Formáli að útgáfu á Íslandi
Frá því að ég komst til trúar seint á árinu 1995 hef ég haft brennandi áhuga á því að vaxa í trú og sjá aðra vaxa í trú. Að sjá fólk taka framförum er uppörvandi og hvetjandi. En að sjá fólk mæta á samkomur, jafnvel áratugum saman, án þess að vaxa eða taka andlegum framförum hefur frá upphafi valdið mér vonbrigðum. Það sem olli mér samt mestu hugarangri var að horfast í augu við eigin breyskleika, mistök og skort á vexti. Vonandi veldur það okkur öllum hugarangri. Breyskleiki og synd á að hryggja okkur (sjá 2. Korintubréf 7:10-11).
Hvers vegna vöxum við ekki? Fyrir því eru aðeins tvær ástæður mögulegar, eða blanda af þessum tveim. Annaðhvort höfum við ekki skilið nægjanlega vel hver er okkar hlutur í trúarlífinu eða þá að okkur hefur ekki tekist að framkvæma það sem við höfum þó skilið og meðtekið.
Þessi bók fjallar um það að vaxa sem lærisveinn og þá sérstaklega að hjálpa okkur að skilja hver er okkar hlutur í trúarlífinu, hvað það er sem aðeins við sjálf getum gert. Það má leiða að því góð rök að algengasta ástæðan fyrir skorti á vexti sé einmitt þessi: Að okkur hefur skort skilning á því hvernig heilbrigt líf í trú á Jesú vex fram með þjálfun og ástundun. Við höfum reynt – en áreynsla okkar hefur oft snúist meira um að nota viljastyrkinn til að passa í ákveðinn kassa frekar en að þjálfa okkur þannig að við breytumst innan frá og út.
Viljastyrkurinn einn og sér breytir mér ekki, ég verð að æfa mig. - John Ortberg
Kirkjunum okkar hefur einfaldlega ekki gengið nógu vel að gera fólk að heilbrigðum lærisveinum. Okkur hefur skort hagnýta, skarpa og heilbrigða þekkingu á þessu efni.
Að vera lærisveinn er ekki að gnísta tönnum og kreista hnefana til að lifa hinu kristna lífi á viljastyrknum einum saman. Að vera lærisveinn er að líkjast Jesú þannig að skref fyrir skref förum við að lifa lífi okkar eins og Jesús væri að lifa því, innan frá og út. Fyrri leiðin er full af áreynslu, pirringi og vonbrigðum því það er ekki hægt að líkjast Jesú á eigin forsendum og styrk. Seinni leiðin er að þjálfa sig og læra að tengjast Jesú með því að lifa í flæði náðar hans þannig að við breytumst hið innra. Þetta gerist með því að þjálfa og æfa sig í því að vera lærisveinn. Ekki ósvipað því að læra á fiðlu eða leika knattspyrnu. Þannig förum við smám saman að bregðast við lífinu eins og Jesú – ekki af því að við kunnum allar reglurnar heldur af því að við umbreytumst. Við erum farin að endurspegla hver hann er, innan frá og út.
Ef við trúum því að Jesús sé sá sem hann sagðist vera, þá er slík umbreyting möguleg. Að við sjáum fleiri hér á okkar landi lýsa af þessu lífi Jesú er forsenda þess að við sjáum kristni vaxa á Íslandi.
Forsæti í Flóahreppi desember 2015
Ágúst Valgarð Ólafsson