英國生活雜談/攻略 by 英國短毛喵

目錄

[其一。雜談] 英國人係咪真係識分香港人同中國人？英國人會唔會歧視香港人？

[其二] 英國生活文化、dos and don'ts及融入貼士（持續更新）

[其二。離題] 出街食攻略

[其三] 英國點睇醫生？

[其四] 交通篇

[其五] 垃圾分類

[其六] 日常Small talk

[其七] 轉錢黎英國

[其八] 買傢俬／傢俱／家電／家品

[其九] 有圖慎入！英國常見pest

[其十] 租屋

[其十一] 家居保安

[其十二。雜談] 深夜隨筆

[其十三] 搵工相關問題

[其十四] 衣食住等唔同品牌一覽

[其十五] XXX 城市好唔好住？

[其十六] 配眼鏡／con

[其十七] 英國貨幣/交易知識

[其十八] 揸車／學車 （in progress）

[其十九] 睇電視＆TV Licence

[其二十。雜談] 淺談英國賭博業

[其廿一] 清潔用品牌子推介

[其廿二] 英國辦公室文化（持續更新）

[其廿三] 英國郵政（Royal mail? Post office?）

[其廿四。雜談] 'You are one of us'

[其廿五] 英國詐騙手法

[其廿六] 無printer 但係又要print 嘢，點算？（in progress）

[其廿七。雜談] Bonfire night

[其廿八] 英國過冬需知（in progress）

Miscellaneous

Useful links

請按以上目錄標題的超連結跳往該章節。每章結尾均設有「返回目錄」超連結返回首頁。

Patch notes

New chapters:

1. [其廿八] 英國過冬需知（in progress）

Updates:

1. [二。一] 英國生活文化 (25/10/2021)

連登舊post

Post 1: https://lih.kg/2487148

Post 2: https://lih.kg/2503782

Post 3: https://lih.kg/2621699

Post 4: https://lih.kg/2665778

Post 5: https://lih.kg/2693398

Post 6: https://lih.kg/2728282

Toolbox

返回目錄

[其一。雜談] 英國人係咪真係識分香港人同中國人？英國人會唔會歧視香港人？

tldr: 受過基本教育嘅大機率睇得出有分別，但係未必噏得出你係香港人。低下階層嘅racist 就唔會分。

小弟住過英國幾個二三四線城市，有大學區有非大學區。大學區嘅人生活上見得多中國人同非中國人，自然係舉手投足之間睇到有分別。但係要佢地分得出係咩國籍就有難度。不過係反送中之後，多左英國人係BBC 睇到關於香港嘅新聞，所以都多左人估中我係香港人。

根據我係鄰居、同事、侍應、街市檔口老闆、的士司機等嘅講法，佢地係從以下兩樣嘢睇得出分別：

一。禮貌：佢地認為香港人多數有禮貌啲，會講please, thank you etc。香港人雖然閪客多，但係唔少中國嗰班出到國嘅二世祖會更加閪。

二。英文嘅口音同流利程度：佢地當然唔識分香港人同中國人嘅口音，但係多數指中國人嘅口音令英國人更難聽得明。

試過最誇張係有次係間幾多遊客嘅高級餐廳食飯，侍應問我地係邊到黎，我地答係香港之後，個侍應即刻好開心咁同我地全家傾左幾分鐘計，見到我地走嘅時候重特登走過黎同我地道別，have a nice trip 之類 (同我屋企人講)。但係圍住隔離幾枱嘅中國人就好冷淡，面都黑埋又嘢都無咩講。

講左咁耐，雖然多左英國人識分，但係歧視係仍然存在。Racist 嘅人多數本身都係無受過教育嘅低下階層。你問佢Asia 有咩國家都未必答到你，更加唔駛旨意對方識分中國同香港。佢地對著所有Asian 都會ching chong fucking Chinese，所以你同呢班人講I'm Hongkonger 只係曬鳩氣。

想分（中國/香港）嘅英國人自然會識分，唔想分嘅你教佢都唔會分

所以其實連登成日係到嘈呢條問題，我覺得無咩意義。大家倒不如以身作則，教佢地去分。

對於英國人黎講，本土嘅經濟俾武肺重創，本地人都未搵到工，對於一大班BNO 嘅人來英當然係擔心。所幸嘅係大部分都重支持香港同香港人過黎。出於殖民者責任嘅有，出於同理心嘅有，出於欣賞香港人/香港嘢食嘅都有。大家黎緊移民過黎英國，記住大家係代表緊「香港人」呢個身份。你個人嘅行為會影響英國大眾對全部香港人嘅觀感。入鄉最緊要隨俗，去餐廳叫侍應唔好舉手、咩都加個thank you 同please、人地講have a nice day 你答返佢you too，呢啲細微嘅嘢英國人非常非常非常之睇重。你覺得佢地好麻煩懶客氣，掉反轉睇，你只要做得齊，佢開心之餘對你又會好啲，你又會開心，大家其實係win win 雙贏

返回目錄

[其二] 英國生活文化、dos and don'ts及融入貼士（持續更新）

唔少巴打好擔心黎到英國生活會融入唔到英國嘅生活。有見及此，等我分享下係英國生活左咁耐遇過嘅cultural shock 同撞過嘅板，等大家黎到英國嗰陣可以快啲融入英國嘅生活。

由於要講嘅內容實在太多，所以我唔會一次過寫曬，而係不定時咁更新呢個topic，如果大家無追開我連登嘅post 嘅就請定時revisit 呢個Thread 睇下有咩更新。

、「」

[二。一] 英國生活文化

[二。二] Dos and don’ts

[二。三] 融入英國小貼士

返回目錄

[二。一] 英國生活文化

一。英國常用嘅單位：

容量

Pints：1 pint = 568 mL. 主要用係啤酒同牛奶

距離

Inches： 1 in =  1" = 2.54 cm

Feet： 1 foot = 1ft = 12 inches

Yards： 1 yard = 1 yd = 3 ft = 0.91 m，老一輩先用

Miles, miles per hour：1 mile = 1.6 km = 5280 ft

(5280 ft = 1760 yd = 1 mile)

        重量

Pounds (lbs)：1 kg ＝ 2.2 lbs

Stones：1 stone ＝ 14 lbs ，老人輩先用，主要用係體重

1 Pint

https://www.reddit.com/r/CasualUK/comments/pr7503/how_to_measure_things_like_a_brit/

二。英國嘅日子格式同香港一樣，都係dd/mm/yyyy。

三。英國人好撚鍾意狗。鍾意狗嘅英國人好多都唔鍾意貓，鍾意貓嘅人就多數都會鍾意狗。同埋英國領養貓狗好common。

四。英國人習慣放養貓，所以你係街見到嘅貓其實大部分都有人養。可能英國人真係太鍾意狗，我真係咁耐都無見過流浪狗，英國應該唔會有人棄養狗。之前武肺開始嗰陣直頭有人偷人地啲狗黎賣。

五。英國政治主要有兩大黨，分別係保守黨 Conservative （=簡稱Tories）同埋工黨Labour（紅色）。除左兩大黨，重有啲其他細黨包括Liberal Democrats （Lib dem） 同埋Green Party（環保撚）。以前有個Brexit Party，依家改左名叫Reform UK。Scotland 我記得好似有個大黨叫Scottish National Party，專係搞蘇格蘭獨立嘅。係英國，撐Tories 嘅多數都係中產到有錢嘅中年人，撐Labour 嘅就多數係後生仔。

六。我記得當初黎英國嘅時候係無咩英國人會著羽絨，著親都好似係異類咁。但係近年好多鬼佬都會著羽絨，所以大家唔駛怕柒，凍就著啦。不過英國因為室內有暖氣，所以冬天正確嘅著衫方法係入面著件薄身衫，出面著件防水嘅羽絨（擋雨同雪），入到室內就除褸。

七。英國人嗜酒如命，自大學開始就會成日落club 玩。但係因為Club 入面買酒好貴，所以佢地會落club 前係宿舍pre-drink，飲到醉先call 車去club。好多英國人飲酒飲到個肝有事，同埋係急症室每晚都一定有人酒精中毒入廠。英國人平時好好禮貌，但係全部都好差酒品，一醉左disinhibited 就會判若兩人，打交隨街痾尿叫囂樣樣齊。所以住係英國千祈唔可以住係Pub、球場同埋火車站隔離。

八。英國人好撚鍾意飲茶／咖啡。佢地嘅tea 其實即係我地嘅奶茶。英國人嘅tea bag 係單次沖，沖完就會扔，唔會長期浸住個茶包。唔少人眼中嘅一杯靚茶係要Strong and milky。Strong and milky 嘅茶係指個茶底沖得濃（少啲水同茶包浸得耐）再加多啲奶，沖法係先放茶包入隻杯再加滾水，浸完之後用teaspoon 扔走個茶包落垃圾筒，然後再加糖同奶攪混。糖罐入面多數已經有另一隻teaspoon，一杯茶一teaspoon 糖多數就夠。

九。除左酒同tea，英國人重好鍾意食甜嘢。佢地嘅甜係真係好撚甜嗰種，例如milk chocolate 、brownies、fudge 同caramel/salted caramel 味嘅任何嘢。Rowntree’s 同Terry's 就係英國兩間著名嘅confectionery 牌子。根據Google，俾Nestlé 收購左嘅Rowntree’s 仍然係York 設廠，而Terry's 嘅發源地都係York。相傳係York 嘅市中心係聞到Rowntree’s 工廠傳黎嘅朱古力味。Rowntree’s 嘅能得利橡皮糖應該無香港人未食過，而Terry's 嘅Chocolate Orange 係唔少英國人嘅最愛（個人認為好重藥水味，狗也不屌）。英國啲蛋糕又係甜到仆街，當中嘅俵俵者應該係傳統上小朋友生日成日食嘅Caterpillar cakes。根據Google，Caterpillar cakes 係英國M&S 係九十年代推出嘅蛋糕，佢表面嗰層coating 係甜到乸喉，甜過成羹糖直接啪入口。如果有咩情況下要送禮，去M&S 買盒朱古力係最穏陣。

M&S 平價送禮首選

Terry’s Chocolate Orange

Rowntree's Fruit Pastilles

Caterpillar cakes

十。英國係無所謂嘅「身份證」。以我所知係英國曾經嘗試推行過身份證，但係因為法院判左係侵犯人權定個人私隱所以就取消咗，而英國嘅差佬都唔會喺街頭查你身份證明。雖然我記得睇新聞講過話依家多咗stop and search（特別係大城市），不過我係英國住咗咁多年都未俾差佬搜過身。英國嘅差佬嘅警民關係唔錯，大家黎到英國要習慣下。我記得反送中嗰排返到黎英國之後好反射性咁敵視行過嘅警察，然後先醒起自己已經唔係英國。如果大家有需要證明年齡 （例如買酒、刀等）就要用以下任何一樣證件：車牌、駕駛執照、臨時駕駛執照、passport 、BRP。注意大學學生證因為無出世日期，所以就算讀得大學多數都過左十八都唔可以做年齡證明。

ukengineer 巴打（#282897）：

係英國好少人會問係出示身份證明文件, 就算入醫院A&E , 只係要名同地址, GP 名, 最多加埋NHS number. 佢地會查你要唔要俾錢. 買酒, 刀仔就要出示passport/driving licence. 就算警察係街查一個人或者London Underground捉人唔買飛 ge fare dodgers (俾人捉到, 又死唔認, 搞到要警察出現), 好多時只問係地址同名. 我平時都係無拎本護照出街, 又無渣車成十幾年, 出街最緊要係debit card, 同坐火車, 地鐵張photo card

十一。臨時駕駛執照（provisional driving licence）唔駛真係學車或者考車先拎得，只要夠秤就可以申請。Provisional driving licence 應該係BRP 同passport 以外最容易拎到嘅身份證明，建議大家一有機會申請就拎定先。

十二。英式英文同美式英文除左口音外，係用詞都有好大嘅分別。情況就好似廣東話喺香港同中國嘅用詞都一樣有唔同。如果用美式英文嘅用詞，有時啲英國人會聽唔明又或者扮聽唔明，唔老黎嘅重可能會話你（英國pride 無計）。

十二。口音除左可以分辦到個英國人嘅家鄉係邊，根據我多年嘅觀察，口音某程度上係反映到一個人嘅socioeconomic status（譯做家境好似有啲唔夠好）。有啲城市in general 係有錢過其他城市，所以啲英國人會形容有啲城市口音好 ‘posh’ 。Even 同一個城市入面，家境差嘅人通常口音都會比較重。

十三。香港有MK，英國都有佢自己嘅版本Chav（plural: chavs）。呢chavs 多數都係low socioeconomic status 嘅童黨，經常會喺市中心公園嘅或者單車徑見到佢哋三五成群，十個有九個都係著tracksuit 同埋口音會好重。 記得之前有個post有人講過英國越後生嘅人越衰，其實都講得冇錯。論racist 會搞鳩你嘅最主要都係呢班，不過其實就算唔搞你班亞洲人，佢哋都會周圍生事撩事鬥。有啲呢chavs好鍾意聯群結隊咁踩單車，然後喺大馬路度亂踩同埋wheelie 覺得自己好撚型。講到好似好得人驚，不過其實大家唔駛咁驚，只要mind your own business 同佢地避免眼神接觸就得。

十四。英國人對中餐嘅定義同香港人係好大分別。由於英國人嘅口味唔同，早期香港人過到嚟英國就發明咗所謂嘅鬼佬中餐。好多鬼佬都係以甜酸（sweet and sour）為主。除咗甜酸之外重有好多連香港人都未食過嘅嘢，例如「芙蓉」、 「chop suey」、「OK Sauce」 等。一間中餐館嘅menu 越少中文，啲嘢食就一定係越伏，尤其係啲「Chinese takeaway」，十間有九間都係狗也不屌。

十五。Wagamama 同 Yo! Sushi 係英國開到周圍都係，每個城市都會有一間，啲英國人都好鍾意食。不過我奉勸大家除非係抱住食明將嘅心態入去，如果唔係真係連試都唔好去試。咁撚垃圾嘅餐廳俾一蚊佢賺都嫌多。

十六。英國人好興用某隻出名嘅牌子黎做本身件Product 嘅代名詞。以下係我聽過嘅例子：

十七。係英國北部，午餐係會叫做dinner，晚餐係叫做tea。呢個其實係歷史上啲低下階級嘅叫法，以我所知係因為午餐係以前勞動階層嘅最大份嘅一餐，佢地嘅晚餐係下午五點幾返屋企食，而呢個時間係上等人嘅tea time。只有上等人先會叫午餐做Lunch，叫晚餐做Dinner。而香港人講嘅下午茶其實真係直譯Afternoon tea 而唔係High tea，同樣都係以前上等人嘅玩意。

十八。麥當勞係香港叫做金拱門Ｍ 記，英國人就叫佢Maccies。同埋係英國食完快餐係要自己執枱，唔執係無家教。

十九。英國嘅Ｍ 記係無Shake shake 薯條同埋脆香雞翼。如果你係黎英國讀大學，係英國Ｍ 記叫套餐嘅話可以憑大學學生卡換個免費嘅麥旋風或者Cheeseburger，我以前食親都一係加個麥旋風，一係拎個Cheeseburger 俾啲homeless，劫富濟貧。

二十。英國一入秋冬就開始成日落雨。雖然落嘅雨唔會好似香港咁倒水咁倒，但係落親都落得好耐，連續落一兩個星期都好平常。加上英國大起風上黎你拎咩遮都無用（我已經吹爛左幾把），所以係英國生活最好就著防水褸同埋用防水嘅袋，再拎把縮骨遮做後備。唔少英國人都唔會擔遮，靠件防水褸就算。

廿一。最近天氣開始轉涼了！一眾連登仔可能都怕柒唔敢係英國著羽絨，但係其實近兩年羽絨或者人造羽絨已經開始係英國普及，唔少英國人十度左右已經會著出街，所以大家唔駛怕柒，放心著出街啦！係英國最好就著啲出面可以加件防水褸嘅羽絨，因為一大雨或者大雪起上黎，你件羽絨一濕左就唔保暖。

廿二。英國嘅話number 係11 位數字（ 0XXXX XXXXXX）。0 同+44 係本地係互通嘅，本地打 +44 XXXX XXXXXX 一樣可以打得通而唔會扣左你國際漫畫。但係如果你係國外打返去英國就一定要用+44，同漫遊打返香港要加+852一樣原理。有時啲messenger apps e.g WhatsApp, Signal 會認唔到0XXXX 嘅電話，所以save 人電話入contact 建議入返+44。英國電話number 頭5 個數字如果係landlines 嘅話就代表嗰個地區，成個地區嘅頭5 位number 都係一樣（0XXXX）。大啲嘅城市就可能少幾個位一樣（e.g. Manchester 嘅area code係0161X，London 係020XX）。如果係mobile 嘅話，頭5 個字就代表你係咩電訊公司。所以有時你係街到見到啲舖頭或者的士嘅電話number 得6 個數字，係因為佢地assume 大家知道頭5 位嘅area code 係咩所以省略左。

廿三。英國人嘅民族pride 係幾強。好多英國人都好唔鍾意美國，覺得美國係無文化，有唔少重好抗拒美式英文。所以大家搵工同返工一定一定一定要換走曬啲美式串法同用字。英國人除左憎美式英文，好多都好憎Trump，所以我建議大家黎到英國就唔好亂講美國政治。除左美國，英國人重唔太鍾意法國，主要原因都係歷史上嘅積怨。就算依家脫左歐，英國都法國都有唔少磨擦，最近期嘅應該就係英國佬唔俾法國漁民係英國附近捉魚，法國就威脅唔俾火雞出口英國過聖誕，真正嘅LF2。

廿四。每年11月11日係Remembrance day 嘅正日 （又稱Armistice Day），記念自一戰開始犧牲嘅軍人，記念嘅象徵係紅色嘅罌粟花Poppy。一戰當年就係1918年11月11日11時停戰（Armistice）。每年踏入十一月，好多人都會買個Poppy 襟章掛係心口或者個袋，又或者痴係車頭。你係英國每個城市嘅市中心或者教堂入面基本上都會見到二戰嘅記念碑，到左十一月就會放滿一片紅色Poppy。係Armistice Day 11月11日嘅11點好多地方例如國會會有兩分鐘嘅默哀儀式，其餘嘅官方悼念活動多數係Remembrance Sunday 舉行（最近11月11日嘅星期日）。Poppy 襟章嘅收入會用作慈善，幫助英國服役嘅軍人或者前軍人，所以大家不妨都係街頭或者超市買返個支持下。以下係Poppy 成為記念象徵嘅歷史，大家不妨入去理解下。https://www.britishlegion.org.uk/get-involved/remembrance/about-remembrance/the-poppy。

廿五。吸塵機如果係兩層或以上嘅我就建議買Dyson 嗰類嘅cordless 吸塵機，吸上層同樓梯無咁辛苦，我自己就用緊呢個牌子，係Which.co.uk 推介嘅 https://www.amazon.co.uk/Hoover-H-FREE-Cordless-Vacuum-Cleaner/dp/B08FXQRFRT/ref=sr_1_1_sspa?crid=FQEW77LTV0XD&dchild=1&keywords=hoover%2Bcordless&qid=1629556559&sprefix=hoover%2Caps%2C189&sr=8-1-spons&spLa=ZW5jcnlwdGVkUXVhbGlmaWVyPUFTMEpWRFcwUVVSUzImZW5jcnlwdGVkSWQ9QTAzMTc2ODkzVTM3TFZWRVNLNENVJmVuY3J5cHRlZEFkSWQ9QTAzNjcwMjYzNTRROUFPRllSU1FSJndpZGdldE5hbWU9c3BfYXRmJmFjdGlvbj1jbGlja1JlZGlyZWN0JmRvTm90TG9nQ2xpY2s9dHJ1ZQ&th=1。如果怕唔夠吸力嘅就買返英國人居家必備嘅Henry https://www.amazon.co.uk/Henry-HVR-160-11-Bagged-Cylinder/dp/B078KKHT2Q/ref=sr_1_3?crid=1LTJ65L89LT52&dchild=1&keywords=henry+hoover&qid=1629556623&sprefix=henry+%2Caps%2C177&sr=8-3。除左Henry 之外你可以考慮下其他屋企人。

返回[其二]

[二。二] 英國生活Dos and don’ts

係英國生活有好多大大小小嘅潛規則要識應。大家日常生活記住要多啲觀察英國人嘅行為模式黎了解佢地。以下就係經我觀察得出黎嘅result，大家可以參考下。英國始終好大，所以大家請記住

Dos

一：守時。香港人普遍覺得英國人好懶，但係英國人其實意外地守時，約左個時間多數會早十至十五分鐘到達，唔同唔少香港人會準時到。所以如果出發時發現可能會遲幾分鐘都好，一定要事先send 個message 俾對方解釋加道歉。試過有次約左senior 但係無巴士（英國巴士多數唔準時），遲左一分鐘都俾人屌到甩肺

二：禮養。英國人好講風度，因為風度反映出一個人嘅教養。好多日常小事香港人覺得唔重要，但係英國人會放得好大，認為係見微知著。我講下諗到嘅例子：入一道門嘅時候要Hold 著門俾身邊同行嘅人或者老弱婦孺行先再加句after you，如果你俾人after you 左先就要加句thank you 先再穿過道門。入見到有人行緊埋黎要hold 著道門等埋對方。

三：入人地屋企請係門口除褸／帽再問屋主可以係邊到掛起（特別冬天時件褸可能有雨水或者雪會整濕人地屋企）。如果係餐廳或者其他室內公眾地方e.g. Office 要坐一段長時間就請除褸／帽放係櫈pan，唔除會俾人覺得無禮貌（當然呢啲規則唔係絕對，如果問左對方而對方唔介意嘅大可以著住）。

四：講多啲「多謝」同「唔該」。雖然廣東話本身都係比較blunt 嘅語言，同埋香港人比較直接，講嘢習慣講重點，所以香港人之間會覺得無咩所謂，但係我覺得唔少香港人近年好似越黎越少係日常生活中多謝或者唔該人，好似好多嘢都覺得係老奉咁。英國人真係好講禮貌，如果你唔加句「多謝」或者「唔該」人，人地就會認為你係命令緊佢做嘢，覺得你係「閪客」，對方唔老黎事都唔會俾你好受。相反，只要你係咪都加個excuse me/sorry、please、thanks 或者cheers (thank you 嘅informal 英文，解唔該)，就算有時個request 本身會令對方有少少不便，對方有時反而會好肯幫你。鬼佬叫‘please’ 呢個字做‘magic word’，小朋友由細就要學識講please。除左係request 嘅問句入面，please 重可以用係回答到。正所謂禮多人不怪，基本上人地問你咩，你答‘Yes, please’ 或者‘No, thanks’ 就實無死。Cheers 呢個字係單獨一個字做一句，主要係人地幫你做某樣嘢e.g. 幫你開門、遞嘢俾你之類時你單字咁講句cheers! 咁用。順帶一提，唔少英國人分辦香港人同中國人嘅方法就係溝通時嘅禮貌，你想人地點看待你就請有返相應嘅表現，唔好失禮其他香港人。

Don'ts

一：係餐廳叫侍應落order 或者埋單唔好舉高隻手。想召換個waiter，你要等侍應經過時excuse me 咁，最好就等佢唔係拎著杯碟嗰陣叫。第二個方法就係隻手拎著道具（可以輕輕舉高）再用眼神話俾對方知。咩係道具？你想落單就係張menu，你想埋單就係張credit/debit card。唔好問我點解舉高隻手就係無禮貌，我都唔知。我問過英國friend 點解，佢都話唔知，總之就係啦初初黎英國，試過同枱有人舉手嗰陣俾個侍應屌，要佢放返低隻手

二：係一般餐廳特別係非煩忙時段可能無人企係門口帶你埋位。千祈唔好自己見到有空枱就坐底。正確做法係企係門口等，侍應見到有人等位自然會埋黎serve 你。

三：除非你入車立時全車立只係得你一個人，否則請避免禁關門掣，要等車立門自己關。我唔清楚究竟係英國人唔鍾意人趕頭趕命定係覺得要等埋其他人入車立先叫有禮貌，總之大家當係約定俗成嘅潛規則就得。

四：千祈唔好用美式英文。英國人暗瓦底其實唔鍾意美國同美國人，覺得自己高等過美國人。如果日常生活用左美式英文讀法或者用詞，有時會俾英國人指正。學生交功課或商務英文用左美式串法更加可能會俾人屌。我以前係大學Year 1 時交論文時就中過伏，俾個tutor 逐個字highlight 黎屌。其實原理同香港人聽到共式中文e.g. 公交 會覺得un 耳一樣。如果大家唔想中伏，可以大膽問返對方英式英文係點，對方多數會好樂意教你。注意，我指嘅「讀法」唔係啲細微嘅口音，而係某啲字會成個讀法唔同左嗰種，例如Router 同Garage ，英國人真係會唔明或者要load 一load。有啲用詞例如英國人叫廁所做toilet，你講bathroom 或者restroom 佢地又係會load 一load。讀中學嘅話，你讀Chem 時串Aluminium 做Aluminum，如果個老師唔鍾意又係可以扣你分。

五：唔好係餐廳樓面了牙（除左中餐館）。係香港咁做好正常，但係係英國就唔會有餐廳提供牙籤。好似我咁食嘢成日攝牙罅嘅人一定要自備牙籤或者牙線。不過如果唔係中餐廳嘅話，請行入去廁所處理，無謂令人側目。

返回[其二]

[二。三] 融入英國小貼士

入伙買手信

口音?

