథములో ప్రసంగి 7:1, ''సుగంధతైలముకంటె మంచి పేరు మేలు;  ఒకని జన్మదినముకంటె మరణదినమే మేలు.'' అని చెప్పుచున్నాడు.  మరణదినము జన్మదినము కన్నా మేలు ఎలాగైనదో ఇప్పుడు తెలుసుకొందము.

ప్రసంగి చెప్పినట్లుగా -వ్యర్థము అంతయును వ్యర్థమే.  గంథకర్తనైన నేను చెప్పునదేమనగా - మనము భౌతిక శరీరముతో చేసిన మంచి చెడు కియ్రలు తప్ప అంతయు వ్యర్థమే

        జన్మదినము ఆనందముతో కూడినది.  ఒక ఆత్మ శరీర రూపములో భూమిపై ప్రసవించబడి అందరికి ఆనందమును కలుగజేయునుగాని, ఈ భూమిపై ఆత్మకు ఆనందమనేది శూన్యమైనదని చెప్పవచ్చును.  ఈ భూమిపై ప్రతిదీ పోరాటమే.  నరుని జీవితమే ఒక పోరాటము.  దీనినిగూర్చి ప్రత్యేకముగా చెప్పనక్కరలేదు.  ప్రతి విషయము శ్రమతో కూడినది, 100 రోజుల శ్రమ ఒక దినము ఆనందమన్న సామెతగా నరుని జీవితము వుండును.  ఇట్టి స్థితిలో నీతిగా పరిశుద్ధతగా జీవించాలి.  లేని పక్షములో ఈ ఆత్మ మరణానంతరము దు:ఖమును ఆనుభవించును.  ఈ దు:ఖము వర్ణింపశక్యము కానిదని గుర్తించాలి.  యెషయా 66:24, ''పురుగు చావదు వాటి అగ్ని ఆరిపోదు,''  అనగా ఆత్మకు నశింపు లేదు.  బాధించు అగ్ని ఆరిపోదు.  ఇది మరణించిన ఆత్మలలో శరీరముతో జీవించునప్పుడు నీతి పరిశుద్ధతగా జీవించనివారి స్థితి.

        అయితే మరణించిన దినము మేలు అని చెప్పుటకు ఒక మర్మము వున్నది.  ఇందులో - మరణించిన  దినము మరణించిన వాని బంధువులు దు:ఖముతో వుందురుగాని ఆత్మ శరీర బంధముల నుండి విముక్తి జరుగును.  

ఉదా :-  1.  ఒక నీతిమంతుడు మరణించిన వాని ఆత్మతో బాటుగా వాడు చేసిన నీతి కార్యములు వెంబడించును.  కనుక వాడు పరిశుద్ధుడుగా తీర్చబడి విశ్రాంతిలో ఆనందమును అనుభవించును.  కనుక నీతిమంతునికి మరణదినము మేలైనది.  

        2.  ఒక అపరిశుద్ధుడు మరణించిన వాని ఆత్మతోబాటుగా వాడు చేసిన అవినీతి లేక దుష్ట కార్యములు వానిని వెంబడించును.  వానిని అపరిశుద్ధుడుగా లేక కడమవాడుగా తీర్చబడి పాతాళములో వేదన అటు తరువాత అగ్నిగుండములో పాలిపంపులు పొందును.  అయినను వీని మరణదినమే మేలు.  ఎందుకంటే వాడు చేయు దుష్ట కార్యములకు కూడా అంతటితో ఆగిపోవును.  లేకుంటే ఇంకా ఎక్కువ కార్యములు చేసి తన ఆత్మను అధోగతికి తీసుకొని పోవునని గుర్తించాలి.

మరణదినమున నీతిమంతుడు       

 1.  ఆత్మ శరీరమును వదులును.

2.  వీని నీతి కార్యములు ఆగిపోవును.        

3.  పరిశుద్ధుడుగా తీర్పు తీర్చబడును.        

4.  పరదైసులో చేర్చబడును.                

5.  విశాంతిలో వుండును.                

6.  ఆకలిదప్పిక లేక నెమ్మది పొందును.

7.  వీని మరణదినము మేలు, ఎందుకంటే నీతిమంతునిగా విశ్రాoతిలో ప్రవేశించాడు.

మరణదినమున అపరిశుద్ధుడు:

   1.  ఆత్మ శరీరమును వదులును

2.  వీని అవినీతి కార్యములు ఆగిపోవును.

3.  అపరిశుద్ధుడుగా తీర్పు తీర్చబడును.

4.  పాతాళములో చేర్చబడును.

5.  వేదనలో వుండును.

6.  ఆకలిదప్పికతో నోరు ఎండి ఆత్మీయ వేదన పొందుదురు.

7.  మరణదినమే మేలు, ఎందుకంటే ఆ దినముతో వాని చెడు కార్యములు ఆగిపోవును.

        అందుకనే ప్రసంగి తన బోధలో జన్మదినము కన్నా మరణ దినము మేలైనదని తెలియ జేస్తున్నాడు.  అంతేకాదు జన్మదినమున నరులు ఆనందమును అనుభవించినను తమలో పశ్చాత్తాపము వుండదు.  ఉపదేశము వినినను వారిలో డాంబికము కనిపించును.  అలాగే మరణ దినమున ఈ స్థితి మనకు కనిపించదు.  ప్రతి ఒక్కరిలో తెలియని వేదన వారు అనుభవించుట జరుగును.  ఈ స్థితిలో కనీసము వారు చేయు దుష్ట కార్యములను కొంతకాలము చేయకుండా ఉండుట జరుగును.  కనుక జన్మదినము కన్నను మరణదినమే మేలు.

21.  మరణించినవారి కొరకు దు:ఖించుట / అంగలార్చుట

        మరణించిన వారి కొరకు దు:ఖించుట ఆదికాలము నుండి యుగాంతము వరకు వున్నది.  తనవాడు ఇక లేడు అను బాధ వానిలో దు:ఖమునకు కారణము. ఈ దు:ఖము ఒక్కొక్కరికి ఒక్కొక్క రీతిగా యుండుట చూస్తున్నాము.  ఒక వ్యక్తి మరణము, వాని రక్తసంబంధులు అనగా తల్లి, దండ్రి, కుమారులు, సహోదరులు, సహోదరీలకు బహు దు:ఖము కలిగిస్తే, వాని స్నేహితులకు మాత్రము కొంత తక్కువ దు:ఖము వుండును.  ఇంకొంత దూరపు బంధువులకు ఇంకా తక్కువ దు:ఖము కలుగును.  అయితే అసలు ఆయన ఎవరో తెలియని వారికి దు:ఖము ఉండదు గాని మరణ భీతి మాత్రము వానికి కలుగును.  ఇంకా వాని శత్రువులకు వీని మరణము ఆనందమును కలిగించును.    

మరణము తమ వారిలో సంభవించిన దు:ఖము కలుగుట సహజము.  ఆ దు:ఖము శృతి మించిన  దైవశాపమునకు కారణమగును

        ఇలా ప్రతి ఒక్కరి విషయములో మరణించిన వారికి కలుగు దు:ఖములో తేడా వుండుట మనము చూడవచ్చును.  తిండితిప్పలు మాని శవము దగ్గర బాధపడుచు, కన్నీరు కార్చుచూ, రొమ్ము కొట్టుకొనుచు కూర్చున్నవారిని చూడవచ్చును.  అలాగే వారిని మించి దు:ఖించువారివలె నటించువారిని అదే స్థలములో చూడ వచ్చును.  కన్నీరు కార్చుచూ నిశ్శబ్దముగా వుండువారిని చూడవచ్చును.  దు:ఖమును దిగమ్రింగి డాంబికముగా కనబడువారిని అదే స్థలములో చూడవచ్చు.  ఇలా అన్ని రకాల వారు వున్నట్లుగా మనము చూస్తున్నాము.  దీని కంతటికి కారణము ఇక ఆ వ్యక్తి ఇక వుండడను బాధయే.  ఆ దినము తరువాత జ్ఞాపకాలు మాత్రమేగాని ఆ వ్యక్తిని చూచుటకు అవకాశము వుండదు.  అలాగే ఆది 50:1, ''యోసేపు తన తండ్రి ముఖముమీద పడి అతనిగూర్చి యేడ్చి అతని ముద్దు పెట్టుకొనెను.''  ఇది యోసేపు ఇశ్రాయేలను తన తండ్రి మరణించినప్పటి సంఘటన.  ఆది 50:10, ''యెర్దానునకు అవతలనున్న ఆఠదు కళ్లమునొద్దకు చేరి అక్కడ బహు ఘోరముగా అంగలార్చిరి.  అతడు తన తండ్రినిగూర్చి యేడు దినములు దు:ఖము సలిపెను.''  అలాగే దావీదు, అబ్షాలోము మరణించినప్పుడు కూడా ఆ దు:ఖమును చూపుట జరిగింది.  

        2 సమూయేలు 19:1, ''రాజు తన కుమారునిగూర్చి దు:ఖించుచు ఏడ్చుచున్నాడను సంగతి ఆ దినమున జనులందరు విని,''  అలాగే దావీదు మహారాజు, అబ్నేరు చనిపోయినప్పుడు కూడా తన వారినందరిని దు:ఖించమని చెప్పుట గురించి మనము 2వ సమూయేలు 3:31లో చదువగలము.  అలాగే యేసుక్రీస్తును సిలువ బలియాగమునకు యూదులు తీసుకొని వెళ్ళునప్పుడు యెరూషలేము స్త్రీలు రొమ్ము కొట్టుకొనుచూ దు:ఖించుట చదువగలము.  హేరోదు మహారాజు జ్ఞానులు తనను మోసగించిరని తెలుసుకొని క్రీస్తును చంపదలచి 2 సంవత్సరములలోపు మగపిల్లలనందరిని చంపించుట చేత ఆ ప్రాంతమంతయు దు:ఖసాగరములో మునిగిపోయెనని వ్రాయబడి యున్నది.  మత్తయి 2:17-18, ''అందువలన -రామాలో అంగలార్పు వినబడెను   ఏడ్పును మహా రోదనధ్వనియు కలిగెను   రాహేలు తన పిల్లలవిషయమై యేడ్చుచు వారు లేనందున ఓదార్పు పొందనొల్లక యుండెను  అని ప్రవక్తయైన యిర్మీయా ద్వారా చెప్పబడిన వాక్యము నెరవేరెను.''  ఇలా మరణించిన వారి విషయములో శరీరరీత్యా దు:ఖము కలుగుట సహజమే అని మనము గ్రహించాలి.  ఈ దు:ఖములో దేవుని నిందించువారిని అనేకులను మనము చూస్తున్నాము.  ఇది చాలా తప్పు.  శరీరరీత్యా మరణము తప్పదు.  కనుక ఒకరు ముందు - ఇంకొకరు వెనుక.  ఇలా ప్రతి ఒక్కరు చనిపోవుట జరగవలసినదే.  దీనిని గూర్చి దు:ఖించ వచ్చునుగాని దేవుని నిందించుట తప్పుగా గ్రహించాలి.  దేవుని అవతారము, దేవుని కుమారుడు, మన రక్షకుడైన యేసుక్రీస్తు ప్రభువు మనకొరకు సిలువ బలియాగము చేసి మరణించెనని గుర్తించుకొని దు:ఖితులై పాపము చేయక క్రీస్తు చెప్పిన వాక్యమును అనుసరించవలసినవారమై యున్నాము.  ఆయన మరణమును నిత్యము జ్ఞాపకపరచుకొని ఆయన రాజ్య స్థాపన కొరకు జీవించాలి.

        అలాగే దైవవ్యతిరేకి, తండ్రిని చంప జూచినవాడు, ఇశ్రాయేలీయులందరికి తెలిసినట్లుగా తల్లితో సమానమైన తన తండ్రి ఉపపత్నులను కూడినవాడు మరణించినప్పుడు దేవుడు ఆ మరణమును హర్షించలేదు.  అనగా అబ్షాలోము మరణించినప్పుడు దు:ఖించుచున్న దావీదు మహారాజును మందలించినట్లుగా గుర్తించాలి.  2 సమూయేలు 19:1-7, ''రాజు తన కుమారునిగూర్చి దు:ఖించుచు ఏడ్చుచున్నాడను సంగతి ఆ దినమున జనులందరు విని, యుద్ధమందు సిగ్గుతో పారిపోయిన జనులవలె వారు నాడు దొంగనడకలతో వచ్చి పట్టణములో ప్రవేశించిరి;  నాటి విజయము జనులకందరికి దు:ఖమునకు కారణమాయెను.  రాజు ముఖము కప్పుకొని-అబ్షాలోమా నా కుమారుడా అబ్షాలోమా నా కుమారుడా నా కుమారుడా, అని కేకలు వేయుచు ఏడ్చుచుండగా, రాజు అబ్షాలోమునుగూర్చి దు:ఖించుచు ఏడ్చుచున్నాడను సంగతి యోవాబు విని నగరియందున్న రాజునొద్దకు వచ్చి-నీ ప్రాణమును నీ కుమారుల ప్రాణములను నీ కుమార్తెల ప్రాణములను నీ భార్యల ప్రాణములను నీ ఉపపత్నుల ప్రాణములను ఈ దినమున రక్షించిన నీ సేవకులనందరిని నేడు సిగ్గుపరచి నీ స్నేహితులయెడల ప్రేమ చూపక నీ శత్రువులయెడల ప్రేమ చూపుచు, ఈ దినమున అధిపతులును సేవకులును నీకు ఇష్టజనులు కారని నీవు కనుపరచితివి.  మేమందరము చనిపోయి అబ్షాలోము బ్రదికియుండినయెడల అది నీకు ఇష్టమగునన్న మాట యీ దినమున నేను తెలిసికొనుచున్నాను.  ఇప్పుడు లేచి బయటికివచ్చి నీ సేవకులను ధైర్యపరచుము.  నీవు బయటికిరాకయుండిన యెడల ఈ రాత్రి యొకడును నీయొద్ద నిలువడని యెహోవా నామమునుబట్టి ప్రమాణముచేసి చెప్పుచున్నాను;  నీ బాల్యమునుండి నేటివరకు నీకు ప్రాప్తించిన అపాయము లన్నిటికంటె అది నీకు కష్టతరముగా ఉండునని రాజుతో మనవిచేయగా రాజు లేచి వచ్చి గుమ్మములో కూర్చుండెను.''  ఇందునుబట్టి, దైవసంబంధులు మరణించినప్పుడు దు:ఖించుటలో తప్పులేదుగాని, దైవ సంబంధులు కాని వారి కొరకు దు:ఖించుట వ్యర్థమని గ్రహించాలి.  ఏది ఏమైనప్పటికిని దు:ఖము కొన్ని దినములు మాత్రమే ఉండును.  అటు తరువాత ఈ దు:ఖమును వీడి మరల తమ స్వకార్యములు జరిగించుట జరుగును.  ఈ విషయములు ప్రతి ఒక్కరికి తెలిసినదే.  ద్వితీయోపదేశ కాండము 34:7-8, ''మోషే చనిపోయినప్పుడు నూటఇరువది సంవత్సరముల యీడుగలవాడు.  అతనికి దృష్టి మాంద్యములేదు, అతని సత్తువు తగ్గలేదు.  ఇశ్రాయేలీయులు మోయాబు మైదానములలో మోషేనుబట్టి ముప్పది దినములు దు:ఖము సలుపగా మోషేనుగూర్చిన దు:ఖము సలిపిన దినములు సమాప్తమాయెను.''  ఈ విధముగా మోషే నిమిత్తముగా ఇశ్రాయేలీయులు మోయాబు మైదానములలో 30 దినములు దు:ఖమును సలుపుట జరిగింది.  అలాగే యోసేపు యాకోబు నిమిత్తము దు:ఖమును 7 దినములు జరిపాడు.  ఇలా తమ వారి కోసము దు:ఖము సలుపుట అనునది సహజము.  కనుక తమ వారు మరణము పొందినప్పుడు దు:ఖమును పొందువారిని విమర్శించుట మంచిది కాదని గ్రహించాలి.  అయితే చెడు నడత కల్గినవారు మరణించినప్పుడు వారు దైవసంబంధులు కారు కనుక వారికోసము దు:ఖము సలుపకూడదని, ఒకవేళ దు:ఖము పొందినను ఆ శరీరమును పాతి పెట్టువరకు మాత్రమే పొంది తరువాత దు:ఖము నుండి విడుదల పొందవలెను.  అలా కాకుండా, దైవసంబంధము కాని వాని విషయము దినముల తరబడి దు:ఖమును పొందిన చనిపోయినవాని వలె అతని కోసము దు:ఖము పొందినవారు కూడా దైవశాపమునకు యోగ్యులని 2 సమూయేలు 19:1-5లో చెప్పుట జరిగింది.  

మరణించినవారి కొరకు దు:ఖించుట వలన చచ్చినవారికి గాని బ్రతికియున్న వారికిగాని ఎవరికిని ఏ మేలు వుండదు.

        అయితే మరణించినవారి కొరకు దు:ఖించుట వలన ఎవరికి మేలు జరుగును?  ఈ దు:ఖము వలన ఎవరికి మేలు లేదు.  ఎందుకంటే తమ సంబంధులు తిరిగిరాని లోకానికి వెళ్ళిరి అని మనకు కలుగు దు:ఖమేగాని, ఈ దు:ఖము పశ్చాత్తాపమునకు సంబంధించినది కాదు.  ఈ దు:ఖము తను చేసిన తప్పునుబట్టి కలిగినది అయితే ఏమన్నా ప్రయోజనము కలుగును.  కాని ఇందులో దు:ఖించువారు వారి తప్పులను గుర్తు చేసుకొని దు:ఖించరు.  అంతేకాకుండా దు:ఖించువారు తమ సంబంధులు రాని లోకానికి వెళ్ళారని వచ్చు దు:ఖమే ఎక్కువగా వుండును.  కనుక దీనివలన ప్రయోజనము ఏమి వుండదు.  అయితే ఈ దు:ఖ దినములు జరుపుట ద్వారా కామక్రోధ, లోభ మొదలైన గుణములను క్రమబద్ధము ఆ దినములలో జరుగును.  తప్పుపని చేయువారలు వారి క్రియలను మాని దు:ఖించుట జరుగును కనుక అది వానికి మేలు అని ప్రసంగి చెప్పుచున్నాడు.  ఎందుకంటే ఎవరైనను మరణించిన తమ సంబంధుల శరీరమును ఇంటిలో వుంచుకొని దైనందిక కార్యములు జరుపరు కదా!  అందుచేత మరణదినము జన్మదినము కన్నా మేలైనదిగా గుర్తించాలి.  అయితే మనము మరణించినవారి కొరకు దు:ఖించుట వలన చనిపోయినవారికి కూడా ఏ మేలు జరుగదని గుర్తించాలి.  ప్రకటన 14:13, ''అంతట-ఇప్పటినుండి ప్రభువునందు మృతినొందు మృతులు ధన్యులని వ్రాయుమని పరలోకమునుండి యొక స్వరము చెప్పగా వింటిని.  నిజమే;  వారు తమ ప్రయాసములు మాని విశ్రాంతి పొందుదురు;  వారి క్రియలు వారి వెంట పోవునని ఆత్మ చెప్పుచున్నాడు.''  

        ప్రకటన 22:12, ''ఇదిగో త్వరగా వచ్చుచున్నాను.  వానివాని క్రియచొప్పున ప్రతివాని కిచ్చుటకు నేను సిద్ధపరచిన జీతము నాయొద్ద ఉన్నది.''  కనుక శరీరముతో చేసిన కార్యములకు క్రీస్తు ప్రభువు జీతము ఇచ్చునుగాని మరణించిన తరువాత వారిని గూర్చి దు:ఖించిన దానినిబట్టి కాదని గ్రహించి, దు:ఖముతో కాలమును వ్యర్థము చేసుకొనక, బహు జాగరూకులై సత్క్రియలయందును, సువార్త కార్యముల యందును మనస్సును లగ్నము చేసి దేవునికి యోగ్యరీతిగా జీవించుదుముగాక.

22.  అంగలార్పు చేయునప్పుడు శరీరములను గాయపరచుట లేక తలలు గొరిగించుకొనుట నిషిద్ధము

        బైబిలు గ్రంథము ఒక ప్రత్యేకమైన గ్రంథము.  ప్రతి విషయమును ఒక ప్రత్యేకమైన శ్రద్ధతో చెప్పుట జరిగింది. అలాగే కొన్ని మతములవారు చనిపోయినవారి కొరకు అంగలార్చి అనగా విలపించి వారితోబాటుగా తమని చితిపై సజీవ దహనము చేసుకొంటారు.  దీనినే సతీసహగమనము అను పేరుతో జరిగిస్తారు.  ఇంకొన్ని మతములవారు మీసాలు, గడ్డము, తల వెంట్రుకలు గొరిగించుట చూస్తున్నాము.  ఇలా చేయుట శరీరమును గాయపరచుట లేక వెంట్రుకలను గొరిగించుకొనుటతో సమానమే.  

        దీనినిగూర్చి బైబిలు గ్రంథము - ద్వితీయోపదేశ కాండము 14:1-2, ''మీరు మీ దేవుడైన యెహోవాకు బిడ్డలు గనుక చనిపోయిన వాడెవనినిబట్టి మిమ్మును మీరు కోసికొనకూడదు, మీ కనుబొమ్మల మధ్య బోడిచేసుకొనకూడదు.  ఏలయనగా నీ దేవుడైన యెహోవాకు నీవు ప్రతిష్టత జనము.  మరియు యెహోవా భూమి మీదనున్న సమస్త జనములలో విశేషముగా తనకు స్వకీయజనమగునట్లు నిన్ను ఏర్పరచుకొనెను.''

        కనుక క్రైస్తవులకు చనిపోయిన వారి కోసరము తన శరీరము బాధించుకొనుట, వెంట్రుకలు గొరిగించుకొనుట వంటివి చేయుట నిషిద్ధము.  ఇలా చేయుటవలన మనలను మనము దేవుని జనాంగముగా వుండక వేరుపడినవారము అగుదుము.  కనుక మరణించిన వారి కోసము అంగలార్చినప్పుడు శరీరమును గాయపరచుకొనక, తలవెంట్రుకలు తీయించుకొనక వుండుట శ్రేయస్కరమని క్రైస్తవ మత గ్రంథము తెలుపుచున్నది.  గ్రంథమును పాటించినవారు దేవునియొక్క సొంత ప్రజలుగా చెప్పుట చదవగలము.  

        లేవీయకాండము 19:28, ''చచ్చినవారికొరకు మీ దేహమును చీరుకొనకూడదు, పచ్చబొట్లు మీ దేహమునకు పొడుచుకొనకూడదు;  నేను మీ దేవుడనైన యెహోవాను.''

23.  అంగలార్పు ఆహారము - పానీయములు

        మనలో ఒకరు చనిపోయినవారి శరీరమును ఇంట వుండినప్పటినుండి ఉపవాస దినములు గడచువరకు ఆ ఇంటివారికి వేరే ఇంటివారు ఆహారమును పంపించాలి.  ఎందుకంటే చనిపోయినవారి ఇంటివారు దు:ఖాక్రాంతులై వేదన పొందుచున్నందున వారి ఆహారము పానీయములు చేసుకొని తినవలెనన్న తలంపు వారికి వుండదు.  వారి వేదన అంతులేనిదిగా వుండునని గుర్తించాలి.  

సజీవుడై క్రీస్తు మరణించాడని దు:ఖించుట అవసరమా!

        ఆది 23:1-2, ''శారా జీవించిన కాలము, అనగా శారా బ్రదికిన యేండ్లు నూట ఇరువది యేడు.  శారా కనాను దేశమందలి హెబ్రోనను కిర్యతర్బాలో మృతిబొందెను;  అప్పుడు అబ్రాహాము శారా నిమిత్తము అంగలార్చుటకును ఆమెను గూర్చి యేడ్చుటకును వచ్చెను.''  ఇలా అబ్రాహాము తన భార్యయైన శారా చనిపోయినప్పుడు ఆమెయొద్దకు అంగలార్చుకొరకును యేడ్చుట కొరకును వెళ్ళుట జరిగింది.  ఆది 50:10, ''యెర్దానునకు అవతలనున్న ఆఠదు కళ్లమునొద్దకు చేరి అక్కడ బహు ఘోరముగా అంగలార్చిరి.  అతడు తన తండ్రినిగూర్చి యేడు దినములు దు:ఖము సలిపెను.''  

