إزاي تتعلم اللغة الإنجليزية♥️✔️
خطة كاملة من A to Z 🌿
أولًا: تحديد مستواك في اللغة
وتقدر تحدد مستواك في اللغة بطريقة من الطرق دي:
- عن طريق الاختبار السريع اللي بتقدمه EF SET
- اختبار مستوى اللغة الإنجليزية المجاني المقدم من British Council
- اختبار dulduolingo english test
دي خطوة ضرورية جدًا؛ لإنك هتبدأ من المستوى بتاعك ✔️👌
ثانيًا: اختيار منهج مناسب
بصراحة ملقتش منهج منظم ومرتب أكتر من منهج Z American English إني أنتظم وأتعلم منه.
حابة أديك شوية نصايح لو دا منهجك برضو:
✔️ حمل التطبيق وتابع منه لإن التطببق بيقيس تقدمك وكمان بيختبرك بعد كل درس.
✔️ يفضل تطبع الملفات اللي فيها تفريغ الحلقات لإن دي هتسهل عليك جدًا مذاكرتك ومراجعتك، أنا عشان أوفر وقت أكتر أشتريت الكتب. الملفات متجمعة هنا
✔️ راجع اللي ذاكرته أول بأول عشان متنساش.
ثالثًا: نمي مهاراتك في اللغة
هل المنهج اللي هتبعه وهذاكر منه هيكون كافي للمذاكرة سواء اخترت Z Amirican English أو غيره؟
من وجهة نظري اللي ممكن حد يقتنع بيها أو يعترض عليها، فالمنهج عبارة عن دليل بيعرفك إزاي تتعلم، بيوريك إزاي تستخدم الكلمات في الجمل وإزاي تقرأ وإزاي تكتب ولكن أنت محتاج اللي أكتر من كدا اللي هو الممارسة المستمرة والتعرض للغة بأكثر من شكل..
لذلك إجابتي على السؤال دا هي: إن المنهجية بتحميك من التشتت وبتعرفك وصلت لفين ولكن مش هتكون كافية وهتحتاج معاها شوية حاجات تانية🧚
رابعًا: إزاي تنمي مهارة القراءة عندك
🌿 هتخصص وقت للقراءة بشكل يومي وهتستخدم التطبيق الرائع istoria
التطبيق دا هيخليك:
- هستمتع وأنت بتقرأ عن طريق إن بيعرض عليك قصص ممتعة.
- التطبيق مقسم مستويات، وبكدا هتضمن إنك هتقرأ نصوص حسب مستواك
- التطبيق أثناء القراءة أي كلمة مش عارفها ممكن تضغط عليها وهيترجمها ليك وينطقها كمان وكمان ممكن تسمع النص صوت وأنت بتقرأه.
وبكدا اضمن لك إن مهارة القراءة هتتظبط جدًا عندك👌
خامسًا: إزاي أنمي مهارة الإستماع
هنخصص وقت لتنمية مهارة الاستماع وبشوف من أفضل التطبيقات اللي ممكن تستخدمها هو تطبيق voscreen
✔️ تطبيق voscreen بيعرضلك فيديوهات قصيرة وبيختبر بيها مهارة الأستماع عندك وبيدربك على السماع بطريقة صحيحة فهيفيدك جدًا
✔ ممكن تسمع بودكاست وكمان فيه قناة على اليوتيوب اسمها listening Time ممتازة جدًا وفيها فيديوهات كتيير تناسب مستواك وهتساعدك تنمي مهارة الأستماع جدًا
سادسًا: تنمية مهارة التحدث 👄
دي المهارة اللي كله بيقف عائق قدامها ومش بيكون عارف يطورها إزاي؟!
أنا جيبالك كذا حل عشان متحترش 🙅♀️
✔️ تطبيق English conversation تطبيق أكتر من رائع وفيه مزايا ممتازة هتساعدك في ممارسة اللغة بكل سهولة
✔️ تاني حل: إنك تستخدم الذكاء الإصطناعي، آه والله ذيمبقولك كدا ( الذكاء الإصطناعي دلوقتي بقى بيتيح ميزة التحدث بالصوت) فهتنزل chat gpt وتفتح التحدث بالصوت وتقوله
Can you help me learn English and have
a conversation with me?
بعدها هيسألك عن مستواك وحابب تتكلم في موضوع أي؟ وتبدأ رحلتك في التحدث مع chat gpt😂
✔️ تطبيق Falou هيساعدك في التحدث برضو وتكوين جمل
سابعًا: تنمية مهارة الكتابة
ودي مهارة مهمة جدًا فمتهملهاش وأنصحك بالمصادر دي للتدرب عليها:
- موقع Write &improve with Cambridge
- موقع daily dictation دا موقع ممتاز بيدربك على السمع والكتابة بطريقة الإملاء
- موقع Grammarly دا بيصححلك أي خطأ في كتابتك
- لو مفيش أي حاجة من اللي فاتوا كانت مناسبة ليك ممكن تطلب من الذكاء الإصطناعي يديلك تدريبات لممارسة الكتابة باللغة الإنجليزية وهو مش هيقصر معاك
ثامنًا: جدول التعلم
الخطة دي لمدة ساعة واحدة يوميًا، عشان لو حد مشغول جدًا يقدر ينفذها، ولكن اللي قادر يضاعف المدة دي ممكن يخليها ساعتين يوميًا ويضاعف المدة المحددة لكل مهارة.
ولكن حابة أنصحك نصيحة ( قليل دائم خير من كثير متقطع) وإن الإستمرارية أفضل كتيير 🌿✔️
تابعوني لو عايزين خطط أكتر ونصابح