至於口音方面，我同意唔應該突登chok 「英式」口音。比起口音，講嘢清楚緊要好多。同埋香港口音其實算係容易聽。香港口音其實係自己嘅特色黎，唔應該刻意改走去。

Chips, crisps, football/soccer

返回[其二]

返回目錄

[其二。離題] 出街食攻略

流程

係英國餐廳食嘢係有個流程。侍應帶你埋位之後會俾drinks menu 同food menu 你，然後就會行開俾時間你睇。隔左一陣就會先過黎問你想飲啲咩。你落完嘢飲之後就問你叫得嘢食未。你答得就會同你落埋，未得就會行開俾時間你再睇。有時未決定好嘅唔駛怕有壓力，直接同佢講未ready，可唔可以俾你睇多陣就得。

Drinks

Drinks menu 上面有alcoholic 有non-alcoholic drinks，如果兩樣都唔想飲可以就咁叫tap water，唔駛收錢嘅。

Food

Food menu 特別係意式餐廳會啲嘢食名好多好複雜又唔係英文。件item 下面多數會有英文解釋講入面有咩材料。記得初初黎英國，出街食係要用Google translate 樣樣睇下係咩黎所以大家黎到英國唔好俾個menu 嚇親，慢慢search 就得，無人會趕你走

英國餐廳食嘢多數有三part (course)，分別係appetizers 前菜, mains 主菜同desserts 甜品。不過其實無規定你一定要叫曬，小弟胃口唔大所以我都係多數叫個mains 就算。Set menus 有分2 course 同3 course，2 course 就係前菜加主菜，3 course 就加埋dessert。Appetiser 就唔駛個個人都叫，但係mains 就最好要一人叫返一個，唔會預你3 個人share 兩個mains.

Tips

英國無tips 文化，除左高級啲嘅餐廳會有optional 嘅加一之外，大部分餐廳都無服務費。如果你想俾tips，多數俾50p 到一鎊就得。（100p/便士 = 1 pound/鎊）

酒吧

酒吧free 好多，自己埋位，每張枱有個枱號，然後自己出去counter 叫嘢飲嘢食係即刻俾錢，嘢飲就即刻攞，嘢食就會問你枱號，你自己埋位等，佢上菜會俾埋餐具你，食完就自己走，完

返回目錄

[其三] 英國點睇醫生？

係英國睇醫生同係香港睇係完全兩回事，大家要忘記香港嘅所有經驗，由頭理解一次NHS 嘅玩法。

呢一篇因為要講嘅嘢太多，所以會分做以下七part：

一。簡介

二。家庭醫生（GP）

三。攞藥/買藥

四。急症？111？999？定睇GP 街症？

五。醫院（住院及out-patient，專科）

六。身體檢查

七。牙醫

八。抑鬱症睇醫生流程

返回目錄

[三。一] 簡介

NHS （National Health Service ）呢個名大家可能都聽過。佢係英國嘅公營醫療機構，你係英國任何一個角落都會見到呢個藍底白字嘅Logo。除左診所同醫院之外，好多唔同嘅服務都係直屬NHS 或者同NHS 有關，包括老人院（care homes）、心理治療（psychological therapies）、善終中心（hospices）、物理治療（physiotherapy）同職業治療（occupational therapy）等。

眾所鳩知，英國作為一個nation 係有四個countries，分別係England、Scotland、Wales 同Northern Ireland。基於種種嘅歷史原因，每個country 都有佢地自己嘅NHS 分支。雖然好多嘢對市民黎講都係大同小異，但係我以下講嘅所以嘢都係以NHS England 作準，大家敬請留意。

NHS England etc. 其實都只係一個大框框，底下重有份唔同嘅聯網（Trust）。有啲大城市會自己有一個trust，唔少鄰近嘅細城市就會幾個組成一個trust。所以好多時候急症同睇專科醫生都會refer 你去另一個城市嘅醫院就係咁解（even 係通波仔都可以用救護車車你去隔離城市）

英國除左公營醫療外亦都有私營醫療。但係因為公營醫療質素拍得住私營同埋大家份稅包埋你睇NHS ，所以多數市民都係揀返NHS 睇。會睇私營嘅多數係公司有買醫保或者有啲服務NHS 唔包（因為NHS 無錢，所以有啲唔係必要嘅服務係會唔包）。只要你係揸BC， 直屬NHS 嘅所有服務係唔駛收錢。無錯，上至住院下至抽血，大至做手術細至換膠布，全部唔駛錢。呢個對我黎到英國係一個cultural shock，所以先咁強調呢點。但係由於英國係醫藥分家，所以係診所開藥係NHS England 係要自己俾錢。有趣嘅係NHS Scotland 同NHS Wales 係連診所藥費都唔駛俾，所以大家揀住邊嘅時候都可以考慮埋呢樣嘢（順帶一題，住院時用嘅所有藥都唔收錢）。藥費同攞藥嘅嘢我會係其他章節再詳細講解。

每個人都會有一個自己嘅NHS number，係以10 個數字組成。呢個number 你可以問自己註冊嘅診所攞，係NHS 新出嘅App 都可以搵到。建議大家mark 返低，因為如果你要配藥又或者未來搬屋要轉診所嘅話，有呢個number 會易辦事啲。但係唔記得嘅話其實啲醫護都可以問你嘅個人資料黎拎返，所以唔駛panic。你係全英國嘅所有醫療記錄都係統一跟你個NHS number，你去英國任何一間醫院或者診所，入面嘅staff 都可以用個NHS number access 你嘅醫療記錄。如果你唔知自己嘅NHS number，NHS 嘅staff 係可以靠你嘅全名同出生日期等資料搵返你嘅NHS number 同埋醫療記錄。

NHS 新出左個app 可以一站式book appointment、睇返自己嘅NHS number 同埋醫療紀錄／藥單，不論睇醫生同埋攞藥都好方便，強烈建議大家註冊左GP 之後即刻download（https://www.nhs.uk/apps-library/nhs-app/）。

返回[其三]

[三。二] 家庭醫生（GP）

GP（general practitioner），即係家庭醫生（有時會泛指診所），係英國醫療系統好重要嘅一環。香港人對GP 嘅印象係睇傷風感冒同拎假紙，有咩其他唔舒服就自己搵個專科醫生睇。但係係NHS 係無得自己揀個專科醫生睇 － 專科醫生只可以經GP 轉介先睇到。GP 嘅作用就係轉介有需要轉介嘅病人，唔駛出動專科醫生嘅就會係返診所到處理。所以大家如果有咩唔舒服直接去GP 到book appointment 就得。

英國同香港另一大唔同就係英國醫生係唔睇傷風感冒嘅。因為一黎傷風感冒呢啲係靠你自己好，而你睇醫生係唔會令你好得快啲。二黎英國嘅醫生基本上係唔會開「收鼻水藥」、「止咳藥」、「 消炎酵素」呢啲消減病徵嘅藥，你想食佢都係叫你去藥房同超市自己買必理痛食。三黎GP 本身輪候時間長，同你book appointment 嘅staff 聽到你嘅病徵，知道你係非緊急，一係就打發你走一係就幫你book 好遲，你未睇到可能已經自己好返。四黎係英國攞病假，頭7 日唔舒服係唔駛睇醫生證明同拎病假紙（呢樣叫做self certification ），唔同香港射波要俾幾舊水睇一次醫生。

Book appointment 方面，除左打電話之外，大部分GP 都已經有網上預約。係預約嘅時候會問你啲講下邊到唔舒服之類（打電話就係個receptionist 問你，網上就填form）。英國嘅診所多數有幾個GP，有啲診所可以俾你request 睇邊個醫生，但係因為診所太忙而未入可以配合到。但係所有醫生都可以睇到你嘅醫療record，所以原則上邊個睇你都無分別嘅。

英國一個GP 嘅appointment 大約十分鐘，呢十分鐘就會做曬問症、檢查同開藥。如果係sensitive 嘅檢查e.g. 女士檢查胸部或者下體，可以要求多一個staff 監察個醫生有無唔守規矩，不過多數唔駛病人要求嗰醫生已經會自動offer 搵人黎（英文叫chaperone）。另外，如果大家擔心語言不通，唔知點表達自己邊到唔舒服，大家可以搵NHS 嘅廣東話翻譯，睇醫生時嗰翻譯員會用電話即時為雙方翻譯。如果病人行動不便離開唔到屋企e.g. 老人家，GP 係可以上門家訪。

去到appointment 嘅尾聲，醫生覺得有需要開藥就會用藥單（prescription ）開藥。英國由於醫藥分家，攞藥係要自己出去市面藥房攞（大公司有Boots, Lloyd's pharmacy 等），診所係唔會俾藥你。做法大致分兩種：一係印張藥單俾你去出面藥房配，一係就直接send 埋張藥單俾藥房，你自己行過去俾身份證明就得。如果有重覆配藥嘅需要，例如濕疹要一個月買一次藥膏，醫生會俾張repeat prescription 你，你keep 住張藥單就可以定期去拎藥。其餘嘅嘢關於藥房嘅嘢，我會留待下節再講。

GP 除左睇症之外，重有好多作用。例如GP 會定期為長期病患（例如糖尿病、高血壓等）做定期檢討，睇下情況有無改善同惡化，又或者駛唔駛加減藥力。嬰兒、小朋友同老人家打針都係由診所一手包辦。但係以上嘅嘢有唔少係交俾護士或者Health care assistant （你當係護士嘅助理啦）做，因為英國嘅護士都會受過相關嘅訓練，有啲specialist nurse 可能重熟手過醫生，所以發現睇你嗰個唔係醫生大家唔駛擔心。

最後，正如之前咁講，GP 嘅所有服務係唔收錢，大家拎完藥單，同個醫生say 完good bye，就可以頭也不回咁行出個診所門口。順帶一提，大家過黎英國第一次睇GP 時建議帶定針卡，俾對方留返個record 你打過咩疫苗。如果大家有長期病食開某啲藥，建議可以問香港嘅醫生拎返自己嘅醫療紀錄同埋拎埋自己食開嘅藥個盒或者藥單過黎俾英國嘅GP。

大家揀GP 其實主要都係google 最近嘅GP，然後拎齊身份證明walk in 或者上佢個網register 就得。你見到間GP 嘅google review 基本上一定係超低評分，因為多數你有唔滿意先會專登上網投訴。不過係英國轉GP 好容易，只要有你嘅個人資料同埋NHS number 就得，所以你試完覺得唔好再轉都未遲。

返回[其三]

[三。三] 攞藥/買藥

NHS England 係2021 年4 月嘅藥費係£9.35 per item，金額每年都會微調。Per item 係指不論係平藥定貴藥都劃一收同一個價，原理係拎賣平藥賺到嘅錢去補貼入貴藥同埋其他人免費攞藥。所以如果醫生叫你自己去藥房配藥，並唔係因為個醫生hea 你，而係想幫你慳錢，因為你自己去藥房買啲藥會重平。

英國嘅藥分三種。第一種係Prescription-only medicine，即係要醫生開藥單嘅藥。第二類係Pharmacy medicine，即係唔駛醫生開藥，但係藥劑師俾你買先準買。英國所有藥房都會有個藥劑師坐鎮。有時有啲藥係貨架係無得直接拎，佢只會show 個牌俾你，叫你拎個牌去櫃檯問。呢啲藥就好大機會係Pharmacy medicine，藥劑師會問左你係咪真係需要先賣俾你，賣俾你之前都會教你點用。第三類就係Over-the-counter medicine（OTC drug），即係一般必理痛、胃藥之類嘅安全啲嘅藥，唔駛醫生又唔駛藥劑師開藥。呢啲藥係超級市場都買到，唔駛特登去藥房買。

英國人講藥名會叫返隻藥嘅成份名。例如必理痛（牌子名）大家會叫返學名paracetamol，大家講panadol 反而未必個個知你講咩。所以如果醫生叫你自己去藥房買藥，但係佢講完啲藥名你唔知講咩，記住叫醫生寫張紙仔你去藥房照單執藥，咁就唔怕買錯。講學名重有另外一個好處就係大牌子例如必理痛其實係唔合理地貴。同樣嘅paracetamol，藥房或者超市自己出嘅牌子其實重平（幾蚊港紙就有一盒），但係功效係一模一樣。所以大家唔駛怕見到貨架上嘅OTC drug 咁平就唔敢買，無啦啦挨貴藥。

NHS England 雖然係有收藥費，但係唔係個個都要俾錢。詳細嘅list 係到可以搵到https://www.nhs.uk/nhs-services/prescriptions-and-pharmacies/who-can-get-free-prescriptions/，GP 亦都會提你或者幫你申請。基本上18 歲以下同60 歲以上、某啲病例如cancer 藥費係全免。如果唔合資格，但係又要長期食好多藥，可以買三個月或者十二個月嘅 prescription prepayment certificate (PPC)。簡單啲講PPC 就係食藥放題，只要係醫生開嘅藥就任食唔嬲。2021 年嘅 3-month 嘅 PPC 係 £30.25，12-month 嘅PPC 係 £108.10，如果大家有長期病嘅可以參考下，同時考慮下會唔會去住Scotland 同Wales 等藥費全免嘅country。

左邊“Prescriptions” 係配醫生開嘅藥（Prescription-only medicine ），右邊 “Medicine” 係要經藥劑師買嘅藥（Pharmacy medicine）

返回[其三]

[三。四] 急症？111？999？定睇GP 街症？

如果係英國突然之間唔舒服嘅話點算？係英國其實有幾個做法。首先，如果係緊急嘅嘢例如中風同心臟病發等，就一定唔駛諗，直接打999 call 白車送院。順帶一提所有醫院服務包括Call 白車係唔駛錢，睇完就走得。

如果係相對無咁urgent 嘅，又或者唔知應該點做，就可以打111。111 接線生聽完你講之後，就會俾建議你下一步，例如幫你call 白車、自己搭車去醫院walk in、睇自己GP 等。英國嘅醫院除左有A&E（或者Emergency department ），重有所謂嘅Urgent care centre（或者minor injuries unit、urgent treatment centre etc.，唔同醫院可以有唔同嘅名），可以睇啲非緊急嘅嘢，例如切傷手指之類。

如果係相對小事嘅（例如頭痛之類），可以好似香港咁去睇左診所GP 先。有啲GP 會有walk-in 時間，但係並唔係間間都有。如果你去book appointment，聽到你某啲症狀，receptionist 可能會幫你打尖即日睇。如果睇完發現係嚴重嘢，GP 可能會轉介你去醫院睇急症。

如果怕講英文，英國有個網叫做www.nhs.uk，上面基本上有齊所有嘅醫療資訊。大家search 左自己嘅病徵之後，就會教你幾時應該睇GP、幾時打111、幾時打999。

返回[其三]

[三。五] 醫院（住院及out-patient，專科） 

以下落黎所分享嘅都係關於公立醫院，我無住過私家所以無可奉告。

結構

英國嘅醫院同香港一樣有分聯網(Trust)。有啲大城市e.g. London 會有幾個trusts，但係其他細啲嘅郡就會幾個城市組成一個trust。所以如果你住啲二三線城市，好多時你入院要做啲咩特別啲嘅檢查，啲醫生會安排你即日來回去隔離城嘅醫院做。甚至有啲嚴重啲嘅case e.g. 重傷或者通波仔都會由救護車直接車你去隔離城醫。

「日常」

醫生巡房（ward round）多數係每日朝早八點半到Lunch time 前。派藥時間就視乎醫生開咩藥俾你，如果有需要準時食e.g. 抗生素，啲護士就算朝早6 點都會叫醒你食。不過基本上所有病人係每晚六點到都要打一枝抗凝血針落個肚皮到，呢樣係香港嘅醫院應該係無。呢枝針我隔離床啲呀伯話唔痛，但係可能因為我太瘦，所以我自己就覺得痛到仆街。

英國嘅醫院餐係有張menu 俾你自己tick，啲伙食其實都幾好，我見過有啲地方有雪糕食添。順帶一提，英國人食晚餐嘅時間好早，大約係五點幾六點，係醫院入面都係。

早餐

午餐（好似係）

晚餐

我見有啲病房係有地方沖涼，不過我之前做手術個傷口唔可以濕水，所以只可以抺身。每日朝早食早餐前，啲助護嬸嬸就會開盤水俾你自己抹身，換醫院袍同刷牙（醫院會俾埋牙膏牙刷你）。梳洗完之後就會幫你換床單，然後先俾早餐你食。

每張病床床頭都有個櫃，有鎖嗰個櫃主要唔係俾病人用，而係俾護士放你要食嘅藥物。不過如果你要離開間病房一排e.g. 去照x-ray 或者做手術，護士都會幫你放啲貴重財物入嗰櫃。

床頭嘅插蘇只要無寫明都可以用e.g. 叉電，如果你部電話無電，你可以試下問啲護士幫你叉電，多數都會肯幫你。每張床都有部電視仔，係朝早嘅時候係免費嘅，印象中過左晚餐時間就要去走廊買儲值卡，重要都幾貴下。床頭部電話就每次通話頭5 分鐘左右都係免費，之後就要收錢。不過你冚左線之後又可以無限次打多5 分鐘。

Staff

所有醫護心口都有個牌仔講佢個名同埋職位，不過英國嘅醫院嘅dress code 都係差唔多咁上下：

醫生（非consultant）：藍色scrubs

Consultant：內科就西裝/裇衫西褲或者，外科就多數綠色scrubs

^（英國醫生係唔著白袍）

護士Nurse：天藍色

Senior nurse/sister：深藍色

助護 HealthCare Assistant：淺藍色

藥劑師 Pharmacist：西裝

物理治療師 Physiotherapist/職業治療師 Occupational therapist/營養師dietician：白色衫，但係唔知條領個colour coding 係點分

出院

住完院之後，佢地就會send 返啲資料俾你嘅GP follow-up，呢樣香港應該就唔common。係英國住院嘅所有服務，包括打針，化驗，做手術，飲食，物理治療，住院其間嘅藥物以及出院俾你食嘅藥物都唔駛俾錢。當醫生覺得你出得院，啲醫生護士就會幫你做出院嘅手續。醫生會係佢地個system 到寫份discharge summary 交待GP 點樣follow-up，同埋會印份copy 俾你keep 住。醫院會開埋藥俾你出院食 —— GP 可以開俾你嘅就會開到你有得睇GP follow-up，然後交返俾GP 接手，GP 唔可以開俾你嘅醫院就會俾曬你。如果你行動不便嘅醫院重會安排埋patient transport 俾你。

專科

英國嘅專科醫生基本上都係曬醫院，所以有時GP 話轉介你去睇專科，就係refer 你去醫院日間門診。Refer 左之後就多數會由醫院打電話同出信俾你confirm，到時拎住張信去醫院就得。

返回[其三]

[三。六] 身體檢查

英國人唔興好似香港人咁每年用份保險去自己做身體檢查（因為英國嘅醫療唔駛錢，所以其實唔多人會自己買醫療保險）。英國嘅NHS 會係你到左某個歲數就會同你安排做免費嘅特別疾病嘅檢查（screening）。基本上除左女人嘅子宮抹片之外（25 歲以上）同糖尿眼（12 歲以上嘅糖尿病患者），其他嘅檢查都係俾啲中年至老年人。到左咁上下，你就會收到NHS 俾你嘅資料，你自己可以選擇做唔做。詳細嘅screening list 請自己參考 https://www.nhs.uk/conditions/nhs-screening/。

返回[其三]

[三。七] 牙醫

英國嘅牙醫同醫生以我所知嘅一大分別就係牙醫嘅market 係私營大過公營。除左啲嚴重嘢NHS 有提供，一般嘅定期洗牙（Scale and polish）要自己俾錢做。搵牙醫都係靠Google 搵附近嘅診所，但係我聽聞有啲城市因為啲牙醫唔再收新客，所以啲人睇牙醫要去另一個城市睇。呢個情況相信唔common，但係我都唔係太熟，大家要靠自己上網Google 返自己城市嘅availability 啦。

返回[其三]

[三。八] 抑鬱症睇醫生流程

係英國抑鬱症（Depression）唔係好嚴重嘅case 一般都係交由GP 處理，要睇得精神科醫生（Psychiatrist）嘅都係啲重症e.g. 有幻覺或者嚴重自殺傾向。不過同其他病一樣，如果大家覺得自己有需要睇醫生又或者本身係香港已經有睇開抑鬱症而想係英國繼續睇嘅，大家都係要由GP 開始睇起，再由佢決定有無需要refer 俾精神科醫生。

當大家book appointment 嗰陣，接線生就會問定一啲基本嘅問題黎睇下你有無即時嘅危險e.g. 有無自殺念頭。如果對方覺得你有即時危險，一般都會轉介你去急症室或者專門處理精神病急症嘅所謂Crisis team。如果你無即時危險，對方就會幫你book appointment 睇GP 或者其他受過精神科訓練嘅醫護人員，同時係你等appointment 嘅期間俾定你Crisis team 嘅contact。

當GP 診完症之後認為你有需要接受抑鬱症治療，一般就會俾以下兩個option 你：心理輔導同埋食抗抑鬱藥。心理輔導（有好多唔同嘅叫法，e.g. Psychological Therapies, talking therapy, counselling, CBT）就一般會轉介俾所謂嘅IAPT （Improving Access to Psychological Therapies）負責，由佢地幫你度身訂造合適嘅療程，詳情GP 自會交待。抗抑鬱藥（antidepressants）就由GP 自己開。抗抑鬱藥一般嘅療程都係半年起跳，視乎需要再作延長直到可以停藥為止。由於抗抑鬱藥需要連續食返兩三個星期先至會起效，而係起效之前可能會有短暫嘅反效果，GP 一開始只會開一個月嘅藥，然後安排你覆診黎睇下有無需要較藥。如果隻藥同個劑量啱嘅先會開長啲藥俾你再定期review。

我食緊嘅Fluoxetine 20mg 係最低嘅劑量（dose），食左幾個星期之後開始覺得情緒好左，食慾都回覆返正常，同埋無再咁想自殺。最近接受左幾次心理輔導，每次一個鐘，有個third party 可以傾訴下都有啲幫助。

返回[其三]

返回目錄

[其四] 交通篇

係衣食住行四樣嘢入面，唯獨「行」係貴過又複雜過香港。以下係英國除左揸車以外嘅交通模式，嫌too long didn't read 嘅就只需要重點睇巴士同埋火車。事關我未有車牌，所以揸車方面我無咩嘢可以offer 俾大家，要靠其他巴打幫手啦。

買任何車飛嘅stock phrase：'Hi, may I get a single/return ticket to XXX please?'