        అలాగే దావీదు తన అక్రమ సంతానమైన బేర్షబా బిడ్డ కొరకు అంగలార్చాడు.  కాని చనిపోక ముందు బాధపడుట జరిగింది.  ఎందుకంటే తన దు:ఖమును వేదనను చూచియైనను తండ్రియైనప్పుడు కుమారుని రోగము నయము చేసి చావనీయక బ్రతికించగలడని ఉపవాస ప్రార్థనలు చేశాడు.  చనిపోయిన తరువాత లేచి అన్నపానములు పుచ్చుకొని బిడ్డ కొరకు ఏడవలేదు.  కాని దావీదు దైవద్రోహియైన అబ్షాలోము గురించి అంగలార్చినప్పుడు దైవశాపము రాకుండా అంగలార్చుట మానమని చెప్పుట జరిగింది.  అలాగే ప్రతి ఒక్కరి కొరకు అంగలార్పు దు:ఖము సలుపుట జరుగును.  మోషే విషయములో 40 దినములు జరిపారు.  కాని యేసుక్రీస్తు విషయములో అంగలార్చు యెరూషలేమువారు ఒకరికి తెలియకుండా ఒకరు జరిపినట్లు గ్రహించాలి, ఎందుకంటే యేసుక్రీస్తు యూదా మతద్రోహిగా సిలువ శిక్షను అనుభవించుట జరిగింది.  కాని ఆయన సిలువను మోసుకొని వెళ్ళుచున్నప్పుడు యెరూషలేము స్త్రీలందరు రొమ్ములను బాదుకొంటూ ఏడ్చినట్లుగా చెప్పబడి యున్నది.  

తమలో ఒకరు చనిపోయి బాధపడుచున్నవారికి ఆహారము పానీయము పెట్టుట నీతి

        లూకా 23:27, ''గొప్ప జన సమూహమును, ఆయనను గూర్చి రొమ్ముకొట్టు కొనుచు దు:ఖించుచున్న చాలమంది స్త్రీలును ఆయనను వెంబడించిరి.''  అందుకు యేసు వారిని ఓదార్చుచూ - లూకా 23:28, ''యేసు వారివైపు తిరిగి-యెరూషలేము కుమార్తెలారా, నా నిమిత్తము ఏడ్వకుడి;  మీ నిమిత్తమును మీ పిల్లల నిమిత్తమును ఏడ్వుడి.'' అని చెప్పెను.  ఎందుకంటే క్రీస్తు బలియాగము ద్వారా సమస్త జనులకు రక్షణ వచ్చునని క్రీస్తు ప్రభువుకు తెలియును కనుక నా కొరకు దు:ఖించవద్దని నేను లోకరీత్యా మరణించినట్లు కనబడినను, నేను సజీవుడనే అని చెప్పుట జరిగింది.  కాని, అంగలార్చు దినములలో ఉన్నవారికి ఆహారము - పానీయములు ఇచ్చుట మన విధియై యున్నది.  యిర్మీయా 16:7, ''చచ్చినవారినిగూర్చి జనులను ఓదార్చుటకు అంగలార్పు ఆహారము ఎవరును పంచిపెట్టరు;  ఒకని తండ్రియైనను తల్లియైనను చనిపోయెనని యెవరును వారికి ఓదార్పు పాత్రను త్రాగనియ్యకుందురు.''  

        ఈ యిర్మీయాలో జరిగిన సంఘటనలో యెహోవా వాక్కు ప్రత్యక్షమై దైవజనాంగానికి శిక్ష వచ్చినప్పుడు జరిగిన సంఘటన.  ఇందులో చనిపోయినవారి కొరకు అంగలార్చు చున్నప్పుడు వారికి ఆహారమును పంచుట పానీయము త్రాగనిచ్చుట రెండును చేయకూడదని చెప్పుచున్నాడు, ఎందుకంటే వారు దైవోగ్రతలో వారు శిక్షను అనుభవించుచున్నారు.  వారి నిజ దైవమైన యెహోవాను వీడి అన్య దేవతా విగ్రహాలను పూజించుచున్నారు.  కనుక దేవుడు వారికి అంగలార్పు కాలములో ఆహారము, పానీయములు ఇయ్యవద్దని ప్రవక్తకు తెలియజేస్తున్నాడు.  

        ఇందునుబట్టి, నిజ దైవ విశ్వాసములో వున్నవారికి వారిలో ఒకడు చనిపోయి అంగలార్పుతోను, దు:ఖముతో వున్నప్పుడు, వారికి మనము అంగలార్పు ఆహారము, పానీయములు ఇయ్యవలసినవారమై యున్నామని గుర్తించాలి.  ఇలా ఇచ్చుట నీతిక్రియగా అది ఎంచబడునని గుర్తించాలి.  ఇలా ఇచ్చుటకు మనము వెనుకంజ వేయకూడదు.  ఇలా అంగలార్పుతో వున్నవారిని ఓదార్చుచూ, వారికి కావలసిన ఆహారమును పానీయములను పంచుట ఉత్తమమైన క్రియగా మనము గుర్తించాలి.

24.  రాత్రిపూట శవములు వ్రేలాడుట నిషిద్ధము

        యోహాను 19:31, ''ఆ దినము సిద్ధపరచుదినము; మరుసటి విశ్రాంతి దినము మహాదినము గనుక ఆ దేహములు విశ్రాంతి దినమున సిలువ మీద ఉండకుండునట్లు, వారి కాళ్లు విరుగగొట్టించి వారిని తీసివేయుంచుమని యూదులు పిలాతును అడిగిరి.''  ఇందునుబట్టి రేపటి దినము విశ్రాంతి దినము.  ఆ దినము శవములు సిలువపై అసలు వుండకూడదు.  అలావుంటే ఆ దినము విశ్రాంతి దినముగా లెక్కించబడదు.  

శవము రాత్రి వేలాడుచుండుట చనిపోయినవానికే కాదు ఆ దేశములో వుండు పత్రి ఒక్కరికి అనర్థము.

అంటే క్రీస్తు సిలువ బలియాగ సమయములో క్రీస్తుతోబాటుగా ఇద్దరు దొంగలను సిలువ వేసారు.  కాని క్రీస్తు - ఈ ఇద్దరు దొంగలు మరణించకుండా రాత్రి అంత వుండి విశ్రాంతి దినము అనగా పస్కా పండుగ దినమున చనిపోతే ఆ దినము అపవిత్ర దినముగా మారును.  అలాంటప్పుడు వారు పస్కా పండుగను తిరిగి నెల తరువాత ఆచరించాలి.  ఇది విధి.  సంఖ్యా కాండము 9:6-12, ''కొందరు నరశవమును ముట్టుట వలన అపవిత్రులై ఆ దినమున పస్కా పండుగను ఆచరింపలేకపోయిరి.  వారు ఆ దినమున మోషే అహరోనుల ఎదుటికి వచ్చి మోషేతో నియామక కాలమున ఇశ్రాయేలీయుల మధ్యను అర్పింపకుండునట్లు ఏల అడ్డగింపబడితిమని అడుగగా మోషే - నిలువుడి;  మీ విషయములో యెహోవా యేమి సెలవిచ్చునో నేను తెలిసి కొందునని వారితో అనెను.  అప్పుడు యెహోవా మోషేకు ఈలాగు సెలవిచ్చెను-నీవు ఇశ్రాయేలీయులతో ఇట్లనుము -మీలోగాని మీ వంశములలోగాని ఒకడు శవమును ముట్టుట వలన అపవిత్రుడైనను, దూరప్రయాణము చేయుచుండినను, అతడు యెహోవా పస్కాపండుగను ఆచరింపవలెను.  వారు రెండవనెల పదునాలుగవ దినమున సాయంకాలమున దానిని ఆచరించి పొంగనివాటితోను చేదు ఆకుకూరలతోను దానిని తినవలెను.  వారు మరునాటివరకు దానిలో కొంచెమైనను మిగలనీయవలదు;  దానిలోనిది ఒక్క యెముకనైనను విరువవలదు;  పస్కాపండుగ విషయమైన కట్టడలన్నిటిని బట్టి వారు దానిని ఆచరింపవలెను.''  కనుక విశ్రాంతి దినమున అనగా పస్కాపండుగ దినమను మహాదినమున శవములను తాకరాదు కనుక వారి కాళ్లను నరికి వారిని చంపివేయుమని యూదులు పిలాతును అడుగుచున్నారు.  యోహాను 19:32-34, ''కాబట్టి సైనికులు వచ్చి ఆయనతో కూడ సిలువవేయబడిన మొదటి వాని కాళ్లను రెండవవాని కాళ్లను విరుగగొట్టిరి.  వారు యేసునొద్దకు వచ్చి, అంతకుముందే ఆయన మృతిపొందియుండుట చూచి ఆయన కాళ్లు విరుగగొట్టలేదుగాని సైనికులలో ఒకడు ఈటెతో ఆయన ప్రక్కను పొడిచెను, వెంటనే రక్తమును నీళ్లును కారెను.''  ఈ విధముగా క్రీస్తు ప్రభువు ముందుగానే చనిపోవుట, ఇద్దరు దొంగల కాళ్ళను విరగగొట్టుట ద్వారా వారు చనిపోవుట జరిగింది.  ఇది పస్కా పండుగ దినమున మరియు చనిపోయినవారి దేహము వ్రేలాడుచూ రాత్రి కాలమున వుండకూడదని బైబిలు గ్రంథము చెప్పుచున్నది.  

శవములు ముట్టుట వలన అపవిత్రులు అగుదురు

ద్వితీయోపదేశకాండము 21:22-23, ''మరణశిక్షకు తగిన పాపము ఒకడు చేయగా అతని చంపి మ్రానుమీద వ్రేలాడదీసినయెడల అతని శవము రాత్రి వేళ ఆ మ్రానుమీద నిలువకూడదు.  వ్రేలాడదీయబడినవాడు దేవునికి శాపగ్రస్తుడు గనుక నీ దేవుడైన యెహోవా స్వాస్థ్యముగా నీకిచ్చుచున్న దేశమును నీవు అపవిత్రపరచకుండునట్లు అగత్యముగా ఆ దినమున వానిని పాతి పెట్టవలెను.''  కనుక యూదులు క్రీస్తును శాపగ్రస్తునిగా ఎంచిరి కనుక ఆయన భౌతిక దేహము సిలువకు వ్రేలాడకూడదని పిలాతుకు చెప్పుట జరిగింది.  కనుక అరిమతయియ యోసేపు పిలాతును క్రీస్తు శరీరమును అడగగానే ఇచ్చివేయుట జరిగింది.  యోహాను 19:38, ''అటుతరువాత, యూదుల భయమువలన రహస్యముగా యేసు శిష్యుడైన అరిమతయియ యోసేపు, తాను యేసు దేహమును తీసికొని పోవుటకు పిలాతు నొద్ద సెలవడిగెను.  పిలాతు సెలవిచ్చెను.  గనుక అతడు వచ్చి యేసు దేహమును తీసికొని పోయెను.''  ఎందుకంటే తరువాతి దినము మహాదినము విశ్రాంతి దినము.  ఆ దినమున శవములు వ్రేలాడకూడదు.  ఆ దినమున ఎవరును పని చేయరు.  అంతే కాకుండా శాపగ్రస్తుని శరీరము రాత్రి వ్రేలాడుట దేశానికి అరిష్టమని ధర్మశాస్త్రము చెప్పుచున్నది.  ఈ రెండు కారణములచేత పిలాతును యూదులు అడుగుట జరిగింది.

యూదా ఇస్కరియోతు ఉరి వేసుకొనినను శాపగ్రస్త స్థితి నుండి  దేవుడు రక్షించెను

        ఉరి వేసుకొని చనిపోవుట నేరమని ఈనాడు అందరు చెప్పుదురు.  దీనికి కారణము ధర్మశాస్త్రమే.  ఈ ధర్మశాస్త్రము మోషే కాలములో దేవుని ద్వారా ఇయ్యబడినది.  ఉరి వేసుకొని వ్రేలాడి చనిపోవువారు శాపగ్రస్తులుగా చెప్పబడియున్నది.  చాలావరకు ఉరి వేసుకొనుట అను కార్యము రాత్రిపూటలే జరుగును.  వారు ఎవరికి తెలియకుండా రహస్యముగా ఉరి వేసుకొనుట జరుగును.  రాత్రి శవము వ్రేలాడకూడదని ధర్మశాస్త్రము చెప్పుచుండగా సాతాను నరులను దానికి విరుద్ధముగా ప్రేరేపించి వారు ఉరి వేసుకొని రాత్రి వ్రేలాడునట్లుగా చేయును కనుక వీరు శాపగ్రస్తులు.  ఉరి వేసుకొనుట, ఉరి వేసుకొనుటకు ప్రయత్నించుట, అలా ఉరి వేసుకొంటానని బెదిరించుట, ఇవన్నీ కూడా సాతానుయొక్క లక్షణాలే.  కనుక వారు శాపగ్రస్తులని గ్రహించాలి.  ఉరి వేసుకొనుట గాని ఏదోయొక రీతిగా ఆత్మహత్య చేసుకొనుటగాని మహా పాపమని మనకెల్లరకు తెలిసిందే.  దేవుడు మనకు దయచేసిన ప్రాణమును త్యజించుటకు మనకు అధికారము లేదు.  ఆయన తీసివేయవలసినదే!  అట్టి వారికి దైవరాజ్యములో ప్రవేశము ఉండదని గ్రహించాలి.

        ఇక 12 మంది శిష్యులలో ఒకడైన యూదా ఇస్కరియోతు ఉరి వేసుకొనుట జరిగింది.  దీనిని గూర్చి క్రీస్తు ప్రభువు ఏమి చెప్పుచున్నాడో తెలుసుకొందము.  మత్తయి 26:20-24, ''సాయంకాలమైనప్పుడు ఆయన పండ్రెండుమంది శిష్యులతో కూడ భోజనమునకు కూర్చుండెను.  వారు భోజనము చేయుచుండగా ఆయన-మీలో ఒకడు నన్ను అప్పగించునని మీతో నిశ్చయముగా చెప్పుచున్నాననెను.  అందుకు వారు బహు దు:ఖపడి ప్రతివాడును-ప్రభువా నేనా?  అని ఆయన నడుగగా ఆయన-నాతో కూడ పాత్రలో చెయ్యి ముంచినవాడెవడో వాడే నన్ను అప్పగించువాడు.  మనుష్యకుమారునిగూర్చి వ్రాయబడిన ప్రకారము ఆయన పోవుచున్నాడు గాని యెవనిచేత మనుష్యకుమారుడు అప్పగింపబడుచున్నాడో ఆ మనుష్యునికి శ్రమ;  ఆ మనుష్యుడు పుట్టియుండని యెడల వానికి మేలని చెప్పెను.''  పుట్టియుండని యెడల యూదాకు మేలని ప్రభువు చెప్పుటలోని పరమార్థమేమి?  లోకములోని సజ్జనులనుగాని, దుర్జనులనుగాని దేవుడే కదా పుట్టిస్తున్నాడు.  యూదా తనంతట తానుగా ఈ లోకములో జన్మించాలని రాలేదు.

        యోహాను 3:5లో వలె యూదా నీటి మూలముగాను అనగా బాప్తిస్మము ద్వారాను ప్రభువు నామమున ఆత్మ మూలముగాను జన్మించి నూతన జన్మను పొందినాడు.  ప్రభువు చేసిన పాద ప్రక్షాళన ద్వారా పవిత్రత పొందినాడు.

        ఇట్టి పవిత్ర జన్మను నూతనముగా పొందిన యూదా ధనాశ చేత సాతానుకు అవకాశమిచ్చి భ్రష్టత్వము పొందినాడు.  కనుక యూదా క్రీస్తులో నూతనముగా జన్మించక ఆయన బల్లలో పాలుపంపులు పొందక అన్యుడుగానే ఉండి నన్ను శత్రువులకు పట్టిచ్చియుంటే కొంత శిక్ష తగ్గియుండేది.  కాని ప్రభువు నెరిగి నిజ దైవత్వము తెలిసికొని బాప్తిస్మము ద్వారా నూతన జన్మను పొందిన క్రైస్తవునికి ఏడింతల శిక్ష కలదని, ఆ శిక్ష మహా భయంకరమైనది కనుక యూదా క్రీస్తులో జన్మించక తనను పట్టించియుంటే కొంత శిక్ష తగ్గియుండేదన్న భావముతో - యూదా పుట్టి యుండని యెడల మేలని చెప్పుచున్నాడు.

        ఇలా 12 మంది శిష్యులలో ఒకడైన యూదా ఇస్కరియోతు యేసుక్రీస్తు ప్రభువును శత్రువులైన యూదులకు అప్పగించి తప్పు చేసినట్లుగా తెలియుచున్నది.  వాస్తవానికి ఇది లేఖనముల నెరవేర్పు మాత్రమే అని గుర్తించాలి.  అయితే ఈ పాపము చేసిన తరువాత యూదా ఏమి చేసాడో తెలుసుకొందము.  మత్తయి 27:3-5, ''అప్పుడాయనను అప్పగించిన యూదా, ఆయనకు శిక్ష విధింపబడగా చూచి పశ్చాత్తాపపడి, ఆ ముప్పది వెండి నాణెములు ప్రధానయాజకుల యొద్దకును పెద్దలయొద్దకును మరల తెచ్చి - నేను నిరపరాధరక్తమును అప్పగించి పాపము చేసితినని చెప్పెను.  వారు-దానితో మాకేమి?  నీవే చూచుకొనుమని చెప్పగా అతడు ఆ వెండి నాణెములు దేవాలయములో పారవేసి, పోయి ఉరి పెట్టుకొనెను.''  ఈ విధముగా యూదా ఉరి వేసుకొనుట జరిగింది.  కాని యూదా దైవ ప్రణాళికలో ఒక భాగముగా సాతానుచే ప్రేరేపింపబడి దైవాజ్ఞ మేర వాడబడినందును అతడు ఉరి వేసుకొనినను దైవాత్మ అతనిని వ్రేలాడువాడు శాపగ్రస్థుడు అను ధర్మశాస్త్ర చట్టము నుండి అతనికి విడుదల కలిగించాడు.  వాస్తవానికి యూదా ఉరి వేసుకొనుట నిజమే.  కాని ఈ ఉరి వేసుకొనుట క్రీస్తును సిలువ వేయుట ఒకేసారి జరిగినట్లుగా మనము తెలుసుకొనవలెను.  కనుక యూదా యేసునకు శిక్ష విధింపబడుట చూచాడు.  పశ్చాత్తాపపడి నేరుగా ప్రధానార్చకుల యొద్దకు వచ్చి వారితో మాట్లాడుట జరిగింది.  అదే సమయములో క్రీస్తు ప్రభువు సిలువను మోసుకుంటూ గొల్గత ప్రాంతమునకు వెళ్ళుట జరిగింది.  అటుతరువాత - ఆ విధముగా క్రీస్తు కొరకు తాను తీసుకొనిన వెండి నాణెములను దేవాలయములో విసిరికొట్టి ఉరి వేసుకొనుట జరిగింది.  ఈ ఉరి రాత్రిపూట జరిగింది కాదు.  రాత్రి శవములు వ్రేలాడకూడదు.  అలా వ్రేలాడినవారు శాపగ్రస్థులని ధర్మశాస్త్రమునందు చెప్పబడియున్నది.  కాని ఎవరైనా ఉరి వేసుకొన్న తరువాత సుమారుగా 3 గంటలసేపు బ్రతుకుటకు అవకాశమున్నది.  అందులో యూదా సైనికుడిగా వుండి యూదుల విడుదల కోసము బర్నబాతో వున్నవాడు కనుక ఉరి వేసుకొన్నను తక్షణమే ప్రాణము పోవుటకు అవకాశము లేదు.  ఈలోగా క్రీస్తు ప్రభువు సిలువపై దేవునికి తన ఆత్మను అప్పగించి ప్రాణము విడుచుట జరిగింది.  అప్పుడు - మత్తయి 27:51-52, ''అప్పుడు దేవాలయపు తెర పైనుండి క్రింది వరకు రెండుగా చినిగెను;  భూమి వణకెను;  బండలు బద్దలాయెను;  సమాధులు తెరవబడెను;  నిద్రించిన అనేక మంది పరిశుద్ధుల శరీరములు లేచెను.''  ఇందునుబట్టి యూదా ఉరి వేసుకొన్నను తాను చనిపోకతలికే, ఈ సంఘటన వల్ల తను ఉరి వేసుకొన్న కొండ శిఖరము బద్దలు అగుట జరిగింది.  క్రీస్తు ప్రభువును గొల్గత అను కొండ ప్రాంతమునకు తీసుకొని వెళ్ళి సిలువ వేసారు.  యూదా ఇస్కరియోతు ప్రధాన యాజకులతో వాగ్వివాదము చేసి వారిపై కోపగించుకొని వెండి నాణెములను దేవాలయములో విసిరికొట్టి వేరొక కొండ శిఖరమున వున్న చెట్టు కొనకు త్రాడు కట్టి ఉరి వేసుకొన్నాడు.  ఇలా యూదా ఇస్కరియోతు ప్రధాన యాజకుల వద్దకు వెళ్ళక ముందే యేసుక్రీస్తుకు శిక్ష పడిన సంగతి తెలుసుకొన్నాడు.  అటుతరువాత ప్రధాన యాజకుల వద్దకు వెళ్ళుట జరిగింది.  ఇంచుమించుగా ఇద్దరు అనగా యూదా ఇస్కరియోతు, క్రీస్తు ప్రభువు ఒకేసారి, ఒకే గడియలలో వారి సంఘటనలు జరిగాయి. 

ఉరి వేసుకొని లేక ఉరి వేయబడి మరణించిన వాని శవము మరుసటి దినమునకు ఉంచకూడదు

        ఎప్పుడైతే కొరడలు బద్దలైనవో యూదా ఇస్కరియోతు పై నుండి పడి ప్రేగులు బయటకు వచ్చి మరణించాడు.  ఈ సంఘటనను అపొస్తలుల కార్యములో వ్రాయబడి యున్నది.  అపొస్తలుల కార్యములు 1:18, ''ఈ యూదా ద్రోహమువలన సంపాదించిన రూకల నిచ్చి యొక పొలము కొనెను.  అతడు తలక్రిందుగాపడి నడిమికి బద్దలైనందున అతని పేగులన్నియు బయటికి వచ్చెను.'' అతడు పై నుండి తలక్రిందుగా పడగా పొట్ట పగిలి లోపల ఉన్న పేగులన్నియు బయటపడి మరణించాడు.  ఈ విధముగా యూదా ఇస్కరియోతు తన జీవితములో ఉరి అను శాపగ్రస్తమైన స్థితి నుండి తప్పించబడినట్లుగా మనము గ్రహించాలి.  ఎందుకంటే అతడు తను చేసిన పాపమునకు పశ్చాత్తాపపడి ఘోరముగా ఆవేదన పడి ప్రధాన యాజకుల యొద్దకు వెళ్ళి ఆయన నిరపరాధియని ప్రకటించి తాను తీసుకొన్న నాణెములు వారు విననందున వారిపై క్రోధావేశముతో దేవాలయములో వెదజల్లి, ప్రభువు శిక్షకు కారకుడు తనే గనుక తాను బ్రతికుండ తగదని తనకు తానుగా ఉరిశిక్ష విధించుకొన్నాడు.  పశ్చాత్తాపము పొంది ప్రభువు ప్రేమను, ఆయన రక్షణను పొందగల్గి క్రీస్తు కుడివైపున సిలువ వేయబడిన దొంగవలె ఇతడు కూడా హృదయ పరివర్తన చెంది క్రీస్తు ప్రేమకు పాత్రుడైనట్లు యోహాను 21:20-23లో ప్రభువు మాటలను బట్టి తెలుస్తున్నది.  

        దావీదు ఊరియాను నిష్కారణముగా చంపించి పశ్చాత్తాప హృదయముతో తిరిగి ప్రభువు ప్రేమను సంపాదించాడు.  సంసోను డెలీలా ప్రేమలో మునిగి దైవ మర్మమును బహిర్గతము చేసి అంధుడైనప్పుడు పాప పశ్చాత్తాప హృదయముతో ప్రభువు ప్రేమను సంపాదించి, తన జీవిత కాలములో చంపినవారి కంటే మరి ఎక్కువమందిని ప్రభువు ఆత్మను పొంది చంపగలిగిన శక్తి సామర్థ్యములను పొందెను. కనుక ఉరి వేసుకొనుట, లేక ఉరి వేయుట రెండును శాపగ్రస్తమైనవే అని మనము గ్రహించాలి.

25.  శవములను పూడ్చుటకు ముందు చేయవలసిన విధులు (శవమును పూడ్చుటకు సిద్ధపరచుట)

        నరులు చనిపోవుచున్నారు వారిని మనము పాతిపెట్టుచున్నాము.  అయితే చనిపోయిన నరుని పాతిపెట్టుటకు ముందు శవమును సిద్ధపరచవలసిన విధి మనకు ఉన్నది.  ఇందులో  భాగముగా ముస్లీములైతే శవమునకు స్నానము చేయించి మట్టి లేకుండా బాగా కడిగి, శరీరమునకు వస్త్రములు తొడిగి పెట్టెలో పెట్టి తీసుకొని వెళ్లి శవమును మాత్రమే పూడ్చి వేయుట చేయుదురు.  