一。巴士

二。的士及 Uber

三。Tube？Underground？Overground？

四。火車及Coach

五。內陸機

六。單車及e-scooter

番外。行路

返回目錄

[四。一] 巴士

英國嘅巴士分做短途同長途。短途係指城市內之間嘅路線，長途係指你所在城市同鄰近小鎮同城市嘅路線。由於London 內同London 外嘅巴士模式會有唔同，所以我每樣嘢都會分開London 內同外講。

收費方式

收費方式方面，基本上全英國都已經可以用智能手機或者credit/debit 卡係車上俾錢。智能手機就係指Google pay, Apple pay 之類嘅NFC 功能。英國嘅Credit card 同debit 卡可以直接好似八達通咁拍卡俾錢，方便過啲咩支付寶用QR code 慢慢嘟。

London 內就有佢專用嘅Oyster card，即係香港八達通（Octops card）嘅老竇。Oyster card 同八達通嘅唯一分別就係Oyster 真係只用係交通，唔可以做日常交易。Oyster card 可以係地鐵站嘅自動售賣機買到。

最後一個收費方式就係俾錢買車飛。London 內嘅巴士好似唔收cash，你要買車飛就要去返最近嘅Tube 車站買。London 外嘅巴士就多數上車時向車長買，所以搭巴士上車有時候會大排長龍，就係因為前面啲人係到數大餅。如果你夠細心，會留意到我係講「買車飛」唔係「俾車錢」。因為英國搭巴士係會印張車飛俾你。呢張好似收據咁車飛大致上有分single ticket, return ticket 同day ticket。Single ticket 就係單程，張飛落車就可以扔。Return 就係來回，所以你要keep 返張飛，等你回程時嘟返張飛上面嘅QR code，先至可以扔張飛（有時司機會係你回程嘅時候搣爛少少你張飛做record）。Day ticket 就自然係任搭，搭到唔搭就可以扔。

以我所記得，London 內嘅巴士係好似香港咁分段收費，流程上基本上唔駛同司機講嘢，拍完卡就坐底，到站前就禁鐘落車。London 外嘅巴士雖然都係分段收費，但係買車飛係以點到點方式去買。即係你係A 車站上車買車飛時要同車長講「我要買來回飛去B 車站／某地標」，司機就回出張return ticket 俾你，你可以係B 車站或更近嘅車站搭回程巴士返A 車站。回程車同day ticket 唔駛係同一個number 嘅巴士 — day ticket 就只要係同一巴士公司就得，return ticket 嘅話如果係另一個number 嘅巴士（同公司）但係都有B 同A 車站嘅路線都可以上車。

英國嘅巴士車費普遍俾香港貴，我住嘅城市搭返十五分鐘嘅單程車已經要鎊半到兩鎊，所以係幾唔化算。

係London 就好似無呢個文化，但係係其他城市搭巴士，落車經過司機時記住講句’thank you!’ 或者’Cheers!’ 多謝司機！

ukengineer 巴打（#282897）：

係London ge 巴士車費正確d講以個operation係唔係最終由transport for London負責. 以 TfL 名義行 ge 巴士應該唔係分段收費.

https://tfl.gov.uk/fares/find-fares/bus-and-tram-fares

搵路線同班次

係2021 年嘅英國搭巴士真係方便左好多。以前Google map 未有direction 功能，搭巴士只可以上巴士公司嘅官網或者係巴士站個地圖搵路線。依家Google 係英國大部分城市都有最update 嘅巴士路線，可以教你由邊個站搭到邊個站。呢個功能好重要，因為你上車買飛要同司機講去邊個車站，但係唔係個個車站附近都有地標（例如住宅區），所以知道個站名買車飛會方便好多。除左搵路線，因為英國London 外好多巴士都會有廣播或者螢幕報站，要靠自己肉眼睇（或者上車時問個司機可唔可以做好人提你），所以有時飛左站或者早左落車自己都唔知。要知道英國嘅住宅區睇落都一模一樣，又無咩街燈，一入左黑隔左個巴士玻璃係唔會知自己去到邊。依家Google map 直頭會即時提你重有幾多個站同幾時禁鐘落車，真係好方便。

Google map 雖然係好方便，但係有時都會出錯或者唔準。因為有時巴士會因為唔同原因e.g.大時大節或者整路會改道或者delay，Google map 未必反映到呢啲改變。所以我就要介紹traveline.info/ 呢個網。Google 其實係大城市係已經好準確。但係如果你想要最準確嘅即時timetable，travelline呢個網可以出到實時嘅巴士資訊，係啲近郊成個鐘先一班嘅巴士特別有用。以下係real life example：

假設我依家要由Manchester Piccadilly 火車站去一個叫Whitworth Park 嘅地方

（紅框：地點）

首先你要係現場巴士站或者Google map 搵到你要搭嘅巴士number出發車站嘅獨有code：MANAJAPD

（藍框：巴士站，綠框：巴士number）

然後去到travelline.info 嘅live times 到打返個code

禁左Let's Go 之後再confirm 個車站名，就會出左呢一個page

然後再禁左上角Show as a list，volià！大功告成！

其實如果你係現場嘅巴士站，係可以Skip 過Google map 直接入個Code 落travelline。但係如果你唔係嘅話（例如要plan 幾點出門口），用travelline 直接打個地方名會出左好多個附近嘅車站名，結果都係要用Google map confirm 返個車站名或者code

注意：如果要轉車，都係用Google map 最方便，Travelline 都有journey planner 但係Google map 已經夠做。

返回[其四]

[四。二] 的士及Uber

英國除左係的士站嘅的士（多數係火車站外或者景點），全部嘅的士都係打電話預約嘅，無得好似香港咁係街上面截的士。你可以book asap，亦都可以book 定幾個鐘後、第日甚至更遲，方便你預時間（例如第日凌晨一出火車站去機場）。我搭過嘅的士都係24 小時服務，凌晨打去都有人同你book 車。價錢方面好睇你係邊個城市，有時同一個城市會有唔同嘅的士公司，收費同服務質素都有唔同，但係普遍都貴過香港唔少。大家可以上Google 睇下間公司嘅review 再作比較。

以前的士只收cash，依家因為疫情已經發展到可以用contactless debit/credit card 比錢。見過有啲公司直頭學uber 咁有個app book 車同過數。順帶一提，唔少的士會做長途e.g. 揸一個幾鐘去隔離城市甚至去埋大機場。如果人數多嘅話，有時搭的士除返開會重平過斷人頭搭火車。

London 嘅Cab 我就未搭過，所以都係等其他巴打分享。

Uber 就唔係個個城市有，但係價錢多數都平過搭local 嘅的士公司。Uber 大致上同香港一樣，其實都無咩嘢講。

返回[其四]

[四。三] Tube？Underground？Overground？

唔少大城市如London、Manchester 同Edinburgh 都有佢嘅市內鐵路系統。London 嘅就有Underground（又稱Tube）同Overground。要簡單咁解釋，Underground 就係香港以前嘅地鐵，主要係London 嘅核心地帶嘅地底行駛。Overground 就係火車，係London 嘅近郊同外圍嘅地面行駛。

London 嘅鐵路都係可以用oyster card 或者contactless credit/debit card 拍卡俾錢。雖然Tube 同Overground 係好貴，但係每日嘅車費係有上限，過左個上限就唔再收錢任你搭。個Cap 會因應你嘅活動範圍（由Zone 幾去Zone 幾）有唔同，詳見https://tfl.gov.uk/fares/find-fares/tube-and-rail-fares/pay-as-you-go-caps#on-this-page-1。

London 嘅underground 因為係地底，所以多數收唔到上網。大家出發前請用定Google map 搵定點轉車，落到車站再用官方嘅offline map app 或者紙地圖搵路。重有唔係個個車站都有扶手電梯同車立，同行有老人家或者有好多行李嘅要留意。地鐵站內因為人多，London 治安都唔係太好，所以銀包電話要小心，唔好俾人扒走。

返回[其四]

[四。四] 火車及Coach

簡介

黎到英國，離開機場基本上只有火車同Coach 兩個選擇。Coach 其實就係旅遊巴，價錢比火車平同埋車上有廁所，但係車程會長過火車。我以前學生時期搭過幾次，最後都係選擇火車。由於我自己唔建議搭coach，所以都無謂花時間多講。英國嘅火車遍布全國，但係全部鐵路公司都係私營，唔同路線由唔同公司營運。呢一點對買車飛嘅實際操作係有影響，之後會再詳細講。

Coach

火車

買車飛方法

乘客買車飛有三個方法，分別係網上訂購、係車站買（車站counter 或者自助）同係火車直接向查飛員買（唔建議）。網上訂購嘅話，你可以選擇實體車飛，火車公司會俾booking reference 你，你上車前預留時間係車站counter 或者自助取票機到等佢印俾你。你亦可以揀電子車飛，用自己printer 印出黎或者 save 係電話到俾查飛員check。網上訂飛可以預留埋坐位，可以揀同朋友/親人一齊坐。網上訂飛有兩個網頁選擇，一個係National Rail Enquiries www.nationalrail.co.uk（應該係官方）一個係https://www.thetrainline.com/，佢地各自都有佢嘅電話app（我自己用開前者）。先前講過唔同路線係由唔同公司營運，但係book 車飛都係用呢兩個網址是但一個起步，佢地會集合曬所有公司嘅班次同資訊俾你（有時A 城去B 城會有幾間公司嘅車可以揀）。你揀好要搭嘅班次，National Rail Enquiries 就會彈返營運路線嘅火車公司官網俾你俾錢。換言之National Rail Enquiries 個網只係中介，而每間火車公司都要申請一個account 同download 個app 放電子車飛，你住耐左就可以集齊全套。如果要轉車嘅話（詳細之後會講），even 兩班車係唔同公司你都係向第一間公司買同俾錢，佢會issue 曬兩程車嘅車飛俾你，唔駛你分開買。順帶一提，如果上網訂左實體飛，你係要帶埋俾錢嗰張信用卡到場，唔係你係會拎唔到飛。大家唔好大頭蝦唔記得，如果唔係車都無得你搭。

自助買飛/拎飛 機

實體車飛

Railcard

講到買車飛就不得不提Railcard。Railcard 有好多唔同種類俾唔同年齡階層嘅人，一年大約三十鎊（有分一年同三年）。申請左Railcard 你就買所有車飛都可以平1/3 咁多，所以基本上搭返兩三程就已經回本甚至有賺。詳情大家可以上官網www.railcard.co.uk 睇。Railcard 一樣有分實體卡同電子版。實體卡只for 英國本地申請，由公司郵寄俾你。電子版就即時issue，俾你save 係電話個app 俾查飛員check。大家買車飛時要declare 你有railcard 先會有折；網上版就係National Rail Enquiries 首頁到tick 你有railcard，但係買飛過程佢唔會問你張railcard number。申請railcard 無限國籍，大家係出發前記住申請定電子版，長遠計慳唔少。

電子Railcard

實體卡

車飛種類

講起車飛種類，火車係比巴士更加複雜，有三個category。首先，車飛係有分1st class 同standard class（未必寫明）。分完車飛就會分上車時間，分別有advance、anytime 同off-peak。最後就係single（單程，未必寫明）定return（回程）。

簡單啲講就係 [Class][上車時間][Single/return]。

1st class 頭等車多數係頭卡或者尾卡，有一道門隔開，入面有自動行李架同埋啲位會好坐啲，亦都會有包埋一份小食（多數係蛋糕仔）同聲一杯茶或咖啡。有啲路線嘅頭等可能比普通class 只係貴幾鎊，試下一次半次都無妨。我係機場搭火車返自己城市多數會搭1st class，原因係係機場嘅乘客全部都好多行李，如果唔夠人快，行李架滿曬就會麻煩，要放係門口位，一有人下個站上車就要搬走。坐完十幾個鐘飛機，都唔差在加少少錢坐1st class 唔駛同人逼得咁辛苦。

Advance、anytime 同off-peak 又點解呢？Advance 就係指限死時間嘅車飛，你買個班車就只可以搭嗰班，無得改無得refund。Anytime 就係只要係當日嘅同一終點班次都可以上（包括off-peak），even 係唔同公司operate 都可以上車。Off-peak 就係指非繁忙時段嘅班次，基本上就係weekday 16:00 至 18:30 以外嘅時間同埋weekend 全日。價錢方面係Anytime > Off-peak > Advanced。Off-peak 同Anytime 差唔多，只要係當日嘅off-peak 都可以即時上車，唔駛事先改。Anytime 同off-peak 都可以改日子（要補差價）同refund（要扣手續費）。Anytime 同off-peak 係book 飛時都可以留位，但係如果你臨時轉上另一班車就未必可以再留位。你間公司唔俾你再留過，你就只可以坐係無俾人預留嘅位置（每個坐位上面都有張紙寫明個位由邊個站留到邊個站）。

Single 同return 就係單程同回程。Return 有時會再細分做Day return（即日來回）同就咁Return。如果你張飛係Anytime return 而唔係Anytime day return，你其實係可以由原定book 車飛嘅日子五日內任何一班車使用，而回程就係由原定出發日子嘅一個calender month 內完成就得（呢一點未必個個知） — 呢樣叫做open return，off-peak return 同樣如果無寫明都係open return。

轉車

由於唔係每個幫城市之間都有火車直接連接，所以有時係要轉車。係你買車飛嘅時候，佪網站已經會寫明係邊一個站到轉。但係實際上要去邊個月台搭下一班車就要即日先知。如果你熟手就當然可以睇月台嘅電子告示版，但係穩陣起見大家都係用返個National rail app check 最實時嘅資料，事關有時轉車嘅月台可以係臨上車前一分鐘突然改，但係月台個告示牌又update 唔切。呢個時候就要靠個app 同聽月台上好大回音嘅廣播做人。轉車時間多數只有10 分鐘，而有時去另一個月台係要搭lift 甚至上落樓梯，所以大家要留意時間，同時間競賽。

實體火車飛（googel 圖片）

用左嘅飛會俾查飛員打孔或者畫花，然後俾返你

其他注意事項

一。英國嘅火車飛係海鮮價，你越遲買係越貴，到你上車前一日買比起一早買係可以貴兩三成，所以如果買左機票就唔好等啦，一次上網過買埋火車飛自己print 定先，到埗時就唔駛煩要拎車飛或電話又無上網之類。

二。有時兩張single 可以平過一張return，唔好問我點解，總之大家買飛車記住要格下價。

三。如果係機場出發，由於要預時間飛機delay 同埋行李帶嘔行李嘔得慢，再加上初黎報到嘅巴打人生路不熟，過海關又要排好耐隊同埋俾海關問，所以要預多啲時間係飛機落地到上火車。FYI 我自己拎BC 可以用英國e 道秒速過關我都會預最少個半至兩個鐘。如果大家第一次黎，其實我會建議買Anytime ticket，咁就唔怕趕到裙拉褲甩。

四。訂位建議有三：揀近行李架嘅坐位、唔好坐近廁所同揀唔坐倒頭車。坐位number 係47，車卡係B，你個車位就係B47。Book 左位就最好坐返自己位，但係如果架車無咩人就無人會理你。

五。車位有分table 同airline，airline 就係似飛機坐位咁，前面可以放張枱落黎。Table 就係兩張forward 位加兩個backward 倒頭車圍住張枱坐。如果多人嘅話table 會好坐啲，一個人就坐airline，唔駛同人面對面。

六。機場出左閘係火車站係有嘢食買。如果無時間買，車上都會有手推餐車賣零食，可以用cash 或者卡比錢。

七。英國嘅火車好多變數，例如成日delay 或臨時改月台。除左睇電話app、月台告示同廣播，有唔清楚都可以問月台嘅staff。如果你見到身邊其他等緊車乘客突然全部離開個月台，好可能就係改月台。聽唔明月台廣播同睇唔明告示版嘅就最好唔好怕柒即時問人，大家都好樂意解答同埋一齊屌英國火車垃圾。

八。所有火車飛/book 飛網/告示版上嘅時間係出車時間，唔係月台到站時間。火車會係個「時間」嘅幾分鐘前到月台，一夠鐘就準時出車，蘇州過後無艇搭。

九。如果係總站，有時架車到左又唔代表可以上車。因為架車有時要清潔，所以直到出車前十分鐘都可以唔俾你上，甚至你上左都會趕你落車。上得車嘅話，架車會有嘟嘟聲，同埋車門外嘅開門掣會著綠燈。英國嘅火車內外都有開門同關門掣，你唔禁佢係唔會開門俾你。

圖右下角

圖正中間，門嘅左邊

十。火車嘅車頭會寫明條路線嘅總站，告示版/app 就會寫埋係邊到停站。車上面都會有告示同廣播，例如總站係Manchester Airport，係就會話This is the train going to Manchester Airport, calling at XXX, YYY, ZZZ ... （唔同嘅站名）。每次埋站前都會有廣播提示。大家係車上就唔好咁專心玩電話唔記得落車。

十一。唔係所有火車都有Wifi，而火車會經過大量郊區，搭一程火車係有九成時間收唔到data 上網。建議大家搵定啲娛樂，例如睇書同down 定Netflix 嘅片。

十二。有啲月台係要用返你上車張飛出閘，唔好俾人係車上check 完張飛就扔左佢，要keep 到離開車站嗰刻。

IT_old_man 巴打（#372185）：

有一種情況一定唔會搭火車，就係要喺倫敦轉車。如果有行李會想死，一程coach 有位坐。另外，如果有大件行李坐火車又係中途站上，你的行李會冇位放。coach 有行李艙。

Coach 有 national express and maga bus（編按：megabus）. Coach 一定要早一日前網上買飛。平好多。只是輸入上下車站，人數，日期就可以。十四歲以下不能自己乘車。十六以下半價。同火車一樣出電子飛。千祈唔好買即場或車上飛，貴同隨時唔比你上。

講多啲coach。如果由London 東面啲埠仔去西面，比如去reading ，火車要係London 轉幾程地鐵，坐 coach 全部喺 Victoria 轉車，落車之後行過對面馬路等上車。但有時中間要等好耐，可以放低行李出去食嘢.行街，我試過去白金漢宮睇完再翻去搭車。

上車前要睇清楚邊個bay 有人查飛。

返回[其四]

[四。五] 內陸機

其實我自己搭內陸機都係搭過一兩次，所以其實都無咩嘢可以分享。

大家相信都聽過London Heathrow Airport （希思路）同埋Manchester Airport。但係英國除左呢兩個機場，重有好多細機場做廉航內陸航線。由於英國嘅火車出名貴，而唔係每個地方之間都有直線火車連接，好多時坐內陸機其實會重快同平過搭火車。例如以我所知Scotland 或者England 北部去Wales 南部e.g. Cardiff, Swansea 係要兜個大圈轉車（要往南搭到去London 再往西搭去Wales），坐火車閒閒地係要五六個鐘。如果搭內陸機就可以直線去到目的地，又快又慳錢。

依家因為武肺所以內陸機好似重未開返，但係到左Lockdown 完結，大家安排行程時不妨Google 下有無內陸機。

搭內陸機機票價錢雖然平，但係其實有唔少hidden cost，例如每件行李要逐件計錢，劃位又要加錢，機上飲食又要錢，大家要留意。順帶一提，由於內陸機係靠以上方式賺錢，行李重量係捉得好緊，多左0.1 kg 都要收你錢。有啲細機場嘅磅係要俾錢甚至無磅，所以出發之前執行李要磅好唔好過重。根據我個人經驗，香港嘅地勤（特別係CX）係比較鬆手，有時過左2-3 kg 都會俾你過，而係英國嘅國際機場地勤就唔係個個都咁鬆手，就算鬆都係鬆你1kg 到，太多就會叫你再pack 過個行李。

實際上嘅流程同搭國際航班一樣，一樣要過安檢之類，所以無謂浪費大家時間再解釋。

肥＿仔 巴打（#18477）：

under100g一個但係超好用

第日坐壞人air easyjet呢類嗰陣都會用到 （編按：壞人air 即係Ryanair，同easyjet 一樣係common 嘅廉航公司）

呢啲小型吊鎊Amazon 十鎊都唔駛，可以hand carry 上機，好使好用！

返回[其四]

[四。六] 單車及e-scooter

考慮因素

因為英國嘅公共交通比較貴，所以唔少人（包括我）都會以單車代步。但係並唔係每個城市都適合踩單車。英國踩單車最少有七成時間要係馬路，其餘三成係好彩有獨立嘅單車徑。一個城市啱唔啱踩單車有好多因素：

一。路面繁忙程度

繁忙嘅城市e.g. London 應該係Hardcore mode，只係比老手揸。馬路上有好多hazard，例如大車e.g.巴士同貨車、迴旋處等，無返咁上下路面經驗都唔好踩。

二。司機態度

我住過大大少少嘅城市，有啲高汁啲嘅城市比較cyclist-friendly，例如司機會讓單車過先。有啲差啲嘅城市直頭會俾大車貼到實。

三。有無單車徑

英國嘅所謂單車徑大部分都係係馬路靠行人路邊劃條細細嘅行車線俾你。好彩嘅先會有獨立嘅單車徑（多數都係穿過公園或者綠化帶）

四。Road condition

英國嘅路面大部分都爛到仆街，好多potholes。而好多渠冚都會係單車徑上面，條車軚幼嘅話（road bike etc.）重可能會攝入去，輕則炒車重則撞車。決定踩單車前最好就睇下你想踩嘅area 嘅路面狀況如果。

除此之外，英國唔少地方都好多上落斜，每日踩單車會好辛苦。如果你打算踩單車commute 要考慮埋你嘅體力。

五。冬天氣候（及路面情況）

英國唔少地方冬天都會落雪或者路面結冰。有時就算無落雪都會有所謂嘅Black ice，即係一層薄薄嘅冰（溶左雪再結冰）。因為太薄所以好難察覺，到你發現嘅時候就已經跣左車。有啲路段市政府會落grit 防止結冰，有啲就無落。所以其實一入左冬就要開始留意天氣報告，得返攝氏兩三度（特別係朝早未出太陽）就唔好踩單車啦。

新手上路tips

一。單車有分Hybrid bike, road bike 同mountain bike。雖然Road bike 係好型同好快，但係基於英國嘅Road condition 太差，其實我係建議買返hybrid 或者mountain bike（特別係唔係踩得太叻嘅）。

二。英國一入冬日照時間就會好短，可以下午三點就天黑。所以車頭車尾一定要有燈，最好著埋反光衣。

不過如果架車泊係公眾地方長時間，最後就拆走啲燈，因為有機會俾人偷（有啲人連sit 位同車轆都會拆埋）。

三。除左燈同反光衣，英國踩單車最好戴返個頭盔。頭盔個個都會戴，所以唔駛怕柒，同埋始終命仔要緊。冬天就要有埋手套，因為隻手真係會凍到痛，控制唔到㗎單車。

四。英國好多剪鎖偷單車，所以單車鎖一定唔可以慳。千祈唔好買啲圈圈鎖，嗰啲一剪就爛。要買就買呢種D-lock。

鎖單車都有學問，最少都要做到一個tick。

記住，所有賊都係取易不取難。

五。正式踩出街前首先要習慣有車係你身邊駛過嘅感覺，建議最好就係無咁繁忙嘅住宅區練習下，儲下路面經驗。

六。踩單車一樣要跟交通規則，轉彎打唔到燈就要靠手勢。

七。出發前請用Google map 睇定路線。我建議係Amazon 買定個Holder 放個電話係手柄，開住Google map 聲音加畫面導航。

BlauC 巴打（#247860）：

講一下交通方面既單車或 e-scooter，主要講倫敦：

- 因為唔需要考牌所以唔需要保險

- 踩行人路要小心差佬捉正會罰 £30

- 踩緊單車中其他 highway code 會扣分既會扣落日後英國車牌計分上

- 除左 zone2 內市中心或真係撞到正外，好少差佬會捉你行人路踩單車

- 大 L 把外賣佬係電動單車亂飛

- 當然無車牌所謂鳩泊逆線超速等等都係捉唔到既

- 嚴格黎講 e-scooter 係除私家路上係犯法既但對比以上唔會有人捉

- 所以唔係落雨落雪或大風，電動輔助既單車或 e-scooter 係倫敦無敵既

"A personally owned E scooter in the UK can be legally ridden only on private land with landowner permission. ... To use an E scooter on private land, you don't need to have a valid license or insurance as they're not legal for use on public roads."

另外，倫敦因為九成平地，只要天氣好踩單車好好踩，只要避開爛路 pinholes 就 ok，英國司機包括我同我朋友「勁驚」單車佬或 e-scooter 佬，當中用電摩打既呢啲車手成鳩日打橫係啲路邊衝出黎柒，我地剎唔切撞到佢我地揸車既輸 (法律仲有車身輸)、佢撞埋黎你部車都係你輸 (無法律責任但你部車花 / 笠晒要 claim 保險，輸) ，zone 1 2 都有碰瓷黨而電動單車同 e-scooter 夠晒快所以難就

如果要合法又去得遠或舒服咁就電動摺車，20 寸左右都夠，放心唔會有歐洲或英國野可以揀，得大陸摩打同電池可供選擇 (呢啲野真係大陸野玩晒) 二手平均要 300-450£ 一部

返回[其四]

[四。番外] 行路

英國人真係好撚鍾意行路，行半個鐘九個字都可以話好近啫，唔駛搭車啦 除左落雪太跣之外，就算係冬天定落雨都阻止唔到佢地

以前返學嗰陣，有啲人係會每日早一個鐘起身就係為左突登慢慢行去上堂，但係明明架巴士點對點十分鐘到就到 我真係睬佢都有味

返回[其四]

返回目錄

[其五] 垃圾分類

簡介

每個市政府（Council）都會有自己嘅rules，但係大致上垃圾分類係分三種：一般垃圾（Household waste）、回收垃圾（recycling）同園藝垃圾（garden waste）

House 嘅垃圾筒示意圖：

Apartment 嘅垃圾收集站示意圖：

住House 同住apartment 會有唔同。住House 嘅係自己有自己嘅三種垃圾筒，我自己個Council 就要自己同政府買，價錢都唔平，所以自己嘅垃圾筒要做返記認，例如用噴漆噴返House number 或者買防水label 痴，如果唔係會俾人偷或者俾隔離屋唔小心攞左。住apartment 嘅就多數有公家嘅垃圾筒。

住House 比住apartment 多樣嘢煩嘅就係每次垃圾車朝早黎收垃圾都要前一晚推個垃圾筒出去馬路邊。啲垃圾佬收完自後就會放返原位，等你自己收返個垃圾筒。收垃圾多數唔係一次過收曬三類，可以係每個禮拜只收一至兩樣。你個地址收垃圾嘅timetable 政府會寄俾你，亦都可以上返官網download，timetable 會出曬成年嘅日子，包括大時大節會點改。

Recycling

回收筒係點回收，同埋有啲咩係唔收，唔同Council 又會有唔同嘅方法。大致上回收嘅就有紙、塑膠、鋁罐同玻璃。有啲Council 係一個筒俾你放曬入去（mixed recycling），有啲要分開玻璃，有啲直頭全部都要分開。所以有啲城市係用幾個回收籃，唔係一個回收筒。有啲Council 會唔收某啲塑膠，詳情要自己上返Council 官網睇。有啲food container 例如pizza 盒因為污糟，所以都係唔回收要放入一般垃圾。有時放錯左，垃圾佬係會唔收你個筒，要你自己執返掂佢等佢下次收。例如發泡膠係我個城市係唔回收，要放入一般垃圾到。

Garden waste

Garden waste 就無咩特別，就係放剪完草嘅草呀，樹枝之類，有咩想知大家再問。注意石頭、泥土同種子唔好放入Garden waste，要當一般垃圾扔。

Household waste

Garden waste基本上放唔到入Recycling 同garden waste 嘅就可以放入一般household waste 垃圾桶。住House 嘅唔好諗住偷懶唔做分類，因為自己嘅垃圾筒未必夠你放咁多垃圾放到下次有人黎收。正如之前所講，政府唔係個個星期同你收垃圾，所以有時啲垃圾要放係個垃圾筒兩個星期，個袋一穿左就會臭到仆街。所以建議垃圾袋一係就買靚啲，一係就double bag。

食物殘渣同非廁紙嘅紙巾（包括盒裝、Tempo 嗰種嘅細包facial tissue、廚房紙）千祈唔好沖去屎坑。英國室內嘅渠係頂唔順，所以係一定會塞。我初初唔知道呢樣嘢，結果個屎坑幾個星期就塞左，啲屎水一沖廁就會係個浴缸倒灌湧出嚟，結果要請專人搞（唔係一般通渠佬，水電煤嘅嘢遲下會講）。

大型家居垃圾

大型嘅家居垃圾（例如換傢俬）就比較麻煩，一係就自己車或者抬去附近嘅垃圾站，一係就請人黎收。有啲會包人入屋清，有啲就係放個斗係你屋外，等你自己搬曬啲垃圾入去再車走。聽聞搵人請垃圾係幾貴，但係實際價錢就唔清楚，大家要自己上網搵下附近嘅公司報價。

斗示意圖：

返回目錄

[其六] 日常Small talk

小弟本身係香港已經係個唔多朋友嘅毒撚，黎到英國識英國人真係好痛苦。再加上我唔飲酒，結果就更加難識朋友。雖然依家其實都係得幾個英國friend，但係起碼同鬼佬溝通無再好似以前咁吃力。以下係我係咁多年同鬼佬溝通學到嘅小技巧：

一。鬼佬問You alright?/What's up?/How's it going?/How are you? 呢類其實並唔係真係問題黎，性質上其實只係打個招呼，同say hello 差唔多（瑞典人Pewdiepie 前幾日先有屌過呢樣嘢）。其實你唔需要真係詳細答佢，對方都唔expect 你同佢真係吐苦水。呢啲問題你只係需要mirror 返佢條問題就得e.g. Yeah, you alright?/Not bad, how are you? 之類。 如果係How's your day? ，就可以用一兩句概括，然後再mirror 返句How's your day就得（e.g. Yeah, not bad! I just went for a walk with my dog! How's your day?）。

二。如果過左打招呼個phase 都未開始搵到話題，下一步就係講天氣。英國天氣變幻莫測，上一秒有陽光，可以下一秒開始落雨甚至落冰雹，然後過五分鐘後就萬里無雲。所以講下當日嘅天氣就係最好嘅ice breaker。天氣好嘅就讚下個天，講下自己好想出去室外飲杯嘢唔想留係室內開工/番學。天氣差嘅就屌下British weather，講下天氣變得幾快。

三。如果英國人見你唔係本地人，通常就會問你where are you from? 你答左香港之後，自19 年反送中開始，佢地就好興問How's the protest 之類嘅問題。鬼佬多數因為怕敏感同offend 到你，所以唔會assume 你係撐送中定反送中。呢個時候就好睇場合同埋你認為個鬼佬有無興趣繼續傾呢個話題。如果對方係有興趣嘅通常都有啲cues，例如係後生仔嘅就會話我去過香港玩或者前排係BBC 睇到好多新聞，老人家嘅我自己見過話老竇去過香港當兵。呢啲情況我會特登少少dramatic 咁講「Yeah, we're fucked by the Chinese Communist」之類。對方聽到就通常會嚇一嚇，但係見你咁open 咁講，就會放低戒心同你講深入啲，同你一齊屌下中共（呢個係香港人大外宣嘅好機會）。但係如果對方係無興趣嘅，我就多數答佢「The protest has been pretty quiet recently, partly due to the government actions and partly due to COVID」，將個話題拉去武肺呢個大家都可以contribute 嘅話題到。

四。除左問How's Hong Kong，另一條熱門問題就係How long you have you been in the UK? 同埋你黎英國讀書定做嘢（或者你以前係香港做咩）。接住下一條問題就係 Why do you choose to come to XXX (e.g. Edinburgh)。基本上呢啲都係照直答就得，例如你鍾意附近個環境，你之前黎過旅行好鍾意個城市之類。

五。有時對方會出於禮貌或者真心咁讚你英文好。呢個時候除左講多謝，我多數會解釋埋香港由細就要學英文咁。有時有啲英國人就會開始話香港人嘅英文普遍好過中國人，然後又係一個大外宣好機會

基本上我係英國識人都係跟足以上formula。識落左之後有共同嘅經歷就會容易啲搵到共同話題同拿捏到合適嘅距離。香港人其實係small talk 上唔一定要做主動。啱啱開始嗰陣大可以俾英國人作為東道主lead 個話題，你跟住佢個flow 就得。其實英國人係同外國人打交道呢方面可能重驚青過你（都係怕offend 到你），所以大家真係唔駛怕，過到黎慢慢浸就會學識Currys PC World同人small talk。

如果對方發現你英文唔係咁好，其實多數都會講慢啲黎就你。如果你真係因為各種原因聽唔明（e.g. 對方太快或者口音太重），亦都可以坦白同佢講（e.g. I'm very bad at accents.）。口音本身都係一個small talk 嘅common theme，所以唔駛怕講完會dead air 之類嘅尷尬場面出現

返回目錄

[其七] 轉錢黎英國

當你成功係開左個英國account 之後，就可以係香港telegraphic transfer 去英國account。

你張英國銀行卡上面會有兩個number，一個叫sort code 一個叫bank number（Sort code 係類似英國間銀行嘅編碼）。你俾呢兩個code 再加其他個人資料俾香港銀行就得。

Bank number 同 Sort code 就好似寄信嘅收件人同地址咁，千祈唔可以錯。完成之後通常一個星期到就過到錢。

返回目錄

[其八] 買傢俬／傢俱／家電／家品

一手

一手傢俬要最平一定係IKEA，其次就係啲local 傢俬舖（Google 搵），第三就係啲傢俱城。呢啲傢俱城多數係城市嘅外圍（好似啲outlet 咁），由唔同俬舖group 埋一齊，俾你坐車／揸車去佢地嘅Showroom 到慢慢睇。呢啲傢俱城多數高檔啲，可能會貴過其他地方買。IKEA 唔係個個城市有，雖然你係可以上網訂，但係如果要睇Showroom 實物嘅就要自己揸車／坐車去，再自己車走或者Book 送貨。

白色家電嘅話，英國有間大型電器舖叫做 https://www.currys.co.uk/gbuk/index.html，基本上就好似豐澤同百老滙咁。

家品同家電嘅話，Argos 都係一個好選擇（https://www.argos.co.uk/）。Argos 其實係Sainsbury 間公司嘅，可以揀自取或者親身去拎。注意Argos 實體舖都係無現貨睇，只係有本catelog 同電腦俾你買嘢，佢再係倉拎出黎俾你。Argos 啲嘢雖然無問題，但係佢啲review 唔係太準確咁，有啲水位。我建議去返Amazon UK 睇下啲真實用家review 再做決定。

除左實體舖，Amazon UK（https://www.amazon.co.uk） 都有好多嘢買，小型電器嘅多數重平過去實體舖，無Amazon Prime 嘅多數買夠20 鎊就會免運費送到你門口。

有一間不得提嘅就係B&Q （https://www.diy.com/），基本上你入伙新屋室內外嘅裝修以及所有嘅維修工具同材料等都可以係B&Q 搞掂，價錢重要幾合理。我老竇去到B&Q 直頭好似小朋友去左玩具反斗城咁。如果你附近無B&Q，重可以試下去Wilko，簡單啲講就好似香港嘅日本城。

二手

如果想買二手嘢就主要有兩個方法。首先就係Local 嘅舖頭（Google 搵）或者Charity shop。Charity shop 係啲NGO （e.g. Oxfam, British Heart Foundation, Cancer Research UK etc.）義賣嘅地方，主要係賣二手衫同小型傢俱e.g. 餐具。我見過British Heart Foundation 專賣大型傢俬，可以搵下你自己住嗰頭有無（https://www.bhf.org.uk/search?tab=locations&servicetype=furniture-electrical-store）。

Charity shop

除左實體舖，大家重可以上網搵。除左Facebook market 之外，重有Gumtree （https://www.gumtree.com/） 呢個網。入左你自己嘅地址，就可以睇到你附近有咩嘢放緊。不過上網搵嘅話多數唔會送貨，要你自己揸車去收或者俾錢搵人送貨。

選擇月刊 Which.co.uk

初黎到英國，相信大家都未必熟識英國常見嘅電器牌子。我建議大家俾少少錢subscribe 網上版選擇月刊（https://www.which.co.uk/）。佢每種家電都會做曬research 然後話你知邊個牌子嘅邊個model 好，邊個千祈唔好買，同埋係邊到有得賣，重會幫你格埋價，可以慳返唔少錢。當你買曬你要買嘅嘢就可以unsubscribe 佢。

抽濕機？

英國就算落雨其實都好乾燥（特別係開左暖氣），所以你擔心皮膚太乾有濕疹好過。不過如果有需要嘅，英國都有得賣抽濕機嘅，Google dehumidifier 就得。

返回目錄

[其九] 有圖慎入！英國常見pest

首先，好消息係英國係無白蟻同埋基本上無甲由同蚊（我係英國七年都無見過，但係似乎原來南部暖啲嘅地方係有蚊）。壞消息係英國咁多草地同綠化帶，昆蟲自然多香港好撚多。係英國嘅屋好多時抽氣扇同燈掣係hardwire 埋一齊，無得唔開燈同時開抽氣扇。試過有一晚夏天沖完涼之後開著窗同埋燈／抽氣扇瞓，半夜去痾夜尿成個天花板都係一點點，成晚結果就真係捉蟲唔駛瞓。以下等我介紹英國幾種常見生物，以及佢地係咪有害同埋有無急切性去處理（係最低， 為滿分）。

以下開始多圖，頂唔順嘅就返連登睇post

嗰邊用左四重加密，可以安心睇

[上] [下]

蜘蛛

有害？：否

急切性：

雖然蜘蛛係好核特，但係英國室內嘅蜘蛛基本上都係無害，重幫你食唔少昆蟲，其實係益蟲黎。我係室內見過最大隻嘅都係一寸樓下嘅幼身蜘蛛，唔同澳洲嗰啲食人異型。係英國就要習慣同佢同共生，如果真係開始多啲，人道啲嘅就可以用手提吸塵機吸走去再係屋外放生。

Daddy-longlegs（Crane fly）

有害？：否

急切性：

英國同美國嘅daddy-longlegs 似乎唔同，美國指嘅係一種蜘蛛，英國指嘅係一種草蚊，一般係一寸幾咁上下大，外型似有翼嘅蜘蛛。因為佢一飛就好撚大聲，雖然佢唔係害蟲但係我真係好撚怕佢。Daddy-longlegs 多數係夏天嘅夜晚飛入你屋企，我每次都係搵火酒或者電蚊拍殺死佢。

黃蜂 Wasp

有害？：是

急切性：

同蜜蜂唔同，Wasp 係出曬名嘅asshole with wings。俾佢針到好多人會有過敏反應，成世人就要戴著枝腎上腺素針保命（用黎急救過敏反應）。如果飛左入屋就要快啲殺死佢，同埋如果發現屋企附近或者後花園有黃蜂巢，首先睇下你個市政府有無提供pest control service，如果無嘅就要自己出錢搵BPCA 認可嘅滅蟲公司，千祈唔好自己用津路水泡。如果個巢係蜜蜂honey bees 嘅就搵啲local beekeepers 處理。

衣魚／書蟲 Silverfish

有害？：是

急切性：

Silverfish 鍾意係啲潮濕陰暗嘅地方生存，例如浴室水渠。Silverfish BB 係黑色，銀白色嘅已經係成蟲。佢地有時會食你啲書嘅紙，但係本身嘅危害其實唔太大。不過如果你屋企有Silverfish，可能代表你間屋某啲位嘅濕氣好重，要注意下係咪有地方漏水。佢地爬得好撚快，要殺佢只可以搵嘢噴死佢。以前住大學宿舍一定有silverfish，次次搵宿舍滅完都會過一排再返出黎。所以建議如果發現Silverfish 自己又搞唔掂就要搵滅蟲公司搞啦。

老鼠

有害？：是

急切性：

咁多樣pest 之中，老鼠應該係最大嘅危害。除左會食你啲嘢食同傳播病菌，老鼠重會咬穿木櫃（無錯，係咬穿）同電線，釀成火災。如果你係住house，老鼠可以係室外爬入間屋入面，係地板下面同dry wall 入面穿梭同匿埋。如果發現老鼠就要盡快搵滅蟲公司處理。記住千祈唔好用老鼠藥（bait），因為如果佢係地板或者牆內先毒發身亡，啲屍臭味會好難搞。

更正：

滅蟲公司指出一般Mouse 係會中mouse trap，但係大隻啲嘅rat 係識得避開老鼠夾，所以老鼠藥係唯一方法。我最近屋企就係有rat，來源係啲rat 由屋外嘅sewer 爬入屋企嘅水渠。由於我屋企以前嘅屋主擴建過，所以啲渠改動過。但係啲鬼佬做嘢好乸西，舊有嘅渠拆左之後就無封返啲開口位，啲rat 就經啲窿由水渠入左屋，係啲地板底、牆身同埋地櫃入面周圍走。我唔清楚出面價錢如何，我搵間滅蟲公司收我fixed price 180 鎊用mouse trap + bait 滅鼠，不過一般三次就可以成功。我呢個case 食左老鼠藥之後好彩就會死係渠內俾水沖走，唔好彩就會死係地板底或者牆身。不過因為起地板好大工程，佢建議等條屍自己發臭腐爛，然後過兩個星期變做乾屍就會無味。

成功滅鼠之後就要防止新老鼠入屋。滅蟲公司有兩個方案，第一就係由我自己搵人或者自己封左個渠口（搵人做估計要過千鎊），第二就係係室渠同屋外sewer 嘅接駁口安裝個單向Valve （一個盛惠90 鎊），等屋內嘅污水可以流出，出面嘅老鼠爬唔到入屋。問題係比起封渠可以一勞永逸，單向Valve 就容易塞渠，而且要每半年check 一次。

蛞蝓 Slug

有害？：否（除非花園有種農作物）

急切性：

如果屋企有花園，有時會係石地到見到一行行反光嘅黏液，嗰啲係蛞蝓行過嘅痕跡。除非你有自己種農作物，蛞蝓基本上都無需要處理。

Woodlice

有害？：否

急切性：

屋企有花園嘅就一定會有呢啲半隻尾指甲咁大嘅woodlouse，重會耐唔耐就會爬一兩隻入屋。佢爬得好慢，所以搵張紙巾執起或者用吸塵機吸就得。因為佢地唔可以係乾燥嘅地方生存，所以好多時你係屋入面見到佢嗰陣已經係乾死左。雖然個名有個Wood 字，但係呢啲woodlice 只會食腐爛左嘅植物，對房屋用嘅木無害。不過同silverfish 一樣，如果你屋企有大量woodlice，可能代表你間屋某啲位嘅濕氣好重，要注意下係咪有地方漏水。

Woodworm

有害？：是

急切性：

雖然英國係無白蟻（termite），但係有自己嘅昆蟲會好似白蟻咁會食木頭。英國所指嘅woodworm 主要係指Common Furniture Beetle。有別於woodlice，woodworm 係會食傢俬甚至建築嘅木材，所以都幾大鑊。Woodworm 除左會經二手傢私入屋，重有機會係窗外飛入屋，所以都無得100% 避開。

Woodworm 嘅成蟲會係嘅木頭鑽好多牙籤洞咁大嘅洞生蛋。啲蛋變成幼蟲之後就會開始食啲木頭。Identify woodworm 蟲害有幾樣嘢要留意，第一就係直接見到成蟲，第二就係見到啲木頭上面有一個個洞。由於啲幼蟲要用年做單位黎成長，加上啲蟲只會係木頭入面唔會俾你見到，見到木頭有洞有可能係新嘅infestation，亦都可能係以前發生過但係已經滅過蟲（特別英國嘅house 唔少都過百年歷史）。第三個方法就係係啲洞上面留個mark（例如用marker 畫）或者影張相，然後過幾個月之後比對下，睇下有無新嘅洞出現。啲幼蟲會駐到啲木變做粉，所以如果見到啲木頭附近有新嘅sawdust 就好大機會係active 嘅蟲害。由於啲Woodworm 可能只會鑽你間屋嘅建築木材，而大家平時又未必會check 到牆身入面或者地板下面嘅木材，所以有時當你發現唔對路時可能已經好嚴重（例如啲木材承托能力下降，導致你係地板上面行會有彈性）。

如果confirm 左係有woodworm，咁就要拆曬所有嘅地板，然後再搵滅蟲公司處理曬全部嘅木造建材。所以大家係英國買樓時一定要搵Surveyor 驗樓，如果唔肯定嘅就要搵埋timber specialist 檢查，唔係入左伙先發現中招就仆得街。

木頭附近有sawdust

Marker 大法

Carpet beetle

成蟲

幼蟲

有害？：是

急切性：

英國家居大部分都有舖地墊。舖左地墊就有機會有Carpet beetle。Carpet beetle 嘅成蟲只係食花粉，但係幼蟲就會食地墊。我曾經都係屋企廁所見到一兩隻成蟲，大細只有一粒塵咁上下，重要都係黑色有啲毛咁。不過滅蟲公司就話五六月到搵到一兩隻成蟲係正常，只要啲地墊無俾啲幼蟲蛀到一個個窿就得。如果真係中左招，就只可以搵滅蟲公司搞。

Bed bug

有害？：是

急切性：

Bed bugs 係靠吸人血為生，所以一發現就要搵專人搞。佢地比較容易係shared house 或者學生宿舍等衛生相對較差嘅地方出現，但係你間屋再乾淨都有機會不幸中招。如果你發現以下幾個現象，你間屋好可能有bed bugs：

• 肉眼見到bed bugs
• Bed bug 脫嘅皮或者蟲卵 （肉眼可見）
• 係頸／膊頭／背脊或者四肢到有蟲咬
• 張床單／床褥下面／床架到有啲一點點啡紅色血漬。

除左搵滅蟲公司之外，重可以跟NHS 條link 入面嘅建議https://www.nhs.uk/conditions/bedbugs/ 同埋多啲保持家居清潔。

舞蹈擔當陳卓賢 巴打（#15794）：

話説4號滅蟲嚟整咗一轉，蟲量係少咗但每晚仲keep 住有比咬，之後每朝都有隻吸飽血嘅BB陳屍咗係我床頭#cry#dog

但尋晚咬嘅位又多咗，搞到我今晚又唔敢瞓要醒住捉床蝨

見到我成身疤痕真係好想死，勁核突好似生野咁，都唔知要幾耐先會好返，仲有我嘅心理創傷

Btw，我用呢隻殺床蝨，對準啲垃圾蟲一噴，過幾秘佢哋就收皮見住佢哋啲腳係到掙扎我先稍為平復到我嘅心情

gadgash2353 巴打（#225291）：

搵左滅蟲, 係少左但仲有

佢話個PROCESS要幾個星期

佢來噴化學品

佢話要等佢地出來咬你個時行過先有用

如果眼見到就打死左佢先

而家係間唔時見到啲好細粒吸咗血既係地下死左

大隻好似唔見，多數自己打

係多咗好多其他蚊仔死咗喺地下

天花牆身所有你見到見唔到都噴

係床面因為俾你瞓所以無噴

講返BED BUG

都係SHARE HOUSE

睇房同搬入來都CHECK過無野

係夜晚先走出來DLLM#arrr#cow

我入左來之後樓下房都有不過無咁勁

應該係我ACTIVE左班PK

樓下個南亞話滅蟲噴完之後自己再買左來噴

噴完離開兩個鐘就無LO WO, 我聽日都去買

租房果陣要返箱倒龍check

同睇下床面床底有冇血跡

另外我已經一開始由頭自己清潔左一次都無見有野

完全唔知邊度走出來

不過有就立即叫屋主找滅蟲

呢個係佢既責任

如果間屋係有合法登記既話

唔肯就立即CALL council

所以見到華人業主就自己小心啲

特別係FB POST個啲

Pest 處理方法

好多巴打好似我一樣都好怕昆蟲。英國係有電蚊拍賣（bug zapper），所以唔駛係香港帶過黎。除左電蚊拍，重可以自己買火酒（isopropyl alcohol）或者用番梘水入落個噴壺到噴死啲昆蟲。如果想人道啲嘅，可以用手提吸塵機吸走再放生。

市面上都有好多pest control product，但係英國係無老鼠膠賣（因為唔人道）。就連mouse trap 都有老鼠夾同活捉版俾你放生。如果自己搞唔掂，就最好上https://bpca.org.uk/ 搵返合資格嘅滅蟲公司處理。如果有pest 我無cover 到，BPCA 個網都有個A-Z of Pests 可以自己參考。