        హిందూమతమునకు చెందినవారు శవమును కడగరుగాని శవముపై 2-3 బిందెల నీళ్ళు పోసి తుడిచి శవము నోటిలో తమలపాకులను, ముక్కులో దూదిని పెట్టి కాళ్ళు చేతులను దారముతో కట్టి పాడిపై సిద్ధపరచుదురు.  వీరికి పెట్టెలో పెట్టు ఆచారము లేదు.  వీరు శవమును బహిరంగముగా అందరికి కనబడునట్లుగా మోసుకొని పోవుదురు.  అదే ఆడవారు అయితే వారికి పసుపు కుంకుమలు పూసి పై విధముగా తీసుకొని పోవుదురు.  మరి తమిళులులలో వారు పై ఆచారమునే ఆచరించినను, మరికొన్ని విచిత్రమైన పద్ధతులను అవలంబించుచున్నారు.  అందులో ఎవరైనా కూర్చుని చనిపోయినవారిని శవపేటికపై కూర్చునబెట్టి అలాగే మోసుకొని పోతారు.  వారిలో పెళ్ళికాని పిల్లలు చనిపోతే మనము జంతువులను మోసుకొని వెళ్ళినట్టుగా వారి కాళ్ళు చేతులను కర్రకు కట్టి మోసుకొని పోవుదురు.  ఇలా వారివారి ఆచారములను బట్టి వారు శవములను సిద్ధపరచుట చూస్తున్నాము.  ఒక్క ఇండియాలోనే కొన్ని వందల లేక కొన్ని వేల పద్ధతులలో శవములను సిద్ధపరచుట చూస్తున్నాము.  ఫరోరాజు కుటుంబీకులను గుడ్డలతో చుట్టి సుగంధ ద్రవ్యములను చల్లి వారిని పూడ్చుట చేసేవారు.  దానితోబాటు వారు ఇష్టపడిన ప్రతి వస్తువును చనిపోయినవారు ఉపయోగించిన వస్తువులను వారితోబాటుగా పూడ్చేవారు.

        ఇక మనము బైబిలు గ్రంథమునకు వస్తే బైబిలు గ్రంథములో చనిపోయినవారిని పూడ్చుటకు ముందు శరీరమును అనగా శవమును సిద్ధపరచు ఆచారము కూడా వున్నట్లుగా వ్రాయబడియున్నది.  మొదట శరీరమునకు సుగంధ ద్రవ్యములు పూసి శవమును గుడ్డలతో చుట్టి ఒక పెట్టిలో ఉంచి పూడ్చేవారు.  ఆది 50:26, ''యోసేపు నూటపది సంవత్సరములవాడై మృతి పొందెను.  వారు సుగంధ ద్రవ్యములతో అతని శవమును సిద్ధపరచి ఐగుప్తు దేశమందు ఒక పెట్టెలో ఉంచిరి.''  

        ఈ సుగంధ ద్రవ్యము కొంతవరకు అనగా శవమును పూడ్చుటకే గుహలో వుంచువరకు శవము కుళ్ళిన వాసన వారికి రానీకుండా ఆ సుగంధ ద్రవ్యము ఆ ప్రదేశమును తన సుగంధముతో నింపును.  కనుక శరీరమును పూడ్చుటకు ముందు శరీరముయొక్క వాసన తెలియకుండుటకు ఈ సుగంధద్రవ్యమును ఉపయోగించేవారు.  అలాగే ఆ శరీరమును గుడ్డతో గట్టిగా చుట్టి యోసేపు శరీరమును పెట్టెలో పెట్టి పూడ్చినట్లుగా చెప్పబడింది.  ఇలా బైబిలు గ్రంథములో ఒక ఆచారముగా విధిగా దీనిని పాటిస్తూ వచ్చారు.

        అలాగే నూతన నిబంధన అనగా క్రీస్తు ప్రభువు కాలములో కూడా జరిగింది.  యోహాను 11:43-44, ''ఆయన ఆలాగు చెప్పి-లాజరూ, బయటికి రమ్మని బిగ్గరగా చెప్పగా చనిపోయినవాడు, కాళ్లు చేతులు ప్రేత వస్త్రములతో కట్టబడినవాడై వెలుపలికి వచ్చెను;  అతని ముఖమునకు రుమాలు కట్టియుండెను.  అంతట యేసు-మీరు అతని కట్లు విప్పిపోనియ్యుడని వారితో చెప్పెను.''  ఇందునుబట్టి ప్రేత వస్త్రముతో లాజరు శవమును బంధించి, శవమును గుహలో పెట్టుటకు సిద్ధపరచినట్లుగా మనము గుర్తించాలి.  ఇందులో ప్రేత వస్త్రములను ఎలా కట్టుదురో వివరముగా తెలుపబడి యున్నది.  కాళ్లు-చేతులు మొదలుకొని ముఖము వరకు ఏ ఒక్క రవ్వంత కూడా కనబడకుండా కట్టి శరీరమును బంధించినట్లుగా చేయాలి.  ఈ విధముగా వారు శవమును సిద్ధపరచినట్లుగా మనము గ్రహించాలి.  

క్రీస్తు ప్రభువు శరీరమునకు సుగంధ ద్రవ్యములు పూసి, నార వస్స్త్రముతో దేహమును చుట్టి, తలకు తుండుగుడ్డను కట్టిరి

        ఇంతకి క్రీస్తు ప్రభువు విషయములో క్రీస్తు ప్రభువుయొక్క శరీరమును ఏ విధముగా సిద్ధపరచారో తెలుసుకొందము.  క్రీస్తు ప్రభువు బలియాగమునకు ముందే బేతనియాలో ఆయన పాదములకు పరిమళద్రవ్యములు పూయుట జరిగింది.  ఇది క్రీస్తు ప్రభువు మరణమునకు సూచనగా చేసినట్లుగా చెప్పబడింది.  

        యోహాను 12:1-8, ''కాబట్టి యేసు తాను మృతులలోనుండి లేపిన లాజరు ఉన్న బేతనియకు పస్కా పండుగకు ఆరు దినములు ముందుగా వచ్చెను.  అక్కడ వారు ఆయనకు విందు చేసిరి.  మార్త ఉపచారము చేసెను;  లాజరు ఆయనతో కూడా భోజనమునకు కూర్చున్నవారిలో ఒకడు.  అప్పుడు మరియ మిక్కిలి విలువగల అచ్చజటామాంసి అత్తరు ఒకసేరున్నర యెత్తు తీసికొని, యేసు పాదములకు పూసి తన తలవెండ్రుకలతో ఆయన పాదములు తుడిచెను;  ఇల్లు ఆ అత్తరు వాసనతో నిండెను.  ఆయన శిష్యులలో ఒకడు అనగా ఆయనను అప్పగింపనైయున్న ఇస్కరియోతు యూదా -యీ అత్తరెందుకు మూడు వందల దేనారములకు అమ్మి బీదలకు ఇయ్యలేదనెను.  వాడీలాగు చెప్పినది బీదలమీద శ్రద్ధకలిగి కాదు గాని వాడు దొంగయైయుండి, తన దగ్గర డబ్బు సంచి యుండినందున అందులో వేయబడినది దొంగిలించుచు వచ్చెను గనుక ఆలాగు చెప్పెను.  కాబట్టి యేసు-నన్ను పాతిపెట్టు దినమునకు ఆమెను దీని నుంచుకొననియ్యుడి;''  కనుక యేసు ప్రభువు ప్రత్యేకించి ఈ పరిమళద్రవ్యమును భూస్థాపన చేయు దినమునకై ఉంచుకొననిండు అని చెప్పుచున్నాడు.  దానిని అమ్మి  పేదలకు పంచమని 12 మంది శిష్యులలో ఒకడైన యూదా చెప్పినను క్రీస్తు ప్రభువు వినలేదు.  పేదలు ఎల్లప్పుడు మనతోనే వుంటారు అని చెప్పుచున్నాడు.  కనుక ఈ పరిమళ ద్రవ్యమును శవము సిద్ధపరచునప్పుడు ఉపయోగించుట పేదలకు ఇచ్చిన దానికన్నా కూడా ఉన్నతమైన క్రియగా మనము గుర్తించాలి.  కనుకనే ఈ పరిమళ ద్రవ్యమును అమ్మి పేదలకు ఇయ్యక క్రీస్తు ప్రభువు తను చనిపోయి, తన శరీరమును భూస్థాపన చేయించుటకు సిద్ధముగా ఉంచుకొనుమని ఆ స్త్రీతోను, ఆ శిష్యులతోను చెప్పుట జరిగింది.  కనుక చనిపోయినవారి శరీరమును పరిమళద్రవ్యముతో పూసి ఆ వాసన తెలియకుండా చేయుట మనయొక్క విధిగా గుర్తించాలి.

        యోహాను 19:38-42, ''అటుతరువాత, యూదుల భయమువలన రహస్యముగా యేసు శిష్యుడైన అరిమతయియ యోసేపు, తాను యేసు దేహమును తీసికొనిపోవుటకు పిలాతునొద్ద సెలవడిగెను.  పిలాతు సెలవిచ్చెను.  గనుక అతడు వచ్చి యేసు దేహమును తీసికొనిపోయెను.  మొదట రాత్రివేళ ఆయన యొద్దకు వచ్చిన నీకొదేముకూడ బోళముతో కలిపిన అగరు రమారమి నూట ఏబది సేర్ల యెత్తు తెచ్చెను.  అంతట వారు యేసు దేహమును ఎత్తికొని వచ్చి, యూదులు పాతిపెట్టు మర్యాద చొప్పున ఆ సుగంధద్రవ్యములు దానికి పూసి నారబట్టలు చుట్టిరి.  ఆయనను సిలువ వేసిన స్థలములో ఒక తోట యుండెను;  ఆ తోటలో ఎవడును ఎప్పుడును ఉంచబడని క్రొత్తసమాధియొకటి యుండెను.  ఆ సమాధి సమీపములో ఉండెను గనుక ఆ దినము యూదులు సిద్ధ పరచు దినమైనందున వారు అందులో యేసును పెట్టిరి.''  

        ఇందులో యేసుక్రీస్తు ప్రభువుయొక్క భౌతిక దేహమును వారు తీసుకొని పోయి నీకొదేము తెచ్చిన 150 సేర్ల పరిమళద్రవ్యమును అత్తరు పూసి నార వస్త్రముతో ఆ దేహమును పాదములనుండి తల వరకు చుట్టి సాంప్రదాయ ప్రకారముగా ఆయనను క్రొత్త సమాధిలో వుంచారు.  కనుక ఈనాడు మనము శవములను సిద్ధపరచు విధానము ఎలాగున్నదో మనమొకసారి గ్రహించవలసి యున్నది.  సాంప్రదాయము అదియును క్రీస్తుకు జరిగిన విధానమును పాటించుటలో తప్పేమి లేదు.  వీటితోబాటుగా క్రీస్తు ప్రభువు విషయములో తలకు తుండుగుడ్డను కట్టినట్లుగా చెప్పబడినది.  యోహాను 20:7, ''నారబట్టలు పడియుండుటయు, ఆయన తల రుమాలు నారబట్టలయొద్ద ఉండక వేరుగా ఒకచోట చుట్టిపెట్టియుండుటయు చూచెను.''  లూకా 23:55-56,  ''అప్పుడు గలిలయనుండి ఆయనతో కూడ వచ్చిన స్త్రీలు వెంట వెళ్లి ఆ సమాధిని, ఆయన దేహము ఏలాగుంచబడెనో చూచి తిరిగి వెళ్లి, సుగంధ ద్రవ్యములను పరిమళ తైలములను సిద్ధపరచి, ఆజ్ఞచొప్పున విశ్రాంతిదినమున తీరికగా ఉండిరి.''  

        లూకా 24:1, ''ఆదివారమున తెల్లవారుచుండగా (ఆ స్త్రీలు) తాము సిద్ధపరచిన సుగంధ ద్రవ్యములను తీసికొని సమాధి యొద్దకు వచ్చి'' ఇది ఒక సాంప్రదాయ ఆచారము మాత్రమే అని గుర్తించాలి.  ఇది పాటించుటలో ఎటువంటి అభ్యంతరము లేదని గుర్తించాలి.

26.  మరణించిన వారి కన్నులు మూయుట

        మన కన్నుల ఎదుటే అనేకులు మరణించుట చూస్తున్నాము.  వారిలో కొందరు మన చేతులలో కూడా మరణించవచ్చును.  ఇలా మరణించినప్పుడు, వారు మరణ యాతనతో అర్థము కాని స్థితిలో ఎదుటివారి సహాయార్థము చూచుచూ చనిపోవుట అనేక సంఘటనలలో జరుగును.  ఇలా చనిపోయినవారి కన్నులు తెరవబడి యుండును.  వీటిని మనము మూయవలసియున్నది.  ఇదే సంగతిని దేవుడు యోసేపునకు తెలియజేశాడు.  ఆదికాండము 46:2-4, ''అప్పుడు రాత్రి దర్శనములయందు దేవుడు-యాకోబూ యాకోబూ అని ఇశ్రాయేలును పిలిచెను.  అందుకతడు-చిత్తము ప్రభువా అనెను.  ఆయన - నేనే దేవుడను, నీ తండ్రి దేవుడను, ఐగుప్తునకు వెళ్లుటకు భయపడకుము, అక్కడనిన్ను గొప్ప జనముగా చేసెదను.  నేను ఐగుప్తునకు నీతోగూడ వచ్చెదను.  అంతేకాదు నేను నిశ్చయముగా నిన్ను తిరిగి తీసికొని వచ్చెదను, యోసేపు నీ కన్నులమీద తన చెయ్యియుంచునని సెలవియ్యగా''  ఇందునుబట్టి మన ముందు మరణించువారికి మరణించిన వెంటనే కన్నులు మూయుట దేవుని ఆజ్ఞను పాటించుట అగునని మనము మరువకూడదు.  అలాగే ఈ విధముగా మన మధ్య మరణించి మన చేతుల మీదుగా కన్నులు మూయించుకొను మరణము కూడ మహా భాగ్యముగా గుర్తించాలి.  తన వారు తమ దగ్గర ఉంటేనే ఇది సాధ్యమగును.  అలాగే ఇశ్రాయేలు అను పేరుగల యాకోబు యోసేపు  అను తాను ప్రేమించిన రాహేలు కుమారుడు ఉండగా నీ మరణము జరుగునని చెప్పబడింది.  ఇది జరిగినప్పుడు యోసేపు నీ కన్నులు మూయునని చెప్పబడింది.  అలా మూయు అవకాశము లభించినవారు అదృష్టవంతులుగా భావించాలి, ఎందుకంటే దేవుడు చెప్పినట్లుగా మరణించినవారి కన్నులను మూయు భాగ్యము వారికి లభించగా, వారు ఆ కన్నులను మూసి దేవుని ఆజ్ఞను నెరవేర్చినవారు అగుచున్నారు.

27.  శ్మశానపు ఏర్పాట్లు

        ఈనాడు మనము చనిపోయిన వారిని చూస్తున్నాము.  క్రైస్తవులు వారిని ఒక చెక్క పెట్టెలో పెట్టి గోతి త్రవ్వి పూడ్చుట చేస్తున్నారు.  హిందూ మతమువారు చితిపై వుంచి కాల్చి బూడిద చేస్తున్నారు.  దానిలో మిగిలిన ఎముకలను ఏరి నదులలో నిమజ్జనము అను పేరుతో కలుపుట జరుగుతుంది.  ఇలా మరణించినవారికి చివరి వీడ్కోలు వారివారి జాతినిబట్టి అనేక రీతులుగా జరుగుట మనము చూస్తున్నాము.  ఈనాడు అమెరికా, బ్రిటన్‌, ఫ్రాన్స్‌ మొదలైన దేశాలలోని వారు తమ వారి శవములను కోల్ట్‌ హోమ్స్‌లో భద్రపరచుట చూస్తున్నాము, ఎందుకంటే ఏనాటికైనను శాస్త్రజ్ఞానము పెరిగి చనిపోయినవారిని తిరిగి లేపగలుగుదురని వారి నమ్మకము.  కనుక ఈ చనిపోయినవారి శరీరమును కోల్ట్‌ హోమ్స్‌ నందు వారు భద్రపరచుకొని నరుని తిరిగి బ్రతికించుటకు ప్రయోగములు జరుపుచున్నారు.  దీనిని కూడా మనము ఓ రకమైన సమాధి స్థానముగానే భావించాలి.  ఇంకొన్ని దేశాలలో మరణించినవారి శరీరములను పూడ్చే స్థలము లేక వారిని మండుచున్న ఎలక్ట్రికల్‌ గుండములో వేసి బూడిదగా మార్చుచున్నారు.  ఇది అభివృద్ధి చెందిన విధానమైతే, బైబిలు గ్రంథములోని పాత నిబంధన మరియు క్రొత్త నిబంధన కాలములలో మరణించినవారిని రాతి సమాధులలో వుంచి, దాని ద్వారమును మూసి వుంచేవారు.  ఆ శరీరము పురుగుపట్టి వాసనతో కుళ్ళి కృశించి చివరకు ఎముకలు మిగిలిపోయేవి.  కాలక్రమేణా ఆ యెముకలు కూడా పొడిగా మారిపోయేవి.

        దైవాజ్ఞను మీరి దైవ వనమైన ఏదెను నుండి త్రోసివేయబడిన ఆదాము తన మొదటి కుమారుడైన కయీను, తన రెండవ కుమారుడైన హేబెలును చంపినప్పుడు ఏమి చేసి వుండునో ఒక్కసారి మనము గమనించాలి.  ఆది 3:19, ''నీవు నేలకు తిరిగి చేరువరకు నీ ముఖపు చెమట కార్చి ఆహారము తిందువు;  ఏలయనగా నేలనుండి నీవు తీయబడితివి;  నీవు మన్నే గనుక తిరిగి మన్నైపోదువని చెప్పెను.''  ఈ మాట ప్రకారము ఆదాము చనిపోయిన తన రెండవ కుమారుని నేలను త్రవ్వి పూడ్చినట్లుగా మనము గ్రహించాలి.  అయితే అబ్రాహాము కాలములు - ఆది 23:19, ''ఆ తరువాత అబ్రాహాము కనాను దేశములో హెబ్రోనను మమ్రేయెదుట నున్న మక్పేలా పొలము గుహలో తన భార్యయైన శారాను పాతిపెట్టెను.''  ఇలా మరణించినవారి శరీరములను గుహలలో వుంచుట అనునది అబ్రాహాము చరిత్ర మొదలు నూతన నిబంధన కాలము తరువాత కూడా జరుగుచున్నది.  ఈ కాలములో కూడా కొన్ని జాతులవారిని గూర్చి నేషనల్‌ జియోగ్రఫీ టీ.వి. ఛానల్‌లో చూపిస్తూ - వారు వారిలో మరణించినవారిని ఒక పాత గృహములో వారు వదిలివేయుట చూపించారు.  ఇది అబ్రాహాము కాలములో కూడా జరిగింది.  తన భార్యయైన శారా చనిపోయినప్పుడు అబ్రాహాము కనాను దేశములో మక్సేలా పొలము అందులోని గుహను కొని తన సొంతము చేసుకొని, తన భార్యను అందులో వుంచినట్లుగా మనము గ్రహించాలి.  అంతేకాదు ఈ శ్మశానపు ఏర్పాటు చేయు కాలములో అబ్రాహాము తన భార్యయైన శారా నిమిత్తము దు:ఖమును అనుభవించినట్లుగా వ్రాయబడి యున్నది.  ఆది 23:2, ''శారా కనాను దేశమందలి హెబ్రోనను కిర్యతర్బాలో మృతిబొందెను;  అప్పుడు అబ్రాహాము శారా నిమిత్తము అంగలార్చుటకును ఆమెను గూర్చి యేడ్చుటకును వచ్చెను.''  అందరిలాగే అబ్రాహాము తన భార్యయైన శారా నిమిత్తము అంగలార్చుట, ఏడ్చుట చేసాడు కాని అదే సమయములో ఆమెను పాతిపెట్టుటకు స్వాస్థ్యముగా శ్మశానపు భూమిని కొనుగోలు చేయుట మనము చదువగలము.  ఆది 23:13-18, ''-సరేకాని నా మనవి ఆలకింపుము.  ఆ పొలమునకు వెల యిచ్చెదను;  అది నాయొద్ద పుచ్చుకొనినయెడల మృతిబొందిన నా భార్యను పాతి పెట్టెదనని ఆ దేశ ప్రజలకు వినబడునట్లు ఎఫ్రోనుతో చెప్పెను.  అందుకు ఎఫ్రోను-అయ్యా నా మాట వినుము;  ఆ భూమి నాలుగు వందల తులముల వెండి చేయును;  నాకు నీకు అది యెంత?  మృతిబొందిన నీ భార్యను పాతిపెట్టుమని అబ్రాహామున కుత్తరమిచ్చెను;   అబ్రాహాము ఎఫ్రోను మాట వినెను.  కాబట్టి హేతు కుమారులకు వినబడునట్లు ఎఫ్రోను చెప్పిన వెల అనగా వర్తకులలో చెల్లు నాలుగువందల తులముల వెండి అబ్రాహాము తూచి అతనికిచ్చెను.  ఆలాగున మమ్రే యెదుటనున్న మక్పేలాయందలి ఎఫ్రోను పొలము, అనగా ఆ పొలమును దానియందలి గుహయు దాని పొలిమేర అంతటిలోనున్న ఆ పొలము చెట్లన్నియు, అతని ఊరి గవిని ప్రవేశించువారందరిలో హేతు కుమారుల యెదుట అబ్రాహామునకు స్వాస్థ్యముగా స్థిరపరచబడెను.''  ఇలా అబ్రాహాము తన భార్యయైన శారాయొక్క శరీరమును పాతిపెట్టుటకు తన సొంత పొలముగా వుండునట్లుగా ఆ పొలమును కొని దాని గుహలో తన భార్యను వుంచుట జరిగింది.  

        అలాగే లాజరు, యేసుక్రీస్తు ప్రభువును కూడా గుహలలో వుంచారు.  అయితే ఎవరు పెట్టని గుహలో యేసుక్రీస్తు ప్రభువును వుంచుట జరిగింది.  ఇలా పాత మరియు క్రొత్త నిబంధన కాలములోని దైవజనాంగమైన ఇశ్రాయేలీయుల ప్రజలు గుహలలో శరీరములు వుంచుటయే పాతిపెట్టుటతో సమానముగా భావించేవారు.  ఆది 50:12-14, ''అతని కుమారులు తన విషయమై అతడు వారి కాజ్ఞాపించినట్లు చేసిరి.  అతని కుమారులు కనాను దేశమునకు అతని శవమును తీసికొనిపోయి మక్పేలా పొలమందున్న గుహలో పాతిపెట్టిరి.  దానిని ఆ పొలమును అబ్రాహాము తనకు శ్మశానముకొరకు స్వాస్థ్యముగానుండు నిమిత్తము మమ్రే యెదుట హిత్తీయుడైన ఎఫ్రోనుయొద్ద కొనెను.  యోసేపు తన తండ్రిని పాతిపెట్టిన తరువాత అతడును అతని సహోదరులును అతని తండ్రిని పాతిపెట్ట వెళ్లిన వారందరును తిరిగి ఐగుప్తునకు వచ్చిరి.''  కనుక శ్మశాన కార్యక్రమము ఆది కాలము నుండి ఏదో ఒక రూపములో జరుగుచూనే వున్నది.  వారివారి ఆచారములు వారివారి సిద్ధాంతములను బట్టి ఆ కార్యమును జరిగించేవారు.  అందులో భాగముగా పిరమిడ్‌లు, ఐగుప్తు రాజుల గొప్పతనమును, వారి ఆర్థిక స్థితిని చాటితే, సాధారణ స్థితిలో భూమిలో పాతిన వారి సాధారణ స్థితి మనకు తెలుస్తున్నది.  శ్మశాన కార్యక్రమములో హిందువులైతే కొందరిని గంధపు చెక్కలతో కాల్చుట, మరికొందరిని పనికిరాని కొయ్యలతో కాల్చుట చేస్తున్నారు.  దీనికి కారణము వారి కుటుంబముయొక్క ఆర్థిక స్థితినిగ్రహించాలి.  యుద్ధములలో చనిపోవువారిని అందరిని కలిపి ఒకే గోతిలో వేసి పూడ్చుట కూడా శ్మశాన కార్యక్రమమే.  కాని అది దేవుని ఉగ్రత వల్ల వచ్చినట్లుగా యిర్మీయా 16వ అధ్యాయములో చెప్పబడింది.  యిర్మీయా 16:4, ''-వారు ఘోరమైన మరణము నొందెదరు;  వారినిగూర్చి రోదనము చేయబడదు, వారు పాతి పెట్టబడక భూమిమీద పెంటవలె పడియుండెదరు, వారు ఖడ్గము చేతను క్షామముచేతను నశించెదరు;  వారి శవములు అకాశపక్షులకును భూజంతువులకును ఆహారముగా ఉండును.''  దేవుని ఉగ్రతలో చనిపోయినవారి శవములు కుప్పలు కుప్పలుగా పడి ఒకేచోట వందలకొలది తన మన భేధము లేక పూడ్చువారిని గూర్చి బాధపడువారే లేని స్థితిలో శ్మశాన కార్యక్రమము జరుగుతుంది.  కాని ఈ శ్మశాన కార్యక్రమము చేయువారి విషయములో చేయువారికి నీతిగా ఎంచబడుతుంది.  ఎందుకంటే చనిపోయినవారు వారి రక్త సంబంధులు కారు.  కాని వారి మీద వారికి జాలి కలిగి వారిని పూడ్చుట చేస్తున్నారు.  ఇది నీతి కార్యమే.  కార్యము చేయువారికి నీతిక్రియగా మారి వారి మరణానంతరము వారితో వెళ్ళుతుంది.  కాని చనిపోయి కుప్పలు కుప్పలుగా పూడ్చబడినవారికి అది నీతిగా ఎంచబడదు.  వారి చరిత్ర అంతటితో సమాప్తమై పోయినది.

దిక్కులేని శవములు పూడ్చుట కూడా నీతి క్రియయే

        కనుక శ్మశాన కార్యము చేయువారికి అది నీతిగా ఎంచబడును.  అందులోను దిక్కుమొక్కులేని శవములకు శ్మశాన కార్యక్రమము చేసిన అది చేయువారికి నీతిగా ఎంచబడును.  కాని చనిపోయి మరణించినవారికి మాత్రము ఈ కార్యక్రమము వలన వారికి నీతి రాదు.

28.  మరణించినవారు తమ మరణించినవారిని పాతిపెట్టుట

        మత్తయి 8:22, ''యేసు అతని చూచి-నన్ను వెంబడించుము;  మృతులు తమ మృతులను పాతిపెట్టుకొననిమ్మని చెప్పెను.''

        ఇది క్రీస్తు ప్రభువు చెప్పిన మాట.  దీనినిగూర్చి తెలుసుకొనే ముందు, ఇది ఏ సందర్భములో చెప్పబడినది అనేది ముఖ్యము.  మత్తయి 8:21, ''శిష్యులలో మరియొకడు-ప్రభువా, నేను మొదట వెళ్ళి, నా తండ్రిని పాతిపెట్టుటకు నాకు సెలవిమ్మని ఆయనను అడుగగా''  ఇందులో ఒక శిష్యుని తండ్రి మరణించినట్లుగా చెప్పబడినది.  అతనిని పూడ్చి వచ్చుటకు శిష్యుడు క్రీస్తు ప్రభువుని అనుమతిని అడుగుచున్నాడు.  అయితే క్రీస్తు ప్రభువు మన మూలవచనములో వలె తెలియచేస్తున్నారు.

        ఇందులో మొదట చెప్పబడిన మృతులు ఎవరు?  రెండవసారి చెప్పబడిన మృతులు ఎవరు?  ఇందులో మృతులుగా చెప్పబడినవారు - ఎఫెసీ 2:1, ''మీ అపరాధములచేతను పాపములచేతను మీరు చచ్చినవారై యుండగా, ఆయన మిమ్మును క్రీస్తుతో కూడ బ్రదికించెను.''  ఇందులో అపరాధములచేత పాపముల చేత చచ్చినవారే ఈ మృతులు.  అనగా ఆదాము దేవుడు తినవద్దన్న పండును తిని అపరాధములచేత పాపములచేత దైవవ్యతిరేకిగా మారి దైవశాపము మూలముగా మరణించినవాడు అయ్యాడు.  అనగా ఆత్మరీత్యా మరణించాడు.  అతని సంతతియైన మనము చచ్చినవారమై అనగా మన పుట్టుకతోటే మనయొక్క ఆత్మజ్ఞానము కోల్పోయినవారమై చచ్చినవారిగా అనగా మరణించిన వారిగా లెక్కకు వచ్చుచున్నాము.

అపరాధములు మరియు పాపముల చేత మరణించినను జీవము కలిగి తిరుగుతున్న మనుష్యులు

        ఇక రెండవ మృతులు వీరు శరీరరీత్యాను, ఆత్మరీత్యాను మరణించినవారు.  అనగా పుట్టుక నుండియే తమ దుష్క్రియల వలన ఆత్మను చంపుకొని ఆ తర్వాత దేహరీత్యా కూడా  మరణించి మృతులైనవారు, శరీరరీత్యా మొదటి మరణమును రుచి చూచుదురు.  ఇలా శరీరరీత్యా ప్రాణమును వదిలి మరణించినవారు ఈ రెండవ మృతులు.

        ఇందులో ఆత్మరీత్యా మరణించినవారు అనగా ప్రకటన 3:1లో వలె జీవించుచున్నామన్న పేరు మాత్రము ఉండి - మృతులైనవారు ఆత్మ శరీరరీత్యా మరణించినవారిని పాతిపెట్టు కొననిమ్మని క్రీస్తు ప్రభువు చెప్పుచూ - ''నన్ను వెంబడించుము,'' అని చెప్పుచున్నారు.  యోహాను 11:25, ''అందుకు యేసు-పునరుత్థానమును జీవమును నేనే;  నాయందు విశ్వాసముంచువాడు చనిపోయినను బ్రదుకును;''  కనుక క్రీస్తును వెంబడించినవాడు నిత్య జీవమును వెంబడించినవాడు మరియు జీవ పునరుత్థానమును వెంబడించినవాడు అగును.  అందుచేత ఆత్మరీత్యా మరణించినవాడుగా వున్న శిష్యుడిని క్రీస్తు ప్రభువు నన్ను వెంబడింపమని చెప్పుచున్నాడు.

        అందుచేత క్రీస్తు ప్రభువును వెంబడించుట, జీవమును వెంబడించుట అగును, ఎందుకంటే పునరుత్థానము మరియు జీవము క్రీస్తే.  కనుక మరణించియున్న మనము క్రీస్తును వెంబడించాలి.  అప్పుడు మనము మరణించినప్పుడు పునరుత్థానము జీవమునకు అధిపతియైన క్రీస్తు తన అధికారముతో ఆత్మరీత్యా శరీరరీత్యా మరణించియున్న మనలను తిరిగి జీవములోనికి పునరుత్థానము ద్వారా నడిపించును.

        అయితే క్రీస్తును వెంబడిస్తున్న శిష్యుడు జీవమును వెంబడించువాడు తన తండ్రి మరణించి యుండుటచేత తిరిగి అతన్ని పాతిపెట్టి వస్తానని చెప్పుచున్నాడు.  అయితే క్రీస్తు ప్రభువు శిష్యునికి అనుమతి ఇయ్యుట లేదు, ఎందుకంటే క్రీస్తు శిష్యులలో ఒక శిష్యుడు ఇతను.  ఇతను అప్పటికే క్రీస్తు ప్రభువు ద్వారా ఇతని ఆత్మ మరణమును జయించి జీవములో ప్రవేశించి యున్నాడు  కనుక వెనుతిరగవలసిన అవసరము లేదు, ఎందుకంటే జీవములో ప్రవేశించిన వారికి జీవములో ప్రవేశించినవారే బంధువులు, స్నేహితులు.  అంతేకాని మరణములో ప్రవేశించినవారు కారు.  ఈ శిష్యుడికి స్వంత తండ్రియైనను పాపములోనే మరణించుట చేత ఆయన చేసిన కార్యములు క్రీస్తు ప్రభువుకు తెలుసును కాబట్టి జీవములో ప్రవేశించిన నీవు వెళ్ళవద్దని తెలియజేస్తున్నాడు.

        కనుక పాపముల చేత, అపరాధముల చేత చచ్చినవారు మృతులుగా వున్నారు.  వీరు తోటి మృతులను అనగా అపరాధములచేత, పాపములచేత క్రీస్తును ఎరుగని శరీరరీత్యా మొదటి మరణమును చూచిన మృతులను పాతిపెట్టుకొననిమ్మని చెప్పుచున్నారు.  కనుక జీవములో వున్నవారికి, మరణములో వున్నవారికి ఎప్పటికి పొత్తు కూడదని చెప్పబడింది.  జీవములో వున్నవారు శాంతికర పరదైసులలో వుంటారు.  మరణించి మృతులుగా వున్నవారు పాతాళ లోకములో వుంటారు.  క్రీస్తు ప్రభువు తీర్పు తరువాత జీవములో వున్నవారు పరమయెరూషలేములో భాగస్థులు.  మృతులు మండుచున్న అగ్నిగుండములో భాగస్తులు.  వీరికి ఎక్కడ పొత్తు లేదని గ్రహించాలి.

        ఈ విషయము గ్రహించిన క్రీస్తు ప్రభువు మన మూలవచనములో వలె - మృతులు తమ మృతులను పాతిపెట్టుకొననిమ్మని చెప్పుచూ - జీవములో ప్రవేశించిన నీవు నన్ను వెంబడింపుముగాని వెనుతిరిగి చూడవద్దని చెప్పుచున్నాడు.  

        ఇదే మూల వాక్యములో లూకా 9:61-62లో ప్రభువు వెంట వెళ్ళుటకు ఇంటనున్న వారి యొద్ద అనుమతి పొంది వచ్చుటకు సెలవిమ్మని కోరినప్పుడు - నాగలియను జీవవృక్షము మీద చేయి పెట్టి వెనుకకు చూడనవసరము లేదని ప్రభువు పలుకుతున్నాడు.

29.  మరణించినవారిని గూర్చిన భయము

         ఇదొక విచిత్రమైన స్థితి.  చనిపోతామంటే భయపడేవారు ఒక రకము.  ఇది ఇంచుమించు అందరిలోను వుంటుంది.  కాని చనిపోయినవారి శవాలను చూచి భయపడువారిని అనేకులను మనము చూడ వచ్చు.  

చనిపోయిన వారంతా దయ్యాలుగా మారితే ఈ ప్రపంచమంతా దయ్యాలతోనే నిండి వుండాలి

వీరు ఈ చనిపోయినవారు దయ్యాలుగా మారతారని అపోహలో జీవిస్తారు.  అందుకనే భయపడి రాత్రిళ్ళు బయటకు రాకుండా ప్రక్కన మనిషి లేనిదే వారు శరీర కార్యము లకు కూడా వెళ్ళరు. నిజానికి, వీరను కున్నట్లుగా చనిపోయినవారు దెయ్యాలైతే ఈ ప్రపంచమంతా దయ్యాలతోనే నిండి వుండేదని గ్రహించాలి.  కనుక ఇటువంటి అపోహలకు తావియ్యక భయము వీడి జీవించమని ఈ పుస్తకము ద్వారా తెలియజేస్తున్నాను.  అయితే చనిపోయినవారి శరీరమును మనము సమాధులలో పూడ్చుచున్నాము.  వారి ఆత్మను ఎవరు తీసుకొని వెళ్ళుదురు అను విషయము మనము 81వ పేజీలోని 33వ నెంబరు చాప్టరు నందు చదువగలము.

30.  ఈ మట్టి శరీరముతో రెండుసార్లు మొదటి మరణమును చూచినవారు

        పాతనిబంధన కాలములో సారెపతు అను ఊరిలోని విధవరాలి కుమారుడు రోగియై ప్రాణము విడిచి మరణించిన తరువాత, ఏలీయా దేవునికి ప్రార్థన చేసి తిరిగి బ్రతికించెను.  

క్రీస్తు నందు నమ్మిక ఉంచిన దైవజనులు మాత్రమే దేవుడు ఏమి చేయునో అవి అన్ని చేయగలరు అనుటకు ఇది మంచి ఉదాహరణ - ఇదే ఈనాటి క్రైస్తవ మత వ్యాప్తికి కారణము.

1 రాజులు 17:20-22, ''-యెహోవా నా దేవా, నన్ను చేర్చుకొనిన యీ విధవరాలి కుమారుని చంపునంతగా ఆమెమీదికి కీడు రాజేసితివా అని యెహోవాకు మొఱ్ఱపెట్టి ఆ చిన్నవానిమీద ముమ్మారు తాను పారచాచుకొని- యెహోవా నా దేవా, నా మొఱ్ఱ ఆలకించి యీ చిన్నవానికి ప్రాణము మరల రానిమ్మని యెహోవాకు ప్రార్థింపగా  యెహోవా ఏలీయా చేసిన ప్రార్థన ఆలకించి ఆ చిన్నవానికి ప్రాణము మరల రానిచ్చినప్పుడు వాడు బ్రదికెను.''

అలాగే ఎలీషా తాను చనిపోయినను, చనిపోయినవానికి అద్భుతరీతిగ జీవమును ఇచ్చెను.  2 రాజులు 13:20-21, ''తరువాత ఎలీషా మృతిపొందగా వారు అతనిని సమాధిలో ఉంచిరి.  ఒక సంవత్సరము గడచిన తరువాత మోయాబీయుల సైన్యము దేశముమీదికి వచ్చినప్పుడు కొందరు ఒక శవమును పాతిపెట్టుచు సైన్యమునకు భయపడి ఆ శవమును ఎలీషాయొక్క సమాధిలో ఉంచగా దింపిన ఆ శవము ఎలీషా శల్యములకు తగిలినప్పుడు అది తిరిగి బ్రతికి కాళ్లు మోపి నిలిచెను.''  ఇది ఒక విచిత్రమైన సంఘటన.  అయినను చనిపోయినవాడు అదే శరీరముతో ఎవరి ఉద్దేశ్యము అనగా బ్రతికించాలన్న ఉద్దేశ్యము ఎవరికి లేకపోయినను ఈ సంఘటనలో తిరిగి జీవము వానికి వచ్చింది.

        ఇక నూతన నిబంధన కాలములో యేసుక్రీస్తు ప్రభువు నాయీరులో వితంతువు కుమారుని  తిరిగి లేపాడు.  లూకా 7:13-15, ''ప్రభువు ఆమెను చూచి ఆమెయందు కనికరపడి ఏడువవద్దని ఆమెతో చెప్పి, దగ్గరకు వచ్చి పాడెను ముట్టగా మోయుచున్నవారు నిలిచిరి.  ఆయన-చిన్నవాడా, లెమ్మని నీతో చెప్పుచున్నాననగా ఆ చనిపోయిన వాడు లేచి కూర్చుండి మాటలాడసాగెను;  ఆయన అతనిని అతని తల్లికి అప్పగించెను.''  అలాగే లాజరు మరణించి నాలుగు దినములు అయిన తరువాత తిరిగి మరల బ్రతికింపబడెను.  యోహాను 11:43-44, ''ఆయన ఆలాగు చెప్పి-లాజరూ, బయటికి రమ్మని బిగ్గరగా చెప్పగా చనిపోయినవాడు, కాళ్లు చేతులు ప్రేత వస్త్రములతో కట్టబడినవాడై వెలుపలికి వచ్చెను;  అతని ముఖమునకు రుమాలు కట్టియుండెను.  అంతట యేసు-మీరు అతని కట్లు విప్పిపోనీయుడని వారితో చెప్పెను.''  ఇలా క్రీస్తు ప్రభువు అనేకులను తిరిగి లేపి వారికి మరల జీవము పోసెను.  అలాగే క్రీస్తునందు ప్రతిష్టించబడిన అపొస్తలులు చేయగలిగిరి.  అపొస్తలులుగా ఎంచబడినవారు పౌలు కూడా చనిపోయినవారిని లేపెను.  కనుకనే నేడు క్రైస్తవ మతము ప్రపంచమంతయు చుట్టుకొని యున్నది.  

        ఇలా ఒకసారి చనిపోయిన వారి ఆత్మ పరదైసులోనో లేక పాతాళములోనో బంధింపబడి యున్నప్పుడు ఆ ఆత్మ తిరిగివచ్చి దానిలో ప్రవేశించి జీవాన్ని ఇవ్వగలిగింది.  ఇలా బ్రతికినవారు మరి కొంత కాలము దైవ మహాత్యములకు సాక్ష్యముగా ఈ లోకములో జీవించి తిరిగి మరణించారు.  ఇలా వీరు రెండుసార్లు మొదటి మరణమును తమ జీవితములో రుచి చూడగలిగిరి.

31.  మరణించినవారియొక్క జ్ఞాపకార్థ విందు

        అంగలార్పు దినములు దు:ఖ దినములు జరిగిన తరువాత జ్ఞాపకార్థ విందు కార్యము జరుగును.  వారివారి పరిస్థితులను బట్టి వారి స్థితిని బట్టి ఈ కార్యక్రమము వుంటుంది.  సంఘ కాపరియొక్క వాక్యోపదేశముతో కూడిన ఈ కార్యక్రమమును కొందరు 3వ రోజు లగాయతు 40వ రోజు లోగా ఒక దినమున సాధారణముగా చేస్తుంటారు.  చనిపోయిన దినమువలె ఈరోజు అంగలార్పు ఉండదు.  మరణించిన వారి కుటుంబము వచ్చిన ప్రతి ఒక్కరిని విందు చేసి వెళ్ళమని బ్రతిమిలాడుట మనము చూస్తాము.  ఈ దినముతో చనిపోయిన వ్యక్తిని ప్రతి ఒక్కరు మరచిపోతారు.  ఎప్పుడో సమయ సందర్భాలనుబట్టి ఈ చనిపోయిన వ్యక్తిని గూర్చి మాట్లాడుటయే గాని మునుపటివలె ప్రాధాన్యత వుండదు.  ఈ విందులో చనిపోయినవారిని గూర్చిన బాధకన్నా వారి కుటుంబీకుల హోదా, అంతస్తులకు ప్రాధాన్యత వుంటుంది.  ఈ విందులో పంచభక్ష పరమాన్నాలు చేసేవారు కొందరైతే, సాంబారు అన్నముతో సరిపెట్టేవారు కొందరు.  ఈ విందులో కుటుంబానికి ఒక స్టీలు గ్లాసు ఇచ్చేవారు కొందరైతే, ఖరీదైన బహుమతిని ప్రతి ఒక్కరికి ఇచ్చేవారు కొందరు.  ఇలా వారివారి ఆర్థికస్థితిని బట్టి ఈ కార్యక్రమము చేస్తారు.  దీనినే మనము జ్ఞాపకార్థ విందుగా చెప్పుచున్నాము.

చనిపోయినవారిని గుర్తు చేసుకొంటూ ఆనందమును పంచుకొనే ఏకైక పద్ధతి

        అయితే, ఈ విందులో కూడా దేవునికి ఇష్టమైనవి ఇష్టము లేనివి అని రెండు రకములుగా ఉన్నాయి.  పరిశుద్ధుని మరణము తరువాత జరుగు విందు దేవునికి ఇష్టమైన చర్య.  అపరిశుద్ధునికి జరుగు విందు దేవునికి ఇష్టమైనది కాదు.  యిర్మీయా 16:8, ''వారియొద్ద కూర్చుండి అన్నపానములు పుచ్చుకొనుటకు నీవు విందుశాలలో ప్రవేశింపకూడదు.''  కనుక యిర్మీయాలో చెప్పబడిన వారు దైవ వ్యతిరేక చర్య వలన, అన్య దేవతలననుసరించి పూజించి దైవమార్గము నుండి మరలినవారు వారి విందు దైవత్వము నిరాకరించినట్లుగా మనము గుర్తించాలి.

32.  చనిపోయిన పరిశుద్ధుల శవములు అద్భుతములు చేయుట

        ఈనాడు ప్రపంచ చరిత్రలో క్రైస్తవులలో కథోలిక్‌ సంఘస్థులు పరిశుద్ధుల సమాధులను జాగ్రత్తపరచి వారిని గుర్తు చేసుకొనునట్లుగా ఏర్పాటు చేసి వున్నారు.  ఉదాహరణకు అపొస్తలుడైన తోమా చనిపోయిన స్థలమును - ఆయనను సమాధి చేసిన స్థలమును కథోలిక్‌ సంఘమువారు   వాటిని అలాగే వుంచి, అది పరిశుద్ధ స్థలముగా ఎన్నికచేసి దానిపై లేక ఆ సమాధిని అలాగే వుంచి దాని చుట్టూ చర్చీని నిర్మించియున్నారు.  ఇలా చేయుట అనేకము మనము చూడవచ్చును.  చెన్నై నగరములో మైలాపూర్‌ అను ప్రాంతములో చర్చీలోనే అపొస్తలుడైన తోమా పూడ్చిన సమాధిని మనము చూడవచ్చును.  అలాగే ఈమధ్య కాలములో మరణించిన మదర్‌ థెరిస్సా శరీరము పూడ్చిన స్థలమును  బాగా జాగ్రత్తగా దానిని భద్రపరచినట్లుగా మనము గుర్తించాలి.  కొందరు విశ్వాసులు మేము ఆ సమాధిని తాకి క్రీస్తు ప్రభువుని ప్రార్థించితిమి మాకు స్వస్థత లభించినదని చెప్పుట మనము అప్పుడప్పుడు వింటున్నాము.  

        ఇది నిజమా!  ఇది జరుగునా అని మరికొంతమంది క్రైస్తవ విశ్వాసులు ప్రశ్నించుట చూస్తున్నాము.  ఇందులో వున్న నిజమేమిటో తెలుసుకొందము.  మత్తయి 23:29-30, ''అయ్యో, వేషధారులైన శాస్త్రులారా, పరిసయ్యులారా, మీరు ప్రవక్తల సమాధులను కట్టించుచు, నీతిమంతుల గోరీలను శృంగారించుచు -మనము మన పితరుల దినములలో ఉండినయెడల ప్రవక్తల మరణ విషయములో వారితో పాలివారమై యుండకపోదుమని చెప్పుకొందురు.''  ఇందునుబట్టి, ప్రవక్తల మరణ విషయములో వారిని చంపినవారితో పాలివారము కాకుండా యుందుమని అనుకొని మరణించిన ప్రవక్తలకు సమాధులు కట్టించి, నీతిమంతుల గోరీలను శృంగారించుచు కాలము వెళ్ళబుచ్చుచున్నారు.  అనగా ఇందులో రెండు రకాల చర్యలు కనబడుచున్నవి.  

1.  ప్రవక్తల సమాధులు నిర్మించుట మరియు నీతిమంతుల గోరీలు శృంగారించుట.

2.  మనము మన పితరుల దినములలో ఉండినయెడల ప్రవక్తల మరణ విషయములో వారితో పాలివారమై యుండకపోదుమని చెప్పుట.

పరిశుద్ధుని శరీరము దేవుని నివాస స్థలము

        ఈ రెండు చర్యలు క్రీస్తు ప్రభువు వారికి గుర్తు చేస్తూనే మత్తయి 23:31, ''అందువలననే మీరు ప్రవక్తలను చంపినవారి కుమారులైయున్నారని మీ మీద మీరే సాక్ష్యము చెప్పుకొనుచున్నారు.'' అని చెప్పుచున్నారు.  అనగా ప్రవక్తను చంపినవారి కుమారులుగా వారికి క్రీస్తుప్రభువు పేరు పెట్టినారు.  యెహోవా దేవుని ప్రవక్తను చంపుట మహా నేరమైయున్నది.  దీనికి ఫలితముగా దేవుని కోపము, వీరిపైకి వచ్చునని గుర్తించాలి.  మత్తయి 23:35-36, ''నీతిమంతుడైన హేబెలు రక్తము మొదలుకొని బలిపీఠమునకును, దేవాలయమునకును మధ్య మీరు చంపిన బరకీయ కుమారుడగు జెకర్యా రక్తమువరకు భూమిమీద చిందింపబడిన నీతిమంతుల రక్తమంతయు మీ మీదికి వచ్చును.  ఇవన్నియు ఈ తరమువారిమీదికి వచ్చునని మీతో నిశ్చయముగా చెప్పుచున్నాను.''  కనుక వీరు ప్రవక్తలకు సమాధులు నిర్మించినను నీతిమంతుల గోరీలు శృంగారించినను ఉపయోగము లేదు.  దానివల్ల వేషధారులైన శాస్త్రులు, పరిసయ్యులు తమకు వచ్చు శిక్ష నుండి తప్పించుకొనలేరు.

        ఒక మనిషి చనిపోయినప్పుడు, వానిని అలా వదిలివేయక సమాధిచేసి దానిపై నిర్మించుట నీతికి సూచనే.  మార్కు 6:29, ''యోహాను శిష్యులు ఈ సంగతి విని, వచ్చి శవమును ఎత్తికొనిపోయి సమాధిలో ఉంచిరి.''  అపొ 8:2, ''భక్తిగల మనుష్యులు స్తైఫనును సమాధిచేసి అతనిని గూర్చి బహుగా ప్రలాపించిరి.''  కనుక సమాధిని జాగ్రత్తపరచుట, కట్టించుట, సమాధి చేయుట, దానిని శుభ్రముగా వుంచుట, నీతికి సూచనయే.  కాని మత్తయి 23:29-30లో అది చేసినవారు శాస్త్రులు, పరిసయ్యులు.  వీరు ఎలాంటివారో ఈ వచనములోనే చెప్పబడింది.  వారు వేషధారులై యున్నారు.  కనుక వేషధారణ జీవితములో వుంటూ చనిపోయిన నీతిమంతులకు, ప్రవక్తలకు సమాధులు కట్టి వాటిని శృంగారించుచూ వున్నారు.  పైపెచ్చు వారు మా పూర్వీకులు వారిని చంపారు కాని మేమైతే వారిని చంపక యుందుమని చెప్పుచున్నారు.  కాని అక్కడ ప్రవక్తలకే మహా ప్రవక్తయైన క్రీస్తు ప్రభువును నిర్లక్ష్యము చేయుచున్నారు.  అందుకే క్రీస్తు ప్రభువు ఓ వేషధారణ జీవితములో ఉన్న శాస్త్రులూ, పరిసయ్యులారా,  మీరు ప్రవక్తల సమాధులను కట్టించుచూ వున్ననూ అది వ్యర్థమే, మీరు నీతిమంతుల గోరీలను శృంగారించుచూ వున్ననూ అది వ్యర్థమే అని చెప్పుచూనే ఈ తరము వారి మీదికి దేవుని కోపము వచ్చునని చెప్పుచున్నాడు.