返回目錄

[其十] 租屋／買屋

[十。一] 租屋

租屋方面容許我Share 廚職背遊 梁芷靈BackpaCooking 以下嘅呢條片，因為條片講得好詳細，我諗唔到有咩可以補充。

移民英國｜英國租屋10個步驟 劍橋郡伊利一房一廳月租$5,800 教你睇樓小貼士 #籽想旅行​─果籽 香港 Apple Daily─原刊日期：20210121

Source 1: https://www.youtube.com/watch?v=TGBI5Md1zvY

Source 2: https://tw.appledaily.com/supplement/20210201/YQHBJ42SU5DTTJ6FNGD5666Q4A/

英國劍橋租房攻略 10個步驟搞定魔鬼細節

撰文、攝影：廚職背遊 梁芷靈

編輯：洪慧冰、鄒仲安

搬家是個艱鉅的任務，要在人生地不熟的英國租屋，建立安樂窩，挑戰更大！筆者現居英國，任職廚師及小吃攤老闆。適逢近日新居入住，帶大家參觀一下新舊單位、拆解每月開支，以及分享在英國租屋的10個步驟！

筆者的新居位於劍橋郡伊利(Ely)市中心，鄰近多間大型超級市場、露天市集，附近也有火車站、巴士站，交通方便。新居是獨立單位，面積425呎，一房一廳，間格實用。筆者和另一半兩個人住，地方寬敞。月租550英鎊（約新台幣21129元），每月水費20英鎊（約新台幣768元）、電費30英鎊（約新台幣1152元）、市政稅126英鎊（約新台幣4840元），全屋開支合共726英鎊（約新台幣27890元）。

根據筆者在英國多次的租屋經驗，歸納出以下10個步驟：

第一步：找屋

筆者喜歡上網找屋，最快最方便。推介3個英國租售網站：英國最大的Rightmove、第二大的Zoopla，以及主打商舖和寫字樓的OnTheMarket，它也有住宅房地產。用法很簡單，只須於網站輸入城市名、類型、租金預算、大小，選擇一覽無遺，也可以按進去查看相片及詳情。

第二步：預約看屋

有心儀單位之後，筆者便直接在網站內聯絡負責的租屋公司。因為經紀通常在幾天之內，致電跟你約好看屋時間和地點，所以有英國當地電話號碼十分重要。

第三步：看屋

看屋時，筆者會盡量檢查清楚屋內裝修、櫥櫃﹑電器有無損壞。萬一有任何問題，便要及早反映。免得日後退租，不是你損壞的東西，也向你追討。

第四步：所得審查

英國業主希望找到好租客，他們不止考慮你有沒有錢交租，還會考慮你之前3年的住址、有否養寵物、做什麼職業等。最初到英國時，很多租屋公司也要筆者提供英國所得證明，於是我決定先做一份最快聘請筆者的廚房雜工。租金一般不能超過收入的六成；簽約前，租屋公司委託一個獨立機構，檢視筆者的收入狀況，等一至兩星期就會知道結果。

第五步：簽約

為避免簽約後才發現原來有很魔鬼細節，筆者會預先向經紀索取一份租約副本，仔細閱讀，有任何不合理的地方，就提早詢問經紀。一般來說，押金是5個星期租金。筆者會特別留意合約裡的退還押金安排、扣減押金原因等。簽約當天，核對清楚合約和副本有無出入。

第六步：登記水電市政稅

筆者進入新單位的第一件事，是記錄水電錶的度數。萬一入住之後，使用了幾個星期的水和電才去抄度數，水電公司就會單憑預估向你收錢，有什麼出入則很難追討。凡在英國擁有物業，一律要繳交市政稅，以營運公共服務，例如圖書館、垃圾回收。收到區議會的信件後按指示登記，然後每月準時繳交市政稅就可以。

第七步：清潔舊屋

無論因為合約或公德心，搬走前，我們也應該清潔好家中每個角落，不要讓英國業主對香港人留下壞印象。

第八步：退還鑰匙

最後，把舊居大門鑰匙、信箱鑰匙全部歸還予地產公司或業主。

第九步：退還押金

歸還鑰匙後，租屋公司會派人驗收舊單位。如果一切正常，大約10個工作日之後，業主便退還押金給筆者。

第十步：搬家入住

大部份英國人也有車，搬家通常都親力親為。若想找搬家公司幫手，網上有很多選擇，即時報價。雖然筆者並沒有光顧搬家公司，但以筆者的搬運距離和物件數量，價錢大約150英鎊（約新台幣5762元），包貨車、搬運工人。如果要上下兩層樓，就另加50英鎊（約新台幣1921元）。

筆者身邊的英國朋友十分環保，不要的家庭用品都會先問鄰居會否收留。他們贈予我很多家具，例如微波爐、烤麵包機、廚具、桌椅等。筆者也在英國二手網站GumTree以25英鎊（約新台幣960元）購買冰箱，非常實用。筆者也入鄉隨俗，主動減少購物、物盡其用，不要因為移民或搬屋，為地球製造大量垃圾。

希望以上的租屋經驗，對大家有參考價值！祝各位好人事事平安﹑安居樂業！（香港《蘋果動新聞》提供）

バナナ 巴打（#44277）：

Ｑ：即係一定要有工作先可以租屋？就算我比一年租金都唔租比你？

Ａ：俾晒一年租就梗係租俾你 有價講添

利申我就係咁

Q: 其實俾定一年租金有冇風險？我擔心嘅係到時錢就畀咗, 但係唔畀鎖匙你, 或者中途趕你走

A: 唔會咁囉大陸咩你估

只要你係經正常agent搵樓

除非你去咩spareroom （編按：share room）嗰啲業主自己draft contract

又或者冇第三方hold deposit呢啲嘢

最大問題咪搬入去先知間屋有問題eg原來附近好雜，隔離有傻佬，漏水唔理你咁

[十。二] 買屋

Big_Ball暢泳 巴打（#155792）：

Ｑ1: 可唔可以講下help to buy 流程係點？

A1: 首先搵左你想買既地區有咩新development。你上rightmove 或者直接google Help To Buy/New Build，就有一大堆選擇。但有啲 Development 就唔做help to buy，有啲只係做Shared Ownership，所以你要望清楚。搵到合適你就可以係developer 個網登記想睇樓，佢地基本上一兩日就會打返比你再約時間，問下你想買咩樓型，用唔用help to buy 。

你去之前developer 就已經叫你搵佢地有合作既mortgage broker 計清楚你可以買到幾錢既樓。大致上會問你幾錢收入、有無負債、用咩計劃去買之類既問題。睇樓過日，developer 已經係mortgage broker 知道你可以買到幾錢既樓，以防你去運吉。

有啲development 仲未起好，所以去到可能係睇showroom。我過間就已經起好，但未有室內裝修，所以我帶住頭盔，工程鞋入去睇。

去到睇樓過日，個sale 會係個marketing office 介紹下個development，附近有啲咩，之後就比張價單你睇，寫哂有咩盤仲有得賣。之後就係睇樓。去到記得問埋管理費幾多錢一個月(有啲屋苑有私家GYM，禮賓服務幫你收amazon，個管理費就貴好多)、係唔係用central district heating system (啫係屋企無boiler，所以熱水都係由中央供應，之似就好似交水電費一樣計用量俾錢)、裝修包啲咩、可唔可加錢整衣櫃之類既野。

睇完你覺得ok，你就可以向個sale 出offer 。但記得呢到買樓係可以講價!!!記住同個sale 傾清楚價錢會包啲咩。以我為例，除左減價之外，仲包左律師厘印費，呢到都慳左GBP10,000，佢地叫呢啲係incentive。我知其他發展商就可以要求 free upgrade 間屋裝修options，但我呢間就無啦。

出左offer 之後，如果無其他人同你爭個單位，可以同你講，可以好多人一齊爭間屋，我就無爭唔到第一間，個sale 再帶我去睇第二間。developer accept 你個offer 你就可以返去簽acceptance letter 之後就開始mortgage application 同埋啲 legal 野。Mortgage Broker 就會打比你同你講Mortgage 既野。Help to buy 個application 都係developer 幫我交application，佢地入好哂資料，我只係望下有無錯，之後submit ，我就無搵自己律師，直接用developer 介紹過個就算，雖然我覺得唔太好，但developer 同mortgage broker 就follow up 得好好，所以到exchange contract 過一刻都好smooth。成個過程只係用左一個月多啲。

大致上就係咁。

坦白講20000鎊年薪，如果係倫敦應就買唔到。佢地最多借你年薪4.5倍。你200,000鎊既樓都過唔到佢地個 affordability test。當你買200K樓，Help to Buy London 政府借40%俾你，你都要問銀行借差唔多100K

返回目錄

[其十一] 家居保安

英國唔同城市嘅治安可以好唔同，even 同一個城市都有分好同唔好嘅area。英國嘅入屋爆竊其實比想像中常見，所以做好家居保安係好緊要。所有嘅賊都係取易不取難，如果做足家居保安，唔單止保障你嘅財物，重係保障埋你屋企人嘅安全。

家居保安將會係一個比較複雜嘅topic，亦都會好受唔同因素影響，包括你係租戶定屋主、住House 定住apartment、你嘅budget 同埋你對科技嘅熟悉程度。以下我將會分享我自己個人嘅經驗，但係唔代表係最好嘅選擇， 如果出咗咩事我都唔會負責。

現今嘅家居保安同智能家居息息相關，而Smart home 嘅牌子本身都五花八門同日新月異。當大家睇到我篇文嘅時候某啲product 可能已經過時，大家請自行做research 睇下最新嘅科技同product，我之後都會分享幾個我睇開嘅專介紹Smart Hhome 嘅Youtuber 俾大家參考。事先聲明，如果我分享嘅嘢包括任何牌子，我全部都冇sponsor。

以下我會將家居保安分成唔同部份，再將各部份分成唔同等級。大家可以視乎自己嘅能力選擇做到咩程度。

一。唔俾人知間屋無人

二。鎖好門窗

三。Surveillance

番外。Smart home 入門

返回目錄

[十一。一] 唔俾人知間屋無人

Level 1 打理好正門

家居保安嘅第一步就係打理好正門。

首先 ，同香港一樣，啲賊爆格實係嘗試搵無人嘅屋企黎爆。一間屋其實有唔少蛛絲馬跡可以透露俾人知間屋有無人，例如個信箱滿左、門口有parcel 放咗喺地下無人收、過咗垃圾回收日個垃圾桶重係街邊（只限House）、前門無人打理雜草叢生等。啲賊黎踩線嘅時候見到呢啲跡象，自然會揀呢間屋做對象。套用番破窗理論，當你黎到英國睇樓嘅時候，睇下你附近嘅住宅打理成點樣都可以對附近嘅治安略知一二。如果你係住House 而有養狗或者將來會養狗，係花園正門貼張內有惡犬嘅sticker 都會減低有賊入屋嘅機會。

打好鄰里關係都好緊要。如果你因為唔同原因要離開間屋一排，例如出國旅行，建議事先拜託定鄰居幫手收信／parcel 或者收垃圾筒。同鄰居打好關係都可以係佢地口中知道唔同情報。以我嘅鄰居為例 ，佢係呢一頭已經住咗幾十年。所以佢基本上都識曬全條街嘅住客同埋認得出邊啲生面口。佢直頭講得出條街對上一次有人爆格係幾多年前，亦都提醒左我附近有咩地方治安比較差。之前試過出門口一個星期但係唔記得鎖後花園門，都係靠佢地contact 我提我返去鎖門。

以上就係最基本表示間屋有人嘅方法，再進一步就要用空城計，用唔同設備扮間屋有人。

Level 2 Fake TV，收音機等

如果間屋成日長時間都無人，就要開始裝假狗扮間屋有人。除左開收音機，最基本嘅做法就係買部所謂嘅fake TV 放係睡房或者客廳。當你離開間屋嘅時候就開著佢同埋落窗簾，咁啲賊夜晚見到嘅時候就會以為間屋有人睇緊電視，唔會嘗試爆入黎。

Fake TV 呢個方法只係夜晚先有效，但係唔少家居爆竊係係朝早返工時間發生， 所以係有佢嘅限制。

Level 3 智能燈

如果大家對smart home 有認識又或者近年行過下大間嘅豐澤或者百老匯，都可能知道智能燈膽係smart home 最基本嘅一個範疇。Smart bulb 除咗可以用手機app 遙距開關，重可以set programme 自動開關，比起就咁一部假電視更加逼真。不過裝假狗始終都係裝假狗，假電視同smart bulb 都唔可以真正實際阻止個賊入屋。不過其實smart bulb 本身日常生活都好方便，價錢都開始平民化，大家黎到英國不妨研究下。

智能燈最大路嘅就係Philip Hue （特貴）同埋IKEA TRÅDFRI，Lidl 最近都開始有自己嘅智能家居，佢啲燈膽我覺得比得上Philips Hue 有餘。以上三個牌子都係行Zigbee （一種制式，本質上其實都係Wi-Fi，不過你當好似Bluetooth NFC 咁），要額外買一個hub 接駁你個router 先至可以用。如果嫌太複雜啲嘅可以選擇行一般2.4 Ghz Wi-Fi 嘅智能燈膽，咁就只要電話安個app 就得。但係大部分都係中國牌子e.g. 小米，用唔用得過就自行斟酌啦。

返回[其十一]

[十一。二] 鎖好門窗

首先我要講下英國爆格係有咩常用嘅方法：

一。爆窗：應該係最少人用嘅方法之一，因為爆玻璃太嘈，全條街都會聽到邊間屋畀人爆玻璃。

二。Lock snapping：即係夾爆個鎖頭。 有啲人裝個門鎖嘅時候把鎖唔啱size 而突左個頭出黎。如果把鎖唔係anti-snap lock 嘅就好容易會俾人搵野夾爆。就算你個鎖頭冇突出個門嘅厚度，由於英國大部分都係用膠門（upvc door）有啲賊會癲到用枝blowtorch 燒融你道門去expose 個鎖頭。

三。Letterbox fishing：好多人會將自己屋企條鎖匙掛係個門框度或者放係道門附近。好多英國嘅住宅道門係有個信箱位，有時啲賊就會伸個衣架之類入去勾條門匙出嚟。

Level 1

首先裝返條door chain 係基本，呢啲可以自己去B&Q 買料自己裝。重有就係唔好大頭蝦插住條鎖匙係大門就入左門關門，漏左條匙係門口個鎖到。

如果你係買樓嘅話，第一件事一定係要搵個開鎖佬幫你換鎖。除左正門之外，側門同後花園嘅鎖都要換，因為你唔知道上一手業主或者地產經紀有無keep 起你嘅鎖匙。除左係Google 搵，大家重可以去呢個網https://www.locksmiths.co.uk/ 搵合資格嘅開鎖佬，佢地會提供唔同價位同埋唔同安全程度嘅鎖。

Level 2

建議換鎖嗰陣唔好慳錢，買啲高規格嘅anti-snap 門鎖。夾鎖唔駛好技術，啲賊幾十秒就可以無聲無息咁夾爆你個鎖入屋，但係anti-snap 門鎖如果detect 到有賊嘗試夾爆佢，佢會啟動佢個mechanism 去逼死你度門，個賊要開把鎖就要搵電批鑽爛個鎖，到時唔單止要花幾倍時間重會有好大噪音，一般賊都會知難而退。以下係anti-snap locks 嘅示範：

https://www.youtube.com/watch?v=nYh371UjbEM

有啲牌子嘅鎖匙重會專業到有申請專利嘅鎖匙，唔可以拎住啲鎖匙週街搵人配，要個鎖嘅登記用家直接同公司訂造再寄俾你。anti-snap locks 嘅詳情（包括牌子）可以係呢條link 搵到。https://www.locksmiths.co.uk/faq/lock-snapping/#anti-snap

英國嘅upvc 窗全部都有鎖。不過因為出面係無得用鎖匙開，所以其實都唔駛換。順帶一提，窗嘅鎖只要係同一間公司做嘅就係同一款鎖匙，所以如果上一手留俾你嘅鎖匙太殘舊或者唔夠用，你拎住條舊鎖匙去啲連鎖配匙地方e.g. Timpson 就可以配到spare 鎖匙。

要防止letterbox fishing， 可以喺信箱個位裝個guard （letter plate）增加fishing 難度， 同埋唔好放條大門鎖匙係門框位。

Level 3

如果你住嘅地區真係好唔安全， 可以安裝一啲趟得郁嘅窗花（security grills）係啲窗同落地玻璃嘅後花園門。自己住嗰頭治安唔錯，就真係未見過住宅裝，不過商舖就見過唔少。

後花園門都可以裝呢啲patlock 防止人係後花園爆門。

有啲smart home product 例如Alexa Guard 可以detect 你間屋有爆玻璃嘅聲，然後會通知你可能有賊入屋。不過我自己就無用過，因為直到目前Amazon 唔知點解都唔係英國開放呢個功能。

有啲智能鎖可以遙距鎖門或者開門，可以係你離開間屋之後提你鎖門甚至自動幫你鎖返。不過smart lock 亦都有俾人hack 嘅風險，所以要自行斟酌。

返回[其十一]

[十一。三] Surveillance

如果大家係一支公黎到英國，間屋少不免會有無人看住嘅時候，結果就好容易成為啲賊嘅目標。就算係成個家庭搬過黎，都可能因為大家要返工返學或者去旅行而令到間屋出現真空。所以有一套監控系統都幾緊要，可以俾你遙距掌握間屋嘅狀況。

以前係間屋有保安系統係有錢人嘅玩意，但係自從smart home 開始平民化，一般人都可以自己set up 一套系統，又平又好過出面搵公司做。事關出面啲公司好多都係收月費，正所謂小數怕長計，更何況嗰筆月費應該都唔係小數。不過自己set up 要除咗要有啲基本嘅維修同電腦知識，有啲嘢重要請專業嘅電工搞。加上有啲device 買返黎只有基本嘅function，要啲advanced 嘅功能（例如cloud storage 啲鏡頭錄影）可能都要俾返少少月費，所以大家買件product 前要做足功課，諗清楚有無啲咩hidden cost 同自己係咪真係有需要。大家可以視乎你嘅需要買唔同嘅設備或者加錢subscribe 付費plan。

以下提到嘅smart home product 出名啲牌子有Amazon 嘅Ring 同Blink（兩個都要月費先有錄影功能，自己用緊覺得一般），Google 嘅nest （唔知駛唔駛月費）同 eufy（好似買左個local storage 就可以揀唔駛月費）。

Level 1

如果大家初初嚟到英國有啲手頭緊，但係住緊嗰頭治安又唔太好，咁就可以用以下兩個方法頂住先。

第一個方法就係用所謂嘅dummy camera，其實都係裝假狗嘅一種。大家只需要上網買呢啲假嘅CCTV 返黎安係室外嘅牆或者放係地下向街嘅窗台就得。啲賊都係取易不取難，唔會真係同你慢慢check 個camera 係堅定流。

第二個方法就係買啲平平哋嘅室內真camera。依家基本上四五百蚊港紙內就已經可以買到一個，但係就未必包錄影功能，只係俾你最基本咁用部電話隨時開個camera嚟睇，要額外嘅錄影功能就可能要加錢俾月費。不過反正dummy camera 都要一舊錢，不如加少少錢買個真嘅室內camera 影住條街。

順帶一提，如果係住house 嘅話正門出面嘅燈最好要有個motion sensor （PIR sensor），夜晚有人行過就會著燈。除咗平時返屋企可以照明，重可以俾你知道間屋出面有野行過，不過唔一定係人，可能有時係貓狗甚至狐狸（英國唔少地方有野生狐狸，size 可以大過隻狗，不過其實佢驚你多過你驚佢）。

Level 2

如果大家間屋係自己買嘅，咁就可以考慮下裝啲室外嘅camera 同埋video doorbell。基本上市面上嘅camera 都有night vision 同埋motion sensor，只要係正門或者後花園有人行過就會send notification 去你部電話。有啲室外嘅camera 係連埋floodlight，可以提供額外照明同埋嚇走啲賊。不過室外嘅cam 唔少都要拉電線，如果大家唔識嘅就請搵返專業嘅electrician 搞，唔係電死就無命賠。如果大家係住apartment，咁就要check 清楚安video doorbell 係咪合法，因為會影到公眾地方或者係對面屋，我唔太清楚相關嘅條例。有啲video doorbell 係用電池安裝係道門上，可以係你搬屋嘅時候隨時拆走，唔駛俾個landlord 屌。

呢啲video doorbell 會包埋mic 同speaker 可以俾你經電話或者voice assistant（e.g. Alexa 同Google home）同門外嘅人對話。Video doorbell 一大功用就係當你有parcel 但係個人唔係屋企嗰陣，你可以拜託佢放係安全嘅地方（e.g. 自己屋企回收筒內）或者交俾你鄰居代收，唔駛怕delivery 條友收返個parcel 或者俾人偷parcel。

除左室外嘅alarm 連motion sensor，大家重可以係門窗安裝一個細細嘅door sensor，只要一有人打開到門就會send notifications 提示你。不過如果個賊係爆玻璃入屋嘅就當然唔會detect 到。

Level 3

有啲公司嘅product 會有埋burglar alarm system。如果個system detect 到間屋係無人嘅情況下有人開門或者開窗，啲門窗嘅door sensor 就會activate 個alarm system。如果入屋嘅人過左一段時間都唔deactivate 返（用密碼或者key fobs），個系統就會響起警鐘、send message 提示住戶甚至幫你打999 報警。呢類system 以前要或啲保安公司（e.g. ADT）先有，不過依家自己都可以裝得到。不過如果大家唔係咁熟電子嘢又俾得起錢嘅，其實都可以俾錢人做。

返回[其十一]

[十一。番外] Smart home 入門

以下有三個Level 嘅smart home resource 俾大家參考。大家想買某種product 例如CCTV 可以先係佢地嘅youtube 到搵下有無相關嘅片，佢地九成有出片比較唔同牌子邊隻好用。

Level 1：初階

Smart home solver

https://youtube.com/c/SmartHomeSolver

呢個Youtuber 主力介紹基本同大路嘅smart home product，例如Philips hue 智能燈、Alexa 同Google Home 等voice assistant 同埋Smartthings hub 等。佢亦都有拍好多片推介啲smart home ideas （e.g. LED light strips）俾啲新手可以跟住入手。但係因為佢係美國人，所以有啲片係唔適用係英國，例如有啲佢介紹嘅牌子英國未必有，敬請留意。

Level 2：進階

https://youtube.com/c/PaulHibbert

呢個英國Youtuber 主力介紹進階嘅smart home product 或者set up。佢介紹嘅product 功能或者性價比會俾Smart Home Solver 嘅好，但係就未必有咁方便或者易用。佢亦都出名在call out 好多smart home industry 嘅黑幕或者毒瘤（例如Philips hue，Amazon，IFTTT etc.）。雖然佢有唔少sponsors，但係佢介紹sponsored product 嘅時候都係俾honest reviews。大家基本上跟住佢啲片就已經可以有套好完善嘅smart home。缺點係佢有介紹過ezviz 嘅CCTV（海康威視Hikvision 嘅brand，同新疆集中營有關），不過我認為不知者不罪，亦都唔應該將香港人嘅黃藍標準套落人身上。加上其實有好多大路嘅smart home product 例如Tuya 同eufy 都係中國公司，所以所有smart home youtuber 都一定推介過，而smart home user 難免都會有一兩件佢地嘅product，大家只可以盡量避開（Tuya 成日賣佢地啲硬件俾其他外國公司裝佢地自己寫嘅firmware 黎賣）。

Level 3：專業

The Hook Up

https://youtube.com/c/TheHookUp

DrZzs

https://youtube.com/c/DrZzs

目前市面上大部分嘅smart home product 都係Cloud based，而所有上得網嘅嘢其實都有安全隱患。呢兩位Youtuber 嘅特色就係介紹目前最安全但係最難用嘅open source smart home hub - home assistant。Home assistant 可以locally 整合同控制你所有嘅smart home product，安全性可以話係最高。不過home assistant 牽涉大量嘅coding 同電腦知識，要上手比較難，不過實用性同安全性絕對係10/10。除左home assistant，佢地重會係硬件同軟件上改裝啲smart home product（特別係Tuya），去除佢地嘅網上功能黎安心使用。不過呢啲係要出動埋辣雞，一般用家唔會玩得掂。

返回[其十一]