దేవుని నివాస స్థలము (పరిశుద్ధుని శరీరము) అద్భుతములు చేయుననుటలో ఆశ్చర్యమేమన్నా వున్నదా!

        ఇందులో క్రీస్తు ప్రభువు ప్రవక్తల సమాధులు కట్టుట, నీతిమంతుల గోరీలను శృంగారించుట తప్పుగా చెప్పుటలేదు గాని వేషధారణ జీవితముతో చేయవద్దని చెప్పబడియున్నది.  ఈనాడు మన సమాజములో బోధకులుగా, యాజకులుగా అనేకులు వున్నారు.  వీరు ప్రవక్తల, అపొస్తలుల పరిశుద్ధుల సమాధులను భద్రపరచుచూ దేవునిలో ఎదిగిన అది గొప్పతనమేగాని నేరము కాదు.  కాని వీరు వ్యభిచారము, దొంగతనము వంటి రహస్య కార్యములు చేయుచూ పైకి పై సమాధులను శృంగారించి ప్రార్థనలు దేవునిపేర జరిగించినను అది వ్యర్థమని గుర్తించాలి.  దీనిని గురించి క్రీస్తు ప్రభువు మత్తయి 23:29-30లో చెప్పుచున్నారు.  అపొస్తలుల కార్యములు  19:12, ''అతని శరీరమునకు తగిలిన చేతిగుడ్డలైనను నడికట్లయినను రోగులయొద్దకు తెచ్చినప్పుడు రోగములు వారిని విడిచెను, దయ్యములు కూడ వదలిపోయెను.''  ఇందులో జీవములేని గుడ్డ అనేక అద్భుతములు చేయుచున్నది.  అదియును పౌలు శరీరము తగిలినవి మాత్రమే.  అయస్కాంతమును అంటిపెట్టియున్న ఇనుపముక్క కొంతకాలానికి అయస్కాంతముగా మారినట్లుగా పౌలు శరీరమునకు తగిలిన గుడ్డలు ఆయన శరీరమును వదిలిన తరువాత కూడా అవి మహత్యములు చేయుట గురించి చెప్పబడింది.  అలాగే ఎలీషా చనిపోయి సమాధి చేయబడిన తరువాత అతని శరీరము మహత్యము చేసిందని బైబిలు గ్రంథమందు చదువగలము.  2 రాజులు 13:20-21, ''తరువాత ఎలీషా మృతిపొందగా వారు అతనిని సమాధిలో ఉంచిరి.  ఒక సంవత్సరము గడచిన తరువాత మోయాబీయుల సైన్యము దేశముమీదికి వచ్చినప్పుడు కొందరు ఒక శవమును పాతిపెట్టుచు సైన్యమునకు భయపడి ఆ శవమును ఎలీషాయొక్క సమాధిలో ఉంచగా దింపిన ఆ శవము ఎలీషా శల్యములకు తగిలినప్పుడు అది తిరిగి బ్రతికి కాళ్లు మోపి నిలిచెను.''  ఇందునుబట్టి దైవాత్మ నివసించిన శరీరము ఆత్మను వీడి మరణించిన తరువాత కూడా దానిలో శక్తి కనుమరుగు కాదని గుర్తించాలి.  అది సంపూర్ణముగా భూమిలో కలసిపోవువరకు దానిలో దైవశక్తి క్రియ జరిగించును.  ఎలీషా చనిపోయి ఒక సంవత్సరము తరువాత చనిపోయిన శవాన్ని ఎలీషాని పాతిపెట్టిన దానిలో వేయగా ఒక అద్భుతము జరిగింది.  కనుక పరిశుద్ధులు దేవునికి వారసులుగా భూమి మీద క్రియ జరిగించిన వారు మరణించి తమ ఆత్మ శరీరమునుండి వేరు చేయబడిన తరువాత కూడా అద్భుతములు చేయగలరని గుర్తించాలి.  పరిశుద్ధుని శరీరము కుళ్ళదు అని చెప్పబడింది.  కీర్తన 16:10, ''ఎందుకనగా నీవు నా ఆత్మను పాతాళములో విడచి పెట్టవు   నీ పరిశుద్ధుని కుళ్లుపట్టనియ్యవు''  అపొ 2:27, ''నీవు నా ఆత్మను పాతాళములో విడిచిపెట్టవు  నీ పరిశుద్ధుని కుళ్లుపట్టనియ్యవు.''  అనగా పరిశుద్ధుని శరీరము మహిమ శరీరముగా మారి అనేక అద్భుతములు జరిగించునుగాని దానికి నాశనము లేదు.  రెండవ మరణము లేదని గుర్తించాలి.  కనుకనే ఒక సంవత్సరము తరువాత కూడా ఎలీషాయొక్క శరీరము అద్భుతము చేయుట బైబిలు గ్రంథమందు చదువుచున్నాము.  కనుక పరిశుద్ధునికి మరణము లేదని, ఒకవేళ వారు శరీరరీత్యా మరణించినను వారికి జీవమేగాని మరణము లేదని గుర్తించాలి.  1 కొరింథీ 3:16-17.

33.  ఎప్పుడో వధింపబడిన ప్రవక్తల, పరిశుద్ధులయొక్క రక్తము యుగాంతములో కనబడుట

        ప్రవక్తలు పాత నిబంధన కాలము నుండి అనగా క్రీస్తు పూర్వము నుండి యున్నారు.  పరిశుద్ధులు భూమి పుట్టినది మొదలు యుగాంతమునకు కొంచెము కాలము ముందు వరకు వుందురు.  యుగాంత కాలములో పరిశుద్ధులనేవారు వుండరు.  కనుకనే ఈ భూమిని దేవుడు అగ్ని గంధకములతో నాశనము చేయును.  ఈ నాశనము జరుగునప్పటికి ఈ పరిశుద్ధులనే వారు భూమిపై పుట్టుట, చంపబడి మరణించుట జరిగిపోవును.  అలాగే ప్రవక్తలు కూడా వధింపబడి మరణించుట జరుగును.  ఈ సమయములో అపరిశుద్ధులతో కూడిన సమాజమైన మహాబబులోనుయొక్క పతనము, దానికి శిక్ష సంభవించునని బైబిలు గ్రంథము బోధించుచున్నది.  బబులోను పట్టణముయొక్క పతనమును గూర్చి - ప్రకటన 18:21, ''తరువాత బలిష్ఠుడైన యొక దూత గొప్ప తిరుగటి రాతివంటి రాయి యెత్తి సముద్రములో పడవేసి- ఈలాగు మహాపట్టణమైన బబులోను వేగముగా పడద్రోయబడి ఇక ఎన్నటికిని కనబడకపోవును.''  ఇలా పడద్రోయబడినప్పుడు ఆ పట్టణములో ప్రవక్తల, పరిశుద్ధుల, భూమి మీద వధింపబడిన వారి రక్తము ఆ పట్టణములో కనబడెనని వ్రాయబడి యున్నది.  ప్రకటన 18:24, ''మరియు ప్రవక్తలయొక్కయు, పరిశుద్ధులయొక్కయు, భూమిమీద వధింప బడినవారందరియొక్కయు రక్తము ఆ పట్టణములో కనబడెననెను.''

పరిశుద్ధులకు ఏ సందర్భములోను నాశనములో పాలిపంపులు లేదు

        ఈ బబులోను పట్టణము నాశనము చేయబడినప్పుడు, అది ఇక ఎన్నటికి కనబడకపోవునని చెప్పినప్పుడు ఆ నాశనములో రక్తము అగుపడుటలో వున్న ముఖ్య ఉద్ధేశ్యము ఏమై యుండును?  ప్రవక్తలు, పరిశుద్ధులు మొదలైనవారు పవిత్రులు.  వీరి రక్తము వీరిని వధించినప్పుడు ఈ భూమిపై పడి అందులో  కలిసిపోయింది.  అయితే బబులోను అను అపరిశుద్ధుల సమాజమును దేవుడు ఈ భూమితోబాటుగా దానిలోని అపరిశుద్ధులను నాశనము చేయునప్పుడు ఈ శిక్షలో పరిశుద్ధులకు పాలిపంపులు లేవు కనుక ఈ రక్తము అందులోంచి వెలుపలికి వచ్చి ఆ పట్టణములో కనబడుచున్నది.  పరిశుద్ధుని దేవుడు శిక్షించడని ప్రతి ఒక్కరికి తెలిసిన సంగతే.  అయితే బబులోను అను ఈ అపరిశుద్ధుల పట్టణములో పరిశుద్ధులు, ప్రవక్తలు ఒకప్పుడు చంపబడి, వారి రక్తము కలిసిపోయి యున్నది.  ఈ రక్తము దైవజనులది కనుక అపరిశుద్ధులతో పొందిక లేదు.  కనుకనే అపరిశుద్ధులకు జరుగు శిక్షలో నుండి అవి వేరుపరచబడినట్లుగా మనము గ్రహించాలి.

రెండవ భాగము

ఆత్మ భౌతిక శరీరమును విడిచినది మొదలు క్రీస్తు రెండవ రాకడకు ముందురోజు (పునరుత్థాన దినమునకు ముందు) వరకు వున్న కాలము

34.  శరీరరీత్యా మరణించి భౌతిక శరీరమును వీడిన వెంటనే ఆత్మ పరిస్థితి

        అది ఏ విధముగానైనను సరే మనిషి మరణిస్తున్నాడు.  ఈ మరణించిన వాని శరీరమును జీవముతో వున్న వారు సమాధి చేయుచున్నారు.  ఇవన్నీ మనము నిత్యము చూచుచున్నదే అయినను మనలను భయాందోళనను కలిగించే అంశము ఒకటున్నది.  అదేమిటంటే శరీరరీత్యా మరణించి భౌతిక శరీరమును వీడిన ఆత్మ పరిస్థితి ఏమిటి?  

        1 రాజులు 17:17-24, '' అటుతరువాత ఆ యింటి యజమానురాలైన ఆమె కుమారుడు రోగియై ప్రాణము నిలువజాలనంత వ్యాధిగలవాడాయెను.  ఆమె ఏలీయాతో - దైవ జనుడా, నాయొద్దకు నీవు రానిమిత్తమేమి?  నా పాపమును నాకు జ్ఞాపకముచేసి నా కుమారుని చంపుటకై నాయొద్దకు వచ్చితివా అని మనవి చేయగా అతడు-నీ బిడ్డను నా చేతికిమ్మని చెప్పి, ఆమె కౌగిటిలోనుండి వానిని తీసికొని తానున్న పై అంతస్తు గదిలోనికి పోయి తన మంచముమీద వాని పరుండబెట్టి -యెహోవా నా దేవా, నన్ను చేర్చుకొనిన యీ విధవరాలి కుమారుని చంపునంతగా ఆమెమీదికి కీడు రాజేసితివా అని యెహోవాకు మొఱ్ఱపెట్టి ఆ చిన్నవానిమీద ముమ్మారు తాను పారచాచుకొని- యెహోవా నా దేవా, నా మొఱ్ఱ ఆలకించి యీ చిన్నవానికి ప్రాణము మరల రానిమ్మని యెహోవాకు ప్రార్థింపగా యెహోవా ఏలీయా చేసిన ప్రార్థన ఆలకించి ఆ చిన్నవానికి ప్రాణము మరల రానిచ్చినప్పుడు వాడు బ్రదికెను.  ఏలీయా ఆ చిన్నవాని తీసికొని గదిలోనుండి దిగి యింట ప్రవేశించి వాని తల్లికి అప్పగించి ఇదిగో నీ కుమారుడు; వాడు బ్రదుకుచున్నాడని చెప్పగా ఆ స్త్రీ ఏలీయాతో-నీవు దైవజనుడవై యున్నావనియు నీవు పలుకుచున్న యెహోవామాట నిజమనియు ఇందుచేత నేనెరుగుదు ననెను.''

మనలోని ఆత్మ మన మరణానంతరము ఎటు వైపు దాని పయ్రాణము?

        ఇందులో - విధవరాలి కుమారుడు మరణించినప్పుడు, ఏలీయా చేసిన ప్రార్థనలో - ''యీ చిన్నవానికి ప్రాణము మరల రానిమ్మని యెహోవాకు ప్రార్థింపగా,'' అని అనుటలో మరణించిన ఈ విధవరాలి కుమారుడులోని ప్రాణము అనగా ఆత్మ ఎక్కడికో వెళ్ళినట్లుగా మనకు అర్థమగుచున్నది.  ఈ ఆత్మ ఈ విధవరాలి కుమారుని విడుచుటయే మరణము అను క్రియ.  ఈ విడిచిన ఆత్మ ఎక్కడికో వెళ్ళినది.  ఈ వెళ్ళిన ఆత్మను ఏలీయా తన ప్రార్థనలో తిరిగి ఇయ్యమని యెహోవా దేవుని ప్రార్థించుచున్నాడు.  ఈ ప్రార్థన చేసినది గొప్ప దైవజనుడు కనుక అతని ప్రార్థన ఆలకించిన దేవుడు మరల వానిలోని ప్రాణమును లేక ఆత్మను ''రానిచ్చినప్పుడు'' వాడు బ్రతికెను.  ''రానిచ్చినప్పుడు,''  అనుటలోనే ఎక్కడికో వెళ్ళిన ఆత్మను తిరిగి మరల తీసుకొని వచ్చినట్లుగా అర్థమగుచున్నది.  ఇందునుబట్టి ఆ పసివానిలోని ప్రాణము లేక ఆత్మ అతనిని వీడిన తరువాత ఎక్కడికో వెళ్ళినది.  దానిని ప్రవక్త అడిగి ఆ వెళ్ళిన ఆత్మను మరల తిరిగి తీసుకొని వచ్చి ఆ చిన్నవానిలో ప్రవేశింపజేసినట్లుగా అర్థమగుచున్నది.

మరణించినవాని ఆత్మను తిరిగి భౌతిక శరీరములోనికి రమ్మని ప్రార్థించి రప్పించగల విశ్వాసము నీదా!

        ఇంతకి ఈ చిన్నవాడు ఎప్పుడు మరణించాడు?  1 రాజులు 17:17, ''  అటుతరువాత ఆ యింటి యజమానురాలైన ఆమె కుమారుడు రోగియై ప్రాణము నిలువజాలనంత వ్యాధిగలవాడాయెను.''  ఈ స్థితిలో ఉన్న ఆ బాలుని పై అంతస్తు గదిలోనికి పోయి మంచము మీద పరుండబెట్టిన వెంటనే ఆ పసివాడు మరణించి యుండాలి.  ఆ వెంటనే ప్రవక్తయైన ఏలీయా ప్రార్థించుట జరిగింది.  ఈ ప్రార్థనలో ప్రవక్త పసివానిలోని ప్రాణమును లేక ఆత్మను తిరిగి రానిమ్మని వేడుకొనుట జరిగింది.  ఇందునుబట్టి, శరీరరీత్యా మరణించిన వెంటనే ఆ శరీరములోని ఆత్మ వేరొక చోటికి వెళ్ళిపోతున్నట్లుగా మనకు అర్థమగుచున్నది.  చనిపోవుట జరిగిన తోడనే ఆత్మ ఇక అక్కడ ఉండదు.  ఎక్కడికో తీసుకొని పోవుట జరుగుచున్నది.

35.  మరణించి భౌతిక శరీరమును విడిచిన వారి ఆత్మలను ఎవరు ఎక్కడికి తీసుకొని పోవుదురు?

        ఆదికాండము 3:19, ''నీవు నేలకు తిరిగి చేరువరకు నీ ముఖపు చెమట కార్చి ఆహారము తిందువు;  ఏలయనగా నేలనుండి నీవు తీయబడితివి; నీవు మన్నే గనుక తిరిగి మన్నైపోదువని చెప్పెను.''   ప్రసంగి 12:7, ''మన్నయి నది వెనుకటివలెనే మరల భూమికి చేరును, ఆత్మ దాని దయచేసిన దేవునియొద్దకు మరల పోవును.''  ఇలా మరణించిన వారిని నరులు భూమిలో వారి శరీరములను పాతి మట్టిగా మార్చుచున్నాము.  

మన భౌతిక శరీరములో సమానమైన ఆకారములో ఆత్మ మహిమ శరీరముతో వుండును

అయితే ఆత్మ సంగతి ఏమిటి?  ప్రసంగి చెప్పినట్లుగా మన్నయిన మన శరీరము తిరిగి భూస్థాపిత శరీరము ద్వారా మట్టిగా మార్చబడుచున్నది.  అలాగే ఆత్మ తనను భూమిపైకి పంపిన దేవుని యొద్దకు మరల వెళ్ళవలసియున్నది.  ఇలా మరణించి భౌతిక శరీరమును విడిచినవారి ఆత్మ దైవసన్నిధికి వెంటనే వెళ్ళదు, ఎందుకంటే ఆత్మ శరీరముతో జీవించిన రోజులలో తాను చేసిన కార్యములకు తగిన జీతమును పొందవలసియున్నది.  ప్రకటన 22:12, ''ఇదిగో త్వరగా వచ్చుచున్నాను.  వానివాని క్రియచొప్పున ప్రతివాని కిచ్చుటకు నేను సిద్ధపరచిన జీతము నాయొద్ద ఉన్నది.''  కనుక తీర్పు దినము వరకు వారిని  కొందరు తీసుకొని వెళ్ళి కొన్ని ప్రాంతములలో భద్రపరచుచున్నారని యూదా వ్రాసిన పత్రికలో చదువగలము.  ఆత్మలను ఎవరు తీసుకొని వెళ్ళుదురు?  యూదా 1:9, ''అయితే ప్రధానదూతయైన మిఖాయేలు అపవాదితో వాదించుచు మోషేయొక్క శరీరమునుగూర్చి తర్కించినప్పుడు, దూషించి తీర్పుతీర్చ తెగింపక-ప్రభువు నిన్ను గద్దించును గాక అనెను.''  ఇందులో ''మోషేయొక్క శరీరమును గూర్చి,'' అనుటలో ఇది భౌతిక శరీరము కాదు, ఎందుకంటే మరణించినవారి శరీరమును వారి తరపువారు భూమిలో సమాధి చేయుచున్నారు.  ఇది కుళ్ళి క్రుశించి పోవుట మనము ఎరిగిన సత్యమే!  కొన్ని దినముల తరువాత మన అవసరతలనుబట్టి త్రవ్వినప్పుడు ఆ శరీరము చెడిపోవుచూ అందులోనే ఉంటున్నట్లుగా మనము మన నిజ జీవితములో చూస్తున్నాము.  అయితే ఇందులో చెప్పబడిన మోషేయొక్క శరీరము ఆత్మకు సంబంధించినది.  ఆత్మ కూడా శరీర ఆకారములోనే ఉండును.  యేసుక్రీస్తు ప్రభువు తాను సిలువ బలియాగము ద్వారా మరణించి, తిరిగి లేచినప్పుడు ఆయన మనుష్యుని ఆకారములోనే ఉన్నట్లుగా చెప్పబడినది.  యోహాను 20:14-16, ''ఆమె యీ మాట చెప్పి వెనుకతట్టు తిరిగి, యేసు నిలిచియుండుట చూచెనుగాని ఆయన యేసు అని గుర్తుపట్టలేదు.  యేసు- అమ్మా యెందుకు ఏడ్చుచున్నావు, ఎవనిని వెదకుచున్నావు?  అని ఆమెను అడుగగా ఆమె ఆయన తోటమాలి అనుకొని-అయ్యా, నీవు ఆయనను మోసికొని పోయినయెడల ఆయనను ఎక్కడ ఉంచితివో నాతో చెప్పుము, నేను ఆయనను ఎత్తికొని పోదునని చెప్పెను.  యేసు ఆమెను చూచి-మరియా అని పిలిచెను.  ఆమె ఆయనవైపు తిరిగి ఆయనను హెబ్రీ భాషతో రబ్బూనీ అని పిలిచెను.  ఆ మాటకు బోధకుడని అర్థము.''  కనుక ఆత్మయొక్క శరీరము కూడా మనుష్యుని శరీర ఆకారములో ఉండునుగాని మట్టి శరీరము మాత్రము కాదు.  అది చెడిపోని అనగా క్షయముగాని మహిమ శరీరము.  అలాగే మోషే మరణించిన తరువాత మోషేయొక్క ఆత్మ కూడా మనుష్యుని ఆకారములోనే శరీరమును కలిగియున్నది.  కనుకనే మోషేయొక్క శరీరముగానే చెప్పబడినది.  అయితే మోషే మరణించిన తరువాత అతని శరీరములో ఉన్న మరియొక శరీరము అనగా ఆత్మయొక్క శరీరమును తీసుకొని పోవుటకు దేవుని దూతయైన మిఖాయేలు అను ప్రధాన దూత, సాతాను ఇద్దరు వచ్చారు.  అనగా మన భౌతిక శరీరములో ఇంకొక శరీరము వున్నట్లుగా మనకు అర్థమగుచున్నది.  2 కొరింథీ 4:16-17లో  దీనినే ఆంతర్య పురుషుడని ఆత్మను గూర్చి చెప్పబడుచున్నది.  అదే ఆత్మ మహిమ శరీరమును కలిగి ఈ భౌతిక శరీరములో నివసిస్తున్నది.  దీని కొరకు వీరిద్దరు వచ్చారు.  కనుక చనిపోయినవారి  ఆత్మలను మిఖాయేలు అతని అనుచరులు, సాతాను అతని అనుచరులు ఈ రెండు వర్గములవారు తీసుకొనిపోయి పరదైసులలో వారి ఆత్మలను భద్రపరచుదురు.  వారిలో సాతాను కొనిపోవువారు భూమిపై పాపములు అనగా చెడు క్రియలు చేసి ఉండాలి.  మిఖాయేలు ప్రశాంతకర పరదైసులలో భద్రపరచును.  కాని సాతాను తన స్వాస్థ్యమైన బాధాకరమైన పాతాళలోకములో భద్రపరచును.  ఇలా మిఖాయేలు, సాతాను ఇద్దరు వారి వారి క్రియలనుబట్టి తర్కించుకొని, మరణించి భౌతిక శరీరము విడిచిన ఆత్మను మృతుల లోకము అను పరదైసులో చేర్చును.  ఈ మృతుల లోకము మృతులయొక్క ఆత్మలను వారి వారి కార్యములనుబట్టి భద్రపరచబడుట జరుగును.  లూకా 16:22-23, ''ఆ దరిద్రుడు చనిపోయి దేవదూతలచేత అబ్రాహాము రొమ్మున (ఆనుకొనుటకు) కొనిపోబడెను.  ధనవంతుడు కూడ చనిపోయి పాతిపెట్టబడెను.  అప్పుడతడు పాతాళములో బాధపడుచు, కన్నులెత్తి దూరమునుండి అబ్రాహామును అతని రొమ్మున (ఆనుకొనియున్న) లాజరును చూచి''  వీరిద్దరి మధ్యన ఒక మహా అగాధము ఉన్నట్లుగా లూకా 16:26 నందు వ్రాయబడి యున్నది.  కనుక మృతుల లోకములో రెండు రకముల ప్రాంతములు మనకు తెలియుచున్నవి.  అందులో 1.  లాజరు ఉన్న ప్రాంతము.  2.  ధనవంతుడున్న ప్రాంతము.  వీటి మధ్యలో అగాధము.  ఇటువంటి మృతుల లోకములో మరణించినవారి ఆత్మలను భద్రపరచుచున్నారు.

మరణించిన భౌతిక శరీరమును విడిచిన ఆత్మకు మార్గము చూపువారు ప్రదాన దూతయైన మిఖాయేలు మరియు సాతాను అను అపవాది

        ఇలా భద్రపరచబడిన పరదైసులలో ఆనందమును పాతాళములో బాధను అనుభవించు వారు క్రీస్తు ప్రభువు ఇయ్యవలసిన తీర్పు వరకు అలాగే ఉందురు.  వారిలో ఎవరును పరలోకమునకు వెళ్ళరు.  2 కొరింథీ 12:2, ''క్రీస్తునందున్నయొక మనుష్యుని నేనెరుగుదును.  అతడు పదునాలుగు సంవత్సరములక్రిందట మూడవ ఆకాశమునకు కొనిపోబడెను; అతడు శరీరముతో కొనిపోబడెనో నేనెరుగను, శరీరములేక కొనిపోబడెనో నేనెరుగను, అది దేవునికే తెలియును.''  కనుక మూడవ ఆకాశమునకు కొనిపోయెనేగాని ఒకసారిగా పరలోకమునకు వెళ్ళలేదు.  ప్రకటన 2:7, ''చెవిగలవాడు ఆత్మ సంఘములతో చెప్పుచున్నమాట వినునుగాక.  జయించు వానికి దేవుని పరదైసులో ఉన్న జీవవృక్షఫలములు భజింపనిత్తును.''  లూకా 23:43, ''అందుకాయన వానితో-నేడు నీవు నాతోకూడ పరదైసులో ఉందువని నిశ్చయముగా నీతో చెప్పుచున్నా ననెను.''  కనుక భూమిపై భౌతిక శరీరమును విడిచినవారి ఆత్మలు భూమి మీద కాక మృతుల లోకములోని పరదైసులలో లేక పాతాళ లోకములో వారిని ఉంచుట జరుగుచున్నది.  ఇలా శరీరము నుండి ఆత్మను వేరు చేసి మరియొక లోకమునకు చేర్చువారు మిఖాయేలను ప్రధాన దూత మరియు అపవాది అను సాతాను.  అయితే ఆత్మలు శరీర రూపము ధరించి ప్రభువు వారికేర్పరచిన నివాసాలలో ఉంటారని క్రీస్తు రూపాంతరములో మోషే ఏలీయాలు శిష్యులకు దర్శనమిచ్చుట, 2 కొరింథీ 12:2లోని మాటలు మరియు లాజరు ధనికుని ఉపమానమునుబట్టి మనకు అర్థమగుతున్నది.

36.  మృతుల లోకము - పాతాళ లోకము

        మృతుల లోకము భూమి కాక భూమి అంతర్గత పొరల నుండి సముద్రము, అగాధ జలములు, మధ్యాకాశము వరకు విస్తరించి యున్నది.  మృతుల లోకము అన్ని రకముల మరణించిన ఆత్మలతో నిండి యుంటుంది.  మరణమును దాటిన ఆత్మలు అనగా మరణ బంధకములు దాటిన ఆత్మలు కొద్ది మాత్రమే.  వీరు ప్రశాంతకరమైన పరదైసులలో నిండియున్నారు.  ప్రకటన 2:7, ''జయించు వానికి దేవుని పరదైసులో ఉన్న జీవవృక్షఫలములు భుజింపనిత్తును.''  ప్రకటన 6:9, ''ఆయన అయిదవ ముద్రను విప్పినప్పుడు, దేవుని వాక్యము నిమిత్తమును, తాము ఇచ్చిన సాక్ష్యము నిమిత్తమును వధింపబడినవారి ఆత్మలను బలిపీఠము క్రింద చూచితిని.''  ప్రకటన 14:1, ''మరియు నేను చూడగా, ఇదిగో, ఆ గొఱ్ఱెపిల్ల సీయోను పర్వతముమీద నిలువబడియుండెను.  ఆయన నామమును ఆయన తండ్రి నామమును నొసళ్లయందు లిఖింపబడియున్న నూట నలువది నాలుగు వేలమంది ఆయనతో కూడ ఉండిరి.''  

        ప్రకటన 14:4, ''వీరు స్త్రీ సాంగత్యమున అపవిత్రులు కానివారును, స్త్రీ సాంగత్యము ఎరుగని వారునైయుండి, గొఱ్ఱెపిల్ల ఎక్కడికి పోవునో అక్కడికెల్ల ఆయనను వెంబడింతురు;  వీరు దేవుని కొరకును గొఱ్ఱెపిల్లకొరకును ప్రథమఫలముగా ఉండుటకై మనుష్యులలోనుండి కొనబడినవారు.''  ప్రకటన 4:4, ''సింహాసనముచుట్టు ఇరువదినాలుగు సింహాసనములుండెను, ఈ సింహాసనములందు ఇరువదినలుగురు పెద్దలు తెల్లని వస్త్రములు ధరించుకొని, తమ తలలమీద సువర్ణ కిరీటములు పెట్టుకొన్నవారై కూర్చుండిరి.''

        ఇలా పరిశుద్ధులలో జయించినవారు, వధింపబడినవారు, వెయ్యిన్ని నలుబదినాలుగు వేలమంది, ఇరువదినలుగురు పెద్దలు శరీరరీత్యా మరణించినను, మృతులుగా మారినను, వీరు మృతుల లోకములో లేరు.  వీరిలో వారి వారి శరీర క్రియలనుబట్టి కొందరు క్రీస్తు ప్రభువుతో కూడా ఆయన ఎక్కడకు వెళ్ళితే అక్కడికల్లా సంచరించుచున్నారు.  ఆయన వాక్యము నిమిత్తము, వారిచ్చిన సాక్ష్యము నిమిత్తము వధింపబడినారు బలిపీఠము క్రింద విశ్రాంతి తీసుకొంటున్నారు.  మరికొందరు క్రీస్తు అనుగ్రహించిన పరదైసులలో ఉన్నారు.  మరికొందరు అనగా 12 మంది యాకోబు గోత్రముల మూల పురుషులు, 12 మంది అపొస్తలులు దేవుని సముఖములో ఉన్నారు.  ఇలా వీరంతా మృతుల లోకములో లేరు.  అందుకే క్రీస్తు ప్రభువు - యోహాను 11:25-26, ''అందుకు యేసు-పునరుత్థానమును  జీవమును నేనే;  నాయందు విశ్వాసముంచువాడు చనిపోయినను బ్రదుకును;  బ్రదికి నాయందు విశ్వాసముంచు ప్రతివాడును ఎన్నటికిని చనిపోడు.  ఈ మాట నమ్ముచున్నావా?  అని ఆమెను నడిగెను.''  కనుక పై వారందరు క్రీస్తు విశ్వాసములో చనిపోయినను బ్రతికినవారు. వారు జీవములోనే ఉన్నట్లుగా గుర్తించాలి.  వీరు దేవుని రాజ్యములో లేరుగాని దేవుని సన్నిధిలో ఉన్నట్లుగా గుర్తించాలి.  అనగా వీరు ఇప్పుడు పరలోకములో లేరుగాని మధ్యాకాశములోను దానిపై భాగాలలో పరదైసులలో ఉన్నారు.

మృతుల లోకములో అతి వేదనకర పాంతమును పాతాళ లోకము అందురు

        ఇక మిగిలినవారు ఎక్కడ ఉన్నారు?  వీరు కొద్ది పాపము నుండి ఎక్కువ పాపము చేసినవారు.  వీరు దేవుని క్షమాపణ పొందనివారు గనుక మృతుల లోకములో ఉన్నారు.  వీరిలో క్షమాపణ లేని పాపములు చేసినవారు ఉంటారు.  1 యోహాను 5:16-17లో వలె కొద్దిపాటి పాపములు చేసినవారు ఉంటారు.  దీనినే ఉత్తరించు స్థలము అని కూడా చెప్పవచ్చును.  వీరికి మృతుల లోకములో సువార్త కార్యక్రమము నిత్య సువార్తగా చెప్పబడుతుంది.  ప్రకటన 14:6.  

        ఇక పాతాళ లోకము అనగా నేమి?  ఇది కూడా ఇంచుమించు మృతుల లోకమే!  ఇందులో కూడా మృతులయొక్క ఆత్మలు వుండును.  ప్రకటన 20:13, ''సముద్రము తనలో ఉన్న మృతులను అప్పగించెను;  మరణమును పాతాళలోకమును వాటి వశముననున్న మృతుల నప్పగించెను;  వారిలో ప్రతివాడు తన క్రియల చొప్పున తీర్పుపొందెను.''  ఇందులో సముద్రము అనగా అగాధము.  మరియు మరణమును పాతాళ లోకమును తమ వశములో ఉన్న మృతులను అప్పగించినట్లుగా వ్రాయబడి యున్నది.  కనుక సముద్రము అనగా అగాధము అనగా ఆదికాండము 1:6-8, ''మరియు దేవుడు-జలముల మధ్య నొక విశాలము కలిగి ఆ జలములను ఈ జలములను వేరుపరచును గాకని  పలికెను.  దేవుడు ఆ విశాలము చేసి విశాలము క్రింది జలములను విశాలము మీది జలములను వేరుపరపగా ఆ ప్రకారమాయెను.  దేవుడు ఆ విశాలమునకు ఆకాశమని పేరు పెట్టెను.  అస్తమయమును ఉదయమును కలుగగా రెండవ దినమాయెను.''  ఆదికాండము 1:2, ''భూమి నిరాకారముగాను శూన్యముగాను ఉండెను; చీకటి అగాధ జలము పైన కమ్మియుండెను;''  ఇందులో చెప్పబడిన జలములు అగాధ జలములే.  కాని విభజింపబడినవి.

        కనుక అగాధముగా చెప్పబడిన సముద్రము పాతాళ లోకము రెండును మృతుల లోకములోని భాగాలుగా  గ్రహించాలి.  ఇందులో సముద్రములోనివారు మరణించినను మరణముయొక్క వశమున లేరు.  అనగా కొంత జీవమునకు సంబంధించిన కార్యములు జరిగించినవారుగా గుర్తించాలి.  వీరు మృతుల లోకములో సముద్రము అను అగాధములో ఉన్నారు.  

        అంతేకాకుండా మరికొందరు మరణమును పాతాళ లోకముయొక్క వశములో ఉన్నారు.  వీరు క్షమించరాని నేరము చేసినవారుగా గుర్తించాలి.  వారు దైవశాపము మూలముగా మరణమును పొందినట్లుగా గుర్తించాలి.  అనగా సొదొమ గొమొఱ్ఱా పట్టణ ప్రజలను అగ్ని గంధకములు దిగి వచ్చి వారిని నాశనము చేశాయి.  అలాగే యుగాంత కాలములో వధింపబడినట్లుండిన గొఱ్ఱెపిల్లగా ఉన్న క్రీస్తు ప్రభువు - ప్రకటన 6:7-8, ''ఆయన నాలుగవ ముద్రను విప్పినప్పుడు-రమ్ము అని నాలుగవ జీవి చెప్పుట వింటిని.  అప్పుడు నేను చూడగా, ఇదిగో పాండుర వర్ణముగల ఒక గుఱ్ఱము కనబడెను;  దాని మీద కూర్చున్నవాని పేరు మృత్యువు.  పాతాళ లోకము వానిని వెంబడించెను.  ఖడ్గమువలనను కరువువలనను మరణమువలనను భూమిలో నుండి క్రూర మృగములవలనను భూనివాసులను చంపుటకు భూమియొక్క నాలుగవ భాగము పైన అధికారము వారికియ్యబడెను.''  ఇలా దేవుని ఉగ్రత వల్ల చంపబడినవారు అందరు మృతుల లోకములో అతి వేదనకర ప్రాంతము పాతాళములో చేర్చబడినట్లుగా గుర్తించాలి.  లూకా 16:23-24, ''అప్పుడతడు పాతాళములో బాధపడుచు, కన్నులెత్తి దూరమునుండి అబ్రాహామును అతని రొమ్మున (ఆనుకొనియున్న) లాజరును చూచి -తండ్రివైన అబ్రాహామా, నాయందు కనికరపడి, తన వ్రేలికొసను నీళ్లలోముంచి నా నాలుకను చల్లార్చుటకు లాజరును పంపుము;  నేను ఈ అగ్నిజ్వాలలో యాతనపడుచున్నానని కేకలువేసి చెప్పెను.''  

        వీరు మరణముయొక్క ఆధీనములో ఉన్నారు.  కనుక మరణము పాతాళ లోకము రెండును తమలోని మృతులను, సముద్రము తనలోని మృతులతోబాటుగా అప్పగించుట ఇందులో జరుగుచున్నది.  కనుక మృతుల లోకములో సముద్రమను అగాధము మరియు పాతాళ లోకము ఉన్నట్లుగా మనము గ్రహించాలి. అయితే వీటిలోని మృతులు వీరు అప్పగింపబడిన తరువాత క్రీస్తు ప్రభువు తీర్పు తీర్చును.  

ఈ మృతుల లోకము పరదైసుల వారీగా విభజింపబడి ఆత్మకు వారు భూమి మీద చేసిన కార్యములనుబట్టి నివాసముగా వున్నది

        అటుతరువాత - ప్రకటన 20:14, ''మరణమును మృతుల లోకమును అగ్నిగుండములో పడవేయబడెను;  ఈ అగ్నిగుండము రెండవ మరణము.''  ఈ రెండవ మరణమను అగ్నిగుండములో మరణము, మృతుల లోకము పడవేయబడుచున్నది.  దీని అర్థము పాతాళ లోకము కూడా అందులో పడవేయబడు చున్నట్లుగా గుర్తించాలి.  ఎందుకంటే మృతుల లోకములో పాతాళ లోకము ఒక భాగము మాత్రమే.

37.   మృతుల లోకములోని ప్రాంతాల మధ్య మహా అగాధములు

        లాజరు ధనవంతుని ఉపమానములో క్రీస్తు ప్రభువు ఈ విషయమును గూర్చి చెప్పెను.  లూకా 16:26, ''అంతేకాక ఇక్కడనుండి మీ యొద్దకు దాట గోరువారు దాటి పోజాలకుండునట్లును, అక్కడి వారు మాయొద్దకు దాటి రాజాలకుండునట్లును, మాకును మీకును మధ్య మహా అగాధముంచబడియున్నదని చెప్పెను.''  ఇందునుబట్టి ఇది వట్టి అగాధము కాదు మహా అగాధముగా చెప్పబడినది.  మృతుల లోకములోని ఆత్మలు వారి వారి క్రియలనుబట్టి విభజింపబడి వారు ప్రాంతాల వారీగా ఉంటారు.  

ఉదా :-         1.  లాజరు ఉన్న ప్రాంతము వేరు.  ఇది ఆత్మ నెమ్మది పొందు ప్రాంతము.  లూకా 16:19-31.  

        2.  ధనవంతుడు వుంటున్న ప్రాంతము వేరు.  ఇది ఆత్మ యాతన పొందు ప్రాంతము.  లూకా 16:19-31.  

        అలాగే మరణముయొక్క బంధకములలో లేనివారు కూడా వేరు వేరు ప్రాంతాలలో ఉన్నారు.  వారిలో వెయ్యిన్ని నలుబదినాలుగు వేలమంది క్రీస్తు ప్రభువుతో ఉండగా, ఇరువదినలుగురు పెద్దలు దేవుని సముఖములో, వధింపబడినవారి ఆత్మలు బలిపీఠము క్రింద మధ్యాకాశము పై భాగాలలో ఉన్నారు.  అలా మన క్రియలను బట్టి వేరు వేరు ప్రాంతాలలో ఉంటారు.

దాటజాలని మహా అగాధము కలిగిన మృతుల లోకము

        ఇలా అనేక రకములైన ప్రాంతములు ఉన్నవి.  ఈ ప్రాంతములు ఒకదాని నుండి మరియొక్క  ప్రాంతమును వేరు చేయుచు మహా అగాధము కలిగి యున్నవి కనుక వారు వారి ప్రాంతము నుండి మరొక ప్రాంతమునకు వెళ్ళు అవకాశము లేదు.  ఇవన్నీ ముందుగానే ఒక పద్ధతి లేక ప్రణాళిక ప్రకారముగా చేసినట్లుగా ఉన్నవి కదా!

38.  మరణించి శరీరమును వదిలిన ఆత్మలు కొనిపోయేవి ఏవి?

        మనము ఊరికి వెళ్ళు సందర్భములో మన అవసరత కొరకు కావలసిన వస్తువులు, డబ్బు తీసుకొనిపోవుట సహజము.  అలాగే ఆత్మ శరీరమును వదిలి వెళ్ళునప్పుడు తాను కొన్ని తీసుకొని వెళ్ళును.  కాదు, కాదు,  తీసుకొని వెళ్ళునని చెప్పితే అది తప్పు అవుతుంది.  ఆత్మ శరీరమును వదిలి శరీరమును మరణమునకు అప్పగించి వెళ్ళునప్పుడు అది ఏమి తీసుకొనకయే వెళ్ళును.  

        కనుక ఆత్మ శరీరమును వదలగానే వాని ఆత్మను చేర్చుటకు దేవదూతలు వాని యొద్దకు వచ్చి ఆ ఆత్మను చేర్చవలసిన చోటుకి చేర్చునేగాని ఇహలోక సంబంధముగాను, పరలోక సంబంధముగాను ఏమైన తెచ్చుకొనుటకు అవకాశము ఉండదని గ్రహించాలి.

        కాని, ప్రకటన 14:13, ''అంతట-ఇప్పటినుండి ప్రభువునందు మృతినొందు మృతులు ధన్యులని వ్రాయుమని పరలోకమునుండి యొక స్వరము చెప్పగా వింటిని.  నిజమే; వారు తమ ప్రయాసములు మాని విశ్రాంతి పొందుదురు;  వారి క్రియలు వారి వెంట పోవునని ఆత్మ చెప్పుచున్నాడు.''  కనుక ఆత్మ శరీరమును వదిలి వెళ్ళునప్పుడు తాను ఏమియు తీసుకొనకపోయినను దానిని అనుసరిస్తూ అది భూమిమీద చేసిన క్రియలు అవి చెడ్డవైనను, మంచివైనను ఈ ఆత్మ వెంట పోవునని గుర్తించాలి.  తాను చేసిన మంచి చెడు క్రియలను కూడా ఆత్మ అన్నింటితో అనగా సమస్త, ఇహలోక విషయములను వదిలి వెళ్ళినను, వానిని క్రియలు వెంబడించుచున్నవి.

మనలను మన నీడ వెంబడించినట్లుగా ఆత్మను తాను భూమి మీద చేసిన మంచి చెడు క్రియలు వెంబడించును

        కనుకనే ఆత్మ ఎక్కడ వుండవలసిన నిర్ణయము నిర్ణయించబడుతుంది.  అనగా మంచి క్రియలు వానిని వెంబడిస్తే, ఆ ఆత్మ మిఖాయేలు అతని దూతలచే శాంతికరమైన పరదైసులలో చేర్చబడును.  ఒకవేళ చెడుక్రియలు వానిని వెంబడిస్తే, ఆ ఆత్మను సైతాను, అతని దూతలచే పాతాళములో వేదనకరమైన పరదైసులలో చేర్చబడుదురు.

39.  మరణించిన భౌతిక శరీరమును విడిచిన ఆత్మలు మృతుల లోకములో ఎంత కాలము ఉండాలి?

        భౌతిక శరీరమును విడిచిన ఆత్మ మహిమ శరీరమును కలిగియున్నను తను భూమిపై చేసిన కార్యములను బట్టి పరదైసు లేక పాతాళ లోకములో చేర్చబడిన తరువాత వీరు ఇక్కడ ఎంతకాలము ఉండాలి?  అక్కడ వారు ప్రభువు తీర్పు కాలము వరకు వుండాలి.  అంతవరకు వీరు సజీవులుగా చెప్పబడరు.  వీరు మృతులే.  ప్రకటన 20:5, ''ఆ వెయ్యి సంవత్సరములు గడచువరకు కడమ మృతులు బ్రదుకలేదు;  ఇదియే మొదటి పునరుత్థానము.''  ఇందునుబట్టి వీరు పునరుత్థాన కాలము వరకు అనగా క్రీస్తు రెండవ రాకడ కాలము వరకు ఇక్కడ వుండుట జరుగును.  క్రీస్తు తన రెండవ రాకడ కాలములో మేఘారూఢుడై వచ్చుసరికి ఈ ప్రపంచములో ఒక్క నరమాత్రుడు ఉండరు.  అనగా క్రీస్తు ప్రభువు రాకడ ఈ యుగాంతము తరువాత వచ్చును.  ఈ యుగాంతము ఎప్పుడు జరుగునో ఎవరికి తెలియదు.  అది దొంగవలె వచ్చునని చెప్పబడినది.  ఇందునుబట్టి భౌతిక శరీరమును విడిచిన ఆత్మలు మొదట విడతగా మృతుల లోకములో ప్రవేశించి అక్కడ ఈ యుగాంతము వరకు  వుండవలసియున్నది.  అటుతరువాత వారి ప్రయాణము క్రీస్తు రాకడ కాలములో మాత్రమే జరుగును.  ఈ భూమి మీద మనము మన జీవిత కాలమునుబట్టి ఏ విధముగా వున్నామో, అలాగే ఆ ఆత్మలు మృతుల లోకములో వారు భౌతిక శరీరమును విడిచినప్పటి నుండి అక్కడ వుందురు.

40.   మరణించిన ఆత్మలలో రకాలు - వారు ఉండు ప్రాంతములు - వారిపై రాజు

         ఈ లోకరీత్యా అనేక రకముల ప్రజలను చూడవచ్చును.  ఇందులో ముఖ్యముగా మూడు రకములవారుగా మనకు కనబడుదురు.

1.  ధనవంతులు.  2.  మధ్యతరగతి కుటుంబములవారు.  3.  పేదవారు.  

ఈ లోకములో మనము కొంతకాలము జీవిస్తూ నివసించిన తరువాత మనకు  జీవితముపై విరక్తి కలిగి చనిపోయి మృతుల లోకమునకు వెళ్ళవచ్చునేమోగాని,  మృతుల లోకములో వున్న ఆత్మ దేవుని నిర్ణయ కాలము వరకు ఎటు వెళ్ళలేదు

        వీరినే వారు చేయు వృత్తులనుబట్టి కులాలవారిగాను, జీవన విధానమునుబట్టి జాతులుగాను విభజించుకొని జీవిస్తున్నారు.  అలాగే తాను పొందిన ఉన్నత జీవితమునుబట్టి లేక అధికారమునుబట్టి అనేక వర్గాలుగా వున్నారు.

        అయితే మరణించిన ఆత్మకు ఇవన్నీ వున్నాయా?  అనేది మనము తెలుసుకొనవలసి యున్నది.  ఆత్మల విభజన ముఖ్యముగా వారు చేసిన క్రియలనుబట్టి యుండును.  

ఆత్మలు వారి  కియ్రలనుబట్టి  విభజింప బడుచున్నారు

        1.  అతి పరిశుద్ధులు          

        2.  అపరిశుద్ధులు  

        3.  ఈ రెంటి మధ్య కార్యములు కలవారు.  (అనగా మంచి చెడు చేసినవారు)  

        ఈ విభజన వారి వారి క్రియలనుబట్టి ఉంటుంది.  ఈ క్రియలు మంచి కావచ్చును లేక చెడు కావచ్చును.  

1.  అతిపరిశుద్ధులు :-  అంతా మంచి క్రియలు చేసి చెడు అసలు చేయనివారు అతిపరిశుద్ధులు.  వీరిలో జాతి, వర్గ, కుల భేదములు అసలు ఉండవు.  ఇక్కడ అందరు సమానులే.  వీరికి రాజు గొఱ్ఱె పిల్లయైన క్రీస్తే.  ప్రకటన 14:1, ''మరియు నేను చూడగా, ఇదిగో, ఆ గొఱ్ఱెపిల్ల సీయోను పర్వతముమీద నిలువబడియుండెను.  ఆయన నామమును ఆయన తండ్రి నామమును నొసళ్లయందు లిఖింపబడియున్న నూట నలువది నాలుగు వేలమంది ఆయనతో కూడ ఉండిరి.''  ప్రకటన 14:5, ''వీరినోట ఏఅబద్ధమును కనబడ లేదు; వీరు అనింద్యులు.''  ఇందునుబట్టి వీరు ఏ అబద్ధమును చెప్పనివారు, అనింద్యులు అనగా నింద లేనివారు.  వీరినే ప్రకటన 17:14, ''వీరు గొఱ్ఱెపిల్లతో యుద్ధము చేతురు గాని, గొఱ్ఱెపిల్ల ప్రభువులకు ప్రభువును రాజులకు రాజునై యున్నందునను, తనతోకూడ ఉండినవారు పిలువబడినవారై, యేర్పరచ బడినవారై, నమ్మకమైనవారై యున్నందునను, ఆయన ఆ రాజులను జయించును.''  ఈ అతిపరిశుద్ధులలో మూడు రకములవారు వున్నారు.  వీరు  . . .  

        1.  దేవునిచే పిలువబడినవారు.  అనగా పాత నిబంధన కాలములో తండ్రియైన దేవుడు, నూతన నిబంధన కాలములో క్రీస్తు ప్రభువు, విశ్వాసుల యుగములో పరిశుద్ధాత్మ  దేవునిచే  పిలువబడినవారు వీరు.  

        2.  దేవునిచే యేర్పరచబడినవారు అనగా మూడు రకముల కాలములలో త్రియేక దేవునిచే యేర్పరచబడినవారు.

        3.  నమ్మకమైనవారు :-  ఈ రెండు రకములవారు నమ్మకమైనవారుగా క్రీస్తు ప్రభువుతోబాటుగా ఉంటున్నారు.