返回目錄

[其十二。雜談] 深夜隨筆

相信大家黎得呢個post 都係有嘢想知或者想問，對我個人嘅生活唔會有興趣。我自己都掙扎左好唔好打呢篇嘢，亦都唔想將呢個post 變左個人嘅樹窿。不過考慮到除左我之外可能會有其他巴打未來會有類似嘅情況（當然我衷心希望大家唔會咁），所以最後決定打呢篇嘢出黎，亦嘗試用一個對大家都有啲幫助嘅方式去表達。

孤單係英國生活係一個好嚴重嘅問題。係英國，有五十萬嘅老人家經常連續一個星期無同過任何人接同交流。事關英國人唔少仔女大個左之後就會離開屋企去其他城市搵食，而英國地方咁大，交通嘅時間同金錢都令好多人好少去探自己父母。香港人移民過黎英國，面對一個陌生嘅環境，未必有親戚同朋友同樣係英國定居，英文能力又未必足以係英國識local 朋友，Loneliness 嘅問題會比local 更加嚴重。

我過左黎英國就黎十年，去過大大小小嘅城市居住。我曾經識過唔少嘅朋友，但係都隨住每次自己或者朋友搬屋或者回流香港而同佢地失去聯絡。驀然回首，最後都係得返自己一個人對住四道牆。

好多人問過我：你有無思鄉、又或者點解決思鄉？坦白講，我真係無咩經歷過好嚴重嘅思鄉病。唯一一次嘅真正「思鄉」就係去左一個窮鄉僻壤住左幾個月，搵到成個城唯一一間中餐館嗰陣。好記得間餐館嘅老細已經移民左過黎幾十年，係嗰個城市本身無咩華人，見到我呢個生面口就好熱情咁招呼我。我記得我叫左碟燒味飯，老細上菜時順手送多左碟菜俾我，再打開speaker 播起許冠傑嘅《鐵塔凌雲》，成間好幽暗殘舊嘅中餐館就得返我、老細同佢老婆三個人坐係到數香港政府嘅不是。

https://youtu.be/uVNmwzy8eVk

《鐵塔凌雲》 許冠傑

作詞：許冠文、鄧偉雄、許冠傑   作曲：許冠傑

鐵塔凌雲 望不見歡欣人面

富士聳峙 聽不見遊人歡笑

自由神像 在遠方迷霧

山長水遠 未入其懷抱

檀島灘岸 點點磷光

豈能及漁燈在彼邦

俯首低問 何時何方何模樣

回音輕傳 此時此處此模樣

何須多見復多求 且唱一曲歸途上

此時此處此模樣 此模樣

檀島灘岸 點點磷光

豈能及漁燈在彼邦

俯首低問 何時何方何模樣

回音輕傳 此時此處此模樣

何須多見復多求 且唱一曲歸途上

此時此處此模樣

此模樣

雖然我係香港土生土長，但係除左嗰次之外我自己真係無掛念過「香港」呢個城市。我留戀嘅就只有身處香港嘅屋企人、女朋友、朋友同埋嘢食。我個人認為「香港」嘅核心價值係「香港人」同「香港文化」，地理上嘅位置只係一個虛名。係2014 年嘅社運期間，我係宿舍到睇住唔同嘅直播，除左心痛香港人受到嘅對待同埋憎恨如此對待香港人嘅政權、重有就係對香港未來變好嘅渴望。不過到左2019 年，同樣身處英國嘅我，再次望住香港九個台同時直播，心痛同憎恨更加強烈，不過就加上左對自己無得參與其中嘅自責以及對「香港」嘅死心。

相信唔少依家想移民嘅巴打都有諗過自己係咪「食緊人血饅頭」同埋「做逃兵、當義士係condom」。對於呢兩條問題，坦白講我自己都無答案。不過我可以同大家講，「香港人」先係「香港」嘅核心價值。雖然身處國外嘅我為香港可以做嘅嘢係有限，但係開呢個post 分享自己嘅經驗係我自己能力內可以做到嘅事，希望可以幫助各位因為各種原因而離開香港嘅人，以及為我係2019 至20 年嘅無能為力贖罪。

我自己個人對「香港」嘅呢一個地方已經死左心，所以老實講我真係講唔出「我真係好撚鍾意香港」。係2019 年之前我都重有諗過下回流返香港賺幾年錢，等香港形勢再唔對路再返黎英國。當時我錯失左回流返香港嘅機會，但係依家諗返轉頭都係塞翁失馬，焉知非福。香港依家嘅景況對我黎講亦都已經係萬劫不復，所以我都已經打算非必要都唔會返香港。不過我永遠都會係一個「香港人」，同鬼佬介紹自己嗰陣都係話自己係Hongkonger。當然，移民去一個國家就要融入當地嘅生活，但係咁唔代表你唔可以同時保留「香港人」嘅身份。每個人本身就係一個獨特嘅個體，只有中共呢個法西斯政權先鍾意抹殺個人特色，盲目追求統一。連登嗰啲咩「出到外國重去食中餐係賤種華人DNA」只係啲未見過世面嘅小朋友鳩噏，大家唔駛理會。當然移民本身係人生一個好大嘅決定，我自己嘅人生閱歷都比呢到嘅巴打少（例如有好多問題我都唔識答，要靠其他巴打補充同代答），不過我強烈建議大家唔好比移民嚇怕，其實出面嘅世界真係好大。

講返我自己最近嘅狀況，我自從五年前到情緒就開始有問題，但係因為畏疾忌醫同埋個人原因難以access healthcare 而一路拖到依家，直到最近因為太過孤單同埋生活上嘅唔如意而終於爆煲。我曾經有諗過如果我一早就去面對自己嘅情緒會唔會有所改變，唔駛落到如斯田地。坦白講，我依家嘅情緒都重係好差，亦都經常想自殺，不過有各種理由同責任令我就算keep 唔到calm 都要carry on。不過我已經開始安排緊治療，希望可以係短期內開始療程。係香港呢個咁壓抑嘅城市，香港人對mental health 嘅awareness 非常低，亦都對自己嘅情緒好避忌，會主動收起自己嘅情緒。希望大家唔好學我，要係需要嘅時候宣洩自己嘅情緒，亦都要係適當嘅時候求醫。

最後為大家同為自己點一首我好鍾意嘅歌，就係麥俊龍嘅《彳亍》。

https://youtu.be/wXeE2v9LcVc

《彳亍》 麥俊龍

作詞：周耀輝   作曲：馮穎琪

風和風之間隔了風波 無數風波

如你信我 換過絲的衣著行入每顆心臟

天和天之間隔了天荒 地老天荒

踏出啞的感覺 行入幾多個軀殼

若你說東風破甚麼 西天降甚麼

只想一覺瞓天光

若你說已到了天堂 太快樂

神遇到 佛碰到 但我希望碰到我

很想抱月光 很想鑽漩渦

可否跟我沿著甚麼邊走邊看藏著甚麼

方知一切故事在遊蕩

很想到無邊搜索 然後與歲月摔角

為了知生存過不生存過

很想在桂花飄下時 去過 看過

山和海之間永遠蒼蒼 雲雨蒼蒼

如你信我 望向瘋的孔雀行入赤色的浪

身和心之間永遠剛剛 眉眼剛剛

認識新的乾涸 行入浮泥仍在喝

很想唱驪歌 很想探洪荒

可否跟我沿著甚麼邊走邊看藏著甚麼

方知一切故事在遊蕩

很想到無邊搜索 然後與歲月摔角

善惡多 生命更多 味更多 道更多 路更多

經書向前翻 薪火向上燒

初生的我緩慢站起彳亍走向十方

在我的無邊搜索 然後與歲月摔角

為了知生存過不生存過 很想在雨點崩裂時 去過 聽過 華麗與沮喪

Update:

多謝咁多位嘅支持，連登有愛

由於太多支持我嘅comment，容許我集中一次過多謝大家

我自中學開始已經比人叫做陰森大毒撚，本身其實都唔多朋友。自己自問都算係個悶得下嘅人，只要有上網有機打、有連登有reddit 就可以過一日。但係原來人類生存係唔可以無social interaction，同埋當你情緒差到一個點，你真係會對你嘅興趣失去興趣。我玩Apex Legends 已經玩左1500 個鐘，可見我有幾鍾意玩佢，但係最近我連開電腦都無動力開。

運動方面，我自己就鍾意打羽毛球同踩單車，可惜英國唔興打羽毛球，所以我套架生黎到英國都無再開過。單車嘅話我除左代步之外有時都會踩下嘅。大家黎到英國記住睇下邊到有得繼續你嘅興趣，英國好多唔同嘅gym，有啲富貴gym 例如David Lloyd 連網球場、羽毛球場同泳池都有。

多謝有巴打邀請我約出黎，但容許我拒絕呢個offer。一黎我本身嘅social battery 已經唔大，二黎我依家嘅情況連出街都無咩動力，三黎我上網嘅宗旨就係盡量將網上生活同現實生活分開，呢一點係我自高登開始已經有嘅習慣。我自己都見識過相熟嘅人無辜被捲入其他網友嘅情事，結果俾人排擠。呢個都係其中一個原因我無開個tg group —— 我連自己都搞唔掂，點handle 人地嘅是非。如果有其他巴打想開我絕對無任歡迎，我都應該會以參與者嘅身份加入，不過重心仍然會放返係呢個post。

我住緊嗰頭有好多流浪貓/放養貓，佢地唔知點解好鍾意係我屋企後花園打躉。有一隻已經同我做左好朋友，重會耐唔耐入我間屋玩。所以我每日見貓嘅時間重多過見人類

最後有樣嘢想請求大家，就係如果我打啲文篇幅好長，請唔好quote 我篇文，唔係會變左金剛棒 大家可以就咁留comment，我每個comment 都會睇，所以應該唔會覆漏左

返回目錄

[其十三] 搵工相關問題

ukengineer 巴打（#282897）：

Q1: 香港多唔多人上linkedin?

A1: 我做civil engine, 係 linkedin 有好多唔同recruitment agencies d 人係linkedin有 accounts/profiles, 佢地好主動聯絡做civil engine ge 人, 講乜野公司/地方(有 d agents唔出公司名, 只講大約位置)有空缺, 問人想唔轉工...有好多recruitment agencies轉做土木依行. 我個你個行都差唔多.

Q2.1: BNO Visa 搵工

A2.1: 你同 agents 講, 你會申請bno visa, 唔洗employers幫你申請 work permit / tier 2 work visa. 最好 send 條 link 聯結去 gov.uk ge webpage, 講 bno visa 有乜rights.

我無乜係香港打過似樣ge工, 十年前一樣有香港同澳洲agents問我想唔想去依兩個地方. 有機會做到生意, 佢地一定試. 一個agent唔理你, 可以搵第二個. 追唔到一個女仔, 你都唔會以後唔追另一個女仔, 一世單身.

如果你係香港, 要自己主動搵下英國agents.

Q2.2: 想問下，我喺香港搵到英國有公司肯請我，仲肯sponsor work visa。我有問過有冇可能佢地俾錢我申請BNO visa，但佢地好似唔係好熟，所以唔想。除左冇咁易轉工，俾公司幫我申請tier 2仲有冇咩壞處？

A2.2: 當然用BNO Visa, 因為你可以自由轉工.

Work visa / permit 係跟係employment. 轉工係要申請一個新visa.

Q3: Housing issue

A3: 漏咗樣嘢冇講 我以前間舊公司 位於一個小鎮 如果有新人入嚟我哋公司 個hr女仔 會send email畀所有同事 問我哋有冇一間房空出嚟可以租畀新人 咁樣會解決到住嘅問題

另外 英國公司畀offer你之後 你可以叫hr幫你問下 點樣喺公司附近嘅地方租地方住

我舊公司嘅hr 同鎮上面一間地產經紀好熟 有啲新人嚟到我哋公司 人事部啲人會叫地產經紀幫手搵下屋

有公司幫你搭路去搵地產經紀 經紀會同個業主講 你有 固定職業 你乜頭乜路 見工嘅時候 僱主已經望嗰一次

Q4: 係咪可以做學徒咁學做電工

A4: 你可以考慮email問下: nationalhelpdesk@apprenticeships.gov.uk

https://www.apprenticeships.gov.uk/apprentices

Q5: 想問吓做地盤有冇得跟華人做？

好似香港啲巴基斯坦人咁 成班拍住上

因為英文廢

另外想問之前啲東歐人唔識英文咁點考啲工人牌？

上網睇cscs 考工種果啲牌都唔平

萬分感激

A5: 其實過到去做咩都得 只要夠食住就得

有諗過Amazon 農場 肉廠 如果肯請

以前十幾年前都去下地盤, 真係無乜華人樣做工人, 可能英文問題.

如果你因為英文唔好, 唔明安全指示引至出意外, 承建商要停工, 又會被罰好多錢.

你可以係英國一邊做其他工先, 學好英文先.

https://www.building.co.uk/news/the-bigger-picture-how-eastern-european-workers/3036919.article

Of course, the unions' concerns go deeper than just the issue of pay. The construction industry is already killing about 80 people in accidents every year, and the unions believe that the problem will only be exacerbated by the arrival of non-English speaking foreign workers.

At another leading construction firm, the operations director says that employing foreign workers is more problematic than it's worth. "Employers first of all have to go through the procedures of ensuring the workers are legitimate, then they have to make sure they have the right skills and training. But then you have to worry about their English skills and welfare before you can even begin to worry about their competence," he says.

賜座男 巴打（#158317）：

Q6: Apprenticeship要住夠3年?

A6: 講得Appreticeship通常都government funded

Trainee就唔計

gov.uk網址

https://www.gov.uk/guidance/apprenticeship-funding-rules-for-employers/annex-a-eligibility-criteria-who-we-fund

夕樹中子 巴打（#284932）：

Q7: 電工入行途徑 + 人工

A7: Youtube 片by Cheung Stephen:

https://www.youtube.com/watch?v=CTbDmVzQKGM

BNO英國搵工 👷🏻‍♂️⚡️ 電工 Electrician  入行途徑 + 人工$$

仲有呢個網頁講 brief outlines, 教人點樣在英國入行做電工

https://electricalqualifications.com/

うちはマダラ 巴打（#15828）&
被誘捕的怜 巴打（#38071）：

Q8: 無National Insurance Number (NI) 可唔可以做嘢？

A8: You can start work without a National Insurance number if you can prove you have the right to work in the UK.

汁：

https://www.gov.uk/apply-national-insurance-number

https://www.gov.uk/prove-right-to-work

o34t0v 巴打（#34787）：

其他搵緊工嘅巴絲都可以留意下所屬council嘅adult learning centre, 有時有d免費cv / interview practice workshop, 個人上完覺得幾幫到手，執左cv同cover letter後真係interview機會都多左，仲要搵返本身香港做緊個行

返回目錄

[其十四] 衣食住等唔同品牌一覽

一。衣

二。食

三。超市

四。住

五。個人護理

六。銀行

七。其他

返回目錄

一。衣

返回[其十四]

二。食

返回[其十四]

三。超市

返回[其十四]

四。住

（詳見 [其八] 買傢俬／傢俱／家電／家品）

返回[其十四]

五。個人護理

返回[其十四]

六。銀行

返回[其十四]

七。其他

返回[其十四]

返回目錄

[其十五] XXX 城市好唔好住？

其實「環境好唔好」呢個問題係好因人而異。我自己唔鍾意大城市，同埋治安同寧靜係我嘅 priority，所以我會覺得Manchester, London, Birmingham 呢啲城唔好住。好多香港人會prioritise 工作機會／仔女讀書／環境同香港似，咁佢地會覺得大城市先係「環境好」。Even 「工作機會」對唔同人嘅定義都有唔同。有啲人係想搵藍領工廠類工作，咁某啲工業城市會比較啱佢。有啲人想搵白領office 工，咁可能London Manchester 呢啲咪啱佢。有啲人想搵醫療類工作，咁可能其他比較缺人手嘅細城市會多啲工作機會。

所以其實初初落腳嘅時候多數人都建議你租住樓先，再慢慢去唔同城市實地考察，感受下邊到嘅風土人情最啱你。英國地方好大，你唔鍾意一個城市可以隨時搬走，無人限死你一落地就要係同一個地方生根。大量英國人直頭會係A 城市返工，然後就住係B 城市，每日揸一個鐘車來回commute。

Useful links 入面有個postcode checker 可以睇下某一區嘅環境如何，大家可以參考下。

返回目錄

[其十六] 配眼鏡／con

武肺話咁快就已經年半有多。相信唔少巴打絲打都同我一樣每日都望著部電腦moon 望足全日。經過左年幾唔係用電腦做嘢就係打機嘅生活，我嘅近視同散光又深左。加上每日都要消毒副眼鏡，本身戴緊副眼鏡都已經花曬。所以最近終於的起心肝去Specsavers 配過副新眼鏡。頭幾年係英國我都習慣係暑假返香港嘅時候係配埋先返黎。不過自從係Specsavers 配過之後就無再返過香港配。一黎係英國配啲視光師會驗得仔細過香港，二黎價錢都唔係真係差好遠。

係英國驗眼係要事先book 嘅，唔係好似香港咁walk in 就得。係Specsavers 驗眼係25 鎊，如果做埋佢嗰OCT test（加10 鎊）就可以check 埋你對眼有無咩隠疾。因為我屋企有糖尿病病史，所以我今次就加錢做左，不過呢個test 其實配眼鏡係無關係，所以大家可以自己選擇。我兩年幾前都無呢個test，所以應該都係新嘢黎。

有唔少人係可以有NHS 資助，驗眼唔駛俾錢。係眼鏡舖俾錢之前佢會俾個list 你睇下你有無得free （詳見https://www.specsavers.co.uk/glasses/nhs-eye-test）。

驗眼過程其實同香港都大同小異，唯一唔同嘅就係視光師會問你好多同眼睛健康有關嘅問題，同埋多左第二part 個slit lamp exam睇下你有無眼疾。Slit lamp exam個視光師（Optometrist）會用強光照你對眼，都有少少唔舒服，不過一兩分鐘就做完，大家請咬緊牙關。

大致流程（太detailed 嘅唔講）：

 第一part（熱氣球，明嘅就明）

第二part（Slit lamp exam，香港無嘅）

第三part（check 度數同散光）

驗完眼之後佢就會print 張卡寫低你嘅度數（prescription），然後就帶你去揀眼鏡。不過其實你唔即刻落決定，如果你搵唔到啱你嘅框你甚至可以去拎住你嗰度數去其他眼鏡舖配（Specsavers 依家無左Ray-Ban，明明以前重有）。

由於依家疫情重未完，所以試眼鏡時佢會俾個tray 你，你試過嘅所有眼鏡都要放入個tray 到，然後俾佢拎去消毒完先會放返上個架到。

當你揀好左之後，視光師就會問你有無咩特別要求，例如要薄鏡片、防UV 之類。值得一提嘅係，Specsavers 係無防藍光鏡片，因為原來目前係無足夠證據證明防藍光鏡片係可以護眼（詳見Specsavers 網頁https://www.specsavers.co.uk/glasses/glasses-lenses/do-blue-light-glasses-work）。就算係薄鏡片都會有唔同level，佢會用部iPad 話你知你個度數用左咩level 會輕左幾多percent。

（我最後揀左超薄Ultimate thin，輕左８成）

當你confirm 曬啲要求，佢就會幫你度你兩隻眼嘅瞳孔距離，根據個視光師嘅講法就係令你睇嘢最清嗰點match 返副眼鏡最清嗰點。度曬所有嘢之後就俾錢同埋book 日子拎眼鏡。

（個價目表同部iPad要開口問個視光師影，少老尷）

我今次要等十日先有得拎，但係上一次配好似幾日就得，我估都係因為疫情影響。到攞眼鏡嗰日就都係幫你微調下副眼鏡就搞掂。

最後我副眼鏡嘅price breakdown:

驗眼 = £25

OCT = £10

名牌框 = £149

Ultimate thin + light lenses = 105-55 = £50

防UV = £15

Total = £249

Glossary:

近視 = Short-sightedness/myopia

遠視 = Long-sightedness/hyperopia

散光 = Astigmatism

老花 = Presbyopia

青光眼 = Glaucoma

白內障 = Cataract

呀~巴打（#2286）：

配con我都係第一次

行入去眼鏡舖（貪方便入咗Asda），話配con

佢就同我book期驗眼，收£3X預一個禮拜

驗眼預半粒鐘，驗完佢會度身訂造

又預多兩個禮拜，到貨就教我戴

即棄£40左右

成個過程同喺香港嘅專業視光師一樣，好C服

返回目錄

[其十七] 英國貨幣/交易知識

一。        100p = £1

二。        £0.01 = 1p = one-p → p for penny
        £0.02 = 2p = two-p → p for pence，p唔駛plural (‘ps’)
        £1 = a/one pound

        £2 = two pounds
        £1.05 = one pound-five-p
        £2.05 = two-pound-five-p  → pound 唔駛plural
        £2.50 = two-fifty   → pound 及p 可省略
        £10.05 = ten-pound-five-p(ence)
        £10.50 = ten-fifty 或者 ten-pound-fifty
        £10.55 = ten-pound-fifty-five
        £15.20 = fifteen-pound-twenty

        £20.50 = twenty pound-fifty
        £100.05 = a/one-hundred-pound-and-five-p

Pence 係幾正式嘅叫法，好少人會講，大家都係簡稱p

三。£5 紙幣（note）俗稱fiver，£10 紙幣俗稱tenner。用法可以參考https://dictionary.cambridge.org/dictionary/english/tenner。Quid （無plural）即係解pound(s)，同樣係口語。 用法可以參考https://dictionary.cambridge.org/dictionary/english/quid。

四。50 鎊紙係市面上唔流通，我手頭上都無，所以唯有key 張網上圖片頂住先。如果大家係香港唱英鎊過黎，好可能係收到一疊50 鎊紙。雖然市面上無英國人會用50 鎊，但係大部分嘅商舖都會收50 鎊紙。不過我建議大家俾錢前可以問定對方收唔收50 鎊紙以示禮貌。如果大家申請到銀行戶口可以直接入曬入銀行，唔駛煩。

五。英國嘅「紙」幣係幾年前已經全部換曬做膠幣（pun intended），「紙」幣係市面上已經唔會再見到。另外，英國除左Bank of England 之外重有其他發鈔銀行e.g. Bank of Scotland，所以唔同地區嘅紙幣設計可能會有唔同，但係全英國都通用嘅。英國嘅硬幣even 同一面值都可以有唔同嘅設計，係得一面永遠都係事頭婆個樣，大家見到個硬幣有一面唔同唔駛怕自己收到假錢。

六。係英國嘅所有銀行嘅ATM 都係互通，意思係我拎住A 銀行嘅卡係可以用B 銀行出面嘅ATM 提款而唔收手續費。唔收手續費嘅ATM 係會大大隻字寫明Free cash withdrawal，有少部分嘅ATM 係會收錢e.g. Club 嘅ATM 或者某啲私人便利店嘅ATM，佢地全部都會有寫明收幾多錢。除左銀行外，所有超市（門口無入面都會有）、火車站同油站都有Free ATM。

七。英國嘅Contactless debit card limit 目前係 £100 per transaction，過左個額就要插卡再入pin。如果係餐廳俾錢，部機可能會係入pin 前問你俾唔俾tips（gratuity）。禁個「clear 」掣就可以decline，禁個「enter」掣再打個銀碼就可以俾tips，然後加個tips 係個total 銀碼到。大家入pin 前要check 清楚，唔好俾左四位數英鎊嘅tips。

八。由於疫情關係，有啲巴士係唔收cash，只可以用contactless 或者電話app 買車飛。唔少超市嘅自助收銀機都只收card payment。

九。英國習慣用debit card 俾錢，每個銀行戶口都會有一張，用嘅時候唔駛手續費。應該同香港嘅tap and go 一樣，不過我無用過tap and go 所以都唔肯定。

十。上網買嘢時俾錢會俾你揀張卡係Visa Debit 定Visa Credit，敬請留意。

十一。3 for 2 同3 for £2 係唔同。3 for 2 係指買二送一（Buy 2 get 1 free, 兩件嘅價錢買三件貨品），3 for £2 係指三件貨品賣兩鎊。

返回目錄

[其十八] 揸車／學車 （in progress）

我嗰陣學車就30 鎊一個鐘，如果連book 10 個鐘就28 鎊。

如果係學自動波會貴過棍波。

唔同城市學車會有唔同價錢，所以大家要自己格下價。

筆試全世界都係用呢個app，要俾少少錢：

https://play.google.com/store/apps/details?id=uk.co.tso.ctt。Google 同Apple 都有呢個app。