2.  అపరిశుద్ధులు :-  వీరు చెడు క్రియలు చేసినవారు.  వీరు పాతాళ లోకములో వుంటారు.  లాజరు ధనవంతుని ఉపమానము ప్రకారము వీరు యాతన అనుభవిస్తూ వుంటారు.   వీరికి రాజు సాతాను, ఎందుకంటే పాతాళ లోకమునకు అధిపతి సాతాను.  ప్రకటన 9:11, ''పాతాళపు దూత వాటిపైన రాజుగా ఉన్నాడు;  హెబ్రీభాషలో వానికి అబద్దోనని పేరు, గ్రీసుదేశపు భాషలో వానిపేరు అపొల్లుయోను.''  ప్రస్తుతము మనకు కూడా రాజు సాతానే.  వీడు ఈ లోకము, లోక రాజ్యములపై అధికారిగా వున్నాడు.  లూకా 4:5-6, ''అప్పుడు అపవాది ఆయనను తీసికొనిపోయి, భూలోక రాజ్యములన్నిటిని ఒక నిమిషములో ఆయనకు చూపించి -ఈ అధికారమంతయు, ఈ రాజ్యముల మహిమయు నీకిత్తును; అది నాకప్పగింపబడియున్నది, అదెవనికి నేను ఇయ్యగోరుదునో వానికిత్తును;''  కనుక భూమిని దేవుడు చేసినది మొదలు యుగాంతము వరకు పాతాళ లోకము అనగా మృతుల లోకములో వేదనకర ప్రాంతము మరియు భూలోకముపై సాతాను రాజుగా నియమింపబడి యున్నాడు.  ఈ రాజ్యములోని వారందరు ఒకటిగా పరిశుద్ధులవలె యుండరు.  ఇందులో కూడా రకరకాల  జాతి భేదములు, కుల భేదములు కలిగియుందురు.  ఉదా :-  లాజరు ధనవంతుని ఉపమానములో ధనవంతుడు ధనవంతుని లాగానే కనబడునని  లూకా 16:22-23లో చెప్పబడి యున్నది.  భూమి మీద లాగానే అనేక రీతులుగా పాతాళ లోకములో విభజింపబడి యుంటారు, ఎందుకంటే సకల అవలక్షణములకు మూలము సాతానే కదా!

3.  ఈ రెంటి మధ్య కార్యములు కలవారు :-  వీరు నులివెచ్చని జీవితము కలవారు.  ప్రకటన 3:15-16, ''-నీ క్రియలను నేనెరుగుదును, నీవు చల్లగానైనను వెచ్చగానైనను లేవు; నీవు చల్లగానైనను వెచ్చగానైనను ఉండిన మేలు.  నీవు వెచ్చగానైనను చల్లగానైనను ఉండక, నులివెచ్చనగా ఉన్నావు గనుక నేను నిన్ను నా  నోటనుండి ఉమ్మివేయ నుద్దేశించుచున్నాను.''  ఇందులో వెచ్చగా యున్నవారు దేవుని పరిశుద్ధులు.  వీరు క్రీస్తు ప్రభువుతో కూడా సంచరిస్తున్నారు.  మరణించి కూడా జీవముతోనే ఉన్నారు.  చల్లగా వున్నవారు శరీరరీత్యా సాతాను కార్యములు చేసి మరణించి దేవునికి దూరముగానే పాతాళ లోకములో యాతనలో ఉన్నారు.  ఇక నులివెచ్చని జీవితములో వున్నవారు పోరాట జీవితమును జీవించినవారు.  వీరు దేవుని కోసము పోరాడుచూనే, లోకము మరియు సాతాను ఆశలకు లోనై జీవించినవారు.  వీరికి క్రీస్తు ప్రభువు జీవము దయచేయడు.  కనుక వీరు జీవము కలిగి క్రీస్తు ప్రభువువలె లేక 1,44,000 మంది వలె తిరుగుటకు అవకాశము లేదు.  అలాగే సాతాను అధికారము క్రింద లేక విశ్రాంతి జీవితములో వారి క్రియలనుబట్టి జీవిస్తారు.  అనగా వీరు మృతుల లోకములో వీరి కార్యములనుబట్టి విభజింపబడి పునరుత్థాన దినము వరకు జీవము లేక అనగా స్వతంత్య్రముగా తిరుగు యోగ్యత లేక వారికిచ్చిన స్థలములో నెమ్మది పొందుటకు ప్రయత్నము చేయుచుంటారు.  లూకా 16:23-24లో అబ్రాహాము వడిలో లాజరు నెమ్మది పొందుచున్నట్లుగా వీరు నెమ్మది పొందు అవకాశము కలిగి యుందురు.  కనుక వీరిలో కూడా అనేక వర్గములు, జాతులవారు ఉన్నను వారి వారి క్రియలనుబట్టి ఈ భేదము లేక ఒకటిగా జీవించుటకు ప్రయత్నిస్తుంటారు.  వీరు పరదైసులలో ఉందురు.  ఈ పరదైసులు కూడా మృతుల లోకములో ఒక భాగమే.  ఈ పరదైసులలో ఒక పరదైసులో జీవవృక్షము ఉన్నది.  అందులో ప్రవేశించినవారు క్రీస్తు ప్రభువుతోబాటు జీవము కలిగి అన్ని రకములుగా యోగ్యులుగా ఉందురని గ్రహించాలి.

ఆత్మలకు రాజులు  వారి కియ్రలనుబట్టి  ఉంటారు

        వీరికి రాజు సాతానే!  కాని వారు దేవుని కోసము పోరాడి కొంత మంచి కార్యములు చేస్తూనే కొన్ని సమయములలో లోకము సాతాను ఆశలచే పడిపోయినవారు.

        ఇలా మూడు రకముల జనాభా ఆత్మలలో ఉన్నారు.  మొదటి రకమువారు పరిశుద్ధులు.  వీరు జీవము కలిగి క్రీస్తు ప్రభువు చేయు ప్రతి క్రియలను చేయుచుందురు.  అపరిశుద్ధులు యాతన పొందుచుందురు.  ఇక నులివెచ్చని జీవితములోని వారు నెమ్మది పొందుటకు ప్రయత్నము చేస్తూ వుంటారు.

41.   మరణించినవారి ఆత్మలయొక్క లింగము

        ఈ భూమి మీద రెండు రకముల లింగములను నరులలో సర్వసాధారణముగా చూస్తున్నాము.  ఇందులో . . .

        1.  పురుష లింగము 2.  స్త్రీ లింగము.  

        వీరుకాక వీరిద్దరి మధ్యన ఇంకొక జాతి ఉన్నది.  వారిని నపుంసకులని పిలుస్తారు.  వీరు స్త్రీలైతే పురుషులవలె వ్యవహరిస్తారు.  వీరు పురుషులైతే స్త్రీలవలె వ్యవహరిస్తారు.  అయితే చిన్న పిల్లలలో కూడా స్త్రీ పురుష భేదములు మనము చూడవచ్చును.  అయితే స్త్రీ పురుష భేదము కలిగిన ఈ నరుల మరణానంతరము వారి ఆత్మలలో కూడా అదే తేడా ఉంటుందా?  అనిన సంగతి మనము తెలుసుకొందము.

స్తీ పురుష భేదము శరీరమునకేగాని ఆత్మకు కాదు

        మొట్టమొదటగా దేవుడు ఆదాములో తన ఆత్మను ఉంచాడు.  ఈ ఆత్మ పురుష సంబంధమైనది.  ఈ ఆత్మలో నుంచి రెండవ ఆత్మయైన హవ్వకు ఈ లోకములో ప్రవేశించు అవకాశమును ఇచ్చాడు.  ఇది స్త్రీ రూపము.  అయితే ఆత్మ మాత్రము దేవునిదే.  ఆదికాండము 1:26, ''దేవుడు-మన స్వరూపమందు మన పోలికె చొప్పున నరులను చేయుదము.''  దేవుడు తన స్వరూపమందు నరుని చేసాడు.  ఈ నరుని పేరు ఆదాము.  ఆదాము పురుష స్వరూపి.  కనుక దేవుడు పురుష స్వరూపియే,  ఎందుకంటే తన పోలిక, తన స్వరూపము చొప్పున సృజించిన మొదటి మానవుడు పురుషుడే.  అందుచేత దేవుడు పురుష స్వరూపియేగాని మానవులవలె మట్టి నిర్మితుడు కాడు.  దేవుడు ఆత్మ స్వరూపి.

        ఈయన తన ఆత్మను నరులకు అనుగ్రహించాడు.  అది స్త్రీలో ఉన్నను, పురుషునిలో ఉన్నను ఆత్మ పురుష స్వరూపమైనదే.  ఆత్మకు స్త్రీ పురుష భేదము లేదు.  ఆత్మ పురుష సంబంధమైనదే.  స్త్రీ రూపము కేవలము శరీరమునకు చెందినదిగా మనము గుర్తించాలి.  చిన్న పిల్లలలో వుండే ఆత్మ కూడా పురుష సంబంధమైనదే.  ఈ చిన్న పిల్లలలోని ఆత్మకు కూడా స్త్రీ పురుష బేధము ఉండదు.  ఇంకా దేవుడైన యెహోవా ఈ లోకములో జన్మించి క్రీస్తు రూపములో జీవించెనని వేద గ్రంథము మనకు తెలుపుచున్నది.  ఈ క్రీస్తు ప్రభువు కూడా పురుషుడేగాని స్త్రీ కాదు.  ఈ యేసుక్రీస్తు ప్రభువు దేవునియొక్క దృశ్యరూపము.  అంతేకాకుండా ఈయన ఆత్మ నిర్మితుడేగాని పురుష ప్రమేయముతో పుట్టినవాడు కాడు.  కనుక దేవుడు పురుష సంబంధమే!  కనుక మనలోని ఆత్మ కూడా పురుష సంబంధమైనదే.  అయితే స్త్రీ పురుష భేదములు దేవుడు నరనారులను ఏర్పరుచుటలో ఈ శరీరమునకు వచ్చినదేగాని ఆత్మకు వచ్చినది కాదని గుర్తించాలి.  కనుక మరణించినవారు ఆడవారైనా, మగవారైనా సరే వారి ఆత్మకు వారి మరణానంతరము ఆడ మగ తేడా ఉండదు.  కాని ఆత్మ పురుష స్వరూపమును కలిగి యుండునని గుర్తించాలి.  ఇక మూడవ రకమునకు చెందిన నపుంసకులలోని ఆత్మ కూడా పురుష సంబంధమైనదేనని గుర్తించాలి.  సాతాను వీరిని తన చెరలో బంధించి వారిని ఆ విధముగా నడిపించునని గుర్తించాలి.

ఆత్మ పురుష స్వరూపి

        ఇంతకి దేవుడు ఈ లింగ భేదమును ఈ శరీరములో ఎందుకు ఉంచినట్లు?  ఒకే ఆత్మయైన, తండ్రియైన దేవుని ఆత్మ నుండి వచ్చిన జీవాత్మలోని అణువులు అన్నీ భూమిపై విస్తరించి, వారి వారి కార్యములను పూర్తి చేసి దైవరాజ్యములో నూతన స్థితిని పొందవలసి యున్నది.  అనగా జీవాత్మ ఈ లోక సంచార జీవితములో సాతానును, ఈ లోక ఆశలను జయించి ఉన్నతమైన స్థితిని పరలోకములో పొందవలసియున్నదని గ్రహించాలి.  దీని కోసరముగా దేవుడు నరనారులను సృజించుట జరిగింది.  స్త్రీ పురుషుల అవయవాలలో తేడాను శరీరరీత్యా ఏర్పరచి ఒకరి నుండి ఒకరు వచ్చునట్లుగా అనగా శిశు జన్మ విధానమును సంపర్క క్రియ ద్వారా ఏర్పరచి, ఆత్మలను భూమి పైకి దేవుడు పంపుచున్నాడు.  అందుకే హెబ్రీ 13:4, ''వివాహము అన్ని విషయములలో ఘనమైనదిగాను, పానుపు నిష్కల్మషమైనదిగాను ఉండవలెను; వేశ్యాసంగులకును వ్యభిచారులకును దేవుడు తీర్పు తీర్చును.''  కనుక దేవుడు లింగ బేధమును నరుల జన్మ కొరకు శరీరరీత్యా ఏర్పరచి, ఆత్మను మాత్రము పురుష సంబంధమైనదిగా ఉంచాడు, ఎందుకంటే ఆత్మ దేవునిది.  దేవుడు పురుష స్వరూపి.  ఈ ఆత్మ నర శరీరమును ఆధీనములో ఉంచుకొని దేవునిలో నడిపించాలి.  అనగా పురుషుడు స్త్రీని ప్రేమించి ఆమెను తన మార్గములో నడిపించును.  ఎఫెసీ 5:25-28, ''పురుషులారా, మీరును మీ భార్యలను ప్రేమించుడి.  అటువలె క్రీస్తుకూడ సంఘమును ప్రేమించి, అది కళంకమైనను ముడతయైనను అట్టిది మరి ఏదైనను లేక, పరిశుద్ధమైనదిగాను, నిర్దోషమైనదిగాను మహిమగల సంఘముగాను ఆయన తనయెదుట దానిని నిలువబెట్టుకొనవలెనని, వాక్యముతో ఉదకస్నానముచేత దానిని పవిత్రపరచి, పరిశుద్ధపరచుటకై దానికొరకు తన్ను తాను అప్పగించుకొనెను.  అటువలెనే పురుషులుకూడ తమ సొంతశరీరములనువలె తమ భార్యలను ప్రేమింప బద్ధులైయున్నారు.  తన భార్యను ప్రేమించువాడు తన్ను ప్రేమించుకొనుచున్నాడు.''  అలాగే పురుష స్వరూపియైన మనలోని ఆత్మ ఈ శరీరమును నడిపించాలి.  ఎందులోనికి?  దేవునిలోనికి.  కనుక ఈ ఆత్మ నర శరీరమును తన ఆధీనములో వుంచుకొని దేవునిలోనికి నడిపించవలసిన అవసరత వున్నది.  కనుక యేసుక్రీస్తు ప్రభువు ఇచ్చు తీర్పు ఆత్మకు మాత్రమేగాని ఈ శరీరమునకు కాదని గుర్తించాలి.  కనుక దేవుని దృష్టిలో ఆత్మ మాత్రమే ప్రాముఖ్యత కలిగి యున్నది, ఎందుకంటే ఆత్మ దేవునిది.  శరీరము మట్టి సంబంధమైనది.  మట్టి సంబంధమైన ఈ లింగ భేదము కలిగిన ఈ శరీరము మరణ క్రియ ద్వారా దేహమును ఆత్మ వదిలిన తరువాత ఈ దేహము మట్టిలో కలిసిపోవును.  కాని ఈ లింగ భేదము కలిగిన ఈ మట్టి శరీరములోని ఆత్మ తిరిగి దైవసన్నిధికి వెళ్ళవలసియున్నది.  ప్రసంగి 12:7, ''మన్నయి నది వెనుకటివలెనే మరల భూమికి చేరును, ఆత్మ దాని దయచేసిన దేవునియొద్దకు మరల పోవును.''  దీనికి కారణము పురుష సంబంధమైన మనలోని ఆత్మ పరమపురుషుని చేరవలసియున్నది.  అనగా తండ్రియైన దేవుని దగ్గరకు తిరిగి వెళ్ళవలెనని గుర్తించాలి.  ఇలా వెళ్లి మరణించినవారి ఆత్మ రెండు రకముల లింగ భేదములు లేక పురుష సంబంధమైనదిగానే ఉండును.

        అయితే ప్రకటన గ్రంథములో ఎత్తబడే సంఘము అనగా పరమయెరూషలేమును వధువు సంఘముగా ఎందుకు చెప్పబడింది?  ఈ సంశయము మనలో కలుగవచ్చును, ఎందుకంటే వధువు ఒక కన్య.  వధువుగా చెప్పబడినవారు స్త్రీ సంబంధమైనవారే కదా!  ఇందులో పరమయెరూషలేమును స్త్రీగా వర్ణించుట జరిగింది.  ప్రకటన 21:2, ''మరియు నేను నూతనమైన యెరూషలేము అను పరిశుద్ధపట్టణము తన భర్తకొరకు అలంకరింపబడిన పెండ్లికుమార్తెవలె సిద్ధపడి పరలోకమందున్న దేవునియొద్దనుండి దిగి వచ్చుట చూచితిని.''  పరమ పురుషుడు దేవుడే.  ఆయన ముందు ఎవరైనను తక్కువే.  కనుక ఆయనను చేరవలసిన ఆత్మ కూడా పురుష సంబంధమైనదైనను  స్త్రీగా వర్ణించుట జరిగింది.  ఇది వర్ణన మాత్రమేగాని నిజానికి ఆత్మ స్త్రీ సంబంధమైనది కాదు.  ప్రకటన 21:2లో, ''తన భర్తకొరకు అలంకరింపబడిన పెండ్లికుమార్తెవలె,'' అని చెప్పుట జరిగింది.  ఇందులో చెప్పబడినది పోలిక మాత్రమే.  అనగా పరమ యెరూషలేములోనివారు పెండ్లి కుమార్తెవలె ఏక పురుషునికి చెందినవారు.  అనగా వీరు దైవ సంబంధులేగాని సాతాను సంబంధులు కారు.  వీరు సాతానును తమ నాధునిగా చేసుకొనినవారు కారు.  వీరు స్వచ్ఛమైన కన్యకలు తమ భర్తను చేరు విధముగా, వీరు ఏ కళంకము లేనివారుగా దేవుని చేరుటనుబట్టి పరమ యెరూషలేమను వధువు సంఘముగా చెప్పుట జరిగింది.  అంతేగాని, మనలోని ఆత్మ పురుష సంబంధమైనదిగానే గుర్తించాలి.  జీవాత్మ పరమాత్మలోని ఒక అణువు.  ఈ జీవాత్మ స్త్రీ పురుష భేదము లేకండ నర శరీరులందరిలో నివసిస్తున్నది.  

        నేను గొర్రెలకు మంచి కాపరిని అని ప్రభువు అన్నాడు.  అయితే ఆడవియైన గొర్రెలలో మగవియైన పొట్టేళ్ళు కూడా ఉంటాయి.  ఆయన తీర్పు దీర్చునప్పుడు కుడివైపున గొర్రెలు అన్నాడు.  ఇందులో ఆడా మగ అందరు ఉంటారు.  పరమాత్మలో నుండి నరశరీరములో జీవాత్మ ప్రవేశించి బలహీనమైంది గనుక స్త్రీ నామధేయములో పోలికగా ఉచ్ఛరింపబడింది.  పరమాత్మ యొక్కడే పురుషుడు ఎందుకంటే సర్వాన్ని పుట్టించినవాడు గనుక పురుషుడన్నాము.  ఆయన ద్వారా జీవాత్మ బలపడి తిరిగి పరమాత్మలో లీనము కావలసి ఉంది గనుక స్త్రీగా అనగా వధువు సంఘముగా పోల్చి చెప్పబడింది.  కనుక ఆత్మ ఒక్కటే.  అది పురుషుడు అయితే విభజింపబడి స్త్రీ నామము ధరించింది.  అపవాది కూడా పురుషుడే - శాపము వలన నపుంసక ఆత్మగా రూపాంతరము చెందినది.  లూకా 20:36, ''వారు పునరుత్థానములో పాలివారై యుండి, దేవదూత సమానులును దేవుని కుమారులునై యుందురు.'' అని ప్రభువు వాక్కు తెలియజేస్తున్నది.  కనుక మరణించినవారి ఆత్మలు కుమారులుగా పురుష సంబంధమైన ఆత్మగానే ఉండును.  కనుక దేవదూతలలో కూడా స్త్రీ దేవదూతలు లేరు.  వారి ఆత్మలు పురుష స్వరూపమే.  అయితే వారు కామ రూపధారులు.  ఏ రూపమునైనను ధరించి మనకు సహాయం చేయగలరు.

42.   మరణించినవారి ఆత్మలు ఏ ఏ రూపములో ఉంటాయి?

        నర జ్ఞానముతో దీనిని చెప్పవలెనంటే ప్రయాసతో కూడినదిగా మనము గ్రహించాలి.  అయినను ఆత్మదేవుని ప్రేరణ కల్గినవారు దీనికి సమాధానము చాలా సులభముగా చెప్పుదురు.  ఇందులో అనేకులు అనేక స్థితులలో మరణించుట జరుగును.  ఇది మనకందరికి తెలిసిన విషయమే!  కొందరు పసి బిడ్డలుగా మరణిస్తారు.  కొందరు ముసలి ప్రాయములో మరణిస్తారు.  మరికొందరు ఆత్మహత్యల ద్వారాను, హత్యల ద్వారాను మధ్యాంతరముగా మరణిస్తారు.  వీరంతా వారి మరణానంతరము భౌతిక దేహ రీత్యా వారిని మట్టిలో పూడ్చి వేయుట జరుగును.  అయితే వారిలోని ఆత్మ ఏఏ రూపములలో ఉండును?  ఆత్మ పురుష సంబంధమైనదైనను ఆకారము ఏ రూపములలో ఉండునో తెలుసుకొనవలసి యున్నది.

        లూకా 16:23, ''అప్పుడతడు పాతాళములో బాధపడుచు, కన్నులెత్తి దూరమునుండి అబ్రాహామును అతని రొమ్మున (ఆనుకొనియున్న) లాజరును చూచి'',  ఇది క్రీస్తు ప్రభువు తన బోధలో చెప్పిన వాక్యము.  ఈ వాక్యములో ధనవంతుడు లాజరును చూచినట్లుగా వ్రాయబడి యున్నది.  అంతేకాదు ధనవంతుడు అబ్రాహామును కూడా గుర్తించాడు.  ఇంతకి ధనవంతుడు వుండేది పాతాళ లోకములో కనుక పాతాళ లోకములో వున్న ధనవంతుడు అబ్రాహాము రొమ్మున ఆనుకొనియున్న లాజరును చూచుట జరిగింది.  గుర్తించాడు అంటే శరీరమును ఆత్మ వదిలినను ఆత్మ శరీర రూపములో ఉండునని గుర్తించాలి.  ఆత్మ రూపములు మారిపోతే గుర్తించుట అసాధ్యము.  క్రీస్తు ప్రభువు చెప్పిన వచనములో ధనవంతుడు లాజరును, అబ్రాహామును గుర్తించినట్లుగా చెప్పబడినది.  కనుక మరణించినవారి ఆత్మ పాతాళ లోకములో వున్నను, అబ్రాహాము రొమ్మున ఆనుకొని పరదైసులో ఉన్నను ఒకరిని ఒకరు గుర్తించుకొన్నారు గనుక శరీరము విడిచిన ఆత్మ ఇంచుమించు అదే ఆకారమును కలిగియుండునని గుర్తించాలి.

        ఒక కాలేజీలో ఇద్దరు చిన్ననాటి స్నేహితులు చదువు పూర్తి చేసుకొని వారిలో ఒకడు విదేశాలకు వెళ్ళి స్థిరపడినాడు.  మరియొకడు స్వస్థలములోనే వుంటూ జీవించాడు.  వారు ముసలితనము వరకు ఒకరికొకరు చూచుకోలేదుగాని ఫోన్‌ ద్వారా మాట్లాడుకొనేవారు.  ముసలివారై కొన్ని ఏండ్లకు ఇద్దరు చనిపోయారు.  చనిపోయే ముందటి శరీర రూపములను వారు ఒకరినొకరు చూచుకోలేదు.  మరి ఆత్మల రాజ్యములో వారు ఒకరినొకరు గుర్తించుట ఎట్లు?  అందుకని ఆ ఆత్మలు ఒకరికొకరు గుర్తింపు పొందుట కొరకు కాలేజీలో చదివే యవ్వన రూపమును తాను ధరించి తన స్నేహితునికి గుర్తింపు కలుగజేయును.  ఆ దినములలోని  ఆ కాలేజీలోని ఇతర విద్యార్థుల ఆత్మలను కూడా ఆహ్వానించి హెబ్రీ 11:35లో వలె ఆ ఆత్మలు తమ వారిని తమ బంధుమిత్రులతో సమావేశమై ఆనందానుభూతిని పొందుదురు.

        ప్రకటన 4:4, ''సింహాసనముచుట్టు ఇరువదినాలుగు సింహాసనములుండెను, ఈ సింహాసనములందు ఇరువదినలుగురు పెద్దలు తెల్లని వస్త్రములు ధరించుకొని, తమ తలలమీద సువర్ణ కిరీటములు పెట్టుకొన్నవారై  కూర్చుండిరి.''  పరలోకములో ఈ ఇరువదినలుగురు పెద్దలు తలలు కలిగి వాటికి సువర్ణ కిరీటములు ధరించుకొని యున్నారు.  అంతేకాకుండా కూర్చుని యున్నట్లుగా వ్రాయబడి యున్నది.  అనగా మన ఆకారములోనే ఉన్నట్లుగా మనకు అర్థమగుచున్నది.