因為佢係官方出，又有mcq 又有hazard perception 嘅practice questions

我考筆試嗰日有三分一都係佢question bank 到做過[sosad]

我無睇過佢Study 嗰part，只係用一兩晚做佢個question bank 就一take 過pass

師傅最好搵individual tutor https://www.gov.uk/find-driving-schools-and-lessons，大公司識唔少人用過都話伏。

如果大家book theory test book 唔到啱心水嘅時間同地區，又唔介意洗少少錢，可以俾18 鎊買呢個autobook service：https://driving-test-cancellations-now.co.uk/。你只要係官網是但book 一個好遠嘅time slot（地區無所謂）做placeholder ，然後join 呢個service，再download 佢個app，佢就會幫你mon 住你心水嘅time slot 同地區，一有人cancel 自己個driving test booking 個app 就會自動幫你book。我自己實測好好彩第二日朝早就autobook 個心水時間。不過假設你唔好彩幾個月都book 唔到，你可以係placeholder driving test 個time slot 最遲三日前向政府攞full refund，然後再用個app 再試多次。

般若波羅蜜多故 巴打（#79987）：

Here's a rough break down of getting your licence:

Provisional Licence £50

Theory test practice software £7

Theory test £31

Driving Lessons (40 hours @ £23/hour) £920

Practical test £62

TOTAL £1070

7年前Reddit 資料 可能有出入

Oh.cock 巴打（#415146）：

•Provisional Licence網上申請係£34，郵寄都只係£43

•Theory test practice software 唔洗£7，可以買£4.99嘅Driving Theory Test 4 in 1 Kit

•Theory test 係£23

•Driving Lessons 一般係£30-40 per hour

蝗在做豬在看 巴打（#36138）：

發覺英國渣車既 cost同香港差唔多

油價：英國無油卡，香港有油卡，每L油計返差唔多（香港用油卡入柴油仲平過英國）

牌費：英國平，香港好L貴

保險：英國好L貴，香港平

泊車：英國住house 唔駛錢，相等香港住村屋都唔駛錢。住flat/apartment 唔一定有車位。入到city d shopping centre應該英國貴過香港。

返回目錄

[其十九] 睇電視＆TV Licence

英國嘅BBC Channel 係國營電視台。由於佢係唔會播任何商業廣告，所以佢要靠收稅黎回本，而政府收稅嘅方式就係訂立「睇電視牌」。係英國睇電視係要每年買TV Licence。只要你會用電視／電腦／電話／tablet／機頂盒等器材：

• 睇Live 嘅電視或者錄影Live 嘅節目（ITV Hub, All 4, YouTube, Amazon Prime Video, Now TV, Sky Go, etc.）
• 下載／睇任何BBC iPlayer 有嘅programmes

你就要買TV Licence。一間屋只需要買一個Licence —— 注意係一間屋而唔係一個家庭。雖然佢個網係講 ‘You only need one TV Licence per household’，但係假設你同父母分開住，就算你未結婚都好你同父母都要各自買一個Licence。如果係同人share 屋住嘅話，以我所知就只需要夾一個Licence。換言之個Licence 係跟個地址而唔係跟個人。係呢篇文寫緊嘅時候（2021年8月），彩色電視嘅 TV Licence 係 £159 一年，而黑白電視係£53.50 一年（如果你有興趣嘅話）。大家自行上佢個網https://www.tvlicensing.co.uk/ 俾錢就得。

如果你係好似我咁只係睇Netflix 同Youtube 嘅話係唔駛買TV Licence ，不過大家都係要上佢個網整返個No Licence Needed declaration https://www.tvlicensing.co.uk/check-if-you-need-one/topics/telling-us-you-dont-need-a-tv-licence。以我所知政府係會抽樣派人上門調查，不過佢地係無權係未經你許可嘅情況下入屋檢查。不過大家黎到英國就請做返個守法公民，唔好貪嗰少少便宜。

如果你只係睇BBC 嘅話一般嘅Smart TV 都可以用內置嘅BBC iPlayer 睇。如果要睇其他台，就要再向電視公司買好似香港有線嗰啲機頂盒俾月費睇。目前嘅電視公司主要有ITV、Channel 4、Sky、BT 等。係英國同有線電視一樣，啲公司會一次過做曬電視、broadband 同landline 電話服務，有啲重有埋手機sim card。通常上網同電視會係一個package 咁買會平啲，而以我所知唔同城市又好似會有唔同收費，所以大家要自己上返各間公司嘅官網check 返自己嗰區嘅offers。

順帶一提，係英國睇電視同係戲院睇戲default 係無字幕。電視嘅話就要開accessibility set 返俾聽障人士用嘅字幕功能，電影嘅話會有少量場次有英文字幕，但係啲時間通常都好差，大家買戲飛入場前記住要睇清楚。

返回目錄

[其二十。雜談] 淺談英國賭博業

講左咁多英國嘅好嘢，係時候要講下英國嘅衰嘢啦。英國生活就算幾唔錯，始終都係有佢嘅黑暗面。雖然我都只係略知一二，自己亦都無參與其中，但係都可以分享下我知道嘅嘢。今次就由黃賭毒之中嘅賭開始。

英國嘅賭博行業我會主要分做Casino（賭場）、Bookies（投注站）、Bingo 同其他（例如六合彩、FOBTs 等）。

Casino 就聽聞無咩特別，我自己其實都無去過。年齡限制以我所知就係18 歲。聽聞好多大陸留學生或者有啲超有錢嘅香港留學生會成日去賭，最癲聽過有人一輸輸左成年嘅大學學費，計返港紙係十幾廿萬。近年除左實體嘅賭場，重多左好多online casino，大家係YouTube 啲廣告都可能見過咩888 Casino 嗰啲。

Bookies 係幾有英國特色嘅嘢黎。Bookies 即係Bookmakers 嘅簡稱，又稱Betting shop，簡單啲講就係投注站。係香港就只有賽馬會一間獨市，而係英國就有好多唔同嘅私營博彩公司。如果大家聽過Netflix 有套劇叫做Peaky Blinders，就會知道個黑社會本身係做Illegal bookies，即係做外圍嘅莊。大家初初黎到英國可能都會好奇係街成日見到嘅Ladbrokes、Betfred、Coral、William Hill 係咩黎，答案就係全部都係Bookies 黎。係呢啲Bookies 係乜柒都可以賭，由基本嘅賭波賭馬到凱特王妃生仔定生女同埋美國總統大選邊個嬴都有得賭。

Peaky Blinders 劇照

除左呢啲「基本」嘢，英國嘅Bookies 重有好多一部部所謂嘅FOBTs，全寫係Fixed odds betting terminals，簡單啲講就係賭場入面嗰啲老虎機咁，不過除左老虎機重有其他遊戲e.g. 廿一點、輪盤等。你每次行過呢啲Bookies 都會見到入面啲機前面坐住啲中年人，佢地真係可以係部機前面坐足全日，最多係去廁所、食飯同企係門口煲煙先離開個位，然後賭到間舖關門先走，情況好似香港冒險樂園入面玩推銀機啲啊婆咁。呢班人係中左好深賭癮，其實好悲哀，分別只係推銀機只係少少錢同埋起碼有禮物換，老虎機係可以玩到人傾家蕩產。順帶一提，係英國嘅Pubs 入面都會見到啲啊叔企係部機前面行屍走肉咁入錢、禁掣、入錢、禁掣、入錢... 嗰啲都係FOBTs 或者係就咁老虎機（叫Fruits machine/fruity，美式就係Slot machine）。

Pub 入面嘅Fruities

Bookies 入面嘅FOBTs

Bingo 大家都可能玩過，而係英國Bingo 基本上係老人家嘅活動黎。係英國全國每個城市都有間Mecca Bingo，呢個就係英國專營Bingo 嘅場所。每逢Weekend 啲老人家就會約埋三五知己一齊去玩Bingo，所以你會見到好多一部部鬼佬電動輪椅（Mobility scooters）好似Mario Kart 咁駛入去Mecca Bingo。比起其他賭博，Bingo 只係小賭怡情。

英國嘅六合彩（Lottery）係大部份超級市場都有得買，係佢啲Stand 到拎張紙劃number，然後就去收銀俾錢。個收銀拎左你張紙Scan 入電腦之後就會Print 張電腦飛俾你，萬一你中左獎就係拎張電腦飛去攞獎，所以千祈唔好唔見，同埋要係張飛後面寫翻你個全名同埋地址。Lottery 有好多唔同嘅玩法，最大路嘅就係Lotto，同香港一樣係劃六個number （1-59），Jackpot 大約係幾百萬鎊，最大亦都係最難中嘅就係Euromillions，要劃五個number （1-50）再加兩個兩個特別號碼（1-12），Jackpot 大約係千幾二千萬鎊，中左係會上新聞嗰種。呢啲其實都係俾大家買個一夜致富嘅希望，俾大家享受下準備對number 前嘅adrenaline rush 同埋對number 後嘅失落感，說穿了就係大家夾錢幫其中一個幸運兒圓夢。

最後，如果大家發現自己有賭博成癮，可以係以下搵到唔同嘅求助方法 https://www.nhs.uk/live-well/healthy-body/gambling-addiction/，希望大家無需要用到啦。黎到英國無咩世藝有好多唔同嘅選擇，去下唔同嘅博物館、古堡、公園行下都已經一日，就算唔去做Gym 都可以出街跑下步或者買部單車返黎踩下。賭錢老套講句真係倒錢落海，大家唔好咁傻豬，而已經上左癮嘅都唔好怕柒，要積極求助。

返回目錄

[其廿一] 清潔用品牌子推介

大家初黎到英國未必認識本地嘅清潔用品。以下係我多年係英國Trial and error 試曬咁多種牌子得出嘅結論，等大家唔駛浪費金錢買啲唔等駛嘅product。以下嘅牌子大部分都可以係超級市場搵到，如果無嘅會標明邊到有得買。

以下產品係細間嘅超市好似Tesco Express 同Sainsbury Local 嗰啲未必有，要搵啲大間少少嘅買。

廚房

2. 洗碗sponge

Marigold

原因：雖然佢貴過其他牌子唔少，但係佢好耐用，一個頂到其他牌子幾個。加上佢有粗嗰一面係可以用係易潔鑊都唔會整花，連鋼絲scourers 都唔駛買（鋼絲只可以用係不鏽鋼上，易潔鑊係花梗）。

3. 手套（gloves）

Marigold

原因：同佢啲sponge 一樣，雖然貴過其他牌子，但係耐用到一對頂到其他牌子幾對，好耐先會穿。

4. 洗潔精（Washing up liquid）

Fairy liquid （任何一隻味）

原因：去油能力公認最強。我prefer Original 係因為真係無味，唔會影響嘢食嘅味道。基本上佢係Common 到英國人係以Fairy liquid 黎做洗潔精嘅代名詞。

5. 洗碗碟機Tablet（Dishwasher tablet）

Fairy （任何一隻味）

原因：去油能力夠強，洗碗碟機都會好乾淨（雖然我無用過其他牌子）。用法係開一次機用一粒，係個洗碗碟機門上個槽放粒tablet 入去然後冚埋佢，開左機之後個槽會自動打開嗰冚。

6. 洗碗碟機rinse aid（Rinse aid）

Finish（任何一隻味）

原因：英國啲水主要係硬水，用左Rinse aid 之後啲碗碟唔會有水漬。你唔駛每次開機都Refill，當部機要Refill 嘅時候就會有盞燈提示你。你下次開機前

係個洗碗碟機門上個槽倒入去然後冚埋佢就得。一枝可以用好耐。

7. 洗碗碟機專用鹽（Dishwasher salt）

Finish

原因：英國啲水主要係硬水，用左Dishwasher salt 可以令啲水變軟，除左啲碗碟乾淨啲重可以防止部機有水垢（limescale）形成，塞住啲去水。同Rinse aid 一樣，部機唔夠Dishwasher salt 會有盞燈提示你。詳情請參考https://www.which.co.uk/reviews/dishwashers/article/dishwasher-salt-and-rinse-aid-explained-aW38b7q5rD0X。

8. 不鏽鋼（stainless steel）清潔劑

 Barkeepers Friend Power Cream

原因：去漬能力特強。啲不鏽鋼煲嗰底燶左用呢隻嘢加個Cheap sponge 一陣就甩曬，好似新嘅一樣。除左不鏽鋼煲，重可以用係鋅盤或者廁所入面嘅不鏽鋼上面嘅頑固水垢。除左不鏽鋼爐頭之外，我重試過用係焗爐（oven）同電陶爐（ceremic cooktop）上面嘅燶左嘅嘢一樣得。一般嘅surface cleanser 係完全無料到。不過用係爐頭嘅時候記住要等個爐頭凍左先，同埋落左啲Cream 之後可能要搵嘢刮一刮。大家用嘅時候記住帶手套，同埋啲煲用完之後一定要過水過得乾淨。

9. 水煲去水垢（Kettle descaler）

（理論上咩牌子都無分別）

原因：我自己只係用過Wilko 牌，可以去到頑固嘅水垢。不過如果水垢唔太多嘅話其實落半個檸檬煲熱啲水浸佢一晚都已經好work。

廁所

10. 屎坑屎漬／浴缸／洗手盤清潔／拖地：漂白水（Bleach）

 （理論上咩牌子都無分別）

原因：又平又勁，好過啲潔廁得之類嘅牌子，浴缸／洗手盤／拖地自己開稀1:49 就得。

General

11. 一般廚房枱面／廁所清潔劑（Surface cleanser）

滴露 Dettol

原因：夠平又乾淨，又唔駛過水。不過我自己都係習慣過一過水。

12. 一般水垢清潔

 Cif Pro Formula

原因：鋅盤同廁所（水龍頭同花灑）都用得，唔駛過水，同埋唔駛下下用Barkeepers Friend 咁強勁同咁貴。花灑如果太多水垢可以拆出黎搵嘢浸e.g. 上面Wilko 嗰隻descaler。

呢枝嘢好似改左名做Cif Perfect Finish，不過成份應該一樣。

13. 抺玻璃

Marigold

原因：一抺就抺走到啲水漬，唔駛落抺玻璃水，無限次使用。

14. 通渠水

 HG （五金舖／B&Q／Amazon UK 有售）

原因：試過其他牌子係得呢隻有用，廚房廁所水渠都用得。

15. 洗衫波波（washing capsule/pods）

Ariel

原因：Detergent 黎講個人覺得最乾淨係佢。

16. 火酒（Rubbing alcohol/ surgical spirits）

 Cunea （Amazon UK 有售）

原因：最平應該就係佢，自己買個噴壺開稀做70% 就得。如果要清潔電子零件就唔駛開稀。

Isopropanol = Isopropyl alcohol = propan-2-ol = rubbing alcohol

https://www.amazon.co.uk/Rubbing-Alcohol-Isopropyl-Isopropanol-Cleaning/dp/B07DXD9DCM/ref=sr_1_3_sspa?dchild=1&keywords=rubbing%2Balcohol&qid=1629407338&sr=8-3-spons&spLa=ZW5jcnlwdGVkUXVhbGlmaWVyPUEyNDhDNkFEV1pUNDcyJmVuY3J5cHRlZElkPUEwNTQyNjIzM09JOEZQNDNNVlNUNiZlbmNyeXB0ZWRBZElkPUEwMzI3OTAwMVpPNjNYTkMySU1IMiZ3aWRnZXROYW1lPXNwX2F0ZiZhY3Rpb249Y2xpY2tSZWRpcmVjdCZkb05vdExvZ0NsaWNrPXRydWU&th=1

返回目錄

[其廿二] 英國辦公室文化（持續更新）

基於個人原因，其實我都好少留係辦公室。不過以下係我知道嘅英國辦公室文化，如果大家有唔同嘅睇法或者經驗歡迎係連登留言補充。

一。英國嘅同事關係話親密又唔算親密，話疏離又唔算疏離。我見過friend 過打band 嘅又有，搞小圈子杯新人嘅又有，所以其實都好睇彩數。不過整體嘅環境感覺上無香港咁惡性競爭。

二。香港人入到去英國嘅辦公室要做好心理準備難融入。講真，大家係香港office 黎左個鬼佬／鬼婆同事，都唔會夠膽主動approach 佢啦。更何況香港人差勁都識Hello how are you 幾句雞腸，英國人係100％ 唔識廣東話。新入職嘅時候係自我介紹嘅黃金機會，只要你肯講啲英國佬都唔會唔so 你。但係一過左頭個幾日，大家就會越黎越老尷，到時要融入就會越黎越難。如果你係大城市返工，對方都可能有其他華人同事，如果係細城市嘅話你有可能係佢第一個華人同事，所以請大家主動出擊去break the ice！啲鬼佬自我介紹有時會圍埋一齊輪流自我介紹，有啲會加個短短嘅ice breaker，例如要每個人講自己最鍾意嘅電影、最想去旅行嘅地方之類，呢啲用一兩句簡短回答就得，同人地問你how are you 一樣千祈唔好長篇大論咁回覆人。

三。食Lunch 方面，英國人大部分都係自己pack lunch，一返到office 就去茶水間放入雪櫃，Lunch 再叮黎食。少部分人會出去買外賣或者去超市買meal deals （三文治＋薯片／生果＋樽裝飲品），真係搵餐廳坐低食嘅好少。我見嘅大部分office 都係去茶水間食，食完就坐係到吹水玩電話，坐到開工先慢慢返位。

四。英國人好撚鍾意飲茶／咖啡。佢地嘅tea 其實即係我地嘅奶茶。通常一個人去茶水間沖杯嘢拎返位飲，多數都會禮貌上問埋附近同事或者上司駛唔駛沖埋佢地嗰份。如果關係疏嘅或者係同level 就多數話唔駛或者自己黎，如果係高級啲或者熟嘅就有機會真係順便叫你沖埋。如果對方想你沖埋，就記住問埋對方要幾多奶同糖。Office 嘅雪櫃多數有無限量嘅奶，櫥櫃會有無限量嘅tea bag/coffee 同佢地嘅decaff 版，初入職時記住問下點夾錢。

五。鬼佬放左工有時會一齊食飯或者落pub 飲杯嘢，係英國係正常社交黎，唔係香港嗰啲食仔食女嘅pub。佢地有時重會有pub quiz。Pub quiz 係有個主持負責問啲好似百萬富翁咁嘅問題，然後每張枱就分做一隊，搵張紙一齊寫低答案，最後再一齊對答案。呢啲只係娛樂性質，多數係無獎問答遊戲，唔識答都無所謂，唔好偷用手機google 出cheat 咁認真。

六。英國人返工一定要準時，放工都會好準時，好少見人會OT。佢地五點收工就真係五點停，即刻執嘢走，好少好似香港咁鬥OT。當然可能其他工種會唔同啦，最少我見到嘅就好少呢個情況出現。

七。英國啲office 嘅IT 設備同infrastructure 多數好舊同好慢，同埋英國人人均嘅IT 水平係好低，講緊開Projector 都有困難嗰種，大家請有定心理準備做埋IT support。

八。英國法例上請假頭一個星期係唔駛病假紙（self certification），只要同老細單聲就得。長過一個星期嘅就要睇GP R 病假紙。如果因為各種原因（例如受傷、疾病、大肚等）要拎輕工／病假紙（fit note）都係睇GP 拎。詳細請睇https://www.gov.uk/government/publications/the-fit-note-a-guide-for-patients-and-employees/the-fit-note-guidance-for-patients-and-employees。

暫時諗到嘅就得咁多，有咩要補充嘅會再更新。

返回目錄

[其廿三] 英國郵政（Royal mail? Post office?）

大家啱啱黎到英國應該要申請好多嘢，例如National Insurance Number 或者車牌，當中應該成日要寄信或者收信。呢一篇就係俾大家理解英國嘅郵政係點玩。

呢一篇會分做以下四part：

一。簡介

二。服務

三。收費方式

四。流程

五。其他私營速遞服務

返回目錄

[廿三。一] 簡介

要理解英國嘅郵政，大家首先要分清楚Royal Mail 同Post Office 嘅分別。Royal Mail 同Post Office 其實係兩間公司黎。簡單啲講，Royal mail 就係郵差同速遞（back end），Post Office 就係間郵局本身（front end）。不過其實講咁多對我地用家黎講其實無分別，你去post office 寄信，佢會交俾Royal Mail 送信。

當初我過黎英國嘅時候，英國大部分嘅郵局都係獨立一間branch。近年可能因為要慳錢，所以Post Office 好多分行已經消失左，唔少都變左寄生係啲便利店或者WHSmith 呢間書局／文具舖到。大家要寄信就行入啲藍色嘅WHSmith 最入面就會搵到紅色嘅Post Office，如果係便利店入面就係返正常俾錢個收銀到搞就得。

英國寄信除左聖誕外都好準時，同埋好少出事寄失。不過一踏入十二月，全英國都會準備寄聖誕卡或者禮物，所以大家係十二月寄嘢一定要預鬆啲時間，起碼俾多一個禮拜時間走棧。

返回[其廿三]

[廿三。二] 服務

Royal Mail 嘅服務有分寄信同寄一般parcel，寄大件嘅parcel 係由Royal Mail 旗下嘅Parcelforce 負責。

Post office 除左俾你去寄信之外最重要嘅功能就係return parcel。當係英國網上購物之後想refund，間公司（e.g. Amazon UK、ASOS）會俾幾個方法你還返個parcel，而最大路、最方便同免費嘅方法就係落郵局還。當你係間公司到揀左經Post office refund，個網就會自動generate 個return label 俾你。你自己print 出黎痴係個parcel 上面就可以拎落郵局個counter 到，個staff 收左你個parcel 就可以拍拍蘿友走人，一蚊都唔駛俾。除此之外，Post office 重有搞啲finance、換外幣之類其他business。除左信封、郵票同紙箱呢啲郵寄用品之外，有啲郵局重會有聖誕卡、零食、ID photo booth 等等，我見過最誇張嘅係有雜貨賣。係Post Office 官網可以搵到你附近嘅郵局同埋各自有咩服務https://www.postoffice.co.uk/branch-finder。

Royal Mail 有mail redirect 嘅服務，俾大家搬左屋但係有重要文件要收嘅時候e.g. National Insurance Number 都可以係新地址到收。不過我自己就無用過，詳情請自己上官網搵https://www.royalmail.com/personal/receiving-mail/redirection。

返回[其廿三]

[廿三。三] 收費方式

除左一般平郵係可以自己用郵票放入郵筒寄之外，其餘嘅郵遞都係要親身落郵局一轉。要親身落郵局嘅郵遞服務可以直接係郵局俾埋錢，又或者自己上Royal Mail 官網搵返相應嘅服務俾錢，然後自己print 個label 痴落件郵件到，再拎落Post Office drop off 件郵件。不過大家初黎報到，應該大膽啲自己去郵局試下去寄，順便練下英文。

寄信同一般parcel (small/medium) 就係由收Royal Mail 價，過左個size 或者30 kg 嘅就係收Parcelforce 價。

Royal Mail 收費方法五花百門，新手未必知道點玩法。以下係我整理過後嘅list（直至2021 年9 月），方便大家參考。

Royal Mail (UK)

*1st class 基本上都係next working day + Sat, 2nd class 就3 日到。

Source:

• https://www.royalmail.com/sending/uk
• https://www.royalmail.com/sites/royalmail.com/files/2021-03/royal-mail-our-prices-april-2021.pdf （直至2021 年9 月，請自行goole 搵update）

心得：

• 1st class 同2nd class 價錢其實差幾十p，所以識買一定買1st class
• UK Guaranteed 9am 貴到痴線，亦都係overkill。其實Tracked 24® 都已經好夠做
• 寄重要文件e.g. 證件唔好慳嗰少少錢，請用Tracked and signed 俾多幾鎊買個安心。係英國補領任何證件都好貴，唔好因小失大。

  ---

Royal Mail (International)

*香港嘅Pricing zone 係World Zone 1，唔同Pricing zone 嘅價錢同Time frame 會有唔同，請自行去下面Source 嘅link 2 查看。

Source:

• https://www.royalmail.com/sending/international
• https://www.royalmail.com/sending/international/country-guides#world-zones