దేవుని వాక్యము నిమిత్తమును,  తాము ఇచ్చిన సాక్ష్యము నిమిత్తము వధింపబడిన వారి ఆత్మలు వధింపబడినట్లుగానే బలిపీఠము కింద కనిపిస్తున్నాయి

        యోహాను 20:11-16, ''అయితే మరియ సమాధి బయట నిలిచి యేడ్చుచుండెను.  ఆమె ఏడ్చుచు సమాధిలో వంగి చూడగా, తెల్లని వస్త్రములు ధరించిన యిద్దరు దేవదూతలు యేసు దేహము ఉంచబడిన స్థలములో తలవైపున ఒకడును కాళ్ల వైపున ఒకడును కూర్చుండుట కనబడెను.  వారు-అమ్మా, యెందుకు ఏడ్చుచున్నావని ఆమెను అడుగగా ఆమె-నా ప్రభువును ఎవరో యెత్తికొని పోయిరి;  ఆయనను ఎక్కడ ఉంచిరో నాకు తెలియలేదని చెప్పెను.  ఆమె యీ మాట చెప్పి వెనుకతట్టు తిరిగి, యేసు నిలిచియుండుట చూచెనుగాని ఆయన యేసు అని గుర్తుపట్టలేదు.  యేసు-అమ్మా యెందుకు ఏడ్చుచున్నావు, ఎవనిని వెదకుచున్నావు?  అని ఆమెను అడుగగా ఆమె ఆయన తోటమాలి అనుకొని-అయ్యా, నీవు ఆయనను మోసికొని పోయినయెడల ఆయనను ఎక్కడ ఉంచితివో నాతో చెప్పుము, నేను ఆయనను ఎత్తికొని పోదునని చెప్పెను.  యేసు ఆమెను చూచి-మరియా అని పిలిచెను.  ఆమె ఆయనవైపు తిరిగి ఆయనను హెబ్రీ భాషతో రబ్బూనీ అని పిలిచెను.  ఆ మాటకు బోధకుడని అర్థము.''  మరణించి పునరుత్థానము ద్వారా తిరిగి లేచిన క్రీస్తు ప్రభువు మానవ ఆకారమును కలిగియున్నట్లుగా చెప్పబడినది.  మగ్ధలేన మరియ మహిమ శరీరమును పొందియున్న క్రీస్తు ప్రభువును తోటమాలి అనుకొన్నట్లుగా వ్రాయబడియున్నది.  ఇందునుబట్టి మహిమ శరీరమును పొందిన ఆత్మ నరరూపమునే కలిగి యుండి నరులవలె అన్ని అవయవములు ఉండునని గుర్తించాలి.

        అయితే మరియ పునరుత్థానుడైన ప్రభువును ఎందుకు గుర్తుపట్టలేకపోయింది?  సిలువ మీద ఆయన పోగొట్టుకొన్న రక్తహీనత వల్ల ఆయన ముఖము కళావిహీనముగా రక్తసిక్తముగా ఉంటుంది.  ఆయొక్క  వాడబారిన ముఖమే ఆమె మనస్సులో నిలిచింది.  యోహాను 15:15-18లో వలె గొర్రెల కొరకు సిలువ మీద ప్రాణము పెట్టినాడు - తన ప్రాణమును తాను తిరిగి తీసుకొన్నప్పుడు ఆ ప్రాణముతో బాటు భూమి ఆయన రక్తమును జీర్ణించుకోలేక ఆయన తన ప్రాణముతోబాటు తన రక్తమును కూడా పూర్తిగా విడుచుటవలన ప్రకటన 10:1లో వలె బలిష్ఠుడుగా కనపడినందున తోటమాలి యనుకొని పొరపాటు పడింది.

మన మరణమునకు ముందు ఏ స్థితిలో చనిపోవుట జరిగిందో అదే స్థితిలో ఆత్మలయొక్క రూపములుంటాయి

        యోహాను 20:24-27, ''యేసు వచ్చినప్పుడు, పండ్రెండుమందిలో ఒకడైన దిదుమ అనబడిన తోమా వారితో లేకపోయెను గనుక తక్కిన శిష్యులు-మేము ప్రభువును చూచితిమని అతనితో చెప్పగా అతడు-నేనాయన చేతులలో మేకుల గురుతును చూచి నా వ్రేలు ఆ మేకుల గరుతులో పెట్టి, నా చెయ్యి ఆయన ప్రక్కలో ఉంచితేనేగాని నమ్మనే నమ్మనని వారితో చెప్పెను.  ఎనిమిది దినములైన తరువాత ఆయన శిష్యులు మరల లోపల ఉన్నప్పుడు తోమా వారితో కూడ ఉండెను.  తలుపులు మూయబడియుండగా యేసు వచ్చి మధ్యను నిలిచి-మీకు సమాధానము కలుగునుగాక అనెను.  తరువాత తోమాను చూచి-నీ వ్రేలు ఇటు చాచి నా చేతులు చూడుము;  నీ చెయ్యి చాచి నా ప్రక్కలో ఉంచి, ఆవిశ్వాసివి కాక విశ్వాసివై యుండుమనెను.''  పునరుత్థానము తరువాత మహిమ శరీరమును ధరించిన క్రీస్తు ప్రభువు మానవ రూపమును కలిగియున్నను చేతులకు కలిగిన గాయములు తన ప్రక్కలో పొడవబడిన బల్లెముయొక్క గాయమును తోమాకు చూపిస్తున్నాడు.  అంటే మహిమ శరీరమును పొందినను భూమిపై వారికి జరిగిన క్రియ, వారి మహిమ శరీరములో కనబడునని గ్రహించాలి.  అనగా క్రీస్తు ప్రభువు తన చేతులలో కొట్టిన చీలల గాయమును చూపించాడు.  నడుము భాగములో బల్లెము ద్వారా జరిగిన గాయమును చూపించాడు.  అలాగే ప్రకటన 6:9, ''ఆయన అయిదవ ముద్రను విప్పినప్పుడు, దేవుని వాక్యము నిమిత్తమును, తాము ఇచ్చిన సాక్ష్యము నిమిత్తమును వధింపబడినవారి ఆత్మలను బలిపీఠము క్రింద చూచితిని.''  వీరంతా దేవుని కోసము వధింపబడినవారు.  వీరు కూడా ఆయొక్క యోగ్యతను కలిగి కనిపిస్తున్నారు.  ఇప్పటికి అనగా ఆరవ ముద్ర కాలమునకు పునరుత్థానము జరగలేదని గుర్తించాలి.

        ఇందునుబట్టి మనము ఏ స్థితిలో మరణిస్తామో ఆ స్థితి మన మహిమ శరీరములో స్పష్టముగా కనిపిస్తుందని గుర్తించాలి.  అనగా ఒక శిశువు మరణిస్తే వారి ఆత్మ అదే రూపములో ఉంటుంది.  ఆ ఆత్మ అదే స్థితిలో పునరుత్థాన దినమందు మహిమ శరీరమును పొందును.  ముసలితనములో చనిపోయినవారు పునరుత్థాన దినమందు వారి ఆత్మ ఆ ఆకారమునే పొందునని గుర్తించాలి.  అయితే ఈ మట్టి శరీరమువలె కాక మహిమ శరీరమునకు బలహీనత ఉండదుగాని బాధ, వేదన, దు:ఖము, ఆనందములను అనుభవించునని గుర్తించాలి.

        కనుక మరణానంతరము ఆత్మ అదే ఆకారమును కలిగి యుండి మృతుల లోకములో భద్రపరచబడి యుండును.  కనుక భూమిమీద వారు జీవించిన స్థితి వారి బాల్య యవ్వన వార్థక్య రూపాలు ఆత్మలో కనిపిస్తుంది.  అనగా క్రీస్తు ప్రభువు శరీరములో గాయములు, వధింపబడినవారు ఆ వధింపబడినట్లుగానే కనిపిస్తారు.  కాని వీరు మృతుల లోకములోని పరదైసుల వారీగా ఒకే స్థితి కలిగినవారు ఒకేచోట వుండుట జరుగును.  అయితే పాతాళ లోకములో కూడా ఇదే స్థితి ఉంటుంది.  లాజరు ధనవంతుని ఉపమానములో ధనవంతుని ఆత్మను ధనవంతుడుగానే గుర్తించుట జరిగింది.  కనుక పాతాళ లోకములోని ఆత్మలు కూడా వారు శరీరరీత్యా మరణించునప్పటి స్థితి వారి ఆత్మ రూపములో కనిపిస్తుంది.  కనుక అతి భయానకమైన రూపములు అందులో కనిపిస్తాయి.  ఈ స్థితి నుండి వారు బయటకు రాలేరు.  కాని పాతాళ లోకములో కాక మృతుల లోకములోని మిగిలిన భాగములోని ఆత్మలు వారి భౌతిక శరీరమును విడుచునప్పటి ఆకారములు కలిగియున్నను వారు ఆ స్థితి నుండి నెమ్మది పొందుచుందురు.  కనుక స్త్రీ పురుష ఆకారములలోనే కనబడుదురు.  కనుక  ఈ కాలము అనగా ఆత్మ శరీరరీత్యా మరణించినది మొదలు క్రీస్తు రాకడ వరకు వీరు అలాగే ఉండుట జరుగును.

43.   మృతుల లోకములోని ఆత్మయొక్క శరీరము

        భౌతిక శరీరమును విడిచిన ఆత్మలు మహిమ శరీరమును కలిగి మహిమలు కలిగియుండునా?  అన్న సంశయము నా మనస్సున కలిగింది.  దీని కొరకు బహుగా చాలా దినములు ఆలోచిస్తూ వున్నాను.  ఇది మన ఆలోచన జ్ఞానమునకు బహు దూరముగా వున్నదని గ్రహించి నా ప్రార్థనా జీవితములో ప్రభువుని అడిగి తెలుసుకోగలిగితిని.

        మొదట దేవుడు ఆత్మ స్వరూపి.  ఈయన నరుని తన రూపములో సృజించుట జరిగింది.  కాని నరునికి మట్టితో శరీరము రూపమును చేసాడు.  కాని దేవుడు నరునికి ఇచ్చినది జీవాత్మ.  ఈ ఆత్మ దేవుని రూపమును కలిగియున్నది.  ఈ ఆత్మ రూపము అదృశ్య రూపమేగాని కంటికి కనిపించునది కాదు.  అయితే యోహాను బలిపీఠము క్రింద వున్న ఆత్మలను తన దర్శనములో మాత్రమే చూడగలిగినాడుగాని తన కళ్ళతో కాదు.  కనుక ఆత్మయొక్క రూపము అదృశ్యమైనది.

        ఎప్పుడైతే ఆత్మ భౌతిక శరీరమును విడిచినదో, ఈ భౌతిక శరీరము రోజు రోజుకు పురుగులు పాలై మట్టిగా మారిపోవును.  ఆత్మ ఈ శరీర రూపమును కలిగియుండి అదృశ్యముగా వుండునేగాని కంటికి కనిపించదు.  ఈ ఆత్మ భౌతిక శరీరమును విడిచిన తరువాత మృతుల లోకములో భద్రపరచబడి యుండును.  ఆత్మ శరీర ఆకారమును కలిగి యుంటుంది.  కనుక వారు మరణించినప్పుడు ఏ స్థితిలో మరణించారో అదే స్థితిలో వారు వున్నట్లుగా మనము చదువుకొన్నాము.   కాని ఆత్మ ఆకారము వేరు, శరీరము వేరు.  అలాగే శరీరములలో మట్టి శరీరము వేరు, మహిమ శరీరము వేరు.  

మట్టి శరీరము వేరు ఆత్మయొక్క మహిమ శరీరము వేరు ఆత్మయొక్క రూపము వేరు

        మట్టి శరీరము ఆత్మ నర శరీరములో అనగా తల్లి గర్భములో ప్రవేశించినప్పుడు  మట్టి శరీరము తయారు చేసుకొని తొమ్మిది నెలల తరువాత ప్రసవించబడి, జ్ఞానమందు వికసించి అనేకులచే ప్రశంసించబడి లేక చీదరించబడి, చివరకు ఈ శరీరమును వదిలి వెళ్ళిపోవును.  కనుక ఈ మట్టి శరీరము అశాశ్వతమైనది.  కనుకనే మన్నుగా మారిపోతుంది.  ఇక ఈ భౌతిక శరీరమును విడిచిన ఆత్మ శరీర ఆకారమును కలిగి వుంటుందిగాని శరీరమును కలిగి యుండదు.  ఈ శరీరము ఇంతకు ముందులాగా మట్టి శరీరము కాదు.  ఈ శరీరము పునరుత్థాన శరీరము.  ఈ శరీరమును ఆత్మ పొందవలసి యున్నది.  ఇంతకి ఈ ఆత్మ ఈ శరీరమును ఎప్పుడు పొందును?  1 కొరింథీ 15:52, ''కడబూర మ్రోగగానే మనమందరము మార్పు పొందుదుము.''  అలాగే 1 కొరింథీ 15:42-45, ''మృతుల పునరుత్థానమును ఆలాగే శరీరము క్షయమైనదిగా విత్తబడి అక్షయమైనదిగా లేపబడును; ఘనహీనమైనదిగా విత్తబడి మహిమగలదిగా  లేపబడును; బలహీనమైనదిగా విత్తబడి, బలమైనదిగా లేపబడును; ప్రకృతిసంబంధమైన శరీరముగా విత్తబడి ఆత్మసంబంధ శరీరముగా లేపబడును.  ప్రకృతిసంబంధమైన శరీరమున్నది గనుక ఆత్మసంబంధమైన శరీరముకూడ ఉన్నది.  ఇందు విషయమై-ఆదామను మొదటి మనుష్యుడు జీవించు ప్రాణి ఆయెనని వ్రాయబడియున్నది.  కడపటి ఆదాము జీవింపచేయు ఆత్మ ఆయెను.''  కనుక ఈ మట్టి శరీరము పూడ్చబడి, ఆత్మ ఘనహీనముగా మృతుల లోకములో ప్రవేశిస్తుంది.  అయితే ఇది మరల లేపబడు దినము వున్నది.  అదే కడబూర దినము.  ఈ దినమే మృతుల పునరుత్థాన దినము.  1 కొరింథీ 15:23, ''తరువాత క్రీస్తు వచ్చినపుడు ఆయనవారు బ్రదికింపబడుదురు.''  దీనికి ముందు ఆత్మలు శరీరము లేక ఆత్మయొక్క ఆకారములోనే వుండునుగాని శరీరమును కలిగి యుండవు.

        ఇక్కడ మనమొక రహస్యమును తెలుసుకొనవలసి యున్నది.  అదేమిటంటే - ఆత్మయొక్క ఆకారము కూడా ఈ శరీర ఆకారమే.  కనుక మనలో ఈ అంశము అనేక సంశయములు కలిగించవచ్చును.  కాని కడబూర ఊదగానే మృతులు సమాధులలో నుండి శరీరమును మహిమలో పొందుట జరిగి తిరిగి బ్రతికింపబడుదురు.  కనుక మీ భౌతిక శరీరమును విడిచిన ఆత్మ కడబూర ఊదువరకు శరీర రూపమును కలిగి యుండదు.  ఆత్మగానే ఆత్మ రూపములో వుండునని గ్రహించాలి.

        మన శరీరములోని ఆత్మ మన శరీర ఆకారమునే కలిగియుండును.  అయితే ఆత్మ ఆకారము మన కంటికి కనిపించదు.  శరీరము కనిపించును.  ఈ మట్టి శరీరములోనే ఆత్మ అదే ఆకారములో వుంటుంది.  అలాగే మహిమ శరీరమును పునరుత్థాన కాలములో ఆత్మ తిరిగి మరియొకసారి పొందును.  దీనికి ముందు ఆత్మకు శరీరము వుండదు అని మనము గ్రహించాలి.

44.   మృతుల లోకములో ఆత్మ సంచారము

        సాధారణముగా ఆత్మ తిరుగుచూ వుంటుంది.  కాని మృతుల లోకములోని ఆత్మలు తిరుగుట యుండదు.  ఆత్మ భౌతిక శరీరమును విడిచిన తరువాత, ఆ ఆత్మ మృతుల లోకములో వుంచబడును.  లాజరు ధనవంతుని ఉపమానములో వారు వున్నచోటనే వున్నారుకాని కదలినట్లు, వేరొక చోటుకు వెళ్ళినట్లుగా లేదు.  అలా వెళ్ళుటకు అవకాశము లేనట్లుగా చెప్పబడినది.  అలాగే ప్రకటన 6:9-11, ''ఆయన అయిదవ ముద్రను విప్పినప్పుడు, దేవుని వాక్యము నిమిత్తమును, తాము ఇచ్చిన సాక్ష్యము నిమిత్తమును వధింపబడినవారి ఆత్మలను బలిపీఠము క్రింద చూచితిని.  వారు-నాథా, సత్యస్వరూపీ, పరిశుద్ధుడా, యెందాక తీర్పు తీర్చకయు, మా రక్తము నిమిత్తము భూనివాసులకు ప్రతిదండన చేయకయు ఉందువని బిగ్గరగా కేకలువేసిరి.  తెల్లని వస్త్రము వారిలో ప్రతివాని కియ్యబడెను; మరియు వారివలెనే చంపబడబోవువారి సహదాసులయొక్కయు సహోదరులయొక్కయు లెక్క పూర్తియగువరకు ఇంక కొంచెము కాలము విశ్రమింపవలెనని వారితో చెప్పబడెను.''  ఈ ఆత్మలు బలిపీఠము క్రింద వుండి ధర్నాను నిర్వహిస్తున్నాయిగాని అక్కడ నుండి కదలి వచ్చి క్రీస్తు ప్రభువును ఎదుర్కొన్నట్లుగా వ్రాయబడలేదు.  కాని ఆత్మ స్వతంత్ర మనస్సును కలిగి యున్నను వారు అందు నుండి వేరొక చోటుకు వెళ్ళు అవకాశము లేదు.  యెషయా 14:15-17, ''నీవు పాతాళమునకు నరకములో ఒక మూలకు త్రోయబడితివే.  నిన్ను చూచువారు నిన్ను నిదానించి చూచుచు ఇట్లు తలపోయుదురు  -భూమిని కంపింపజేసి రాజ్యములను వణకించినవాడు ఇతడేనా?  

మృతుల లోకము విడిచి ఆత్మ తిరుగుటకు అవకాశము లేదు, కనుక అవి వున్న చోటనే పునరుత్థాన దినము వరకు వుంటాయి

లోకమును అడవిగాచేసి దాని పట్టణములను పాడు చేసినవాడు ఇతడేనా?  తాను చెరపట్టినవారిని తమ నివాసస్థలమునకు పోనియ్యనివాడు ఇతడేనా?''  ఇది కొంతమంది సాతానును చూచుచున్నట్లుగా చెప్పబడినది.  వీరిలో కదలిక వున్నట్లుగా చెప్పబడినది.  ఇది జరిగేది పాతాళ లోకములోనే.  అనగా ఇది మృతుల లోకములో జరుగుచున్నది గాని ఈ కార్యము సాతాను బంధింపబడినప్పుడు జరుగుచున్నది.  సాతాను బంధింపబడి పాతాళ లోకము అను అగాధములో పడవేయబడును.  ప్రకటన 20:1-3, ''మరియు పెద్దసంకెళ్లను చేత పట్టుకొని అగాధముయొక్క తాళపుచెవిగల యొక దేవదూత పరలోకము నుండి దిగివచ్చుట చూచితిని.  అతడు ఆదిసర్పమును, అనగా అపవాదియు సాతానును అను ఆ ఘటసర్పమును పట్టుకొని వెయ్యి సంవత్సరములు వానిని బంధించి అగాధములో పడవేసి, ఆ వెయ్యి సంవత్సరములు గడచువరకు ఇక జనములను మోసపరచకుండునట్లు అగాధమును మూసి దానికి ముద్ర వేసెను; అటుపిమ్మట వాడు కొంచెము కాలము విడిచి పెట్టబడవలెను.''  అటుతరువాత క్రీస్తు వెయ్యి సంవత్సరములు పరిపాలన జరుగును.  దీనికి ముందు క్రీస్తు ప్రభువు తీర్పు తీర్చును.  దీనికి ముందు ఆత్మలు పునరుత్థానమును పొందును కనుక ఈ వచనములో పాతాళ లోకములో వున్న ఆత్మలు తిరుగుతూ సంచారము చేయుచున్నట్లుగా చెప్పబడినది.  అయితే పునరుత్థానమునకు ముందు అనగా ఆత్మ భౌతిక శరీరమును విడిచినది మొదలు పునరుత్థానమునకు ముందు వరకు మృతుల లోకములో వారి వారి కార్యములను బట్టి అవి వాటి ప్రాంతాలలో వుండును.  అక్కడ నుండి అవి తిరుగుటకు అవకాశము లేదు.  ఇది ఒక రకముగా బంధన అని చెప్పవచ్చును.  ప్రకటన 20:4-5, ''అంతట సింహాసనములను చూచితిని; వాటిమీద ఆసీనులై యుండువారికి విమర్శచేయుటకు అధికారము ఇయ్యబడెను.  మరియు క్రూరమృగమునకైనను దాని ప్రతిమకైనను నమస్కారముచేయక, తమ నొసళ్లయందు గాని చేతులయందు గాని దాని ముద్రవేయించుకొనని వారిని, యేసు విషయమై తామిచ్చిన సాక్ష్యము నిమిత్తమును దేవుని వాక్యము నిమిత్తమును శిరచ్ఛేదనము చేయబడిన వారి ఆత్మలను చూచితిని.  వారు బ్రదికినవారై, వెయ్యి సంవత్సరములు క్రీస్తుతోకూడ రాజ్యము చేసిరి.  ఆ వెయ్యి సంవత్సరములు గడచువరకు కడమ మృతులు బ్రదుకలేదు; ఇదియే మొదటి పునరుత్థానము.''  ఇందులో యోహాను చూచిన ఆత్మలు బ్రతుకుట ఏమిటి?  అంటే ఇంతవరకు బంధకములో వుండి నెమ్మది పొందుచున్న ఆత్మలకు ఇప్పుడు విడుదల కలిగింది.  కనుక అవి మన వలె శరీరమును మహిమలో పొంది సంచారము చేయు యోగ్యతను పొందుచున్నారు.  దీనినే పునరుత్థానముగా చెప్పబడినది.  కనుక పునరుత్థానమునకు ముందు మనము చెప్పుకొనుచున్న ఆత్మలు బ్రదికిన స్థితిలో స్వతంత్రముగా సంచారము చేయు యోగ్యత వుండదు.

        కనుక ఈ ఆత్మలను ఏ స్థితిలో మిఖాయేలు సాతానులు వుంచుదురో అదే స్థితిలో వారు పునరుత్థాన దినము వరకు ఉండాలి.

45.  144000 మంది పరిశుద్ధులు లేక అనింద్యులయొక్క సంచారములు

         పరిశుద్ధులుగా వుండినవారు భూమిపై మరణించిన తరువాత వారి ఆత్మను మిఖాయేలు దూత వారి వారి కార్యములనుబట్టి మృతుల లోకములోని పరదైసులలో వదిలిపెట్టును.  అక్కడ ఆ ఆత్మలు సంచార జీవితమును జీవించునని గుర్తించాలి.  అక్కడ వారికి అన్ని రకములైన వసతులతో కూడిన గృహములు కలిగి యుంటారు.  యోెహాను 14:2.  తినుటకు జీవవృక్ష ఫలములు పరదైసులో వున్నవని ప్రకటన 2:7లో చెప్పబడి యున్నది.  యోహాను 10:9, ''నేనే ద్వారమును;  నా ద్వారా ఎవడైన లోపల ప్రవేశించిన యెడల వాడు రక్షింపబడినవాడై, లోపలికి పోవుచు బయటికి వచ్చుచు మేత మేయుచుండును.'' ఇందునుబట్టి రక్షింపబడినవాడు పరదైసులో అటుఇటు తిరుగుటకు ఇంకా పరదైసులను దాటి తిరుగుటకు యోగ్యుడని గ్రహించాలి.

పరిశుద్ధులు పరిశుద్ధులే.  వీరిని దేవుడు తనతో సమానముగా చూచుకొనును.  కనుక వీరి ఆత్మలకు నిబంధనలు లేక స్వేచ్ఛగా వుందురు

        పాత నిబంధన కాలము నాటి ఏలీయా, మోషేలలో ఏలీయా సుడిగాలిలో ఆరోహణమై పోగా మోషే మరణించినవాడే.  కాని క్రీస్తు ప్రభువు కాలములో కొండపై క్రీస్తు ప్రభువు రూపాంతరము పొందినప్పుడు కనిపించారు.  లూకా 9:28-31, ''ఈ మాటలు చెప్పినది మొదలుకొని రమారమి యెనిమిది దినములైన తరువాత, ఆయన పేతురును యోహానును యాకోబును వెంటబెట్టుకొని, ప్రార్థన చేయుటకు ఒక కొండ యెక్కెను.  ఆయన ప్రార్థించుచుండగా ఆయన వస్త్రములు తెల్లనివై ధగధగ మెరిసెను.  మరియు ఇద్దరు పురుషులు ఆయనతో మాటలాడుచుండిరి, వారు మోషే ఏలీయా అనువారు.  వారు మహిమతో అగపడి, ఆయన యెరూషలేములో నెరవేర్చబోవు నిర్గమమునుగూర్చి మాటలాడుచుండిరి.''  అలాగే 1,44,000 మంది కూడా క్రీస్తుతోబాటుగా సంచారము చేయుచుందురని చెప్పబడినది.  ప్రకటన 14:1 మరియు ప్రకటన 14:4.  ఇలాంటి వీరు క్రీస్తు ప్రభువుతో కూడా వుండి, ఆయన శత్రువులను జయించుదురు.  ప్రకటన 17:14, ''వీరు గొఱ్ఱెపిల్లతో యుద్ధము చేతురు గాని, గొఱ్ఱెపిల్ల ప్రభువులకు ప్రభువును రాజులకు రాజునై యున్నందునను, తనతోకూడ ఉండినవారు పిలువబడినవారై, యేర్పరచ బడినవారై, నమ్మకమైనవారై యున్నందునను, ఆయన ఆ రాజులను జయించును.''