心得：

• 我未寄過Economy，不過Standard 同Economy 其實好似差幾十p，所以兩者之間我建議揀Standard
• Tracked and signed 同Tracked 之間又係差幾十p，所以俾得Signed 就唔差在Tracked 埋
• Time frame 聖誕以外嘅時間都好準，佢話5-7 working days 多數十日內真係到香港
• 寄國際parcel 或者信入面唔可以有電池，拆到電嘅記住要拆。我試過想寄張聖誕卡返香港，但係因為張卡係會發聲所以有粒電芯係入面，佢問起嗰時我又照直講，結果佢唔俾我寄。

Parcelforce (UK)

Source:

• https://www.parcelforce.com/sending-parcel/parcel-delivery

• https://www.royalmail.com/sites/royalmail.com/files/2021-03/royal-mail-our-prices-april-2021.pdf （直至2021 年9 月，請自行goole 搵update）

心得：

• 無心得，我未試過用Parcelforce

返回[其廿三]

[廿三。四] 流程

寄信或者parcel 嘅話可以用自助機或者去counter 搞，但係部機都幾難用，因為啲選擇太多，所以我建議排去Counter 算。

去到個counter 你同個staff 講你想寄parcel 或者寄信去本地或者ＸＸ國家，佢就會叫你放個郵件上個電子鎊。鎊完重佢就會收你個郵件去度size。度完之後佢就會問你想用咩方法寄，咁你咪答佢e.g. Tracked 24，然後就俾錢走人。如果係寄internatinal parcel 嘅，係俾錢前佢會要你填張form 申報入面件嘢係咩黎同大約嘅銀碼。如果過左某個銀碼（唔太清楚個數字），對方收件時可能要交少少稅，詳情請自己問個staff。

如果你係有俾錢tracking 嘅話，你俾完錢後佢會印個tracking number 俾你上Royal Mail 官網check。我建議大家拎到即刻用電話影低，咁就唔怕唔見。

如果你係好似我咁習慣去到先買信封，請先去自助機或者counter 俾左個信封嘅錢先再用個信封。郵局嘅信封有埋膠紙封個信封，不過唔係間間郵局都有筆借，同埋如果你寄parcel 要封箱嘅話佢唔會借膠紙俾你，要你自己買。所以去郵局寄嘢最好自備文具，唔係就要即場買。

返回[其廿三]

[廿三。五] 其他私營速遞服務

如果送黎果陣無人係屋企，多數個速遞員一係係你屋口搵地方收埋，一係就搵你neighbour 代收，然後係你信箱攝張紙話你知點搵個parcel，呢個係common practice 黎。

Royal mail 嘅話就會穏陣啲，除非你指明用以上嘅方法，唔係嘅話多數會試下redelivery，都唔得就要你出郵局自己攞。

返回[其廿三]

返回目錄

[其廿四。雜談] 'You are one of us'

（以下所有對話都係我盡可能意譯做中文，希望唔會太詞不達意）

難得天氣好有陽光，前幾日去左海邊城市吹下海風。有日心情好落左海灘行下順便食嘢，我搵左張長櫈坐低之後就開左我盒Scampi and chips 出黎食（Scampi 係某種細蝦黎，係fish and chips 嘅alternative ）。

食食下有個呀婆同個女人拖住個小妹妹問我張櫈有無人，我就答佢隨便坐啦，我只係自己一個人。然後佢地三個就坐係長櫈嘅另一邊開始食佢地嘅雪糕。

我份人最鍾意就係搭嗲，見佢地食得咁開心，就提佢地要小心啲海鷗，因為啲海鷗前一日搶走我成盤海鮮，渣都無得淨。佢地就答我話啲海鷗係咁衰㗎啦，成日搶人嘢食。佢地見我主動R 水吹，又問返我係過黎玩定係係到住。咁我就答返佢過左黎英國差唔多十年啦，不過黎呢個城市就係玩下㗎啫。

母女： 我：

母女：如果你唔介意我問嘅話，咁你本身係邊到黎㗎？

我：我本身係來自香港嘅

母女：咁你打算將來都留係英國定會返去香港？

我：老閪都唔返香港啦

母女：（面容煞有介事）點解呀？係咪因為香港前排發生嘅事？

我：梗係啦，香港依家俾中國搞到咁嘅樣，全香港都諗緊點走佬啦，我重點敢返去？

母女：（表情無咁緊張）唉，我都知㗎啦，我有睇BBC 新聞，知道香港依家俾中國搞到鷄毛鴨血

我：你地都知？老實講，我好驚訝好多英國人咁了解香港發生過咩事！

母女：係呀，好多英國人都好同情香港㗎。我呀婆當年係睇電視見到英國交返中國嗰陣重係到屌曬鬼，話做咩要俾返香港中國呀

我：可能聽落好諷刺，但係我諗香港大概係英國唯一嘅殖民地係寧願自己繼續係殖民地

母女：

母女：咁你以後就唔好返去啦，係英國你有自由，你想講咩都可以

我：好多謝你地咁接納我地，坦白講我當初都好怕會引起英國人反彈

母女：點會反彈？You are one of us，我地當然歡迎！

呢個時候，個孫女終於食曬杯雪糕。兩母女就幫個孫女抹手，然後就拍一拍我膊頭同我講：「好啦，我地出發啦！Nice chat，你都玩得開心啲！Have a nice day！」我同佢地道別之後佢地就行左落沙灘玩，剩低我一個望住個海係到清埋盒嘢。

嗰日盒Scampi and chips 大概係我一生食過最好味嘅一盒Scampi and chips。

返回目錄

[其廿五] 英國詐騙手法

今日我瞓完晏覺之後發現部電話收到呢個text message。Spoiler alert: 呢個係一個詐騙message （phishing）黎。大家睇下圖入面有邊到有可疑？

我將真嘅銀行message （右）同假嘅（左）放埋一齊比較，等大家容易啲睇得出有咩唔同

(1)。真嘅銀行text message 係唔會直接show 佢嘅電話Number 俾你。右圖入面可以見到佢個sender 係直出SANTANDER，而我係無save 過佢嘅電話號碼落電話簿。

(2)。真嘅銀行text message 係會包括埋你嘅bank account number 嘅最後四位數字黎證明個message 係真嘅，而左邊詐騙message 係無。

(3)。我未收過真嘅銀行text message 係有可以click 入去嘅超連結。如果有咩事銀行都會叫你去分行或者用自己嘅電話app 之類。左邊詐騙message 入面嘅網址都明顯好可疑。真嘅Santander 網址係https://www.santander.co.uk/，大家有任何懷疑可以自己上Google 查證。

(4)。我收過嘅真嘅銀行text message 都係單向send message 俾我，我係無得回覆。左邊詐騙message 係有得回覆。

我收到詐騙message 之後即刻用自己嘅銀行app check，check 完之後確認左根本就無詐騙message 入面所講嘅transaction，而我gmail 都無收到來自Santander 嘅通知。跟住我就向Santander 同https://www.actionfraud.police.uk/report-phishing report 左。

我身邊嘅朋友都收過少量詐騙電話或者message，聽過唔少都係扮車保公司話你架車俾人撞到（而當時我係同個朋友係坐係架車入面）。不過扮銀行phishing 就真係第一次見。大家下次收到所有類似嘅message 記住停一停，諗一諗，唔好做碌撚。

返回目錄

[其廿六] 無printer 但係又要print 嘢，點算？（in progress）

Print 文件

一。Rymans

https://www.ryman.co.uk/print-shop

二。政府圖書館

1. ソープランド 巴打（#390224）:
   網上join圖書館member，落圖書館印一張黑白20p/彩色50p左右，仲有得找錢唔使自己唱散銀，你可以上番自己區council睇，但註冊完一定要screen cap/抄低member id，佢唔會sd mail再confirm你。
   
   我網上join圖書館嘅過程：
   
   join online-->accept
   
   
   填資料-->continue
   
   
   最尾應該會出congratulations, your member id is xxxxxxxxxx咁樣

曬相

一。Boots

https://www.boots.com/photo/photo-printing

二。Timpson （好似只做photo gifts）

https://www.timpson.co.uk/services/personalised-photo-gifts

返回目錄

[其廿七。雜談] Bonfire night

Remember, remember the Fifth of November,

The Gunpowder Treason and Plot,

I know of no reason

Why the Gunpowder Treason

Should ever be forgot.

Guy Fawkes, Guy Fawkes, t’was his intent

To blow up the King and Parli’ment.

Three-score barrels of powder below

To prove old England’s overthrow;

By God’s providence he was catch’d

With a dark lantern and burning match.

Holla boys, Holla boys, let the bells ring.

Holloa boys, holloa boys, God save the King!

And what should we do with him? Burn him!

相信係英國嘅大家可能幾日前已經開始聽到周圍都有人放煙花嘅聲音。每年十一月五號係bonfire night，亦即係Guy Fawkes Night。係1605 年嘅今日，有一班叫做The Gunpowers 嘅天主教徒密謀燒左英國嘅House of Lords（英國國會嘅上議院），打算燒死當時嘅新教國王。當年嘅行動係以失敗告終，Guy Fawkes 亦都係同日被捕，然後係翌年嘅一月被處決。由嗰時開始，英國每年嘅十一月五號就會起篝火慶祝行動嘅失敗，亦都會同以上首童謠所講一樣，燃燒Guy Fawkes 嘅假人。

時至今日，Bonfire night 本身嘅其實已經消失左。大家只係搵個理由出黎睇下煙花，食下Toffee apple，飲下酒咁。但係身為香港人，到左十一月五號心情都會五味雜陳。事關有一套好出名嘅戲嘅男主角借用左Guy Fawkes 嘅樣做左個面具，呢位男主角帶住偶遇嘅女主角係未來嘅英國反抗新法西斯政權 北方之火（Norsefire）。雖然最後男主角不幸死左，但係佢成功激起全英國嘅反抗之心，係十一月五號一齊上街抗爭，並且成功燒毀英國嘅國會大樓。呢一套戲嘅戲名就係《V for Vendetta》。

可惜故事畢竟只係故事，現實中嘅Guy Fawkes 無男主角V 嘅超能力，亦都係燒唔到英國嘅國會大樓。但願獨在異鄉嘅我地都繼續無忘每年嘅十一月五號。

[其廿八] 英國過冬需知（in progress） 

一。氣候

二。禦寒衣物

三。暖氣

四。交通

五。儲糧

返回目錄

[廿八。一] 氣候

英國嘅冬季大約係十一月頭到二月尾或者三月頭。入冬之後英國就會進入冬令時間，日照時間會顯著變短，晏晝三點開始天黑都唔出奇。大家如果要揸車出入或者踩單車就要小心， 揸車嘅要睇清楚路上的行人同埋單車，踩單車嘅要著好反光衣同埋開前後燈（白燈係前燈紅燈係後燈）。唔少人就連跑步都會帶條反光帶或者著反光衣保護自己，過馬路時就唔無咁易俾啲盲毛撞到。

大家應該都感受到入咗冬之後明顯落多咗雨，同時又大風咗。咁係因為英國嘅雨季係喺冬天，所以濕凍其實唔係香港獨有。因為橫風橫雨嘅緣故，縮骨遮多數都會頂唔順，大風起上黎買一把就爛一把，所以大家一係要有件防水外套或者一把士的遮（M&S 嘅遮鋼水幾好，雖然有少少貴，印像中要25 鎊一把）。不過雖然成日落雨，但係因為室內有開暖氣，所以皮膚好容易乾燥，有濕疹嘅巴打記住要用搽多啲lotion 保濕。

當到咗十二月尾到一月頭氣溫降到接近零度嘅時候就會開始落雪。 不過英國始終唔同加拿大， 除非你係郊外啲嘅地方或者英國北部， 否則好少可會積到雪，夜晚落嘅雪第日朝早就會溶雪。 有時如果日夜溫差大嘅話仲有機會落冰雹，重要都幾common 下。我見過咁多次落冰雹多數都係一厘米樓下，唔會扑得死人，係有啲痛咁解。

返回[其廿七]

[廿八。二] 禦寒衣物

喺英國生活最緊要係入面著得薄，中間著得厚，最出要防水。入面著得薄嘅原因係英國大部分的室內地方都有暖氣，入咗室內之後你除曬啲褸就得。當你出返室外嘅時候就要靠中間嗰層黎保暖。喺我當初過嚟英國嘅時候，羽絨係英國仲未普及，所以香港人著羽絨出街有時會有啲異相。不過近年英國人都開始著羽絨或者人造羽絨，所以大家可以放心著出街。不過因為英國會落雨或者落雪，所以最愛一定要笠一層防水嘅外套，如果唔係你中間嗰層羽絨濕咗水就唔保暖。

返回[其廿七]

[廿八。三] 暖氣

記得啱啱開始有BNO 移民嘅時候，連登有巴打出post 投訴啱啱入秋嘅時候Airbnb host 唔俾日頭開heating。之前都有巴打問過我關於暖氣嘅玩法， 我想藉住呢篇文教大家理解下係英國應該點樣用暖氣。

英國嘅暖氣分三部分， 分別係boiler、thermostat （恆溫計） 同埋暖管。簡單啲講， 當恆溫計發現室內溫度低過你自訂嘅溫度， 就會叫個boiler 開始煲水，然後將啲熱水泵入牆身或者地下嘅暖管。因為boiler 係行煤氣，所以煤氣費到咗冬天就會好貴。英國家居嘅boiler 都有分幾種，大家請參考呢個網：https://www.which.co.uk/reviews/boilers/article/buying-a-new-boiler/what-are-the-different-types-of-boiler-a0Fpc4I2M9Fk

英國人習慣喺日頭唔開暖氣或者開好細暖氣。撇除Airbnb 個host 想慳錢，重可能因為以下三個原因：

一。朝早有日照，本身已經無咁凍（英國日夜溫差可以差十五到二十度）

二。朝早到下午間屋多數無人，無需要開暖氣

三。本身英國起樓有做隔熱，所以只要入夜開始開到凌晨，啲暖氣係間屋就夠捱到第二日朝早

啲鬼佬多數早瞓，而瞓著左其實本身冚著被已經好夠暖，所以多數鬼佬過左凌晨就會關暖氣，啲暖氣捱到一晚到第二日朝早。我自己就會浪費同怕凍啲，係朝早起身前一個鐘會開定暖氣，到出門口就會關，直到下午返到屋企返到屋企先會再開。同埋因為我自己一個住，為咗慳煤氣費，我係Argos 買咗張電熱氈，咁就唔使打暧曬成間屋。有啲鬼佬連朝早起身都唔駛開暖氣，冬天真係由四五點入夜開到晚上十一點就關。

講返Airbnb 嗰個post，我覺得好可能個樓主啱啱黎到未習慣英國嘅溫度。除非你係Scotland 或者英國北部嘅郊外，係入秋同啱啱入冬嘅時候室外朝早都有十五到十八度，咁室內唔開暖氣都會有十八至二十度。呢個室內暖度的確未過一般英國人thermostat 個溫度。以下係我係秋季weekend 長期係屋企時個thermostat 嘅setting（到左冬天我就會較高一度）：

我以前個舊款thermostat 個溫度計可能唔準，所以就算好凍同埋個timer 有開都唔識自己去恆溫。依家我用左個Hive smart thermostat 一黎準左，二黎可以用電話開關，出左街唔記得關都可以遙距關左個暖氣，慳左好多gas 錢

By the way 英國人自細已經習慣冬天唔開窗去慳暖氣，所以佢地好頂得下焗，唔駛通風。香港人黎到要習慣都唔容易。

返回[其廿七]

[廿八。四] 交通

當到咗十二月尾開始有機會落雪嘅時候大家出門就要開始小心。當雪融咗做水然後再結冰嘅時候會形成所謂嘅Black ice，即係一層薄到肉眼睇唔到嘅冰，留意唔到就咁行上去嘅話包保你會仆街。有時無落grit salt 嘅路面就算之前冇落雪，朝早嘅露水已經足以形成Black ice。所以到咗落雪嘅季節除咗揸車要小心揸慢啲， 行路都要金睛火眼唔好睇電話， 更加盡量唔好踩單車出門口。正如之前交通篇所講，雖然大部分嘅馬路、單車徑同行人路都會有落grit salt 預防結冰，但係有時會有漏網之魚無落grit salt。踩單車嘅你物理上係好難刹車同轉唔到彎，結果一定係會炒車。就算係搭公共交通工具，因為路面狀況嘅關係，巴士同火車基本上一定會遲到甚至脫班，而的士係前一晚已經會俾人book 曬。如果大家要朝早出門口，記住前一晚係BBC 天文台睇定第二日嘅天氣再做好準備，如果落雪或者地面有機會結冰嘅時候就要比平時預多啲時間出門口。

Book train

呀~

#2286

咪以為落雪好過癮！見今日個個都去睇初雪玩雪，但對司機嚟講一定係痛苦。

一見到架車四邊窗都結晒霜，唔剷晒佢根本開唔到車。

所以開車前要預一段時間剷雪兼warm up架車。

有人會落除雪劑，但聽聞唔環保，所以自己拎起個剷仔剷雪；又有人貪方便搵張信用卡刮雪，各適其式啦！

用熱水兜頭淋架車都有，不過水費煤氣費貴自己衡量。

不過好似唔好用熱水淋㗎車，啲玻璃凍左一晚急速膨脹會爆

我個鬼仔friend 會一起身就去撻著架車開暖氣，然後先入返屋刷牙洗面食早餐，到出發時啲雪都溶到七七八八。

COYpyd

#376020

同埋如果架車要泊一段長時間，最好將嗰兩條水撥屈起，咁會避免條水撥黐住擋風玻璃啲冰。

返回[其廿七]

[廿八。五] 儲糧

英國人好重視聖誕同埋新年，呢啲日子一定係同屋企人過。基本上由廿四號平安夜到廿六號Boxing day、除夕同埋新年全英國幾乎停擺咁濟。好多交通工具都會唔開，超級市場又唔開，餐廳（even 中餐館）都唔會開。 大家唔好諗住好似香港咁假日出街食飯或者叫外賣，我好肯定咁話畀你知呢幾日英國都係死城咁。 所以大家要係呢啲大日子之前幾日儲定糧喺雪櫃，好多超級市場廿三號開始已經會早收，所以大家記住唔好拖到最後一刻先去買餸，唔識煮嘢食嘅就買定幾日嘅外賣放入雪櫃，又或者趁呢個機會學下煮啲基本嘢食。

返回[其廿七]

返回目錄

Miscellaneous

2. ソープランド 巴打（#390224）:
   Your COVID test result can be provided as:
   - a printed document
   - an email or text message you can show on your phone
   Source: https://www.gov.uk/guidance/coronavirus-covid-19-testing-for-people-travelling-to-england#where-to-take-your-test
3. 因為英國比起香港實在太大，真正tech savvy 會自己砌機嘅人好少，所以好難咁集中有個地方賣電子零件，以我所知都係上網買

Mirror 巴打（#38633）:

我係喺一個telegram group見到呢set links, 要多謝一位阿Sam, 我只係慷他人之慨
https://www.overclockers.co.uk/
https://www.novatech.co.uk/
https://www.scan.co.uk/
https://www.aria.co.uk/
https://pricespy.co.uk/computers-accessories/computer-components--c1243
https://pangoly.com/en/
https://uk.pcpartpicker.com/

返回目錄

Useful links

1. 華人教會資料 （by 大桐世界 巴打（#75064））:
   https://church.oursweb.net/saddress.php?s=%e8%8b%b1%e5%9c%8b

2. 90後BNO單人移民攻略 （by 海鮮拼盤 巴打（#243707））:
   https://lih.kg/2683904

3. Mobile and broadband checker (postcode required)
   https://checker.ofcom.org.uk/

4. 城市Postcode checker (postcode required)
   https://fryford.github.io/imdmap/
   

5. 廚職背遊 梁芷靈BackpaCooking YouTube Channel
   https://www.youtube.com/channel/UCDufxgd5cAYCS61ed8lcA-Q

6. 搵某地址嘅postcode
   https://www.royalmail.com/find-a-postcode

返回目錄

Toolbox

、「」

------------------------

請前往以下Google doc 重溫舊文archive: [url]shorturl.at/kuDKO[/url]

[red]此金剛棒請勿quote／回覆 ，有咩問請直接留comment[/red]

巴打我Copy 左你呢個comment 落個document ([其XX] XXXXXX)

已落Reference  #sorry#cow

XXX 巴打（#XXX）：

XXX

一。所有新出嘅文連同Google doc 嘅link都會置頂#hoho#

二。舊嘅Topic 如果有update 會係Google doc 嘅patch notes 寫明，歡迎定期返去check 下#cn#

三。請唔好問／討論關於投資嘅嘢，如有投資問題請移玉步去財經台#pointing#pig

四。如果係關於稅務或者某某行業嘅歡迎照問，但係我九成都係唔識答[sosad]，不過有好多巴打會樂意解答#it0#dog

五。如果有問題好急又或者好耐都無人答嘅，歡迎留言提一提我，我會pin 你嘅問題係最頂等大家優先回答#yup#

六。所有我出嘅長文請勿quote／回覆 ，有咩問請直接留comment

七。所有我出嘅長文請勿quote／回覆 ，有咩問請直接留comment

八。所有我出嘅長文請勿quote／回覆 ，有咩問請直接留comment

英國生活雜談/攻略/你問我答 (含資料整合) (8)

小弟已移居英國七年有多，打算係休息時間分享下自己嘅個人經歷同睇法

大家有咩可以係到問，答到嘅我會盡答，但係唔擔保一定啱，大家有咩唔同意請指正，亦都歡迎大家代答#adore#

有私人問題可以留底tg，但係[b][u]請確保自己嘅privacy setting 唔會洩露自己個人資料e.g. 電話number[/u][/b]

同埋有關我個人私隱一概唔會答

請注意呢個Post 係[b][u]無[/u][/b]開tg group 嘅

--------------

[b][red]請前往以下Google doc 重溫舊文archive: [url]shorturl.at/kuDKO[/url][/red][/b]

以下係目前已cover 嘅大topic，[red][b]係發問前不妨睇下有無cover 過[/b][/red]#it1#dog：

[size=2][quote][其一。雜談] 英國人係咪真係識分香港人同中國人？英國人會唔會歧視香港人？

[其二] 英國生活文化、dos and don'ts及融入貼士（持續更新）

[其二。離題] 出街食攻略

[其三] 英國點睇醫生？

[其四] 交通篇

[其五] 垃圾分類

[其六] 日常Small talk

[其七] 轉錢黎英國

[其八] 買傢俬／傢俱／家電／家品

[其九] 有圖慎入！英國常見pest

[其十] 租屋

[其十一] 家居保安

[其十二。雜談] 深夜隨筆

[其十三] 搵工相關問題

[其十四] 衣食住等唔同品牌一覽

[其十五] XXX 城市好唔好住？

[其十六] 配眼鏡／con

[其十七] 英國貨幣/交易知識

[其十八] 揸車／學車 （in progress）

[其十九] 睇電視＆TV Licence

[其二十。雜談] 淺談英國賭博業

[其廿一] 清潔用品牌子推介

[其廿二] 英國辦公室文化（持續更新）

[其廿三] 英國郵政（Royal mail? Post office?）

[其廿四。雜談] 'You are one of us'

[其廿五] 英國詐騙手法

[其廿六] 無printer 但係又要print 嘢，點算？（in progress）

[其廿七。雜談] Bonfire night

[其廿八] 英國過冬需知（in progress）

Miscellaneous

Useful links[/quote][/size=2]

[img]https://na.cx/i/bDekNB7.png[/img]

Between 大家唔駛怕入左個Google document 會俾我起到底，因為Google 會幫你匿名#hoho#

--------------

Post 1: [url]https://lihkg.com/thread/2487148/page/1[/url]

Post 2: [url]https://lihkg.com/thread/2503782/page/1[/url]

Post 3: [url]https://lihkg.com/thread/2621699/page/1[/url]

Post 4: [url]https://lihkg.com/thread/2665778/page/1[/url]

Post 5: [url]https://lihkg.com/thread/2693398/page/1[/url]

Post 6: [url]https://lihkg.com/thread/2728282/page/1[/url]

Post 7: [url]https://lihkg.com/thread/2787963/page/1[/url]

To-do list

買電器黎英國: router, laptop, rice cooker

花園e.g. 剪草

OTC drug list

移民帶啲咩

水電煤公司+維修

硬水

返回目錄